October

Wisdom kam from Jehovah, and hem willing for sharem datwan witim olketa narawan. Wanfala wei for kasem wisdom, hem for acceptim discipline bilong God. And wisdom savve protectim iumi for no duim samting wea bae spoelem gudfala wei and spiritual saed bilong iumi. (Provebs 2:10-12) Datwan bae helpem iumi for “gohed kasem gud samting from love bilong God, and garem hope for laef olowe.” (Jude 21) Bat, bikos iumi no perfect, samting iumi laekem, ples iumi growap, and olketa nara samting savve mekem hem hard for iumi acceptim discipline or garem stretfala tingting abaotem datwan. Taem iumi lukim gud samting wea kamap from iumi acceptim discipline, datwan mekem wei wea iumi tinghae long love bilong God hem kamap moa strong. Provebs 3:11, 12 sei: “San blong mi, yu no les long strongfala toktok blong [Jehovah], . . . hemi stretem eniwan hu hemi lavem.” Tru nao, Jehovah evritaem laekem iumi for kasem nomoa gud samting. (Heb. 12:5-11) From God savve gud long iumi, discipline wea hem givim hem evritaem fitim wanem iumi needim. w18.03 28-29 ¶1-2

Aposol Peter raet for olketa brata and sista long Asia Minor, wea garem didifren culture. Olketa feisim olketa “bigfala test” wea olsem fire. Wanem nao helpem olketa Christian long datfala taem for deal witim olketa barava hard taem hia? (1 Pet. 1:1; 4:4, 7, 12) Tingim, Peter laekem olketa brata and sista for welkamim each other nomata olketa associate tugeta and savve long each other finis. Wanem gud samting nao olketa kasem taem olketa showimaot wei for welkam? Diswan mekem olketa fren gud tugeta. Waswe, iu tingim enitaem samwan invaetem iu long haos bilong hem? Waswe, iu rememberim olketa gud samting wea iufala enjoyim tugeta? Taem iu invaetem samfala long kongregeson, diswan helpem iufala for fren gud tugeta and bae iu savve gud long olketa. Olsem wei wea olketa Christian long taem bilong Peter mas fren gud bikos olketa hard taem wea olketa feisim hem kamap worse, iumi tu need for duim sem samting from iumi stap long “olketa last day.”—2 Tim. 3:1. w18.03 14-15 ¶1-3

Jesus sei olketa wea garem spiritual tingting olketa hapi. Rome 8:6 storyim olketa gud samting wea man kasem taem hem garem spiritual tingting. Hem sei: “Man wea tingim samting wea body laekem bae dae, bat man wea tingim samting bilong spirit bae kasem laef and garem peace witim God.” Sapos iumi garem spiritual tingting iumi savve garem peace long mind and witim God distaem, and hope for laef olowe long future. Nomata olsem, iumi stap long world wea danger tumas. From iumi stap midolwan pipol wea no garem tingting bilong God, iumi mas waka hard for garem spiritual tingting and protectim mind bilong iumi. Sapos iumi no fulimap mind bilong iumi witim tingting bilong Jehovah, disfala world bae fulimap mind bilong iumi witim olketa nogud wei and tingting bilong hem. Jude sei, gogo pipol olsem bae “no garem spiritual tingting and no garem spirit bilong God.”—Jude 18, 19. w18.02 19 ¶5, 7; 20 ¶8

Staka doctor and nurse waka midolwan pipol wea garem sik wea isi for kasem narawan. Olketa lukaftarem sikman bikos olketa laek for helpem hem. Bat olketa mas protectim olketa seleva mekem olketa no kasem datfala sik wea olketa trae for kiurim. Long sem wei tu, staka long iumi stap and waka witim pipol wea wei and tingting bilong olketa barava difren from God. Diswan isi for affectim iumi. Hem wanfala challenge. Long olketa last day distaem, pipol wea no lovem God no laek for followim standard bilong God long samting wea stret and no stret. Aposol Paul storyim olketa nogud fasin bilong olketa hia taem hem raet long Timothy. (2 Tim. 3:1-5) Olketa nogud fasin olsem mekem iumi feel nogud tumas. Nomata olsem, tingting, toktok, and fasin bilong pipol wea stap raonem iumi savve isi for affectim iumi. (Provebs 13:20) Dastawe, iumi mas protectim iumiseleva for no letem diswan affectim iumi taem iumi helpem pipol for savve long Jehovah. w18.01 27-28 ¶1-2

Long 33 C.E., bihaen Jesus resurrect, hem story long winim 500 man, woman, and maet samfala pikinini tu. Long datfala taem nao maet hem talem toktok wea stap long text for tuday. (1 Cor. 15:6) Luk olsem staka handred follower bilong Jesus nao stap taem hem talem datfala komand for teachim pipol for kamap disaepol. Jesus sei eniwan wea laek for kamap disaepol bilong hem or “karem yoke” bilong hem, mas baptaes. (Matt. 11:29, 30; ftn.) Eniwan wea laek for worshipim Jehovah long wei wea hem acceptim, mas tinghae and luksavve long waka wea Jesus duim for fulfillim plan bilong Jehovah. Bihaen man duim datwan, hem savve baptaes. Datwan nao only wei for baptaes wea God acceptim. Bible storyim staka pruv wea showimaot hao long first century olketa niu disaepol bilong Christ luksavve hem important for baptaes. And olketa no delay for baptaes.—Acts 2:41; 9:18; 16:14, 15, 32, 33. w18.03 5 ¶8

Distaem, iumi stap long world wea fulap witim false worship and staka nogud samting. Diswan from Bigfala Babylon, wea Bible kolem ples wea “olketa demon” stap long hem, hem affectim full world. (Rev. 18:2) Dastawe pipol luksavve iumi difren and olketa mekfani long iumi. (Mark 13:13) Bat, olsem Daniel, iumi laek for fren gud witim God bilong iumi, Jehovah. Taem iumi hambol, obey and trustim Jehovah, hem bae ting long iumi olsem iumi spesol tu. (Hagae 2:7) Olketa dadi and mami savve lane from parents bilong Daniel. Taem Daniel smol boy long Judah, wei bilong staka pipol nogud. Bat wei wea hem lovem Jehovah gohed for kamap strong. Why nao olsem? Masbi parents teachim hem abaotem Jehovah. (Provebs 22:6) And tu, nem bilong Daniel, wea minim “Judge Bilong Mi Hem God,” showimaot parents bilong hem lovem Jehovah. (Dan. 1:6, ftn; NW) So parents, patient taem iufala teachim olketa pikinini abaotem Jehovah and no givap. (Eph. 6:4) Gohed for prea witim olketa and prea for olketa. Duim best bilong iufala for teachim pikinini for lovem wanem Jehovah sei hem stret, and Jehovah bae barava blessim iufala.—Sams 37:5. w18.02 5 ¶12; 6 ¶14-15

Iumi give long Jehovah bikos hem part long worship bilong iumi. Long wanfala vision, aposol John herem olketa wakaman bilong Jehovah long heven sei: “Jehovah, wea iu nao God bilong mifala and wea iu garem bigfala paoa, iu nao fit for kasem glory and for evriwan mekhae long iu bikos iu wakem evri samting, and evri samting hem stap bikos hem nao wanem iu laekem.” (Rev. 4:11) Tru nao, Jehovah nomoa fit for kasem glory and for evriwan mekhae long hem, so iumi laek givim best bilong iumi long hem. Thru long Moses, Jehovah komandim nation bilong Israel for celebratem thrifala festival evri year. Taem olketa kam long festival, olketa mas ‘no kam nating’ bikos wei for give long Jehovah hem part long worship bilong olketa. (Diutronomi 16:16) Distaem tu, taem iumi willing for give long organization bilong Jehovah, hem showimaot iumi tinghae and laek sapotim waka bilong hem and diswan hem important part long worship bilong iumi. w18.01 18 ¶4-5

Jesus sei tu: “Iufala waka witim mi. . . . Bae hem no hard for iufala waka witim mi, and iufala savve karem samting wea mi askem iufala for karem.” (Matt. 11:29, 30) Datwan barava tru! Samfala taem iumi feel taed taem iumi lusim haos for go long meeting or preaching. Bat bihaen iumi kam bak long haos, iumi feel strong and redi for deal witim eni problem. Tru nao, hem no hard for duim wanem Jesus laekem. Tingim experience bilong wanfala sista wea garem sik wea mekem hem wik tumas, sorre, and garem olketa headache wea pain tumas. So samfala taem hem hard for hem attendim meeting. Nomata olsem, wanday bihaen hem go long meeting, hem sei: “Tok wea kamap hem abaotem wei for wikdaon. Brata wea givim tok, story long wei wea showimaot hem tingim and minim man wea kasem problem olsem. Taem mi herem datwan mi krae. Datwan helpem mi for tingim hao meeting nao ples wea mi need for go long hem.” Hem barava hapi bikos hem traem best for attendim datfala meeting! w18.01 8-9 ¶6-7

Wanem nao bae iu duim sapos pikinini bilong iu talemaot hao hem daotem truth bihaen hem baptaes? Olsem example, maet son or dota bilong iu start for laekem olketa samting long world. Or maet hem start for daotem sapos hem gud for followim olketa Bible principle. (Ps. 73:1, 3, 12, 13) Wei wea iufala dadi or mami, deal witim datwan bae barava affectim sapos pikinini gohed worshipim Jehovah or nomoa. Trae for no argue witim pikinini bilong iu, nomata hem smol or hem teenager finis. Bat, mek sure hem savve iu lovem and laek for helpem hem. Young wan wea baptaes hem dedicate finis long Jehovah. Diswan minim hem promis for lovem and duim wanem Jehovah laekem winim wei for duim wanem hemseleva laekem. (Mark 12:30) Jehovah tingim kaen promis olsem hem serious samting, and evriwan shud garem sem tingting olsem tu.—Eccl. 5:4, 5. w17.12 22 ¶16-17

Olsem Martha, olketa faithful wakaman bilong God savve hao resurrection bae kamap long future. Tingim samting Jehovah askem Abraham for duim long Isaac, pikinini wea hem weit longtaem for garem. Jehovah sei: “Plis tekem son bilong iu, only son bilong iu Isaac, wea iu lovem tumas, and go long Moriah and sakrifaesim hem.” (Gen. 22:2) Tingim feeling bilong Abraham taem hem herem wanem Jehovah talem hem for duim. Jehovah promisim Abraham hao thru long laen bilong hem evri pipol bae kasem blessing. (Gen. 13:14-16; 18:18; Rome 4:17, 18) And tu, Jehovah sei datfala pikinini bae “kam from laen bilong Isaac.” (Gen. 21:12) Bat hao nao datwan bae kamap tru sapos Abraham sakrifaesim son bilong hem? Jehovah iusim Paul for explainim hao Abraham bilivim God savve resurrectim Isaac. (Heb. 11:17-19) Abraham no savve wanem taem nao bae son bilong hem laef bak. Bat hem trustim Jehovah bae resurrectim Isaac. w17.12 5-6 ¶12-14

Olsem Paul, iumi tu shud ting long laef olsem Jehovah. Hem laekem evriwan for repent mekem olketa savve kasem laef olowe. (2 Pet. 3:9) For followim example bilong Jehovah, iumi mas lovem pipol. Wei for garem mercy bae muvim iumi for gohed strong and hapi for preach. For garem sem tingting olsem Jehovah abaotem laef, iumi need for garem stret tingting abaotem safety. Taem iumi draev and waka, iumi mas tingim safety. Olsem taem iumi go long olketa meeting or duim eni waka for buildim or repairim Kingdom Hall. Laef, safety, and health bilong pipol hem important winim selen. God bilong iumi evritaem duim samting wea stret and iumi laek for olsem hem. Olketa elder nao main wan wea need for tingim safety bilong olketa seleva and olketa narawan. (Prov. 22:3) Sapos elder remindim iu abaotem olketa rul and standard bilong safety, followim wanem hem talem. (Gal. 6:1) Respectim laef olsem Jehovah and “iu bae no guilty long blood.”—Deut. 19:10. w17.11 16 ¶11-12

Olsem aposol Paul, olketa anointed Christian distaem garem nambawan hope. Aposol Paul sei disfala hope hem “prize for laef long heven wea God givim.” (Phil. 3:14) Olketa luk forward for rul long heven witim Jesus Christ insaed Kingdom and waka witim hem for helpem pipol for kamap perfect. (Rev. 20:6) Datwan barava nambawan hope! Olketa nara sheep luk forward for kasem difren prize. Olketa hope for stap olowe long Paradaes earth and diswan mekem olketa barava hapi! (2 Pet. 3:13) Paul laekem olketa nara anointed Christian for gohed faithful and kasem datfala prize. Hem sei: “Tingim evritaem olketa samting long heven.” (Col. 3:2) Diswan minim olketa mas evritaem tingim nambawan hope for go long heven. (Col. 1:4, 5) Wei for ting raonem blessing wea Jehovah bae givim savve helpem iumi evriwan for gohed luk forward for kasem datfala prize.—1 Cor. 9:24. w17.11 25-26 ¶1-2

Staka song long Singsing Long Jehovah From Heart, hem olsem prea. Olketa song hia savve helpem iu for talemaot feeling bilong iu long Jehovah. Olketa nara song savve encouragem iumi for “showimaot love and duim olketa gudfala samting.” (Heb. 10:24) Iumi laek for savve gud long tune, beat, and word long olketa song bilong iumi. Wanfala wei for duim diswan hem for herehere long olketa singsing wea olketa singim wea stap long jw.org. Taem iu lanem olowe olketa song hia long haos, iu bae no fraet for singsing big from heart. Remember, singsing hem important part long worship bilong iumi. Hem nambawan wei for showimaot iumi lovem and tinghae long evri samting wea Jehovah duim for iumi. (Isa. 12:5) Taem iu hapi and singsing from heart diswan encouragem olketa narawan for duim olsem tu. Evriwan long kongregeson nomata olketa wea young, olo, or just niu long truth, savve worshipim Jehovah taem olketa singsing. So no hol bak for singsing from heart. Tru nao, iumi mas hapi for singsing big! w17.11 7 ¶18-19

Distaem staka refugee kam from samfala kantri wea gavman tambuim preaching waka. Iumi tinghae long olketa brata and sista wea helpem staka thousand refugee wea hem firstaem bilong olketa for herem “message abaotem Kingdom.” (Matt. 13:19, 23) Staka wea kasem hard taem kasem comfort taem olketa attendim olketa meeting bilong iumi and olketa luksavve God hem barava stap witim pipol bilong hem. (Matt. 11:28-30; 1 Cor. 14:25) Iumi mas wise and “garem gudfala tingting” taem iumi preach long olketa refugee. (Prov. 22:3) Iumi mas patient and lisin gud taem olketa story and iumi shud no story abaotem olketa samting saed long politik. Iumi mas followim direction wea kam from branch office, and tu, for followim wanem olketa wea lukaftarem olketa refugee talem mekem iumi and olketa narawan no kasem nogud samting. Olketa refugee garem difren religion and culture, so hem important for iumi savve long datwan, and iumi mas respectim olketa taem olketa talemaot tingting bilong olketa. Olsem example, samfala hia garem strongfala tingting abaotem olketa kaleko wea olketa woman shud werem. So taem iumi go for preach long olketa, iumi shud no werem kaleko wea bae mekem olketa stambol. w17.05 7 ¶17-18

Iumi savve askem holy spirit bilong Jehovah for helpem iumi kaen long olketa relative wea no long truth. Iumi shud trae for no argue witim olketa abaotem biliv bilong olketa. Sapos iumi feel nogud long samting wea olketa talem or duim long iumi, iumi savve followim example bilong olketa aposol. Paul sei: “Taem pipol tok spoelem mifala, mifala askem God for blessim olketa. Taem pipol spoelem mifala, mifala no givap. Taem pipol talem nogud samting abaotem mifala, mifala tok kaen long olketa.” (1 Cor. 4:12, 13) Why nao datwan hem important? Bikos gud samting wea iumi duim savve affectim narawan winim samting wea iumi talem. (1 Pet. 3:1, 2, 16) Example bilong iu savve helpem olketa relative for luksavve Olketa Jehovah’s Witness garem hapi marit, savve lukaftarem gud olketa pikinini, olketa followim Bible principle, and for garem laef wea hapi and satisfae. Nomata sapos olketa relative no acceptim truth, iumi hapi bikos iumi savve gudfala wei bilong iumi mekem Jehovah hapi. w17.10 15 ¶13-14

Taem iumi lukim pipol change taem olketa lanem truth long Bible, iumi no sapraes long datwan. Olketa brata and sista bilong iumi long first century wea garem hope for laef long heven, olketa tu changem laef bilong olketa. (1 Cor. 6:9-11) Taem Paul story abaotem olketa wea duim samting wea mekem olketa no fit for kasem Kingdom bilong God, hem sei: “Hem nao wei bilong samfala long iufala bifor.” Toktok bilong God and holy spirit bilong hem helpem pipol hia for change. Nomata olsem, samfala wea kamap Christian finis olketa duim bigfala sin and datwan affectim wei wea olketa fren witim Jehovah. Wanfala example wea Bible storyim hem wanfala anointed brata wea olketa mas disfellowshipim hem. Bihaen hem changem wei bilong hem, olketa letem hem for kam bak long kongregeson. (1 Cor. 5:1-5; 2 Cor. 2:5-8) Taem iumi lukim hao Bible hem garem paoa for helpem olketa brata and sista for changem staka samting long laef bilong olketa, datwan barava encouragem iumi. So dastawe iumi laek for evritaem iusim Bible. w17.09 23-24 ¶2-3

Love hem kam from Jehovah. (1 John 4:7) Love (a·gaʹpe) wea followim olketa Bible principle hem winim evri nara love. Disfala love no wanfala feeling nomoa, bat hem savve mekem iumi for tingim and duim samting for helpem narawan. Man wea garem disfala love hem no savve selfish. Taem iumi showimaot diskaen love, bae iumi hapi and garem gudfala laef. Bifor Jehovah creatim Adam and Eve, hem duim samting wea showimaot hem lovem olketa man. Hem wakem earth for garem evri samting wea olketa man needim mekem olketa savve gohed laef. Bat samting wea barava nambawan, Jehovah mekem earth for kamap ples wea iumi barava enjoyim laef. Jehovah no tingim hemseleva, bat hem tingim iumi dastawe hem duim datwan. Bihaen Jehovah redyim evri samting long earth, hem creatim olketa man and givim olketa hope for laef olowe long Paradaes. w17.10 7 ¶1-2

James sei tu: “Sapos iufala gohed favorim narawan, iufala sin.” (Jas. 2:9) Sapos iumi lovem pipol, iumi shud no ting daonem olketa from education wea olketa kasem, kala skin, or living bilong olketa. Iumi shud no act olsem iumi no favorim eniwan, bat hem shud wei bilong iumi for no favorim eniwan. And tu, man wea garem love hem “patient and kaen,” and “hem no savve tinghae tumas long hemseleva.” (1 Cor. 13:4) Iumi mas patient, kaen, and hambol mekem iumi savve gohed preachim gud nius long pipol. (Matt. 28:19) And tu, taem iumi garem olketa fasin hia, hem bae isi for iumi deal witim evri brata and sista bilong iumi long kongregeson. Taem iumi showimaot love, evriwan long kongregeson bae garem wan mind, and datwan bae mekhae long Jehovah. Wei wea iumi wan mind savve mekem olketa narawan for laek worshipim Jehovah. Dastawe bihaen Bible story abaotem datfala niufala wei wea God laekem iumi for garem, hem sei: “Showimaot love, bikos datwan nao hem barava mekem pipol for wan mind.”—Col. 3:14. w17.08 26 ¶18-19

Iumi shud sorre long olketa wea no savve long Jehovah yet, bikos maet olketa bae repent and kamap fren bilong hem. Jehovah no laekem eniwan for dae taem hem bae finisim disfala world. (2 Pet. 3:9) So iumi laek for iusim disfala chance for talemaot warning message bilong Jehovah long evriwan and for helpem olketa kasem gud samting from kaenfala fasin bilong hem. Jesus showimaot nambawan example long wei for sorre and kaen long pipol. Hem sorre long olketa pipol bikos hem luksavve “olketa garekil and stap olobaot olsem olketa sheepsheep wea no garem eni man for lukaftarem olketa.” So wanem nao hem duim? “Hem teachim olketa plande samting.” (Matt. 9:36; Mark 6:34) Wei bilong olketa Pharisee hem barava difren bikos olketa no sorre long pipol and no laek helpem olketa. (Matt. 12:9-14; 23:4; John 7:49) Olsem Jesus, waswe, iu barava laek for helpem pipol and teachim olketa abaotem Jehovah? w17.09 9 ¶6; 10 ¶9

Taem Joseph stap insaed prison long Egypt, hem nating tingim wanday bae hem kamap mek-tu ruler long Egypt, or Jehovah bae iusim hem for sevem famili bilong hem long taem bilong bigfala hangre. (Gen. 40:15, ftn.; 41:39-43; 50:20) Samting wea Jehovah duim for Joseph hem winim nao eni samting wea hem tingim. Waswe, Sarah wea olo finis hem expectim Jehovah for letem hem for bornem wanfala pikinini boy? Taem Sarah bornem Isaac, datwan hem winim nao wanem Sarah expectim. (Gen. 21:1-3, 6, 7) Iumi no expectim Jehovah for duim mirakol for finisim evri problem bilong iumi bifor niu world hem kam. And iumi no askem Jehovah for duim eni spesol samting for iumi. Bat iumi savve Jehovah hem helpem olketa wea worshipim hem bifor long wei wea olketa no expectim. And Jehovah nating change. (Isa. 43:10-12) Datwan helpem iumi for trustim hem. Iumi sure hem bae strongim iumi for duim wanem hem laekem. (2 Cor. 4:7-9) Sapos iumi gohed faithful long Jehovah, hem bae helpem iumi for winim eni hard samting wea iumi no fit for winim. w17.08 11-12 ¶13-14

Full-taem service savve helpem iu for kamap strongfala Christian taem iu waka witim olketa narawan wea duim sem samting. And tu, staka wea duim full-taem service taem olketa young luksavve datwan helpem olketa for garem gudfala marit. Staka taem olketa wea pioneer bifor olketa marit, olketa gohed for pioneer witim marit partner bilong olketa. (Rome 16:3, 4) Psalm 20:4 sei olsem abaotem Jehovah: “Hem bae givim iu olketa samting wea heart bilong iu laekem and hem bae helpem iu for win long evri plan bilong iu.” Taem iu mekem olketa plan for future bilong iu, ting raonem wanem nao iu barava laek for duim long laef. Tingim olketa samting wea Jehovah duim distaem, and wanem iu savve duim long waka bilong hem. Then plan for duim samting wea Jehovah bae hapi long hem. Taem iu iusim laef bilong iu for duim moa samting long waka bilong Jehovah, and mekhae long hem, iu bae barava hapi. Iu bae “barava hapi long Jehovah, and hem bae givim iu olketa samting wea heart bilong iu laekem.”—Ps. 37:4. w17.07 26 ¶15-18

Iumi savve praisem samwan taem iumi lukim hem duim or talem samting wea iumi tinghae long hem. Bat Jehovah God nao hem main wan wea iumi laek for praisem! Iumi laek for praisem hem for bigfala paoa wea hem garem wea iumi savve lukim long olketa nambawan samting wea hem wakem, and iumi praisem hem for bigfala love wea hem showimaot for iumi, wea hem nao ransom sakrifaes bilong Son bilong hem. Taem iumi readim Psalm 147, iumi luksavve man wea raetem datfala psalm hem barava laek for praisem Jehovah. And tu, hem encouragem olketa narawan for praisem God. (Ps. 147:7, 12) Iumi no savve hu nao raetem Psalm 147. Bat luk olsem disfala man hem laef long datfala taem wea olketa Israelite go bak long Jerusalem, bihaen Jehovah mekem olketa kamap free from Babylon. (Ps. 147:2) Hem praisem Jehovah bikos pipol bilong Hem bae worshipim hem moa long ples bilong olketa. Waswe long iu, olketa wanem reason nao iu garem for sei “Hallelujah!,” or “Praisem Jah!”?—Ps. 147:1, ftn. w17.07 17-18 ¶1-3

Jesus savve living bilong staka wea followim hem bae hem no isi. Nomata Jesus no explainim why hem sei olketa material samting hem riches bilong disfala world, Bible showimaot wei wea olketa bisnisman greedy and laek for kasem staka selen hem no part long plan bilong God for iumi olketa man. Olsem example, Jehovah givim staka samting wea Adam and Eve needim long garden bilong Eden. (Gen. 2:15, 16) Bihaen, taem God givim holy spirit long olketa anointed Christian, “no eniwan long olketa tingse samting wea hem garem hem bilong hemseleva nomoa bat olketa sharem evri samting wea olketa garem.” (Acts 4:32) Profet Isaiah sei wanfala taem bae kam wea evriwan bae kasem evri material samting wea olketa needim. (Isa. 25:6-9; 65:21, 22) Bat go kasem datfala taem, olketa wea followim Jesus need for garem gudfala tingting. Olketa savve iusim olketa material samting for helpem olketa taem olketa traem best for duim samting wea bae mekem God hapi.—Luke 16:8. w17.07 8 ¶4-6

Bible buk Job, hem wanfala long olketa firstfala buk bilong Bible wea olketa raetem. Hem storyim hao Satan sei Job bae no faithful long God sapos hem kasem hard taem. Satan askem God for mekem Job safa. Jehovah no duim datwan, bat hem letem Satan for testim Job. No longtaem bihaen, olketa wakaman bilong Job dae and hem lusim evri samting wea hem garem. Then tenfala pikinini bilong hem olketa dae. Satan duim datwan mekem hem luk olsem God nao kosim olketa nogud samting hia. (Job 1:13-19) Then Satan mekem Job for kasem bigfala sik wea mekem hem safa tumas. (Job 2:7) Bihaen datwan, waef bilong Job and olketa fren bilong hem tok daonem hem, and datwan mekem hem barava feel wikdaon. (Job 2:9; 3:11; 16:2) Waswe, samting wea Satan talem abaotem Job hem tru? Nomoa. Nomata Job kasem staka nogud samting, hem gohed faithful long Jehovah.—Job 27:5. w17.06 24 ¶9-10

Jehovah markem hed long famili for provaedem wanem famili needim. Hem mas waka hard for lukaftarem famili bilong hem. Bat from iumi stap long olketa last day, waka for selen savve mekem man for wari tumas. Staka pipol lukaotem waka for selen bat no inaf waka hem stap for olketa duim. From datwan, pipol mas barava traem best bilong olketa for kasem wanfala waka. Dastawe staka pipol tingse olketa mas waka ovataem nomata olketa no kasem big pei. Olketa company trae for wakem staka samting distaem, nomata olketa no garem staka wakaman. So datwan savve mekem olketa wakaman for stress, taed tumas, and sik tu. Staka wari nogud olketa lusim waka bilong olketa sapos olketa no duim wanem boss talem. Iumi olketa Christian, wei for faithful long Jehovah hem important winim for faithful long eniwan or eni nara samting, nomata boss bilong iumi tu. (Luke 10:27) Iumi waka for selen for baem olketa samting wea iumi needim and for sapotim iumi long ministry. Bat sapos iumi no careful, waka bilong iumi savve affectim worship bilong iumi. w17.05 23-24 ¶5-7

Samfala wea niu long truth savve askem iumi for helpem olketa for teachim pikinini bilong olketa abaotem Jehovah or for studyim Bible witim olketa pikinini. Sapos wanfala dadi or mami askem iumi for studyim Bible witim pikinini bilong hem, hem gud for tingim, iumi shud no tekova long responsibility bilong hem for teachim datfala pikinini. (Eph. 6:1-4) Samfala taem maet iumi savve study tu witim wanfala pikinini wea dadi and mami no insaed long truth. Hem gud for study witim hem taem dadi and mami stap long haos, or iumi savve askem nara mature Christian for kam witim iumi, or iumi savve duim study long ples wea pipol savve lukim iumi. Taem iumi duim olsem, pipol bae no garem rong tingting abaotem wanem iumi duim. And iumi hope gogo maet dadi and mami nao bae teachim pikinini bilong olketa abaotem Jehovah. w17.06 8 ¶15-16

Sapos olketa pikinini no minim culture bilong mami and dadi bilong olketa, maet olketa bae no laek lanem languis and followim religion bilong mami and dadi. Olketa dadi and mami mas tingim spiritual saed bilong pikinini and no wanem olketa seleva nomoa laekem. (1 Cor. 10:24) Wanfala brata wea nem bilong hem Samuel sei: “Mi and waef bilong mi lukluk gud long olketa pikinini for faendemaot languis wea savve helpem olketa for gohed gud long spiritual wei, and mifala askem Jehovah for helpem mifala for mekem wise disison. . . . Taem mifala lukim olketa pikinini no minim gud wanem olketa herem long olketa meeting long languis bilong mitufala, mifala disaed for joinim kongregeson wea iusim languis long ples wea mifala stap. Mifala evritaem attendim olketa meeting and go long preaching waka tugeta. And tu, mifala invaetem olketa fren long kongregeson for kam kaikai long haos and for mifala go long olketa ples tugeta. Evri samting hia helpem olketa pikinini for savve gud long olketa brata and sista long kongregeson, and for savve long Jehovah olsem God, Dadi, and fren bilong olketa. Olketa samting hia nao hem important winim wei for olketa savve gud long languis bilong mitufala.” w17.05 10-11 ¶11-13

Klosap nao pipol wea sapotim rul bilong Jehovah nomoa bae stap long earth. Iumi barava luk forward long datfala taem! Iumi olsem Deborah and Barak wea singsing olsem: “Jehovah, killim dae olketa enemy bilong iu, and olketa wea lovem iu bae olsem sun wea kamap and go daon wea luk naes tumas.” (Judg. 5:31) Datwan bae happen taem Jehovah finisim Satan and disfala nogud world. Taem Armageddon start, Jehovah bae no iusim iumi for killim dae olketa enemy bilong hem. Iumi bae ‘standap kwaet and lukim wei wea Jehovah bae sevem iumi.’ (2 Chron. 20:17) Bat distaem, iumi garem chance for showimaot iumi no fraet and strong for sapotim rul bilong hem. “Olketa toktok long start bilong datfala song wea Deborah and Barak singim hem mekhae long Jehovah and no olketa man. Tufala sing olsem: “From olketa willing for go faet, datwan mekhae long Jehovah.” (Judg. 5:1, 2) Distaem tu olketa narawan savve praisem Jehovah bikos long gudfala waka wea iumi duim. w17.04 32 ¶17-18

Nomata Joseph hard for forgetim nogud samting wea kasem hem insaed 13-fala year, hem no gohed feel nogud olowe. (Gen. 45:5-8) And important samting nao, hem no letem nogud samting wea olketa narawan duim long hem for spoelem wei wea hem fren witim Jehovah. From Joseph faithful long Jehovah hem garem chance for lukim wei wea Jehovah stretem olketa samting wea kasem hem and blessim hem and famili bilong hem. Iumi tu mas tinghae long wei wea iumi fren witim Jehovah. From olketa brata and sista no perfect olketa savve duim samting wea no stret, bat iumi shud no letem datwan for stopem iumi for worshipim Jehovah wea iumi lovem. (Rome 8:38, 39) Bat sapos samwan long kongregeson duim samting long iumi wea no stret, iumi laek for followim example bilong Joseph and strongim wei wea iumi fren witim Jehovah. Iumi laek for duim samting followim tingting bilong Jehovah. Sapos bihaen iumi followim olketa Bible principle and traem best for stretem eni problem witim samwan long kongregeson bat hem no laek for acceptim datwan, iumi shud leavim datwan long hand bilong Jehovah. Iumi sure gogo hem bae stretem datwan. w17.04 20-21 ¶12; 22 ¶15-16

Hannah barava duim samting wea hem promisim long Jehovah. Hem tekem Samuel go long Hae Priest Eli long tabernacle long Shiloh, and hem sei: “Disfala boy nao mi askem long Jehovah taem mi prea, and hem givim hem long mi. Distaem mi bae givim hem go bak long Jehovah. Hem bae waka for Jehovah for full laef bilong hem.” (1 Sam. 1:24-28) Start long datfala taem Samuel hem stap long tabernacle. Bible sei hem “gohed for duim waka bilong Jehovah.” (1 Sam. 2:21) Datwan hem no isi samting for Hannah bikos bae hem no stap nao witim son bilong hem wea hem lovem tumas. Bae hem missim wei for plei witim hem, story witim hem, and teachim hem taem hem gohed for growap. Nomata olsem, Hannah duim wanem hem promisim long Jehovah bikos datwan nao important long hem winim samting wea hemseleva laekem.—1 Sam. 2:1, 2; Ps. 61:1, 5, 8. w17.04 5 ¶7-8

Aposol Paul sei long olketa last day, ‘evri samting bae hem hard tumas.’ Hem sei tu: “Wei bilong olketa nogud man and olketa man for laea bae worse moa.” (2 Tim. 3:2-5, 13) Waswe, iu lukim diswan happen? Staka long iumi kasem nogud samting from wei wea pipol spoelem narawan, heitim narawan, and from olketa raf criminal. Samfala nogud pipol no shame for duim nogud samting. Olketa narawan laea for helpem pipol batawea olketa duim nogud samting for spoelem olketa. Nomata kaen samting olsem no happen long iumi, wanem olketa nogud pipol hia duim hem still affectim iumi. Iumi savve sorre tumas taem iumi herem wei wea pipol treatim nogud olketa pikinini, olketa olo, and olketa wea no savve protectim olketa seleva. Wei bilong olketa nogud pipol hia hem olsem wei bilong olketa animal or olketa demon. (Jas. 3:15) Nomata olsem, iumi hapi bikos Bible hem givim iumi hope. w17.04 10 ¶4