July

Iumi stap long “olketa last day” wea “evri samting hem hard tumas,” and laef bae hem hard go moa go kasem taem Jehovah distroem disfala nogud world and mekem evriwan long earth garem trufala peace. (2 Tim. 3:1) So hem gud for askem iumiseleva, ‘Hu nao mi luk long hem for helpem and leadim mi?’ Staka handred year go finis, man wea raetem psalm hem storyim why iumi need for luk long Jehovah taem iumi needim help. (Sams 123:1-4) Hem storyim wei for luk long Jehovah hem olsem wei wea wanfala servant luk long boss bilong hem. Wanem nao hem minim? Datfala servant no luk long boss bilong hem for kaikai and protection nomoa, bat hem mas lukluk long boss bilong hem for luksavve long samting wea boss bilong hem laekem, and then hem mas duim datwan. Long sem wei, iumi mas studyim gud toktok bilong God evriday mekem iumi luksavve long samting wea Jehovah laekem for iumi duim and then followim datwan. Sapos iumi duim olsem iumi sure Jehovah bae helpem iumi taem iumi needim datwan. w18.07 12 ¶1-2

Jesus minim bae iumi kamap free from wei for slave long sin, wea datfala wei for slave hem worse winim wei wea pipol slave long narawan. (John 8:34) Long wanem wei nao iumi slave long sin? Sin mekem iumi for duim olketa nogud samting. And tu, sin savve stopem iumi for duim wanem iumi savve hem stret, or for duim best bilong iumi. Sin savve mekem iumi wari, kasem pain, safa, and dae. (Rome 6:23) Taem sin hem finis evribit bae iumi kamap barava free, olsem Adam and Eve long firstaem. Disfala toktok bilong Jesus, “sapos iufala followim teaching bilong mi,” hem showimaot sapos iumi laekem Jesus for mekem iumi kamap free, iumi need for duim samfala samting. (John 8:31) Wanem nao olketa samting hia? Iumi dedicatem laef bilong iumi long God for duim wanem hem laekem and followim olketa teaching wea Jesus talem for olketa disaepol bilong hem. (Matt. 16:24) Olsem Jesus promisim, iumi bae kamap barava free long future taem iumi kasem evri gud samting from ransom sakrifaes bilong Jesus. w18.04 7 ¶14-16

Jehovah tingim feeling bilong pipol bilong hem nomata taem tingting bilong olketa hem no stret. Tingim example bilong Jonah. God sendem datfala profet for talemaot judgment message long pipol bilong Nineveh. Taem olketa repent, God disaed for no finisim olketa. Bat, Jonah no hapi long datfala disison. Hem barava kros bikos profesi wea hem talem abaotem Nineveh hem no kamap tru. Bat Jehovah patient witim Jonah and helpem hem for changem tingting bilong hem. (Jona 3:10–4:11) Gogo, Jonah minim wanem Jehovah teachim hem, and Jehovah iusim hem for raetem datfala story insaed Bible for helpem iumi distaem tu. (Rome 15:4) Wei wea Jehovah deal witim olketa pipol bilong hem showimaot hem tingim feeling bilong olketa. Hem savve long olketa hard taem and wei wea each wan long iumi safa. Hem savve long evri tingting and feeling bilong iumi, and hem savve long samting wea iumi no fit for duim. And hem bae no letem eni samting for kasem iumi ‘wea iumi no fit for winim.’ (1 Cor. 10:13) Datwan hem barava comfortim iumi! w19.03 16 ¶6-7

Anda long Law bilong Moses, olketa wea Jehovah markem for judgem pipol, garem responsibility for judgem olketa case saed long worship, olketa raoa, and taem eniwan brekem law. Tingim samfala example. Sapos eni Israelite killim dae samwan, bae olketa no stretawe killim hem dae. Olketa elder long datfala taon bae lukluk raonem diswan bifor olketa disaedem sapos hem mas dae. (Diutronomi 19:2-7, 11-13) Olketa man hia mas judgem tu staka nara samting long laef, olsem olketa raoa saed long property, and tu olketa problem midolwan hasband and waef. (Eksodas 21:35; Diutronomi 22:13-19) Taem olketa judge followim justice and olketa Israelite obeyim Law, evriwan kasem gud samting, and Jehovah kasem praise. (Levitikas 20:7, 8; Aesaea 48:17, 18) From diswan, iumi lukim hao evri samting wea iumi duim long laef hem important long Jehovah. Hem laekem iumi for showimaot justice and love taem iumi deal witim olketa narawan. And hem lukim wanem iumi talem and duim nomata taem iumi stap long haos bilong iumiseleva. w19.02 23 ¶16-18

Taem iumi stress or wari, hem no isi for iumi hambol. Maet iumi savve kwiktaem feel nogud long olketa smol samting wea bifor iumi nating warim nomoa. And maet iumi savve talem or duim samting wea no kaen. Sapos iu stress or wari olsem, tingim example bilong Jesus. Long olketa last month wea Jesus laef long earth, hem stress and wari tumas. Hem savve hao olketa bae killim hem dae and hem bae barava safa. (John 3:14, 15; Gal. 3:13) Samfala month bifor hem dae, hem storyim hem wari tumas. (Luke 12:50) And tu-thri day bifor Jesus dae, hem sei: “Mi barava wari tumas.” Iumi savve lukim wei wea hem barava hambol and obeyim God taem hem prea and talemaot feeling bilong hem. (John 12:27, 28) Taem olketa kam for arrestim Jesus, hem no fraet for givim hemseleva long olketa enemy bilong God. Olketa barava mekem hem safa and mek shame long hem taem olketa killim hem dae. Nomata Jesus barava wari and safa tumas, hem hambol for duim wanem God laekem. For sure, iumi fit for sei Jesus nao barava nambawan example bilong man wea hambol nomata hem barava stress and wari!—Aesaea 53:10. w19.02 11 ¶14-15

For attendim olketa meeting evritaem, iumi bae need for garem wei for no fraet taem iumi deal witim olketa hard taem. Samfala brata and sista attendim olketa meeting nomata olketa sorre from samwan wea olketa lovem hem dae, maet olketa feel wikdaon, or garem health problem. Olketa gohed for no fraet for attendim meeting nomata famili member or gavman barava againstim olketa. Tingim tu hao example bilong iumi savve affectim olketa brata wea stap long prison from olketa faithful long God. (Heb. 13:3) Taem olketa herem iumi gohed faithful for worshipim Jehovah nomata iumi kasem olketa hard taem, datwan strongim olketa for faithful, no fraet, and no givap. Taem Paul stap insaed prison long Rome, hem hapi tumas for herem olketa brata faithful for worshipim God. (Phil. 1:3-5, 12-14) No longtaem bifor or bihaen Paul go aot from prison, hem raetem leta for olketa Hebrew Christian. Long datfala leta, hem encouragem olketa faithful Christian hia for no misstim wei for hipap tugeta.—Heb. 10:25. w19.01 28 ¶9

Satan laekem iumi for olsem hem, for bighed and rejectim olketa standard bilong Jehovah and for duim samting wea hemseleva laekem. Hem laekem iumi for spendem taem witim pipol wea followim wei bilong hem and wea bae “spoelem” gudfala wei and tingting bilong iumi. (1 Cor. 15:33; ftn.) Satan trae for spoelem heart bilong iumi tu taem hem mekem iumi for trustim tingting bilong man winim tingting bilong Jehovah. (Col. 2:8) Tingim disfala idea wea Satan mekhae long hem. Hem nao, wei for kamap rich shud main samting long laef. Olketa wea garem tingting olsem maet bae kamap rich, or maet nomoa. Bat olketa mas keakea long kaen tingting olsem. Why nao olsem? Bikos for mekem olketa kasem goal bilong olketa, olketa tingim tumas selen gogo olketa sakrifaesim health bilong olketa, wei wea olketa fren witim famili, and wei for fren witim God. (1 Tim. 6:10) Iumi barava hapi bikos wise Dadi bilong iumi long heven helpem iumi for garem stret tingting abaotem selen.—Eklesiastes 7:12; Luke 12:15. w19.01 15 ¶6; 17 ¶9

Bifor Jesus kam long earth and showim perfect example long hao for encouragem olketa narawan, olketa faithful servant bilong Jehovah luksavve olketa need for encouragem narawan. Tingim example bilong Hezekiah. Taem olketa long Assyria klosap attakim Jerusalem, olketa bigman bilong army and pipol long Jerusalem hipap tugeta and Hezekiah encouragem olketa. Bible sei: “Toktok blong King Hesekaea hemi strongim tingting blong olketa.” (Mektu Kronikols 32:6-8) Iumi savve lane abaotem wei for encouragem narawan from example bilong Job tu. Nomata hemseleva needim encouragement, Job helpem thrifala man wea kam for comfortim hem for savve hao for givim encouragement. Hem talem olketa hao sapos olketa kasem hard taem wea hem kasem, ‘bae hem strongim tingting blong olketa, an toktok blong hem bae mekem olketa filgud moa.’ (Job 16:1-5) Gogo Job kasem encouragement from Elihu and from Jehovah tu.—Job 33:24, 25; 36:1, 11; 42:7, 10. w18.04 16 ¶6; 17 ¶8-9

Isaiah explainim finis hao Jehovah bae strongim pipol bilong hem, taem hem sei: “Lod [Jehovah] hemi kam nao fo rul long bikfala paoa blong hem.” (Aesaea 40:10) Disfala toktok showimaot Jehovah hem wanfala King wea garem bigfala paoa. Hem iusim paoa bilong hem for sapotim and protectim olketa pipol bilong hem long bifor, and tu, hem gohed for strongim and protectim olketa wea trustim hem distaem. (Diutronomi 1:30, 31; Aesaea 43:10) Jehovah savve keepim disfala promis, especially taem olketa enemy persecutim iumi. Hem sei: “Mi bae strongim iu.” Distaem long samfala ples long world, olketa enemy bilong iumi trae hard for stopem preaching waka or banim organization bilong iumi. Nomata olsem, iumi no wari tumas abaotem datwan. Jehovah talem wanfala promis wea strongim and mekem iumi barava trustim hem. Hem promis hao hem bae no letem eni weapon for spoelem pipol bilong hem.—Aesaea 54:17. w19.01 5-6 ¶12-13

Iumi man no olsem olketa animal bikos iumi needim olketa spiritual samting, wea Creator nomoa savve givim long iumi. (Matt. 4:4) Taem iu lisin long God, iu bae garem wisdom, savve, and bae iu barava hapi. God givim iu spiritual kaikai thru long Bible, and olketa pablikeson wea “datfala wakaman wea faithful and wise” provaedem. (Matt. 24:45) Iumi barava enjoyim staka difren spiritual kaikai! (Aesaea 65:13, 14) Olketa spiritual kaikai wea God givim bae mekem iu for garem wisdom and wei for ting raonem samting, and datwan bae protectim iu long staka difren wei. (Provebs 2:10-14) Olsem example, wei for garem wisdom and ting raonem samting bae helpem iu for luksavve long olketa laea teaching, olsem wei wea pipol sei no eni Creator stap. Hem helpem iu tu for luksavve wei for garem selen and staka material samting no savve mekem iu hapi. And hem helpem iu for luksavve and againstim olketa nogud tingting and fasin bilong iuseleva wea savve spoelem iu. So gohed for lukaotem wisdom bilong God and wei for ting raonem samting, and barava tinghae long datwan! w18.12 20 ¶6-7

Wanem taem nao bae iumi laef longtaem olsem olketa tree? Samfala tree laef for staka thousand year. For laef longtaem olsem, olketa man mas barava healthy. For garem kaen laef wea Isaiah storyim, hem bae barava nambawan, hem barava paradaes nao! And long datfala taem nao bae disfala profesi hem fulfill! Olsem iumi just storyim finis olketa promis hia showimaot hao wanfala paradaes bae kamap long future, tingim diswan: Pipol long full earth nao bae kasem blessing from God. No eni animal or pipol wea wei bilong olketa olsem wild animal, bae spoelem eniwan. Olketa wea blind, earpas, and leg bilong olketa nogud bae kasem healing. Pipol bae wakem haos bilong olketa seleva and enjoyim wei for plantim gudfala kaikai bilong olketa. Bae olketa laef longtaem winim olketa tree. Tru nao, iumi lukim hao Bible showimaot olketa samting hia bae kamap long future. Nomata olsem, samfala maet sei iumi nomoa sei olketa profesi hia minim datwan. Wanem nao main reason wea pruvim why iu luk forward for wanfala paradaes long disfala earth? Datfala nambawan man wea winim evri narawan nao givim iumi wanfala main reason.—Luke 23:43. w18.12 5 ¶13-15

Staka taem, wanem iumi ting abaotem savve changem mind bilong iumi. So sapos iumi ting raonem hao Jehovah ting abaotem samting, datwan bae helpem iumi for luksavve hao tingting bilong hem stret evritaem. Then iumi bae barava laekem for ting long samting olsem hao Jehovah ting long datwan. Bat for iumi garem tingting bilong Jehovah, iumi mas “no gohed followim wei bilong pipol long disfala world.” Diswan minim iumi mas stop for lukluk, readim, and lisin long eni samting wea savve mekem iumi mekhae long olketa idea wea againstim tingting bilong God. For helpem iumi minim why datwan hem important, iumi bae storyim example abaotem kaikai. Samwan wea laek for healthy maet kaikaim healthy kaikai. Bat, bae hem hard waka nating nomoa sapos long semtaem hem gohed for kaikaim rotten kaikai! Long sem wei, iumi hard waka nating nomoa sapos iumi lane abaotem tingting bilong Jehovah bat long semtaem iumi letem olketa idea bilong world for affectim iumi. w18.11 21 ¶14-15

Iumi mas disaed strong for followim truth long evri samting wea iumi duim. Bible comparem truth olsem belt wea wanfala soldia werem. Long bifor, belt bilong soldia hem sapotim and protectim hem taem hem go faet. Bat hem mas taetem gud datfala belt. Sapos belt hem slak, datwan bae no sapotim and protectim hem. Hao nao truth protectim iumi olsem wanfala belt? Sapos iumi evritaem followim truth long Bible, datwan bae helpem iumi for garem stretfala tingting and helpem iumi for mekem olketa gudfala disison. Taem iumi garem wanfala big problem or iumi kasem test for duim samting wea no stret, truth insaed Bible bae helpem iumi for disaed strong for duim stret samting. Long sem wei wea wanfala soldia bae hard for go faet sapos hem no werem belt bilong hem, iumi tu bae followim truth from Bible long evri samting iumi duim. w18.11 12 ¶15

Iumi mas waka hard for lanem truth insaed Bible. And iumi bae let go long samfala samting for lanem truth. And bihaen iumi “baem truth” wea minim iumi lanem truth, iumi mas careful for no “salem” wea minim iumi mas no lusim truth. Wei wea wanfala samting hem free no minim man bae no waka hard for kasem datwan. Hebrew toktok for “baem,” wea Proverbs 23:23 iusim savve minim tu wei for “kasem” samting. Tufala toktok hia showimaot man mas duim samting, or let go long samfala samting mekem hem kasem wanem hem barava important. For helpem iumi minim hao iumi savve baem truth, tingim sapos, olketa long wanfala market givim free olketa banana. Waswe, olketa banana hia bae seknomoa kasem haos bilong iumi? Nomoa. Iumi nao mas go long market and tekem kam long haos. So nomata olketa banana hia free, bat iumi nao mas duim samting for go tekem. Long sem wei, iumi no needim selen for lanem truth, bat iumi mas waka hard and sakrifaesim samfala samting for lanem truth. w18.11 4 ¶4-5

Datfala spesol vision happen taem Jesus invaetem Peter, James, and John for go witim hem long wanfala hae maunten. Feis and kaleko bilong Jesus barava shaen braet. And olketa lukim tufala man wea luk olsem Moses and Elijah story long Jesus abaotem taem wea hem bae dae and laef bak. (Luke 9:29-32) Then, wanfala braet cloud kavarem olketa, and olketa herem voice bilong God tok kam from cloud hia! Datfala vision piksarem glory and paoa wea Jesus bae garem taem hem king long Kingdom bilong God long heven. Iumi sure vision hia encouragem and strongim Christ for feisim wei wea hem bae safa and dae. Diswan strongim tu faith bilong olketa disaepol and helpem olketa for redi for hard taem wea bae kamap and bigfala waka wea bae olketa duim. Samting olsem 30 year bihaen Peter lukim datfala vision, hem storyim datfala vision. Datwan showimaot vision hia klia yet insaed mind bilong hem.—2 Pet. 1:16-18. w19.03 10 ¶7-8

Wanem nao wanfala wei wea showimaot olketa tru Christian difren from pipol bilong false religion? Iumi “mas tok tru.” (Sekaraea 8:16, 17) Iumi bae tok tru taem iumi story long olketa stranger, wakfren, fren, and olketa wea hem lovem. Sapos iu wanfala young wan, maet iu laekem olketa nara young wan for acceptim iu. Mek sure iu no garem dabol laef. Taem iu stap witim famili or kongregeson iu act olsem iu garem gudfala wei, bat taem iu stap witim olketa young wan long world or iusim social media, wei bilong iu barava difren. Taem olsem, iu laea long parents, olketa brata and sista, and laea long Jehovah tu. (Sams 26:4, 5) Jehovah savve sapos iumi mekhae long hem long toktok nomoa, bat heart bilong iumi barava farawe from hem. (Mark 7:6) Hem gud for iumi followim wanem disfala proverb talem, wea sei: “Yu no joles long man nogud, tinghevi an tinghae long [Jehovah] nomoa.”—Provebs 23:17. w18.10 9 ¶14-15

Pipol bilong God olketa insaed wanfala spiritual famili wea lovem each other. (1 John 4:21) Olketa showimaot love no long olketa big samting wea olketa duim nomoa, bat long olketa smol samting tu, olsem for talem kaenfala toktok and duim gud samting for narawan. Taem iumi kaen and tingim narawan, iumi ‘olketa pikinini bilong God wea hem lovem and iumi followim wei bilong hem.’ (Eph. 5:1) Jesus barava followim example bilong Dadi bilong hem. Dastawe hem sei: “Kam long mi, iufala wea waka hard and wea karem hevi samting, mekem mi savve strongim iufala. . . . Mi no savve raf and mi hambol.” (Matt. 11:28, 29) Taem iumi followim example bilong Christ for “tingim olketa pua pipol,” Dadi bilong iumi long heven bae hapi and iumi tu bae barava hapi. (Sams 41:1) So, iumi laek for showimaot love taem iumi gohed for tingim olketa insaed famili, kongregeson, and long ministry. w18.09 28 ¶1-2

Taem natural disaster kamap, pipol bilong God garem chance for waka tugeta witim Hem taem olketa helpem olketa brata. Olsem example, olketa givim selen for sapotim olketa. (John 13:34, 35; Acts 11:27-30) Nara wei for helpem olketa hem for klinim or repairim haos bilong olketa. Gabriela, wanfala sista from Poland wea flood spoelem haos bilong hem, barava hapi taem hem lukim olketa brata from nara kongregeson wea stap klosap olketa kam for helpem hem. Hem sei: “Mi no laek for tok abaotem samting wea mi lusim. Olketa samting hia hem material samting nomoa. Bat mi laek for storyim olketa gud samting wea mi kasem. Experience hia helpem mi for luksavve wei for part long Christian kongregeson hem wanfala spesol privilege, and tu, hem mekem man for barava hapi.” Staka wea kasem help bihaen wanfala natural disaster tu garem sem feeling. And tu, olketa wea waka witim Jehovah for provaedem help olsem barava hapi and satisfae.—Acts 20:35; 2 Cor. 9:6, 7. w18.08 26 ¶12

Sapos iumi laek for protectim heart bilong iumi, iumi mas luksavve long olketa danger and duim samting kwiktaem for protectim iumiseleva. Diswan mekem iumi tingim waka bilong wanfala security gard. Long taem bilong King Solomon, olketa security gard savve standap antap wall bilong wanfala taon and talem warning sapos olketa lukim eni danger kakam klosap. Disfala example helpem iumi for luksavve samting wea iumi mas duim for no letem Satan spoelem tingting bilong iumi. Long bifor, olketa security gard waka tugeta witim olketa man wea lukaftarem gate. (Mektu Samuel 18:24-26) Olketa hia waka tugeta for protectim datfala taon and mek sure olketa gate klos taem enemy kam klosap. (Nehemaea 7:1-3) Konsens bilong iumi wea Bible trainim savve act olsem security gard and warnim iumi taem Satan trae for spoelem heart bilong iumi, wea minim tingting, feeling, why iumi duim samting, or wanem iumi laek for duim. Taem konsens bilong iumi warnim iumi abaotem wanfala danger, iumi need for lisin and satem gate long heart bilong iumi. w19.01 17 ¶10-11

Olketa elder shud no judgem olketa young brata followim tingting or culture bilong olketa, bat olketa mas followim olketa standard insaed Bible. (2 Tim. 3:16, 17) Sapos olketa elder no followim olketa standard long Bible for appointim olketa ministerial servant or elder, datwan maet stopem olketa hia for no kasem waka wea olketa fit for duim. Long wanfala kantri, wanfala ministerial servant duim gudfala waka long kongregeson, and olketa elder agree hem kasem mark for kamap elder. Nomata olsem, samfala mature elder sei hem luk young tumas for kamap elder, so olketa no recommendim hem nao. Sorre tumas, datfala brata hem no kasem appointment bikos long wei wea hem luk young. Luk olsem long staka kantri olketa savve garem kaen tingting olsem. Hem barava important tumas for iumi followim wanem Bible talem winim wei for followim nomoa tingting bilong iumi. Then bae iumi obeyim Jesus and no judgem pipol followim samting wea iumi lukim.—John 7:24. w18.08 12 ¶16-17

Danger stap taem iumi kwiktaem forwardim e-mail or text message. Long samfala ples, gavman banim or strict tumas long waka bilong iumi. Long olketa ples olsem, olketa wea againstim iumi maet spredim olketa laea story for mekem iumi fraet or no trustim each other. Tingim samting wea happen long Soviet Union bifor. Datfala KGB, wea hem secret police bilong datfala kantri, spredim samfala laea story and sei samfala brata, wea olketa brata and sista savve gud long olketa, duim samting for spoelem pipol bilong Jehovah. Staka brata and sista bilivim olketa story hia and lusim organization bilong Jehovah. Datwan sorre samting! Gogo, samfala kam bak long organization, bat samfala no kam bak nao. Olketa laea story hia spoelem faith bilong olketa. (1 Tim. 1:19) Wanem nao iumi savve duim mekem kaen samting olsem no happen? No spredim nogud story or report wea no garem pruv. No bilivim evri story iu herem. Mek sure iu kasem information wea stret and tru. w18.08 4 ¶8

Long olketa firstfala manuscript long Greek languis, olketa no evritaem iusim olketa punctuation olsem comma. So maet iu ting olsem: Waswe, Jesus sei, “Mi talem iu tru samting, tuday iu bae stap witim mi long Paradaes”? Or waswe hem sei, “Mi talem iu tru samting tuday, iu bae stap witim mi long Paradaes”? Tingim samting wea Jesus talem long olketa disaepol bilong hem bifor hem dae, hem sei: “Son bilong man bae stap insaed long grev for thrifala day and thrifala naet.” (Matt. 12:40; 16:21; 17:22, 23; Mark 10:34; Acts 10:39, 40) So Jesus no go long eni Paradaes long day wea hem and datfala criminal dae. Jesus stap “long grev [or “Hades”]” for thrifala day go kasem taem wea God resurrectim hem. (Acts 2:31, 32; ftn.) Datfala criminal no savve tu abaotem agreement wea Jesus mekem witim olketa faithful aposol bilong hem for go rul witim hem long Kingdom long heven. (Luke 22:29) And tu, datfala criminal hem no baptaes. (John 3:3-6, 12) Dastawe, taem Jesus mekem datfala promis hem abaotem paradaes wea bae kamap long earth long future. w18.12 6 ¶17-18, 20-21

No longtaem bihaen nomoa, olketa Israelite worshipim wanfala gold buluka! Nomata olketa no obeyim komand bilong Jehovah, olketa laea long olketa seleva and olketa tingse Jehovah still saedem olketa. And Aaron sei datwan hem “wanfala fist fo tinghae long [Jehovah].” Wanem nao tingting bilong Jehovah abaotem datwan? Hem barava feel nogud. Jehovah talem Moses hao olketa Israelite olketa “kamap nogud tumas” and “olketa lusim finis wei wea [Hem] bin talem olketa fo falom.” Jehovah “barava kros” long olketa and hem ting for finisim datfala full nation bilong Israel. (Eksodas 32:5-10) Bat Jehovah disaed for no finisim olketa Israelite. (Eksodas 32:14) Aaron repent and joinim olketa Levite wea talemaot olketa saedem Jehovah nomata hem nao wakem datfala gold buluka. Staka thousand Israelite nao dae bikos olketa worshipim idol. Bat olketa wea saedem Jehovah olketa laef and Jehovah promis for blessim olketa.—Eksodas 32:26-29. w18.07 20 ¶13-16

Hu nao iumi laekem for hem mas luksavve and tinghae long iumi? Iumi no laekem pipol for tinghae long iumi from iumi aftarem hae education, ranem big bisnis, or kamap famous long disfala world. Bat iumi laekem samting wea Paul storyim taem hem sei: “Distaem iufala savve long God, or mi shud sei, God hem savve long iufala. So hao nao iufala laek go bak followim moa olketa iusles samting bilong disfala world?” (Gal. 4:9) Hem nambawan privilege for God wea hem Barava Haefala Ruler bilong universe, ‘hem savve long iumi’ and iumi fren gud witim hem. Wanfala savveman sei, diswan mekem iumi ‘kamap man wea hem hapi and tinghae long hem.’ Taem iumi kamap fren bilong Jehovah, iumi barava duim samting wea hem creatim iumi for duim.—Eklesiastes 12:13, 14. w18.07 8 ¶3-4

Sapos iumi laekem olketa law bilong God for helpem iumi, iumi mas lovem and tinghae long olketa law hia. (Rome 12:9) Bat hao nao iumi savve duim datwan? Main samting hem for lane for garem sem tingting olsem Jehovah. Tingim disfala example: Maet iu garem problem for no sleep gud. Doctor talem iu for kaikaim olketa healthy kaikai, exercise, and changem samfala samting long laef bilong iu. Bihaen iu followim samting wea doctor talem, iu luksavve datwan helpem iu! Taem olsem, iu bae barava tinghae long doctor hia bikos hem helpem iu for stap gud. Long sem wei, Creator bilong iumi givim olketa law for protectim iumi from olketa nogud samting wea kamaot from sin, and tu for helpem iumi stap gud. Olsem example, Bible teachim iumi hao iumi bae kasem gud samting sapos iumi no laea, raverave, steal, durong, raf, or duim spiritism. (Provebs 6:16-19; Rev. 21:8) Taem iumi kasem olketa gud samting wea kamaot from wei for duim wanem Jehovah laekem, datwan bae mekem grow wei wea iumi lovem and tinghae long Jehovah and olketa law bilong hem. w18.06 17 ¶5-6

Wanfala samting wea Pilate wari abaotem hem wei wea pipol maet againstim rul bilong Rome and hem tingse nogud Jesus mekem pipol for duim datwan. Bat Jesus sei: “Kingdom bilong mi hem no bilong disfala world.” (John 18:36) Hem no laek joinim politik bikos Kingdom bilong hem bae stap long heven. Hem talem Pilate hao waka bilong hem long earth hem “for talem olketa tru samting.” (John 18:37) Jesus minim gud wanem nao waka bilong hem. Long sem wei, taem iumi minim gud waka bilong iumi, iumi bae no tingim or duim eni samting for sapotim eni political grup. Maet diswan hem no isi. Wanfala traveling overseer hem sei: “Pipol long ples wea mi stap barava strong tumas long wanem olketa tingim. Olketa tinghae tumas long kantri bilong olketa and olketa tingse sapos olketa independence, laef bilong olketa bae kamap moabeta. Bat gud samting nao, olketa brata and sista keepim wei wea olketa wan mind taem olketa busy for preachim gud nius abaotem Kingdom. Olketa trustim God for stretem olketa nogud samting wea gohed for happen.” w18.06 4-5 ¶6-7

Long olketa Hebrew Scripture, Fas Kronikols, Job, and Sekaraea nomoa garem datfala nem Satan wea minim “man for againstim narawan.” Why nao Bible no talem staka samting abaotem datfala enemy go kasem taem wea Messiah kam long earth? Long olketa Hebrew Scripture, Jehovah no storyim staka samting abaotem Satan and wanem hem duim bikos main reason for garem olketa Hebrew Scripture hem for helpem pipol luksavve hu nao Messiah and for leadim olketa for go long hem. (Luke 24:44; Gal. 3:24) Taem Messiah kam, Jehovah iusim hem and olketa disaepol bilong hem for talemaot staka samting abaotem Satan and olketa angel bilong hem. Diswan hem fitim, bikos Jehovah bae iusim Jesus and olketa anointed wan wea bae rul witim hem for finisim Satan and olketa wea followim hem. (Rome 16:20; Rev. 17:14; 20:10) Tingim paoa bilong Devil hem garem spialaen. Jehovah, Jesus, and olketa faithful angel savve protectim iumi. Olketa savve helpem iumi for winim datfala enemy. w18.05 22-23 ¶2-4

Jehovah bae acceptim iumi only sapos iumi garem frut. (Matt. 13:23; 21:43) Dastawe, long disfala tokpiksa long John 15:1-5, frut wea olketa Christian mas garem no minim olketa niu wan wea iumi helpem for kamap disaepol. (Matt. 28:19) Bikos sapos nomoa, bae diswan minim olketa faithful witness wea stap long ples wea pipol no interest and no helpem eniwan for kamap disaepol, bae olsem olketa branch wea no garem frut long tokpiksa bilong Jesus. Bat datwan no tru! Why nao olsem? Bikos iumi hard for forcem pipol for kamap disaepol. Jehovah showimaot love so hard for hem expectim pipol bilong hem for duim samting wea olketa no fit for duim. Evri samting Jehovah askem iumi for duim hem samting wea iumi fit for duim. (Diutronomi 30:11-14) So, wanem nao datfala frut wea iumi mas garem? Masbi datfala frut hem minim wanfala waka wea each wan long iumi fit for duim. Wanem kaen waka nao datwan? Hem nao waka for preachim gud nius abaotem Kingdom bilong God.—Matt. 24:14. w18.05 14 ¶8-9

Distaem tu staka bigman bilong religion stap. Samfala kolem olketa long pastor, priest, or long olketa nara title. Olketa olsem olketa Pharisee long first century wea no teachim truth long Bible, bat olketa changem truth abaotem God for samting wea no tru. (Rome 1:18, 25) Olketa mekhae long kaen teaching olsem, “sapos man acceptim Jesus, bae hem sev,” man garem soul wea no savve dae, taem man dae hem kamap nara samting, and olketa sei God acceptim homosexual and wei for man maritim man or woman maritim woman. Olketa bigman long gavman tu laea long pipol. Wanfala main laea wea klosap for iumi herem nao hem wei wea olketa gavman bae sei “iumi garem peace and stap gud nao!” Bat “then seknomoa olketa bae finis.” So iumi shud careful for no bilivim wanem olketa talem, bikos olketa laea long pipol and mekem olketa tingse world no klosap finis yet. Bat tru samting nao iumi “savve finis day bilong Jehovah bae kam olsem man for steal long naet.”—1 Thess. 5:1-4. w18.10 7-8 ¶6-8

Thru long olketa anointed wan and olketa elder, Jesus Christ provaedem encouragement and direction for olketa wea feel sorre and wikdaon. Olketa elder no “boss” long faith bilong olketa narawan bat “waka tugeta” witim olketa brata for mekem evriwan hapi. (Aesaea 32:1, 2; 2 Cor. 1:24) Aposol Paul showimaot nambawan example for olketa elder. Hem raet olsem for olketa Christian long Thessalonica wea kasem persecution: “From mifala lovem iufala tumas, mifala hapi for sharem gud nius bilong God witim iufala and for givim tu laef bilong mifala for helpem iufala.” (1 Thess. 2:8) Samfala taem for talem nomoa toktok for encouragem narawan hem no inaf. Paul talem toktok long text for tuday for olketa elder long Ephesus. w18.04 21-22 ¶6-8

Sapos iumi laek garem datfala freedom, iumi mas worshipim Jehovah, wea minim iumi mas fren gud witim hem. (2 Cor. 3:16) Taem olketa Israelite stap long wilderness olketa no garem spiritual tingting abaotem freedom wea Jehovah givim olketa. Hem olsem wanfala samting hem kavarem mind and heart bilong olketa. Olketa laek for iusim wei wea olketa kamap free from Egypt for duim samting wea olketa seleva nomoa laekem. (Heb. 3:8-10) Datfala freedom wea iumi kasem from spirit bilong Jehovah, hem difren from wei wea man savve kamap free from wei for slave. Winim wei wea olketa man savve mekem iumi free, spirit bilong Jehovah mekem iumi free from sin and dae. And tu, hem mekem iumi free from olketa false religion and teaching bilong olketa. (Rome 6:23; 8:2) Datfala freedom hem barava winim eni nara wei for free! Nomata man kamap slave or stap long prison, hem savve garem datfala freedom.—Jenesis 39:20-23. w18.04 9 ¶3-5