November

Taem Bible sei Abraham hem “olo and satisfae” datwan no minim hem no laek for laef bak long future. Bible sei olsem abaotem Abraham: “Hem weitim datfala taon wea garem strongfala faondeson wea God nao planim and buildim.” (Heb. 11:10) Tingim wei wea Abraham bae hapi tumas for laef long Paradaes earth and for gohed strongim wei wea hem fren witim God. Hem bae hapi for savve example bilong hem helpem pipol bilong God for staka thousand year! Long niu world hem bae faendaot datfala sakrifaes wea God talem hem for duim long Maunt Moriah hem piksarem samting wea barava important. (Heb. 11:19) Hem bae faendaot tu, sorre feeling wea hem garem taem hem redi for sakrifaesim son bilong hem Isaac helpem plande million pipol for luksavve long feeling bilong Jehovah taem hem sendem Son bilong hem, Jesus Christ, for givim ransom sakrifaes for olketa man.—John 3:16. w16.02 1:15, 16

Iumi shud faithful long Jehovah nomata sapos wanfala brata wea lead long kongregeson no kaen long iumi from hem minim rong wanem iumi talem or duim. God nao markem Saul for kamap king, bat hem nating kaen long son bilong hem. Saul no minim why nao Jonathan fren gud witim David. So taem Jonathan duim samting for helpem David, Saul barava kros and mek shame long son bilong hem front long staka pipol. Nomata olsem, Jonathan gohed for respectim dadi bilong hem. And hem gohed faithful long Jehovah and David, wea God chusim for kamap nextfala king long Israel. (1 Sam. 20:31-41) Long olketa kongregeson bilong iumi distaem, olketa brata wea lead trae for kaen and duim stret samting long evriwan. Bat olketa brata hia no perfect. So samfala taem, maet olketa no minim why nao iumi talem or duim wanfala samting. (1 Sam. 1:13-17) Sapos samting olsem hem happen long iumi, iumi laek for gohed faithful long Jehovah. w16.02 3:14, 15

Maet samfala young wan no barava savve wanem hem minim for dedicate and hao datwan hem join witim wei for baptaes. Olsem example, maet samfala young wan sei olketa dedicate long Jehovah finis bat olketa no redi yet for baptaes. Waswe, kaen tingting olsem hem stret? Nomoa. Wei for dedicate hem minim long wanfala prea iu promis long Jehovah for worshipim hem for olowe. Then, taem iu baptaes, iu showimaot long olketa narawan iu dedicate finis long Jehovah. So bifor iu baptaes, iu mas savve long wanem hem minim for dedicate long God. Taem iu dedicate long Jehovah, iu givim laef bilong iu long hem. Iu promis hao worship bilong hem bae first samting long laef bilong iu. Taem iu mekem promis olsem long God, hem wanfala serious samting!—Matt. 5:33. w16.03 1:14, 15

Paul sei kongregeson hem olsem wanfala body for helpem olketa Christian luksavve olketa mas wan mind and stap anda long Jesus, wea hem hed long kongregeson. Hem sei full body waka gud tugeta and “olketa join duim gud waka bilong olketa for mekem evri part long body join gud tugeta.” (Eph. 4:16) So nomata iumi young or olo, iumi healthy or nomoa, wanem nao iumi wanwan savve duim for mekem kongregeson wan mind? Jesus markem olketa elder for lukaftarem kongregeson, and hem laekem iumi for respectim olketa and followim wanem olketa talem. (Heb. 13:7, 17) Samfala taem, hem no isi for duim olsem. Bat iumi savve askem Jehovah for helpem iumi. Holy spirit bilong hem savve helpem iumi for obeyim eni instruction wea iumi kasem from olketa elder. And sapos iumi hambol and waka tugeta witim olketa elder, kongregeson bae kasem barava gud samting. Kongregeson bilong iumi bae wan mind, and datwan bae strongim wei wea iumi lovem olketa brata and sista. w16.03 3:8, 9

Taem samfala brata growap, dadi and mami no encouragem olketa for garem olketa spiritual goal. So Kingdom hem no first samting long laef bilong olketa young brata hia. (Matt. 10:24) So taem wanfala elder laek for trainim wanfala young brata for duim samting long kongregeson hem mas fren gud witim datfala brata. Then, taem olketa chance kamap datfala elder savve showim hem olketa scripture wea savve helpem hem for ting raonem wei wea hem dedicate long Jehovah. (Eccl. 5:4; Isa. 6:8; Matt. 6:24, 33; Luke 9:57-62; 1 Cor. 15:58; 2 Cor. 5:15; 13:5) Datfala elder savve askem hem samfala kwestin olsem: ‘Wanem nao iu promisim long Jehovah taem iu dedicate long hem? Jehovah feel hao taem hem lukim iu baptaes?’ (Prov. 27:11) ‘Hao nao Satan feel taem hem lukim iu baptaes?’ (1 Pet. 5:8) Taem elder showim datfala brata olketa scripture hia datwan savve barava kasem heart bilong hem and helpem hem for changem tingting bilong hem. w15 4/15 2:9, 11

Why nao maet samfala taem Jehovah no kwiktaem ansarem olketa prea bilong iumi? Bible hem sei Jehovah hem Dadi bilong iumi and iumi olketa pikinini bilong hem. (Ps. 103:13) Wanfala dadi bae no givim evri samting wea pikinini askem, or hem no givim stretawe samting wea pikinini askem. Dadi hem savve maet pikinini seknomoa lukim samting and laekem, bat bihaen, hem no laekem moa datfala samting. Dadi savve tu long best samting for pikinini bilong hem, and maet samting wea pikinini askem bae hem affectim olketa narawan. Hem savve long samting wea pikinini needim, and long best taem for givim long hem. Sapos dadi hem stretawe givim evri samting wea pikinini askem, pikinini bae kamap boss long dadi. Jehovah, wea hem Dadi bilong iumi long heven, hem lovem iumi. From hem wakem iumi, hem savve long wanem iumi needim and long best taem for givim iumi wanem iumi askem. Hem gud for iumi patient for lukim wei wea Jehovah bae ansarem olketa prea bilong iumi.—Isa. 29:16; 45:9. w15 4/15 4:6, 7

Disfala nogud world hem klosap for finis, so Satan laekem iumi for tingim iumiseleva long wei for aftarem olketa riches bilong disfala world. Hem laekem iumi for no tingim hao iumi stap long olketa last day, and for no gohed for lukaot. No letem Satan trikim iu! Bat “gohed for lukaot.” (Matt. 16:22, 23; 24:42) Satan laek trikim iumi mekem iumi tingse end hem farawe yet or end bae no kam. No bilivim datwan. Satan laekem iumi for tingse Jehovah no lovem iumi, and God bae nating forgivim olketa sin bilong iumi. Bat datwan hem nating tru. Tingim diswan. Satan nao Jehovah no lovem hem. Satan nao Jehovah bae nating forgivim hem. Bat Bible sei olsem long iumi: “God hem raeteous so hard for hem forgetim waka wea iufala duim and love wea iufala showimaot for nem bilong hem.” (Heb. 6:10) Jehovah tinghae long evri samting wea iumi duim for mekem hem hapi, and iumi no hard waka nating taem iumi duim waka bilong hem. (1 Cor. 15:58) So no letem Satan for trikim iu. w15 5/15 1:16-19

Abraham lukim staka pruv wea showimaot Jehovah evritaem duim wanem hem promisim, so hem sure evri samting wea Jehovah promis for duim long future bae kamap tru. From Abraham bilivim olketa promis bilong Jehovah, datwan mekem hem evritaem laek for obeyim Jehovah. Olsem example, hem lusim hom bilong hem long Ur and for full laef bilong hem, hem no stap long eni nara taon moa. Hem savve olketa taon long Canaan bae no stap for olowe bikos olketa man wea rulim olketa taon hia no worshipim Jehovah. (Josh. 24:2) Bat hem luk forward long taem wea Kingdom bilong God bae rulim earth for olowe. Kingdom hia hem “datfala taon wea garem strongfala faondeson wea God nao planim and buildim.” (Heb. 11:10) Abraham, Abel, Enoch, Noah, and olketa narawan tu olketa biliv pipol wea dae bae laef bak. Taem olketa ting raonem olketa blessing wea bae kamap long future, datwan strongim faith bilong olketa.—Heb. 11:15, 16. w15 5/15 3:8, 9

Olketa mirakol wea Jesus Christ duim taem hem stap long earth showimaot bigfala paoa bilong Jehovah. Bible storyim samfala long olketa mirakol hia, and taem iumi read abaotem olketa, datwan savve strongim faith bilong iumi. (Matt. 9:35; Luke 9:11) Tru nao, Jehovah givim bigfala paoa long Jesus, dastawe aposol Paul sei: ‘Christ hem showimaot paoa bilong God.’ Bat wanem nao iumi savve lanem from olketa mirakol wea Jesus duim? Aposol Peter sei Jesus duim “olketa spesol samting,” wea hem nao olketa mirakol. (Acts 2:22) Olketa mirakol hia showimaot wanem Jesus bae duim insaed long wan thousand year wea hem bae rul. Long datfala taem bae hem duim olketa mirakol wea bae helpem pipol evriwea long earth. And tu, olketa mirakol hia helpem iumi for savve abaotem olketa wei bilong Jesus and Dadi bilong hem. w15 6/15 1:1, 2

Jesus savve Jehovah nao healim datfala woman, so hem tok kaen olsem long hem: “Dota bilong mi, faith bilong iu mekem iu gud bak. Iu go and no wari moa, bikos sik hia hem finis nao.” (Mark 5:34) Iumi tinghae long wei wea Jesus showimaot love for pipol, especially for olketa wea sik. Jesus no olsem Satan wea laekem iumi for tingse iumi iusles and no eniwan lovem iumi. Olketa mirakol wea Jesus duim showimaot hem barava lovem iumi and laek for helpem iumi taem iumi kasem problem. Iumi barava hapi for garem wanfala King and Hae Priest wea lovem iumi! (Heb. 4:15) Maet hem no isi for iumi minim feeling bilong samwan wea hem sik for longfala taem, especially sapos iumi no sik. Bat tingim Jesus. Hem minim feeling bilong pipol wea sik nomata no enitaem hem sik. Iumi laek for duim best bilong iumi for followim example bilong hem for showimaot love long olketa wea sik.—1 Pet. 3:8. w15 6/15 2:11, 12

Iumi garem bigfala privilege for savve long nem bilong God and for “garem nem bilong hem.” (Acts 15:14; Isa. 43:10) Taem iumi prea long Dadi bilong iumi long heven, iumi sei: “Mifala laekem nem bilong iu for holy.” (Matt. 6:9) Maet iumi askem hem tu for helpem iumi for no duim or talem eni samting wea bae spoelem nem bilong hem. Iumi no laek for olsem samfala long first century wea olketa seleva no duim samting wea olketa teachim olsem text for tuday hem storyim. Jehovah bae mekem nem bilong hem holy taem hem finisim evriwan wea spoelem nem bilong hem and no laek for stap anda long rul bilong hem. (Ezek. 38:22, 23) Long datfala taem olketa man bae kamap perfect, and evriwan long heven and long earth bae worshipim Jehovah, and mekhae long nem bilong hem. Long datfala taem, Dadi bilong iumi long heven bae “rul ovarem evriwan.”—1 Cor. 15:28. w15 6/15 4:7, 10

Long olketa Hebrew Scripture, datfala toktok “ples for mi putim leg bilong mi” hem minim tu datfala temple long Israel bifor. (1 Chron. 28:2; Ps. 132:7) Datfala temple hem barava luk naes long Jehovah bikos hem nao main ples for tru worship, and hem mekem Jehovah kasem praise long earth. (Isa. 60:13) Long distaem, main ples for tru worship hem no wanfala really temple long earth bat hem wanfala spiritual temple. Temple hia mekem Jehovah kasem praise winim eni building. Wanem nao datfala spiritual temple? Hem arrangement wea God mekem for olketa man fren witim hem and worshipim hem. Ransom sakrifaes bilong Jesus nao mekem disfala arrangement kamap. Disfala arrangement hem start long 29 C.E. taem Jesus baptaes and Jehovah anointim hem for kamap hae priest long datfala spiritual temple.—Heb. 9:11, 12. w15 7/15 1:1-3

Jesus bae givim reward long olketa wea faithful, and hem bae panisim olketa wea no faithful. (Matt. 24:46, 47, 50, 51; 25:19, 28-30) Jesus iusim wanfala tokpiksa for storyim diswan. Hem sei: “Taem Son bilong man hem kam witim olketa angel, hem bae garem bigfala paoa and hem bae sidaon long nambawan throne bilong hem. Bae hem kam and evriwan long full world bae stap front long hem. Then bae hem separatem olketa long tufala difren sekson, olsem man wea lukaftarem olketa sheepsheep hem separatem olketa sheepsheep from olketa goat. Bae hem putim olketa sheepsheep long raet saed bilong hem, and olketa goat long left saed bilong hem.” (Matt. 25:31-33) Wanem nao bae happen long olketa sheepsheep and long olketa goat? Jesus bae judgem olketa. Olketa goat, wea minim pipol wea no faithful, “bae dae and no laef moa.” Bat olketa sheepsheep, wea minim pipol wea faithful, “bae kasem laef olowe.”—Matt. 25:46. w15 7/15 2:11, 12

Staka long iumi savve laekem kaikai, languis, kastom, and olketa naes samting long ples wea iumi kam from. Bat waswe, iumi evritaem tingse olketa samting wea iumi laekem hem winim olketa samting wea narawan laekem? Jehovah laekem iumi for enjoyim evri difren kaen samting wea hem wakem. (Ps. 104:24; Rev. 4:11) So waswe, hem fitim for sei samting wea iumi laekem hem gud winim samting wea narawan laekem? Jehovah laekem evri difren kaen pipol for savve long hem, worshipim hem, and for laef olowe. (John 3:16; 1 Tim. 2:3, 4) So sapos olketa brata and sista bilong iumi garem difren tingting or idea from iumi, and datwan no againstim olketa Bible principle, iumi willing for lisin long olketa. Datwan savve mekem laef bilong iumi interesting and hem protectim wei wea iumi wan mind. Olsem iumi storyim finis, from iumi sapotim Jehovah and Kingdom bilong hem, iumi no teksaed long olketa raoa bilong world. Iumi barava no laekem wei wea pipol long world olketa praod and laek for winim narawan. Iumi thankiu long Jehovah from hem teachim iumi for stap gud witim nara pipol and for hambol! w15 7/15 3:17, 18

Staka samting iumi savve duim for showimaot iumi lovem Jehovah. Olsem example, iumi savve showimaot iumi lovem Jehovah taem iumi strong for talemaot gud nius abaotem Kingdom long narawan. (Matt. 24:14; 28:19, 20) And tu, iumi savve showimaot iumi lovem God taem iumi gohed faithful nomata iumi kasem test. (Ps. 84:11; Jas. 1:2-5) Nomata sapos iumi kasem barava hard taem, iumi savve sure Jehovah luksavve long samting wea kasem iumi and hem bae helpem iumi, bikos iumi spesol long hem. (Ps. 56:8) Love wea iumi garem for Jehovah mekem iumi for ting raonem olketa gudfala samting wea Jehovah wakem. Iumi showimaot iumi lovem God and iumi tinghae long Bible taem iumi studyim gud Bible. Iumi evritaem prea long Jehovah bikos iumi lovem hem and laek for strongim wei wea iumi fren witim hem. And taem iumi ting raonem ransom sakrifaes bilong Jesus, datwan barava strongim love wea iumi garem for Jehovah. (1 John 2:1, 2) Olketa samting hia hem samfala wei for showimaot iumi tinghae long bigfala love bilong Jehovah for iumi. w15 8/15 1:6, 17, 18

Long niu world, maet iumi mas patient long samfala samting tu. Olsem example, maet iumi herem olketa narawan barava hapi bikos olketa relative and fren bilong olketa laef bak. Bat maet olketa relative bilong iumi no laef bak yet. Sapos datwan happen, waswe, bae iumi hapi witim olketa wea hapi, and patient for weit? (Rome 12:15) Sapos iumi lane for patient distaem and weitim taem wea Jehovah bae mekem olketa promis bilong hem kamap tru, datwan bae helpem iumi for patient long niu world tu. Nara samting wea savve helpem iumi for mek redi for niu world hem nao for iumi patient taem samfala change kamap long wei wea iumi minim samfala scripture. Waswe, iumi studyim gud datfala niu point, and iumi patient sapos iumi no minim gud yet? Sapos iumi duim olsem distaem, datwan bae helpem iumi for patient long niu world taem Jehovah talem iumi eni niu samting for duim.—Prov. 4:18; John 16:12. w15 8/15 3:9, 10

Aposol Paul laekem olketa Christian long Ephesus for kamap mature Christian. Hem encouragem olketa for garem wan mind long faith and for gohed lane abaotem Jesus mekem olketa savve “kamap mature, wea diswan minim [olketa] barava mature olsem Christ.” (Eph. 4:13) Taem Paul raetem disfala leta, kongregeson long Ephesus hem stap for staka year finis. Staka brata and sista long datfala kongregeson olketa mature Christian. Nomata olsem, samfala long kongregeson still need for strongim wei wea olketa fren witim Jehovah. Hem semsem tu distaem, staka brata and sista worshipim Jehovah for plande year finis and olketa kamap mature Christian. Bat samfala long kongregeson no kamap mature yet. Olsem example, staka thousand Christian baptaes evri year, so olketa niu wan olsem mas gohed for grow long spiritual wei. Waswe long iu?—Col. 2:6, 7. w15 9/15 1:2, 3

Staka sei wei wea olketa exercise evritaem hem strongim olketa and hem gud for health bilong olketa. Bat waswe sapos iumi laek exercise witim olketa narawan? Waswe, hem olraet for iumi exercise witim eniwan nomoa? Proverbs 13:20 sei: “Man wea fren witim pipol wea wise bae hem wise, bat man wea fren witim pipol wea krangge bae hem kasem nogud samting.” Tru nao, hem important for iumi iusim konsens wea followim Bible long evri samting wea iumi duim. Haomas taem nao iu iusim for duim hapitaem? Wanem nao barava important samting long laef bilong iu? Waswe, hem olketa meeting, preaching, and study seleva, or hem hapitaem? Jesus sei: “Evritaem Kingdom and olketa samting wea God sei hem stret mas first samting long laef bilong iufala. Sapos olsem, God bae givim iufala olketa samting hia wea iufala needim.” (Matt. 6:33) Waswe, konsens bilong iu helpem iu for followim datfala advaes taem iu disaedem hao iu bae iusim taem bilong iu? w15 9/15 2:13, 15

Taem Jehovah lukim Cain barava kros long brata bilong hem, Jehovah laek for helpem Cain. Cain no laek for followim wanem Jehovah talem and hem kasem nogud samting. (Gen. 4:11-13) Nara taem, Jehovah lukim Baruch hem taed and wikdaon bikos hem garem rong tingting abaotem waka wea hem duim. So Jehovah talem Baruch for changem tingting bilong hem. Baruch followim kaonsel wea Jehovah givim and datwan sevem laef bilong hem. (Jer. 45:2-5) Jehovah givim kaonsel and stretem iumi bikos hem lovem iumi. Hem stretem iumi long taem wea iumi needim datwan and hem trainim iumi tu. (Heb. 12:6) Insaed long Bible iumi read abaotem samfala wea worshipim Jehovah wea hem trainim olketa for duim gudfala waka. w15 9/15 4:12, 13

Olketa Gibeonite luksavve Jehovah nao faet for olketa Israelite. Rahab tu luksavve long olketa samting wea Jehovah duim. Hem no wanfala Israelite, bat hem herem story abaotem wanem Jehovah duim for mekem pipol bilong hem kamap free from Egypt. Taem tufala Israelite spae visitim hem, hem sei: “Mi barava savve Jehovah bae givim iufala disfala land.” Rahab trustim Jehovah for sevem hem and famili bilong hem. Hem showimaot faith long Jehovah nomata datwan bae mekem laef bilong hem stap long danger. (Josh. 2:9-13; 4:23, 24) Olketa example hia and staka nara example long Bible helpem iumi for luksavve long olketa samting wea God duim, and example bilong samfala wea no laek luksavve long datwan. Taem iumi savve long Jehovah and olketa wei bilong hem, iumi bae luksavve long olketa samting wea hem duim. (Eph. 1:18) Iumi laek followim example bilong olketa wea faithful long bifor and distaem wea luksavve long wei wea Jehovah helpem pipol bilong hem. w15 10/15 1:6, 7, 9

Bible sei Martha hem gudfala fren bilong Jesus, and Jesus lovem hem. Jesus lovem and respectim olketa nara woman tu. Olsem example, Mary, wea hem sista bilong Martha, hem gudfala fren bilong Jesus tu. And Jesus lovem Mary wea hem mami bilong hem. (John 19:25-27) So why nao Jesus lovem Martha? Jesus lovem Martha bikos hem barava kaen and hem woman for waka. And Jesus barava lovem Martha bikos hem garem strongfala faith. Martha bilivim evri samting wea Jesus teachim, and hem barava sure Jesus nao datfala Messiah. (John 11:21-27) Nomata olsem, Martha hem no perfect olsem iumi evriwan. Olsem example, taem Jesus visitim Martha and Mary, Martha hem kros long sista bilong hem and hem talem Jesus for talem Mary for kam helpem hem. Martha sei: “Hao Lord, iu no lukim sista bilong mi ia? Hem nating helpem mi nomoa! Iu talem hem for kam helpem mi.”—Luke 10:38-42. w15 10/15 3:1, 2

Taem iumi ting raonem olketa spiritual samting, datwan bae helpem iumi for tinghae long truth. Wei wea iumi tinghae long truth bae encouragem olketa brata and sista and pipol wea iumi meetim long ministry. And taem iumi ting raonem ransom sakrifaes bilong Jesus, wea hem nambawan present wea God givim, datwan bae helpem iumi for tinghae long wei wea iumi fren witim Jehovah. (Rome 3:24) Mark, wanfala brata from South Africa wea stap long prison for thrifala year from hem faithful long God, hem sei: “Wei for ting raonem samting hem olsem wei for travel long wanfala interesting ples. Taem iumi evritaem ting raonem olketa spiritual samting, bae iumi lanem olketa niu samting abaotem God bilong iumi, Jehovah. Samfala taem, taem mi wari or feel sorre, mi readim samfala scripture long Bible and ting raonem. Diswan savve helpem mi for no wari tumas and for feel gud.” w15 10/15 4:15

Long taem wea fitim, explainim long teenager bilong iu why iu mekem wanfala rul or disaedem wanfala samting. Taem hem minim datwan, maet bae hem hapi for obeyim iu. Barry, wea hem garem fofala pikinini, hem sei: “Taem iu talem olketa teenager why iu talem wanfala samting, datwan bae helpem olketa for trustim iu.” Olketa teenager bae luksavve iu disaedem samting bikos iu garem gudfala reason, and no bikos iu garem paoa nomoa for duim datwan. And no forget, olketa teenager, olketa no olsem olketa smol pikinini. Olketa lane for ting raonem wanem olketa laek for duim, and olketa laek for disaedem samting seleva. (Rome 12:1) Barry sei: “Olketa teenager mas lane for disaed long gudfala wei, and no disaed followim feeling bilong olketa nomoa.” So taem iu disaedem wanfala samting, showimaot iu hambol long wei for explainim long teenager bilong iu why iu disaedem datwan. Datwan bae helpem teenager bilong iu for disaedem samting seleva, and hem bae luksavve iu no ting long hem olsem wanfala smol pikinini. w15 11/15 2:11

Distaem, staka million pipol evriwea long world worshipim Jehovah. Evriwan hia olketa brata and sista bilong iumi. Wanem kaen tingting nao iumi shud garem abaotem olketa? (Rome 12:10) Aposol Peter sei from iumi “obeyim olketa tru teaching,” iumi shud “showimaot love for olketa brata.” Peter sei tu long olketa Christian: “Barava important samting nao, iufala mas barava lovem narawan.” (1 Pet. 1:22; 4:8) Organization bilong Jehovah hem barava spesol. Iumi lovem olketa brata and sista bilong iumi evriwea long world. And tu, bikos iumi lovem Jehovah and obeyim olketa law bilong hem, Jehovah iusim holy spirit, wea hem bigfala paoa bilong hem, for sapotim iumi. Spirit bilong God helpem iumi for wan mind witim olketa brata and sista bilong iumi evriwea long world.—1 John 4:20, 21. w15 11/15 4:8, 9

Jehovah no forcem iumi evriwan for lanem wanfala languis nomoa for savve long hem and plan bilong hem. (Rev 7:9, 10) Olketa man story long staka difren languis, nomata olsem, datwan no stopem Jehovah for story long pipol long olketa difren languis hia. Olsem example, insaed Bible hem garem tu-thri languis toktok nomoa wea Jesus iusim taem hem stap long earth. (Matt. 27:46; Mark 5:41; 7:34; 14:36) Bat Jehovah mek sure olketa samting wea Jesus teachim, olketa raetem and transleitim long Greek languis, and bihaen, long olketa nara languis tu. And tu, bikos olketa Jew and Christian copyim olketa Holy Raeting, datwan mekem toktok bilong God for stap kam kasem distaem. Samfala pipol transleitim olketa copy hia go long staka nara languis. Long samting olsem mek-foa century C.E., John Chrysostom sei olketa teaching bilong Jesus stap long languis bilong pipol long Syria, Egypt, India, Persia, Ethiopia, and staka nara languis tu. w15 12/15 1:10, 11

Sapos iumi toktok long taem wea no fitim, maet pipol no acceptim or kasem gud samting from wanem iumi talem. Olsem example, long March 2011, wanfala earthquake and tsunami distroem staka taon long east saed long Japan. Winim 15,000 pipol nao dae. Samfala famili and fren bilong staka Jehovah’s Witness dae tu. Nomata olsem, olketa Witness hia iusim Bible for helpem nara pipol wea kasem sem samting tu. Olketa brata and sista savve staka pipol long Japan olketa Buddhist and olketa no savve long Bible, so olketa luksavve hem no stretfala taem for storyim resurrection long olketa. Bat olketa talem samting for comfortim pipol hia and storyim why nao olketa nogud samting olsem happen long gudfala pipol. w15 12/15 3:7

Sorre samting nao, samfala pipol and samfala company sei olketa garem treatment wea savve finisim sik bilong iumi. Olketa talem olsem bikos olketa laek for mek selen long pipol wea sik. And taem iumi sik, maet iumi willing for tekem eni treatment for helpem iumi and for stap laef for lelebet taem moa. Sapos iumi wise bae iumi no kwiktaem bilivim evri samting iumi herem, especially sapos man wea givim advaes saed long health hem no kasem training. Hem gud for ting raonem olketa kwestin hia: ‘Nomata hem sei disfala medicine, leaf, or kaikai hem helpem pipol, waswe, diswan hem tru? Sapos hem tru datfala treatment helpem nara pipol, why nao mi tingse bae hem helpem mi tu? Waswe, mi shud duim research and story long olketa wea kasem training for treatim sik bilong mi?’—Deut. 17:6. w15 12/15 4:14, 15

Paul hem savve taem iumi tinghae long love wea Jesus showimaot for iumi, datwan bae mekem iumi for lovem Jesus and laek for obeyim hem. Tru nao, taem iumi savve long wanem Jehovah duim for iumi and bigfala love bilong hem, iumi bae traem best for duim samting wea showimaot iumi tinghae long Jesus. Hao nao iumi savve duim datwan? Love wea iumi garem for Jehovah bae helpem iumi for barava followim gud example bilong Jesus. (1 Pet. 2:21; 1 John 2:6) Taem iumi obeyim God and Christ, datwan showimaot iumi lovem tufala. Jesus sei: “Man wea acceptim and obeyim olketa law bilong mi, hem nao man wea lovem mi. Dadi bilong mi bae lovem man wea lovem mi. Mi bae lovem datfala man tu.” (John 14:21; 1 John 5:3) So ting raonem tufala kwestin hia: ‘Wanem nao samfala samting wea mi duim finis wea showimaot mi followim example bilong Jesus? Wanem moa samfala samting wea mi mas duim for followim example bilong Jesus?’ Hem important for ting raonem olketa kwestin hia bikos pipol long world laekem iumi for followim wei bilong olketa.—Rome 12:2. w16.01 2:7-9

Waswe, iu strong for duim preaching waka? Waswe, iu barava interest for studyim Bible and for lanem “wisdom bilong God wea big tumas”? (1 Cor. 2:10) Waswe, iu lukim wei wea Jehovah barava blessim ministry bilong iu? Waswe, iu barava laek for duim wanem Jehovah laekem? Waswe, iu barava lovem pipol and iu laek for helpem olketa for worshipim Jehovah? Waswe, iu lukim wei wea Jehovah helpem iu long samfala samting long laef bilong iu? Sapos ansa bilong iu for olketa kwestin hia hem yes, waswe, diswan minim God chusim iu for go long heven? Nomoa. Why nao olsem? Bikos evriwan wea worshipim Jehovah kasem gud samting from Jehovah, nomata olketa anointed Christian or nomoa. And Jehovah savve iusim holy spirit bilong hem for helpem eniwan wea worshipim hem, nomata hem garem hope for go long heven or stap long earth. For tok stret, sapos iu tingting raonem sapos iu wanfala wea God chusim iu for go long heven, datwan showimaot God no chusim iu. Olketa wea Jehovah chusim no ting raonem sapos olketa bae go long heven or nomoa! w16.01 3:14, 15

Taem Jesus waka witim Dadi bilong hem, hem hapi bikos hem duim staka samting and hem savve Jehovah lovem hem. Bat waswe long iumi? Jesus sei man wea givim samting hem hapi and man wea kasem samting hem hapi tu. (Acts 20:35) Iumi barava hapi taem iumi lanem truth. Bat why nao iumi hapi tu taem iumi talemaot truth long olketa narawan? Bikos iumi lukim pipol barava hapi taem olketa minim olketa tru teaching insaed Bible and olketa start for fren witim God. Iumi hapi taem iumi lukim olketa changem tingting and wei bilong olketa. Iumi luksavve preaching waka hem important winim eni nara waka wea iumi savve duim. Hem helpem pipol for fren witim God and for kasem laef olowe.—2 Cor. 5:20. w16.01 5:6, 7