September

Wanfala long olketa nambawan privilege wea olketa parents garem hem for ‘stretem and trainim olketa pikinini followim samting wea Jehovah talem.’ (Sams 127:3) Olketa pikinini long Israel olketa born insaed nation wea dedicate finis long Jehovah, bat olketa pikinini distaem no olsem. And tu, man no born witim wei for lovem God and truth. Dastawe start long day wea pikinini born, parents shud garem goal for helpem hem kamap disaepol, and for dedicate long Jehovah and baptaes. Diswan hem barava important samting for parents duim. Wei wea samwan dedicate and baptaes and faithful for worshipim God bae helpem hem for sev long taem bilong bigfala trabol. (Matt. 24:13) Iufala parents tu savve hapi and satisfae taem pikinini bilong iufala dedicate long Jehovah and baptaes. w18.03 12 ¶16-17

Olketa wea givim discipline from Bible insaed long famili and kongregeson need for followim example bilong Jesus. Taem olketa duim olsem, datwan showimaot olketa laekem God and Son bilong hem for leadim olketa. Taem iumi acceptim discipline from God and followim wei bilong Jehovah and Jesus for givim discipline, bae iumi savve kasem staka blessing. Famili and kongregeson bae garem peace, feel sef, garem love, and respectim each other. Olketa samting hia hem samfala long olketa blessing wea bae iumi kasem long future tu. (Sams 72:7) Tru nao, discipline wea Jehovah givim distaem redyim iumi for savve hao for stap gud tugeta and garem peace for olowe olsem wan famili wea Jehovah nao lukaftarem. (Aesaea 11:9) Taem iumi ting olsem abaotem discipline from God, bae iumi tinghae long datwan from iumi luksavve hem wanfala nambawan wei wea showimaot God barava lovem iumi. w18.03 26 ¶15; 27 ¶17, 19

Pipol go long John for baptaes for showimaot olketa repent from olketa sin againstim Law bilong Moses. (Matt. 3:1-6) John garem spesol privilege for baptaesim Jesus, datfala perfect Son bilong God. Bat datwan hem difren from olketa narawan wea hem baptaesim. (Matt. 3:13-17) Jesus no garem sin, so hem no need for repent. (1 Pet. 2:22) Wei wea Jesus baptaes hem for showimaot hem givim hemseleva for duim wanem Jehovah laekem. (Heb. 10:7) Taem Jesus duim ministry long earth, olketa disaepol bilong hem tu baptaesim olketa narawan. (John 3:22; 4:1, 2) Pipol hia tu baptaes for showimaot olketa repent from olketa sin againstim Law bilong Moses. Bat bihaen Jesus dae and resurrect, olketa wea laek followim hem garem difren reason for baptaes. w18.03 5 ¶6-7

Wanem nao olketa wei bilong spiritual man? Spiritual man barava laek for fren gud witim God. Hem letem holy spirit bilong God leadim hem and hem trae hard for followim wei bilong Jehovah. (Eph. 5:1) Hem trae hard for savve and garem tingting bilong Jehovah abaotem olketa samting. Hem barava bilivim God hem stap. Tingting bilong spiritual man hem difren from olketa wea no spiritual, from hem traem best for followim evri standard bilong Jehovah. (Sams 119:33; 143:10) Hem no duim “olketa nogud samting” wea body laekem, bat hem traem best for garem olketa wei bilong holy spirit. (Gal. 5:22, 23) For minim go moa diswan, tingim disfala example: Man wea savve tumas for duim bisnis, olketa kolem hem bisnisman and man wea tinghae tumas long olketa spiritual samting, olketa kolem hem spiritual man. w18.02 19 ¶3, 6

Olketa tekem Daniel olsem prisoner long Babylon, taon wea pipol worshipim idol and duim spiritism. Pipol long there no laekem olketa Jew and tok spoelem olketa and God bilong olketa, Jehovah. (Sams 137:1, 3) Daniel and olketa Jew wea faithful for worshipim Jehovah mas barava feel nogud long diswan! Olketa mas kaikaim kaikai bilong king, wea samfala kaikai hia Jehovah stopem. Bat Daniel “hemi save dat bae olketa samting ya i save mekem hem no klin long ae blong God,” so hem disaed for no kaikaim. (Daniel 1:5-8, 14-17) Daniel kasem nara challenge wea lelebet difren. Maet from hem savve tumas long staka samting, king givim hem olketa spesol waka. (Daniel 1:19, 20) Bat Daniel no praod or tingse wanem hem tingim nomoa hem stret. Hem gohed hambol and evritaem sei Jehovah nao givim hem savve for duim samting. (Daniel 2:30) Tingim diswan, Daniel hem spesol bikos nomata hem young yet, Jehovah sei hem faithful olsem Noah and Job wea servem Jehovah for full laef bilong tufala finis. (Esikiel 14:14) Waswe, hem fitim for Jehovah trustim Daniel? Ia, bikos Daniel gohed faithful and obeyim Jehovah for full laef bilong hem. w18.02 5 ¶11-12

Jesus showimaot example for balance saed long wei for enjoyim laef. Hem attendim “wanfala marit” and “wanfala big feast.” (John 2:1-10) Long datfala marit, olketa no garem inaf wine, so Jesus duim mirakol for changem wata for kamap wine. Nomata olsem, Jesus no tingim wei for enjoyim seleva hem main samting. Hem putim Jehovah first and duim best for helpem olketa narawan. Hem willing for dae long post for sevem olketa man, nomata hem kasem bigfala pain. Jesus tok olsem long olketa wea laek followim hem: “From iufala olketa disaepol bilong mi, pipol bae tok daonem and spoelem iufala and talem enikaen nogud samting abaotem iufala wea no tru. Nomata olsem, iufala bae hapi nomoa. Iufala mas barava hapi bikos iufala bae kasem bigfala blessing long heven.” (Matt. 5:11, 12) From iumi lovem God and laek for mekem hem hapi, iumi bae careful for no duim samting wea iumi savve hem rong, and tu, iumi no laek duim eni samting wea iumi tingse maet Jehovah no hapi long hem.—Matt. 22:37, 38. w18.01 26 ¶16-18

Iumi give long Jehovah bikos iumi tinghae and lovem hem. Taem iumi ting abaotem evri samting wea Jehovah givim, datwan barava kasem heart bilong iumi. King David sei evri samting iumi kasem hem kam from Jehovah and eniting wea iumi givim long Jehovah hem samting wea hem givim iumi finis. (Fas Kronikols 29:11-14) Wei for give savve helpem iumi for stap gud. Dastawe, hem gud for iumi willing for givim samting and no weit for kasem samting nomoa. Tingim sapos wanfala pikinini kasem selen from parents bilong hem, then hem iusim datfala selen for peim present for tufala. Hao nao feeling bilong dadi and mami taem olketa kasem datwan? Or tingim wanfala young pioneer wea stap witim parents bilong hem and hem givim samfala selen for help for peim rent or hem baem kam samfala kaikai for famili. Maet parents bilong hem no expectim hem for duim datwan, bat bae olketa hapi for acceptim datwan. Why? Bikos hem showimaot hem tinghae long evri samting wea tufala duim for hem. Long sem wei, Jehovah savve iumi savve kasem gud samting taem iumi give long hem. w18.01 18 ¶4, 6

For helpem pikinini bilong iu for garem faith hem no inaf for talem nomoa wanem hem stret and no stret. Iu need for helpem hem tu for ting raonem olketa kwestin olsem: ‘Why nao Bible stopem samfala samting wea maet mi laek for duim? Why nao mi bilivim olketa standard long Bible savve helpem mi?’ (Isa. 48:17, 18) Sapos pikinini bilong iu laek baptaes, helpem hem for ting raonem wanem Jehovah expectim hem for mas duim bihaen hem baptaes. Askem hem wanem nao tingting bilong hem abaotem datwan. Wanem gud samting nao bae hem kasem? And wanem nao samfala hard samting wea maet bae hem feisim? Why nao olketa gud samting hem kasem, hem winim olketa hard samting wea hem bae feisim? (Mark 10:29, 30) Hem barava important for pikinini tingting gud abaotem olketa samting hia bifor hem baptaes. Datwan bae helpem hem for bilivim wei for followim olketa standard long Bible bae evritaem helpem hem. w17.12 21-22 ¶14-15

Staka long iufala olketa brata and sista safa from bigfala sik. Samfala wea olo finis mas lukaftarem olketa nara olo relative. And olketa narawan stragol for provaedem need bilong famili. Mifala savve staka long iufala no deal witim wanfala problem nomoa, bat mas deal witim evri problem hia long semtaem. Jehovah interest long olketa star, nomata olketa no savve worshipim hem. Sapos olsem, datwan minim Jehovah mas barava interest long iu, bikos iu lovem and worshipim hem. (Sams 19:1, 3, 14) Dadi bilong iumi long heven savve long evri samting abaotem iu. Bible sei: “Hem kaontem finis tu evri hair long hed bilong [iu].” (Matt. 10:30) Jehovah laekem iumi for savve hem “gohed fo lukaftarem olketa wea i gohed fo obeim hem.” (Sams 37:18) Tru nao, Jehovah savve long evri problem wea iu garem and hem bae strongim iu for deal witim olketa problem hia. w18.01 7 ¶1; 8 ¶4

Taem Peter resurrectim Tabitha datwan mekem “staka biliv long Lord.” So olketa niu disaepol hia savve preachim gud nius abaotem Jesus and talem evriwan hao Jehovah savve mekem olketa man laef bak. (Acts 9:36-42) Samfala pipol stap tu taem nara resurrection happen. Wantaem, long Troas, wea distaem hem northwest Turkey, aposol Paul attendim wanfala meeting insaed rum wea stap antap. Paul story gogo kasem midolnaet. Wanfala young man wea nem bilong hem Eutychus hem sidaon herehere long window. Bat hem sleep and then hem foldaon from mek-thri story. Maet Luke nao first wan for kasem Eutychus. From hem doctor, hem luksavve datfala young man hem no garekil or hafded, bat hem dae finis. Paul tu go daon. Hem liftim and holem Eutychus and evriwan seke taem hem sei: “Hem laef nao.” Datfala mirakol barava affectim evriwan wea lukim datwan. From olketa savve datfala young man hem dae finis and then hem laef bak, datwan mekem “olketa hapi tumas.”—Acts 20:7-12. w17.12 5 ¶10-11

Waswe, pipol really savve hao for stretem olketa nogud samting wea happen long world? Iumi lukim hao olketa man nating savve finisim war. Olketa nogud samting olsem, cybercrime, domestic violence, terrorism, and corruption hem gohed kamap big tumas. And olketa sik wea staka dae from, hem staka tumas. Distaem, selfish pipol nao kontrolem olketa samting saed long selen and politik. Dastawe, hem hard tumas for olketa finisim war, criminal fasin, sik, and wei for poor. Kingdom bilong God nomoa savve duim datwan. Tingim wanem Jehovah bae duim for iumi olketa man. Kingdom bae finisim olketa samting wea kosim war olsem wei for selfish, corruption, wei for mekhae long kantri, false religion, and Satan tu. (Ps. 46:9) Kingdom bae finisim tu criminal fasin. Nomata distaem tu Kingdom gohed teachim staka million pipol for lovem and trustim each other. No eni nara gavman savve duim datwan. (Isa. 11:9) Klosap nao Jehovah bae finisim sik and evriwan bae garem gudfala health. (Isa. 35:5, 6) Hem bae finisim wei for poor and mekem evriwan hapi and fren gud witim hem.—Ps. 72:12, 13. w17.11 24 ¶14-16

Wanfala main reason Jehovah markem olketa taon for stap sef, hem for protectim olketa Israelite for no guilty long blood. Jehovah barava tinghae long laef and hem heitim wei for killim man dae. (Prov. 6:16, 17) Nomata sapos samwan no min for killim dae narawan, hard for Jehovah ting nating long datwan from hem God bilong justice and hem holy. Olketa scribe and Pharisee difren from Jehovah, olketa nating tinghae long laef. Jesus sei long olketa: “Iufala aotem key wea openem door for savve abaotem God. Iufala no go insaed datfala door and iufala trae for stopem olketa narawan wea laek go insaed tu!” (Luke 11:52) Olketa nao shud explainim toktok bilong God long pipol and helpem olketa for kasem laef olowe. Bat, olketa stopem pipol for followim Jesus, “man wea God markem for givim laef long pipol.” (Acts 3:15) Taem olketa duim olsem, olketa leadim pipol go for dae. Olketa scribe and Pharisee praod and selfish, and no kea long laef bilong pipol. Datwan barava no kaen and no showimaot love! w17.11 15-16 ¶9-10

Taem iumi start studyim Bible witim olketa Witness, maet iumi no laek talem olketa long famili abaotem datwan. Bat taem faith bilong iumi start for grow, iumi luksavve iumi mas talem olketa iumi laek worshipim Jehovah. Taem iu faithful long God, datwan maet mekem problem kamap midolwan iu and olketa insaed famili. Traem best for minim feeling bilong olketa. Iumi barava hapi bikos iumi savve long truth insaed Bible. Nomata olsem, olketa relative bilong iumi maet tingse Olketa Jehovah’s Witness laea long iumi for joinim religion bilong olketa. Maet olketa tingse iumi no lovem olketa nao bikos iumi no celebratem olketa holiday witim olketa. And tu, maet olketa tingse bae iumi kasem nogud samting bihaen iumi dae. Bat iumi mas traem best for minim feeling bilong olketa. Taem iumi lisin long wanem olketa talem, datwan bae helpem iumi for savve why olketa wari abaotem iumi. (Prov. 20:5) Aposol Paul trae for minim “evri didifren kaen man” mekem hem savve preach and teachim gud nius long olketa. Taem iumi duim olsem, diswan savve helpem iumi for teachim truth long olketa relative.—1 Cor. 9:19-23. w17.10 15 ¶11-12

Maet iumi fraet for sing bikos iumi no savve hao for singsing. Bat samfala idea stap for mekem singsing bilong iumi kamap gud. Iu savve singsing witim strong and laod voice sapos iu lane hao for brith long stretfala wei. Long sem wei wea paoa savve mekem bulb for laet, wei wea iu brith long stretfala wei savve mekem toktok or singsing bilong iu garem paoa. Iu shud singsing laod olsem hao iu toktok or winim hao iu toktok. Long Bible, samfala scripture talem olketa wea worshipim Jehovah for “singaot witim hapi” taem olketa singsing for praisem hem. (Ps. 33:1-3) Traem olketa idea hia: Chusim wanfala favorite song long songbuk. Readim big evri word witim strong and klia voice. Then, witim sem laod voice, readim wanfala short toktok long wanfala brith. Then, singim datfala short toktok witim sem strong voice. (Isa. 24:14) Taem olsem, voice bilong iu for singsing bae garem moa paoa. Datwan barava gud samting. So no fraet or feel shame for mekem voice bilong iu laod and garem paoa. w17.11 5-6 ¶11-13

Tingim bigfala gogo bilong olketa Jew from Babylon go kasem Jerusalem. Olketa hia bae garem staka taem for tingting and story abaotem niu ples bilong olketa. Olketa olo storyim long olketa narawan hao Jerusalem and datfala temple luk naes tumas. (Ezra 3:12) Sapos iu nao followim olketa and hem firstaem bilong iu for lukim Jerusalem, hao nao feeling bilong iu? Waswe, bae iu sorre taem iu lukim grass grow and kavarem olketa building wea distroe, wall bilong datfala taon brek, and olketa big hol nomoa stap long ples wea olketa gate and taoa stap bifor? Waswe, bae iu start for comparem wall bilong Babylon wea big and strong witim wall bilong Jerusalem wea distroe? Nomata olsem, olketa Jew no wikdaon. Why nao olsem? Bikos Jehovah helpem and protectim olketa taem olketa kam bak long Jerusalem. Taem olketa kasem Jerusalem, olketa buildim wanfala altar long ples wea temple hem stap long hem bifor, and olketa offerim sakrifaes long Jehovah evriday.—Ezra 3:1, 2. w17.10 26-27 ¶2-3

Solomon maet lanem staka samting abaotem wei for no fraet from dadi bilong hem. David no fraet taem hem faetem Goliath, datfala maeti soldia wea evriwan fraetem. David iusim nomoa wanfala smooth ston and hem trustim Jehovah, and hem killim dae Goliath. (1 Sam. 17:45, 49, 50) Dastawe hem barava fitim for David encouragem Solomon for no fraet and for buildim temple! Jehovah bae stap witim hem go kasem taem hem finis for buildim datfala temple. Solomon ting raonem toktok wea dadi bilong hem talem and hem no letem wei wea hem young and no garem big savve stopem hem for duim datfala waka. Bat hem showimaot wei for no fraet and gohed waka, and Jehovah helpem hem for finisim datfala temple insaed seven and haf year. Jehovah helpem Solomon, and hem savve helpem iumi tu for no fraet and duim olketa waka bilong iumi insaed famili and long kongregeson. (Isa. 41:10, 13) Sapos iumi no fraet taem iumi gohed for duim wanem Jehovah laekem, iumi sure hem bae blessim iumi distaem and long future tu. w17.09 28 ¶3; 29 ¶4; 32 ¶20-21

Pipol bilong Jehovah barava bilivim toktok bilong God “hem laef and hem garem paoa.” Iumiseleva lukim hao Bible garem paoa for changem laef bilong iumi and olketa narawan. Long bifor, samfala brata and sista savve steal, iusim drug, or durong. Samfala olketa bin rich and garem bignem, bat olketa no hapi and satisfae. (Eccl. 2:3-11) Bat plande pipol wea feel iusles and no garem hope, distaem Bible helpem olketa for garem hope and followim road for laef olowe. Maet iu hapi for readim and lane abaotem experience bilong olketa brata and sista insaed olketa Wastaoa article wea garem title, “Bible Changem Laef Bilong Pipol.” And nomata bihaen man kamap wanfala Witness, hem mas gohed for kasem help from Bible for strongim wei wea hem fren gud witim Jehovah. w17.09 23 ¶1

Olsem wei wea Jehovah hem luksavve long samting wea kasem Lot, iumi sure hem minim tu olketa hard taem wea iumi kasem. (Isa. 63:7-9; Jas. 5:11; 2 Pet. 2:9) Jehovah teachim tu pipol bilong hem for kaen and sorre long pipol. Tingim wanfala law wea hem givim long olketa Israelite. Taem samwan kaonem selen from wanfala man, hem mas leavim coat bilong hem witim datfala man for olsem wanfala promis wea showimaot hem bae changem bak selen bilong datfala man. (Ex. 22:26, 27) Datfala man mas givim bak datfala coat long evening mekem man wea ownim savve iusim long naet mekem hem no cold. Man wea no kaen bae no laek for givim bak coat bilong narawan. Bat, Jehovah teachim pipol bilong hem for kaen and sorre long narawan. Wanem Bible principle nao iumi lanem from disfala law? Sapos iumi lukim wanfala brata or sista bilong iumi hem garem need and iumi fit for helpem hem, iumi laek duim samting for helpem hem.—Col. 3:12; Jas. 2:15, 16; 1 John 3:17. w17.09 9 ¶4-5

Jesus askem Dadi bilong hem for forgivim olketa wea killim hem. Nomata Jesus hem barava wari or hem safa, hem gohed for patient and no raf. (1 Pet. 2:21-23) Paul storyim wanfala wei wea iumi savve showimaot iumi patient and no raf. Hem sei: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem. Iufala mas olsem Jehovah wea hem willing for forgivim iufala.” (Col. 3:13) For iumi forgivim olketa narawan, iumi mas garem wei for patient and no raf. Datwan bae helpem iumi for gohed garem wan mind insaed kongregeson. Jehovah laekem iumi for patient witim olketa narawan and no raf long olketa. Hem important for iumi garem olketa wei hia sapos iumi laek for stap long niu world. (Matt. 5:5; Jas. 1:21) Taem iumi patient and no raf, iumi mekhae long Jehovah and helpem olketa narawan for followim samting Bible teachim.—Gal. 6:1; 2 Tim. 2:24, 25. w17.08 25-26 ¶15-17

Bible garem staka example wea showimaot wei wea Jehovah duim samting wea man no expectim. Olsem example, taem Hezekiah hem king long Judah, Sennacherib, wea hem king bilong Assyria kam attakim Judah, and tekovarem evri taon long there, bat Jerusalem nao nomoa. (2 Ki. 18:1-3, 13) Then Sennacherib redi for kam attakim Jerusalem. Wanem nao King Hezekiah duim? First samting, hem prea long Jehovah for helpem olketa and hem askem advaes long profet Isaiah. (2 Ki. 19:5, 15-20) Then Hezekiah peim tax wea Sennacherib askem, wea datwan showimaot hem garem gudfala tingting. (2 Ki. 18:14, 15) Then hem duim samting for protectim pipol wea stap long datfala taon. (2 Chron. 32:2-4) Bat wanem nao happen? Jehovah sendem wanfala angel for killim dae 185,000 soldia bilong Sennacherib insaed wanfala naet nomoa. Hezekiah bat nating expectim datwan for happen!—2 Ki. 19:35. w17.08 10 ¶7; 11 ¶12

Wanem nao olketa samting wea iu savve duim mekem iu fit for duim full-taem service? For duim best bilong iu for Jehovah, hem important for iu garem olketa gudfala wei. Evritaem studyim Bible, ting raonem wanem iu lanem, and traem best for givim olketa gudfala koment long olketa meeting. Taem iu skul yet, hem gud for iu lane for storyim gud nius long olketa narawan. Showimaot iu interest long pipol taem iu story gud long olketa, and lisin taem olketa talemaot tingting bilong olketa. And tu, iu savve volunteer for duim eni waka long kongregeson, olsem for klinim and fixim olketa samting long Kingdom Hall. Jehovah hem laek for iusim olketa wea hambol and willing for duim waka. (Ps. 110:3; Acts 6:1-3) Aposol Paul askem Timothy for duim missionary waka bikos ‘olketa brata talem olketa gud samting abaotem hem.’—Acts 16:1-5. w17.07 24 ¶7; 26 ¶14

Sapos disfala kwestin abaotem wei wea Jehovah nomoa hem fit for rul hem no klia long mind bilong olketa man or olketa angel, bae no eni peace and wan mind stap. Bat bihaen Jehovah duim samting for mekhae long wei wea hem nomoa garem raet for rul, evriwan bae stap anda long rul bilong hem for olowe. Full universe bae garem peace. (Eph. 1:9, 10) God bae mekhae long rul bilong hem, and rul bilong Satan and olketa man bae finis for olowe. Kingdom wea Jesus rulim bae mekhae long rul bilong God. Pipol wea faithful long God pruvim finis iumi olketa man savve sapotim rul bilong God. (Isa. 45:24) Waswe, iumi laek faithful long God olsem olketa hia? Yes! Sapos olsem, hem important for iumi minim gud why Jehovah nomoa garem raet for rul. w17.06 23 ¶4-5

Iumi no barava savve hao long nao samwan savve gohed for feel sorre. Taem samwan hem dae, staka fren and relative savve stap for comfortim olketa wea sorre. Bat bihaen olketa go and busy witim laef bilong olketa, olketa wea sorre still needim comfort. So iumi mas redi evritaem for helpem olketa. Iumi mas gohed for comfortim olketa wea feel sorre long enitaem wea olketa needim iumi. (1 Thess. 3:7) Tingim, man wea lusim samwan wea hem lovem savve feel sorre enitaem nomoa. Olsem example, olketa savve feel sorre long day bilong wedding anniversary, herem wanfala singsing, lukim olketa photo, duim samting wea olketa savve duim tugeta bifor, wanfala samting wea smel naes, eni saond, or olketa savve feel sorre taem olketa tingim samfala taem long year. Hasband or waef wea marit partner hem dae, savve barava sorre tumas especially long firstfala year wea hem bae attendim assembly or Memorial seleva. Tingim, olketa wea feel sorre needim encouragement no long olketa taem olsem nomoa. w17.07 16 ¶17-19

Taem iumi busy for duim olketa gudfala samting for nara pipol, staka taem datwan savve mekem iumi for no tingim tumas olketa problem bilong iumiseleva. Olsem example, staka sista wea marit or singol luksavve taem olketa preachim gud nius abaotem Kingdom, olketa waka tugeta witim Jehovah and duim wanem hem laekem. Diswan mekem olketa hapi tumas. Iumi evriwan savve showimaot iumi tingim pipol taem iumi preach long olketa. And taem iumi duim olketa gudfala samting for olketa brata and sista bilong iumi, datwan savve mekem iumi fren gud witim olketa. Hem nao samting wea aposol Paul duim. Hem tingim olketa narawan olsem “wanfala mami wea lukaftarem gud pikinini bilong hem wea hem susum.” And tu, Paul comfortim and encouragem olketa brata insaed kongregeson “olsem wanfala dadi hem duim long olketa pikinini bilong hem.” (1 Thess. 2:7, 11, 12) Olketa young wan wea lovem Jehovah savve comfortim and encouragem olketa narawan long famili. Olketa savve duim datwan taem olketa showimaot respect long dadi and mami, and duim samfala samting for helpem famili. And tu, taem olketa pikinini faithful long Jehovah, diswan savve encouragem evriwan insaed long famili. w17.06 7 ¶13-14; 8 ¶17

Samfala pipol garem staka selen wea olketa narawan long famili savve gohed iusim bihaen olketa dae. Bat staka billion pipol long world olketa barava poor. Jesus savve Kingdom bilong God nomoa savve stretem olketa problem hia. Bible storyim “olketa bisnisman” or olketa bigfala bisnis long disfala world, olketa gavman, and evri false religion olketa part long world bilong Satan. (Rev. 18:3) Pipol bilong God mas no join long politik and long false religion. Nomata olsem, staka wea worshipim Jehovah tu duim bisnis or waka for selen distaem. Iumi olketa Christian mas garem stretfala tingting abaotem waka bilong iumi for selen and for duim bisnis. So hem gud for iumi tingim olketa kwestin hia: ‘Waswe, wei wea mi iusim olketa material samting wea mi garem showimaot mi faithful long God? Wanem nao mi savve duim for no busy tumas long waka for selen or for duim bisnis? Olketa wanem experience nao showimaot pipol bilong God distaem barava trustim hem?’ w17.07 7-8 ¶1-3

Jesus savve laef bilong iumi bae hem no isi and iumi savve wari and kasem olketa hard samting. Long datfala tokpiksa abaotem man wea plantim seed, Jesus sei samfala pipol bae gohed strong taem olketa acceptim “message abaotem Kingdom.” Bat gogo, “riches wea savve switim man” hem “satem datfala message” and olketa no gohed strong nao. (Matt. 13:19-22; Mark 4:19) Sapos iumi no careful, olketa samting wea iumi wari abaotem evriday savve mekem iumi for no gohed gud long spiritual wei. Iumi savve showimaot iumi lovem Christ taem preaching waka hem important samting long laef bilong iumi. Wanem nao savve helpem iumi for gohed duim datwan? Hem gud for iumi tingim diswan, ‘Wanem nao mi barava laekem tumas? Waswe, mi hapi taem mi duim waka bilong Jehovah or taem mi duim olketa nara samting?’ w17.05 23 ¶3-4

Taem olketa “pipol from difren ples” stap farawe from olketa nara Witness wea story long languis bilong olketa, olketa shud joinim kongregeson wea story long languis bilong datfala ples. (Ps. 146:9) Bat sapos kongregeson wea story long languis bilong olketa hem stap klosap, hed long famili mas disaed wanem kongregeson nao olketa savve joinim. Bifor hem disaed, hem shud tingting gud abaotem datwan and prea abaotem. And tu, hem bae storyim datwan long waef and olketa pikinini bilong hem. (1 Cor. 11:3) Olketa dadi and mami mas luksavve long olketa samting wea savve helpem pikinini for gohed gud long spiritual wei. For olketa pikinini minim gud olketa tru teaching long Bible, olketa need for lanem moa samting winim wei for attendim olketa meeting nomoa. Bat tingim diswan: Taem olketa pikinini attendim meeting long languis wea olketa minim gud, olketa savve lanem samting, nomata maet dadi and mami no luksavve long datwan. Bat sapos olketa no minim languis, olketa no savve lanem eni samting tu.—1 Cor. 14:11. w17.05 10 ¶10-11

Hem gud for iumi wanwan ting raonem olketa kwestin hia: ‘Waswe, mi ting for muv go long taon, nara province, or long nara kantri mekem mi savve garem staka selen for garem gudfala laef? Sapos mi ting for muv, waswe, mi prea abaotem and ting raonem hao datwan savve affectim famili bilong mi and kongregeson?’ Jehovah givim iumi nambawan privilege for sapotim rul bilong hem. Start long taem bilong Adam and Eve, Satan laekem olketa man for saedem hem and againstim Jehovah. Bat taem iumi sapotim rul bilong Jehovah, datwan showimaot iumi againstim Satan. From iumi garem faith long Jehovah, datwan mekem iumi laek for duim waka bilong hem and datwan mekem hem barava hapi. (Prov. 23:15, 16) God savve givim ansa long Satan taem iumi faithful and obeyim hem. (Prov. 27:11) Jehovah tinghae long wei wea iumi obeyim hem and hem barava hapi long datwan. w17.04 32 ¶15-16

Long Law bilong Moses hem sei taem man mekem promis long Jehovah, “hem mas keepim promis bilong hem. Hem shud duim evri samting wea hem promis for duim.” (Num. 30:2) Holy spirit helpem Solomon tu for talem toktok wea stap long text for tuday. Jesus talem hao hem wanfala serious samting for mekem wanfala promis long God. Hem sei: “Iufala herem hao long bifor, olketa sei: ‘Iu mas duim wanem iu promis for duim. Sapos iu promisim samting long Jehovah, iu mas duim datwan.’” (Matt. 5:33) Tru nao, hem important for duim wanem iumi promisim long Jehovah bikos hem affectim wei wea iumi fren witim hem. David sei: “Hu nao fit for go ap long maunten bilong Jehovah, and hu nao fit for standap long holy ples bilong hem?” Then hem sei, eniwan “wea duim wanem hem promisim” bae Jehovah acceptim hem.—Ps. 24:3, 4. w17.04 4 ¶3-4

Sapos samwan long kongregeson duim samting long iumi wea no stret, iumi mas no gossip abaotem datwan. Sapos wanem hem duim hem serious, iumi shud askem olketa elder for helpem iumi deal witim datwan. (Lev. 5:1) Bat staka taem samting wea samwan duim maet no big tumas, and iumi savve stretem datwan witim datfala brata and no need for talem olketa elder or eni narawan. (Matt. 5:23, 24; 18:15) Iumi laek for stap gud witim olketa brata and sista bilong iumi and followim olketa Bible principle taem samting olsem happen. Samfala taem bihaen samting hem happen nao, maet iumi just luksavve tingting bilong iumi abaotem datwan hem no stret. Then bae iumi hapi from iumi no talem eni nogud samting abaotem datfala brata or sista! Nomata tingting bilong iumi abaotem samting wea happen hem stret or nomoa, hem bae no helpem iumi sapos iumi tok spoelem man wea duim datwan. Bae iumi no laek for duim datwan from iumi lovem Jehovah and olketa brata bilong iumi. w17.04 21 ¶14