August

Olketa meeting savve helpem iumi for tingim evritaem samting wea Jehovah and Jesus duim for iumi. From iumi barava tinghae long datwan, iumi traem best for followim example bilong Jesus evriday. (2 Cor. 5:14, 15) And tu, heart bilong iumi muvim iumi for praisem Jehovah bikos hem givim kam datfala ransom. Wanfala wei for duim datwan, hem nao taem iumi givim olketa koment long meeting wea kam from heart. Iumi savve showimaot iumi barava lovem Jehovah and Son bilong hem taem iumi willing for sakrifaesim samfala samting for tufala. Staka taem, iumi mas sakrifaesim samfala samting for attendim olketa meeting. Long staka kongregeson, meeting savve kamap long end long day long taem wea maet iumi taed from iumi waka full day. And nara meeting savve kamap long weekend long taem wea pipol rest. Waswe, Jehovah lukim wei wea iumi attendim meeting nomata iumi taed? Ia, hem lukim datwan! For sure, Jehovah barava tinghae long love wea iumi showimaot for hem and hem lukim tu hard taem wea iumi mas deal witim.—Mark 12:41-44. w19.01 29 ¶12-13

Jesus seleva kasem samfala hard taem wea pipol savve feisim. Olsem example, Jesus growap insaed wanfala poor famili. Jesus mas lane hao for waka hard, taem hem waka witim dadi bilong hem Joseph. (Matt. 13:55; Mark 6:3) Luk olsem, Joseph dae bifor Jesus startim ministry bilong hem. So masbi Jesus tu feelim sorre taem hem lusim samwan wea hem lovem long dae. And Jesus minim feeling bilong olketa wea growap insaed famili wea no evriwan garem sem biliv. (John 7:5) Olketa samting hia and samfala nara samting moa mas helpem Jesus for minim hard taem and feeling bilong olketa man. Wei wea Jesus tingim olketa narawan barava showaot klia taem hem duim olketa mirakol. Jesus no duim olketa mirakol just bikos hem mas duim datwan, bat bikos hem “barava sorre” long olketa wea safa. (Matt. 20:29-34; Mark 1:40-42) Jesus feel sorre long pipol and laek for helpem olketa.—Mark 7:32-35; Luke 7:12-15. w19.03 16 ¶10-11

Long last naet wea Jesus laef long earth. Tingim wei wea Jesus stress and wari. Waswe, bae hem gohed faithful go kasem taem hem dae? Sapos hem no faithful, no eniwan bae garem hope for laef olowe. (Rome 5:18, 19) And samting wea moa important, wanem hem duim bae affectim nem bilong Dadi bilong hem. (Job 2:4) And long last naet wea hem kaikai witim olketa aposol wea olketa nao klos fren bilong hem, olketa aposol story gogo olketa “raoa abaotem hu long olketa nao hem important.” Bat nomata olsem, Jesus no feel nogud long olketa. Hem gohed for hambol and kaen. Long kaenfala wei Jesus tok stret taem hem explainim moa fasin wea olketa shud garem. Then hem praisem olketa fren bilong hem bikos olketa faithful for sapotim hem. (Luke 22:24-28; John 13:1-5, 12-15) Iumi savve followim example bilong Jesus for hambol and kaen nomata iumi stress or wari tumas. Iumi evritaem tingim hao iumi evriwan savve talem and duim samting wea maet mekem narawan feel nogud. (Provebs 12:18; Jas. 3:2, 5) And hem gud tu for praisem olketa narawan taem iu lukim olketa garem naesfala wei.—Eph. 4:29. w19.02 11-12 ¶16-17

Law bilong Moses hem mekem hem hard lelebet for eniwan talem laea samting for accusim narawan. Law sei man garem raet for savve hu nao accusim hem. (Diutronomi 19:16-19; 25: 1) And bifor olketa savve givim judgment, tufala or moa witness mas givim pruv wea showimaot hem guilty. (Diutronomi 17:6; 19:15) Waswe sapos wanfala Israelite man hem brekem law bat wanfala man nomoa lukim? Disfala man wea brekem law shud no tingse bae hem no kasem panis. Jehovah lukim wanem hem duim. Tru nao, Jehovah showimaot perfect example. Hem showimaot justice long evri samting. Jehovah savve blessim olketa wea faithful for followim standard bilong hem, bat hem panisim olketa wea iusim paoa long rongfala wei. (Mektu Samuel 22:21-23; Esikiel 9:9, 10) Maet hem luk olsem samfala wea duim nogud samting no kasem panis for datwan, bat long taem wea Jehovah markem bae hem judgem olketa. (Provebs 28:13) And sapos olketa no repent, bae olketa faendaot hao judgment bilong God wea laef hem samting wea man fit for fraetem.—Heb. 10:30, 31. w19.02 23-24 ¶20-21

Moses hem wanfala man wea luk long Jehovah for helpem and leadim hem. Bible sei: “Hem gohed strong bikos hem olsem hem lukim God wea no eniwan savve lukim.” (Heb. 11:24-27) No kasem tufala month bihaen olketa Israelite lusim Egypt, wanfala big problem kamap bifor olketa kasem Maunt Sinai. Olketa Israelite start for komplen bikos no eni wata. Olketa start for tok againstim Moses, and olketa barava kros long hem. So Moses sei long Jehovah: “Wanem nao bae mi duim long olketa pipol ya? !No longtaem, bae olketa sutim mi dae long ston!” (Eksodas 17:4) So Jehovah givim klia instruction long Moses. Hem talem Moses for tekem stik bilong hem and whipim datfala ston long Horeb, and then staka wata bae kamaot. Bible sei: ‘Mosis hemi duim diswan frant long olketa lida blong Israel.’ Olketa Israelite drink gogo olketa satisfae nao, and datfala problem hem finis.—Eksodas 17:5, 6. w18.07 13 ¶4-5

Wanfala wei wea Jehovah showimaot love for strongim iumi, hem thru long Christian kongregeson. Each wan long iumi savve showimaot iumi lovem Jehovah taem iumi lovem and strongim olketa brata and sista bilong iumi long spiritual wei and comfortim olketa. (1 John 4:19-21) Aposol Paul sei: “Gohed for encouragem and strongim narawan, olsem iufala duim distaem.” (1 Thess. 5:11) Tru nao, evriwan long kongregeson, no just olketa elder nomoa, savve followim example bilong Jehovah and Jesus for comfortim and strongim olketa brata and sista. (Rome 15:1, 2) Samfala long kongregeson wea safa from olketa sik olsem depression, maet need for lukim doctor and kasem medicine. (Luke 5:31) Nomata olketa elder and olketa narawan long kongregeson, olketa no doctor wea kasem training for deal witim olketa kaen sik olsem, olketa savve duim samting for helpem and comfortim olketa. So evriwan long kongregeson savve “comfortim olketa wea sorre, helpem olketa wea wik, and patient long evriwan.”—1 Thess. 5:14. w18.09 14-15 ¶10-11

Taem iumi savve gud long Jehovah, datwan bae strongim wei wea iumi trustim hem. And only wei for savve gud long God hem nao for readim Bible and ting raonem gud wanem iumi readim. Bible garem staka story wea showim hao Jehovah protectim pipol bilong hem bifor. Olketa story hia mekem iumi barava trustim hao Jehovah bae protectim and lukaftarem iumi distaem. Tingim disfala example. Isaiah iusim wanfala nambawan tokpiksa for showim hao Jehovah protectim iumi. Hem sei Jehovah hem olsem wanfala shepherd and olketa wea worshipim hem olsem smol sheepsheep. Isaiah sei olsem abaotem Jehovah: “Hemi olsem man hu hemi karim olketa [smol sheepsheep] long am blong hem.” (Aesaea 40:11) Taem iumi feelim wei wea strong hand bilong Jehovah karem iumi, datwan mekem iumi no wari and sure hem protectim iumi. For helpem iu no wari nomata iu feisim olketa problem, ting raonem olketa toktok hia wea stap long text for tuday. Datwan bae strongim iu for feisim olketa hard taem wea bae kamap. w19.01 7 ¶17-18

Waswe, iu garem eni spiritual goal wea iu waka hard for kasem? Maet iu markem goal for readim Bible evriday. Or iu trae for kamap gud saed long wei for story and teach. Nomata wanem goal iu garem, taem iu lukim olketa gud samting wea kamaot from datwan and olketa narawan praisem iu, hao nao iu feel? For sure, iu barava hapi. And iu fit for feel olsem, bikos iu followim example bilong Jesus for duim wanem God laekem winim wei for duim wanem iuseleva laekem. (Provebs 27:11) Taem iu aftarem olketa spiritual goal, iu duim waka wea savve mekem iu barava hapi and satisfae. Aposol Paul sei: “Iufala olketa brata wea mi lovem, iufala mas faithful and gohed strong. Evritaem busy long waka bilong Lord from iufala savve iufala no waka hard nating taem iufala duim waka bilong Lord.” (1 Cor. 15:58) Pipol long world barava difren, taem olketa aftarem olketa goal long disfala world, luk olsem olketa kasem gud samting, bat olketa nating hapi and satisfae nomoa.—Luke 9:25. w18.12 22 ¶12-13

David story abaotem taem wea pipol long earth bae followim olketa raeteous wei bilong God. (2 Pet. 3:13) Last part long Aesaea 65:21, 22 hem sei pipol bilong Jehovah bae laef longtaem olsem olketa tree. Diswan minim pipol bae laef for staka thousand year. Revelation 21:1-4 storyim hao God bae blessim olketa man, and wanfala long olketa blessing hia nao hem wei wea “no eniwan bae dae.” Pipol wea worshipim God bae stap long raeteous niu world. Adam and Eve lusim Paradaes long Eden bifor, bat datwan hem no lus for olowe. Olsem God promisim, pipol long earth bae kasem blessing. David storyim hao olketa wea hambol and garem raeteous wei bae stap long earth for olowe. (Sams 37:11) Olketa profesi long buk bilong Isaiah helpem iumi for luk forward for taem wea iumi bae enjoyim laef long paradaes earth. (Aesaea 11:6-9; 35:5-10; 65:21-23) Wanem taem nao datwan bae kamap? Taem promis bilong Jesus wea hem talem long datfala criminal kamap tru. (Luke 23:43) Iu savve stap long Paradaes. w18.12 7 ¶22-23

Waswe, iumi savve stap klia evribit from olketa idea bilong world? Nomoa, bikos iumi stap insaed world so hard for iumi stap klia evribit. (1 Cor. 5:9, 10) Nomata taem iumi preach, iumi herem pipol storyim olketa rong idea and false biliv bilong olketa. So samfala taem hem hard for iumi barava stap klia long olketa rong idea hia, bat iumi no laek for gohed tingim or acceptim datwan. Olsem Jesus, iumi shud kwiktaem rejectim olketa tingting wea Satan laekem iumi for garem. And tu, iumi savve protectim tingting and heart bilong iumi taem iumi traem best for stap klia long olketa tingting bilong world. Olsem example, iumi shud careful taem iumi chusim olketa fren bilong iumi. Bible talem klia hao sapos iumi fren klos witim pipol wea no worshipim Jehovah, iumi bae start for garem sem tingting olsem olketa. (Provebs 13:20; 1 Cor. 15:12, 32, 33) Taem iumi rejectim olketa samting wea mekhae long evolution, raf fasin, or wei for durong, iumi protectim mind bilong iumi for no garem olketa idea wea “againstim datfala savve abaotem God.”—2 Cor. 10:5. w18.11 21 ¶16-17

Hao nao iumi savve strongim wei wea iumi bae gohed obeyim truth? Wanfala wei hem for traem best for teachim truth insaed Bible long olketa narawan. Bible hem olsem wanfala sword. Long sem wei wea wanfala soldia mas hol strong long sword bilong hem, iumi tu mas hol strong long toktok bilong God. (Eph. 6:17) Iumi evriwan savve kamap olketa gudfala teacher wea “iusim long stretfala wei datfala toktok bilong God wea tru.” (2 Tim. 2:15) Taem iumi iusim Bible for teachim olketa narawan, iumi bae savve gud long truth, and barava tinghae long datwan. And iumi bae barava disaed strong for gohed wakabaot followim truth. Truth hem nambawan present from Jehovah. Truth helpem iumi for fren gud witim Dadi bilong iumi long heven. Datwan nao hem barava important samting long laef bilong iumi. Jehovah teachim iumi staka samting finis, and hem promis for gohed teachim iumi for olowe. So tinghae long truth olsem wei wea iu tinghae long datfala gud pearl. Gohed for “baem truth and no salem.”—Prov. 23:23, NW. w18.11 8 ¶2; 12 ¶15-17

Luk olsem part long message wea Noah preach abaotem long olketa pipol hem warning abaotem datfala Flood wea bae kam. Tingim wanem Jesus talem: “Bifor Flood hem kam, pipol gohed for kaikai, drink, and marit go kasem day wea Noah go insaed long ark. Olketa nating tinghae long samting wea Noah talemaot, gogo Flood hem kam nomoa and evriwan draon nao. Taem wea Son bilong man hem stap bae hem olsem tu.” (Matt. 24:38, 39) Nomata staka pipol no acceptim wanem Noah talem, Noah faithful for talemaot datfala warning message wea Jehovah givim long hem. Distaem, iumi preachim Kingdom message wea givim chance long pipol for lane abaotem plan bilong God for iumi olketa man. Olsem Jehovah, iumi hope olketa pipol bae acceptim datfala message and “gohed fo laef.” (Esikiel 18:23) Bat long semtaem, taem iumi preach from haos tu haos and long olketa nara ples, iumi trae for warnim evri pipol hao Kingdom bilong God bae kam and finisim disfala nogud world.—Esikiel 3:18, 19; Daniel 2:44; Rev. 14:6, 7. w18.05 19 ¶8-9

Wanem nao iu shud duim sapos gavman long ples wea iu stap banim waka bilong iumi and olketa arrestim and kwestinim iu abaotem olketa brata? Waswe, iu bae talem olketa evri samting? Wanem nao Jesus duim taem bigman bilong Rome kwestinim hem? Samfala taem, Jesus no talem eni samting, bat hem followim Bible principle wea sei: “Taem hemi stap fo man stap kuaet, an taem hemi stap fo tok.” (Eklesiastes 3:1, 7; Matt. 27:11-14) Sapos kaen samting olsem kasem iumi, iumi need for tingting gud mekem iumi no putim laef bilong olketa brata bilong iumi long danger. (Provebs 10:19; 11:12) Waswe sapos wanfala fren or relative bilong iu hem duim serious sin and iu savve long datwan? “Talem tru toktok.” Iu mas talem olketa elder full story, no haedem or changem eni part long datfala story. Olketa elder garem raet for savve long tru story mekem olketa savve faendem best wei for helpem man wea duim rong samting mekem hem fren moa witim Jehovah.—Jas. 5:14, 15. w18.10 10 ¶17-18

Hao nao iumi savve strongim narawan long wei for showimaot love? Wanfala wei hem for willing for lisin. (Jas. 1:19) Wei for lisin and trae for minim feeling bilong man wea feel wikdaon hem showimaot iumi garem love. Maet iu savve askem olketa kwestin long kaenfala wei for helpem iu minim feeling bilong hem. Taem iu duim olsem, iu bae fit for helpem and strongim hem. Feis bilong iu savve showimaot iu really kea for hem. Taem hem laek story, iu need for patient and no katem story. Sapos iu patient for lisin, iu bae minim gud feeling bilong hem. Datwan bae helpem hem for trustim iu and hem bae willing for lisin long wanem iu talem for strongim hem. Taem iu showimaot iu barava kea for hem, datwan bae barava comfortim hem. w18.09 14 ¶10; 15 ¶13

Iumi needim taem for herem message abaotem Kingdom, readim Bible and olketa Bible pablikeson, studyim Bible witim Olketa Jehovah’s Witness, prepare for olketa meeting, and for go long olketa meeting. For duim olketa samting hia, iumi mas let go long olketa samting wea no important and iusim gud taem bilong iumi. (Eph. 5:15, 16) Hao long nao iumi savve study bifor iumi lanem olketa main truth long Bible? Hao evriwan lane hem no semsem. Bat, wei for lane abaotem wisdom bilong Jehovah, olketa wei bilong hem, and olketa samting wea hem duim, bae gohed for olowe. (Rome 11:33) Firstfala Watch Tower magasin, hem storyim truth olsem “wanfala smol flaoa” and hem sei: “No satisfae for garem wanfala flaoa nomoa. Sapos wanfala flaoa hem inaf, no eni nara flaoa moa bae stap. Gohed faendem staka flaoa moa.” Nomata sapos iumi laef for olowe, iumi bae gohed lanem staka samting abaotem Jehovah. Bat distaem, hem barava important for iumi iusim gud taem bilong iumi mekem iumi lanem staka samting wea iumi fit for lanem abaotem hem. w18.11 5 ¶7

Bible encouragem olketa hasband for tingim and ‘minim gud waef bilong olketa.’ (1 Pet. 3:7) Sapos man minim narawan, bae hem kaen long hem. Olsem example, wanfala hasband wea minim gud waef bilong hem luksavve nomata God wakem waef for barava fitim hem, hem savve tufala no semsem long staka wei and hem no tingse hem gud winim waef bilong hem. (Jenesis 2:18) Hem showimaot hem tingim feeling bilong waef bilong hem and hem respectim hem. Hasband wea kea for waef bilong hem bae tingim feeling bilong waef taem hem story or deal witim olketa nara woman. Hem bae no talem or duim eni samting wea showimaot hem interest long olketa woman long wei wea no stret, and hem no duim datwan tu taem hem iusim social media or Internet. (Job 31:1) Bat hem gohed faithful long waef bilong hem, no bikos hem lovem waef nomoa, bat bikos hem lovem God and heitim olketa nogud samting.—Sams 19:14; 97:10. w18.09 29 ¶3-4

Why nao hem no isi for followim wanem iumi lanem insaed Bible? Wanfala reason hem bikos for duim stret samting iumi mas hambol. Diswan hem no isi samting for duim. Long “olketa last day” iumi stap midolwan pipol wea “tingim olketa seleva nomoa, laekem tumas selen, tok praod, mekhae long olketa seleva,” and “no savve kontrolem seleva.” (2 Tim. 3:1-3) Taem pipol storyim and mekhae long olketa selfish wei bilong disfala world, maet samwan wea worshipim God savve datwan hem nogud, bat maet hem laek for olsem tu. (Sams 37:1; 73:2, 3) Maet iumi ting olsem: ‘Why nao hem important for mi tingim narawan winim miseleva? Sapos mi “hambol,” waswe, bae pipol respectim mi?’ Sapos iumi letem selfish wei bilong disfala world affectim iumi, datwan savve spoelem love wea iumi garem for olketa long kongregeson and spoelem gudfala wei bilong iumi. Bat iumi kasem gud samting taem iumi studyim and followim olketa gud example insaed Bible. w18.09 3 ¶1

Firstaem Jehovah stap seleva nomoa, bat taem hem start for creatim evri nara samting, hem no tingim hemseleva nomoa. Hem disaed for givim laef long olketa narawan tu, olsem olketa angel and olketa man. Jehovah “datfala hapi God,” hem hapi tumas for givim olketa gud samting. (1 Tim. 1:11; Jas. 1:17) And bikos hem laekem iumi tu for hapi, hem teachim iumi for kaen and willing for give long narawan. (Rome 1:20) God wakem man for olsem hem. (Jenesis 1:27) Datwan minim iumi savve showimaot olketa wei bilong hem. For iumi hapi and kasem olketa blessing, iumi need for followim example bilong Jehovah for showimaot interest and kaen tumas for givim samting long olketa narawan. (Phil. 2:3, 4; Jas. 1:5) Why nao olsem? Bikos Jehovah wakem iumi for olsem nao. Nomata iumi no perfect, iumi savve followim example bilong Jehovah for kaen and willing for give. Jehovah laekem iumi for followim example bilong hem, so hem hapi taem iumi kaen long olketa narawan.—Eph. 5:1. w18.08 18 ¶1-2; 19 ¶4

Taem olketa disaepol duim samting wea Jesus talem, datwan showimaot olketa herem toktok bilong hem. Olketa no letem olketa wari long laef for stopem olketa for duim datwan. (Luke 21:34) Nomata olketa feisim olketa hard taem, wei for obeyim komand bilong Jesus hem main samting long laef bilong olketa. Nomata olketa samting olsem kasem olketa, olketa brata gohed faithful long Jehovah.Narafala wei wea iumi savve showimaot iumi herem wanem Jesus talem, hem nao for obeyim olketa wea garem responsibility for leadim iumi. (Heb. 13:7, 17) Staka change kamap insaed organization bilong God distaem, olsem olketa niufala tul for ministry, olketa niufala wei for duim ministry, olketa change wea kamap long midol week meeting, and tu hao iumi buildim, renovatim, and lukaftarem olketa Kingdom Hall. Iumi barava tinghae long olketa nambawan instruction hia wea showimaot organization lovem and tingim iumi! Iumi sure Jehovah bae blessim iumi taem iumi followim eni instruction wea iumi kasem from organization. w19.03 10-11 ¶11-12

No trustim kaen story wea lelebet part nomoa hem tru. Tingim samting wea happen long olketa Israelite wea stap long west saed bilong Jordan River long taem bilong Joshua. (Josua 22:9-34) Olketa herem hao olketa Israelite, wea stap long east saed olketa buildim wanfala bigfala altar. Nomata datfala part long story hem tru, datwan hem no full story. From olketa Israelite wea stap long west saed no herem full story, olketa tingse olketa brata bilong olketa long east saed againstim Jehovah. (Josua 22:9-12) Bat bifor olketa go faet, olketa sendem samfala man for go herem full story. Wanem nao olketa faendemaot? Datfala altar, no for sakrifaes bat for olsem wanfala memory, for showimaot long evriwan hao olketa tu faithful for worshipim Jehovah. Masbi olketa Israelite hia hapi tumas bikos olketa mek sure firstaem long full story and datwan mekem olketa no killim dae olketa brata bilong olketa! w18.08 5 ¶9-10

Olsem Paul storyim, olketa wea worshipim Jehovah tu savve duim olketa nogud samting. Taem olketa duim nogud samting, maet olketa tingse olketa still fren witim Jehovah. Bat wei for laek fren witim Jehovah or sei iumi faithful long hem, no minim Jehovah acceptim worship bilong iumi. (1 Cor. 10:1-5) Long sem wei wea olketa Israelite wari taem Moses no kam daon kwiktaem from Maunt Sinai, olketa Christian distaem maet wari from bigfala day bilong Jehovah and niu world hem no kam kwiktaem. Maet iumi start for daotem olketa promis hia and tingse hem longtaem tumas or maet iumi tingse hem laea promis nomoa. Kaen tingting olsem savve leadim iumi for duim samting wea iumiseleva laekem winim wei for duim samting wea Jehovah laekem. Isisi iumi start for lusim Jehovah and duim olketa samting wea sapos iumi strong long spiritual wei, bae iumi no savve duim. w18.07 21 ¶17-18

Iumi savve kasem olketa nambawan blessing taem Jehovah savve gud long iumi. Bat wanem nao iumi mas duim for Jehovah savve long iumi? Iumi mas lovem hem and dedicatem laef bilong iumi long hem. (1 Cor. 8:3) Bat iumi need for gohed keepim disfala spesol wei wea iumi fren witim Dadi bilong iumi long heven. Olsem olketa Christian long Galatia wea Paul raet long olketa, iumi tu need for stap klia long “olketa iusles samting bilong disfala world,” olsem wei for aftarem hae position and for laekem tumas pipol for tinghae long iumi. (Gal. 4:9) Olketa Christian long Galatia duim finis olketa samting for mekem God savve long olketa. Bat, Paul sei olketa brata hia start for “go bak followim moa” olketa iusles samting. Hem olsem Paul hem sei: “Iufala duim gud samting finis, why nao iufala duim moa olketa iusles samting wea iufala lusim finis?” w18.07 8 ¶5-6

Iumi no need for brekem olketa law bilong God and kasem nogud samting from datwan bifor iumi fit for lanem wanem hem stret or no stret. Iumi savve lane from olketa wea duim mistek bifor wea Bible story abaotem. Olketa teaching wea kam from God savve barava helpem iumi, olsem wei for lane from example bilong olketa man insaed Bible. Olsem example, tingim olketa nogud samting wea David kasem taem hem no followim law bilong Jehovah and hem durong witim Bathsheba. (Mektu Samuel 12:7-14) Taem iu readim and ting raonem disfala story, askem iuseleva: ‘Hao nao David fit for misstim olketa problem hia? Wanem nao bae mi duim sapos mi kasem sem test olsem David? Waswe, bae mi olsem David or bae mi ranawe olsem Joseph?’ (Jenesis 39:11-15) Taem iumi ting raonem nogud samting wea kamaot from wei for duim sin, datwan strongim iumi for “heitim olketa rabis samting.”—Rome 12:9. w18.06 17 ¶5, 7

Taem pipol lukim olketa samting wea no stret hem gohed happen, datwan savve mekem olketa laek for join insaed politik. Long taem bilong Jesus, wei for peim tax hem wanfala main samting wea mekem pipol laek for teksaed long politik. Evriwan wea stap anda long Rome mas peim staka tax olsem tax for haos, land, and for olketa samting wea olketa ownim. And tu, wei wea olketa man for kolektem tax olketa raverave tumas, hem mekem datfala problem for worse go moa. Samfala taem olketa savve givim selen long bigman bilong gavman for kasem olketa position wea mekem olketa garem paoa for kolektem staka selen. Zacchaeus, wea hem boss bilong olketa man wea tekem tax long Jericho, hem rich bikos hem forcem pipol for peim staka tax. (Luke 19:2, 8) Luk olsem staka narawan tu duim sem samting. Olketa enemy bilong Jesus trae for mekem hem teksaed long wei for peim tax. Tax wea olketa kwestinim Jesus abaotem, hem nao tax wea evri Jew mas peim, wea hem wan denarius. (Matt. 22:16-18) Olketa Jew barava les for peim datfala tax bikos datwan remindim olketa hao olketa mas stap anda long gavman bilong Rome. w18.06 5-6 ¶8-10

Taem man saedem Satan hem bae evritaem kasem nogud samting. (Job 21:7-16; Gal. 6:7, 8) Why nao hem gud for iumi savve Satan nao kontrolem world? Diswan helpem iumi for garem stret tingting abaotem olketa gavman and strongim iumi for preach. Iumi luksavve Jehovah laekem iumi for stap anda long olketa wea rul. (1 Pet. 2:17) And Jehovah expectim iumi for obeyim olketa law bilong gavman sapos olketa law hia no againstim wanem God laekem. (Rome 13:1-4) Bat, iumi savve tu iumi mas no teksaed and no favorim eni political party or bigman bilong gavman. (John 17:15, 16; 18:36) From iumi savve Satan tok spoelem Jehovah and no laekem pipol for savve long nem bilong Hem, iumi barava laek for teachim truth abaotem God bilong iumi long olketa narawan. Iumi barava hapi from iumi olketa witness bilong Jehovah and iumi iusim datfala nem. Taem iumi fren witim God bae iumi kasem staka gud samting winim wei for aftarem selen and staka material samting.—Aesaea 43:10; 1 Tim. 6:6-10. w18.05 24 ¶8-9

Sapos eni problem kamap insaed marit, waswe, hem stret for separate? Bible no storyim eni reason for separate. Paul sei: “Sapos hasband bilong wanfala woman hem no biliv bat hem hapi for stap witim hem, datfala woman mas no lusim hasband bilong hem.” (1 Cor. 7:12, 13) Datwan hem fitim taem bilong iumi tu. Bat, samfala taem hasband wea no worshipim Jehovah maet duim samting wea showimaot hem no willing for stap witim waef bilong hem. Maet hem savve barava killim nogud waef bilong hem, gogo waef hem feel olsem laef and health bilong hem stap long danger. Maet hem barava les for sapotim waef and pikinini bilong hem saed long selen or hem trae for stopem waef bilong hem for no faithful long God. Long taem olsem, samfala Christian disaed seleva hao olketa need for separate bikos nomata hasband sei hem “hapi for stap witim hem” bat samting wea hem duim showim difren samting. Nomata olsem, olketa nara Christian wea kasem sem problem disaed for gohed stap witim hasband bilong olketa and traem best for stretem olketa problem wea kamap. w18.12 13 ¶14, 16; 14 ¶17

Long tokpiksa wea stap long Luke 8:5-8, 11-15, datfala seed hem nao “message bilong God,” or datfala Kingdom message. Datfala graon hem piksarem heart bilong man. Seed wea foldaon long gud graon hem garem rut and then hem grow, gogo hem big and bihaen hem “garem staka frut.” Olsem gudfala graon long tokpiksa bilong Jesus, iumi acceptim datfala message and tinghae long hem. From datwan, datfala seed wea hem nao Kingdom message, hem start for garem rut and grow and gogo taem hem big hem redi for garem frut. And olsem wei wea wanfala wheat no garem olketa niu wheat bat hem garem olketa niu seed, iumi tu garem frut wea diswan no minim niu disaepol bat hem minim niu Kingdom seed. Hao nao iumi savve garem niu Kingdom seed? Evritaem iumi talem olketa narawan abaotem Kingdom bilong God, hem olsem iumi spredim seed wea stap finis insaed heart bilong iumi and iumi mekem hem kamap staka. (Luke 6:45; 8:1) Disfala tokpiksa teachim iumi hao taem iumi gohed for talemaot disfala Kingdom message datwan showimaot iumi “garem frut and no givap.” w18.05 14 ¶10-11

Paul hem laekem tumas for encouragem olketa brata and hem willing tu for ‘givim evri samting wea hem garem and givim hemseleva tu for helpem olketa.’ (2 Cor. 12:15) Olketa elder tu shud no talem nomoa olketa toktok for encouragem olketa brata, bat olketa shud strongim olketa thru long wei for showimaot olketa barava tingim olketa. (1 Cor. 14:3) For strongim narawan maet samfala taem olketa elder mas givim kaonsel, bat olketa shud followim example insaed Bible abaotem hao for givim kaonsel long wei wea encouragem narawan. Bihaen Jesus dae and resurrect hem showimaot nambawan example long wei for duim diswan. Hem need for givim strong kaonsel long samfala kongregeson long Asia Minor, bat tingim hao hem duim datwan. Bifor hem kaonselem olketa long kongregeson bilong Ephesus, Pergamum, and Thyatira, hem praisem olketa. (Rev. 2:1-5, 12, 13, 18, 19) Hem gud for olketa elder followim example bilong Jesus taem olketa need for givim kaonsel. w18.04 22 ¶8-9

Parents, iufala garem spesol responsibility for protectim pikinini bilong iufala from wei wea Satan laek for spoelem heart bilong olketa. For sure, iu savve duim best bilong iu for protectim pikinini from sik. Iu keepim haos klin, and iu torowem eni samting wea maet mekem iu or pikinini for sik. Long sem wei, iu need for protectim pikinini bilong iu from olketa movie, TV program, electronic game, and olketa website wea savve spoelem heart bilong olketa and mekem olketa for garem sem tingting olsem Satan. Jehovah givim iu responsibility for lukaftarem spiritual saed bilong pikinini bilong iu. (Provebs 1:8) So no fraet for mekem olketa rul wea followim olketa standard insaed Bible. Talem pikinini bilong iu wanem olketa fit for lukim and no lukim, and helpem olketa for luksavve olketa reason why iu talem datwan. (Matt. 5:37) Taem pikinini bilong iu start for big, trainim olketa mekem olketa seleva luksavve long olketa standard bilong Jehovah saed long samting wea stret and no stret. (Heb. 5:14) Tingim, pikinini savve lanem staka samting from wanem iu duim.—Diutronomi 6:6, 7; Rome 2:21. w19.01 16 ¶8

Sapos iu wanfala young wan, fren gud witim olketa olo brata and sista. Hem gud for askem olketa for storyim experience bilong olketa abaotem samting wea helpem olketa for servem Jehovah for longfala taem. Diswan bae encouragem iu and olketa tu for gohed letem laet bilong truth for shaen. And iumi evriwan savve welkamim olketa wea kam long Kingdom Hall for olketa meeting. Sapos iu kasem assignment for conductim field service meeting, iu savve helpem olketa wea olo for gohed duim ministry. Mek sure datfala territory hem fitim olketa for duim. Samfala taem, maet iu savve markem olketa for waka witim olketa young wan wea fit for helpem olketa long physical wei. And tu, iu savve tingim olketa wea sik and wea no fit for duim staka samting long ministry. Tru nao, wei wea iu kaen and tingim olketa narawan savve helpem olketa young wan, olo, olketa wea niu long truth, and olketa wea stap insaed truth for longfala taem finis for gohed strong for talemaot disfala gud nius.—Levitikas 19:32. w18.06 23-24 ¶10-12

Iumi shud no ting nating long wei wea Jehovah mekem iumi kamap free from wei for sin and dae. Thru long ransom, iumi free for worshipim God witim klin konsens and datwan mekem iumi kasem trufala hapi. (Sams 40:8) Witim wei for sei thankiu long God, iumi mas stap klia long wei for iusim long rongfala wei freedom wea iumi garem for chus. Aposol Peter sei nomata iumi garem datfala freedom, iumi shud no iusim datwan olsem excuse for duim olketa nogud samting. Datwan remindim iumi abaotem samting wea happen long olketa Israelite long wilderness. Datfala toktok barava fitim iumi distaem. Satan and world bilong hem mekhae long staka samting saed long kaleko and lukluk, kaikai and drink, olketa difren kaen hapitaem, and staka nara samting. Olketa wea advertisem samting iusim olketa pipol wea luk naes for mekem iumi tingse iumi shud baem staka samting wea iumi no really needim. Hem isi tumas for Satan trikim iumi and mekem iumi for no duim samting wea Jehovah laekem. w18.04 10 ¶7-8