April

Aristarchus hem wanfala Christian from Thessalonica lo Macedonia, and hem wanfala fren wea barava faithful lo aposol Paul. Firstaem wea iumi read abaotem Aristarchus, hem taem Paul visitim Ephesus lo mek-thri missionary gogo blo hem. Taem Aristarchus gogo witim Paul, pipol kasholem hem. (Acts 19:29) Taem hem kamap free, hem no lusim Paul and lukaotem ples for hem stap sef, bat hem faithful for stap witim Paul. Samfala month bihaen, Aristarchus still gohed stap witim Paul lo Greece, nomata olketa enemy blo Paul laek for killim hem dae. (Acts 20:2-4) Lo samting olsem 58 C.E. taem Paul kamap prisoner and olketa sendem hem go lo Rome, Aristarchus go witim hem, and tufala evriwan lo datfala ship taem hem rek. (Acts 27:1, 2, 41) Taem olketa kasem Rome, luk olsem hem stap witim Paul lo prison for samfala taem. (Col. 4:10) Tru nao, Paul barava kasem encouragement and comfort from faithful fren olsem! Olsem Aristarchus, iumi savve kamap faithful fren taem iumi gohed stap witim olketa brata and sista blo iumi no lo olketa gud taem nomoa bat lo olketa hard taem tu. w20.01 9 ¶4-5

Samwan wea kamap anointed maet feel hem no fitim disfala spesol privilege. Nomata olsem, no enitaem hem bae daotem dat Jehovah chusim hem finis. Hem bae barava hapi and tinghae lo hope blo hem for stap lo heven. (1 Pet. 1:3, 4) So waswe, datwan minim olketa anointed wan laek for dae? Aposol Paul ansarem datfala kwestin. Hem comparem body blo man witim wanfala tent and hem sei: “Iumi wea stap long disfala tent iumi krae long heart and wari tumas, no bikos iumi laek for aotem disfala tent . . . bat bikos iumi laek for kasem datfala haos long heven, mekem body hem finis and iumi kasem laef olowe.” (2 Cor. 5:4) Olketa Christian hia olketa no tingse laef lo earth hem boring and olketa laek for dae kwiktaem nomoa. Bat, olketa enjoyim laef and laek for iusim each day for worshipim Jehovah witim famili and olketa fren blo olketa. Nomata olsem, lo evri samting wea olketa duim, olketa evritaem tingim datfala nambawan hope wea olketa garem for future.—1 Cor. 15:53; 2 Pet. 1:4; 1 John 3:2, 3. w20.01 23 ¶12-13

Olsem part lo training blo iumi, Dadi blo iumi wea lovem iumi hem bae disciplinem iumi lo taem wea iumi needim. Hem duim diswan lo staka wei. Olsem example, samting wea iumi readim lo Bible or wanem iumi herem lo meeting hem savve stretem iumi. Or maet olketa elder nao helpem iumi. Nomata hao nao iumi kasem discipline, love nao evritaem muvim Jehovah for duim datwan. (Jeremaea 30:11) Jehovah sapotim iumi taem iumi kasem test. Olsem wanfala dadi wea sapotim pikinini blo hem lo olketa hard taem, Dadi blo iumi lo heven strongim iumi taem iumi feisim olketa test. Hem iusim holy spirit blo hem for protectim iumi from eni samting wea savve spoelem spiritual saed blo iumi. (Luke 11:13) Jehovah protectim iumi tu taem iumi discourage or wari. Olsem example, hem givim iumi wanfala nambawan hope. Datfala hope for future helpem iumi for no givap lo olketa hard taem. Tingim diswan: Nomata wanem kaen nogud samting kasem iumi, Dadi blo iumi wea lovem iumi bae finisim evri samting wea mekem iumi safa. Eni test wea kasem iumi hem for lelebet taem nomoa, bat blessing wea Jehovah givim hem for olowe.—2 Cor. 4:16-18. w20.02 5 ¶14-15

Iumi savve win for faet againstim wei for jealous! Tingim example blo olketa brata blo Joseph. Staka year bihaen olketa treatim nogud Joseph, olketa meetim hem lo Egypt. Bifor Joseph talem olketa hu nao hem, hem testim olketa brata blo hem firstaem for faendaot sapos olketa changem nao wei blo olketa. Hem mekem kaikai for evriwan, and kaikai wea hem givim lo Benjamin hem big winim olketa narawan. (Jenesis 43:33, 34) Nomata hem duim olsem, hem no lukim eni saen wea showimaot olketa jealous lo Benjamin. Bat olketa barava tingim brata blo olketa and dadi blo olketa, Jacob. (Jenesis 44:30-34) From olketa brata blo Joseph no garem nao wei for jealous, datwan mekem olketa fit for mek peace moa insaed famili blo olketa. (Jenesis 45:4, 15) Lo sem wei tu, sapos iumi aotem eni feeling for jealous, datwan bae help for keepim peace insaed famili and kongregeson. Jehovah laekem iumi for faet againstim wei for jealous and traem best for garem peace. Sapos iumi gohed hambol, satisfae, and garem wei for tinghae, bae iumi no garem disfala wei for jealous. w20.02 19 ¶17-18

Wanfala wei for showimaot iu tinghae lo love blo Jehovah hem for story witim hem lo prea. Love blo iu for God bae grow taem iu talem hem olketa samting wea iu wari abaotem, and thankiu lo hem for evri samting wea hem duim for iu. And taem iu lukim hao Jehovah ansarem olketa prea blo iu, datwan bae strongim wei wea iu fren witim hem. Iu bae barava sure dat hem savve gud lo iu. Bat for kam klos lo Jehovah, iu need for minim gud tingting blo hem. And iu need for savve wanem hem laekem iu for duim. Only wei for iu kasem datfala savve hem nao for iu studyim Bible. Iu showimaot iu tinghae lo Bible taem iu readim evriday, taem iu prepare for study, and taem iu followim wanem iu lanem. (Sams 119:97, 99; John 17:17) Waswe, iu garem wanfala Bible reading schedule? Waswe, iu mek sure iu followim datfala schedule for readim Bible evriday? w20.03 5 ¶8-9

Sapos iu no fit for wakabaot farawe, maet iu savve sidaon long ples wea staka pipol go pas mekem iu preach long olketa. Or maet iu savve duim enitaem witnessing, raetem leta, or duim telephone witnessing. Staka pablisa wea olo or garem health problem savve hapi and satisfae taem olketa duim olketa nara wei hia for duim preaching waka. Nomata iu garem health problem, iu savve barava duim gud ministry bilong iu. Paul. sei: “Nomata wanem samting hem kasem mi, paoa wea mi kasem from God nao hem strongim mi for gohed.” (Phil. 4:13) Paul needim datfala paoa, bikos wanfala taem hem sik taem hem travel for duim missionary waka. Hem storyim long olketa long Galatia hao wei wea hem sik nao mekem hem garem chance for storyim gud nius long olketa. (Gal. 4:13) Long sem wei, taem iumi sik datwan givim iumi chance tu for storyim gud nius long olketa narawan, olsem olketa nurse, doctor, and olketa narawan wea lukaftarem iumi. Staka long olketa pipol hia go waka taem olketa pablisa savve go for preach long haos bilong olketa. w19.04 4-5 ¶10-11

Lo 2018, winim samting olsem 223,000 pablisa nao stap lo olketa kantri wea gavman banim or stopem samfala samting lo waka blo iumi. Iumi no sapraes lo diswan. Olketa tru Christian savve bae olketa kasem persecution. Nomata wea nao iumi stap, maet seknomoa gavman banim wei wea iumi worshipim God blo iumi Jehovah. Sapos gavman banim waka blo iumi, maet iumi tingse God no blessim iumi. Bat tingim diswan, persecution hem no minim Jehovah hem no hapi lo iumi. Wanfala example nao hem aposol Paul. Iumi savve God hapi lo Paul. Hem garem privilege for raetem 14-fala leta wea stap insaed Christian Greek Scripture and hem kamap wanfala aposol for preach lo pipol wea no Jew. Nomata olsem, hem feisim nogud persecution. (2 Cor. 11:23-27) From samting wea kasem aposol Paul, iumi lanem hao Jehovah savve letem olketa faithful pipol blo hem for kasem persecution. w19.07 8 ¶1, 3

Jehovah showimaot hem lovem and tingim iumi wea worshipim hem taem hem helpem iumi for againstim olketa enemy bilong iumi. Main enemy bilong iumi nao hem Satan and olketa demon. Jehovah warnim iumi abaotem olketa enemy hia, and hem givim iumi wanem iumi needim for againstim olketa. (Eph. 6:10-13) Taem iumi acceptim help from Jehovah and barava trustim hem, iumi savve win for againstim Devil. Iumi savve garem sem trust olsem aposol Paul wea sei: “Sapos God hem saedem iumi, no eniwan savve againstim iumi?” (Rome 8:31) Iumi olketa tru Christian no laek for interest tumas long Satan and olketa demon. Main interest bilong iumi hem for lane abaotem Jehovah and for worshipim hem. (Sams 25:5) Nomata olsem, iumi need for savve abaotem samfala samting wea Satan duim. Why nao olsem? For mekem Satan no savve winim iumi.—2 Cor. 2:11. w19.04 20 ¶1-2

Taem iumi deal witim samwan wea garem hevi, waswe, iumi lisin gud taem olketa story? Datwan no minim iumi stap kwaet nomoa and no talem eni samting. Taem iumi lisin long wanfala brata or sista, hao nao iumi savve showimaot love and tingim feeling bilong hem? Samfala taem, nomata tu-thri toktok nomoa bae showimaot iumi tingim feeling bilong olketa. Maet iu savve sei: “Sorre for herem samting olsem hem kasem iu! Maet iu savve askem tu samfala kwestin for mek sure iu minim gud wanem nao fren bilong iu storyim. Iu maet ask olsem, “Mi laek for savve moa abaotem wanem iu storyim.” Or, “Mi tingse wanem iu storyim hem olsem . . . Waswe, hem nao wanem iu trae for talem mi?” Taem iumi talem olketa toktok olsem, iumi showimaot iumi barava lisin gud and trae for minim samting wea hem talem. (1 Cor. 13:4, 7) Bat, iumi mas careful for “no kwiktaem for toktok.” Iumi mas no katem story bilong hem for givim hem advaes or for stretem tingting bilong hem. And iumi mas patient! Winim wei for trae stretem datfala problem, iumi savve showimaot iumi tingim feeling and lovem olketa.—1 Pet. 3:8. w19.05 17-18 ¶15-17

Insaed famili, hasband mas lovem waef bilong hem ‘olsem wei wea Christ lovem kongregeson.’ (Eph. 5:28, 29) Hasband mas showimaot sem kaen love olsem Jesus long wei for willing for tingim firstaem wanem waef laekem or needim winim for tingim nomoa wanem hemseleva laekem. Samfala man faendem hem hard for showimaot kaen love olsem, maet bikos olketa growap midolwan pipol wea no tinghae long wei for lovem and treatim gud narawan. Maet hem no isi for olketa lusim olketa nogud wei wea olketa growap witim, bat for olketa obeyim law bilong Christ, olketa mas change. Hasband wea garem kaen love wea Christ showim, bae kasem respect from waef. Dadi wea lovem olketa pikinini bae no talem or duim samting wea bae spoelem olketa. (Eph. 4:31) Bat, bae hem talem olketa pikinini bilong hem hao hem lovem and hem tinghae long olketa, datwan mekem olketa for feel sef. Olketa pikinini bae lovem and trustim kaen dadi olsem. w19.05 6 ¶21

Waswe, Mary tingse toktok bilong Gabriel minim Jesus bae changem King Herod or bae hem kamap wanfala ruler long Israel? Sapos Jesus kamap king, Mary bae kamap wanfala important woman bikos hem mami bilong king and famili bilong hem bae stap long haos bilong king. No enitaem iumi readim hao Mary hem ask for kasem eni position long Kingdom. Mary hem barava hambol woman! Iumi mas tingim, main goal bilong iumi taem iumi studyim Bible and olketa pablikeson bilong iumi hem for fren gud witim Jehovah. And tu, taem iumi study, iumi laek for luksavve iumi wanem kaen man, and olketa wanem kaen wei nao iumi need for changem mekem God hapi long iumi. (Jas. 1:22-25; 4:8) Long each taem wea iumi redi for study, iumi shud askem Jehovah for givim kam holy spirit bilong hem. Iumi shud askem hem for helpem iumi for kasem gud samting from wanem iumi studyim and for luksavve olketa wanem samting nao iumi shud changem. w19.05 31 ¶18-19

Samfala taem iumi mas deal witim tu-thri problem lo semtaem. Tingim tufala example hia. Wanfala brata wea nem blo John, hem safa from wanfala big sik wea affectim full body blo hem, and tu, hem barava sorre tumas bikos waef blo hem wea tufala marit for 19 year lusim hem. And then, tufala gele blo hem stop for worshipim Jehovah. Nara example, hem Bob and Linda, wea feisim olketa nara kaen problem. Tufala evriwan no garem waka, and from tufala no garem selen, tufala no garem ples for stap. And then lo semtaem, olketa doctor talem Linda hao hem garem sik lo heart wea maet savve kosim hem for dae, and tu wanfala nara sik start for spoelem immune system lo body blo hem. Iumi sure Jehovah, God wea wakem iumi and wea lovem iumi, hem minim hao stress savve affectim iumi. And hem laek for helpem iumi for deal witim olketa challenge wea iumi feisim. (Phil. 4:6, 7) Bible garem staka example wea storyim olketa challenge wea pipol blo hem feisim. Bible showimaot hao Jehovah savve helpem olketa for deal witim olketa problem wea savve kosim stress. w19.06 14 ¶2-3

Taem iumi duim lelebet samting for showimaot iumi kaen lo samwan wea no garem nao marit partner, bae hem luksavve iumi lovem hem. From distaem hem stap seleva, hem barava needim olketa gudfala fren. Wanem nao iu savve duim for showimaot iu gud fren blo hem? Iu savve invaetem hem for kam kaikai lo haos. And iu savve spendem taem witim hem for duim samfala samting and for waka tugeta lo ministry. Nara samting wea iu savve duim, hem for invaetem hem samfala taem for joinim famili worship. Sapos iu duim olsem, Jehovah bae hapi bikos hem “kolsap long olketa pipol wea i sore tumas” and hem lukaftarem olketa widow.” (Sams 34:18; 68:5) Klosap nao, Kingdom blo God bae rulim earth and evri trabol wea kamap distaem bae finis nao. Iumi barava luk forward for datfala taem wea “evrisamting wea hemi hapen bifoa, bae pipol i fogetem finis nao.” (Aesaea 65:16, 17) Go kasem datfala taem, iumi mas gohed for sapotim each other and thru lo toktok blo iumi and wanem iumi duim, iumi showimaot iumi lovem evriwan insaed lo spiritual famili blo iumi.—1 Pet. 3:8. w19.06 25 ¶18-19

Lo 1963, datfala magasin The Watchtower hem sei: “Man wea barava savve gud lo God bae barava trustim hem lo taem blo test.” Datwan hem tru! For iumi no givap lo taem blo persecution, iumi mas lovem Jehovah and barava trustim hem. (Matt. 22:36-38; Jas. 5:11) Readim Bible evriday witim goal for strongim wei wea iu fren witim Jehovah. (Jas. 4:8) Taem iu gohed read, luk for olketa nambawan wei blo Jehovah. Taem iu readim toktok blo hem and samting wea hem duim, iu savve feelim love blo Jehovah and hao hem tingim iu. (Eksodas 34:6) Samfala faendem hem hard for bilivim hao God lovem olketa, bikos no eniwan showimaot love lo olketa. Sapos iu feel olsem tu, trae raetem daon olketa difren wei wea Jehovah showimaot mercy and kaen lo iu. (Sams 78:38,39; Rome 8:32) Taem iu tingim samting wea kasem iu and ting raonem wanem iu readim lo Bible, iu bae tingim staka samting wea Jehovah duim finis for iu. Sapos iu tinghae go moa lo olketa samting wea Jehovah duim for iu, datwan bae strongim go moa wei wea iu fren witim Jehovah.—Sams 116:1, 2. w19.07 2-3 ¶4-5

Jehovah no givim raet lo eniwan for mekem olketa disison for olketa narawan. Sapos samwan mekem olketa rul wea iumi no needim datwan bae no protectim olketa brata, bat hem olsem hem trae for bossim faith blo olketa. Satan bae no stop for trae for persecutim olketa faithful servant blo Jehovah. (1 Pet. 5:8; Rev. 2:10) Satan and olketa wea sapotim hem, bae traem best for banim worship blo Jehovah. Nomata olsem, iumi no garem eni reason for letem wei for fraet for mekem iumi stop for worshipim Jehovah. (Diutronomi 7:21) Jehovah stap witim iumi, and hem bae gohed for sapotim iumi nomata sapos olketa banim waka blo iumi. (Mektu Kronikols 32:7, 8) Iumi mas disaed strong for duim sem samting wea olketa brata blo iumi lo first century olketa duim, olketa talem disfala toktok lo olketa ruler lo datfala taem: “Hem saed bilong iufala sapos iufala tingse hem stret long tingting bilong God for mifala obeyim iufala and no obeyim God. Bat hard tumas for mifala no storyim olketa samting wea mifala lukim and herem.”—Acts 4:19, 20. w19.07 13 ¶18-20

Lo preaching, taem iumi meetim pipol, trae for luksavve hao nao laef blo pipol hem affectim hao olketa ting lo olketa samting. Paul hem growap witim olketa Jew. So for sure hem mas changem hao hem preach taem hem story lo olketa Gentile bikos olketa maet savve lelebet nomoa or olketa no savve eni samting abaotem Jehovah and olketa Scripture. For helpem iumi minim gud tingting and feeling blo pipol lo territory blo iumi, maet iumi need for duim samfala research. (1 Cor. 9:20-23) Goal blo iumi hem for ‘lukaotem olketa man wea fit.’ (Matt. 10:11) For duim datwan, iumi mas askem pipol for talem tingting blo olketa and then lisin gud. Wanfala brata lo England savve askem pipol abaotem hao man savve hapi lo marit, hao for teachim pikinini, or hao for deal witim wei wea pipol no followim justice. Bihaen hem herem wanem olketa talem, hem savve sei: “Hao nao tingting blo iu lo disfala advaes wea olketa raetem winim 2,000 year go finis?” Then hem no talem disfala word “Bible,” bat hem showim olketa scripture wea hem redyim finis insaed phone blo hem. w19.07 21-22 ¶7-8

Hao big nao shud love blo iumi for God? Jesus talem wanfala Pharisee: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” (Matt. 22:36, 37) Iumi no laekem love blo iumi for God for hafhaf. Bat, iumi laek for mekem datfala love grow and kamap strong each day. For iumi lovem God, iumi need for savve lo hem. Bible sei: “Man wea no showimaot love hem no savve long God bikos God hem love.” (1 John 4:8) Aposol Paul showimaot love blo iumi for God bae kamap moa strong taem iumi “garem stretfala savve and gudfala tingting.” (Phil. 1:9) Firstaem wea iumi studyim Bible, iumi start for lovem God bikos iumi start for savve abaotem olketa gudfala wei blo hem. Then taem iumi gohed lane moa abaotem Jehovah, love blo iumi for hem bae kamap moa strong. Dastawe, wei for studyim Bible and ting raonem datwan, hem wanfala lo olketa barava important samting lo laef blo iumi!—Phil. 2:16. w19.08 9 ¶4-5

Sapos iu lo niu assignment blo iu distaem, iu need for faendem olketa niu fren. Tingim diswan, for garem wanfala fren, iu mas mek fren tu. Storyim olketa naesfala experience wea iu kasem lo waka blo Jehovah, and olketa narawan bae lukim hapi wea iu garem from datwan. Sapos iu mas lusim assignment bikos lo health problem blo marit partner, no blamem hem for datwan. And, sapos iuseleva nao garem health problem, no feel guilty and tingse iu nao mekem iutufala for lusim assignment. Tingim, iutufala “wanfala body nomoa,” and iutufala promis front lo Jehovah for kea for each other nomata wanem nao happen. (Matt. 19:5, 6) Sapos iu mas lusim assignment bikos iutufala bae garem baby wea iutufala no expectim, mas mek sure pikinini blo iu savve dat hem important winim assignment wea iutufala garem bifor. Talem pikinini dat iu ting lo hem olsem wanfala “present wea kam from Jehovah.” (Sams 127:3-5) And tu, storyim lo hem olketa naesfala experience wea iu garem taem iu lo assignment blo iu. Taem iu duim olsem, datwan bae muvim pikinini blo iu for laek duim full-taem service for Jehovah olsem iu bin duim bifor. w19.08 22 ¶10-11

Bigfala Babylon, wea hem nao evri false religion duim olketa samting wea hem mek shame lo nem blo God. Hem teachim pipol olketa laea samting abaotem God. False religion hem olsem wanfala jury woman bikos hem no faithful lo Jehovah from hem gohed for fren witim olketa gavman blo man. Hem iusim paoa wea hem garem for bossim pipol blo hem and tekem selen blo olketa. Hem duim samting wea kosim dae blo staka pipol, and hem duim diswan tu lo pipol blo God. (Rev. 18:24; 19:2) Jehovah bae iusim “tenfala horn” blo “wild animal wea kala bilong hem red” for distroem “datfala jury woman wea garem bigfala paoa.” Datfala wild animal hem minim United Nations. Tenfala horn hem minim olketa gavman distaem wea olketa sapotim United Nations. Lo taem wea God markem, olketa gavman hia bae attakim Bigfala Babylon wea hem nao false religion. Olketa bae ‘tekem evriting blo hem and mekem hem naked’ wea minim bae olketa tekem evri riches blo hem and mekem pipol luksavve hem wanfala nogud woman. (Rev. 17:3, 16) Olsem hem happen lo wanfala day nomoa, attak hia bae happen kwiktaem and evriwan wea sapotim hem bae seke lo datwan. Bikos hem savve haem hemseleva tumas and sei: “No enitaem bae mi sorre.”—Rev. 18:7, 8. w19.09 10 ¶10-11

Datfala invitation hem for evriwan, Jesus bae no rejectim eniwan wea barava laek for servem God. (John 6:37, 38) Evriwan wea followim Christ kasem datfala privilege for share insaed waka wea Jehovah askem Jesus for duim. Iumi sure Jesus bae evritaem stap witim iumi for helpem iumi duim datfala waka. (Matt. 28:18-20) Pipol wea hambol laek for kam lo Jesus. (Matt. 19:13, 14; Luke 7:37, 38) Why nao olsem? Bikos Jesus difren from olketa Pharisee. Olketa bigman hia no garem love and olketa praod. (Matt. 12:9-14) Jesus garem love and hem hambol. Olketa Pharisee laek for pipol tinghae lo olketa, and olketa praod tumas lo hae position wea olketa garem. Jesus no laekem datkaen wei, and hem teachim olketa disaepol blo hem for hambol and for helpem olketa narawan. (Matt. 23:2, 6-11) Olketa Pharisee laek for bossim pipol and laek for mekem olketa fraet. (John 9:13, 22) Jesus strongim narawan, thru lo love wea hem showimaot and wei wea hem savve tok kaen. Waswe, iu lane from olketa samting wea Jesus duim? w19.09 20 ¶1; 21 ¶7-9

Olketa meeting helpem iumi for kam moa klos lo Jehovah. Wei blo iumi for attendim olketa meeting distaem hem showimaot hao iumi bae deal witim persecution lo future. (Heb. 10:24, 25) Why nao olsem? Sapos iumi letem olketa smol samting nomoa for mekem iumi no attendim meeting distaem, wanem nao bae happen lo future sapos hem danger for iumi hipap witim olketa brata and sista blo iumi? Bat lo narasaed, sapos iumi barava disaed strong for attendim olketa meeting distaem, iumi bae no givap nomata olketa wea againstim iumi trae for stopem iumi for hipap tugeta. Distaem nao hem taem for iumi mekem grow love wea iumi garem for olketa meeting. Taem iumi lovem wei for attendim olketa meeting, nomata sapos olketa againstim iumi, or gavman banim waka blo iumi, bae iumi obeyim God olsem ruler and no olketa man. (Acts 5:29) Memorizim olketa favorite scripture blo iu. (Matt. 13:52) From man no perfect, hem no isi for rememberim evri samting. Nomata olsem, Jehovah savve iusim holy spirit for mekem iu tingim bak olketa favorite scripture blo iu. (John 14:26) Olketa scripture hia bae helpem datfala brata blo iumi for strong for gohed faithful lo Jehovah and for no givap. w19.07 3 ¶5; 4 ¶8-9

Sapos iu born bihaen year 1914, datwan minim for full laef blo iu, iu stap lo “olketa last day” blo disfala world. Iumi evriwan herem nius abaotem olketa samting wea Jesus sei bae happen lo olketa last day. Insaed diswan, hem olketa war, pipol no garem kaikai, olketa earthquake, olketa nogud sik wea kwiktaem for spred, wei for brekem law kamap big, and wei for persecutim pipol blo Jehovah. (Matt. 24:3, 7-9, 12; Luke 21:10-12) And tu, iumi lukim wei blo pipol barava olsem wanem aposol Paul profesi abaotem. Iumi olketa Jehovah’s Witness barava sure iumi stap lo last part blo olketa last day.” (Mic. 4:1, NW) From staka year go pas finis from 1914, datwan showimaot iumi mas stap lo barava end blo “olketa last day.” From end hem barava klosap, iumi need for savve lo ansa blo samfala important kwestin olsem: Wanem nao bae happen lo end blo “olketa last day”? And wanem nao Jehovah expectim iumi for duim taem iumi weitim olketa samting hia for happen? w19.10 8 ¶1-2

Wei for no givap hem no depend lo taem wea laef hem isi nomoa. Taem iumi depend lo Jehovah datwan savve strongim wei wea iumi no givap. (Rome 12:12) Promis blo Jesus lo text blo tuday hem minim nomata lo eni hard taem wea iumi feisim, iumi mas gohed faithful. Each taem wea iumi no givap lo olketa test wea iumi kasem, datwan bae mekem iumi kamap moa strong bifor start blo big trabol. Bat trufala wei for no fraet hem semsem witim wei for no givap, iumi savve garem datwan only sapos iumi depend lo Jehovah. Hao nao iumi savve strongim wei wea iumi depend lo hem? Hem nao taem iumi readim Bible evriday and ting raonem hao Jehovah sevem pipol blo hem lo bifor. (Sams 68:20; 2 Pet. 2:9) Taem olketa nation bae attakim iumi lo datfala big trabol, iumi need for no fraet and trustim Jehovah winim eni narataem bifor. (Sams 112:7, 8; Heb. 13:6) Sapos iumi depend lo Jehovah distaem, bae iumi no fraet taem iumi feisim datfala attak blo Gog. Iumi barava trustim hao iumi savve gohed stap sef bikos Jehovah lukaftarem iumi.—1 Cor. 13:8. w19.10 18 ¶15-16

Satan kontrolem disfala world, and hem iusim datwan for switim disfala feeling wea iumi garem for laekem olketa normal samting lo laef and hem iusim tu olketa wik point blo iumi. (Eph. 2:1-3) Goal blo Satan hem for mekem iumi lovem olketa nara samting mekem iumi no lovem Jehovah nomoa. Bihaen aposol Peter raet abaotem end blo disfala world blo Satan, and datfala niu world wea bae kam. Hem sei: “Olketa brata wea mi lovem, from iufala weitim olketa samting hia, traem best bilong iufala for mekem God hem lukim iufala stap klin, no garem eni rabis wei, and iufala fren gud witim hem.” (2 Pet. 3:14) Taem iumi obeyim datfala kaonsel and duim best blo iumi for gohed garem gudfala wei and iumi stap klin lo spiritual wei, iumi showimaot iumi worshipim Jehovah nomoa. Satan and world blo hem bae gohed trae for changem wei wea iumi putim Jehovah first lo laef blo iumi. (Luke 4:13) Bat nomata wanem kaen challenge nao iumi feisim, iumi bae no letem eniwan or eni nara samting for spoelem wei wea iumi worshipim Jehovah nomoa. Iumi disaed strong for givim lo Jehovah samting wea hem nomoa fit for kasem, wea hem nao wei wea iumi worshipim hem nomoa! w19.10 27 ¶4; 31 ¶18-19

Samfala wei for wari hem stret. Olsem example, hem stret for iumi wari abaotem wanem for duim for mekem Jehovah and Jesus hapi. (1 Cor. 7:32) Sapos iumi duim wanfala serious sin, iumi wari abaotem hao for iumi fren gud moa witim Jehovah. Iumi wari tu abaotem wei for mekem marit partner hapi, and for provaedem wanem famili needim, and olketa brata and sista tu. (1 Cor. 7:33; 2 Cor. 11:28) Lo narasaed, wei for wari tumas maet mekem iumi wari evritaem abaotem wei for garem inaf kaikai and kaleko. (Matt. 6:31, 32) For katem daon datfala wari, iumi maet tingim nomoa for kasem olketa material samting. Sapos iumi letem datwan for happen, faith blo iumi lo Jehovah bae kamap wik and datwan bae spoelem spiritual saed blo iumi. (Mark 4:19; 1 Tim. 6:10) Or iumi maet warim tumas hao pipol ting lo iumi. Iumi maet fraetem wei wea olketa man tok spoelem or persecutim iumi, winim wei for fraetem Jehovah. For protectim iumi from datfala danger, iumi mas barava askem Jehovah for givim iumi faith and wei for no fraet mekem iumi savve feisim olketa challenge olsem.—Provebs 29:25; Luke 17:5. w19.11 15 ¶6-7

Samfala important disison iumi no savve changem. Olsem example, disison blo iumi for servem Jehovah, and disison blo iumi for faithful lo marit partner. (Matt. 16:24; 19:6) Bat, olketa nara disison maet iumi need for changem. Why nao olsem? Bikos laef savve change. Wanem nao savve helpem iumi for mekem olketa barava gudfala disison? Prea for wisdom. For tok stret, iumi evriwan no garem wisdom. So iumi mas depend lo Jehovah taem iumi mekem wanfala disison or taem iumi need for changem disison. Jehovah bae helpem iu for chus lo wisefala wei. Research gud. Readim Bible and olketa pablikeson wea organization blo Jehovah provaedem, and story lo samwan wea iu trustim. (Provebs 20:18) Hem important for duim kaen research olsem bifor iu mekem disison for changem waka wea iu duim, for muv go lo nara ples, or for chusim wanem kaen education nao iu bae kasem for sapotim iu lo ministry. w19.11 27 ¶6-8

Iumi hapi bikos God mekem arrangement for iumi kamap free from sin. Jesus nao main wan wea mekem datwan for happen. Winim 700 year bifor Jesus kam lo earth, profet Isaiah storyim wanfala nambawan freedom. And gud samting wea iumi kasem from disfala nambawan freedom hem winim freedom wea olketa Israelite kasem lo Jubilee year. Isaiah raet olsem: “Spirit blong Lod [Jehovah] hemi stap wetem mi, bikos hemi siusim mi finis fo talemaot gudnius long olketa pua pipol. Hemi sendem mi fo finisim sore wea hemi save stap insaet long haat blong pipol. Hemi sendem mi fo talemaot long olketa hu i stap long prisin an olketa hu i waka olsem slev, dat bae olketa fri nao.” (Aesaea 61:1) Datfala profesi hem for hu? Datfala important profesi abaotem wei for kamap free hem start for fulfill bihaen Jesus startim ministry blo hem. Taem Jesus go lo sinagog, lo homtaon blo hem lo Nazareth, hem readim toktok blo Isaiah lo olketa Jew wea hipap lo there.—Luke 4:16-19. w19.12 9-10 ¶6-8

For feisim persecution, iu mas strong and no fraet. Sapos iu feel olsem iu man for fraet, wanem nao iu savve duim? Tingim, hao trufala wei for no fraet hem no depend lo size, strong, or wanem man hem fit for duim. Tingim example blo David taem hem feisim Goliath. Goliath hem wanfala big giant, bat David hem smol tumas, hem no strong olsem Goliath, and hem no garem eni samting for faet. For garem sword bat nomoa tu. Nomata olsem, David no fraet and ran go for faetem datfala praod giant Goliath. Why nao David strong and no fraet? Hem barava bilivim Jehovah stap witim hem. (Fas Samuel 17:37, 45-47) David no comparem size blo hemseleva witim hao big nao Goliath. Bat, hem comparem size blo Goliath witim Jehovah. Wanem nao iumi savve lanem from disfala story? Iumi bae strong and no fraet sapos iumi barava bilivim hao Jehovah hem stap witim iumi. And sapos iumi bilivim hao olketa wea againstim iumi olketa smol tumas taem iumi comparem witim Jehovah.—Mektu Kronikols 20:15; Sams 16:8. w19.07 5 ¶11-13

Tychicus, hem fren wea Paul barava trustim. (Acts 20:4) Lo samting olsem 55 C.E., Paul organizem waka for kolektem selen for helpem olketa Christian lo Judea, and luk olsem hem letem Tychicus for help lo disfala important assignment. (2 Cor. 8:18-20) Then, lo firstaem wea Paul kamap prisoner lo Rome, Tychicus kamap messenger for Paul. Hem givim olketa leta and message blo Paul for encouragem olketa kongregeson lo Asia. (Col. 4:7-9.) Tychicus gohed showimaot hem fren wea Paul fit for trustim. (Titus 3:12) Lo datfala taem, no evri Christian garem datkaen wei wea Tychicus garem. Lo samting olsem 65 C.E., wea hem mek-tu taem wea Paul stap lo prison, hem storyim hao staka Christian brata lo province blo Asia no laek for spendem taem witim Paul bikos maet olketa fraetem olketa wea againstim hem. (2 Tim. 1:15) Bat Paul savve depend lo Tychicus and hem givim hem nara assignment moa. (2 Tim. 4:12) For sure, Paul hapi tumas for garem gud fren olsem Tychicus. w20.01 10 ¶7-8

Enitaem iu ting, ‘Waswe, mi anointed or nomoa?’ Sapos olsem, tingim olketa important kwestin hia: Waswe, iu garem strong feeling for laek duim will blo Jehovah? Waswe, iu ting lo iuseleva olsem samwan wea barava strong for duim preaching waka? Waswe, iu enjoyim wei for lane abaotem olketa deep samting lo Bible abaotem God? Waswe, iu feel olsem Jehovah barava blessim preaching waka blo iu? Waswe, iu garem disfala feeling for mas barava helpem olketa narawan lo spiritual wei? Waswe, iu lukim pruv wea showimaot Jehovah barava helpem iu lo staka difren wei lo laef? Sapos ansa blo iu for olketa kwestin hia hem yes, waswe, datwan pruvim iu kasem anointing for go lo heven? Nomoa. Why nao olsem? Bikos evri servant blo Jehovah savve garem sem kaen feeling olsem. Sapos iu ting raonem yet and no sure dat iu kasem anointing, datkaen wei for daot olsem hem minim iu no wanfala anointed. Olketa wea Jehovah chusim bae no ting, ‘Waswe, mi anointed or nomoa?’ Olketa barava sure lo datwan! w20.01 23 ¶14