September

Bifor Abraham and Isaac go ap long datfala maunten, hem sei long olketa wakaman bilong hem: “Iufala stap long hia witim donkey bilong iumi, bat mi and son bilong mi bae go long there and baodaon long God and then kam bak long iufala.” (Gen. 22:5) Hao nao Abraham talem datfala toktok? Abraham savve hem bae go for sakrifaesim Isaac, so waswe, hem laea long olketa wakaman bilong hem taem hem sei tufala bae kam bak? Nomoa. Bible sei Abraham savve Jehovah savve mekem Isaac for laef bak. (Heb. 11:19) Abraham savve Jehovah mekem hem fit for garem pikinini, nomata hem and Sarah tufala olo finis. (Heb. 11:11, 12, 18) So hem luksavve no eni samting hem hard long Jehovah. Abraham no savve wanem nao bae happen long datfala day. Bat from hem garem faith, hem savve Jehovah fit for mekem son bilong hem for laef bak, mekem evri promis wea God talem for kamap tru. Dastawe Bible sei Abraham hem “dadi bilong evriwan wea garem faith.”—Rome 4:11. w16.02 1:3, 13

Jonathan and pipol long Israel feisim wanfala hard samting. King Saul, wea hem dadi bilong Jonathan, hem no obeyim Jehovah and Jehovah rejectim hem. (1 Sam. 15:17-23) Nomata olsem, God letem Saul for gohed rul for staka year. So hem no isi for olketa Israelite faithful long God taem king wea Jehovah chusim hem duim olketa rabis samting. (1 Chron. 29:23) Nomata olsem, Jonathan, son bilong Saul, gohed faithful long Jehovah. Iumi tu savve showimaot iumi faithful long Jehovah taem iumi obeyim olketa wea rul long taem hem fitim. Jehovah letem “olketa wea rul” for rulim iumi, and hem laekem iumi for respectim olketa. (Rome 13:1, 2) Dastawe iumi shud respectim olketa bigman bilong gavman nomata long taem wea olketa no honest and no duim stret samting. Tru tumas, iumi shud respectim evriwan wea Jehovah givim paoa long olketa.—1 Cor. 11:3; Heb. 13:17. w16.02 3:5, 6, 8

Bible sei evri pipol bilong Jehovah, nomata olketa young wan tu, bae “willing” for worshipim hem. So eniwan wea laek for baptaes mas barava sure hem samting wea hemseleva laek for duim. Sapos iu laek for baptaes, iu shud ting raonem why nao iu laek duim datwan, especially sapos iu growap long truth. Taem iu growap, maet iu lukim staka pipol baptaes. Maet samfala hem olketa fren bilong iu or really brata or sista bilong iu. Bat iu shud no tingse iu mas baptaes bikos iu kasem age wea olketa narawan savve baptaes, or iu lukim staka narawan baptaes finis. Wanem nao bae helpem iu for garem tingting bilong Jehovah abaotem baptism? Ting raonem why hem barava important for baptaes. w16.03 1:11, 12

Iumi teachim Bible long pipol wea interest long truth. Bat for duim datfala waka, iumi mas “waka gud tugeta” witim olketa narawan long kongregeson. (Eph. 4:16) Iumi mas organize gud for duim preaching waka mekem iumi savve preach long staka pipol. Long olketa meeting, iumi kasem direction wea helpem iumi for duim datfala waka. Bihaen iumi hipap long grup for field service, iumi go storyim gud nius abaotem Kingdom long pipol. Iumi offerim tu olketa Bible pablikeson. Iumi givimaot finis plande million pablikeson long pipol evriwea long world. Samfala taem iumi garem olketa spesol preaching campaign. Taem iu duim datfala waka, iu wan mind witim plande million brata and sista evriwea long world wea preachim tu datfala gud nius! Iu waka tu witim olketa angel wea helpem pipol bilong God for preachim gud nius.—Rev. 14:6. w16.03 3:4, 5

Luk olsem olketa scroll hia bae explainim wanem Jehovah laekem iumi olketa man for duim long datfala taem. Wei for studyim olketa scroll hia bae helpem evriwan, and olketa wea laef bak tu, for savve long wanem God laekem olketa for duim. Olketa scroll hia bae helpem iumi for savve long staka nara samting abaotem tingting bilong Jehovah. And tu, from iumi bae minim gud Bible, long Paradaes bae iumi showimaot love and respect for each other. (Isa. 26:9) Jesus Christ, wea hem King, bae helpem iumi for lanem staka samting and for teachim olketa narawan. Sapos iumi followim olketa instruction wea “stap insaed long olketa scroll” and iumi gohed faithful long Jehovah long lastfala test, hem bae raetem nem bilong iumi insaed long “scroll bilong laef.” Iumi savve laef olowe! w16.03 4:19, 20

Olketa brata wea elder for longtaem finis sei hem barava important for trainim olketa brata taem olketa young yet, maet taem olketa just kamap teenager. Iu savve givim olketa samfala waka long kongregeson wea olketa fit for duim. Sapos olketa brata kasem training taem olketa young yet, datwan bae helpem olketa for gohed strong long spiritual wei nomata taem olketa start for big and staka samting long world savve pullim tingting bilong olketa. (Ps. 71:17) Sapos elder laek for encouragem brata for duim samfala waka moa long kongregeson, hem important for no just talem hem nomoa wanem for duim. Elder mas talem hem reason why hem shud duim datwan. Olsem example, Jesus, wea hem datfala Nambawan Teacher, hem talem olketa aposol for preach. Bat firstaem hem talem olketa reason why olketa shud obeyim hem. Hem sei: “God givim paoa long mi ovarem evri samting long heven and earth. So iufala go and teachim pipol long evri kantri for kamap disaepol bilong mi.”—Matt. 28:18, 19. w15 4/15 2:5, 6

Long first century, olketa Christian wea stap long Rome laef bilong olketa stap long danger. Olketa long Rome barava spoelem olketa long datfala taem. Olketa sei olketa Christian nao startim wanfala big fire long Rome, and sei olketa Christian heitim nara pipol. Long taem wea olketa nogud samting hia happen, olketa putim aposol Paul long prison long Rome. Maet Paul tingse olketa brata and sista bae no helpem hem, bikos olketa no helpem hem long taem wea hem stap long prison bifor. (2 Tim. 4:16) Bat Jesus nao helpem hem long datfala taem. Hem sure Jehovah bae helpem and strongim hem for no givap long disfala mek-tu taem wea hem go long prison, and long eni hard samting wea maet kasem hem bihaen. Hem barava sure long diswan, dastawe hem sei: “Lord bae sevem mi from evri nogud samting.” (2 Tim. 4:18) Paul barava sure Jehovah and Jesus bae evritaem helpem hem, nomata maet samfala taem olketa Christian no fit for helpem hem. w15 4/15 4:1-3

Taem Jesus hem born, Satan savve taem hem big hem nao bae kamap Messiah wea God promisim. Waswe, Satan tingse hem nogud samting tumas for killim dae wanfala pikinini? Nomoa. Hem no warim sapos hem duim nogud samting. And hem kwiktaem for duim samting for trae killim dae Jesus taem hem pikinini yet. Wanem nao hem duim? Taem olketa man wea lukluk long olketa star talem King Herod hao “king bilong olketa Jew” hem born, Herod hem barava kros and laek for killim dae datfala baby. (Matt. 2:1-3, 13) So hem givim komand for killim dae evri boy wea tu year or wea no kasem tu year yet long Bethlehem, and olketa nara ples long datfala area. (Matt. 2:13-18) Jesus no dae long datfala taem, bat wanem nao iumi lanem abaotem Satan from datwan? Satan no warim laef bilong eniwan, nomata laef bilong olketa pikinini tu. Satan hem “wanfala lion wea singaot big.” (1 Pet. 5:8) Iumi mas no forget, Satan hem barava raf and no kea long eniwan! w15 5/15 1:10, 12, 13

Jehovah givim iumi wanfala nambawan present. Hem nao wei wea iumi savve piksarem long mind bilong iumi olketa samting wea iumi no lukim yet. From iumi savve duim diswan, iumi fit for luk forward long olketa gud samting, planim samting firstaem, and duim samting for misstim olketa problem. Jehovah savve wanem nao bae happen long future, and hem talem iumi samfala samting wea iumi savve luk forward long hem. Nomata iumi no lukim yet olketa samting hia, iumi savve piksarem long mind bilong iumi and datwan helpem iumi for garem faith. (2 Cor. 4:18) Olsem example, Hannah, mami bilong Samuel, piksarem long mind bilong hem wanfala samting wea bae happen. Hem gohed for ting raonem taem wea hem bae tekem Samuel go long tabernacle for waka witim olketa priest. Hannah hem sure diswan bae happen bikos hem samting wea hem disaed finis for duim. So wei wea hem ting raonem datwan hem encouragem hem for duim wanem hem promisim long Jehovah. (1 Sam. 1:22) Taem iumi piksarem long mind bilong iumi olketa samting wea Jehovah promisim, iumi piksarem samting wea iumi sure bae happen. (2 Pet. 1:19-21) Masbi staka wea worshipim Jehovah bifor ting raonem olketa samting wea God promisim. w15 5/15 3:1-3

Bible sei tu for iumi mas waka hard for duim wanem Jehovah laekem and no tingting abaotem wei for kamap rich. Jesus sei man hem krangge sapos hem hipimap olketa riches for hemseleva, bat hem “nating tingim God.” (Luke 12:16-21) Taem iumi hipimap “riches long heven” long wei for duim wanem Jehovah laekem, iumi mekem hem hapi, and iumi tu bae hapi. (Matt. 6:20; Prov. 27:11) Wei for fren gud witim Jehovah hem barava important winim eni nara samting. Sapos iumi laek for kamap rich, datwan bae mekem iumi warim staka samting. (Matt. 6:19) Jesus sei olketa wea wari evritaem abaotem selen bae faendem hem hard for Kingdom hem first samting long laef bilong olketa.—Matt. 13:18, 19, 22. w15 5/15 4:15, 16

God givim paoa long Jesus for duim staka nambawan mirakol. Hem no healim pipol wea garem leprosy nomoa bat hem healim pipol wea garem staka difren kaen sik tu. Jesus no need for givim medicine or duim operation long man wea sik for healim hem, bat Jesus savve duim mirakol for finisim datfala sik. Hem savve healim man stretawe, and nomata pipol wea stap farawe from ples wea hem stap, hem savve healim olketa tu. (John 4:46-54) Wanem nao iumi lanem from olketa mirakol hia? Iumi lanem King bilong iumi, Jesus Christ, garem paoa and hem willing for finisim evri difren kaen sik. Taem iumi tingim wanem Jesus duim for pipol wea sik, iumi sure long niu world “hem bae sorre long olketa man nating and olketa wea poor.” (Ps. 72:13) Jesus bae helpem evriwan wea safa bikos hem barava laek for duim datwan. w15 6/15 2:6

Staka pipol savve gud long datfala Lord’s Prea wea stap long Matthew 6:9-13. Taem iumi duim preaching waka, staka taem iumi savve storyim datfala prea for teachim pipol Kingdom bilong God hem wanfala gavman wea bae mekem earth kamap paradaes. Iumi savve storyim tu datfala toktok “mifala laekem nem bilong iu for holy” for teachim pipol God hem garem nem, and iumi mas showimaot iumi laekem datfala nem for holy. (Matt. 6:9) Waswe, taem iumi prea Jesus laekem iumi for repeatim nomoa datfala Lord’s Prea, olsem staka pipol savve duim? Nomoa. Bifor Jesus talem datfala prea, hem sei: “Taem iu prea, no talem sem samting evritaem.” (Matt. 6:7) Long narafala taem wea Jesus teachim olketa disaepol bilong hem hao for prea, hem talem moa datfala prea bat hem no iusim olketa sem word. (Luke 11:1-4) So Jesus talem datfala Lord’s Prea for teachim iumi wanem kaen samting nao iumi mas prea abaotem. w15 6/15 4:1, 2

Jehovah savve givim holy spirit for helpem iumi no foldaon long olketa trik bilong Satan. And tu, Jehovah givim Bible and kongregeson for warnim iumi long olketa samting wea iumi mas stap klia long hem. Olsem example, hem warnim iumi for no spendem staka taem, selen, and strong bilong iumi long olketa samting wea iumi no needim. Espen and Janne duim pioneer waka bifor tufala garem tufala pikinini distaem. Espen sei: “Distaem mifala no savve spendem staka taem long olketa spiritual samting olsem mifala savve duim bifor, so mifala evritaem prea long Jehovah for helpem mifala for no foldaon long eni samting wea savve switim mifala. Mifala askem Jehovah for helpem mifala gohed strong long spiritual wei and long ministry.” Narafala samting wea iumi mas stap klia long hem nao hem wei for lukluk long olketa rabis piksa. Samfala duim datwan from olketa no rejectim dirty tingting. Bat staka brata and sista bilong iumi olketa no foldaon long disfala test, and iumi tu savve olsem olketa.—1 Cor. 10:13. w15 6/15 5:15, 16

Wanem nao bae happen bihaen olketa false religion finis? Iumi bae garem chance for showimaot iumi barava trustim Jehovah. Long datfala taem, staka pipol bae trae for kasem protection and help from olketa organization bilong olketa man, wea olsem “olketa bigfala ston long olketa maunten.” Bat pipol bilong Jehovah bae trustim hem for protectim olketa. Long 66 C.E., taem olketa soldia bilong Rome lusim Jerusalem, hem no chance for olketa long Jew religion for change and kamap Christian. Bat hem taem for olketa wea Christian finis for ranawe from Jerusalem, olsem Jesus talem olketa for duim. Olsem tu, bihaen Bigfala Babylon hem finis, iumi shud no tingse eniwan bae change for kamap tru Christian. Bat hem chance for evri tru Christian showimaot olketa lovem Jehovah and for sapotim olketa anointed Christian.—Matt. 25:34-40. w15 7/15 2:7

Olketa wea worshipim Jehovah mas no tingse wanfala ples or kantri hem gud winim nara ples or kantri. Pipol bilong Jehovah olketa garem wan mind. Bat maet famili bilong iu, and olketa wea iu growap witim encouragem iu for tinghae long ples wea iu kam from. So maet samfala taem iu still ting daonem pipol wea kam from narafala kantri, garem difren culture, story long difren languis, or garem difren kala skin. Wanem nao savve helpem iu for stretem tingting bilong iu? Ting raonem wei wea Jehovah heitim wei for mekhae long kantri or wei for tingse samfala pipol gud winim olketa narawan. Duim research abaotem diswan. Then askem Jehovah for helpem iu for garem sem tingting wea hem garem abaotem pipol. (Rome 12:2) From iumi evritaem laek for faithful long Jehovah, samfala taem samfala samting savve kamap wea mekem olketa wea iumi waka witim, olketa skulfren, olketa neiba, and olketa relative bilong iumi luksavve iumi barava difren from olketa. w15 7/15 3:14, 15

Jehovah herem olketa prea bilong iumi, and hem minim feeling bilong iumi nomata maet olketa narawan no minim datwan. From hem ansarem olketa prea bilong iumi, datwan pruvim hem barava lovem iumi. Iumi savve lanem staka samting from olketa prea insaed Bible. Samfala taem, maet hem gud for studyim samfala prea hia long famili worship bilong iu. Taem iumi ting raonem olketa prea bilong pipol bilong God bifor, datwan savve helpem iumi for talem olketa gudfala prea. Olsem example, iu savve studyim prea wea Jonah talem taem hem stap insaed bele bilong bigfala fish. (Jonah 1:17–2:10) Iu savve studyim prea wea Solomon talem from heart bilong hem taem olketa dedicatem temple. (1 Ki. 8:22-53) And iu savve ting raonem datfala Lord’s Prea. (Matt. 6:9-13) And barava important samting nao hem for iumi evritaem prea long God. Sapos iumi duim olsem, “peace bilong God wea winim nao wanem man savve minim bae gaedem heart and tingting bilong [iumi].”—Phil. 4:6, 7. w15 8/15 1:11, 12

Long niu world, bae iumi hapi for followim wanem organization bilong Jehovah talem for mekem disfala earth kamap paradaes, and for teachim olketa wea bae laef bak. Iumi bae garem staka waka for duim. Bat waswe sapos olketa wea leadim iumi askem iumi for duim wanfala samting wea iumi no mas laek for duim? Waswe, bae iumi obey? Waswe, bae iumi traem best for duim gud assignment bilong iumi and enjoyim datwan? Sapos iumi obeyim wanem organization bilong Jehovah talem iumi for duim distaem, datwan bae helpem iumi for mek redi for niu world. Sapos iumi redi for datfala laef long niu world, iumi mas lane for satisfae, obeyim wanem organization bilong Jehovah talem and wan mind witim olketa brata and sista bilong iumi. Olsem example, taem iumi kasem wanfala niu assignment, iumi willing for duim and iumi hapi and satisfae long datwan. Sapos iumi willing for waka tugeta witim olketa wea leadim iumi distaem, long niu world bae iumi duim sem samting tu. w15 8/15 3:6, 7

From Solomon associate witim olketa wea no worshipim Jehovah, datwan mekem hem for lusim Jehovah. (1 Ki. 11:1-6) Sapos datwan happen long King Solomon, hem savve happen long eniwan tu. Diswan hem wanfala warning for eni Christian wea tingting for maritim samwan wea no lovem Jehovah! Waswe sapos samwan hem marit finis bifor hem kam insaed long truth? Bible sei: “Iufala olketa waef mas stap anda long hasband bilong iufala. Then nomata sapos eniwan long olketa no obeyim toktok bilong God, gudfala wei bilong waef nao bae mekem olketa biliv nomata waef no talem eni samting.” (1 Pet. 3:1) Disfala principle hem fitim tu hasband wea waef bilong hem no worshipim Jehovah. Datfala kaonsel bilong Bible hem klia: Hasband or waef mas showimaot gudfala wei insaed long marit, and followim olketa standard bilong God. Taem marit partner bilong iu lukim olketa gudfala wei bilong iu, maet hem tu bae laek for worshipim Jehovah. Datwan hem happen finis long staka Christian. w15 8/15 4:15, 16

Samfala sik distaem maet no garem eni medicine for finisim. So iumi mas careful long samfala medical treatment wea pipol sei hem savve finisim wanfala sik, bat olketa no garem eni pruv long datwan. Paul sei: “Showimaot long evriwan, iufala no ova tumas.” (Phil. 4:5) Man wea balance olsem bae mekem worship nao hem main important samting long laef, no health bilong hem. Sapos health bilong iumi nao hem main samting long laef, maet gogo iumi kamap man wea tingim hemseleva nomoa. (Phil. 2:4) Iumi savve, long disfala world bilong Satan, bae iumi no stap healthy olowe. So main important samting long iumi hem shud wei for worshipim Jehovah. (Phil. 1:10) Iumi wanwan mas disaedem seleva wanem kaen medical treatment nao iumi bae tekem, and acceptim responsibility for wanem iumi disaedem. w15 9/15 2:8, 10

Jehovah hem ‘God wea evritaem talem tru samting.’ (Ps. 31:5) Hem hapi for teachim iumi olketa tru samting abaotem hem and hao nao for iumi worshipim hem. And hem showim iumi wanem iumi savve duim mekem iumi garem gudfala laef. So wanem nao Jehovah teachim iumi wea showimaot hem barava lovem iumi? First samting, Jehovah teachim iumi olketa tru samting abaotem hem. Hem laekem iumi for savve long hem. (Jas. 4:8) Hem talem iumi nem bilong hem. Long Bible, nem bilong God, Jehovah, hem kamap staka taem winim eni nara nem. And tu, Jehovah teachim iumi olketa wei bilong hem. Taem iumi lukim olketa samting wea hem wakem, iumi luksavve hem garem bigfala paoa and hem wise. (Rome 1:20) And taem iumi readim Bible, iumi luksavve hem evritaem duim samting wea stret and hem barava lovem iumi. Taem iumi savve long olketa naesfala wei bilong Jehovah, datwan mekem iumi fren gud witim hem. w15 9/15 4:8, 9

Staka pipol tingse God no interest long wanem olketa duim. And olketa tingse God no wari nomoa sapos nogud samting kasem olketa. Olsem example, bihaen bigfala cyclone spoelem staka ples long Philippines long November 2013, bigman long wanfala big taon sei: “Luk olsem God hem forgetim mifala.” Olketa narawan tingse God no lukim wanem olketa duim. (Isa. 26:10, 11; 3 John 11) Samfala pipol long taem bilong aposol Paul garem semkaen tingting tu. Paul sei: “Olketa no willing for savve long tru samting abaotem God.” Olketa hia “evritaem duim samting wea no stret, duim sin, greedy, and garem nogud wei.” (Rome 1:28, 29) Waswe long iumi? Iumi savve Jehovah lukim evri samting wea iumi duim. Bat waswe, iumi sure Jehovah hem interest long iumi? w15 10/15 1:1-3

Wanfala nambawan wei for showimaot iumi garem faith hem for duim preaching waka. Why nao iumi sei olsem? Bikos taem iumi preach, iumi showimaot iumi barava sure end bilong world hem klosap and “hem bae no leit!” (Hab. 2:3) Samting wea bae helpem iumi for luksavve sapos iumi garem strongfala faith, hem for ting raonem olketa kwestin hia: ‘Waswe, mi duim best bilong mi long preaching waka? Waswe, mi trae for duim samfala samting moa long waka bilong Jehovah?’ (2 Cor. 13:5) Iumi laek for showimaot iumi garem strongfala faith long wei for “iusim mouth bilong [iumi] for talemaot datfala message” abaotem gud nius. (Rome 10:10) Iumi showimaot tu iumi garem faith long Jehovah taem iumi no givap nomata iumi kasem hard taem. Taem iumi sik, feel sorre, wikdaon, poor, or kasem olketa nara problem, iumi mas showimaot iumi trustim Jehovah and Jesus for helpem iumi “taem iumi needim help.” (Heb. 4:16) Iumi showimaot iumi garem faith long Jehovah taem iumi askem hem for helpem iumi. w15 10/15 2:12-14

Bible hem main pablikeson wea iumi shud ting raonem. Bat waswe sapos samting kasem iu and iu no garem Bible? No eniwan savve stopem iu for ting raonem olketa samting wea iu baeheartim finis, olsem olketa favorite scripture bilong iu and olketa Kingdom song. (Acts 16:25) And holy spirit bilong God bae helpem iu for tingim moa olketa samting wea iu lanem finis, and datwan bae helpem iu for gohed faithful. Wanem nao wanfala wei wea iu savve duim Bible reading bilong iu evriday? Distaem nao hem gud for iumi markem taem for readim and ting raonem olketa Bible reading wea kamap evri week. Iumi shud markem taem tu for readim olketa Gospel bilong Matthew, Mark, Luke, and John, and ting raonem olketa samting wea Jesus talem and duim. (Rome 10:17; Heb. 12:2; 1 Pet. 2:21) And tu, iumi garem buk wea storyim olketa samting long laef bilong Jesus followim taem wea olketa samting hia happen. Disfala buk savve helpem iu for kasem gud samting taem iu readim olketa Gospel.—John 14:6. w15 10/15 4:11, 12

Jesus hem olsem boss bilong olketa disaepol, bat hem fren bilong olketa tu. Long taem bilong Bible, wanfala boss bae no storyim tingting and feeling bilong hem long olketa wakaman bilong hem. Bat Jesus no treatim olketa aposol bilong hem olsem olketa wakaman. Hem lovem olketa and spendem taem witim olketa. Hem storyim tingting and feeling bilong hem long olketa, and hem lisin gud taem olketa talemaot tingting and feeling bilong olketa. (Mark 6:30-32) From Jesus and olketa aposol story gud tugeta, olketa fren gud and datwan redyim olketa aposol for waka wea olketa bae duim bihaen. Jesus savve sapos olketa disaepol strong for duim olketa spiritual samting and gohed busy long preaching waka, olketa bae barava hapi. So hem encouragem olketa for duim best bilong olketa long preaching waka, and hem sei hem bae helpem olketa.—Matt. 28:19, 20. w15 11/15 2:3, 5

Love hem main fasin bilong Jehovah God. (1 John 4:16) Jesus Christ hem first wan wea God wakem. Jesus stap witim Dadi bilong hem long heven for staka billion year and hem lanem hao Jehovah hem God wea garem bigfala love. (Col. 1:15) Taem Jesus stap long heven and long earth, hem showimaot semkaen love olsem Jehovah. So iumi barava sure Jehovah and Jesus bae evritaem rul long wei wea showimaot love. Taem wanfala man askem Jesus wanem law nao hem important winim olketa nara law, Jesus sei: “‘Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.’ Disfala law nao first wan, and no eni nara law important winim hem. Nara law wea barava important nao hem: ‘Iu mas lovem narawan long sem wei wea iu lovem iuseleva.’” (Matt. 22:37-39) Hem important for iumi showimaot love long evriwan. Jesus sei iumi mas lovem Jehovah and lovem tu olketa narawan. w15 11/15 4:1-3

Jehovah iusim olketa nara languis tu for story long pipol. Taem olketa Israelite kamap free from Babylon, samfala iusim nao Aramaic languis for story long olketa narawan. Maet hem nao why Daniel, Jeremiah, and Ezra raetem samfala scripture long Aramaic languis. Taem Alexander the Great tekovarem staka ples long world, main languis wea staka pipol iusim hem Greek languis wea olketa kolem Koine. Staka Jew start for story long Greek languis, and gogo olketa transleitim olketa Hebrew Scripture go long Greek languis. Datfala transleison nao olketa kolem Septuagint. Datwan nao hem firstaem for eniwan transleitim Bible, and hem wanfala barava important transleison. Olketa savveman sei 72-fala man nao transleitim Septuagint. Samfala long olketa man hia wea transleitim olketa Hebrew scripture olketa transleitim evri word, bat olketa narawan no duim olsem. Nomata olsem, olketa Jew wea story long Greek languis and olketa Christian bilivim Septuagint hem toktok bilong God. w15 12/15 1:4-6

James sei: “Tongue hem wanfala fire.” (Jas. 3:6) Long datfala scripture, “tongue” hem minim wei wea iumi savve toktok. Olsem fire wea savve spoelem staka samting, toktok bilong iumi savve kosim staka problem. Wanem iumi talem savve barava affectim olketa narawan. Bible sei tu: “Laef or dae savve kamaot from wanem man talem.” (Prov. 18:21) Waswe, datwan minim iumi mas no story nao nogud iumi talem samting wea spoelem narawan? Nomoa. Nomata iumi savve fire savve bonem man, datwan no minim iumi stop nao for iusim fire. Bat iumi savve careful taem iumi iusim fire. Olsem example, iumi savve iusim fire for kukim kaikai, iumi savve sidaon saed long fire taem iumi cold, and iumi iusim olsem laet. Long sem wei tu, sapos iumi kontrolem wanem iumi talem, toktok bilong iumi bae mekhae long Jehovah and encouragem olketa narawan. (Ps. 19:14) Jehovah wakem iumi long wei wea iumi savve storyim long olketa narawan tingting and feeling bilong iumi, or iumi savve iusim saen languis for duim datwan. So iumi laek for talem samting wea bae encouragem olketa narawan.—Jas. 3:9, 10. w15 12/15 3:1-3

Long olketa missionary gogo bilong olketa, masbi Luke helpem Paul and olketa narawan taem olketa sik. (Gal. 4:13) Datwan mekem iumi tingim disfala toktok bilong Jesus: “Pipol wea sik nao need for go lukim doctor.” (Luke 5:31) Luke hem no olsem samfala man wea laek givim advaes saed long health nomata olketa no kasem training. Luke hem wanfala really doctor. Bible no talem wea nao Luke go skul for kamap doctor and long wanem taem nao hem kasem datfala training. Bat Bible sei Paul talem hello bilong Luke for olketa Christian long Colossae. Maet Luke go skul for kamap doctor long wanfala medical skul long Laodicea, wanfala taon wea stap klosap long Colossae. And tu, taem Luke raetem Gospel bilong hem and buk bilong Acts, hem iusim samfala word wea olketa doctor savve iusim. From hem wanfala doctor, hem raetem staka story abaotem taem wea Jesus healim pipol. w15 12/15 4:11, 12

Jehovah givim wanfala present for showimaot hem barava lovem iumi taem hem sendem kam spesol Son bilong hem Jesus long earth! (John 3:16; 1 John 4:9, 10) Aposol Paul sei datwan hem wanfala “nambawan present.” Paul savve evri nambawan promis bilong God bae kamap tru bikos long ransom sakrifaes bilong Jesus. (2 Cor. 1:20) So datfala “nambawan present” hem ransom sakrifaes bilong Jesus, and evri gud samting wea Jehovah hem duim for iumi. Iumi no savve markem datfala present witim eni nara samting. Wanem nao iumi shud duim for showimaot iumi tinghae long datfala present? Waswe, iumi laek for changem samfala wei bilong iumi? Waswe, iumi laek duim samfala samting moa for showimaot love and for kaen long narawan, and willing for forgivim eniwan wea no kaen long iumi? Ransom sakrifaes bilong Christ hem nambawan present from Jehovah.—1 Pet. 3:18. w16.01 2:1, 2, 4, 5

Wanfala Christian wea kasem anointing maet ting olsem, ‘Why nao Jehovah chusim mi?’ Or maet hem ting olsem hem no fit. Nomata olsem, hem barava sure Jehovah chusim hem for go long heven. So hem barava hapi and tinghae long datfala hope. Olketa anointed Christian garem sem feeling olsem Peter wea sei: “Praisem God wea hem Dadi bilong Lord bilong iumi Jesus Christ. From hem showimaot bigfala mercy long iumi hem mekem iumi born moa for iumi savve garem strongfala hope. Iumi savve garem diswan bikos Jesus Christ hem laef bak. Hem mekem iumi born long wanfala laef wea garem reward wea hem promis for givim long iumi. No eni samting savve spoelem reward hia, hem holy, and hem stap for olowe. Hem stap finis long heven for iufala.” (1 Pet. 1:3, 4) Taem olketa anointed Christian readim datfala scripture, olketa barava sure Dadi bilong olketa hem story kam long olketa. w16.01 3:11, 12