May

Jephthah luksavve God nomoa savve helpem hem for winim olketa Ammonite. Hem promisim Jehovah sapos hem winim datfala faet, hem bae givim long Jehovah first wan wea kamaot from haos bilong hem taem hem kam bak from datfala faet. Hem sei datfala man bae olsem “wanfala sakrifaes wea olketa bonem.” (Judg. 11:30, 31) Wanem nao Jephthah minim? Jehovah heitim wei for sakrifaesim man, so iumi savve Jephthah no ting for sakrifaesim samwan. (Deut. 18:9, 10) Long Law bilong Moses, sakrifaes wea olketa bonem hem kaen sakrifaes wea olketa givim full animal long Jehovah. So Jephthah minim man wea hem givim long Jehovah bae waka long tabernacle for full laef bilong hem. Jehovah duim wanem Jephthah askem, and helpem hem for winim olketa enemy. (Judg. 11:32) Taem Jephthah kam bak from datfala faet, first wan wea kamaot from haos for meetim hem, hem dota bilong hem wea hem barava lovem, and hem nomoa pikinini bilong hem! Waswe, Jephthah keepim promis bilong hem? w16.04 1:11-13

No longtaem go nomoa iumi studyim disfala buk, “Gohed Kasem Gud Samting From Love Bilong God” long Kongregeson Bible Study. Long datfala meeting, iumi storyim olketa wei bilong Jehovah and iu herem olketa naesfala koment bilong olketa brata and sista. Masbi datwan strongim wei wea iu lovem Jehovah. Long olketa meeting, iumi lanem moa samting abaotem Bible taem iumi herem olketa tok and Bible reading, and taem iumi lukim olketa demonstration. Olketa meeting teachim iumi for followim olketa Bible principle. (1 Thess. 4:9, 10) Olsem example, Wastaoa Study barava helpem pipol bilong God. Waswe, iu tingim yet eni Wastaoa wea encouragem iu for duim moa samting long waka bilong Jehovah, for forgivim wanfala brata or sista, or wea helpem iu for talem olketa gudfala prea? And tu, meeting wea kamap long midol week savve helpem iumi for duim gud ministry bilong iumi. Iumi lane hao for preachim gud nius and teachim pipol abaotem Bible.—Matt. 28:19, 20. w16.04 3:4, 5

Bible story abaotem samfala wea garem problem witim narawan. Tingim samfala example long Bible buk Genesis. Cain hem killim dae Abel. (Gen. 4:3-8) Lamech killim dae wanfala young man wea hitim hem. (Gen. 4:23) Olketa man wea lukaftarem sheepsheep bilong Abraham raoa witim olketa man wea lukaftarem sheepsheep bilong Lot. (Gen. 13:5-7) Hagar hem ting daonem Sarah, and Sarah hem kros long Abraham. (Gen. 16:3-6) Ishmael raoa witim evri pipol and evriwan les long Ishmael. (Gen. 16:12) Why nao Bible garem olketa story olsem? Wanfala reason hem bikos iumi savve lane from example bilong olketa hia wea no perfect wea garem problem witim narawan. Iumi tu no perfect, so taem iumi garem problem witim narawan, olketa gudfala example insaed Bible savve helpem iumi for savve wanem for duim, and olketa nogud example savve helpem iumi for savve wanem for no duim. w16.05 1:1, 2

Hao nao Jesus and olketa disaepol bilong hem duim preaching waka? Olketa go long eni ples wea pipol stap. Olsem example, olketa preach long street and long olketa market. Olketa preach long pipol long haos bilong olketa tu. (Matt. 10:11; Luke 8:1; Acts 5:42; 20:20) Wei for preach long haos tu haos hem gudfala wei for kasem evri difren kaen pipol. Waswe iumi Olketa Jehovah’s Witness? Iumi nomoa talem long pipol Jesus rul olsem King start long 1914. Iumi obeyim Jesus and iumi putim preaching waka olsem main samting long laef bilong iumi. Datfala buk Pillars of Faith—American Congregations and Their Partners sei: “Main goal bilong Olketa Jehovah’s Witness hem for preach abaotem taem wea disfala world bae finis and for teachim pipol wanem olketa mas duim for sev.” Iumi gohed for talemaot datfala message and iumi followim hao Jesus and olketa disaepol bilong hem preach. w16.05 2:10, 12

Taem iumi mekem olketa disison wea Jehovah bae hapi long hem, datwan helpem iumi for fren gud witim hem, and hem bae blessim iumi. (Jas. 4:8) Then faith bilong iumi long Jehovah bae kamap moa strong. So iumi laek for ting raonem wanem iumi readim long Bible mekem iumi savve minim tingting bilong Jehovah. Hem tru, no enitaem bae iumi stop for lanem niu samting abaotem Jehovah. (Job 26:14) Bat sapos iumi waka hard for lane abaotem hem distaem, bae iumi kamap wise and bae iumi fit for mekem olketa wise disison. (Prov. 2:1-5) Olketa idea and tingting bilong olketa man savve change evritaem, bat Jehovah no savve change. Man wea raetem psalm sei: “Olketa samting wea Jehovah disaedem hem for olowe. Olketa tingting wea stap insaed heart bilong hem bae stap for olowe.” (Ps. 33:11) Iumi savve mekem olketa wise disison taem iumi lane for garem sem tingting olsem Jehovah and then duim samting wea mekem hem hapi. w16.05 3:17

From iumi savve Jehovah savve lukluk long heart and hem leadim pipol kam long hem, iumi shud no judgem pipol long territory bilong iumi or olketa long kongregeson. (John 6:44) Taem iumi luksavve Jehovah hem olsem man wea wakem samting long clay, datwan helpem iumi for garem gudfala tingting abaotem olketa brata and sista bilong iumi. (Isa. 64:8) Olketa no perfect bat olketa gohed yet for lanem olketa wei bilong God. Jehovah lukluk long heart bilong olketa, and hem no tingim nomoa olketa wik point bilong olketa bat hem luksavve wanem olketa fit for duim. (Ps. 130:3) Iumi tu shud tingim gud saed bilong olketa brata and sista, olsem Jehovah hem duim. Taem iumi encouragem brata or sista bilong iumi for gohed gud long spiritual wei, hem olsem iumi waka tugeta witim Jehovah. (1 Thess. 5:14, 15) Olketa elder long kongregeson shud showimaot gudfala example long diswan.—Eph. 4:8, 11-13. w16.06 1:4-6

Taem iumi preachim gud nius long pipol, datwan helpem iumi for hambol and for garem olketa nara gudfala wei tu. (Gal. 5:22, 23) Taem iumi followim example bilong Christ, datwan savve mekem pipol laek for herem message bilong iumi and garem gudfala tingting abaotem iumi. Olsem example, taem tufala Witness long Australia preach long wanfala woman, woman hia barava kros and tok nogud long tufala. Nomata olsem, tufala Witness hia respectim hem and stap kwaet nomoa taem hem tok long tufala. Bihaen, woman hia feel nogud long samting wea hem duim, and hem raet go long branch office. Hem sei sorre from nogud samting wea hem duim. Hem sei: “Mi krangge tumas bikos mi trae for raosem tufala wea laek for talemaot toktok bilong God.” Disfala experience showimaot why hem barava important for iumi hambol and kontrolem seleva taem iumi preach. Hem tru, ministry bilong iumi hem helpem nara pipol, bat hem helpem iumi tu for garem olketa gudfala wei. w16.06 2:12, 13

Iumi evriwan no perfect. (Rome 5:12, 19) So samfala taem maet wanfala brata or sista long kongregeson talem or duim samting wea mekem iumi feel nogud. Diswan savve testim sapos iumi lovem Jehovah and pipol bilong hem or nomoa. Waswe, bae iumi gohed faithful long Jehovah sapos samting olsem hem happen? Olsem example, Hae Priest Eli garem tufala son wea no obeyim olketa law bilong Jehovah. Bible sei: “Olketa son bilong Eli olketa rabis man. Olketa nating respectim Jehovah.” (1 Sam. 2:12) Eli savve tufala son bilong hem duim olketa nogud samting. Bat hem nating disciplinem tufala. Gogo, Jehovah panisim Eli and tufala son bilong hem. And bihaen, Jehovah no letem olketa wea kam from laen bilong Eli for duim waka bilong hae priest. (1 Sam. 3:10-14) Sapos iu stap long datfala taem and iu savve Eli letem tufala son bilong hem for duim olketa nogud samting, wanem nao bae iu duim? Waswe, datwan bae spoelem faith bilong iu and bae iu stop for worshipim Jehovah nao? w16.06 4:5, 6

Jesus storyim why iumi savve trustim datfala promis. Hem sei: “Dadi bilong iufala long heven savve iufala needim olketa samting hia.” Jehovah savve finis long wanem iumi needim bifor iumiseleva luksavve long datwan. (Phil. 4:19) Hem luksavve kaleko wea bae iumi needim. Hem savve tu long kaikai wea iu needim. And hem savve iu and famili bilong iu needim ples for stap. Jehovah bae mek sure iu bae garem wanem iu barava needim. And iumi sure sapos iumi duim wanem hem laekem and Kingdom hem first samting long laef bilong iumi, bae hem givim iumi evri samting wea iumi needim and staka nara samting tu. And tu, iumi luksavve wei wea iumi fren gud witim Jehovah nao savve mekem iumi hapi, and diswan mekem iumi satisfae witim ‘kaikai and kaleko’ wea iumi garem.—1 Tim. 6:6-8. w16.07 1:17, 18

From ransom sakrifaes bilong Jesus, iumi savve kamap fren bilong God. Paul storyim hao diswan join witim wei wea Jehovah kaen tumas taem hem sei long olketa anointed Christian: “Long tingting bilong God, faith bilong iumi nao hem mekem iumi raeteous. So iumi savve gohed fren gud witim God bikos long Lord bilong iumi Jesus Christ. From iumi garem faith long Christ, wei hem stap for God hem kaen long iumi, and hem kaen long iumi distaem.” (Rome 5:1, 2) Iumi hapi tumas from iumi savve fren gud witim Jehovah! Profet Daniel sei long olketa last day, “olketa wea garem wei for luksavve,” wea hem nao olketa anointed Christian, bae “helpem staka pipol for kamap raeteous.” (Dan. 12:3) Hao nao olketa anointed Christian duim datwan? Olketa preachim gud nius and teachim olketa law bilong Jehovah long staka million “nara sheepsheep.” (John 10:16) From Jehovah hem kaen tumas, hem savve ting long olketa hia olsem olketa raeteous.—Rome 3:23, 24. w16.07 3:10, 11

Diswan hem no stret, and olketa woman wea olketa angel hia maritim bornem olketa pikinini wea olsem giant wea Bible kolem olketa Nephilim and olketa raf tumas. (Gen. 6:1-5) Jehovah sei bae hem mekem wanfala flood for kamap long earth for finisim evri nogud pipol. Noah, wea hem man for “preach abaotem samting wea raeteous,” hem preach long pipol abaotem datfala flood. (2 Pet. 2:5) Bat olketa no laek for lisin long Noah bikos olketa busy long olketa samting wea olketa duim evriday, wea wanfala nao hem for marit. Jesus sei taem bilong Noah hem semsem witim taem bilong iumi. (Matt. 24:37-39) Staka pipol distaem no laek lisin long gud nius abaotem Kingdom wea iumi storyim long olketa. Iumi storyim disfala gud nius long pipol bifor end hem kam. Wanem nao iumi savve lanem from olketa samting wea happen long taem bilong Noah? Iumi shud no busy tumas long olketa samting wea iumi duim evriday, olsem for marit and for garem pikinini, gogo iumi no tingim nao day bilong Jehovah wea hem barava klosap. w16.08 1:8, 9

From iumi stap long “olketa last day . . . bae evri samting hem hard tumas.” (2 Tim. 3:1-5) Dastawe iumi mas fren gud witim Jehovah bikos datwan savve protectim iumi. Long text bilong tuday, wanem Paul talem hem no minim olketa wea marit shud no tingim marit partner bilong olketa. Bat from iumi stap long olketa last day, olketa spiritual samting nao mas first samting long laef bilong iumi. (Matt. 6:33) Long distaem wea evri samting hem hard tumas, staka marit brekdaon. Waswe, iumi savve hapi and garem gudfala marit? Yes. Sapos iumi fren gud witim Jehovah and pipol bilong hem, followim olketa Bible principle, and followim lead bilong holy spirit bilong Jehovah, iumi savve garem gudfala marit. Taem iumi duim olketa samting hia, iumi tinghae long “samting wea God joinim finis.”—Mark 10:9. w16.08 2:17, 18

Need hem stap long olketa kongregeson for olketa elder trainim olketa nara brata for kamap ministerial servant and elder. Paul talem Timothy: “Olketa samting wea iu herem from mi and wea olketa narawan tu herem, teachim olketa samting hia long olketa man wea faithful wea bae mekem olketa fit for teachim datwan long narawan tu.” (2 Tim. 2:1, 2) Timothy lanem staka samting from Paul, wea hem wanfala elder and aposol tu. Paul teachim Timothy hao for duim gud preaching waka and hao for helpem olketa brata and sista long kongregeson. (2 Tim. 3:10-12) Paul iusim staka taem for trainim Timothy bikos hem laekem Timothy for duim gud waka bilong Jehovah. (Acts 16:1-5) Olketa elder savve followim example bilong Paul taem olketa tekem olketa ministerial servant wea fit for go witim olketa long samfala shepherding kol. Taem olketa elder duim olsem, olketa ministerial servant lanem hao for teachim narawan, hao for patient and showimaot love, and hao for depend long Jehovah taem olketa “lukaftarem olketa sheepsheep bilong God.” w16.08 4:16, 17

Samfala taem, Bible story abaotem wei wea hand bilong man hem wik. Datwan savve minim man wea hem wikdaon or wea hem no garem hope. (2 Chron. 15:7, ftn; Heb. 12:12) Maet man olsem bae laek for givap nomoa. Iumi stap long nogud world bilong Satan, so staka samting savve mekem iumi wari tumas. Olsem wanfala anchor hem stopem boat for muv, wei for wari tumas hem savve mekem man barava wikdaon and stopem hem for gohed long spiritual wei. (Prov. 12:25) Wanem nao samfala samting wea maet mekem man for wari? Maet iu sorre from famili member or fren hem dae or iu kasem bigfala sik or iu kasem persecution. Or maet iu stragol for kasem selen for lukaftarem famili bilong iu. Gogo, wei for wari savve mekem iu wikdaon and iu no hapi tu. Bat God hem willing for helpem iu.—Isa. 41:10, 13. w16.09 1:2, 4

From iumi no perfect, hem no isi for iumi aotem olketa rong tingting from mind bilong iumi. Samfala stragol for garem stretfala tingting abaotem ministry, and samfala stragol bikos olketa garem problem saed long health or olketa lonely. Olketa narawan faendem hard for forgivim samwan wea duim nogud samting long olketa. Nomata iumi worshipim Jehovah for longtaem finis, iumi evriwan mas faet againstim olketa samting wea mekem hem no isi for iumi faithful long God. Sapos hem nao feeling wea iu garem, prea long Jehovah and askem hem for holy spirit. Prea and holy spirit savve strongim iu for duim samting wea stret, and datwan nao bae mekem iu kasem blessing bilong God. Waka hard for duim samting followim prea bilong iu. Readim Bible evriday and markem taem for duim study seleva and famili worship.—Ps. 119:32. w16.09 2:10, 11

Maet samwan sei long iu, “Mi bilivim evolution bikos olketa scientist sei hem tru. Hao nao iu bilivim God hem stap sapos no eniwan lukim hem enitaem?” Hem nao tingting bilong staka pipol. Hem tru, no eniwan long iumi hem lukim God or lukim taem hem wakem wanfala samting. (John 1:18) Bat waswe long pipol wea bilivim evolution? Olketa tu bilivim samting wea olketa no lukim. No eni scientist or eni man lukim wanfala samting wea hem laef hem isisi change for kamap nara samting. Olsem example, no eniwan lukim wanfala monkey hem isisi change for kamap wanfala man. (Job 38:1, 4) So iumi evriwan mas lukluk gud long olketa pruv wea stap, and ting raonem gud mekem iumi luksavve long wanem nao hem stret. Staka pipol studyim nature and “luksavve” wanfala God hem stap. Olketa luksavve hem nao wakem evri samting hia, hem garem bigfala paoa, and hem garem olketa nambawan wei.—Rome 1:20. w16.09 4:4

Jehovah duim samting for lukaftarem olketa man from difren ples wea stap long Israel. Olsem example, olketa savve kolektem kaikai wea leftova long garden. (Lev. 19:9, 10) Jehovah no talem nomoa olketa Israelite for mas respectim man from difren ples, bat hem laekem olketa for tingim feeling wea olketa seleva garem taem olketa stap long Egypt. (Ex. 23:9) Nomata taem olketa Israelite no kamap slave yet, pipol long Egypt les long olketa bikos olketa difren. (Gen. 43:32; 46:34; Ex. 1:11-14) Laef bilong olketa Israelite hem barava hard taem olketa stap long Egypt. Jehovah laekem olketa for no forgetim datwan and for olketa kaen long pipol from difren ples wea stap witim olketa. (Lev. 19:33, 34) Tingting bilong Jehovah abaotem pipol from difren ples hem no change. So taem eniwan from difren ples hem joinim kongregeson bilong iumi, iumi mas tingim Jehovah laekem iumi for kaen long hem. (Deut. 10:17-19; Mal. 3:5, 6) Iumi mas luksavve olketa hia kasem samfala samting wea hem no isi. Olsem example, maet olketa no savve yet long languis and maet pipol ting daonem olketa. Iumi laek for helpem and kaen long olketa.—1 Pet. 3:8. w16.10 1:3-5

James sei: “Hao nao bae iu showim mi faith bilong iu sapos iu no duim gudfala samting? Mi bae showim iu faith bilong mi taem mi duim gudfala samting.” (Jas. 2:18) James sei man wea garem faith hem no biliv nomoa. Olketa demon bilivim God hem stap, bat olketa no garem faith long Jehovah. Olketa strong for againstim Jehovah. (Jas. 2:19, 20) Bat man wea garem faith, bae hem duim olketa samting wea mekem God hapi. Hem nao samting wea Abraham duim. James sei: “Bihaen dadi bilong iumi Abraham hem putim son bilong hem Isaac long altar for sakrifaesim hem, God ting long hem olsem hem raeteous bikos long gudfala samting wea hem duim. So iu lukim, faith bilong hem showaot long gudfala samting wea hem duim and samting wea hem duim mekem faith bilong hem barava fit nao.” (Jas. 2:21-23) Then James strongim moa datfala point long toktok wea stap long text for tuday. w16.10 4:8

Olketa scientist studyim creation and wakem staka samting followim design bilong olketa samting hia, and iumi kasem staka gud samting from diswan. Bat olketa scientist no savve ansarem staka important kwestin. Olsem example, olketa scientist no barava savve hao nao disfala universe hem start? Or why nao olketa man, animal, and olketa plant stap long earth? And staka pipol no savve why nao iumi olketa man laek for laef olowe? Wanfala reason why pipol no kasem ansa for olketa kwestin hia hem bikos olketa scientist and nara pipol sei no eni God stap and olketa sei evolution hem tru teaching. Bat God hem talem iumi ansa bilong olketa kwestin hia insaed Bible. Jehovah putim staka law for olketa samting wea hem wakem for olketa followim. Olketa law hia no savve change. Olketa electrician, plumber, engineer, pilot, doctor, and olketa narawan tu followim olketa law hia taem olketa duim waka bilong olketa. w16.11 2:4, 5

Staka reason stap for iumi thankiu long Jehovah! Wanfala main samting wea hem duim for iumi nao hem “mekem iumi laef and savve wakabaot and duim samting.” And tu, hem givim iumi Bible. Olsem olketa Christian long Thessalonica, iumi barava tinghae long disfala present bikos hem message wea kam from God. (1 Thess. 2:13) Bible hem helpem iumi for fren gud witim Jehovah, and Jehovah savve fren gud witim iumi tu. (Jas. 4:8) Iumi hapi tumas bikos Dadi bilong iumi long heven hem invaetem iumi for kam insaed long organization bilong hem! Iumi garem sem tingting olsem man wea raetem psalm wea sei: “Talem thankiu long Jehovah bikos hem gud. Love bilong hem stap for olowe.” (Ps. 136:1) Long evri verse bilong Psalm 136, hem garem disfala toktok “love bilong hem stap for olowe.” Tru nao, sapos iumi faithful long Jehovah and followim direction wea kam from organization bilong hem, bae hem givim iumi laef olowe and bae hem lovem iumi for olowe! w16.11 3:18, 19

Datfala scripture hem kamap staka taem insaed long datfala buk Wanem Nao Really Samting wea Bible Teachim? Taem iumi studyim chapter 3, 5, and 6 long datfala buk, maet iumi savve readim Rome 5:12 for helpem olketa pikinini and Bible study bilong iumi for minim why earth hem no paradaes distaem, why iumi needim ransom, and why iumi dae. Bat disfala scripture savve helpem iumi evriwan for tinghae long wei wea iumi fren witim Jehovah. Hem savve helpem iumi tu for gohed duim wanem Jehovah laekem and for luk forward long olketa samting wea hem promisim for iumi long future. Iumi evriwan born sin so evriday nao iumi savve duim samting wea no stret. Nomata olsem, Jehovah savve iumi no perfect and hem willing for forgivim iumi from hem garem mercy. (Ps. 103:13, 14) Jesus sei iumi mas prea long God for hem forgivim olketa sin bilong iumi. (Luke 11:2-4) Taem Jehovah forgivim finis olketa rong wea iumi duim bifor, iumi shud no tingim moa olketa samting hia. w16.12 1:1-3

Olketa Christian long Rome mas lukluk gud long olketa seleva for luksavve wanem nao olketa tingim olowe. Waswe, hem olketa “samting wea body laekem”? Iumi distaem tu mas lukluk gud long iumiseleva for luksavve wanem nao barava important long laef bilong iumi. Wanem nao iumi evritaem laek for storyim? Wanem nao iumi laekem tumas for duim? Maet samfala luksavve olketa evritaem tingim selen, tingting for baem niu kaleko or for wakem big garden or for garem big haos. Or maet olketa laek for aftarem big education or olketa niu samting saed long technology. Long samfala ples, pipol savve laek for traem olketa difren kaen wine evritaem. Hem no rong for garem or duim olketa samting hia, from olketa normal samting long laef. Olsem example, Jesus duim mirakol for changem wata for kamap wine long wanfala marit, and Paul talem Timothy for “drinkim lelebet wine” for sik bilong hem. (1 Tim. 5:23; John 2:3-11) Nomata olsem, wine hem no main samting long laef bilong olketa. Waswe long iumi? Wanem nao main samting long laef bilong iumi? w16.12 2:5, 10, 11

Datfala promis bilong Jehovah hem helpem iumi for trustim wanem Jesus talem abaotem wei wea Kingdom and olketa samting wea God sei hem stret mas first samting long laef bilong iumi. (Matt. 6:33) Wantaem aposol Peter sei long Jesus: “Waswe long mifala? Mifala lusim evri samting and followim iu.” (Matt. 19:27) Jesus no kros long Peter taem hem askem datfala kwestin, bat hem talem olketa disaepol bae olketa kasem blessing nomata olketa lusim samfala samting from olketa followim hem. Olketa aposol and olketa narawan wea faithful bae rul witim Jesus long heven long future. Nomata olsem, Jesus sei olketa disaepol bilong hem bae kasem olketa blessing distaem tu. Hem sei: “Eniwan wea lusim haos or olketa brata or sista or dadi or mami or pikinini or olketa garden bikos hem wanfala disaepol bilong mi, bae hem kasem bak staka samting winim wanem hem lusim, and tu, bae hem kasem laef olowe.” (Matt. 19:29) Olketa disaepol bilong Jesus savve faendem dadi, mami, brata, sista, and pikinini insaed long olketa kongregeson distaem. Datwan hem winim eni samting wea iumi lusim from Kingdom bilong God hem first samting long laef bilong iumi. w16.12 4:4, 5

Jehovah givim nambawan hope long pipol bilong hem! Hem promis for mekem nem bilong hem kamap holy, and for duim wanem hem plan for duim long heven and long earth. (Matt. 6:9, 10) Olketa barava important samting hia nao iumi luk forward long hem. Jehovah hem promis tu for givim laef olowe long iumi olketa man. Samfala garem hope for laef long heven and samfala for laef long earth. Laef bae hem gud tumas long datfala taem! (John 10:16; 2 Pet. 3:13) And long disfala taem bilong end, iumi interest tumas tu for lukim hao Jehovah bae gohed for leadim and sapotim pipol bilong hem. Pipol long world distaem hope for kasem staka samting tu, bat olketa no really sure sapos samting wea olketa hope for hem bae kamap tru. Olsem example, staka pipol wea gambol hope for winim staka thousand dollar, bat olketa no sure sapos olketa bae kasem datwan. Bat faith wea iumi olketa Christian garem hem “mekem [iumi] sure” olketa samting wea iumi hope for hem bae kamap tru. w16.10 3:1, 2

Jehovah hem givim iumi evriwan savve for duim olketa difren kaen samting and hem letem iumi for chusim hao iumi laek for iusim savve wea iumi garem. (Rome 12:4-8) Iumi luksavve Jehovah laekem iumi for iusim difren kaen savve wea iumi garem for mekhae long hem and helpem olketa brata and sista bilong iumi. Maet olketa samting wea iumi duim insaed organization bilong Jehovah savve change samfala taem. Olsem example, tingim olketa change wea kamap long laef bilong Jesus. Long firstaem, hem stap seleva witim Dadi bilong hem. (Prov. 8:22) Then hem helpem Jehovah for creatim olketa angel, wakem disfala universe, and olketa man. (Col. 1:16) Bihaen, Jehovah sendem hem kam long earth. Hem born olsem wanfala baby and then hem growap long disfala earth. (Phil. 2:7) Bihaen Jesus dae, hem go bak long heven, and long 1914 hem kamap King long Kingdom bilong God. (Heb. 2:9) And long future, bihaen Jesus hem rul for wan thousand year, bae hem givim bak datfala Kingdom long Jehovah mekem “God nomoa rul ovarem evriwan.”—1 Cor. 15:28. w17.01 3:11, 12

Taem wanfala woman mas disaedem wanfala samting hem sei long fren bilong hem: “Mi no laek for tingting, iu talem kam nomoa wanem for mi duim. Hem nomoa isi wei.” Datfala woman hem laekem narawan nao for talem hem wanem for duim. Hem no laek for disaedem samting seleva, wea datwan hem nambawan present wea kam from God. Waswe long iu? Iu laek for disaedem samting seleva, or iu laekem narawan nao for disaed for iu? Hao nao tingting bilong iu abaotem wei wea iu free for disaedem samting seleva? Pipol garem olketa difren tingting abaotem wei wea iumi olketa man free for disaed seleva. Samfala pipol sei iumi no free for disaed seleva bikos God disaedem finis evri samting wea happen long laef bilong iumi. Olketa narawan sei sapos iumi savve duim eni samting wea iumi laekem, datwan nao showimaot iumi free for disaed seleva. Bat Bible hem sei God wakem iumi long wei wea iumiseleva savve chusim samting followim gudfala tingting wea iumi garem. w17.01 2:1, 2

Maet long tingting bilong David, Solomon hem no fit yet for duim bigfala waka, olsem for wakem haos bilong God. Datfala temple hem mas “barava luk naes,” bat Solomon hem “young nomoa and no garem bigfala savve” long datfala taem. Nomata olsem, David hem savve Jehovah bae helpem Solomon for duim datfala spesol waka. So David duim wanem hem fit for duim for sapotim Solomon long datfala big waka. Distaem tu, olketa brata wea olo shud no sorre taem olketa mas givim samfala responsibility wea olketa garem long olketa brata wea young. Iumi evriwan luksavve waka bilong Jehovah nao hem barava important distaem. Wei for trainim olketa brata wea young for lukaftarem olketa responsibility hia bae mekem datfala waka gohed. w17.01 5:8, 9

King bilong kingdom, Jesus bae killim dae Satan and finisim evri problem wea hem kosim. Jesus helpem olketa disaepol for tinghae long datfala Kingdom. Hao nao hem duim datwan? Bihaen Jesus baptaes hem start for “talemaot gud nius abaotem Kingdom bilong God” long evri ples wea hem go. (Luke 4:43) Hem talem olketa disaepol bilong hem for talem pipol abaotem hem “long evri farawe ples long earth.” (Acts 1:6-8) Distaem, waka wea iumi duim for preach abaotem Kingdom hem givim chance long pipol for lane abaotem ransom, and wanem olketa mas duim for stap anda long Kingdom bilong God. Taem iumi helpem olketa anointed Christian for preachim gud nius evriwea long world, iumi showimaot iumi stap anda long datfala Kingdom.—Matt. 24:14; 25:40. w17.02 2:7, 8

Nomata governing body garem paoa insaed long kongregeson, olketa luksavve Jesus Christ nao Leader bilong olketa. Hao nao iumi savve long datwan? Paul sei Christ “hem nao hed” bilong kongregeson, wea diswan minim hem Leader long kongregeson. (Eph. 4:15) And olketa no iusim nem bilong eni aposol for kolem long olketa seleva, bat “olketa disaepol kasem datfala nem ‘Christian.’ God nao givim disfala nem long olketa.” (Acts 11:26) Paul luksavve hem important for followim wanem olketa aposol and olketa nara Christian wea lead long kongregeson teachim wea kam from Bible. Nomata olsem, Paul hem sei: “Bat mi laekem iufala for savve Christ hem hed bilong evri man.” Diswan minim each member bilong governing body tu. Then Paul sei tu: “God hem hed bilong Christ.” (1 Cor. 11:2, 3) Tru nao, Jehovah markem Son bilong hem Christ Jesus for leadim kongregeson. w17.02 4:7

Taem iumi showimaot respect long olketa narawan, diswan helpem iumi for no tingim iumiseleva, and hem helpem iumi tu for hambol taem olketa narawan duim samting for showimaot respect long iumi. Hem protectim iumi tu for no wikdaon taem narawan duim samting wea mekem iumi feel nogud. And tu, hem helpem iumi for wan mind witim organization bilong Jehovah. Organization bilong Jehovah no showimaot respect wea ova tumas long eni man, nomata long man wea biliv or no biliv. Nambawan samting wea kamaot from wei for showimaot respect long olketa narawan hem wei wea iumi mekem God hapi. Iumi bae duim samting wea hem laekem iumi for duim and bae iumi faithful long hem. Then Jehovah savve givim ansa long Satan wea sei no eni man savve faithful long Jehovah. (Prov. 27:11) Staka pipol long disfala world no garem stretfala tingting long hao for showimaot respect long olketa narawan. Iumi barava hapi for savve long tingting bilong Jehovah abaotem stretfala wei for showimaot respect long olketa narawan! w17.03 1:13, 20, 21

Olsem dadi bilong Jehoshaphat duim, Jehoshaphat encouragem pipol for gohed worshipim Jehovah. Hem sendem olketa man for go long olketa taon bilong Judah for teachim “Law bilong Jehovah” long pipol. (2 Chron. 17:7-10) Hem go tu long olketa territory bilong kingdom bilong Israel long north, long pipol wea stap long olketa maunten long Ephraim, for olketa kam bak long Jehovah. (2 Chron. 19:4) Distaem, Jehovah laekem pipol evriwea long world for lane abaotem hem, and iumi savve share long disfala waka for teachim pipol. Waswe, iu markem goal for share insaed disfala waka evri month? Waswe, iu laek for teachim Bible long olketa narawan mekem olketa tu savve worshipim Jehovah? Waswe, iu prea long Jehovah abaotem datwan? Sapos iu waka hard, Jehovah bae helpem iu for garem wanfala Bible study. Waswe, iu willing for study witim samwan nomata long taem wea iu markem finis for duim samting for iuseleva? And olsem Jehoshaphat wea trae for helpem olketa narawan for worshipim Jehovah moa, iumi tu savve trae for helpem olketa wea inactive for kam bak long Jehovah. w17.03 3:10, 11