September

Taem Bible story abaotem wei for no givap, hem no minim nomoa wei for deal witim olketa hard taem. Hem minim tu wei for garem stretfala tingting abaotem hard taem wea kasem iumi, wea diswan helpem iumi for no fraet, iumi garem faith, and iumi patient. Wanfala reference buk sei wei for no givap savve helpem iumi for garem strongfala hope and for nating givap nomata iumi kasem barava hard taem. Nomata iumi kasem nogud samting iumi savve win bikos iumi tingim evritaem goal bilong iumi. Man wea garem love bae no givap. (1 Cor. 13:4, 7) Love for Jehovah hem helpem iumi for no givap nomata iumi kasem eni hard samting. (Luke 22:41, 42) Love wea iumi garem for olketa brata and sista hem helpem iumi for gohed forgivim mistek wea olketa duim. (1 Pet. 4:8) Love wea hasband and waef garem for each other hem helpem tufala for deal witim olketa “hard taem” wea savve kamap long marit and hem helpem tufala for strongim marit bilong tufala.—1 Cor. 7:28. w16.04 2:3, 4

Olketa Christian long first century evritaem hipap tugeta for worshipim Jehovah. And olketa no stop for hipap tugeta, nomata taem gavman bilong Rome and olketa bigman long Jew religion againstim olketa. Nomata hem no isi, olketa traem best for evritaem hipap tugeta. Pipol bilong Jehovah distaem tu barava tinghae long olketa meeting. George Gangas, wea hem member bilong Governing Body for winim 22 year hem sei: “Wanfala samting wea mekem mi hapi tumas hem taem mi hipap witim olketa brata. Datwan barava encouragem mi.” Hem sei tu: “Mi laekem tumas for go long evri meeting.” Waswe, iu tu laekem tumas for hipap witim pipol bilong Jehovah for worshipim hem? Sapos olsem, traem best bilong iu for evritaem go long olketa meeting nomata hem no isi. Showim long Jehovah iu garem sem feeling olsem King David, wea sei: “Jehovah, mi laekem tumas for stap long haos bilong iu.”—Ps. 26:8. w16.04 3:16-18

Sapos iu savve wanfala brata or sista feel nogud long samting wea iu talem or duim, wanem nao iu shud duim? Iu mas go story witim brata bilong iu. Goal bilong iu hem for stretem datfala problem witim hem. Iu shud talemaot mistek bilong iu and no sei hem nao rong. For stap gud witim olketa brata and sista nao hem barava important. Olsem example, Abraham and nephew bilong hem Lot, garem staka animal gogo olketa wakaman bilong tufala start for raoa bikos ples bilong olketa no fitim nao evri animal for stap. From Abraham laek for stap gud witim Lot, hem letem Lot nao for chusim firstaem wea hem laek for stap. (Gen. 13:1, 2, 5-9) Hem showimaot gudfala example! Waswe, Abraham no kasem eni gud samting from hem duim datwan? Nomoa. Stretawe bihaen Abraham duim datwan, Jehovah promis for givim hem staka blessing. (Gen. 13:14-17) Wanem nao iumi lanem from datwan? Nomata sapos iumi mas lusim samfala samting, taem iumi followim olketa Bible principle and stretem problem wea iumi garem witim narawan, Jehovah bae blessim iumi. w16.05 1:11, 12

Insaed Bible Jehovah talem olketa law for helpem iumi savve wanem hem laekem and wanem hem no laekem. Olsem example, hem tambuim iumi for no worshipim idol, no steal, no drunk, and no durong. (1 Cor. 6:9, 10) And tu, Son bilong Jehovah, Jesus talem disfala komand long olketa disaepol bilong hem: “Iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim. Bae mi stap witim iufala go kasem taem wea world hem finis.” (Matt. 28:19, 20) Evri law and komand wea iumi kasem from Jehovah and Jesus hem for helpem iumi. Taem iumi followim olketa law hia datwan helpem iumi and famili bilong iumi for stap gud, for healthy, and for hapi. And important samting nao, taem iumi obeyim olketa komand bilong Jehovah, wea wanfala nao for iumi mas preach, datwan mekem hem hapi and hem blessim iumi. w16.05 3:1

Iumi mas readim Bible evriday, ting raonem wanem iumi readim, and prea long Jehovah for holy spirit bilong hem. Datwan bae helpem iumi for savve wanem nao Jehovah hapi long hem and for garem sem tingting olsem hem. Then samting iumi tingim, talem, and duim bae mekem Jehovah hapi. (Luke 11:13; Gal. 5:22, 23) Nomata olsem, iumi mas gohed waka hard long diswan. (Prov. 4:23) Hem tek taem for lane for followim olketa wei bilong Jehovah. So sapos iu stragol yet for changem wei bilong iu, iu mas patient. Maet long firstaem, iu mas barava waka hard for duim wanem Bible talem. Bat taem iu gohed for duim wanem Jehovah laekem, bae hem moa isi for iu garem sem tingting olsem Jehovah and for iu duim stret samting.—Ps. 37:31; Prov. 23:12; Gal. 5:16, 17. w16.05 4:14, 16

Distaem Jehovah iusim Bible, holy spirit, and kongregeson for trainim pipol bilong hem. Wanem nao iumi mas duim mekem iumi kasem training from Bible? Iumi mas readim, ting raonem wanem iumi readim, and askem Jehovah for helpem iumi followim wanem iumi readim. King David sei: “Taem mi leidaon long bed bilong mi, mi savve tingim iu. Long naet, mi ting raonem evri samting wea iu duim.” (Ps. 63:6) Hem sei tu: “Mi bae praisem Jehovah, wea givim advaes long mi. Long naet taem tu olketa samting wea mi ting raonem hem helpem mi for stretem tingting bilong mi.” (Ps. 16:7) Tru nao, David ting raonem kaonsel bilong Jehovah and letem datwan for stretem tingting bilong hem, nomata samfala taem hem no isi for followim kaonsel hia. (2 Sam. 12:1-13) David hem hambol and hem obeyim God, wea datwan hem gudfala example for iumi followim. So hem gud for iumi tingim diswan: ‘Taem mi readim Bible, waswe, mi ting raonem and letem datwan for kasem heart bilong mi? Waswe, mi savve kamap gud moa long diswan?’—Ps. 1:3. w16.06 1:11

Iumi evriwan no perfect and savve duim samting wea no stret. So iumi shud no tingse olketa brata or sista bilong iumi bae evritaem talem or duim stret samting. And sapos iumi tingim evritaem mistek bilong olketa, datwan bae spoelem iumi. Maet bae iumi no hapi taem iumi gohed for worshipim Jehovah. Barava nogud samting nao, maet bae iumi wikdaon and lusim organization bilong Jehovah. Sapos iumi duim olsem, bae iumi no garem privilege for worshipim Jehovah and no garem hope for laef insaed long niu world. So wanem nao savve helpem iumi for gohed hapi for worshipim Jehovah nomata narawan duim samting wea mekem iumi feel nogud? No forgetim disfala promis bilong Jehovah: “Mi wakem wanfala niu skae and wanfala niu earth, and iufala bae no tingim moa olketa samting wea happen bifor, and bae iufala no sorre bikos long olketa tu.” (Isa. 65:17; 2 Pet. 3:13) Bae iu kasem olketa blessing hia sapos iu gohed faithful long Jehovah. w16.06 4:13, 14

Datfala toktok “wanfala Jehovah nomoa hem stap” showimaot iumi fit for trustim plan bilong Jehovah and evri samting wea hem duim. Jehovah God hem evritaem faithful, duim wanem hem promisim, and hem no savve change. Olsem example, hem talem long Abraham olketa wea kam from laen bilong hem bae stap long Promis Land. And Jehovah duim staka mirakol for mekem datfala promis kamap tru. Nomata 430 year hem go pas bihaen Jehovah talem datfala promis, plan bilong hem no change. (Gen. 12:1, 2, 7; Ex. 12:40, 41) Staka handred year bihaen, Jehovah sei olketa Israelite nao olketa witness bilong hem and sei long olketa: “Mi nao God. No eni nara God stap firstaem long mi and no eni nara God moa kamap bihaen long mi.” Jehovah talem olketa tu hao plan bilong hem no savve change. Hem sei: “Mi nao God wea no savve change.” (Isa. 43:10, 13; 44:6; 48:12) Olketa Israelite garem nambawan privilege for worshipim God wea no savve change and wea olketa fit for trustim hem! Iumi tu garem datfala nambawan privilege.—Mal. 3:6; Jas. 1:17. w16.06 3:6, 7

Staka gavman distaem garem army and iusim technology for protectim border long kantri bilong olketa. Olketa lukluk for eniwan or eni samting wea savve kam for spoelem kantri bilong olketa. Bat olketa gavman hia no luksavve wanfala barava strongfala gavman hem stap long heven wea Christ Jesus nao rulim. Klosap nao gavman hia bae faet againstim evri gavman long earth. (Isa. 9:6, 7, ftn.; 56:10; Dan. 2:44) Bat from iumi gohed for lukaot and gohed faithful for worshipim Jehovah, bae iumi redi taem datfala day hem kam. (Ps. 130:6) Taem end hem kakam klosap, bae hem no isi for iumi wekap long spiritual wei. Bae hem sorre samting sapos iumi no gohed for lukaot! w16.07 2:2, 9, 10

Bifor Paul kamap Christian, hem man for spoelem olketa Christian, so hem luksavve God hem barava kaen tumas for showimaot mercy long hem. Taem Paul hem olo, hem raet olsem long Timothy: “Mi thankiu long Lord bilong iumi Christ Jesus wea givim paoa long mi. Mi thankiu bikos long tingting bilong hem mi faithful dastawe hem givim mi wanfala waka for duim.” (1 Tim. 1:12-14) Wanem nao datfala waka? Paul sei olsem long olketa elder long kongregeson long Ephesus: “Long tingting bilong mi, laef bilong mi hem no important. Samting wea important long mi nao hem for finisim resis bilong mi and ministry wea Lord Jesus givim long mi for talemaot long evriwan gud nius abaotem love bilong God.” (Acts 20:24) Paul strong for preach and hem showimaot gudfala example for olketa Christian distaem. Hem showimaot hem barava tinghae long wei wea God kaen long hem. w16.07 4:1-3

Maet iumi laek for duim samfala samting moa long waka bilong Jehovah. Nomata sapos Jehovah letem samting wea kasem iumi for gohed, iumi savve hem bae evritaem sapotim iumi. Iumi savve lane from example bilong Abraham. Jehovah promisim hem bae hem garem wanfala son, bat hem mas weit for staka year bifor Isaac hem born. Nomata Abraham mas weit for longfala taem, hem patient and barava trustim Jehovah. (Gen. 15:3, 4; 21:5; Heb. 6:12-15) Nomata olsem, hem no isi for iumi weitim wanfala samting wea iumi laekem. (Prov. 13:12) Sapos iumi gohed for tingim olowe datwan, hem savve mekem iumi barava wikdaon. Samting iumi savve duim taem iumi weit nao, iumi savve waka hard for duim olketa samting wea bae helpem iumi for kamap mature long spiritual wei. Taem iu readim Bible and ting raonem wanem iu readim, datwan bae helpem iu for wise, for garem gudfala tingting, and for mekem olketa gudfala disison. Then evriday, iumi savve iusim wanem iumi lanem for mekem olketa gudfala disison wea Jehovah bae hapi long hem. Olsem example, iumi bae savve hao for stap gud witim nara pipol, hao for iusim selen long wisefala wei, and hao for chusim hapitaem and kaleko wea fitim wanfala Christian. w16.08 3:9-11

Jehovah nao helpem olketa Israelite for winim olketa Amalekite and army bilong Ethiopia. And hem strongim Nehemiah and olketa Jew for buildim bak wall bilong Jerusalem. God bae strongim iumi tu for gohed preach nomata iumi kasem olketa hard taem, pipol againstim iumi, and no interest long message bilong iumi. (1 Pet. 5:10) Jehovah bae no duim mirakol for finisim olketa problem bilong iumi, bat iumi tu mas duim samting. Wanem nao iumi mas duim? Iumi mas readim Bible evriday, prepare for olketa meeting and attendim olketa meeting evri week, gohed duim study seleva and famili worship, and prea evritaem long Jehovah. Iumi mas no letem eni samting for stopem iumi for kasem olketa samting wea Jehovah provaedem for strongim and encouragem iumi. Sapos iu luksavve iu no strong for duim olketa samting hia, askem God for helpem iu. Sapos iu duim olsem, spirit bilong God bae “givim paoa” long iu mekem iu laek for duim olketa samting hia. w16.09 1:12

Aposol Paul sei wei for stap singol hem gud samting. Bat hem sei tu: “Sapos olketa no savve kontrolem olketa seleva, olketa shud marit. Hem moabeta for olketa marit winim wei for laekem tumas for sleep witim narawan.” Samwan maet disaed for marit mekem datwan helpem hem for stap klia long olketa nogud samting olsem nanali or for durong. Olketa Christian wea singol mas tingim tu age bilong olketa sapos olketa laek for marit. Paul sei: “Sapos hem hard for samwan stap singol and hem no young tumas, hem savve marit sapos datwan nao samting wea hem laekem. Hem no duim eni sin.” (1 Cor. 7:9, 36; 1 Tim. 4:1-3) Nomata olsem, iumi shud no encouragem wanfala young wan for marit bikos hem no savve kontrolem feeling for laek sleep witim narawan. Maet datfala young wan no redi for olketa difren responsibility wea bae kamap long marit. w16.08 1:17

Kaleko iumi werem and lukluk bilong iumi hem mekem pipol luksavve wanem kaen man nao iumi. (1 Sam. 16:7) From iumi pipol bilong God, iumi luksavve hem important for iumi mekem wise disison long kaleko wea iumi chus for werem. Taem iumi followim olketa Bible principle, datwan shud helpem iumi for no werem kaleko wea barava taet, showim body, or mekem narawan garem rong tingting. Diswan minim iumi no werem kaleko wea sheipim private part or wea showim susu. Kaleko wea iumi werem shud no mekem narawan feel nogud or for stambol. Taem kaleko wea iumi werem hem klin and showimaot respect, pipol bae luksavve iumi worshipim Jehovah and olketa bae respectim iumi. And tu, maet datwan mekem olketa laek for savve long Jehovah, tinghae long organization bilong iumi, and willing for lisin long iumi taem iumi preach long olketa. w16.09 3:5, 6

Taem iu story long olketa narawan abaotem creation and abaotem Bible, hem gud for savve long tingting bilong olketa firstaem. Samfala wea bilivim evolution olketa biliv wanfala God hem stap. Olketa sei God nao startim evolution for wakem evri samting wea laef. Samfala narawan sei masbi evolution hem tru bikos hem nao wanem olketa teachim long olketa skul. And samfala pipol wea biliv long God bifor olketa no biliv long hem nao distaem bikos long olketa nogud samting wea olketa religion duim. So taem iu story witim samwan, hem gud for faendemaot wanem hem bilivim and why hem bilivim datwan. Then lisin gud long wanem hem talem. Sapos iu duim olsem, maet bae hem willing for lisin long iu tu. Sapos samwan sei hem krangge samting for bilivim God nao wakem evri samting, hao nao bae iu story long hem? Askem hem long kaenfala wei for explainim hao nao laef hem start. Iu savve sei, sapos evri samting wea laef hem kamap seleva, firstfala samting wea laef, olsem wanfala cell, mas fit for gohed wakem olketa nara cell wea semsem olsem hem tu. Wanfala professor long chemistry sei: “Nomata wanfala barava smol samting wea laef bat hem needim staka samting for mekem hem gohed laef.” w16.09 4:12, 13

Staka gohed faithful long God nomata olketa kasem hard taem bikos olketa barava bilivim olketa wea dae bae laef bak, and olketa bae laef olowe long earth. Tingim example bilong Naboth and Zechariah. From tufala obeyim God, pipol sutim tufala dae long ston. (1 Ki. 21:3, 15; 2 Chron. 24:20, 21) Pipol torowem Daniel insaed long hol bilong olketa lion, and pipol torowem olketa fren bilong hem insaed long fire. Evriwan hia willing for dae winim wei for no faithful long Jehovah. Olketa barava sure Jehovah givim holy spirit bilong hem long olketa and helpem olketa for stand strong long olketa hard taem hia. (Heb. 11:33, 34; Dan. 3:16-18, 20, 28; 6:13, 16, 21-23) Staka profet olsem Micaiah and Jeremiah, pipol tok spoelem olketa or putim olketa long prison. Olketa narawan olsem Elijah “wakabaot long wilderness and olketa maunten and olketa stap long olketa cave and olketa hol long graon.” Evriwan hia gohed faithful long God nomata olketa kasem olketa hard taem bikos olketa “sure samting wea [olketa] hope long hem bae kamap tru.”—Heb. 11:1, 36-38; 1 Ki. 18:13; 22:24-27; Jer. 20:1, 2; 28:10, 11; 32:2. w16.10 3:10, 11

Iumi savve kaen long pipol from difren ples taem iumi sei hello and welkamim olketa long Kingdom Hall. Olketa hia maet feel shame and hol bak for associate witim olketa narawan. Bikos long culture or living bilong olketa, maet olketa feel olsem pipol from nara kantri or wea garem difren kala skin nao gud winim olketa. So iumi nao shud go for sei hello long olketa, kaen long olketa, and showimaot interest long olketa. Sapos JW Language app hem stap long languis bilong iu, iu savve iusim datfala app for helpem iu savve hao for sei hello long languis bilong olketa. (Phil. 2:4) Maet iu hol bak for story witim samwan wea garem difren culture. Samting wea savve helpem iu long diswan hem for storyim samting abaotem iuseleva long hem. Taem iu duim olsem, maet iu luksavve iutufala evriwan interest long olketa semkaen samting. Hem gud for tingim hao evri culture garem gud saed and nogud saed bilong hem. w16.10 1:13, 14

Bible talem wanem iumi evriwan shud duim mekem iumi keepim kongregeson hem klin. Tingim samting wea happen long Corinth. Paul lovem olketa brata and sista long there from hem helpem staka long olketa for savve long truth. (1 Cor. 1:1, 2) So tingim feeling bilong Paul taem hem faendaot olketa elder long there letem wanfala Christian wea durong for gohed stap insaed long kongregeson. Paul talem olketa elder for “givim disfala man go long Satan,” wea hem nao for disfellowshipim hem from kongregeson. (1 Cor. 5:5-7, 12) Distaem, maet olketa elder disaed for disfellowshipim samwan wea duim bigfala sin and hem no laek for repent. Sapos datwan happen, waswe, bae iumi deal witim datwan wea disfellowship followim wanem Bible talem? Sapos iumi duim olsem, datwan bae helpem kongregeson for klin. And maet iumi helpem datwan wea duim rong samting for luksavve hem mas repent and askem Jehovah for forgivim hem. w16.11 2:14

Tingim gud samting wea narawan kasem taem iumi encouragem hem. Rubén sei: “For staka year nao mi feel olsem mi iusles nomoa. Bat wantaem, mi waka witim wanfala elder long ministry and hem luksavve mi no hapi. Hem barava lisin long mi taem mi storyim feeling bilong mi long hem. Then hem storyim olketa gudfala samting wea mi duim. Hem talem tu toktok bilong Jesus wea sei iumi barava important winim evri smol bird. Mi no savve forgetim datfala toktok bilong Jesus and datwan evritaem encouragem mi. Toktok wea datfala elder talem barava helpem mi.” (Matt. 10:31) Bible sei iumi mas encouragem narawan evritaem. Aposol Paul sei long olketa Hebrew Christian: “Gohed for encouragem narawan evriday, . . . mekem no eniwan long iufala hem bighed bikos long sin wea savve trikim man.” (Heb. 3: 13) Taem narawan encouragem iu datwan savve mekem iu barava hapi. w16.11 1:2, 3

Long year 313 C.E., King Constantine bilong Rome appruvim teaching bilong olketa apostate for kamap wanfala niu religion. Constantine arrangem wanfala meeting witim olketa bigman bilong religion, wea gogo olketa kolem datfala meeting, Council of Nicaea. Bihaen datfala meeting, king raosem from Rome wanfala priest wea nem bilong hem Arius bikos hem no laek for bilivim Jesus hem God. Bihaen, Theodosius I hem kamap king bilong Rome, and Catholic Church hem kamap main religion long olketa kantri wea Rome rul ovarem. Olketa man for raetem history sei long rul bilong king Theodosius, Rome, wea hem wanfala heathen kantri, hem kamap kantri wea pipol sei hem Christian kantri. Bat long datfala taem, olketa Christian wea apostate acceptim finis olketa heathen teaching wea mekem olketa kamap part long Bigfala Babylon. Nomata olsem, samfala anointed Christian wea faithful olketa stap yet. Olketa olsem wheat wea Jesus story abaotem. Olketa faithful wan hia traem best for worshipim God.—Matt. 13:24, 25, 37-39. w16.11 4:8, 9

Distaem Satan “hem raraon olsem wanfala lion wea singaot big and hem laekem tumas for kaikaim eniwan.” (1 Pet. 5:8; Rev. 12:17) From datwan, laef hem barava hard, and diswan mekem pipol bilong God savve wari. Pipol bilong God long bifor tu kasem olketa samting wea mekem olketa wari. Olsem example, Bible sei King David savve wari samfala taem. (Ps. 13:2) And aposol Paul hem “wari tumas abaotem olketa kongregeson.” (2 Cor. 11:28) Bat wanem nao iumi savve duim taem iumi wari abaotem staka samting? Dadi bilong iumi long heven helpem pipol bilong hem bifor for no wari tumas, and hem laek for duim sem samting for iumi tu. So distaem iumi savve prea, readim Bible and ting raonem, letem holy spirit bilong Jehovah helpem iu, and story long samwan wea iu trustim. w16.12 3:1, 2

Long first century, samfala long Corinth wea olketa man for steal, man for sleep witim nara man, duim adultery, worshipim idol, and olketa man for drunk, olketa change bikos olketa lane abaotem Jehovah and lovem hem. Olketa shame nao long olketa nogud samting wea olketa duim bifor. (Rome 6:21; 1 Cor. 6:9-11) Olketa Christian long Rome tu mas duim sem samting. Paul sei long olketa: “No letem sin bossim body bilong iufala. No iusim olketa part long body olsem weapon for duim samting wea no stret. Bat givim iufala seleva long God from iufala nao pipol wea laef bak, and iusim olketa part long body bilong iufala olsem weapon for duim gudfala samting.” (Rome 6:13) Paul hem savve olketa bae duim samting wea stret and gohed for kasem gud samting from wei wea God hem kaen tumas. w16.12 1:13

Jehovah wakem iumi olketa man long barava spesol wei. Hem wakem iumi long wei wea iumi savve ting raonem samting, wea diswan helpem iumi for stretem olketa problem and for plan for future. (Prov. 2:11) Hem givim iumi paoa wea mekem iumi fit for duim wanem iumi plan for duim and kasem goal bilong iumi. (Phil. 2:13) Hem givim iumi tu wanfala konsens, wea diswan hem helpem iumi for luksavve long samting wea stret and samting wea no stret. Konsens bilong iumi hem helpem iumi for stap klia long wei for duim sin, and for stretem rong wea iumi duim. (Rome 2:15) Jehovah expectim iumi for iusim wanem hem givim long iumi for duim olketa gudfala samting. Olsem example, olketa Hebrew Scripture sei: “Olketa plan bilong man wea waka hard and wea tingting gud firstaem bae win,” and ‘iumi mas waka hard long evri samting wea iumi duim.’ (Prov. 21:5; Eccl. 9:10) Long olketa Greek Scripture hem sei: “Iumi mas duim gudfala samting long evriwan taem iumi garem chance for duim olsem,” and ‘God givim iumi evriwan savve for duim olketa difren kaen spesol waka. So iumi mas iusim datwan for helpem narawan.’ (Gal. 6:10; 1 Pet. 4:10) Tru nao, Jehovah laekem iumi for duim olketa gudfala samting wea bae helpem iumi and olketa narawan. w17.01 1:1, 2

From Adam and Eve no obeyim Jehovah, iumi evriwan born sin, iumi no perfect and savve dae. Nomata olsem, iumi still free for disaedem samting seleva. Iumi luksavve long datwan bikos long wei wea Jehovah deal witim olketa Israelite. Jehovah letem olketa for chus sapos olketa laek for kamap spesol pipol bilong hem or nomoa. (Ex. 19:3-6) Olketa Israelite chus for kamap pipol bilong God and acceptim olketa law bilong God. Olketa sei: “Mifala willing for duim evri samting wea Jehovah talem.” (Ex. 19:8) Sorre tumas, olketa Israelite brekem datfala promis wea olketa mekem witim Jehovah. Olketa samting wea happen long olketa hem for teachim iumi. Iumi laek for evritaem tinghae long wei wea iumi free for disaed seleva and for gohed fren gud witim Jehovah and obeyim olketa law bilong hem. w17.01 2:9

King Jeroboam long Israel hem wakem wanfala altar long taon bilong Bethel for worshipim false god. Jehovah sendem wanfala profet long Judah for talem strongfala message long Jeroboam. Datfala hambol profet obeyim Jehovah and hem talem datfala message long king. King Jeroboam hem barava kros long datfala profet, bat Jehovah protectim hem. (1 Ki. 13:1-10) Jehovah talem datfala profet for hem mas no kaikai or drink and taem hem go bak, hem mas no followim sem road. Taem profet hia go bak, hem meetim wanfala olo man wea laea long hem, and sei hem kasem message from Jehovah for tekem datfala profet for go kaikai and drink long haos bilong hem. Profet hia no obeyim Jehovah and go witim datfala olo man. Jehovah no hapi long datfala profet. Bihaen, taem hem go bak, wanfala lion attakim and killim hem dae. (1 Ki. 13:11-24) Iumi no savve why nao datfala profet obeyim toktok bilong datfala olo man and no obeyim Jehovah. Bat iumi savve datfala profet hem no ‘hambol taem hem wakabaot witim God.’ w17.01 4:1-3

Firstfala verse long Bible hem talem disfala barava important toktok: “Long firstaem God wakem skae and earth.” (Gen. 1:1) Jehovah wakem staka samting long universe. Iumi no lukim staka samting hia, and iumi no savve tu long staka samting abaotem olketa samting olsem space, laet, and gravity. (Eccl. 3:11) Nomata olsem, Jehovah talem long iumi wanem nao plan bilong hem for earth and for olketa man. Hem wakem olketa man for garem olketa wei bilong hem, and hem laekem olketa for enjoyim laef bilong olketa long earth. (Gen. 1:26) Olketa man long earth bae kamap olketa pikinini bilong hem, and hem bae kamap Dadi bilong olketa. Long Genesis chapter 3 hem story abaotem olketa samting wea happen wea mekem plan bilong Jehovah no kamap tru. (Gen. 3:1-7) Bat Jehovah hem fit for stretem datwan. No eniwan savve stopem plan bilong hem for kamap tru. (Isa. 46:10; 55:11) Iumi sure datfala plan bilong Jehovah bae kamap tru long barava taem wea hem markem! w17.02 1:1, 2

Waswe, pipol long datfala taem luksavve holy spirit bilong God helpem Moses? Yes! Holy spirit helpem Moses for duim olketa mirakol and for story abaotem Jehovah long Pharaoh, datfala king bilong Egypt wea garem bigfala paoa. (Ex. 7:1-3) And holy spirit bilong God helpem Moses for patient and for showimaot love long olketa Israelite. Datwan pruvim Jehovah nao chusim Moses for leadim pipol bilong Hem. Hu nao olketa narawan wea Jehovah givim holy spirit long olketa for leadim pipol bilong hem? Bible sei: “Joshua son bilong Nun hem kasem spirit from God wea diswan mekem hem wise.” (Deut. 34:9) “Jehovah givim spirit bilong hem long Gideon.” (Judg. 6:34) And “spirit bilong Jehovah helpem David.” (1 Sam. 16:13) Evriwan hia depend long spirit bilong God for helpem olketa for duim samting wea olketa no savve duim witim strong bilong olketa seleva.—Josh. 11:16, 17; Judg. 7:7, 22; 1 Sam. 17:37, 50. w17.02 3:3-5

Iumi evriwan savve lane from gudfala example bilong aposol Paul. Hem savve olketa long kongregeson garem raet for disaed seleva, and hem respectim datwan. Distaem tu, olketa elder followim example bilong Paul taem olketa givim kaonsel long olketa narawan saed long olketa samting wea man seleva savve disaedem. Olketa hapi for storyim samting wea kam from Bible long olketa brata and sista. Nomata olsem, olketa elder letem olketa Christian disaedem samting seleva bikos olketa bae harvestim samting wea kamaot from disison wea olketa mekem. Hem important for iumi tingim diswan: Iumi savve helpem olketa narawan for savve wanem Bible talem abaotem samting wea happen long olketa. Nomata olsem, olketa brata and sista garem raet for disaedem samting and hem nao wanem olketa mas duim. Taem olketa mekem wise disison, olketa bae kasem gud samting. Tru nao, iumi shud no tingse iumi garem raet for disaedem wanem olketa brata and sista shud duim. w17.03 2:11

Governing Body showimaot olketa garem strongfala faith from olketa gohed strong for preachim gud nius abaotem Kingdom. Waswe, iumi sapotim olketa brata hia long disfala important waka? Sapos iumi duim olsem bae iumi hapi tumas long taem wea Jesus bae sei olsem: “From iufala duim olketa samting hia long wanfala brata bilong mi, hem olsem iufala duim long mi nao.” (Matt. 25:34-40) Taem Jesus go bak long heven, hem no forgetim olketa follower bilong hem. (Matt. 28:20) Jesus savve holy spirit, olketa angel, and olketa Holy Raeting nao helpem hem for leadim pipol bilong God long earth. And Jesus givim olketa samting hia for helpem datfala faithful wakaman distaem tu. Governing Body gohed for “followim datfala Pikinini Sheepsheep,” Jesus, “long eni ples wea hem go.” (Rev. 14:4) So taem iumi followim instruction from Governing Body, iumi followim Leader bilong iumi, Jesus. Klosap nao bae hem leadim iumi for kasem laef olowe. (Rev. 7:14-17) No eni leader long disfala earth savve givim iumi datwan! w17.02 4:17-19

Nomata olketa problem bilong iumi hem big or hem smol, iumi mas askem Jehovah for helpem iumi. Hem gud for tingim diswan: Waswe, samfala taem iumi depend long iumiseleva taem iumi trae for stretem eni problem wea kasem iumi? Or waswe, evritaem iumi tingim wanem Bible talem and then trae for iusim datwan for stretem olketa problem bilong iumi? Olsem example, maet samfala taem famili bilong iu stopem iu for no attendim meeting or eni assembly. Waswe, bae iu askem Jehovah for helpem iu savve wanem for duim? Or maet for lelebet taem iu no garem waka, then gogo iu faendem wanfala waka. Waswe, bae iu talem boss iu mas attendim olketa meeting evri week nomata maet datwan bae mekem hem no laek for givim datfala waka long iu? Nomata wanem problem iumi feisim, iumi mas evritaem tingim advaes bilong man wea raetem datfala psalm wea stap long text for tuday. w17.03 4:6