February

Long Bible, disfala word “Justice,” hem minim wei for duim wanem God sei hem stret and for no favorim eniwan. Tingim hao samting wea Jesus duim showimaot tingting bilong hem abaotem Justice. Long datfala taem, olketa bigman bilong Jew heitim olketa wea no Jew, olketa no respectim olketa woman, and ting daonem olketa Jew wea no skul gud. Nomata olsem, Jesus no favorim eniwan and hem treatim gud evriwan. Hem acceptim olketa wea no Jew wea showimaot faith long hem. (Matt. 8:5-10, 13) Hem preach long evri pipol, nomata olketa rich or poor. (Matt. 11:5; Luke 19:2, 9) Hem no tok daonem olketa woman or raf taem hem deal witim olketa. Bat hem showimaot respect and kaen, nomata sapos olketa woman hia kaen type woman wea pipol barava ting daonem. (Luke 7:37-39, 44-50) Iumi savve followim example bilong Jesus taem iumi no favorim eniwan and preach long evriwan wea willing for lisin, nomata olketa rich or poor, or nomata wanem nao religion bilong olketa. Olketa brata followim example bilong Jesus taem olketa deal witim olketa woman long wei wea showimaot respect. w19.05 2 ¶1; 5 ¶15-17

Olketa faithful elder distaem tu savve tok kaen taem olketa iusim Bible for comfortim olketa wea needim help. Waswe, olketa elder nomoa savve comfortim olketa victim bilong abuse? Nomoa. Iumi evriwan garem disfala responsibility for comfortim each other. (1 Thess. 4:18) Olketa sista wea mature long spiritual wei nao savve barava fit for encouragem olketa sista wea needim comfort. Datwan hem tru, dastawe Jehovah seleva hem sei hem olsem wanfala mami wea laek for comfortim son bilong hem. (Aesaea 66:13) Bible storyim samfala example bilong olketa woman wea comfortim olketa wea kasem hard taem. (Job 42:11) Tingim hao Jehovah mas barava hapi taem hem lukim olketa faithful sista comfortim olketa nara sista wea deal witim feeling for barava sorre. Maet samfala taem wan or tufala elder savve askem wanfala mature sista for helpem sista wea safa from kaen feeling olsem. Hem tru, iumi mas careful for no poke nose or ask abaotem olketa samting wea brata and sista bilong iumi no laek for storyim.—1 Thess. 4:11. w19.05 16-17 ¶10-12

Bifor olketa elder arrangem wanfala judicial komiti, why nao olketa elder mas garem tufala witness? Diswan followim haefala standard bilong Bible saed long justice. Sapos man wea sin no talemaot rong wea hem duim, olketa elder mas garem tufala witness bifor olketa savve arrangem wanfala judicial komiti. (Diutronomi 19:15; 1 Tim. 5:19) Sapos man wea olketa accusim hem denyim samting wea happen, olketa elder bae askem olketa wea witnessim datfala rong for storyim saed bilong olketa. Sapos tufala pipol nao lukim samting wea happen, olketa elder garem strong pruv for arrangem wanfala judicial komiti. Tufala witness hia, maet hem datfala pikinini wea olketa abusim and samwan wea savve pruvim datfala samting wea happen. Sapos man wea reportim datfala child sexual abuse hem no garem mek-tu witness, datwan no minim samting wea hem talem hem no tru. Nomata sapos olketa elder no garem mek-tu witness for pruvim wanem hem happen, olketa luksavve maet wanfala serious sin hem happen wea barava mekem olketa narawan safa. Olketa elder bae gohed for comfortim and sapotim olketa wea maet safa from samting wea happen. And for protectim kongregeson, olketa elder bae evritaem lukluk long datfala man wea olketa accusim nogud hem bae trae for duim moa child abuse long future.—Acts 20:28. w19.05 11 ¶15-16

Hem barava important for lanem olketa pikinini for savve hao for study. Olketa pikinini need for lane hao for prepare for olketa meeting and hao for duim research abaotem wanfala problem or kwestin wea kamap long skul. (Heb. 5:14) Sapos famili spendem taem for study long haos, datwan bae helpem olketa pikinini for interest long olketa information wea kamap long olketa meeting, assembly, and olketa convention. Parents need for luksavve hao long nao study bae gohed each taem bikos datwan hem depend long age and wei bilong pikinini. Olketa Bible student bilong iumi need for lane hao for study. Taem olketa just start for study, iumi savve hapi for lukim taem olketa andalaenem olketa ansa for study bilong olketa and for olketa meeting. Bat iumi mas teachim olketa for savve hao for duim research and hao for olketa seleva duim deep study. Taem iumi duim olsem, nomata sapos eni problem kamap olketa bae savve finis hao for kasem ansa for problem bilong olketa bikos olketa savve hao for duim research long olketa pablikeson bilong iumi. w19.05 26 ¶2; 28 ¶10-11

Satan barava disaed strong for changem tingting blo iumi. Hem iusim evri kaen teaching and idea for againstim gudfala tingting wea iumi kasem from Bible. Satan gohed for askem datfala sem kwestin wea hem askem lo Eve insaed garden blo Eden taem hem sei: “Waswe, hem tru wea God hemi bin talem . . . ?” (Jenesis 3:1) From Satan kontrolem disfala world, iumi savve herem olketa kaen kwestin wea savve mekem iumi daotem wanem iumi bilivim, olsem: ‘Waswe, hem tru God no acceptim wei wea man maritim man? Waswe, hem tru God no laekem iu for celebratem Christmas and birthday? Waswe, hem tru God expectim iu for no acceptim wei for tekem blood transfusion? Waswe, hem tru God wea lovem iu hem expectim iu for no associate witim olketa wea iu lovem wea disfellowship?’ Iumi need for barava bilivim wanem Bible hem teachim. Sapos iumi no faendem ansa for olketa kwestin wea iumi garem abaotem biliv blo iumi, gogo bae iumi start for daotem wanem iumi bilivim. Gogo olketa daot hia savve spoelem tingting blo iumi, and faith blo iumi bae wikdaon. w19.06 12-13 ¶15-17

Jehovah lovem iumi tumas. (John 3:16) Iumi laek for followim example blo hem. Dastawe, iumi trae for showimaot iumi “sorre witim olketa wea safa, lovem olketa brata, tingim and kaen long narawan,” especially olketa wea iumi “garem sem biliv.” (Gal. 6:10) Taem wanfala brata or sista insaed spiritual famili blo iumi hem feisim eni challenge wea mekem hem stress, iumi laek for helpem hem. Hao nao iumi savve comfortim samwan wea marit partner blo hem dae? First samting iumi shud duim, hem for story lo hem, nomata maet datwan no isi or iumi no savve wanem for talem. Paula wea hasband blo hem seknomoa hem dae, hem sei: “Mi luksavve dae hem samting wea pipol faendem hem hard for deal witim. Maet olketa wari nogud olketa talem eni toktok wea no fitim. Bat, taem man no talem eni toktok datwan nao hem worse.” Samwan wea sorre hem no expectim staka toktok from iumi. Paula hem sei moa: “Mi barava tinghae taem olketa fren talem olketa smol toktok olsem, ‘Sorre tumas nao.’” w19.06 20 ¶1; 23 ¶14

Sapos olketa banim waka blo iumi, olketa elder bae arrangem olketa meeting lo wei wea pipol bae no luksavve. Olketa maet sei for meet lo olketa smol grup, and maet evritaem olketa bae changem taem for meeting and ples for hipap. Hao for duim preaching waka bae depend lo ples wea iumi stap. Bat bikos iumi lovem Jehovah and laek for talem narawan abaotem Kingdom blo hem, iumi bae faendem eni wei for iumi mas preach. (Luke 8:1) Wanfala woman for raetem history, Emily Baran, storyim olketa Jehovah’s Witness lo taem blo Soviet Union bifor, hem sei: “Taem gavman talem olketa Jehovah’s Witness for no preach, olketa Witness iusim eni chance for story lo neiba, pipol lo waka ples, and olketa fren. From datwan olketa putim olketa lo prison, bat nomata olsem olketa gohed preach lo olketa nara prisoner.” Nomata gavman banim waka blo olketa brata lo there, olketa no enitaem stop for preach. Hem gud for iu followim example blo olketa tu! w19.07 11 ¶12-13

Hao nao iumi savve helpem pipol wea no interest lo religion for lane for lovem God and kamap disaepol blo Christ? Iumi mas luksavve hao pipol ting lo message blo iumi, hem maet depend lo wea olketa kam from. Olsem example, tingting blo pipol from Europe hem difren from olketa lo Asia. Why? Lo Europe, pipol savve lelebet abaotem Bible and hao God creatim evri samting. Bat lo Asia, big haf lo pipol no savve eni samting abaotem Bible or maet olketa savve lelebet nomoa, and maet olketa no bilivim eni Creator stap. So iumi mas garem positive tingting. Evri year, staka pipol wea no interest lo religion olketa kamap Jehovah’s Witness. Bifor olketa kamap Witness, samfala lo olketa garem finis olketa gudfala wei bat olketa no laekem wei wea olketa religion savve laea tumas. Olketa narawan, no garem gudfala wei and olketa mas lusim olketa rabis wei blo olketa. Iumi barava sure Jehovah bae helpem iumi for faendem “evriwan wea showimaot olketa laekem laef olowe.”—Acts 13:48; 1 Tim. 2:3, 4. w19.07 20-21 ¶3-4

Nomata iumi hope for laef olowe lo heven or lo paradaes lo earth, iumi mas gohed waka hard for kasem datfala goal. Nomata wanem nao iumi feisim, iumi mas no tingim olketa samting lo bihaen, and iumi shud no letem eni samting stopem iumi for gohed for servem Jehovah. (Phil. 3:16) Maet olketa samting wea iumi expectim luk olsem hem delay, or strong blo iumi gogo daon. Iumi maet feisim olketa hard taem and persecution for staka year. Nomata wanem iumi feisim, iumi “mas no wari abaotem eni samting.” Bat iu need for barava askem help blo God and thankiu lo hem, and hem bae givim iu peace wea winim wanem man savve tingim. (Phil. 4:6, 7) Olsem man wea ran hem barava traem best for finisim last part blo datfala resis, iumi mas barava tingting strong for kasem datfala goal for finisim resis for laef. Nomata wanem iumi feisim lo laef and witim strong wea iumi garem, iumi mas gohed traem best and waka hard for kasem olketa gud samting wea stap front lo iumi. w19.08 7 ¶16-17

Samfala taem maet hem hard for savve wanem for talem long samwan wea barava sorre from hem lusim samwan long dae. Nomata olsem, samfala taem tias bilong iumi hem winim eni toktok wea iumi maet talem. Taem fren bilong Jesus, Lazarus hem dae, Mary, Martha, and olketa narawan krae for brata and fren bilong olketa wea olketa lovem. Fofala day bihaen, taem Jesus arrive, hem krae tu nomata hem savve hem bae resurrectim Lazarus. (John 11:17, 33-35) Wei wea Jesus krae showimaot feeling bilong Dadi bilong hem. And tu, datwan pruvim Jesus lovem datfala famili, and iumi sure datwan comfortim Mary and Martha. Long sem wei, taem olketa brata luksavve iumi lovem and tingim olketa, bae olketa no feel olsem olketa stap seleva, bat olketa garem olketa fren wea kea and sapotim olketa. Samfala taem hem gud for iumi lisin gud long olketa. Letem brata bilong iu for storyim feeling bilong hem, and no feel nogud sapos hem talem toktok wea no fitim. (Job 6:2, 3) Maet hem stress tu bikos long hard taem wea hem kasem from olketa relative wea no Witness. So prea witim hem. Askem Jehovah for givim hem strong and gudfala tingting.—Sams 65:2. w19.04 18-19 ¶18-19

Nomata iumi waka lo field or Bethel, iumi savve lovem tumas pipol, and maet ples wea iumi stap. Sapos iumi mas lusim assignment blo iumi, bae iumi sorre tumas. Iumi savve missim olketa brata and sista and wari abaotem olketa, especially sapos iumi lusim ples bikos lo persecutim. (Matt. 10:23; 2 Cor. 11:28, 29) And tu, taem iumi kasem wanfala niu assignment or iumi kasem assignment for go hom, staka taem hem no isi for change fitim culture. Samfala wea mas change assignment, maet seke nomoa olketa feisim problem saed lo selen. Diswan maet mekem olketa no savve wanem for duim, olketa maet wari, and wikdaon. Wanem nao savve help? Stap klosap lo Jehovah. (Jas. 4:8) Hao nao iumi savve duim datwan? Taem iumi trustim dat hem savve herem olketa prea blo iumi. (Sams 65:2) Jehovah savve duim olketa samting wea “barava winim nao wanem iumi askem or tingim.” (Eph. 3:20) Hem no just givim nomoa samting wea iumi prea for hem. Maet hem bae duim samting winim wanem iumi expectim for stretem olketa problem blo iumi. w19.08 21 ¶5-6

Samfala pipol tingse “Armageddon” hem wanfala nuclear war or wanfala natural disaster wea bae distroem world. Bat wanem Bible talem abaotem Armageddon, hem samting for hapi lo hem, hem wanfala gud nius! (Rev. 1:3) War blo Armageddon hem no for spoelem olketa man bat for sevem olketa! Hao nao olsem? Bikos hem finisim rul blo olketa man. Datfala war bae distroem nogud pipol and sevem olketa wea raeteous. And Armageddon bae sevem olketa pipol bikos hem protectim earth for pipol no spoelem. (Rev. 11:18) Datfala word “Armageddon” hem kamap wanfala taem nomoa insaed Bible, and hem kam from wanfala Hebrew toktok wea minim Maunten blo Megiddo. (Rev. 16:16) Megiddo hem wanfala city lo Israel bifor. (Josua 17:11) Bat, Armageddon hem no wanfala ples lo earth. Bible iusim datfala toktok Armageddon for storyim taem wea “olketa king evriwea long earth” bae hipap tugeta for againstim Jehovah.—Rev. 16:14. w19.09 8 ¶1-3

Datfala woman hem barava needim help. Hem go lo staka doctor and hem hope olketa bae helpem hem for kamap gud moa. Bat bihaen 12-fala year, hem still no kasem eni help for sik blo hem. Lo Law blo Moses, datfala woman hem no klin. (Levitikas 15:25) Datfala woman herem hao Jesus savve healim olketa wea safa, so hem go for faendem hem. Taem hem lukim Jesus, hem tasim end lo kaleko blo Jesus, and semtaem nomoa sik blo hem finis nao! Jesus no just healim nomoa datfala sik, bat hao hem treatim datfala woman mekem woman hia for feel olsem hem kasem bak love and respect. Olsem example, taem hem story lo hem, Jesus kolem hem “dota” wea datwan showimaot respect. Datwan mas barava strongim datfala woman! (Luke 8:44-48) Tingim, datfala woman nao go lo Jesus, hem nao duim samting. Hem semsem for iumi distaem tu, iumi nao mas duim samting for “kam long” Jesus. Distaem, Jesus no duim mirakol for healim olketa wea “kam long” hem. Nomata olsem, hem gohed for invaetem iumi taem hem sei: “Kam long mi, . . . mekem mi savve strongim iufala.”—Matt. 11:28. w19.09 20 ¶2-3

Profet Zechariah profesi abaotem sem samting taem hem raet olsem: ‘Long datfala taem, tenfala strensa wea langguis blong olketa hemi deferen, bae i holem kaleko blong wanfala Jiu, an tok olsem long hem, Plis yu letem mifala fo go wetem yufala long Jerusalem, bikos mifala herem dat God hemi stap wetem yufala.’ (Sekaraea 8:23) Olketa Jehovah’s Witness luksavve for hipimap pipol from evri difren languis, hem minim olketa mas preachim disfala gud nius lo staka languis. Distaem winim eni nara taem lo history, iumi duim transleison lo staka handred languis. Wei wea Jehovah hipimap datfala big crowd from evri nation hem wanfala mirakol wea happen lo taem blo iumi. Bikos iumi kasem spiritual kaikai lo staka didifren languis datwan mekem disfala big crowd wan mind for worshipim Jehovah. And tu, evriwan savve lo pipol blo Jehovah bikos lo wei wea olketa strong for gohed preach and love wea olketa showimaot lo each other. Datwan hem barava strongim faith blo iumi!—Matt. 24:14; John 13:35. w19.09 30 ¶16-17

Taem blo bigfala trabol, pipol bae seke tumas taem olketa lukim evriting wea bifor olketa tingse bae stap for olowe, hem start for brekdaon. Olketa bae wari tumas and fraet bikos laef blo olketa hem stap lo danger lo disfala barava nogud taem lo history blo olketa man. (Sefenaea 1:14, 15) Lo datfala taem, luk olsem laef bae barava hard go moa for evriwan, nomata for pipol blo Jehovah tu. From iumi no part blo world, maet bae iumi feisim olketa hard samting. Maet iumi bae no garem tu olketa samting wea iumi needim. “Datfala wakaman wea faithful and wise” redyim iumi for gohed faithful lo taem blo bigfala trabol. (Matt. 24:45) Olketa duim diswan lo staka wei, wanfala example nao hem olketa convention program blo 2016, 2017, and 2018. Olketa program hia encouragem iumi for strongim olketa fasin wea iumi need for garem taem day blo Jehovah kakam klosap. w19.10 14 ¶2; 16 ¶10; 17 ¶12

Taem iumi swallowim kaikai semtaem nomoa body duim waka blo hem and gogo olketa gud samting insaed lo datfala kaikai bae helpem body blo iumi. Wanfala gud kaikai savve mekem iumi healthy, nogud kaikai bae mekem iumi for no healthy. Iumi bae no stretawe luksavve hao datfala kaikai affectim iumi, bat gogo bae iumi luksavve lo datwan bihaen. Lo sem wei, taem iumi chusim entertainment, iumi savve chusim wanem nao iumi putim lo mind blo iumi. Bihaen datwan, mind hem duim waka blo hem and datwan hem affectim tingting and feeling blo iumi. Gudfala entertainment bae helpem iumi, nogud entertainment savve spoelem iumi. (Jas. 1:14, 15) Olketa nogud samting wea kamaot from nogud entertainment hem bae no showaot stretawe, bat gogo bae hem showaot. Dastawe, Bible hem warnim iumi olsem: “Eni samting wea [man] plantim, datwan nao bae hem harvestim. Man wea duim nogud samting wea body laekem bae hem kasem nogud samting from datwan.” (Gal. 6:7, 8) Hem barava important for iumi rejectim evri entertainment wea mekhae lo olketa samting wea Jehovah heitim!—Sams 97:10. w19.10 30 ¶12-14

Jehovah pruvim love bilong hem taem hem givim Son bilong hem olsem ransom for sevem iumi. (John 3:16) Hao nao iumi savve showimaot love olsem Jehovah? Iumi ting long olketa brata and sista olsem olketa important and spesol, and iumi hapi for welkamim bak eni sheepsheep wea lus and wea kam bak long Jehovah. (Sams 119:176; Luke 15:7, 10) Iumi showimaot klia iumi lovem olketa brata and sista, taem iumi iusim taem and strong for helpem olketa, especially long taem wea olketa needim help. (1 John 3:17) Jesus komandim olketa disaepol for lovem each other long sem wei olsem hem lovem olketa. (John 13:34,35) Komand bilong Jesus hem niu bikos anda long Law wea God givim olketa Israelite olketa no need for showimaot diskaen love. Bat disfala niu komand hem sei: Iu mas lovem olketa brata and sista long sem wei olsem Jesus lovem iu. Diswan minim for garem love wea mekem man willing for givim laef bilong hem for narawan. Iumi mas lovem olketa brata and sista winim wei wea iumi lovem iumiseleva. Iumi mas barava lovem olketa gogo iumi willing for dae for olketa, olsem Jesus hem duim for iumi. w19.05 4 ¶11-13

For kasem holy spirit, iumi mas barava prea strong. (Luke 11:13) Tokpiksa blo Jesus lo Luke 11:5-9, helpem iumi tu for luksavve why Jehovah bae givim iumi holy spirit. Lo datfala tokpiksa, man hia laek for lukaftarem gud visitor blo hem. Nomata hem midol naet and hem no garem eni kaikai for givim lo datfala visitor, hem laek for mas givim kaikai lo hem. Jesus sei datfala neiba givim bred lo fren blo hem bikos datfala fren no shame for gohed ask. Wanem nao point blo Jesus? Sapos wanfala man wea no perfect hem willing for helpem fren blo hem wea barava askem hem samting, for sure Dadi blo iumi lo heven wea kaen tumas bae helpem olketa wea gohed for askem hem for holy spirit! So iumi barava trustim hao Jehovah bae ansarem iumi taem iumi askem hem for holy spirit. (Sams 10:17; 66:19) Iumi savve sure dat nomata Satan traem best for winim iumi hem bae no win. w19.11 13 ¶17-19

Jesus savve hao samfala taem hem and olketa aposol blo hem needim taem for rest. Bat, staka pipol lo bifor and distaem, olketa olsem datfala rich man lo tokpiksa blo Jesus. Datfala man talem olsem lo hemseleva: “Bae mi rest, kaikai, drink, and hapi nomoa.” (Luke 12:19; 2 Tim. 3:4) Hem ting lo wei for rest and hapi olsem main samting lo laef blo hem. Bat Jesus and olketa aposol blo hem barava difren, olketa no ting dat wei for mekem olketa seleva hapi nao main samting lo laef. Iumi trae for followim example blo Jesus distaem tu. Taem iumi no waka iumi no just rest nomoa, bat iumi iusim datfala taem for preach and for attendim olketa meeting. Iumi ting lo disfala waka for teachim pipol for kamap disaepol and wei for attendim meeting, olsem hem important tumas, dastawe iumi duim best blo iumi for evritaem duim olketa samting hia. (Heb. 10:24, 25) Nomata sapos iumi go holiday lo nara ples, iumi evritaem attendim olketa meeting, and iumi lukaotem olketa chance for story lo eniwan wea iumi meetim.—2 Tim. 4:2. w19.12 7 ¶16-17

Jehovah letem iumi for mekem olketa disison lo laef. Hem teachim iumi hao for chus gud, and hem savve helpem iumi taem iumi mekem olketa disison wea hem hapi lo hem. (Sams 119:173) Taem iumi followim wisdom wea stap insaed Bible, bae iumi mekem olketa gudfala disison. (Heb. 5:14) Nomata sapos iumi mekem wise disison, samfala taem maet iumi stragol for finisim wanem iumi startim. Tingim samfala example hia: Wanfala young brata disaed for readim full Bible. For samfala week hem barava duim gud, bat gogo hem stop. Wanfala sista disaed for regular pioneer bat hem gohed for muvim nomoa taem wea hem ting for start duim datwan. Lo wanfala kongregeson, body of elders agree tugeta for duim moa samting saed lo shepherding, bat nomata bihaen samfala month olketa still no start yet. Olketa situation hia hem difren, bat wanfala samting nao hem semsem. Olketa no duim wanem olketa disaedem. w19.11 26 ¶1-2

Jesus sei taem blo iumi hem olsem “taem bilong Noah,” and iumi lukim klia dat iumi stap lo taem wea “evri samting hem hard tumas.” (Matt. 24:37; 2 Tim. 3:1) From datwan, samfala couple disaed for weit firstaem mekem olketa savve garem moa taem for duim waka blo Jehovah. Taem wanfala couple ting raonem sapos tufala bae garem pikinini and haomas pikinini for garem, hem wise for tufala ting raonem firstaem expense blo datwan. (Luke 14:28, 29) Olketa wea garem pikinini finis savve hao wei for lukaftarem pikinini hem no kostim selen nomoa bat hem tekem taem and strong blo olketa tu. So hem important for wanfala couple for ting raonem olketa kwestin olsem: ‘Waswe, bae iumi tufala evriwan mas waka for provaedem need blo famili? Waswe, iumi tufala agree lo wanem nao need blo famili? Sapos iumi tufala evriwan bae waka, hu nao bae lukaftarem olketa pikinini? Teaching blo hu nao bae affectim datfala pikinini?’ Taem wanfala couple story gud abaotem olketa kwestin hia, olketa followim toktok lo text for tuday. w19.12 23-24 ¶6-7

Staka taem aposol Paul feisim samting wea mekem laef blo hem stap lo danger. (2 Cor. 11:23-28) And tu, hem mas deal witim “wanfala nila wea stap long body,” luk olsem diswan hem problem saed lo health blo hem. (2 Cor. 12:7) And Paul mas deal witim wei for feel nogud from Demas wea tufala bin waka tugeta lusim hem “bikos hem lovem tumas disfala world.” (2 Tim. 4:10) Nomata Paul hem anointed Christian wea no fraet and evritaem willing for helpem narawan, samfala taem hem feel discourage tu. (Rome 9:1, 2) Paul kasem comfort and sapot wea hem needim. Lo wanem wei? Jehovah iusim holy spirit blo hem for strongim Paul. (2 Cor. 4:7; Phil. 4:13) Jehovah iusim tu olketa nara Christian for comfortim hem. Paul sei samfala wea waka witim hem ‘barava comfortim hem.’ (Col. 4:11) Hem talem nem blo samfala lo olketa, olsem Aristarchus, Tychicus, and Mark. Olketa strongim Paul and helpem hem for no givap. w20.01 8 ¶2-3

Jesus showim hao hem hard for barava explainim lo samwan wea no anointed, feeling blo man wea “born moa” or wea “born long holy spirit.” (John 3:3-8.) Wanem change nao kamap lo tingting blo olketa Christian wea kasem anointing? Bifor Jehovah anointim olketa Christian hia, olketa garem strongfala hope for laef olowe lo earth. Olketa barava luk forward lo taem wea Jehovah bae finisim evri nogud samting and mekem disfala earth for kamap paradaes. Maet olketa tingim go taem wea olketa bae welkamim bak wanfala famili member or fren wea dae. Bat bihaen olketa kasem anointing, tingting blo olketa hem change. Why nao olsem? Olketa no ting daonem datfala hope for laef olowe lo earth. Olketa no changem tingting blo olketa bikos olketa stress or sorre. Olketa no seknomoa tingse for laef olowe lo earth bae boring. Bat, Jehovah nao iusim holy spirit for changem tingting and hope wea olketa garem. w20.01 22-23 ¶9-11

Anda long datfala Law, olketa judge and elder deal witim olketa samting saed long worship, and tu, olketa civil and criminal case. Bat anda long law bilong Christ, waka bilong olketa elder hem for deal nomoa witim hao datfala sin hem affectim worship bilong Jehovah. (Gal. 6:2) Olketa elder luksavve hao God givim responsibility long gavman for deal witim olketa criminal case and olketa civil case. Datwan minim gavman garem paoa for panisim man wea duim rong, olsem for askem fine or for putim hem long prison. (Rome 13:2-4) Hao nao olketa elder savve deal witim wanfala serious sin? Olketa iusim Bible for helpem olketa for lukluk gud long samting wea happen and for mekem eni disison. Olketa mas no forgetim hao love nao hem faondeson bilong law bilong Christ. Love muvim olketa elder for tingim, wanem olketa need for duim for helpem eniwan long kongregeson wea safa bikos samwan duim wanfala sin againstim hem. Then taem olketa deal witim datfala brata or sista wea duim datfala sin, love bae muvim olketa elder for tingim tufala kwestin hia: Waswe, hem repent? Waswe, iumi savve helpem hem for fren bak moa witim Jehovah? w19.05 7 ¶23-24

Jesus luksavve dat Dadi blo hem nao givim hem laef and lukaftarem hem, dastawe hem talem toktok lo text for tuday. Jesus barava trustim Dadi blo hem, and Jehovah provaedem olketa physical need blo hem. Main important samting, Jehovah provaedem spiritual need blo hem. (Matt. 4:4) And tu, Jehovah provaedem olketa spiritual need blo iumi. Thru lo Bible, Jehovah teachim iumi truth abaotem hemseleva, olketa plan blo hem, why iumi laef, and wanem bae happen lo future. Hem showimaot hem tingim iumi wanwan taem hem iusim parents blo iumi or olketa narawan for teachim iumi for savve lo hem. And iumi gohed for kasem help from olketa kaenfala elder and olketa nara mature brata and sista. And tu, Jehovah givim iumi instruction lo olketa meeting taem iumi lane abaotem hem witim olketa brata and sista blo iumi. Lo olketa wei olsem, Jehovah showim lo iumi hao hem wanfala Dadi wea interest lo iumi evriwan.—Sams 32:8. w20.02 3 ¶8; 5 ¶13

Peace no savve grow sapos wei for jealous stap. Iumi need for aotem feeling for jealous from heart blo iumiseleva and no duim samting wea mekem narawan for jealous. Wanem nao iumi savve duim for helpem olketa narawan for faet againstim feeling for jealous, and wanem nao iumi savve duim for keepim peace? Tingting and wanem iumi duim savve barava affectim olketa narawan. World laekem iumi for “show-off” witim wanem iumi garem. (1 John 2:16) Bat datwan savve mekem feeling for jealous kamap. Iumi savve helpem narawan for no jealous taem iumi no story tumas abaotem olketa samting wea iumi garem or plan for baem. Nara wei wea iumi savve helpem olketa narawan for no jealous hem for hambol nomata iumi kasem eni privilege lo kongregeson. Sapos iumi story tumas abaotem wanem iumi duim, iumi mekem hem isi for narawan garem feeling for jealous. Bat lo narasaed, taem iumi showimaot interest lo narawan and tinghae lo gud samting wea olketa duim, iumi helpem olketa for satisfae and iumi keepim peace and wan mind insaed kongregeson. w20.02 18 ¶15-16

Lane abaotem Jehovah thru lo creation blo hem. (Rev. 4:11) Ting raonem wisdom blo Jehovah wea iumi savve lukim lo hao hem designim olketa plant and animal. Lanem samfala samting abaotem hao Jehovah wakem body blo iumi lo nambawan wei. (Sams 139:14) And ting abaotem bigfala paoa wea Jehovah putim lo sun, wea datwan hem wanfala nomoa lo staka billion star. (Aesaea 40:26) Taem iu duim datwan, bae iu barava respectim Jehovah go moa. Bat, for savve Jehovah hem wise and garem bigfala paoa, hem just wanfala part nomoa lo faondeson blo wei wea iu fren witim hem. For garem strongfala love for Jehovah, iu need for savve lo moa samting abaotem hem. Iu need for barava sure dat Jehovah hem kea for iu. Hem gud for evritaem tingim dat “sapos yu lukaotem hem, bae yu save faendem hem.” (Fas Kronikols 28:9) Jehovah nao pullim iu kam lo hem. (Jer. 31:3, NW) Taem iu mekem grow wei for tinghae lo evri samting wea Jehovah duim for iu, datwan bae strongim go moa love blo iu for hem. w20.03 4 ¶6-7

Aposol Paul showimaot gudfala example long wei for mekem ministry kamap main samting long laef bilong hem. Long mek-tu missionary gogo bilong hem long Corinth, hem no garem inaf selen so hem mas spendem taem for wakem olketa tent. Hem duim datfala waka for sapotim hemseleva and no putim hevi long olketa brata and sista long Corinth taem hem duim waka for talemaot gud nius. (2 Cor. 11:7) Nomata Paul mas duim samfala waka for selen, hem gohed for keepim ministry olsem main samting and hem preach long evri Sabbath. Then long taem wea fitim, Paul hem givim moa taem bilong hem for duim preaching waka. “Hem barava busy nao for preachim message bilong God. Hem preach long olketa Jew for pruvim Jesus nao hem datfala Christ.” (Acts 18:3-5; 2 Cor. 11:9) Bihaen, taem hem stap long prison long Rome for tufala year, Paul preach long olketa wea visitim hem and hem savve raetem olketa leta. (Acts 28:16, 30, 31) Paul disaed strong for no letem eni samting kamap important winim ministry bilong hem. w19.04 4 ¶9