April

Sapos pipol no showimaot faith long sakrifaes bilong Jesus, God bae ting long olketa olsem olketa enemy. So iumi garem responsibility for talem long pipol olketa savve kamap fren bilong God. Aposol John sei: “Man wea showimaot faith long Son hem kasem laef olowe. Man wea no obeyim Son bae no kasem laef, bat God bae kros long hem.” (John 3:36) Iumi barava hapi bikos sakrifaes bilong Jesus mekem iumi fit for kamap olketa fren bilong God. (2 Cor. 5:18-20) And iumi teachim truth long pipol and helpem olketa for fren gud witim Jehovah. Diswan hem important part long preaching waka bilong iumi. w16.07 4:8-10

First samting wea Jesus prea abaotem nao hem for nem bilong Jehovah for holy. From Jehovah hem holy, evri samting wea hem duim and evri law bilong hem olketa holy. Nomata olsem, Satan hem kwestinim raet bilong God for markem olketa standard for olketa man followim. Hem talem laea samting abaotem Jehovah and tok spoelem nem bilong God. (Gen. 3:1-5) Bat Jesus hem barava tinghae long nem bilong Jehovah and hem duim best bilong hem for showimaot datfala nem hem holy. (John 17:25, 26) Olketa samting wea Jesus duim and teachim helpem olketa narawan for luksavve olketa standard bilong Jehovah hem stret, and evri samting wea Jehovah askem iumi for duim hem for helpem iumi. (Ps. 40:8-10) From Jesus gohed faithful long Dadi bilong hem go kasem taem hem dae, datwan pruvim man wea perfect fit for obeyim Jehovah long evri samting. w17.02 2:2-4

“Datfala Pikinini Sheepsheep” hem Jesus Christ. Hao nao iumi savve long datwan? Taem Jesus stap long earth olketa kolem hem “Pikinini Sheepsheep bilong God wea aotem sin bilong evri pipol long disfala world.” (John 1:29) No enitaem eni king hem willing for dae for pipol wea hem rul ovarem olketa. Datwan hem wanfala reason why Jesus fit for kasem respect from iumi. Jesus fit for kasem respect bikos “hem nao King bilong olketa wea rul olsem king and Lord bilong olketa wea rul olsem lord.” (1 Tim. 6:14-16) Maet iu tu garem sem tingting olsem olketa long heven wea sei: “Datfala Pikinini Sheepsheep wea olketa killim hem dae, hem fit for kasem paoa and olketa nambawan samting and wisdom and strong. Hem fit for kasem glory and blessing and evriwan mas barava respectim hem.” (Rev. 5:12) Datwan hem main reason why iumi shud respectim and mekhae long Jesus, and taem iumi duim olsem, iumi mekhae long Jehovah tu. Taem iumi mekhae long tufala, iumi savve kasem laef olowe.—Ps. 2:11, 12; John 5:23. w17.03 1:3, 4

Jephthah savve gud long history bilong olketa Israelite and Law bilong Moses. Wei wea Jehovah deal witim pipol bilong Hem helpem Jephthah for savve long wanem God laekem and no laekem. (Judg. 11:12-27) Jephthah tingim wanem God laekem taem hem disaedem eni samting. Hem savve Jehovah no laekem wei for kros and wei for pei bak, and God laekem pipol bilong Hem for lovem each other. And tu, Law bilong Moses sei man mas helpem olketa narawan, nomata olketa wea heitim hem tu. (Ex. 23:5; Lev. 19:17, 18) Maet example bilong Joseph helpem Jephthah. Joseph showim mercy long olketa brata bilong hem nomata olketa heitim hem. (Gen. 37:4; 45:4, 5) Maet Jephthah ting raonem example bilong Joseph, and datwan helpem hem for duim samting wea Jehovah laekem. Wanem olketa brata bilong Jephthah duim barava spoelem hem. Bat samting wea important long Jephthah nao hem for mekhae long Jehovah and protectim pipol bilong hem.—Judg. 11:1-3. w16.04 1:8, 9

Pipol bilong Jehovah laekem tumas for hipap tugeta. Olsem example, olketa firstfala Christian barava laek for hipap tugeta for worshipim Jehovah and lane abaotem hem. Masbi iu tu laek for go long olketa meeting. Nomata olsem, maet samfala taem hem no isi for iu evritaem go long olketa meeting. Maet iu mas waka for staka hour, or iu garem staka samting for duim, or iu evritaem feel taed. Wei for tinghae long gud samting iumi kasem from olketa meeting nao savve helpem iumi for no misstim eni meeting. Hem tru, samfala brata and sista no fit for evritaem go long olketa meeting. Olsem example, maet olketa garem bigfala sik. Olketa elder savve helpem olketa hia for lisin long olketa meeting. Maet olketa iusim telephone or recordim olketa meeting for olketa pablisa hia. w16.04 3:3

Samting wea savve helpem iumi for no teksaed hem nao for lane from example bilong olketa wea faithful. Staka wea worshipim Jehovah bifor, olketa no fraet and olketa no tek saed from olketa mekem olketa wise disison. Tingim example bilong Shadrach, Meshach, and Abednego wea sei olketa bae no worshipim image wea stand for gavman bilong Babylon. (Dan. 3:16-18) Example bilong olketa hia helpem staka Witness distaem for no fraet for sei olketa bae no worshipim flag bilong kantri wea olketa stap long hem. Jesus no join long politik or olketa raoa wea divaedem pipol. Hem savve gudfala example bilong hem bae helpem olketa disaepol. Hem sei: “No fraet.” Olketa brata and sista long kongregeson bilong iu savve helpem iu for no teksaed. And tu, sapos olketa brata and sista long kongregeson savve long samting wea kasem iu, olketa savve encouragem iu. Askem olketa for prea for iu. And iu tu shud sapotim olketa narawan and prea for olketa.—Matt. 7:12. w16.04 4:16, 18

Waswe, Olketa Jehovah’s Witness tekem kolekson long olketa Kingdom Hall or long taem bilong convention? Nomoa! Olketa donation nao sapotim waka bilong iumi. (2 Cor. 9:7) Long 2015, Olketa Jehovah’s Witness iusim 1.93 billion hour for preachim gud nius, and olketa conductim winim 9 million Bible study evri month. Olketa no kasem pei bat olketa hapi for iusim selen bilong olketa seleva for duim preaching waka. Wanfala savveman sei olsem abaotem waka wea Olketa Jehovah’s Witness duim: “Main goal bilong olketa hem for preach long pipol and teachim olketa.” Hem sei tu Olketa Jehovah’s Witness no garem eni bigman mekem olketa peim wages bilong olketa. So sapos iumi no tek pei, why nao iumi preach? Iumi willing for duim disfala waka bikos iumi lovem Jehovah and iumi lovem pipol. Diswan nao samting wea text for tuday storyim. w16.05 2:9

Bible showimaot iumi mas stap klia long eni hapitaem wea savve mekem iumi for tingim or laek duim olketa dirty samting. And sapos iumi savve gud long wanem Jehovah laekem and wanem hem heitim, datwan bae mekem hem isi for chusim olketa buk, movie, or game wea Jehovah bae hapi long hem. Bae iumi no need for askem eni narawan long wanem for duim. Staka samting iumi savve disaedem long tu-thri difren wei, and Jehovah bae hapi long wanem iumi disaedem. Bat taem iumi mas mekem wanfala important disison, maet hem gud for askem wanfala elder or wanfala mature brata or sista for helpem iumi. (Titus 2:3-5; Jas. 5:13-15) Hem tru, iumi shud no askem olketa for disaed for iumi. Iumi mas ting raonem wanem Bible talem, and then iumiseleva nao disaed. (Heb. 5:14) Aposol Paul sei: “Samting wea man seleva mas duim, hem no waka bilong narawan bat hem waka bilong hemseleva nao.”—Gal. 6:5. w16.05 3:15, 16

Taem Jehovah lukluk long man hem luk insaed long heart, and hem luksavve long wanem kaen man nao iumi. (1 Sam. 16:7b) Diswan hem showaot taem God startim Christian kongregeson. Hem leadim staka pipol wea olketa nara pipol ting daonem olketa for kam long hem and Son bilong hem. (John 6:44) Olsem example, hem leadim wanfala Pharisee wea nem bilong hem Saul for kam long hem. Bat Jehovah lukluk long heart bilong Saul and hem lukim gud samting. (Prov. 17:3) Jehovah luksavve Saul savve changem wei bilong hem. Hem fit for kamap man wea hem “chusim” for preach “long pipol long olketa difren kantri and long olketa king and olketa son bilong Israel tu.” (Acts 9:15) Jehovah chusim tu olketa narawan wea bifor olketa savve drunk, durong, and steal, bat wea hem luksavve olketa fit for changem wei bilong olketa and duim gud samting. (Rome 9:21; 1 Cor. 6:9-11) Taem olketa studyim olketa Holy Raeting, faith bilong olketa long Jehovah hem kamap strong and olketa duim wanem hem laekem. w16.06 1:4

God iusim Bible, Christian kongregeson, and ministry for helpem iumi gohed kasem training from hem. Taem iumi readim Bible evriday and ting raonem wanem iumi readim, iumi letem Jehovah for trainim iumi. Jehovah komandim olketa king bilong Israel for raetem wanfala copy bilong Law, and readim datwan evriday. (Deut. 17:18, 19) Olketa aposol tu luksavve wei for readim and ting raonem olketa Holy Raeting bae helpem olketa long ministry. Olketa talem toktok from olketa Hebrew Scripture long olketa Bible buk wea olketa raetem, and taem olketa preach olketa encouragem pipol for readim and ting raonem olketa Holy Raeting tu. (Acts 17:11) Iumi tu luksavve hem barava important for readim and ting raonem Bible evriday. (1 Tim. 4:15) Diswan helpem iumi for hambol mekem Jehovah savve gohed trainim iumi. w16.06 2:10

Pipol bilong Jehovah showimaot love long narawan nomata long taem bilong war. Olsem example, long World War II samting olsem 55 million pipol dae. Bat pipol bilong Jehovah no killim dae eniwan long datfala war. (Mic. 4:1, 3) So pipol bilong Jehovah “no kasem blame for wei wea staka pipol dae long datfala war.” (Acts 20:26) Namba bilong pipol bilong Jehovah gohed for kamap big nomata olketa stap long disfala nogud world bilong Satan, wea Bible sei hem “god bilong disfala world.” (2 Cor. 4:4) Satan kontrolem olketa gavman long world, and olketa organization wea reportim nius, and hem iusim olketa samting hia for trae for stopem preaching waka. Bat hard tumas for hem stopem disfala waka. Nomata olsem, Satan savve hem garem lelebet taem nomoa, so hem gohed trae for stopem iumi for worshipim Jehovah.—Rev. 12:12. w16.06 4:3, 4

Jesus talem moa long olketa disaepol bilong hem Jehovah hem lukaftarem gud olketa samting wea hem wakem. Jesus storyim nao olketa “flaoa long bush.” Maet Jesus tingim olketa barava naesfala flaoa wea luk olsem olketa lily. No eni flaoa hia sewim kaleko for olketa seleva tu. Bat olketa flaoa hia barava luk naes tumas dastawe Jesus sei “nomata olketa barava naesfala kaleko bilong Solomon bat no luk naes olsem olketa flaoa hia.” Tingim nextfala samting wea Jesus talem. Hem sei: “Sapos God hem givim kaleko long olketa flaoa wea stap long bush . . . , hao, iufala tingse hem bae givim nomoa kaleko long olketa flaoa and no long iufala, wea important winim olketa flaoa hia? Faith bilong iufala hem no strong!” (Matt. 6:29, 30) Jehovah promis for lukaftarem pipol bilong hem. Bat olketa disaepol bilong Jesus nao mas showimaot faith. (Matt. 8:26; 14:31; 16:8; 17:20) Olketa mas trustim Jehovah bae lukaftarem olketa and hem barava laek for duim datwan. Waswe long iumi? Waswe, iumi sure Jehovah bae lukaftarem iumi? w16.07 1:15, 16

Nomata wanem kaen hard taem iumi kasem, Jehovah savve helpem iumi for deal witim datwan. (1 Pet. 1:6) Hem bae evritaem givim iumi wanem iumi needim for winim eni hard taem wea kasem iumi. From Jehovah hem kaen tumas, iumi kasem staka blessing. Wanfala blessing nao, hem wei wea Jehovah forgivim olketa sin bilong iumi. From Jehovah hem kaen tumas, hem forgivim iumi sapos iumi repent and waka hard for no duim sin. (1 John 1:8, 9) Paul story olsem long olketa anointed Christian: “[Jehovah] sevem iumi from datfala paoa bilong darkness and tekem iumi go insaed kingdom bilong Son wea hem lovem. Son hia givim laef bilong hem for iumi kamap free, wea minim iumi kasem forgiveness for sin bilong iumi.” (Col. 1:13, 14) From iumi tinghae long mercy bilong God, datwan mekem iumi laek for praisem hem. And from Jehovah forgivim olketa sin bilong iumi, iumi savve kasem staka nara blessing. w16.07 3:7-9

Jehovah mek sure olketa man garem hope for future, nomata Satan spoelem Adam and Eve long Eden. Firstfala profesi insaed long Bible nao hem story abaotem datfala hope. God markem wanfala long olketa angel hia for hem bae “finisim” Satan. Datfala “pikinini” bae openem wei for olketa man wea obey for kasem samting wea first man and woman tufala lusim. Olketa man wea obey bae garem chance for laef olowe long earth, wea hem nao plan bilong Jehovah for disfala earth. (John 3:16) Taem Adam and Eve no obeyim Jehovah, datwan spoelem marit bilong tufala and marit bilong evri narawan. Olsem example, Eve and evri nara woman bae kasem bigfala pain taem olketa bornem pikinini. Olketa woman bae barava laek for stap witim hasband bilong olketa, bat olketa hasband bae bossim waef bilong olketa and samfala taem spoelem olketa tu, wea hem nao samting wea happen long staka marit distaem. (Gen. 3:16) Jehovah laekem olketa hasband for showimaot love insaed long famili and hem laekem olketa waef for stap anda long hasband bilong olketa. (Eph. 5:33) Taem olketa Christian hasband and waef waka tugeta, tufala savve stretem eni problem wea kamap insaed long famili bilong tufala. w16.08 1:6, 7

Bible showimaot olketa gudfala reason hem stap for hasband and waef for no separate nomata wanfala long tufala no worshipim Jehovah. (1 Cor. 7:12-14) Datfala hasband or waef wea no biliv hem “klin” bikos hem maritim wanfala wea worshipim God. Long tingting bilong God, olketa pikinini wea tufala garem olketa “holy.” Staka experience showimaot olketa Christian helpem hasband or waef bilong olketa for worshipim Jehovah. Aposol Peter kaonselem olketa waef for stap anda long hasband bilong olketa. Hem sei: “Nomata sapos eniwan long olketa no obeyim toktok bilong God, gudfala wei bilong waef nao bae mekem olketa biliv nomata waef no talem eni samting. Diswan hem bikos olketa lukim gudfala wei bilong iufala and lukim iufala showimaot bigfala respect.”—1 Pet. 3:1-4. w16.08 2:14, 15

Jehovah laekem pipol bilong hem for lovem and for helpem each other. (Luke 22:24-27) Bible sei Jesus iusim evri samting wea hem garem for helpem olketa narawan, and gogo hem givim laef bilong hem tu for olketa. (Matt. 20:28) Dorcas “hem evritaem helpem pipol and duim gud samting for pipol wea poor.” (Acts 9:36, 39) Mary “waka hard tumas for helpem” olketa brata and sista long Rome. (Rome 16:6) Hao nao iumi savve helpem olketa niu wan for luksavve hem barava important for duim gud samting for olketa brata and sista? Iumi savve askem olketa niu wan for kam witim iumi taem iumi visitim olketa olo or olketa wea sik. And taem dadi and mami visitim olketa hia, sapos hem fitim, olketa savve tekem olketa pikinini bilong olketa tu. Olketa elder savve askem olketa young wan or olketa niu wan for helpem olketa taem olketa fixim eni samting long haos bilong olketa wea olo, or taem olketa tekem kaikai for olketa. Taem olketa young wan and olketa niu wan lukim iumi helpem olketa narawan long kongregeson, olketa tu bae laek for duim sem samting.—Rome 12:10. w16.08 4:13, 14

Wanfala young sista long France sei: “Olketa teacher long skul sapraes tumas for savve nomata distaem samfala student biliv yet long Bible.” Sapos iu wanfala young wan wea iu worshipim Jehovah or iu studyim Bible, waswe, iu kasem hevi for bilivim evolution and for no bilivim God nao wakem evri samting? Sapos olsem, iu savve duim samting for strongim faith bilong iu. Bible encouragem iumi for tingting gud abaotem wanem iumi herem or readim. Hem sei: “Gudfala tingting and wei for luksavve bae protectim iu.” Long wanem wei? Hem bae helpem iu for no bilivim olketa laea teaching, and for strongim faith bilong iu long Jehovah. (Prov. 2:10-12) Iumi mas savve gud long Jehovah mekem iumi garem strongfala faith. (1 Tim. 2:4) So taem iu readim Bible and olketa Bible pablikeson hem barava important for ting raonem and minim gud wanem iu readim. w16.09 4:1-3

Nomata sapos iumi kasem hard taem from taem iumi pikinini or iumi kasem wanfala samting distaem wea hard tumas, iumi mas gohed and no givap. Sapos iumi duim olsem, Jehovah bae blessim iumi. (Gen. 39:21-23) Iumi tu maet kasem olketa hard samting distaem. Maet wanfala samting wea no stret hem happen long iu, samwan from nara ples no laekem iu, samwan spoelem iu, or samwan jealous long iu. No letem kaen samting olsem mekem iu wikdaon, bat tingim wanem nao mekem Jacob, Rachel, and Joseph for gohed hapi and faithful long Jehovah. God hem strongim and blessim olketa bikos olketa barava tinghae long wei wea olketa fren witim hem. Olketa no givap and olketa duim samting followim prea bilong olketa. From iumi stap long olketa last day, hem important for iumi ting strong evritaem long hope bilong iumi for stap long niu world! Waswe, iu willing for faet hard, wea diswan hem minim for waka hard for kasem blessing bilong Jehovah? w16.09 2:8, 9

Samting wea barava important hem for iufala dadi and mami garem strongfala faith. Pikinini bae luk followim example bilong iu. So gohed for strongim faith bilong iuseleva. Pikinini mas lukim iu barava fren gud witim Jehovah. Olsem example, taem wanfala dadi and mami long Bermuda wari abaotem wanfala samting, tufala prea witim olketa dota bilong tufala and askem Jehovah for helpem olketa. And tu, olketa encouragem olketa pikinini for prea abaotem datwan long prea bilong olketa seleva. Dadi and mami hia sei: “Mitufala talem big gele bilong mitufala for ‘barava trustim Jehovah, gohed busy long olketa waka wea sapotim Kingdom, and for no wari tumas.’ Taem hem lukim Jehovah ansarem prea bilong mifala, hem savve Jehovah nao helpem mifala. Diswan strongim faith bilong hem long God and hem luksavve wanem Bible hem talem hem tru.” Dadi and mami, iutufala mas tingim diswan: Iutufala no savve forcem pikinini for garem faith. Iu savve plantim truth long pikinini and watarem datwan, bat Jehovah nomoa savve mekem hem grow. (1 Cor. 3:6) So waka hard for teachim pikinini abaotem Jehovah, and prea for holy spirit for helpem hem for garem faith. Sapos iu duim olsem, Jehovah bae blessim hard waka bilong iu.—Eph. 6:4. w16.09 5:16-18

Serge and Muriel, joinim kongregeson wea iusim difren languis for winim thrifala year. Tufala luksavve boy bilong tufala wea 17 year hem no hapi for duim ministry or go long olketa meeting. Serge sei: “Taem mitufala luksavve wei wea mifala joinim kongregeson wea iusim difren languis hem mekem son bilong mitufala no gohed gud long spiritual wei, mifala disaed for go bak long old kongregeson bilong mifala.” Wanem nao savve helpem dadi and mami? First samting, maet tufala luksavve tufala no garem taem and strong for teachim pikinini for lovem Jehovah and long semtaem teachim hem niufala languis. Mek-tu samting, maet tufala luksavve pikinini no hapi for go preach, go long olketa meeting, or stap long kongregeson wea iusim difren languis. Olketa samting hia savve mekem dadi and mami disaed for muv go bak long kongregeson wea iusim languis wea olketa pikinini minim gud. Then, bihaen olketa pikinini kamap strong long spiritual wei, tufala savve disaed for go bak long kongregeson wea iusim difren languis.—Deut. 6:5-7. w16.10 2:14, 15

Maet pipol wea stap raonem Noah askem hem why hem buildim datfala ark. Iumi savve Noah hem talem olketa why hem duim datwan from Bible sei Noah hem “preach abaotem samting wea raeteous.” (2 Pet. 2:5) Noah sei God bae distroem pipol wea duim nogud samting. Maet wanem hem talem long pipol hem sem samting wea Jehovah talem long hem. Jehovah sei: “Mi disaed for finisim evri samting wea laef, bikos pipol long earth raf tumas” and “bae mi mekem wanfala flood for finisim evri samting wea laef long earth. Evri samting long earth bae dae.” Then masbi Noah storyim long pipol wanem olketa mas duim mekem olketa no dae long datfala flood. Maet hem talem long olketa sapos olketa laek for laef olketa mas followim wanem Jehovah talem long hem. Jehovah sei: “Iu mas go insaed long ark.”—Gen. 6:13, 17, 18. w16.10 4:7

Bible hem garem advaes for olketa dadi and mami long hao for trainim olketa pikinini. Olketa Christian mas careful nogud tingting bilong pipol long world affectim olketa. (Eph. 2:2) Olsem example, long samfala ples olketa dadi savve ting olsem: ‘Long ples bilong mifala, hem waka bilong mami nao for teachim pikinini.’ Bat Bible sei dadi nao mas teachim pikinini abaotem Jehovah. (Eph. 6:4) Olketa dadi and mami wea lovem Jehovah bae laekem pikinini bilong olketa for followim example bilong profet Samuel wea fren gud witim Jehovah taem hem smol boy nomoa. (1 Sam. 3:19) Hem gud for tingim firstaem wanem Bible talem bifor iumi disaedem olketa important samting abaotem famili bilong iumi and abaotem waka bilong iumi. Iumi needim Jehovah for helpem iumi long laef bilong iumi. w16.11 3:14, 15

Taem iumi lukim olketa samting wea Jehovah wakem, iumi luksavve hem God wea organize gud. Bible sei: “Hem iusim wisdom bilong hem for wakem disfala earth. Hem iusim wei for luksavve for wakem skae.” (Prov. 3:19) Iumi savve lelebet nomoa abaotem olketa samting wea Jehovah wakem. Hem olsem iumi “herem lelebet samting nomoa abaotem hem.” (Job 26:14) Nomata olsem, lelebet savve wea iumi garem abaotem universe showimaot Jehovah hem barava organize gud. Staka million star wea muv long space olketa no olobaot. And tingim hao olketa planet insaed solar system bilong iumi muv raonem sun. Wei wea olketa samting hia organize hem showimaot Jehovah barava organizem gud gogo bilong olketa. Taem iumi tingim wei wea Jehovah savve tumas for wakem olketa samting long heven and long earth, iumi laek for praisem hem, worshipim hem, and gohed faithful long hem.—Ps. 136:1, 5-9. w16.11 2:3

Malachi 3:1-3 explainim samting wea happen long olketa Bible student start long 1914 go kasem 1919. Jehovah God, wea hem “trufala Lord,” and Jesus Christ, wea hem “man for talem message abaotem datfala agreement,” tufala kam for chekim “olketa son bilong Levi,” wea piksarem olketa anointed Christian. Bihaen Jehovah stretem olketa and mekem olketa kamap klin, olketa redi for kasem wanfala niu assignment. Long 1919, Jesus markem wanfala “wakaman wea faithful and wise,” wea kasem assignment for leadim and givim spiritual kaikai long evri pipol bilong God. (Matt. 24:45) Long datfala taem nao pipol bilong God kamap free from Bigfala Babylon. Start long datfala taem, olketa lanem staka samting abaotem Jehovah and datwan mekem olketa barava lovem hem. Olketa barava tinghae long olketa blessing bilong hem! w16.11 5:14

Dadi bilong iumi Jehovah hem promis for blessim pipol bilong hem wea faithful long hem. Diswan hem wanfala wei wea Jehovah showimaot hem lovem iumi. And iumi lovem hem “bikos . . . hem lovem iumi firstaem.” (1 John 4:19) Taem love bilong iumi for Jehovah hem kamap strong, bae iumi garem strongfala faith long hem, and iumi barava sure Jehovah bae blessim olketa wea hem lovem. (Heb. 11:6) Jehovah hem God wea hem evritaem givim reward long man. Datwan hem barava important samting long hem and hem wei bilong hem. So sapos iumi no bilivim God bae blessim olketa wea barava lukaotem hem, datwan showimaot faith bilong iumi hem no tru wan. Why nao olsem? Bikos “faith hem mekem man sure samting wea hem hope long hem bae kamap tru.” (Heb. 11:1) For garem faith hem minim for barava bilivim God bae givim reward long olketa wea faithful long hem. Olsem text for tuday storyim, Jehovah laekem iumi for duim best bilong iumi for hem, and for trustim wei wea hem bae blessim iumi. Iumi showimaot iumi tinghae long diswan taem iumi followim wanem Jehovah laekem iumi for duim. w16.12 4:1-3

Man wea worshipim Jehovah for staka year finis hem savve start for “letem body wea sin for bossim” hem. So waswe, wanfala Christian shud no tingim nao olketa samting olsem kaikai, waka, hapitaem, or wei wea hasband and waef showimaot feeling long each other? Nomoa. Olketa samting hia olketa normal samting long laef. Nomata Jesus tu hem enjoyim wei for kaikai, and hem feedim olketa narawan. Jesus luksavve hem important for hem rest tu. And Paul story abaotem wei wea hasband and waef sleep tugeta hem important samting insaed long marit. Greek toktok wea Paul iusim for “tingim samting” hem minim wei wea man putim full tingting and plan bilong hem long wanfala samting. Wanfala savveman sei disfala toktok hem minim “wei wea man hem barava interest long wanfala samting, storyim olowe wanfala samting,” and tingim nomoa samting wea hemseleva laekem. Olketa samting hia wea man laekem tumas nao hem kontrolem wanem hem duim long laef bilong hem. w16.12 2:5, 9, 10

Man savve start for kamap praod sapos hem no kontrolem feeling for laekem samting wea no stret. Wei for mekhae long seleva, jealous long narawan, or no kontrolem kros, savve mekem man duim samting wea showimaot hem praod. Bible storyim samfala man wea kamap praod, olsem Absalom, Uzziah, and Nebuchadnezzar. Jehovah mekem olketa luksavve olketa mas hambol. (2 Sam. 15:1-6; 18:9-17; 2 Chron. 26:16-21; Dan. 5:18-21) Samfala nara reason stap wea mekem pipol tinghae tumas long olketa seleva samfala taem. Tingim example bilong Abimelech and Peter. (Gen. 20:2-7; Matt. 26:31-35) Waswe, tufala man hia tinghae tumas long tufala seleva, or tufala no tingting gud firstaem bifor tufala duim samting? From iumi no savve wanem nao insaed long heart bilong pipol, iumi shud no judgem narawan long samting wea olketa duim. w17.01 3:9, 10

Olsem datfala widow woman wea poor tumas, staka brata and sista distaem sure sapos Kingdom hem first samting long laef bilong olketa, Jehovah bae evritaem provaedem wanem olketa needim. (Matt. 6:33) Tingim wanfala brata wea nem bilong hem Malcolm. Insaed long plande year wea hem and waef bilong hem worshipim Jehovah, tufala kasem staka gud samting and olketa nogud samting tu. Malcolm sei: “Samfala taem samting savve happen wea iumi no expectim and laef savve hard tu. Bat Jehovah blessim olketa wea depend long hem.” Wanem advaes nao Malcolm givim? Hem sei: “Prea long Jehovah for helpem iu for busy long waka bilong hem and duim gud datwan. Tingim wanem iu fit for duim, no wanem iu no fit for duim.” From disfala nogud world “bae worse moa,” iumi savve olketa nogud samting wea kasem iumi bae worse go moa. (2 Tim. 3:1, 13) So hem barava important for no letem olketa hard taem wea kasem iumi for spoelem wei wea iumi fren witim Jehovah. Bat iumi mas trustim Jehovah and duim wanem iumi fit for duim. w17.01 1:17-19

David barava laek for wakem wanfala naes temple for Jehovah. Bat datwan hem no followim tingting bilong Jehovah, olsem iumi lukim long text for tuday. Nomata Jehovah promisim David bae Hem evritaem stap witim hem, Jehovah talem David son bilong hem Solomon nao bae wakem datfala temple. Wanem nao David duim? (1 Chron. 17:1-4, 8, 11, 12; 29:1) Maet David hem barava feel nogud from hem laekem tumas for wakem datfala temple for Jehovah. Nomata olsem, hem barava sapotim son bilong hem Solomon for wakem datfala temple. David organizem waka for hipimap iron, copper, silver, gold, and timba. And tu, hem organizem olketa wakaman for wakem datfala temple. David no feel nogud bikos Solomon nao bae kasem praise for buildim datfala temple, wea gogo olketa kolem temple bilong Solomon. Bat hem encouragem Solomon and sei: “Son bilong mi, Jehovah bae stap witim iu, and bae hem helpem iu for wakem datfala haos bilong Hem.”—1 Chron. 22:11, 14-16. w17.01 5:6, 7

Nomata taem iumi kasem hard taem, iumi duim best bilong iumi for duim wanem God laekem. Taem iumi followim olketa standard bilong hem long laef bilong iumi, iumi praisem nem bilong Jehovah. (Matt. 5:14-16) Iumi showimaot olketa law bilong Jehovah savve helpem iumi, and Satan hem man for laea. From iumi no perfect, bae iumi duim olketa samting wea no stret. Nomata olsem, iumi mas repent and stop for duim olketa samting wea bae spoelem nem bilong Jehovah. Nomata iumi wanfala anointed Christian or iumi bilong “nara sheepsheep,” Jehovah savve forgivim sin bilong iumi sapos iumi showimaot faith long datfala ransom. Jehovah acceptim worship bilong eniwan wea dedicate long hem. Jehovah ting long olketa anointed Christian olsem olketa son bilong hem wea raeteous, and olketa “nara sheepsheep” olsem olketa fren bilong hem wea raeteous. (John 10:16; Rome 5:1, 2; Jas. 2:21-25) So nomata distaem tu ransom openem wei for iumi savve fren gud witim Dadi bilong iumi, and duim samting wea showimaot nem bilong hem holy. w17.02 2:5, 6