June

Disfala promis mas barava strongim olketa aposol! Olketa aposol no barava luksavve hao Jesus bae klosap for dae. Nomata bihaen hem dae, bae olketa gohed kasem help. Jehovah redi for ansarem prea bilong olketa and helpem olketa for duim datfala waka for preach abaotem Kingdom. And hem nao wanem hem happen. No longtaem bihaen Jesus dae, olketa aposol prea for help and Jehovah ansarem prea bilong olketa. (Acts 4:29, 31) Distaem tu iumi savve kasem help. Taem iumi no givap for garem frut, iumi bae gohed fren witim Jesus. And tu, iumi sure hao Jehovah hem redi for ansarem olketa prea bilong iumi, for helpem iumi winim olketa hard taem wea maet iumi kasem taem iumi preachim gud nius abaotem Kingdom. (Phil. 4:13) Iumi barava hapi from Jehovah ansarem olketa prea bilong iumi and from iumi fren witim Jesus! Olketa samting hia wea iumi kasem from Jehovah savve strongim iumi for gohed garem frut.—Jas. 1:17. w18.05 21 ¶17-18

No kasem faev year nomoa, olketa Jew wea Christian wea stap long Jerusalem olketa luksavve “day bilong Jehovah” hem kam klosap, and olketa luksavve olketa mas ranawe from datfala taon taem olketa lukim datfala saen wea Jesus talem. (Acts 2:19, 20; Luke 21:20-22) Datfala day bilong Jehovah happen long 70 C.E. taem olketa bilong Rome distroem Jerusalem. Distaem iumi garem staka reason for bilivim hao bigfala day bilong Jehovah hem barava klosap. (Joel 2:11) Profet Zephaniah sei: “Bikfala De blong [Jehovah] fo jajem pipol hemi barava kolsap nao, an hemi kam kuiktaem.” (Sefenaea 1:14) Datfala warning hem fitim distaem tu. From day bilong Jehovah hem klosap tumas, Paul talem iumi for “barava tingim narawan mekem iumi savve encouragem olketa for showimaot love and duim olketa gudfala samting.” (Heb. 10:24) Dastawe, iumi shud duim moa samting for showimaot iumi tingim olketa brata bilong iumi mekem iumi savve encouragem olketa long taem wea olketa needim. w18.04 20 ¶1-2

Datwan nao encouragement wea Jehovah givim long Joshua bifor pipol bilong Hem go stap long Promis Land! Jehovah savve encouragem man wanwan, and tu, hem savve givim encouragement long evri pipol bilong hem. Olsem example, taem olketa Jew prisoner long Babylon, Jehovah comfortim olketa taem hem talem disfala profesi wea sei: “Yufala no fraet, an yufala no seksek. Mi nao God blong yufala, an mi stap wetem yufala. Bae mi mekem yufala strong, an bae mi helpem yufala. Ya, bae strongfala raet han blong mi hemi gadem yufala long stretfala wei.” (Aesaea 41:10) Jehovah encouragem olketa Christian long first century, and hem encouragem pipol bilong hem distaem tu. (2 Cor. 1:3, 4) Jesus tu kasem encouragement from Dadi bilong hem. Taem Jesus baptaes, hem herem voice from heven wea sei: “Diswan nao Son bilong mi wea mi lovem and wea mi hapi long hem.” (Matt. 3:17) Datfala toktok mas barava strongim Jesus taem hem duim ministry bilong hem long earth! w18.04 16 ¶3-5

Samfala pipol distaem tingse Jehovah no letem Adam free for disaedem wanem for duim. Bat olketa no luksavve wei wea man free for chus hem difren from wei for garem raet for disaedem wanem hem gud and nogud. Adam and Eve free for disaed sapos tufala bae obeyim God or nomoa. Nomata olsem, Jehovah nomoa garem datfala raet for disaedem wanem hem gud and nogud. Datfala tree wea piksarem wei for savve long wanem hem gud and nogud showimaot datwan. (Jenesis 2:9) Wei wea Jehovah talem Adam and Eve for no kaikaim frut from datfala tree, teachim tufala hao sapos tufala obeyim hem tufala bae barava free. Wanem nao Adam and Eve disaed for duim? Sorre nao, Adam and Eve no disaed for obeyim Jehovah. Taem Adam and Eve disaed for kaikaim datfala frut, waswe, datwan mekem olketa savve wanem hem gud and nogud, olsem Satan talem? Nomoa, taem tufala no obeyim Jehovah tufala kasem nogud samting. Taem Adam and Eve trae for kasem moa freedom long wei for disaedem seleva wanem nao gud and nogud, datwan mekem tufala lusim wei wea tufala barava free. w18.04 5-6 ¶9-12

Jehovah no just sorre nomoa long olketa pipol bilong hem wea safa, bat hem duim samting for helpem olketa. Olsem example, taem olketa Israelite safa from olketa slave long Egypt, Jehovah minim pain wea kasem olketa and hem laek for helpem olketa. Jehovah sei olsem long Moses: “Mi lukim finis hao olketa pipol blong Ijip i gohed fo mekful long olketa pipol blong mi. Mi herem finis tu krae blong olketa . . . Mi save finis tu wea olketa barava safa, an mi sore tumas long olketa. Dastawe nao, mi kamdaon fo tekem olketa aot from paoa blong pipol long Ijip.” (Eksodas 3:7, 8) From Jehovah sorre long pipol bilong hem, hem mekem olketa kamap free. Staka year bihaen, taem olketa Israelite kasem Promis Land, olketa enemy attakim olketa. Wanem nao Jehovah duim? Hem sorre taem hem lukim pipol spoelem and treatim nogud pipol bilong hem. From Jehovah sorre long olketa, hem duim samting for helpem olketa. Hem sendem olketa judge for sevem olketa Israelite from enemy bilong olketa.—Jajis 2:16, 18. w19.03 15 ¶4-5

Tufala first law bilong Ten Komandment sei olketa Israelite mas worshipim Jehovah nomoa, and no worshipim olketa idol. (Eksodas 20:3-6) Jehovah no givim tufala law hia bikos hem laek for kasem samting, bat hem givim for helpem pipol bilong hem. Taem olketa worshipim olketa difren god, olketa kasem nogud samting. Bat taem pipol bilong hem obey and showimaot justice long narawan, hem blessim olketa. (Fas Kings 10:4-9) No eniwan fit for blamem Jehovah sapos samwan wea sei hem worshipim Jehovah no followim olketa standard bilong hem and hem spoelem narawan. Tru samting nao, Jehovah lovem iumi and savve taem narawan spoelem iumi. Jehovah feelim pain wea iumi kasem winim wanfala mami wea feel sorre taem baby bilong hem safa. Nomata maet hem no kwiktaem stretem datwan, gogo bae hem judgem eniwan wea spoelem narawan and wea no repent. w19.02 22 ¶13-15

Long olketa week bifor Memorial, olketa meeting bilong iumi savve storyim example bilong Jesus and wei wea hem hambol for givim laef bilong hem olsem wanfala ransom. Datwan muvim iumi for followim hambol fasin bilong hem and for duim wanem Jehovah laekem nomata long taem wea hem no isi. Iumi tingim wei wea hem showimaot hem no fraet long olketa day bifor hem dae. Hem savve olketa enemy bilong hem bae tok spoelem, whipim hem, and killim hem dae. (Matt. 20:17-19) Nomata olsem, hem willing for dae. Kasem taem for olketa enemy arrestim hem, hem sei olsem long olketa faithful aposol bilong hem wea stap witim hem long Gethsemane: “Standap, iumi go. Man wea bae givim mi go long enemy hem klosap for kam nao!” (Matt. 26:36, 46) Taem olketa soldia kam, hem go long olketa, hem talemaot hu nao hem, and komandim olketa soldia for letem olketa aposol bilong hem for go. (John 18:3-8) Jesus showimaot nambawan example for no fraet! Distaem, olketa anointed Christian and nara sheep traem best for followim example bilong Jesus for no fraet. w19.01 27-28 ¶7-8

Wanfala artist savve iusim olketa difren kala wea luk naes for paintim wanfala piksa, long sem wei tu, for man hambol hem mas garem olketa nara gudfala wei. Olketa main fasin nao hem wei for obey, kaen, and wei for no fraet. Olketa wea hambol nomoa willing for obeyim wanem God laekem. Wanfala samting wea God laekem iumi for duim hem nao for hambol and kaen. (Matt. 5:5; Gal. 5:23) Taem iumi duim wanem God laekem, iumi mekem Satan kros. So nomata iumi hambol and kaen, staka pipol long world bilong Satan bae heitim iumi. (John 15:18, 19) Dastawe iumi need for no fraet for againstim Satan. Man wea hambol hem opposite long man wea garem fasin for praod, no kontrolem kros, and no obeyim Jehovah. Hem nao wei bilong Satan. Dastawe hem heitim pipol wea hambol! Pipol wea hambol showimaot klia hao Satan hem wanfala nogud man, bikos olketa showimaot olketa garem gudfala fasin wea Satan no garem. And worse go moa olketa pruvim Satan hem man for laea. Why nao olsem? Bikos nomata Satan talem or duim eni samting, hard for hem stopem pipol wea hambol for worshipim Jehovah!—Job 2:3-5. w19.02 8-9 ¶3-5

Jehovah savve pipol bilong Babylon bae fraet. Bae bigfala army bilong Medo-Persia attakim Babylon. Jehovah bae iusim disfala army for mekem pipol bilong hem free from wei for prison long Babylon. (Aesaea 41:2-4) Taem olketa pipol bilong Babylon and olketa pipol from nara nation luksavve enemy bilong olketa hem kakam klosap, olketa talem olketa toktok for gohed strongim each other. And tu, olketa mekem staka idol bikos olketa tingse datwan bae protectim olketa. (Aesaea 41:5-7) Bat long datfala taem, Jehovah helpem olketa Jew prisoner for no fraet taem hem sei olketa nao wakaman bilong hem wea hem chusim, so olketa mas no wari bikos hem nao God bilong olketa. (Aesaea 41:8-10) Tingim hao Jehovah sei: “Mi nao God bilong iu.” Toktok hia helpem olketa wea faithful for worshipim Jehovah for luksavve hem no forgetim olketa and olketa still pipol bilong hem. Hem sei: “Bae mi lukaftarem yufala . . . an sevem yufala.” Olketa toktok hia barava strongim and encouragem olketa Jew long Babylon.—Aesaea 46:3, 4. w19.01 4 ¶8

Mark 1:9-11 story abaotem thrifala taem wea Jehovah story kam from heven. Jehovah sei: “Iu nao Son bilong mi wea mi barava lovem. Mi hapi tumas long iu.” Taem Jesus herem Dadi bilong hem sei hem lovem and hapi long hem, masbi datwan barava kasem heart bilong Jesus! Toktok bilong Jehovah showimaot thrifala important samting abaotem Jesus. First wan, Jesus hem Son bilong Jehovah. Mek-tu, Jehovah lovem Son bilong hem. And mek-thri, Jehovah hapi long Son bilong hem. Taem Jehovah sei “Iu nao Son bilong mi.” Diswan showimaot hem ting long Son bilong hem long wanfala spesol wei. Bifor Jesus kam long earth, hem wanfala son bilong God wea hem wanfala spirit. Bat, taem hem baptaes hem kasem anointing from holy spirit and hem kamap anointed Son bilong Jehovah. Long datfala taem nao hem garem hope for go bak long heven for kamap King and Hae Priest, wea God markem. (Luke 1:31-33; Heb. 1:8, 9; 2:17) Dastawe taem Jesus baptaes, Dadi bilong hem fit for sei long hem: “Iu nao Son bilong mi.”—Luke 3:22. w19.03 8 ¶3-4

Nogud advaes start kam from taem Satan laea long Eve. Hem bighed and givim rong advaes long Eve taem hem talem Eve hao hem and hasband bilong hem bae hapi sapos tufala disaedem seleva wanem tufala laek for duim long laef. (Jenesis 3:1-6) Satan hem selfish nomoa. Hem laekem Adam and Eve and olketa pikinini bilong tufala for obeyim and worshipim hem winim wei for worshipim Jehovah. Bat Jehovah nao givim evri samting long tufala, hem wakem tufala for stap tugeta, givim tufala naes hom, and perfect body wea savve stap for olowe. Sorre nao, Adam and Eve disobeyim God, hem olsem tufala katemaot tufala from man wea givim laef. Nogud samting nao kamaot from datwan. Tufala olsem flaoa wea olketa katemaot from wanfala plant, wea savve laef for lelebet taem and then dae. Pikinini bilong tufala tu safa from sin. (Rome 5:12) Nomata olsem, distaem staka pipol still chus for no obeyim God. Olketa laek for duim nomoa wanem olketa seleva laekem. (Eph. 2:1-3) Samting wea kamaot from datwan showimaot toktok long text for tuday hem tru. w18.12 20 ¶3-4

Aposol Paul hem skul gud and kleva tumas, and luk olsem hem savve story long tufala languis. (Acts 5:34; 21:37, 39; 22:2, 3) Bat, taem hem mas disaedem samfala samting, hem rejectim tingting bilong world and depend long Bible for helpem hem mekem olketa disison. (Acts 17:2; 1 Cor. 2:6, 7) From datwan, staka gud samting kamaot from ministry bilong Paul and hem luk forward for kasem reward wea bae stap for olowe. (2 Tim. 4:8) Tru nao, tingting bilong God hem barava winim tingting bilong world. Sapos iumi followim olketa standard bilong God, iumi bae barava hapi and satisfae. Bat Jehovah no forcem iumi for garem sem tingting olsem hem. “Datfala wakaman wea faithful and wise” hem no bossim tingting bilong iumi, and olketa elder tu no olsem. (Matt. 24:45; 2 Cor. 1:24) Iumi wanwan garem responsibility for changem tingting bilong iumi mekem iumi ting long samting olsem hao Jehovah ting long datwan. w18.11 20-21 ¶12-13

God talem Isaiah, bihaen olketa pipol bilong hem kam bak long hom bilong olketa, bae olketa no stragol for deal witim eni hard samting. Bae olketa no need for fraetem olketa animal or pipol wea wei bilong olketa olsem wild animal. Nomata olketa young wan or olo, evriwan bae stap sef. (Aesaea 11:6-9; 35:5-10; 51:3) Isaiah sei diswan bae kasem full world, no just nation bilong Israel nomoa. Hem sei: “Disfala wol bae hemi fulap long pipol hu i barava savegud long [Jehovah], olsem si hemi fulap long solwata.” Isaiah strongim point hao no eni animal or pipol bae spoelem olketa Israelite wea kam bak long hom bilong olketa. Land bilong olketa bae garem staka kaikai, bikos bae hem garem inaf wata for evriting grow gud, semsem olsem wei wea garden bilong Eden garem staka wata tu. (Jenesis 2:10-14; Jeremaea 31:12) Waswe, datfala profesi fulfill long datfala taem nomoa? Nomoa. No eni pruv stap wea showimaot hao olketa wea kam bak from Babylon kasem healing long mirakol wei. Olsem example, olketa wea blind still no savve lukluk. So diswan minim God showimaot hao disfala healing bae kamap long future. w18.12 5 ¶11-12

Iumi laek for gohed wakabaot followim truth for olowe. Wanem nao bae helpem iumi for disaed strong for gohed wakabaot followim truth? Gohed for studyim Bible and ting raonem wanem iu lanem. Markem taem for duim datwan. Taem iumi evritaem studyim Bible, bae hem strongim go moa wei wea iumi tinghae long truth, and datwan bae helpem iumi for no lusim truth. Proverbs 23:23, NW hem sei: “Baem truth and no salem.” And hem sei tu for iumi mas baem “wisdom, discipline, and wei for minim samting.” Hem no inaf for iumi savve long truth insaed Bible nomoa bat iumi mas followim long laef bilong iumi. Taem iumi garem wei for minim samting, datwan helpem iumi for ting raonem wanem iumi lanem witim wanem iumi savve long hem finis. Wei for garem wisdom savve helpem iumi for duim samting followim wanem iumi savve finis. Samfala taem, iumi kasem discipline from Bible wea savve helpem iumi for changem samfala samting long laef bilong iumi. So iumi laek for kwiktaem followim datwan, bikos Bible sei discipline hem barava gud winim silver.—Provebs 8:10. w18.11 9 ¶3; 11 ¶13-14

Wanem nao barava important samting long laef bilong iu? From iumi pipol bilong Jehovah, barava important samting nao hem wei wea iumi fren witim hem. Iumi bae no exchangem datwan for eni samting. And tu, iumi tinghae long truth insaed Bible bikos datwan helpem iumi for fren witim Jehovah. (Col. 1:9, 10) Jehovah nao Barava Nambawan Teacher wea teachim iumi staka nambawan truth insaed Bible. Hem teachim iumi why hem important for savve long nem bilong hem, and olketa nambawan wei bilong hem. Hem showimaot hem lovem iumi tumas dastawe hem givim Son bilong hem for dae for iumi. Jehovah teachim iumi tu abaotem Kingdom bilong hem wea Christ rulim. Jehovah givim nambawan hope for stap long Paradaes earth. Hem teachim iumi hao for garem olketa gudfala wei. Iumi tinghae long olketa truth hia bikos olketa helpem iumi for fren gud witim Creator bilong iumi, and mekem iumi hapi and satisfae. w18.11 3 ¶1-2

Pipol wea laea no savve haedem eni samting from Jehovah bikos hem “savve barava lukim klia evri samting.” (Heb. 4:13) Olsem example, Ananias and Sapphira trae for laea long olketa aposol. Tufala salem pis land bilong tufala and givim lelebet selen nomoa long olketa aposol. Tufala laekem olketa long kongregeson for tinghae long tufala, so tufala sei tufala givim evri selen long olketa aposol. Bat Jehovah lukim wanem tufala duim and hem killim tufala dae. (Acts 5:1-10) Hao nao Jehovah ting long wei for laea? Satan and olketa wea followim wei bilong hem for laea for spoelem narawan and no repent bae go insaed “datfala lake bilong fire.” (Rev. 20:10; 21:8; Sams 5:6) Iumi savve Jehovah no olsem olketa man wea savve laea. Tru nao, “God no savve laea.” (Nambas 23:19; Heb. 6:18) Bible sei: “[Jehovah] hemi les long . . . wei fo laea.” (Provebs 6:16a) For iumi mekem Jehovah hapi, iumi mas followim standard bilong hem for talem tru samting. w18.10 8-9 ¶10-13

Sapos boss bilong iu askem iu for contributem selen for wanfala celebration wea join witim false religion, wanem nao bae iu duim? Winim wei for just weit for taem wea kaen situation olsem kamap, hem gud for iumi ting raonem distaem wanem nao tingting bilong Jehovah abaotem datwan. Then, taem iumi duim olsem hem bae isi for duim and talem stret samting. Wei for ting raonem firstaem why iumi need for gohed faithful long Jehovah savve helpem iumi tu taem iumi mas deal witim eni medical emergency. Tru nao, iumi disaed strong finis for no acceptim full blood transfusion or eni fofala part bilong blood. Bat maet samfala taem olketa doctor laek duim samfala samting wea join witim blood wea each Christian need for mekem disison bilong hemseleva. Taem olsem, hem important for tingim olketa Bible principle wea storyim tingting bilong Jehovah. (Acts 15:28, 29) Tru nao, gudfala taem for ting raonem olketa samting olsem, hem no long hospital or long taem wea iumi sik big and mas disaed kwiktaem. Distaem nao hem gud for iumi duim research, raetem wanfala medical directive card wea storyim wanem iumi laekem, and story witim doctor. w18.11 24 ¶5; 26 ¶15-16

Jehovah hem shepherd wea lovem and lukaftarem gud pipol bilong hem. Hem keepim sef and protectim pipol bilong hem from olketa enemy. Diswan barava encouragem iumi, bikos klosap bae iumi feisim taem wea disfala nogud world bae finis! Jehovah bae gohed for lukaftarem pipol bilong hem long datfala bigfala trabol wea kakam klosap tumas distaem. (Rev. 7:9, 10) So nomata pipol bilong God wea young or olo, healthy or disable, olketa bae no fraet or seksek long taem bilong datfala big trabol. Bat, olketa bae tingim disfala toktok bilong Jesus Christ wea sei: “Standap stret and apim hed bilong iufala, bikos taem for God sevem iufala hem klosap.” (Luke 21:28) Pipol bilong God bae trustim hao Jehovah bae protectim olketa nomata long taem wea Gog, wea minim olketa nation wea join tugeta and wea garem bigfala paoa, bae attakim pipol bilong God. (Esikiel 38:2, 14-16) Why nao pipol bilong God bae no fraet? Olketa savve Jehovah no savve change. Hem bae evritaem duim samting for showimaot hem God wea kea and sevem pipol bilong hem.—Aesaea 26:20. w18.09 26 ¶15-16

Samting wea Jehovah talem long text for tuday for olketa faithful Israelite mas barava encouragem olketa. From iumi worshipim Jehovah, iumi tu sure Jehovah barava lovem iumi. Bible promis olsem: “Paoa blong hem hemi save sevem yufala. Bae hemi hapi tumas long yufala.” (Sefenaea 3:16, 17) Jehovah promis for strongim and comfortim pipol bilong hem wea feisim olketa difren hard taem. Jehovah sei: “Bae yufala hapi fogud olsem smolfala bebi wea mami blong hem hemi lavem hem tumas, an hemi gohed fo karim hem an susum hem. . . . Bae mi mekem tingting blong yufala fo kamap gud moa, olsem wea woman hemi mekem pikinini blong hem fo hemi hapi moa.” (Aesaea 66:12, 13) Hem naes tumas taem iumi tingim wanfala mami wea lovem tumas baby bilong hem and hem karem and plei witim baby hia. Datfala tokpiksa showimaot Jehovah barava lovem and tingim olketa wea worshipim hem. Iumi sure Jehovah barava tinghae and lovem iumi.—Jeremaea 31:3. w18.09 13-14 ¶6-7

Long bifor, olketa Israelite garem staka chance for volunteer long olketa difren waka. (Eksodas 36:2; Nehemaea 11:2) Distaem tu, iu garem staka chance for iusim taem, selen, and savve wea iu garem for helpem olketa brata and sista bilong iu. Taem iu duim olsem, iu bae barava hapi and kasem staka blessing. Staka taem olketa wea volunteer for duim olketa project long organization garem olketa niu fren. Tingim example bilong Margie, wanfala sista wea waka long olketa Kingdom Hall construction project for 18 year. Long olketa year wea go pas, hem kaen and showimaot interest long olketa young sista wea hem trainim. Hem luksavve wei for waka tugeta long olketa project hem wanfala best wei for encouragem narawan long spiritual wei. (Rome 1:12) Gogo taem Margie kasem hard taem, olketa fren bilong hem wea olketa waka tugeta long construction encouragem hem. Waswe, enitaem iu volunteer long wanfala construction project? w18.08 25 ¶9, 11

Taem Paul raetem toktok hia, Timothy kasem samfala big responsibility finis nomata hem samting olsem 30 year nomoa. Wanem nao iumi lanem? Iumi mas no judgem olketa brata bikos olketa young. Hem gud for tingim hao Jesus tu start for duim ministry bilong hem long earth taem hem 30 year nomoa and hem finisim datfala waka taem hem 33 year. Long samfala ples, pipol ting daonem olketa young man. From datwan, maet samfala elder hol bak for recommendim wanfala young brata for kamap ministerial servant or elder nomata sapos hem fit for duim datfala waka. Bat hem gud for olketa elder tingim hao Bible no talem eni age wea wanfala brata need for kasem bifor hem savve kamap ministerial servant or elder.—1 Tim. 3:1-10, 12, 13; Titus 1:5-9. w18.08 11-12 ¶15-16

For mekem gudfala disison, iumi need for kasem information wea garem pruv. Dastawe, iumi mas barava careful taem iumi chusim wanem iumi readim. (Phil. 4:8, 9) Iumi shud no weistim taem for lukluk long olketa nius long Internet wea iumi no fit for trustim or readim olketa e-mail or text message abaotem samting wea no garem pruv. Hem barava important for stap klia from olketa website wea garem idea bilong olketa apostate. Main tingting bilong olketa, hem for spoelem faith bilong pipol bilong God and mekem truth no showaot klia. Sapos iumi kasem information wea no tru, datwan savve lead go long wei for mekem rong disison. No enitaem iumi shud tingse, olketa laea information hard for affectim mind and heart bilong iumi. Tingim samting wea happen long taem bilong Moses. Olketa sendem 12-fala spae for spaem Promis Land bat 10-fala talem nogud report. (Nambas 13:25-33) From story bilong olketa ova tumas, pipol bilong Jehovah fraet and wikdaon. (Nambas 14:1-4, 6-10) Winim wei for olketa laek for savve long tru story and trustim Jehovah, olketa chus for bilivim nogud report. w18.08 4 ¶4-5

Staka pipol garem samfala gud wei, and staka wea no insaed kongregeson olketa no duim olketa nogud samting. Maet iu savve long samfala pipol olsem, bat waswe, datwan minim hem gud nomoa for iumi fren witim olketa? Askem iuseleva, ‘Hao nao wei wea mi fren witim olketa hem affectim wei wea mi fren witim Jehovah? Waswe, bae olketa strongim wei wea mi fren witim Jehovah? Wanem nao stap insaed heart bilong olketa? Waswe, story bilong olketa hem abaotem olketa latest stael, selen, niu technology, hapitaem, or wei for aftarem olketa material samting? Waswe, olketa evritaem tok daonem olketa narawan or iusim olketa dirty toktok for mekfani?’ Jesus hem sei: “Samting wea man tingting tumas abaotem nao bae hem storyim.” (Matt. 12:34) Sapos iu luksavve olketa fren bilong iu spoelem wei wea iu fren witim Jehovah, iu need for kwiktaem duim samting for no spendem tumas taem witim olketa, and tu, maet iu mas stop evribit for fren witim olketa.—Provebs 13:20. w18.07 19 ¶11

Taem Moses 80 year, Jehovah chusim hem for helpem olketa Israelite for kamap free from wei for slave long Egypt. (Eksodas 3:10) Tu-thri taem, Moses talem enikaen excuse. Nomata olsem, Jehovah gohed patient and givim paoa long Moses tu for duim olketa mirakol. (Eksodas 4:2-9, 21) Hem garem paoa for mekem Moses fraet and obeyim hem. Bat Jehovah no olsem. Hem patient and kaen, and encouragem hambol wakaman bilong hem hao hem bae stap witim hem. Waswe, eni gud samting kamaot from disfala wei wea Jehovah deal witim Moses? Barava nao! Moses kamap nambawan leader wea traem best for followim example bilong Jehovah for kaen and tingim olketa wea hem leadim. Sapos iu garem responsibility ovarem olketa narawan, hem barava important for iu followim example bilong Jehovah for kaen, patient, and tingim olketa wea iu lukaftarem! (Col. 3:19-21; 1 Pet. 5:1-3) Taem iu traem best for followim example bilong Jehovah, and Jesus Christ wea Moses piksarem, datwan bae mekem hem isi for olketa narawan story witim iu and iu bae encouragem olketa.—Matt. 11:28, 29. w18.09 24-25 ¶7-10

Iumi savve strongim wei for wan mind insaed kongregeson taem iumi kaen and showimaot gudfala wei. Sapos iu duim datwan finis iu fit for kasem praise. Hem gud for traem best for associate staka taem witim olketa brata and sista and savve gud long olketa. (2 Cor. 6:11-13) Nomata wea nao iu stap, iu savve letem laet bilong iu shaen. Kaenfala wei bilong iu savve helpem olketa long ples wea iu stap for laek savve long truth. Askem iuseleva: ‘Wanem nao tingting bilong olketa neiba abaotem mi? Waswe, haos and area bilong mi hem klin and no olobaot? Waswe, mi savve helpem narawan?’ Askem olketa nara Witness abaotem hao kaenfala wei and gudfala example bilong olketa hem affectim olketa relative, neiba, waka fren, or skul fren. Sapos iu duim olsem, bae iu herem samfala gud samting wea kamaot from datwan.—Eph. 5:9. w18.06 24 ¶13-14

Datfala toktok barava fitim olketa wea killim dae Stephen, and olketa narawan tu wea duim sem samting. (Acts 6:8, 12; 7:54-60) Long history bilong olketa man, staka pipol long religion duim staka nogud samting, olsem wei for killim man dae, and olketa sei olketa duim datwan for God. Bat really, wanem olketa duim hem againstim law bilong God. (Eksodas 20:13) So datwan showimaot konsens bilong olketa no leadim olketa long stretfala wei! Wanem nao savve helpem iumi for mek sure konsens bilong iumi hem waka gud? Olketa law and Bible principle “savve teachim pipol, showim iumi samting wea no stret, stretem evri samting, and stretem tu tingting bilong pipol followim olketa raeteous mark bilong God.” (2 Tim. 3:16) Iumi mas studyim Bible evritaem, ting raonem wanem iumi studyim, and followim long laef bilong iumi. Datwan bae helpem iumi for garem sem tingting olsem Jehovah. Taem iumi duim olsem iumi sure konsens bilong iumi bae leadim iumi long stretfala wei. w18.06 16-17 ¶3-4

Long bilong sword wea olketa soldia long Rome iusim long taem bilong Paul, hem samting olsem 50 centimeter and olketa iusim taem olketa faet feis-tu-feis. Wanfala samting wea mekem olketa savve tumas hao for iusim sword hem bikos olketa practice evriday. Paul sei Bible hem olsem sword wea Jehovah givim iumi. Bat iumi mas lane hao for iusim gud datwan for defendim wanem iumi bilivim or for changem tingting bilong iumi. (2 Cor. 10:4, 5; 2 Tim. 2:15) Iumi no need for fraetem Satan and olketa demon. Olketa garem paoa, bat paoa bilong olketa no kasem bilong Jehovah. And olketa no savve stap for olowe. Insaed wan thousand year rul bilong Christ, olketa bae stap long prison and no savve duim eni samting for spoelem olketa man and then bihaen olketa bae finis evribit. (Rev. 20:1-3, 7-10) Iumi savve long enemy bilong iumi, olketa nogud trik bilong hem, and goal bilong hem. Jehovah savve helpem iumi for strong for againstim hem. w18.05 30 ¶15; 31 ¶19-21

Adam savve snek no savve toktok. So maet hem luksavve wanfala angel nao mas iusim datfala snek for story witim Eve. (Jenesis 3:1-6) Adam and Eve no savve hu nao disfala angel. Nomata olsem, Adam disaed for no followim Dadi bilong hem long heven and hem saed witim datfala angel for againstim God. (1 Tim. 2:14) Stretawe, Jehovah talemaot olketa information abaotem datfala enemy wea laea long Adam and Eve, and hem promis hao gogo hem bae finisim datfala nogud enemy. Bat Jehovah talem tu hao go kasem datfala taem, datfala angel bae garem paoa for againstim olketa wea lovem God. (Jenesis 3:15) No enitaem Jehovah talem really nem bilong datfala angel wea bighed againstim hem. Samting olsem 2,500 year bihaen olketa againstim Jehovah long Eden, Jehovah iusim wanfala nem for showimaot wei bilong datfala angel.—Job 1:6. w18.05 22 ¶1-2

Sapos enitaem iu feel wikdaon bikos iu preach long territory wea pipol no interest for lisin, iu bae minim feeling bilong aposol Paul. Insaed 30-fala year wea hem duim ministry, hem helpem staka pipol for kamap disaepol bilong Christ. (Acts 14:21; 2 Cor. 3:2, 3) Nomata olsem, hem no fit for helpem staka Jew for kamap Christian. Staka long olketa les long Paul, and samfala long olketa persecutim hem. (Acts 14:19; 17:1, 4, 5, 13) Hao nao datwan affectim Paul? Hem sei: “Mi sorre tumas and mi barava wari.” (Rome 9:1-3) Why nao Paul feel olsem? Bikos hem barava laekem tumas for duim preaching waka. Hem preach long olketa Jew bikos hem barava lovem and tingim olketa. So taem olketa no acceptim mercy wea God showimaot, Paul barava feel sorre. Olsem Paul, iumi preach long pipol bikos iumi barava tingim olketa.—Matt. 22:39; 1 Cor. 11:1. w18.05 13 ¶4-5

Paul showimaot hao man wea garem responsibility for encouragem olketa narawan need for kasem encouragement tu. Taem hem raet long olketa Christian long Rome hem sei: “Mi laekem tumas for lukim iufala. Mi laek storyim samting for helpem iufala fren witim God. Wanem mi minim nao hem olsem: Mi laekem iumi evriwan strongim narawan. Faith bilong iufala bae strongim mi, and faith bilong mi bae strongim iufala tu.” (Rome 1:11, 12) Tru nao, nomata Paul givim olketa naes encouragement long olketa narawan, samfala taem hem tu needim encouragement. (Rome 15:30-32) Iumi shud encouragem olketa wea duim waka bilong Jehovah full-taem. Olketa brata and sista wea gohed stap singol from olketa laek for obeyim Jehovah for maritim nomoa “wanfala disaepol bilong Christ,” olketa tu need for kasem encouragement. (1 Cor. 7:39) Olketa narawan wea needim encouragement tu hem olketa Christian wea gohed faithful nomata olketa kasem persecution or olketa sik.—2 Thess. 1:3-5. w18.04 21 ¶3-5