March

Waswe, iu no laekem wei bilong samwan long kongregeson bilong iu? Datfala feeling maet mekem iu no really laekem hem and sapos iu no trae hard for changem datwan, bae feeling hia stap olowe. Bible sei iumi mas showimaot welkam, nomata samwan hem enemy bilong iu. Datwan savve mekem iumi fren gud witim olketa narawan. (Rome 12:20) For duim olsem savve katem daon wei for feel nogud and bae hem mekem kros bilong iumi cold daon. Maet diswan savve helpem iu lukim olketa gudfala wei bilong hem wea Jehovah lukim dastawe Hem leadim hem kam long truth. (John 6:44) Sapos love nao muvim iu for invaetem samwan wea no expectim eni invitation, diswan savve startim wei for fren gud tugeta. Hao nao iumi savve sure love nao muvim iumi for invaetem samwan? Wanfala wei hem for followim toktok long text for tuday. Iumi shud trae tingim olketa samting wea olketa brata and sista duim wea winim wanem iumi duim. Olsem faith bilong olketa, wei wea olketa gohed strong nomata olketa kasem test, no fraetem man, or garem olketa nara gudfala wei. Datwan bae mekem love bilong iumi for olketa kamap moa strong and mekem hem isi for iumi invaetem olketa long haos. w18.03 17-18 ¶18-19

Wanfala barava hard samting wea savve testim wei wea samfala parents obeyim Jehovah, hem taem pikinini disfellowship. Tingim example bilong wanfala mami wea dota bilong hem disfellowship and lusim haos. Hem sei: “Taem mi readim olketa pablikeson bilong iumi, mi lukluk for eni toktok insaed wea bae mekem mi garem excuse for spendem taem witim dota and grandota bilong mi.” Hem sei tu: “Long kaenfala wei hasband bilong mi helpem mi for luksavve dota bilong mitufala no stap anda long mifala nao and mitufala mas acceptim wei wea Jehovah disciplinem hem.” Bihaen samfala year, dota bilong tufala reinstate. Datfala mami sei, “Hem barava respectim mi and dadi bilong hem bikos hem luksavve mitufala obeyim God.” Sapos pikinini bilong iu disfellowship, waswe, bae iu ‘trastem Jehovah long ful haat blong yu an no dipen nomoa long save blong yu seleva’? (Provebs 3:5, 6) So garem faith and trustim discipline and direction wea kam from Jehovah. Gohed duim wanem Jehovah talem nomata hem no isi. Acceptim discipline bilong God and no againstim datwan. w18.03 31 ¶12-13

Bible no markem wanem age nao man bae kasem bifor hem savve baptaes. Greek word wea olketa transleitim ‘teachim pipol for kamap disaepol’ long Matthew 28:19 hem minim for teachim samwan witim goal for hem followim wanem hem lanem, or for hem kamap disaepol. Wanfala disaepol hem samwan wea lanem and minim olketa teaching bilong Jesus, and willing for obeyim. Dastawe evri parents shud garem goal for teachim pikinini, start from taem hem baby yet, for dedicate and kamap disaepol bilong Christ. Bat iumi savve hem no fitim for olketa baby baptaes. Nomata olsem, Bible showimaot hao olketa smol pikinini savve minim and lovem truth insaed Bible. Olsem example, Timothy hem wanfala disaepol wea disaed for worshipim Jehovah taem hem young yet. Hem garem strong faith. (2 Tim. 1:5; 3:14, 15) Taem hem samting olsem 20 year, hem kamap wanfala disaepol bilong Christ finis, and tu, hem kasem olketa spesol privilege insaed kongregeson.—Acts 16:1-3. w18.03 9 ¶4-5

Taem iumi start for worshipim God, iumi mas changem laef bilong iumi. Diswan affectim evri samting wea iumi duim. Nomata iumi baptaes finis, iumi still gohed for change. From iumi no perfect, iumi evriwan need for gohed changem wei bilong iumi. (Phil. 3:12, 13) Nomata iumi young or olo, iumi savve askem iumiseleva: ‘Wanem nao samfala samting wea mi changem wea showimaot mi start for kamap spiritual man? Waswe, olketa wei bilong mi start for olsem Christ? Waswe, samting wea mi tingim and duim long meeting showimaot mi strong long spiritual wei? Long wanem wei nao samting wea mi storyim savve showimaot wanem mi laekem tumas? Wei bilong mi for study seleva, kaleko and lukluk bilong mi, hem showimaot mi wanem kaen man? Wanem nao mi duim taem samwan kaonselem mi? Wanem nao mi duim taem mi kasem test? Waswe, mi kamap wanfala mature Christian?’ (Eph. 4:13) Olketa kwestin hia bae helpem iumi for luksavve sapos iumi grow long spiritual wei. w18.02 24 ¶4-5

Winim eni nara taem long history, iumi stap long taem wea barava spesol. Bible sei Jehovah hipimap wanfala big crowd “from evri kantri and tribe and pipol and languis.” Olketa hia kamap wanfala “bikfala strong kantri” wea garem winim eit million pipol wea hapi for “worshipim [God] evri day and evri naet.” (Rev. 7:9, 15; Aesaea 60:22) No enitaem bifor staka pipol olsem lovem God and olketa narawan. Nomata olsem, Bible talem hao pipol distaem, wea no fren witim God, bae garem difren kaen wei for showimaot love. Diskaen love hem selfish. Aposol Paul sei long olketa last day, “pipol bae tingim olketa seleva nomoa, laekem tumas selen,” and “no lovem God, bat bae interest nomoa for enjoyim seleva.” (2 Tim. 3:1-4) Diskaen selfish love barava opposite long love for God. Hem mekem staka pipol for selfish and hem mekem laef bilong evriwan “hard tumas.” w18.01 22 ¶1-2

From Noah lane abaotem Jehovah, hem garem faith and wisdom. Diswan protectim hem, especially for no duim eniting wea bae mekem Jehovah no hapi. Noah laek fren witim God, hem no laek fren witim olketa wea no worshipim God. Noah luksavve olketa angel wea change for kamap man olketa laea long pipol. Pipol barava tinghae long olketa from olketa garem paoa and maet olketa laek worshipim olketa tu. (Jenesis 6:1-4, 9) And tu, Noah savve Jehovah laekem olketa man nao for garem pikinini and fulimap earth. (Jenesis 1:27, 28) So taem olketa demon tekem olketa woman and garem pikinini, Noah luksavve datwan hem barava rong. Diswan showaot klia taem olketa pikinini hia grow big and kamap strong winim olketa nara pikinini. Jehovah talem Noah hem bae mekem flood for kam and finisim evri nogud pipol. From Noah garem faith long warning bilong Jehovah, hem buildim ark, and famili bilong hem sev.—Heb. 11:7. w18.02 9-10 ¶8

Sapos iu duim serious sin, Jehovah redi for helpem iu for fren bak witim hem. Bat iu mas acceptim help bilong Jehovah thru long olketa elder. (Provebs 24:16; Jas. 5:13-15) Iu mas duim diswan kwiktaem! Sapos nomoa, bae iu no kasem laef olowe. Bat sapos iu gohed feel guilty nomata iu kasem forgiveness, wanem nao iu shud duim? Samfala taem aposol Paul feel wikdaon from hem tingim sin wea hem duim bifor. Hem sei: “Olketa nara aposol winim mi, and hem no fitim for olketa kolem mi wanfala aposol, bikos mi spoelem olketa long kongregeson bilong God.” (1 Cor. 15:9) Jehovah acceptim Paul nomata hem no perfect, and hem laekem Paul for luksavve long datwan. Jehovah savve forgivim iu sapos iu barava repent, and sapos sin wea iu duim hem serious, iu need for story long olketa elder. Trustim hao Jehovah forgivim iu, and acceptim datwan!—Aesaea 55:6, 7. w18.01 11 ¶17-18

For fren witim Jehovah iumi need for lisin long hem and for story witim hem. Main wei wea iumi lisin long Jehovah hem for duim study seleva long Bible. Diswan minim for readim and ting raonem Bible and olketa pablikeson bilong iumi. Wei for studyim Bible hem no olsem wei for prepare for exam long skul. Bat, hem olsem iu travel go long wanfala niu ples and lanem staka niu samting abaotem Jehovah. Diswan bae helpem iu for savve gud long Jehovah and hem bae fren gud witim iu. Organization bilong Jehovah provaedem staka tul for helpem iu for duim study seleva. Olsem example, long jw.org iu savve lukim olketa study guide for datfala buk “What Does the Bible Really Teach?” Diswan savve helpem iu for strongim faith bilong iu and explainim olketa biliv bilong iu long olketa narawan.—Ps. 119:105. w17.12 25 ¶8-9

Long disfala profesi hem story abaotem olketa wild animal olsem wolf and lion, wea bae stap tugeta witim olketa pikinini sheepsheep and baby buluka. Why nao olketa stap gud tugeta? Bible gohed for sei: “Bikos disfala wol bae hemi fulap long pipol hu i barava savegud long [Jehovah].” Olketa animal no savve lane abaotem Jehovah, so disfala profesi storyim hao pipol bae changem wei bilong olketa. (Aesaea 11:6, 7) Staka long olketa brata and sista bilong iumi wea bin raf olsem wolf, distaem olketa stap gud witim olketa narawan. Iu savve readim experience olsem wea garem title “Bible Changem Laef Bilong Pipol” long jw.org. Staka wea worshipim Jehovah, wea bifor olketa raf, distaem olketa “garem niufala wei wea fitim wanem God hem laekem and wea datwan hem barava raeteous and faithful.” (Eph. 4:23, 24) Taem pipol lane abaotem God, olketa luksavve olketa need for followim standard bilong hem. Diswan helpem olketa for changem biliv, tingting, and wanem olketa duim. Hem no isi for mekem change olsem, bat holy spirit bilong God bae helpem olketa wea barava laek for worshipim hem. w18.01 31 ¶15-16

Bible sei olketa wea bae resurrect for go long heven bae “followim order.” So iumi trustim hao resurrection wea bae kamap long earth hem bae followim order or barava organize gud. Datwan maet mekem iumi ask olsem: Waswe, olketa wea dae no longtaem go nomoa bae resurrect stretawe bihaen Wan Thousand Year Rul Bilong Christ hem start, and waswe, olketa wea lovem olketa bae stap for welkamim olketa? Waswe, bae olketa faithful man long bifor wea duim waka for lead, laef bak firstaem for help for organizem pipol bilong God long niu world? Waswe long olketa wea nating savve long Jehovah? Wanem taem and long wea nao olketa bae laef bak? Iumi garem staka kwestin wea iumi tingim, bat iumi no need for wari abaotem olketa samting hia distaem. Hem gud for iumi weit and lukluk nomoa for wanem Jehovah bae duim. Go kasem datfala taem, iumi shud gohed strongim faith bilong iumi long Jehovah. Thru long Jesus, Jehovah promis hao olketa wea dae bae stap long memory bilong hem and bae laef bak moa.—John 5:28, 29; 11:23. w17.12 12 ¶20-21

Taem famili followim datfala advaes wea Paul raetem bae hem barava helpem hasband, waef, and olketa pikinini. Jehovah talem olketa hasband, “Gohed lovem waef bilong iufala and no barava kros long olketa.” Hasband wea garem love bae showimaot respect taem hem willing for lisin long tingting bilong waef and showimaot hem tinghae long wanem hem talem. (1 Pet. 3:7) Nomata sapos hasband no evritaem duim wanem waef laekem, wei for lisin long waef savve helpem hem for mekem olketa gudfala disison. (Prov. 15:22) Hasband wea showimaot love bae no forcem waef for respectim hem. Bat bae hem trae for duim olketa samting wea bae mekem waef laek respectim hem. Taem hasband lovem waef and pikinini, olketa bae hapi for worshipim Jehovah tugeta and kasem datfala prize for laef olowe. w17.11 28 ¶12; 29 ¶15

Aposol Paul raet long olketa Christian long Colossae taem hem insaed prison long Rome long samting olsem 60-61 C.E. Hem storyim why olketa mas garem “wei for minim samting wea kam from holy spirit.” Diswan minim for garem sem tingting olsem Jehovah. (Col. 1:9) Paul sei: “Mi talem diswan long iufala mekem no eniwan iusim kleva toktok for trikim iufala. No letem olketa iusles toktok and tingting bilong man for trapim iufala. Olketa samting hia join witim kastom bilong olketa man and olketa iusles samting bilong disfala world nomoa. Olketa no kam from Christ.” (Col. 2:4, 8) Then Paul explainim why samfala tingting wea staka pipol garem hem no stret, and why pipol barava laekem kaen tingting olsem. Olsem example, samfala idea bilong world mekem pipol tingse olketa kleva tumas and gud winim narawan. Paul raetem leta hia for helpem olketa Christian rejectim tingting bilong world and no duim eni nogud samting.—Col. 2:16, 17, 23. w17.11 20 ¶1

Wanem nao maet wanfala Christian need for lusim mekem hem gohed kasem mercy bilong Jehovah? Hem mas lusim eni samting wea maet leadim hem for duim sin moa, nomata datwan hem samting wea hem barava laekem. (Matt. 18:9) Olsem example, sapos olketa fren bilong iu savve mekem iu for duim olketa samting wea Jehovah no laekem, waswe, bae iu stop for associate witim olketa? Sapos iu no savve kontrolem wei wea iu drinkim alcohol, waswe, iu willing for stap klia long eni samting wea maet mekem iu drink tumas? Sapos iu stragol for kontrolem feeling for laek durong, waswe, bae iu stap klia long olketa movie, website, or nara samting wea maet mekem iu for garem rong tingting? Tingim diswan, sapos iu traem best for obeyim olketa law bilong Jehovah, iu no hard waka nating. Taem iumi tingse Jehovah lusim iumi, bae iumi barava feel nogud. Bat taem iumi luksavve long ‘love bilong Jehovah wea stap for olowe,’ datwan mekem iumi barava hapi.—Isa. 54:7, 8. w17.11 11 ¶12

Tingim hao Zechariah 5:4 sei datfala judgment bae “go insaed long haos bilong man wea steal,” and bae hem “stap insaed datfala haos and finisim.” So diswan minim no eniting savve haed from Jehovah and bae hem judgem pipol bilong hem wea duim eni rong samting. Nomata sapos samwan wea steal hem savve haedem datwan from police, boss bilong hem, olketa elder, or parents, datwan hem nating haed long Jehovah. God bae mek sure evri difren wei for steal bae showaot. (Heb. 4:13) Iumi barava hapi tumas for stap witim pipol wea traem best for “honest long evri samting.” (Heb. 13:18) Jehovah barava heitim evri wei for steal. Hem wanfala privilege for savve and obeyim olketa nambawan principle bilong Jehovah, and for no duim eni samting wea bae mek shame long nem bilong hem. Taem iumi duim olsem, iumi bae misstim judgment wea bae kasem olketa wea no obeyim Jehovah. w17.10 22 ¶6-7

Hem important tumas for iumi garem peace witim olketa brata and sista, nomata sapos iumi feel olsem olketa treatim iumi long wei wea no stret or olketa no minim iumi. (Rome 12:17, 18) Sapos iumi mekem narawan feel nogud, iumi shud sei sorre. Bat sorre bilong iumi mas tru wan. Hem important tumas for hasband and waef garem peace. Hem no stret for tufala act olsem tufala lovem each other taem olketa narawan stap, bat taem olketa stap seleva olketa les for tok long each other, tok spoelem each other, or maet killim each other. Iumi mas willing tu for forgive. Sapos samwan mekem iumi feel nogud, iumi shud willing for forgivim hem and no tingim moa datwan. Sapos wei wea iumi forgive hem tru wan, iumi bae “no tingim olowe nogud samting wea narawan duim” long iumi. (1 Cor. 13:4, 5) Sapos iumi gohed for tingim samting wea happen, datwan bae spoelem wei wea iumi fren witim olketa brata and sista bilong iumi and Jehovah tu.—Matt. 6:14, 15. w17.10 10-11 ¶14-15

Hao nao message wea Zechariah talem affectim olketa Jew long datfala taem? Jehovah promis for helpem and protectim olketa mekem olketa finisim datfala building waka. Datfala promis mekem olketa for garem hope. Bat maet olketa tingse from olketa no staka, bae hem hard for olketa finisim datfala big waka. So nara samting wea Zechariah talem, mekem olketa for no fraet and for no daot. Jehovah sei staka narawan tu bae “kam and help for buildim temple bilong Jehovah,” and Heldai, Tobijah, and Jedaiah kam finis for helpem olketa. Olketa Jew sure Jehovah hem sapotim waka bilong olketa. Olketa no fraet and buildim bak datfala temple nomata king bilong Persia stopem datfala waka. Samting wea king bilong Persia duim hem olsem bigfala maunten wea blokem olketa, bat Jehovah kwiktaem aotem datwan. Gogo, olketa finis for buildim datfala temple long 515 B.C.E. (Ezra 6:22; Zech. 4:6, 7) Wanem Jehovah talem long olketa Jew bifor showimaot bigfala waka bae gohed insaed spiritual temple distaem. w17.10 29-30 ¶17

Solomon kasem wanfala spesol assignment from Jehovah for buildim temple long Jerusalem, wea hem wanfala barava important construction project long history bilong iumi! Datfala temple mas “barava big and luk naes winim eni nara building” and pipol evriwea bae savve abaotem datwan. And samting wea barava important nao, diswan hem “haos bilong trufala God, Jehovah.” (1 Chron. 22:1, 5, 9-11) King David trustim Jehovah bae sapotim Solomon. Bat Solomon hem “young nomoa and no garem bigfala savve.” Waswe, bae hem no fraet and willing for acceptim assignment for buildim datfala temple? Waswe, wei wea hem young and no garem bigfala savve bae stopem hem for duim datwan? For buildim datfala temple, Solomon mas no fraet and gohed duim waka hia. Sapos Solomon hem fraet, datwan maet mekem hem hol bak and no duim nao datfala waka. Olsem Solomon, iumi tu needim help bilong Jehovah for no fraet and gohed duim waka wea hem givim long iumi. w17.09 28 ¶1-2; 29 ¶4-5

Sapos God no givim kam Bible, laef bilong iu bae hao? Iu bae no garem olketa wise advaes wea savve helpem iu evriday. Iu bae no savve long truth abaotem God, laef bilong iumi olketa man, or wanem bae kamap long future. And iu bae no savve long olketa samting wea Jehovah duim for pipol long bifor. Iumi hapi from laef bilong iumi no olsem. Jehovah givim kam toktok bilong hem for iumi. Hem promisim toktok bilong hem bae stap for olowe. Aposol Peter quotem toktok wea stap long Isaiah 40:8. Datfala verse hem no story abaotem Bible wea iumi iusim distaem, bat hem storyim message insaed Bible. (1 Pet. 1:24, 25) Dastawe, insaed staka handred year wea go pas samfala pipol barava waka hard for transleitim Bible mekem pipol savve kasem datwan, nomata hem no isi and pipol againstim olketa. Jehovah laekem “evri difren kaen man mas sev and for garem stretfala savve abaotem olketa tru teaching.”—1 Tim. 2:3, 4. w17.09 18 ¶1-2

Samting wea kasem Joseph, hem happen tu long staka young wan distaem. (Gen. 39:7) Tingim samting wea kasem Kim. Staka taem olketa classmate bilong hem olketa tok abaotem wei wea olketa duim sex long weekend. Bat Kim no duim eni samting olsem, so hem no join insaed story bilong olketa. Hem sei samfala taem hem feel olsem ‘pipol les long hem and hem stap seleva’ and olketa nara young wan sei hem krangge bikos hem no garem eni boyfren. Bat Kim hem garem gudfala tingting. Hem savve feeling for laek duim sex savve strong tumas taem man hem young. (2 Tim. 2:22) Olketa skulfren savve askem hem, why hem no sleep witim eni man. Datwan givim hem chance for explainim why hem disaed for no duim sex. Iumi tinghae long olketa young wan bilong iumi wea disaed strong for rejectim wei wea olketa narawan switim olketa for durong, and Jehovah tu barava tinghae long olketa! w17.09 4 ¶8; 5 ¶10

Samfala pipol savve kwiktaem for kros and talem olketa toktok wea savve spoelem narawan. Kaen samting olsem savve affectim evriwan long famili. Bible talem iumi for lusim wei for kros, tok nogud, and singaot. (Eph. 4:31) Olketa samting hia savve mekem man for raf and laek for faet. Distaem staka pipol tingse hem olraet nomoa for kros and raf. Bat olketa wea duim olsem no respectim Jehovah. Staka brata and sista bilong iumi lusim finis olketa wei hia and garem olketa niufala wei. (Col. 3:8-10) Wei for laea hem part long datfala oldfala wei. Olsem example, staka pipol savve laea mekem olketa no peim tax or for no kasem blame for mistek wea olketa duim. Bat Jehovah hem “God wea evritaem talem tru samting.” (Ps. 31:5) So hem laekem evriwan wea worshipim hem for “mas talem tru samting” and “no laea.” (Eph. 4:25; Col. 3:9) Tru nao, iumi mas evritaem talem tru samting nomata hem no isi or maet bae iumi feel shame.—Prov. 6:16-19. w17.08 18 ¶3, 5; 20-21 ¶12-13, 15

Distaem, Jehovah iusim Bible for leadim iumi. Datfala man wea raetem psalm sei toktok bilong Jehovah savve “kwiktaem” for helpem iumi. God showim iumi stretfala road for followim and hem duim datwan long barava taem. Tingim olketa gud samting wea iumi kasem from Bible, olketa pablikeson wea kam from “wakaman wea faithful and wise,” JW Broadcasting, jw.org, olketa elder, and olketa brata and sista. (Matt. 24:45) Waswe, iu lukim hao Jehovah hem kwiktaem for helpem iu? Man wea raetem psalm hem luksavve nomata staka nation stap long earth, nation bilong Israel nao Jehovah chusim for kamap pipol bilong hem. Olketa nomoa Jehovah givim “law” long olketa, and “toktok” bilong hem long olketa. (Ps. 147:19, 20) Distaem, iumi tinghae long privilege for garem nem bilong God. Iumi hapi for savve long hem, iumi garem Bible for leadim iumi, and iumi savve fren gud witim hem. Olsem man wea raetem Psalm 147, iu tu garem staka reason for “Praisem Jah!” and for encouragem olketa narawan for duim sem samting. w17.07 20 ¶15-16; 21 ¶18

Olketa wea followim Jesus distaem, and winim wan million wea duim full-taem service, traem best for followim datfala kaonsel bilong Paul. Olketa no letem olketa samting bilong disfala world wea olketa advertisem for switim olketa. Olketa tingim disfala principle wea sei: “Man wea kaonem selen bae kamap slave bilong man wea hem kaonem selen long hem.” (Prov. 22:7) Satan laekem iumi for spendem taem and strong bilong iumi long olketa riches bilong disfala world. Samfala loanim staka selen for baem haos, trak, education, or for wedding bilong olketa. Sapos iumi no keakea bae iumi garem bigfala kaon wea iumi mas peim bak for staka year. Iumi showimaot iumi garem gudfala tingting taem iumi garem simpol laef, trae for no garem kaon, and no baem staka samting tumas. Taem iumi duim olsem, bae iumi garem taem for duim wanem God laekem and no kamap slave long olketa riches bilong disfala world.—1 Tim. 6:10. w17.07 10 ¶13

Jehovah hem garem raet for rulim full universe. Hem iusim wei wea hem garem paoa for rul long barava stretfala wei. Hem sei: “Mi nao Jehovah, mi showimaot love, mi raeteous, and mi duim olketa samting wea stret long earth, and mi hapi tumas long olketa samting hia.” (Jer. 9:24) Jehovah no needim law wea olketa man markem for helpem hem disaedem stret samting. Bat hem nao markem standard for wanem hem stret. Olketa law wea hem givim for olketa man for followim hem barava stret. Man wea raetem psalm hem sei: “Justice and raeteous wei hem faondeson long throne bilong iu.” So evri law, principle, and olketa instruction wea kam from Jehovah hem barava stret. (Ps. 89:14) Satan sei Jehovah hem nogud Ruler. Bat Satan no savve stretem olketa problem long disfala world. w17.06 28 ¶5

Evri tru teaching hem kam from Jehovah. (Ps. 31:5) From hem Dadi wea kaen, hem laekem iumi for savve long olketa tru samting hia. Iumi lanem olketa tru teaching taem iumi readim Bible and olketa pablikeson bilong iumi, and taem iumi attendim olketa convention, assembly, and olketa meeting. Taem iumi gohed for lanem moa samting long Bible, hem olsem iumi hipimap “olketa naesfala samting” wea old and niu. (Matt. 13:52) Jehovah bae helpem iumi for lanem staka samting insaed Bible, sapos iumi lukaotem olketa tru teaching olsem man wea lukaotem samting wea garem hae price. (Prov. 2:4-7) Hao nao iumi savve duim datwan? Iumi mas evritaem studyim Bible and olketa pablikeson bilong iumi and duim research. Datwan savve helpem iumi for savve long samfala “niu” samting long Bible wea iumi no savve long hem bifor. (Josh. 1:8, 9; Ps. 1:2, 3) Iumi shud barava laek for lanem staka samting long Bible. w17.06 12 ¶13-14

Wanfala singol brata hem ting raonem 1 Corinth 7:28 wea sei: “Olketa wea marit bae kasem hard taem long laef bilong olketa.” Datfala brata askem wanfala elder wea marit finis abaotem diswan, hem sei: “Wanem nao disfala ‘hard taem,’ and hao nao mi savve deal witim sapos mi marit?” Bifor elder hia ansarem kwestin bilong hem, hem talem datfala brata for tingim nara samting wea aposol Paul storyim. Paul sei Jehovah “hem God wea givim iumi comfort wea iumi needim . . . long eni hard taem wea iumi kasem.” (2 Cor. 1:3, 4) Dadi bilong iumi Jehovah, hem lovem iumi and hem savve comfortim iumi taem iumi kasem olketa hard taem. Maet iu tingim olketa taem wea Jehovah iusim toktok bilong hem for helpem and leadim iu. Iumi savve sure Jehovah laekem iumi for kasem gud samting, olsem hem duim for pipol bilong hem long bifor.—Jer. 29:11. w17.06 4-5 ¶1-2

Olketa refugee no needim kaikai and kaleko nomoa, bat olketa barava needim comfort and encouragement from Bible. (Matt. 4:4) Olketa elder savve helpem olketa refugee hia for kasem olketa pablikeson long languis bilong olketa and for contactim olketa brata wea savve long languis bilong olketa. Hem important for duim olsem bikos staka refugee lusim famili, community, and kongregeson bilong olketa. Iumi shud kaen and showimaot love long olketa. Sapos iumi no duim olsem, maet olketa go askem help from olketa narawan wea kam from sem kantri bat no worshipim Jehovah. (1 Cor. 15:33) Taem iumi welkamim olketa insaed long kongregeson, iumi waka witim Jehovah for “lukaftarem olketa pipol from difren ples.” Olketa refugee maet no savve go bak long ples bilong olketa bikos pipol wea persecutim olketa gohed for rul long there. Maet olketa narawan no laek for go bak long hom bilong olketa bikos olketa lukim olketa barava nogud samting happen long there and no savve forgetim datwan. Tingim disfala kwestin, ‘Sapos kaen samting olsem kasem mi, wanem nao mi laekem olketa narawan for duim for mi?’—Matt. 7:12. w17.05 6-7 ¶15-16

From iumi stap long world bilong Satan, staka samting savve happen wea mekem iumi feel wikdaon. (1 John 5:19) Bat sapos iumi letem olketa samting hia for mekem iumi barava wikdaon, faith and love bilong iumi long Jehovah bae no strong nao. Olsem example, maet iumi kasem problem from iumi olo, health hem no mas gud, or hard taem saed long selen. Or maet iumi feel nogud bikos iumi no fit for duim samfala samting wea iumi laek for duim. Maet iumi feel nogud bikos samting wea iumi laekem hem no happen olsem hao iumi tingim. Nomata wanem hem happen, iumi shud no tingse Jehovah hem lusim iumi. Tingim wanem Psalm 136:23 talem wea barava comfortim iumi. Hem sei: ‘God tingim iumi taem iumi feel sorre bikos hem showimaot love long iumi for olowe.’ Iumi sure Jehovah savve lisin long iumi taem iumi “askem hem for helpem iumi” and hem ansarem iumi.—Ps. 116:1; 136:24-26. w17.05 18-19 ¶8

Olsem Peter talem long Galatia 2:11-14, hem fraetem olketa man. (Prov. 29:25) Peter savve Jehovah hem hapi long olketa wea no Jew. Nomata olsem, hem fraetem olketa Jew wea circumcise wea kam from Jerusalem nogud olketa ting daonem hem bikos hem associate witim olketa Christian wea no Jew. Aposol Paul talem Peter samting wea hem duim hem barava no stret. (Acts 15:12; Gal. 2:13) Peter hem hambol and followim kaonsel wea hem kasem from Paul. Bible no storyim sapos Peter lusim eni privilege wea hem garem. Bat bihaen, Peter raetem tufala leta wea stap insaed long Bible. And tu, Jesus wea hem hed bilong kongregeson gohed for iusim Peter for duim waka long kongregeson. (Eph. 1:22) Samting wea happen mekem olketa brata and sista garem chance for showimaot olketa followim example bilong Jesus and Dadi bilong hem for forgivim Peter. Iumi hope olketa Christian no stambol long samting wea Peter duim. w17.04 27 ¶16-18

Jehovah finisim Sodom and Gomorrah. Datwan hem “showimaot samting wea bae kasem pipol wea no followim God” distaem tu. Jehovah bae finisim evri rabis samting wea pipol duim distaem, olsem hem duim long bifor. Bihaen God finisim olketa rabis samting wea pipol duim, wanem nao bae happen? Long niu world iumi bae hapi for duim staka gudfala samting. Olsem example, iumi bae mekem disfala earth kamap paradaes, and wakem haos for iumiseleva and for olketa narawan. Iumi bae welkamim staka million pipol wea bae laef bak and teachim olketa abaotem Jehovah and evri samting wea hem duim for olketa man. (Isa. 65:21, 22; Acts 24:15) Long datfala taem, bae iumi duim staka samting wea bae mekem iumi hapi and mekhae long Jehovah! w17.04 12 ¶11-12

Luk olsem, maet Jephthah savve finis dota bilong hem bae first wan wea kam for meetim hem. Nomata olsem, hem no isi for Jephthah and dota bilong hem for duim samting wea Jephthah promisim long Jehovah. Taem Jephthah lukim dota bilong hem, hem barava sorre. Dota bilong hem tu krae fogud. Why nao olsem? Jephthah no garem eni nara pikinini, and datfala dota bae no marit nao and bae no garem pikinini. Famili laen bilong Jephthah bae nomoa nao. Nomata tufala sorre tumas, tufala luksavve long wanfala important samting. Jephthah sei: “Mi mekem promis long Jehovah, and mi mas duim nao.” Dota bilong hem sei: “Mi willing for duim wanem iu promisim.” (Judg. 11:35-39) Jephthah and dota bilong hem faithful for duim wanem tufala promisim long God nomata hem no isi for tufala.—Deut. 23:21, 23; Ps. 15:4. w17.04 4-5 ¶5-6

Joseph safa from staka nogud samting. Taem hem samting olsem 17 year, olketa brata bilong hem salem hem for kamap slave. Then olketa putim hem long prison from olketa laea for sei hem reipim waef bilong boss bilong hem. (Gen. 39:11-20; Ps. 105:17, 18) Nomata Joseph hem faithful, luk olsem God no blessim hem. Bat bihaen 13-fala year, evri samting hem change. Joseph hem aot from prison, and hem kamap mek-tu ruler long Egypt. (Gen. 41:14, 37-43; Acts 7:9, 10) Waswe, olketa nogud samting wea kasem Joseph mekem hem for gohed feel nogud? Waswe, hem tingse Jehovah no tingim hem? Nomoa. Joseph hem patient for weit. Wanem nao helpem hem? Joseph hem garem faith long Jehovah. Hem luksavve Jehovah nao kontrolem evri samting. Iumi savve long datwan from samting wea hem talem long olketa brata bilong hem. Joseph sei: “Nomata iufala duim nogud samting long mi, God mekem datwan for kamap gud samting and for sevem laef bilong staka pipol olsem hem duim distaem.” (Gen. 50:19, 20) Joseph luksavve from hem willing for weit, staka blessing kamaot from datwan. w17.08 4 ¶6; 6 ¶12-13