August

Trae for piksarem Judge Gideon and olketa Israelite soldia taem olketa faetem army bilong olketa Midianite and olketa narawan. Datfala faet hem no isi and olketa Israelite taed tumas. Gideon and olketa man bilong hem ronem olketa enemy for full naet for samting olsem 32 kilometer! Olketa Israelite soldia no laek for givap. So Gideon and olketa man bilong hem “gohed for ronem olketa” enemy, and gogo olketa winim olketa nao! (Judg. 7:22; 8:4, 10, 28) Iumi tu insaed long wanfala faet wea no isi and wea mekem iumi taed. Samfala enemy wea iumi faetem nao hem Satan, world bilong hem, and wei wea iumi no perfect. Samfala long iumi faetem olketa enemy hia for staka year finis. Jehovah helpem iumi for winim staka hard samting. Nomata olsem, disfala faet hem no finis yet. Samfala taem maet iumi taed. Or maet iumi wikdaon from end bilong world hem no kam yet. Jesus sei long olketa last day iumi bae kasem olketa barava hard taem and pipol bae spoelem iumi. Bat hem sei tu, sapos iumi gohed and no givap, iumi bae win long disfala faet.—Luke 21:19. w16.04 2:1, 2

Long olketa meeting, iumi studyim Bible and iumi lanem wanem Jehovah laekem iumi for duim. (Isa. 30:20, 21) Samfala wea no worshipim Jehovah wea kam long olketa meeting, luksavve God hem leadim iumi. (1 Cor. 14:23-25) Jehovah teachim iumi long olketa meeting and holy spirit bilong hem stap witim iumi long olketa meeting. So taem iumi go long olketa meeting, iumi herem wanem Jehovah talem, iumi luksavve hem barava lovem iumi, and iumi fren gud witim hem. Jesus, wea hem Hed bilong kongregeson, sei: “Taem tu or thrifala man hipap tugeta bikos long nem bilong mi, mi stap witim olketa.” (Matt. 18:20) Bible sei tu Jesus “wakabaot midolwan” long olketa kongregeson. (Rev. 1:20–2:1) Tru nao, Jehovah and Jesus stap witim iumi long olketa meeting and strongim iumi. Jehovah barava hapi taem hem lukim iu traem best bilong iu for fren gud witim hem and Son bilong hem. w16.04 3:13, 14

Long wanfala hapitaem, wanfala sista talem wanfala toktok long tufala brata. Bat wanfala long tufala no hapi long wanem sista hia talem, and taem sista lusim tufala, hem talem feeling bilong hem long nara brata. Bat nara brata hia storyim wei wea datfala sista hem faithful long Jehovah for 40 year nomata hem kasem staka hard taem. Hem sei hem no tingse datfala sista min for spoelem feeling bilong datfala brata. Wanem nao brata wea feel nogud hem duim? Hem sei: “Iu tok tru.” Then hem disaed for forgetim nomoa samting wea happen. Wanem nao iumi lanem from disfala experience? Iumiseleva nao savve disaed sapos iumi bae letem samting wea narawan talem or duim for mekem iumi feel nogud. Man wea showimaot love bae hem willing for forgivim narawan. (Prov. 10:12; 1 Pet. 4:8) Jehovah hem hapi tumas taem iumi forgivim narawan. (Prov. 19:11) So sapos eniwan talem or duim samting wea mekem iumi feel nogud, tingim diswan: ‘Waswe, hem samting wea mi shud gohed tingim? Or waswe, hem samting wea mi savve forgetim nomoa?’ w16.05 1:8, 9

Hu nao preachim gud nius abaotem Kingdom long disfala taem? Hem Olketa Jehovah’s Witness nomoa! Hao nao iumi savve long datwan? Bikos iumi talemaot stretfala message long pipol, wea hem nao gud nius abaotem Kingdom. Iumi go faendem pipol, so datwan showimaot hao iumi duim disfala waka hem stret. Stretfala reason nao mekem iumi for go preach, wea datwan nao from iumi lovem Jehovah and iumi lovem pipol. Iumi preach long pipol long evri kantri and languis. And iumi bae gohed for preachim gud nius abaotem Kingdom go kasem end! Iumi barava tinghae long nambawan waka wea pipol bilong Jehovah duim for preachim gud nius long olketa last day distaem. Bat wanem nao mekem iumi fit for duim disfala waka? Aposol Paul givim ansa long text for tuday. Iumi prea long Jehovah for strongim iumi for gohed duim best bilong iumi for preachim gud nius!—2 Tim. 4:5. w16.05 2:17, 18

Taem iumi chus for obeyim God and waka hard for duim wanem hem laekem, iumi showimaot iumi lovem hem and laek for mekem hem hapi. Satan sei Jehovah no garem raet for rul. Bat taem iumi obeyim Jehovah, iumi showimaot iumi laekem hem nao for rulim iumi. And iumi sure Dadi bilong iumi long heven barava tinghae long evri samting wea iumi duim for obeyim hem. (Job 2:3-5; Prov. 27:11) Taem iumi waka hard for kontrolem olketa wik point bilong iumi nomata hem no isi, datwan showimaot iumi faithful long Jehovah and laekem hem nao for rulim iumi. Jehovah talem iumi for waka hard for followim olketa wei bilong hem. (2 Pet. 1:5-7; Col. 3:12) And tu, hem laekem iumi for waka hard for kontrolem tingting and feeling bilong iumi. (Rome 8:5) Taem iumi waka hard for changem wei bilong iumi and iumi win long datwan, datwan mekem iumi barava hapi. w16.05 4:12, 13

Jehovah savve long evri samting abaotem iumi. Hem savve long olketa wik point bilong iumi, wanem iumi fit for duim and no fit for duim, and olketa samting wea iumi duim finis for obeyim hem. (Ps. 103:10-14) Wei wea Jesus deal witim olketa aposol bilong hem helpem iumi for luksavve long tingting bilong Jehovah abaotem iumi. Samfala taem olketa aposol raoa abaotem hu long olketa nao hem important. Sapos iu stap witim olketa aposol taem olketa raoa, bae iu ting hao long olketa? Maet iu ting olketa praod and hem hard for olketa changem wei bilong olketa. Bat Jesus savve olketa fit for change. So hem kaen and patient witim olketa taem hem givim kaonsel long olketa, and hem encouragem olketa for followim example bilong hem for hambol. (Mark 9:33-37; 10:37, 41-45; Luke 22:24-27) Bihaen Jesus laef bak, olketa aposol kasem holy spirit bilong God and olketa no raoa moa abaotem hu long olketa hem important. Bat olketa gohed strong for duim preaching waka.—Acts 5:42. w16.06 1:10

No eni god olsem Jehovah and hem nomoa trufala God. (2 Sam. 7:22) So datfala toktok bilong Moses helpem olketa Israelite for no forgetim olketa mas worshipim Jehovah nomoa. Olketa shud no followim wei bilong pipol wea stap raonem olketa wea worshipim staka false god. Pipol hia tingse olketa god bilong olketa savve kontrolem samfala samting long nature. Olsem example, pipol long Egypt worshipim Ra, wea hem god bilong sun, Nut, wea hem woman god bilong skae, Geb, wea hem god bilong earth, and Hapi, wea hem god bilong Nile River. And olketa bilong Egypt worshipim staka animal tu. Jehovah showimaot hem strong winim olketa false god hia taem hem mekem Tenfala Trabol for kasem pipol long Egypt. Staka pipol long Canaan tu worshipim Baal, wanfala false god wea olketa sei hem nao givim laef long evri samting. Olketa sei tu hem god bilong skae, rain, and big wind. Pipol long staka ples trustim Baal for protectim olketa. (Num. 25:3) Taem Moses sei “wanfala Jehovah nomoa hem stap,” hem laekem olketa Israelite for rememberim God bilong olketa, Jehovah, hem nomoa “trufala God” wea barava difren from olketa nara god.—Deut. 4:35, 39. w16.06 3:4, 5

Example bilong Jesus helpem iumi for mas gohed faithful long Jehovah and for no lusim organization bilong hem. And iumi garem olketa gudfala reason for duim datwan. Iumi luksavve Jehovah leadim pipol bilong hem distaem. Hem helpem olketa for preachim gud nius long evri ples long world, and olketa nomoa duim disfala waka. From Jehovah teachim pipol bilong hem staka gudfala samting, olketa garem wan mind and olketa hapi. Profesi long Isaiah 65:14 story olsem abaotem datwan: “Olketa servant bilong mi bae singaot from olketa hapi bikos heart bilong olketa hem fulap witim gudfala samting.” Iumi barava hapi bikos Jehovah leadim iumi and helpem iumi for duim staka gudfala samting. Bat pipol long world no hapi and no garem eni hope for future. Bat samting wea iumi laek for duim nao hem for gohed faithful long Jehovah and duim wanem hem talem. w16.06 4:10-12

Iumi savve lanem samting from olketa man wea security long olketa taon bifor. Staka taon hia, olsem Jerusalem, garem olketa haefala wall mekem olketa enemy no savve kam insaed. Olketa man wea security savve standap antap long olketa wall hia mekem olketa savve lukim evri ples raonem datfala taon. Olketa narawan go security long olketa gate bilong datfala taon. Evri man hia wea security mas gohed for lukaot long naet and long daytaem, and sapos olketa lukim olketa enemy kam, olketa mas warnim pipol long datfala taon. (Isa. 62:6) Olketa savve hem barava important for gohed wekap and lukluk gud long wanem hem gohed happen raonem datfala ples. Sapos olketa no duim olsem, staka pipol savve dae. (Ezek. 33:6) Josephus, wea raetem history bilong olketa Jew sei army bilong Rome kam insaed long Jerusalem long 70 C.E. Olketa wea security long northwest saed bilong datfala taon olketa sleep so olketa soldia bilong Rome kam insaed long datfala taon. Olketa go insaed long temple, olketa bonem, and distroem full Jerusalem. Datwan hem lastfala part bilong barava bigfala trabol wea kasem datfala nation bilong olketa Jew. w16.07 2:2, 7, 8

From Jehovah hem kaen tumas, iumi kasem staka blessing. Nomata olsem, iumi mas no tingse hem olraet nomoa for duim sin bikos God hem kaen tumas long iumi. Samfala Christian long first century “nating shame for duim rong samting and [olketa] sei datwan hem olraet nomoa bikos God hem kaen tumas.” (Jude 4) Luk olsem olketa Christian hia tingse olketa savve duim sin and Jehovah bae gohed forgivim olketa. Olketa Christian hia no faithful and olketa trae for switim olketa nara Christian tu for duim nogud samting. Distaem tu, eniwan wea duim olsem hem “nating respectim datfala spirit bilong God wea showimaot love bilong hem.” (Heb. 10:29) Satan trikim samfala Christian distaem for mekem olketa tingse olketa savve duim sin and Jehovah bae gohed forgivim olketa. Hem tru, Jehovah hem willing for forgivim olketa wea repent from sin wea olketa duim. Nomata olsem, hem laekem iumi for waka hard for winim olketa wik point bilong iumi and no duim sin. w16.07 3:16, 17

Sapos hasband and waef divorce bat hem no bikos eniwan long tufala durong, Bible sei tufala evriwan no free for maritim narawan. Samfala taem, maet wanfala Christian disaed for forgivim hasband or waef bilong hem wea durong and wea hem repent. Olsem example, profet Hosea forgivim waef bilong hem Gomer wea durong. Jehovah tu hem forgivim olketa Israelite wea repent. (Hos. 3:1-5) Nara samting tu, sapos wanfala Christian disaed for sleep moa witim hasband or waef bilong hem wea durong, datwan showimaot hem forgivim hem nao, and no eni reason stap for tufala divorce. Bihaen Jesus talem toktok wea stap long text for tuday, hem story abaotem olketa wea singol. Hem sei: “Sapos man hapi for stap singol olsem, hem gud nomoa.” (Matt. 19:10-12) Staka disaed for no marit mekem olketa savve duim moa samting long waka bilong Jehovah. Olketa hia fit for kasem praise for disfala disison wea olketa mekem! w16.08 1:15, 16

Olketa young wan savve duim staka samting for sapotim waka bilong Jehovah bikos olketa strong and healthy. (Prov. 20:29) Samfala young wan long Bethel duim waka for printim olketa buk and Bible. Staka young brata and sista buildim or fixim olketa Kingdom Hall. Olketa narawan help long disaster relief waka. And staka pioneer wea young lanem wanfala languis or go stap long nara ples for preachim gud nius. Man wea raetem psalm hem sei: “Lane abaotem Jehovah and bae iu lukim wei wea hem gud tumas.” Hem sei tu: “Olketa wea lukaotem Jehovah bae no short long eni gudfala samting.” (Ps. 34:10) Tru tumas, taem iumi duim best bilong iumi long waka bilong Jehovah, bae iumi barava hapi bikos iumi savve iumi duim wanem hem laekem. And bae hem duim wanem hem promisim for lukaftarem iumi. w16.08 3:5, 8

Jehovah hem willing and garem paoa for helpem iumi, and tu, hem givim holy spirit bilong hem for strongim iumi. (1 Chron. 29:12) Hem barava important for iumi askem God for givim iumi spirit bilong hem mekem hem strongim iumi for faet againstim Satan and nogud world bilong hem. (Ps. 18:39; 1 Cor. 10:13) Iumi tinghae tu long wei wea Bible savve helpem iumi. Evri month iumi lanem staka samting tu from olketa pablikeson bilong iumi. Zechariah raetem toktok wea stap long Zechariah 8:9, 13 long taem wea olketa Jew buildim bak wall bilong Jerusalem. Olketa toktok hia hem barava fitim iumi distaem tu. Jehovah strongim iumi long narafala wei tu. Iumi kasem Bible instruction long olketa meeting, assembly, convention, and olketa Bible skul bilong iumi. Olketa samting hia savve helpem iumi for worshipim God from iumi lovem hem, garem olketa spiritual goal, and duim wanem Jehovah laekem. (Ps. 119:32) Waswe, olketa instruction hia wea kam from Jehovah strongim iu? w16.09 1:10, 11

Law bilong Moses showimaot Jehovah hem barava heitim wei wea man werem kaleko bilong woman and woman werem kaleko bilong man. Staka distaem tu duim semkaen samting. (Deut. 22:5) Law bilong Moses helpem iumi for luksavve Jehovah heitim wei for eniwan werem kaleko wea mekem hem hard for luksavve sapos hem man or hem woman. Olketa Bible principle savve helpem iumi for mekem olketa gudfala disison saed long kaleko wea iumi werem. Iumi savve followim olketa principle hia nomata wanem kantri iumi stap long hem or culture bilong iumi. Iumi no needim wanfala long list for talem iumi kaleko wea fitim and no fitim, bat wei for followim olketa Bible principle savve helpem iumi for chusim kaleko wea iumi laekem and wea God bae hapi long hem. w16.09 3:3, 4

Tingim tu wei wea olketa man wea raetem Bible olketa honest. Olketa no hol bak for storyim tru samting wea happen. Samfala man wea raet wea stap laef long datfala taem storyim nomoa olketa gud samting abaotem kantri and olketa leader bilong olketa. Bat olketa profet bilong Jehovah raet abaotem olketa gud samting and nogud samting wea pipol long Israel and olketa king bilong olketa duim. (2 Chron. 16:9, 10; 24:18-22) Olketa storyim tu rong samting wea olketa seleva duim, and wea olketa narawan wea worshipim Jehovah olketa duim. (2 Sam. 12:1-14) Taem pipol followim advaes long Bible long laef bilong olketa, olketa kasem gud samting. Diswan mekem olketa barava sure God nao givim kam Bible. (Ps. 19:7-11) Bible hem helpem staka pipol for luksavve samfala samting wea olketa bilivim hem no tru. (Ps. 115:3-8) Bible helpem pipol for depend long Jehovah, wea hem nao Olmaeti God. And tu, Bible storyim olketa nambawan promis for future. Bat pipol wea bilivim evolution mekem olketa samting long nature nao for kamap god bilong olketa. Olketa narawan sei gavman bilong man nao bae duim samting for mekem pipol garem gudfala future. Bat kam kasem distaem, olketa gavman hia no fit for stretem olketa problem long world.—Ps. 146:3, 4. w16.09 4:10, 11

From Boaz luksavve Ruth hem woman from difren ples and laef bilong hem no isi, hem laek for helpem hem. Hem talem Ruth for go witim olketa nara young woman wea waka for hem mekem olketa man no mek trabol long hem. Hem mek sure tu Ruth garem kaikai and wata for drink, olsem olketa wakaman bilong hem. Boaz respectim disfala poor woman from difren ples and talem hem for no wari. (Ruth 2:8-10, 13, 14) Boaz kaen long Ruth bikos Ruth lovem mami-in-law bilong hem, Naomi, and bikos Ruth worshipim Jehovah and depend long Jehovah for protectim hem. Wei wea Boaz kaen long Ruth showimaot hem followim example bilong Jehovah for lovem pipol bilong difren ples. (Ruth 2:12, 20; Prov. 19:17) Distaem tu, wei wea iumi kaen maet helpem “evri difren kaen man” for lanem truth and luksavve Jehovah barava lovem olketa.—1 Tim. 2:3, 4. w16.10 1:10-12

Taem iumi luksavve Jehovah hem ansarem olketa prea bilong iumi and givim iumi wanem iumi needim long barava taem, datwan strongim faith bilong iumi. (1 John 5:14, 15) Iumi mas ‘gohed for askem’ Jehovah for holy spirit bilong hem mekem iumi savve garem strongfala faith. (Luke 11:9, 13) Taem iumi prea long Jehovah, iumi shud no askem hem nomoa for olketa samting wea iumi needim. Iumi shud talem thankiu long Jehovah and praisem hem evriday bikos hem duim staka nambawan samting! (Ps. 40:5) Pipol bilong Jehovah savve prea tu for olketa brata and sista bilong olketa raonem world. Olsem example, iumi “tingim olketa wea stap long prison.” Iumi prea tu for ‘olketa wea leadim iumi.’ Taem iumi lukim wei wea Jehovah ansarem olketa prea bilong iumi, datwan strongim faith bilong iumi long hem and iumi fren gud witim hem!—Heb. 13:3, 7. w16.10 3:8, 9

Pipol bilong Jehovah garem faith long Kingdom bilong God and olketa sapotim datfala Kingdom. And olketa lovem each other tu. Diswan hem bikos holy spirit bilong God nao leadim olketa long laef bilong olketa. (Gal. 5:22, 23) Wanem nao kamaot from datwan? Winim eit million brata and sista raonem world olketa stap long peace and garem wan mind insaed long olketa kongregeson. Tru nao, Jehovah blessim iumi from iumi garem faith and love! No eniwan moa savve duim datwan. God nomoa helpem pipol bilong hem for garem wan mind olsem. Hem fitim for hem kasem praise. (Isa. 55:13) Jehovah bae gohed helpem staka pipol for garem faith long hem, and gogo earth bae fulap witim pipol wea perfect, raeteous, and wea hapi for praisem Jehovah for olowe! w16.10 4:18, 19

Direction wea iumi kasem from olketa elder hem kam from Bible. Long first century, samfala insaed long olketa kongregeson ‘laef bilong olketa hem olobaot.’ Olketa “no waka bat olketa poke nose long samting wea hem no bisnis bilong olketa.” Olketa elder trae for stretem olketa, bat olketa les for changem wei bilong olketa. Paul talem olketa long kongregeson wanem for duim long eniwan wea garem kaen wei olsem. Hem sei: “Iufala mas lukluk gud long hem and stap klia long hem.” Olketa mas no associate witim hem, bat long semtaem olketa mas no ting long hem olsem enemy. (2 Thess. 3:11-15) Olketa elder distaem bae helpem tu eniwan wea no laek for followim olketa standard bilong God. Olsem example, man wea frenim samwan wea no worshipim Jehovah. (1 Cor. 7:39) Sapos olketa elder long kongregeson bilong iu givim wanfala tok abaotem datwan, wanem nao bae iu duim? Waswe, bae iu gohed for fren gud witim samwan wea no laek for followim standard bilong Jehovah? Taem iu duim datwan, maet iu helpem hem for changem wei bilong hem. w16.11 2:13

Long Pentecost 33 C.E., staka thousand niu wan nao God anointim witim holy spirit. Olketa anointed Christian hia kamap ‘pipol wea God chusim, olketa priest wea rul olsem king, wanfala holy nation, and spesol pipol bilong God.’ (1 Pet. 2:9, 10) Olketa aposol lukaftarem gud olketa kongregeson taem olketa laef. Bat bihaen olketa dae, samfala insaed kongregeson start for teachim olketa laea teaching mekem olketa “disaepol followim olketa.” (2 Thess. 2:6-8) Olketa man hia laekem tumas olketa idea and teaching bilong Aristotle and Plato. Olketa start for teachim olketa idea hia insaed long kongregeson and no teachim tru teaching wea kam from toktok bilong God. Staka long olketa hia hem olketa overseer insaed kongregeson. Nomata Jesus talem long olketa disaepol “iufala evriwan olketa brata,” samfala Christian kamap olketa bigman insaed long olketa kongregeson.—Matt. 23:8. w16.11 4:8

Bifor iumi kamap Christian, maet iumi sin staka taem bikos iumi no luksavve long tingting bilong God abaotem olketa samting hia. Hem olsem iumi kamap ‘slave bilong samting wea no klin and iumi duim samting wea no stret,’ wea minim iumi “slave bilong sin.” (Rome 6:19, 20) Bat taem iumi lanem insaed Bible wanem God laekem iumi for duim, iumi changem olketa nogud wei bilong iumi, dedicate long hem and iumi baptaes. Iumi “free nao from wei for slave long sin” and kamap “slave bilong God and duim stret samting.” (Rome 6:17, 18) Iumi savve duim nogud samting wea body laekem or iumi savve kontrolem iumiseleva. Hem gud for ting raonem olketa kwestin hia: ‘Waswe, mi letem feeling for laekem nogud samting grow insaed heart bilong mi gogo mi duim rong samting? Or mi kwiktaem aotem datfala tingting?’ Sapos iumi barava tinghae long wei wea God hem kaen tumas long iumi, iumi bae duim best bilong iumi for mekem hem hapi. w16.12 1:11, 12

Iumi thankiu long Jehovah from hem nao givim iumi trufala peace long mind. Iumi savve stap long peace tu witim famili bilong iumi and olketa brata and sista long kongregeson. From iumi no perfect, samfala taem iumi bae garem problem witim olketa brata and sista bilong iumi. Taem samting olsem happen, iumi laek for followim disfala advaes bilong Jesus: “Stretem datfala problem witim brata bilong iu.” (Matt. 5:24) No forgetim diswan: Olketa brata and sista bilong iu tu worshipim Jehovah, datfala “God wea givim peace.” (Rome 15:33; 16:20) Sapos iumi “tingim samting bilong spirit” bae iumi garem peace witim God. Profet Isaiah raet olsem: “Bae iu [Jehovah] protectim olketa wea barava depend long iu. And peace wea iu givim long olketa bae no savve finis bikos olketa trustim iu.”—Isa. 26:3; Rome 5:1. w16.12 2:5, 18, 19

Nomata iumi stap long olketa last day long world bilong Satan, Jehovah hem gohed for blessim iumi. Hem givim iumi staka spiritual kaikai and iumi stap gud insaed wanfala spiritual paradaes. (Isa. 54:13) Tru nao, olsem Jesus promisim, reward wea Jehovah givim long iumi distaem hem nao olketa spiritual brata and sista bilong iumi evriwea long world. (Mark 10:29, 30) And tu, olketa nara reward wea iumi kasem distaem, hem nao for garem peace long heart, wei for satisfae, and hapi. (Phil. 4:5-7) Iu savve sure ‘bihaen iu duim wanem God hem laekem,’ iu bae “kasem samting wea hem promisim.” (Heb. 10:35, 36) So iumi laek for gohed strongim faith bilong iumi and duim best bilong iumi for worshipim Jehovah. Iumi barava sure Jehovah bae givim reward long iumi.—Col. 3:23, 24. w16.12 4:17, 20

From wei wea iumi free for disaedem samting hem garem olketa spialaen, waswe, datwan minim iumi barava free? Yes! Why nao olsem? Bikos olketa spialaen wea Jehovah putim hem for protectim iumi. Olsem example, maet iumi disaed for draevem trak for go long wanfala farawe ples. Bat tingim sapos olketa no putim eni rul for man followim taem hem draev long datfala road. Man seleva nao disaedem which saed long road for go long hem, and man seleva speed followim hao hem laekem. Waswe, bae iu feel sef for draev followim datfala road? Maet nomoa. For iumi evriwan kasem gud samting from wei wea iumi free for disaed, iumi need for garem olketa spialaen. Tingim example bilong Adam. Hem chus for kaikaim datfala frut wea God tambuim, wea datwan showimaot hem no obeyim law bilong Jehovah. From Adam no iusim wei wea hem free for disaed seleva long stretfala wei, olketa man safa for staka thousand year. (Rome 5:12) Taem iumi savve long olketa barava nogud samting wea kamaot from disison bilong Adam, datwan bae helpem iumi for iusim gud wei wea iumi free for disaed seleva and for obeyim olketa law bilong Jehovah. w17.01 2:6, 8

Taem iumi kasem wanfala niu assignment, Jehovah laekem iumi for hambol taem iumi duim wanem hem laekem. (Mic. 6:8) So taem iumi kasem wanfala niu assignment, iumi laek for followim example bilong Gideon for askem Jehovah for helpem iumi. Iumi prea long Jehovah and barava ting raonem wanem Bible talem and direction wea kam from organization bilong Jehovah. Iumi mas no forgetim diswan: Eni waka wea iumi duim for Jehovah, hem no bikos iumi garem bigfala savve bat hem bikos Jehovah hem hambol and willing for helpem iumi. (Ps. 18:35) Man wea hambol bae duim wanem Jehovah laekem. w17.01 3:17, 18

Jesus savve olketa narawan nao bae gohed for duim waka wea hem startim. Hem savve olketa disaepol bilong hem no perfect. Bat hem trustim olketa and sei olketa bae duim bigfala waka winim waka wea hem duim. (John 14:12) Hem trainim olketa gud, and olketa talemaot gud nius long full world long datfala taem. (Col. 1:23) Bihaen Jesus hem dae, Jehovah mekem hem laef bak and kasem samfala responsibility moa. And tu, Jehovah givim hem paoa wea “winim evri gavman and paoa and rul.” (Eph. 1:19-21) Sapos iumi faithful and iumi dae bifor Armageddon, iumi bae laef bak and garem staka waka for duim long niu world wea mekem iumi hapi. Distaem iumi evriwan garem important waka for talemaot gud nius and teachim pipol for kamap disaepol. So nomata iumi young or iumi olo, iumi evriwan savve gohed “busy long waka bilong Lord.” w17.01 5:17, 18

Jehovah peim finis full price for sevem iumi. (Heb. 9:24-26) Adam mekem iumi kasem sin and dae, bat sakrifaes bilong Jesus bae mekem iumi kasem laef olowe. Ransom savve mekem iumi free from world bilong Satan, and mekem iumi no fraet for dae. (Heb. 2:14, 15) Iumi savve barava trustim olketa promis bilong God. Long sem wei wea olketa law bilong nature bae nating change, Jehovah tu bae no change. No enitaem bae hem talem samting and no duim datwan. Jehovah givim iumi laef and staka nara samting tu. Hem showimaot barava bigfala love for iumi. Bible sei: “[Iumi] savve God hem lovem [iumi] and [iumi] bilivim datwan hem tru. God hem love.” (1 John 4:16) Olketa samting wea God promisim bae evritaem kamap tru. Klosap nao earth bae kamap wanfala paradaes. Evriwan bae garem olketa wei bilong Jehovah and lovem each other. Then evriwan wea worshipim hem long heven and long earth bae sei: “God bilong iumi wea garem wisdom, paoa, and strong, mas kasem praise and glory, and evriwan mas barava respectim hem and talem thankiu long hem for olowe. Amen.”—Rev. 7:12. w17.02 2:16, 17

The Watchtower bilong June 1, 1973 hem ask olsem: “Waswe, man wea no stop for smoke bae hem fit for baptaes?” Hem storyim olketa Bible principle wea showimaot man wea duim olsem hem no fit for baptaes. And tu, hem talem samfala scripture and explainim why nao man wea no stop for smoke hem shud disfellowship. (1 Cor. 5:7) Hem sei disfala strongfala kaonsel hem no kam from eni man bat hem kam “from God, wea talem tingting bilong hem insaed long Bible.” Wanfala buk long United States wea storyim religion sei: “Olketa bigman bilong religion evritaem reviewim and changem lelebet teaching bilong olketa followim tingting bilong olketa member bilong olketa. Olketa duim olsem mekem olketa member hia no lusim religion bilong olketa and nara pipol sapotim olketa.” No eni nara religion hem barava followim samting wea Bible talem nomata maet datwan hem no isi for samfala member bilong hem. w17.02 4:15

Olketa elder olketa barava hambol. Olketa no laekem iumi for ting long olketa olsem olketa famous pipol. Olketa barava difren from staka bigman bilong religion distaem and olketa bigman long taem bilong Jesus. Jesus sei olsem abaotem olketa: “Olketa laek for sidaon long best ples long feast, and taem olketa go insaed sinagog olketa laek for sidaon long olketa chair long front. Olketa laekem pipol long market for mekhae long olketa.” (Matt. 23:6, 7) Olketa elder obeyim disfala toktok bilong Jesus: “Iufala mas no letem eniwan kolem iufala Teacher bikos wanfala Teacher nomoa iufala garem, bat iufala evriwan olketa brata. And tu, no kolem eniwan long earth dadi bilong iufala bikos wanfala Dadi nomoa iufala garem and hem stap long heven. No letem eniwan kolem iufala Leader, bikos wanfala Leader nomoa iufala garem, and hem nao Christ. Sapos eniwan long iufala laek for bigman, hem mas man for helpem iufala.” (Matt. 23:8-11) Taem olketa elder long olketa kongregeson evriwea long world hambol and obeyim toktok bilong Jesus, olketa brata and sista bae lovem, respectim and tinghae long olketa. w17.03 1:14, 15

Hem important for iumi depend long toktok bilong God bikos datwan savve helpem iumi for mekem olketa wise disison. Iumi shud no depend long olketa narawan for disaedem samting for iumi. Bat iumiseleva nao shud savve long wanem God sei hem stret and then followim datwan. Wanem nao iumi maet duim wea showimaot iumi letem olketa narawan mekem disison for iumi? Hem nao sapos iumi letem narawan forcem iumi for followim idea bilong hem gogo iumi mekem rong disison. (Prov. 1:10, 15) Datwan hem no stret bikos iumiseleva nao shud disaedem samting followim konsens bilong iumi wea kasem training from Bible. Sapos iumi letem olketa narawan mekem disison for iumi, datwan showimaot iumiseleva nao disaed for followim olketa. Iumi bae no kasem eni gud samting sapos iumi duim olsem. Aposol Paul warnim olketa Christian long Galatia for no depend long olketa narawan for mekem disison for olketa. (Gal. 4:17) Samfala Christian long Galatia laek for mekem disison for olketa narawan insaed long kongregeson. Why nao olketa laek for duim olsem? Bikos olketa laekem olketa narawan long kongregeson for followim olketa, and no followim olketa aposol. w17.03 2:8-10

Josiah waka hard and duim staka samting for mekem Jehovah hapi. Sapos iu wanfala young wan, iu savve followim example bilong Josiah mekem iu savve barava fren gud witim Jehovah. Maet Josiah luksavve Jehovah hem willing for forgivim man bikos God forgivim grandadi bilong hem King Manasseh taem hem repent. Iu tu savve lane from olketa mature brata and sista insaed long kongregeson and from olketa long famili bilong iu. Olketa savve storyim staka gud samting wea Jehovah bin duim for olketa. And tu, tingim feeling bilong Josiah bihaen olketa readim Law bilong God long hem. Hem barava laek for mekem Jehovah hapi and hem kwiktaem duim samting. Taem iu readim Bible, datwan savve helpem iu for gohed obeyim Jehovah. Datwan bae strongim wei wea iu fren witim Jehovah and bae iu barava hapi. Then bae iu laek for story abaotem Jehovah long nara pipol. (2 Chron. 34:18, 19) Taem iu studyim Bible, maet iu luksavve iu savve duim samfala samting moa long worship bilong iu. Sapos datwan happen, traem best bilong iu for duim datwan, olsem Josiah hem duim. w17.03 3:18, 19