June

Hannah, mami blo profet Samuel, mas deal witim samfala hard samting. For longfala taem hem no savve garem pikinini. (Fas Samuel 1:2) Lo culture blo olketa Israelite, olketa sei sapos wanfala woman no garem pikinini datwan minim God no blessim hem. Diswan mekem Hannah barava feel shame. (Jenesis 30:1, 2) Samting wea hard go moa, Peninnah, nara waef blo hasband blo Hannah, garem olketa pikinini and Peninnah savve tok daonem hem evritaem abaotem datwan. Hannah no savve hao for deal witim datwan. Hem barava feel sorre so hem gohed krae and no laek kaikai. Datfala samting wea happen hem tumas nao for Hannah. (Fas Samuel 1:7, 9,10) Hao nao Hannah kasem comfort? Hannah prea lo Jehovah and talemaot evri feeling blo hem. Bihaen hem prea, hem storyim situation blo hem lo Hae Priest Eli. Then Eli sei olsem lo Hannah: “Letem God blong yumi long Israel hemi givim disfala samting long yu wea yu askem. Yu go an yu no wari moa.” Wanem nao kamaot from datwan? Hannah hem “go and kaikai, and feis bilong hem showimaot hem no wari nao.” (Fas Samuel 1:17, 18) Prea helpem Hannah for kasem bak peace. w20.02 21 ¶4-5

Klosap nao Jehovah bae finisim disfala nogud world. Only olketa wea “showimaot olketa laekem laef olowe” bae sev. (Acts 13:48) Bat iumi laekem tu olketa relative blo iumi for worshipim Jehovah witim iumi. Dadi blo iumi Jehovah wea lovem iumi, “no laekem eniwan for dae bat hem laekem evriwan for garem chance for repent.” (2 Pet. 3:9) Hem gud for tingim hao tufala wei hem stap for storyim message blo salvation, wanfala hem stret bat narawan hem no stret. Maet taem iumi story lo difren pipol iumi kaen lo olketa, bat taem iumi story lo olketa relative maet iumi savve tok stret tumas. Taem iumi ting bak lo firstaem wea iumi trae for witness lo relative blo iumi, maet iumi regret lo hao iumi story lo hem and iumi wish nomoa iumi no story olsem. Taem iumi story lo olketa relative blo iumi, hem gud for tingim disfala advaes blo Paul wea stap lo text for tuday. Sapos nomoa, bae olketa feel nogud lo iumi and no laek lisin lo iumi. w19.08 14-15 ¶3-5

Wat nao tingting blo iu taem iu lanem tru teaching abaotem datfala Son? Jesus hem mek-tu important man lo full universe. Hem nao givim ransom for iumi. Hem willing for givim laef blo hem for iumi. Taem iumi duim samting wea showimaot iumi garem faith lo ransom, iumi savve kasem forgiveness for olketa sin blo iumi, savve garem wei for fren witim God, and kasem laef olowe. (John 3:16) Jesus hem Hae Priest blo iumi. Hem laek for helpem iumi for kasem gud samting from datfala ransom and garem klos wei for fren witim God. (Heb. 4:15; 7:24, 25) From Jesus hem King lo Kingdom blo God, hem nao bae mekem nem blo Jehovah for kamap holy, finisim evri nogud samting, and helpem iumi kasem olketa blessing for olowe lo paradaes lo future. (Matt. 6:9, 10; Rev. 11:15) Jesus nao example for iumi. Hem showimaot gudfala example lo wei wea hem iusim full laef blo hem for duim wanem God laekem. (John 4:34) Taem iu acceptim wanem Bible teachim abaotem Jesus, datwan bae mekem iu for lovem Son blo God. Datfala love muvim iu for iusim full laef blo iu for duim samting wea God laekem, olsem wanem Jesus duim. w20.03 10 ¶12-13

Long sem day wea Jesus dae, staka taem nao hem prea. Taem hem showim long olketa disaepol hao for rememberim dae bilong hem, hem prea for datfala bred and wine. (1 Cor. 11:23-25) Bifor olketa lusim ples wea olketa duim pasova, hem prea witim olketa disaepol. (John 17:1-26) Long datfala sem naet, taem Jesus and olketa disaepol arrive long Maunt Olive Tree, hem prea staka taem. (Matt. 26:36-39, 42, 44) And tu, lastfala toktok bilong Jesus bifor hem dae, hem wanfala prea. (Luke 23:46) Wei wea Jesus prea evritaem long datfala day, hem showimaot hem barava depend long Jehovah. Wanfala reason why Jesus fit for winim datfala test hem bikos hem depend long Dadi bilong hem thru long prea. Bat, olketa aposol no gohed for prea long datfala naet. From datwan hem isi for olketa fraet taem olketa kasem test. (Matt. 26:40, 41, 43, 45, 56) Taem iumi kasem olketa hard taem, iumi bae gohed for faithful only sapos iumi followim example bilong Jesus and gohed for prea. w19.04 9 ¶4-5

Jehovah hem barava heitim spiritism! Jehovah tok olsem long olketa Israelite: “Yufala mas no letem eniwan bonem pikinini blong hem long faea fo mekem sakrifaes. Yufala mas no letem eniwan mekem sakrifaes fo save abaotem wanem bae hemi kamap bihaen. Yufala mas no letem eniwan fo mekem enikaen majik o poesen. Yufala mas no letem eniwan wakem grinlif. An yufala mas no letem eniwan fo kolem olketa devoldevol, o toktok long spirit blong man hu hemi dae. Eniwan hu hemi mekem olketa kaen wei ya, hemi barava nogud tumas long ae blong [Jehovah].” (Diutronomi 18:10-12) Olketa Christian distaem no stap anda long datfala Law wea Jehovah givim long olketa Israelite. Bat, iumi savve tingting bilong hem abaotem spiritism hem no change. Jehovah warnim iumi for againstim spiritism bikos hem savve Satan iusim datwan for spoelem pipol. Satan iusim spiritism for mekhae long olketa laea, olsem wei for sei man wea dae hem gohed laef long nara ples. (Eklesiastes 9:5) Satan iusim tu spiritism for mekem pipol fraet and for mekem olketa no worshipim Jehovah. Main goal bilong hem nao for pipol wea duim spiritism for trustim olketa demon and no trustim Jehovah. w19.04 21 ¶5-6

Child abuse hem wanfala serious sin. Man wea abusim pikinini hem barava spoelem datfala pikinini and mekem pikinini hia for safa. Datfala man spoelem hao datfala pikinini trustim hem and mekem pikinini for no feel sef. Iumi mas protectim olketa pikinini from disfala nogud samting, and olketa victim needim help and comfort. (1 Thess. 5:14) Taem samwan wea part long kongregeson hem duim child sexual abuse hem barava spoelem nem bilong kongregeson. (Matt. 5:16; 1 Pet. 2:12) Iumi barava no acceptim or letem pipol wea duim nogud samting and wea no repent, for gohed stap insaed kongregeson and gohed spoelem gudfala nem bilong kongregeson. Sapos samwan long kongregeson brekem law, olsem for duim child sexual abuse, datwan hem sin againstim gavman. (Comparem Acts 25:8.) Olketa elder no garem paoa for panisim eniwan wea brekem law bilong kantri, bat long semtaem sapos law bae deal witim man wea duim child abuse, olketa elder bae no protectim hem. w19.05 9 ¶4-7

Iumi savve winim eni hard taem bikos Jehovah nao Nambawan Teacher bilong iumi. (Aesaea 30:20, 21) Hem givim kam Bible for teachim iumi for kamap “barava fit and redi for duim evri gudfala waka.” (2 Tim. 3:17) Taem iumi followim wanem Bible teachim, iumi bae kamap wise winim olketa wea followim “wisdom bilong world.” (Sams 119:97-100) Sorre samting nao, wisdom bilong world mekhae long wei for duim samting wea man seleva laekem. So staka taem hem no isi for iumi stap klia long wei for garem tingting and wei bilong disfala world. Dastawe, Bible sei: “No letem olketa iusles toktok and tingting bilong man for trapim iufala. Olketa samting hia join witim kastom bilong olketa man.” (Col. 2:8) Olsem Bible storyim, long olketa last day pipol bae barava “interest nomoa for enjoyim seleva. (2 Tim. 3:4) Iumi lukim distaem hao olketa nogud sik wea kamaot from wei for duim sex, olsem disfala sik AIDS, hem wanfala nomoa long staka samting wea showimaot wisdom bilong world hem krangge samting.—2 Pet. 2:19. w19.05 21 ¶1-2; 22 ¶4-5

Satan laea lo olketa Israelite for mekem olketa tingse olketa mas followim kastom blo pipol lo datfala ples mekem olketa garem gudfala laef. Pipol hia bilivim olketa mas duim samfala samting saed lo worship, mekem olketa god blo olketa hapi and givim kam rain wea olketa needim. So olketa wea no garem faith lo Jehovah, duim olketa samting for mekhae lo datfala false god Baal from olketa tingse hem nao only wei for olketa savve kasem rain. Satan iusim tu, disfala feeling for laekem sex. Pipol wea worshipim olketa false god savve duim olketa rabis samting saed lo sex olsem part lo worship blo olketa. Insaed diswan, olketa garem olketa man and woman wea savve jury lo temple blo olketa. Wei for homosexual and olketa nara kaen wei for duim sex, hem kamap samting wea olketa acceptim and hem kamap normal. (Diutronomi 23:17, 18; Fas Kings 14:24) Olketa pipol hia bilivim dat wei for duim sex olsem part lo worship blo olketa bae muvim god blo olketa for mekem evriting lo land blo olketa for grow gud. Kaen worship olsem wea join witim sex hem switim tingting blo staka Israelite, and datwan mekem olketa for worshipim olketa false god. w19.06 2 ¶3; 4 ¶7-8

Staka thousand Bethelite and olketa narawan insaed full-taem service kasem olketa niu assignment. Maet olketa faithful brata and sista hia faendem hem hard for lusim assignment wea olketa lovem tumas. Sapos datwan kasem iu, wanem nao savve helpem iu for deal witim datwan? Wei for readim Bible evriday and ting raonem bae helpem man for gohed stap klosap lo Jehovah. And tu, gohed duim evri samting wea iu fit for duim lo preaching waka lo niu kongregeson blo iu. Jehovah bae no forgetim olketa wea gohed faithful for worshipim hem, nomata olketa no fit nao for duim wanem olketa savve duim bifor. Garem simpol laef. No letem olketa wari blo disfala world blo Satan for stopem iumi for duim olketa spiritual samting. (Matt. 13:22) No letem pipol lo world or olketa fren or relative for mekem iumi trae for mas aftarem selen lo disfala world blo Satan. (1 John 2:15-17) Trustim Jehovah bikos hem promis for helpem iumi lo spiritual wei, saed lo feeling, and olketa material samting lo “taem iumi needim.”—Heb. 4:16; 13:5, 6. w19.08 20 ¶4; 21-22 ¶7-8

Waswe, iu feisim samfala problem lo laef wea mekem iu stress? Taem iumi savve Jehovah minim feeling blo iumi datwan barava comfortim iumi. Datwan mekem iumi trustim hao Jehovah minim tu hao iumi feel taem iumi kasem hard taem. Hem savve wanem iumi fit for duim and no fit for duim, and hem savve tu lo olketa samting wea iumi tingting abaotem and feeling blo iumi. (Sams 103:14; 139:3, 4) Sapos iumi depend lo Jehovah, iumi bae kasem help for deal witim olketa problem wea mekem iumi stress. Stress savve mekem iu ting olsem evri samting hem nating gud nomoa, and from datwan bae iu feel wikdaon. Sapos iu feel olsem, no forgetim hao Jehovah bae helpem iu for deal witim datwan. Hao nao Jehovah bae helpem iu? Hem laekem iu for storyim olketa problem and wari blo iu lo hem. And taem iu askem hem, bae hem helpem iu. (Sams 5:3; 1 Pet. 5:7) So prea lo Jehovah evritaem abaotem olketa problem blo iu. Hem tru, bae hem no story stret kam lo iu, bat hem story lo iu thru lo Bible and organization blo hem. Olketa story wea iu savve readim lo Bible savve comfortim iu and givim iu hope. Olketa brata and sista blo iu tu savve encouragem iu.—Rome 15:4; Heb. 10:24, 25. w19.06 16 ¶7-8

Taem iu kasem persecution, prea lo Jehovah, talemaot evri samting lo heart blo iu lo hem and storyim evri samting wea mekem iu fraet and wari. (Lamentesin 2:19) Evritaem wea iu gohed for prea olsem, bae iu kamap moa klos lo Jehovah. (Rome 8:38,39) Iu mas barava sure olketa blessing from Kingdom blo God bae kamap tru. (Nambas 23:19) Sapos faith blo iu lo olketa promis hia hem no strong, bae hem isi for Satan and olketa wea followim hem for mekem iu fraet. (Provebs 24:10; Heb. 2:15) Iu savve duim research and studyim olketa promis blo God abaotem Kingdom blo hem, and olketa reason why iu barava bilivim olketa samting hia bae kamap tru. Hao nao datwan savve helpem iu? Tingim example blo Stanley Jones, wea stap lo prison for sevenfala year bikos lo faith blo hem. Wanem nao helpem hem for faithful and no givap? Hem sei: “Wei wea mi savve gud abaotem Kingdom blo God hem strongim faith blo mi and mi no daotem datwan, so no eniwan savve mekem mi for lusim Jehovah.” Sapos iu garem strong faith lo olketa promis blo God, wei for fraet bae no savve winim iu.—Provebs 3:25,26. w19.07 2 ¶1; 3 ¶6-7

Why nao wei for teachim pipol for kamap disaepol hem barava important? Bikos sapos iu wanfala disaepol bae iu savve kamap fren blo God. And tu, olketa wea followim Christ savve garem gudfala laef distaem and olketa garem hope for laef olowe lo future. (John 14:6; 17:3) Hem tru, Jesus givim iumi important responsibility, bat datwan no minim iumi duim seleva. Aposol Paul raet olsem abaotem hemseleva and olketa wea waka witim hem: “Mifala waka tugeta witim God.” (1 Cor. 3:9) Datwan hem nambawan privilege wea Jehovah and Jesus givim lo iumi nomata iumi no perfect! And tu, wei for teachim pipol for kamap disaepol hem savve mekem iumi hapi. First samting hem for go “lukaotem” olketa wea garem heart wea laek for lane abaotem Jehovah. Iumi showimaot iumi olketa Witness blo Jehovah taem iumi story abaotem Hem lo evriwan wea iumi meetim. Iumi showimaot iumi olketa tru Christian taem iumi followim komand blo Christ for preach. w19.07 15 ¶3-5

Samting wea mekem staka pipol interest, hem taem olketa lukim hao wisdom insaed Bible savve helpem olketa. Lo New York, wanfala sista wea savve visitim pipol wea story lo Mandarin languis, hem sei: “Mi interest lo pipol and lisin lo olketa. Sapos mi savve samwan just muv kam, mi savve ask: ‘Hao nao iu faendem laef lo hia? Waswe, iu faendem waka nao? Waswe, pipol lo hia treatim iu gud?’” Samfala taem diswan savve openem wei for storyim wanfala Bible teaching. Then sapos hem fitim, hem savve sei: “Iu ting wanem nao savve helpem iumi for stap gud witim pipol? Mi laek showim iu disfala proverb lo Bible wea sei: ‘Wei for startim raoa hem olsem taem man openem ples wea wata fulap lo hem and then wata bosta kamaot; so bifor raoa hem start iu go nao.’ Waswe, iu ting disfala advaes savve helpem iumi for deal witim narawan?” (Prov. 17:14, NW) Wei for story olsem, savve helpem iumi for luksavve sapos man laek lanem moa samting. w19.07 23 ¶13

Olketa wea muv lo niu assignment olketa needim iu for minim situation blo olketa. Maet olketa stragol for deal witim health problem blo olketa seleva or narawan lo famili. Olketa maet sorre bikos olketa lusim samwan lo dae. And nomata olketa no talem, maet olketa feel sorre bikos olketa missim olketa fren blo olketa lo old assignment. Hem savve tek taem for man deal witim olketa kaen feeling olsem wea maet mekem hem konfius. Sapot and example blo iu savve helpem olketa for change fitim niu situation blo olketa. Wanfala sista wea serve lo nara kantri for staka year sei: “Lo assignment blo mi bifor, mi conductim Bible study evriday. Bat lo hia, hem no isi bikos mi no savve garem chance for openem Bible or showim video lo ministry. Bat olketa pablisa, invaetem mi for go witim olketa lo return visit and Bible study. Datwan mekem mi feel gud. Mi lane for startim story lo niu territory. Evri samting hia helpem mi for kasem bak hapi blo mi.” w19.08 22 ¶10; 23-24 ¶13-14

Olsem Euodia and Syntyche, iumi tu maet faendem hem hard for barava lovem olketa brata blo iumi bikos iumi maet garem diskaen wei for lukluk nomoa lo wik point blo narawan. Iumi evriwan savve mekem olketa mistek evriday. Sapos iumi tingim nomoa mistek blo olketa narawan then love blo iumi for olketa bae katdaon. Olsem example, sapos wanfala brata forget for help for klinim Kingdom Hall, maet iumi feel nogud lo hem. Then sapos iumi start for tingim moa olketa nara mistek blo datfala brata bae gogo iumi just feel nogud go moa and love wea iumi garem bae katdaon. Sapos iumi nao garem kaen tingting olsem, hem gud for iumi tingim diswan: Jehovah luksavve lo mistek blo iumi and mistek blo brata blo iumi. Nomata olsem, hem still gohed for lovem brata blo iumi and hem lovem iumi tu. From datwan, iumi need for followim example blo Jehovah for lovem evriwan and tingim gud saed blo olketa. Taem iumi waka hard for lovem olketa brata blo iumi, iumi bae strongim wei wea iumi wan mind.—Phil. 2:1, 2. w19.08 9 ¶7-8

Jehovah lovem pipol wea hambol. Only olketa wea barava hambol savve fren gud witim hem. Bat, hem luk farawe lo olketa wea praod. Iumi evriwan laek for mekem Jehovah hapi and for hem lovem iumi, so iumi garem staka gudfala reason for gohed lane for hambol. Hambol fasin minim man no ting lo hemseleva olsem hem important and hem no praod. Bible showimaot man wea hambol hem luksavve hao Jehovah God hem barava hae winim hem and hem luksavve lo position blo olketa narawan. Man wea hambol hem luksavve hao olketa narawan winim hem lo olketa didifren wei. (Phil. 2:3, 4.) Samfala pipol luk olsem olketa hambol. Maet olketa savve shame or olketa kwaet tumas. Or maet culture, or wanem olketa lanem taem olketa smol hem mekem olketa garem wei for showimaot respect and story gud lo olketa narawan. Bat insaed heart blo olketa maet olketa barava praod. And gogo, bae really wei blo olketa hem showaot.—Luke 6:45. w19.09 2 ¶1, 3-4

Datfala “gud nius abaotem Lord bilong iumi Jesus” hem minim olketa tru samting wea Jesus teachim. Iumi obeyim datfala gud nius taem iumi followim datwan lo laef blo iumi. For obey, hem minim tu for putim Kingdom olsem first samting, followim olketa standard blo Jehovah, and for talemaot Kingdom blo God. (Matt. 6:33; 24:14) And tu, hem minim for sapotim olketa brata blo Christ taem olketa lukaftarem bigfala responsibility blo olketa. (Matt. 25:31-40) Klosap nao olketa bae rewardim olketa “nara sheepsheep” from help wea olketa givim lo olketa anointed wan. (John 10:16) Lo wanem wei? Bifor war blo Armageddon hem start, evriwan blo 144,000 bae go ap finis lo heven and kamap olketa spirit wea no savve dae. Olketa bae joinim army lo heven wea bae finisim Gog and olketa sevem datfala “big crowd” wea hem olketa sheepsheep blo God. (Rev. 2:26, 27; 7:9, 10) Tru nao, hem wanfala privilege for olketa blo big crowd for sapotim olketa anointed taem olketa stap yet lo earth! w19.09 12-13 ¶16-18

Why nao wei for duim waka wea Jesus givim lo iumi hem samting wea savve strongim iumi? Bikos iumi garem olketa best overseer. Jehovah nao Main Overseer blo iumi, and hem no wanfala raf boss wea no savve talem thankiu. Hem savve tinghae lo waka wea iumi duim. (Heb. 6:10) And hem givim strong wea iumi needim for duim olketa waka wea hem givim lo iumi. (2 Cor. 4:7; Gal. 6:5) Jesus hem King blo iumi and hem leadim iumi lo wei for showimaot example for iumi followim. (John 13:15) Olketa elder wea lukaftarem iumi, traem best for followim example blo Jesus, wea hem “nambawan man for lukaftarem olketa sheepsheep.” (Heb. 13:20; 1 Pet. 5:2) Olketa traem best for kaen, givim encouragement, and no fraet taem olketa teachim iumi and protectim iumi. And tu, iumi garem olketa best fren. Iumi pipol blo Jehovah nomoa garem wei for waka tugeta witim wan mind and barava lovem each other. Tingim diswan, iumi garem privilege for waka tugeta witim pipol wea evriwan garem gudfala wei and wea no tingse olketa gud winim olketa narawan. Olketa ting lo narawan olsem hem winim olketa. Olketa no just ting lo iumi olsem iumi waka tugeta nomoa, bat iumi olsem olketa fren. And datfala klos wei for fren hem barava strong, wea mekem iumi savve willing for dae for each other. w19.09 20 ¶1; 23 ¶12-14

Lo toktok blo Paul hem storyim “day bilong Jehovah.” (1 Thess. 5:1-6) Lo disfala scripture, disfala “day bilong Jehovah” hem start taem olketa attakim “Bigfala Babylon” wea hem nao evri false religion, and datfala day bae finis lo Armageddon. (Rev. 16:14, 16; 17:5) Toktok blo Paul helpem iumi tu for savve wanem for duim for iumi redi for “day bilong Jehovah.” Iumi shud “no olsem olketa narawan wea sleep.” Iumi mas “gohed wekap” and redi. No letem eni samting mekem iumi for join insaed lo politik, nogud iumi spoelem wei wea iumi no teksaed. Sapos iumi duim datwan iumi kamap “olsem pipol long world.” (John 15:19) Iumi savve Kingdom blo God nomoa savve mekem full world for garem peace. Iumi laek helpem olketa narawan tu for wekap and luksavve lo wanem Bible talem wea bae happen lo disfala world. Taem wea bigfala trabol hem start, hem bae leit nao for eniwan start worshipim Jehovah. Dastawe hem barava important for iumi preach distaem! w19.10 8 ¶3; 9 ¶5-6

Taem olketa finis for raetem datfala scroll, Jeremiah mas depend lo fren blo hem Baruch for talemaot datfala message. (Jeremaea 36:5, 6) Baruch no fraet for duim datfala assignment nomata hem danger tumas. Tingim hao Jeremiah mas barava tinghae lo Baruch taem Baruch go lo temple and readim datfala scroll. (Jeremaea 36:8-10) Taem olketa prince lo Judah herem wanem Baruch duim, olketa komandim hem for readim big datfala scroll lo olketa! (Jeremaea 36:14, 15) Olketa prince hia disaed for storyim lo King Jehoiakim samting wea Jeremiah talem. King Jehoiakim kros fogud taem hem herem olketa toktok wea Jeremiah raetem insaed datfala scroll, so hem bonem datfala scroll and talem olketa for arrestim Jeremiah and Baruch. Nomata olsem, Jeremiah tekem nara scroll, givim lo Baruch, and taem Jeremiah gohed story, Baruch raetem evri toktok wea hem bin raetem lo first scroll wea King Jehoiakim bonem.—Jeremaea 36:26-28, 32. w19.11 3-4 ¶4-6

Jehovah savve kamap eni samting wea hem laekem for mekem plan blo hem kamap tru. Olsem example, Jehovah savve kamap wanfala teacher, samwan for givim comfort, and for preach, datwan hem tu-thri nomoa lo staka samting wea hem savve duim. (Aesaea 48:17; 2 Cor. 7:6; Gal. 3:8) Nomata olsem, samfala taem hem savve iusim olketa man for duim wanem hem laekem. (Matt. 24:14; 28:19, 20; 2 Cor. 1:3, 4) And tu, Jehovah savve givim wisdom and strong wea iumi needim for helpem iumi duim eni samting for mekem plan blo hem kamap tru. Olsem samfala man for raet talem, diswan hem barava join witim mining lo nem blo Jehovah. Iumi evriwan laekem Jehovah for iusim iumi for duim waka blo hem, bat samfala maet daotem wei wea Jehovah iusim olketa. Why nao olsem? Bikos lo age, laef blo olketa or savve wea olketa garem, datwan mekem olketa feel olsem olketa no fit for duim staka samting. Bat lo narasaed, samfala maet satisfae nomoa witim wanem olketa gohed duim finis and olketa ting olketa no need for duim samfala samting moa. w19.10 20 ¶1-2

Olketa material samting savve mekem iumi go difren and for no lukaftarem gud shield blo iumi. Aposol Paul sei: “Sapos wanfala soldia laek for mekem komanda bilong hem hapi bae hem no busy long eni nara waka for kasem selen.” (2 Tim. 2:4) So olketa stopem olketa soldia lo Rome for duim eni waka for selen. Olsem wanfala gud soldia, iumi bae no letem eni samting disturbim iumi from main goal blo iumi, wea hem nao for mekem tufala Komanda blo iumi, Jehovah and Jesus, for hapi lo iumi. Iumi ting lo datwan olsem hem barava important winim eni samting wea iumi savve kasem from world blo Satan. Iumi mek sure iumi iusim taem and strong wea iumi garem for servem Jehovah, and for gohed keepim gud shield blo iumi and olketa nara samting wea iumi iusim for faet lo spiritual wei. Iumi mas evritaem careful! Why nao olsem? Aposol Paul warnim iumi dat “olketa wea laekem tumas for rich” bae gogo olketa “lusim nao olketa trufala teaching.”—1 Tim. 6:9, 10. w19.11 17 ¶12, 14-15

Wei for talemaot “peace and stap gud” bae kamap bifor “day bilong Jehovah” hem start. (1 Thess. 5:1-6) Lo 1 Thessalonica 5:2, “day bilong Jehovah” hem minim “datfala big trabol.” (Rev. 7:14) Hao nao bae iumi savve datfala big trabol hem redi for start? Bible sei bae pipol talemaot wanfala toktok wea here difren. Datwan hem olsem wanfala saen wea showimaot datfala big trabol hem redi for start. Datfala toktok wea olketa bae talemaot hem nao peace and security, or “peace and stap gud nao.” Waswe, olketa bigman blo religion bae join witim olketa tu? Maet olsem. Bat, datfala toktok wea olketa bae talemaot hem wanfala laea blo olketa demon. Datfala laea hem danger tumas bikos hem mekem pipol for tingse olketa sef, batawea datwan nao taem wea big trabol wea winim enitaem bifor hem redi for start. Tru nao, bae “seknomoa olketa bae finis, olsem taem bigfala pain hem seknomoa kasem woman wea klosap for bornem pikinini.” Waswe lo olketa pipol blo Jehovah wea faithful? Olketa maet sapraes taem seknomoa day blo Jehovah hem start, bat olketa bae redi finis for datwan. w19.09 9 ¶7-8

Taem iu mekem disison, mas markem wanem for duim. Sapos iu barava markem wanem iu laek for duim, bae iu savve finisim wanem iu startim. Olsem example, iu maet disaed for duim evritaem Bible reading blo iu. Bat sapos iu no garem wanfala schedule, maet bae hem hard for iu duim wanem iu planim. Or maet olketa elder lo kongregeson disaed for duim shepherding lo kongregeson, bat bihaen samfala taem, olketa no duim yet wanem olketa disaedem. For helpem olketa duim datwan, olketa savve askem olketa kwestin olsem: “Waswe, iumi listim nem blo olketa brata and sista wea barava needim shepherding visit? Waswe, iumi mekem schedule finis lo wanem taem for visitim olketa?” And tu, iumi mas garem wei for luksavve. Iumi evriwan no fit for duim evri samting wea iumi laek duim bikos iumi no garem inaf taem, material samting, or strong for duim datwan. So iumi mas garem wei for luksavve and duim nomoa wanem iumi fit for duim. Lo taem wea fitim, iumi maet need for changem wanfala disison wea iumi no fit nao for duim. w19.11 29 ¶11-12

Wanfala profesi abaotem laef lo earth lo future hem stap lo Aesaea 65:21-23. Lo datfala taem bae iumi no stap nating nomoa. Bat, Bible sei pipol blo God bae garem staka waka for duim and olketa bae barava satisfae lo wanem olketa duim. Bihaen Thousand Year Rul hem end, iumi barava sure olketa samting wea God wakem bae “no slave moa long sin and dae . . . olketa bae free olsem olketa pikinini bilong God, wea datwan hem nambawan samting.” (Rome 8:21) Olsem wei wea Jehovah arrange for olketa Israelite garem taem for waka and rest, hem bae duim sem samting for pipol blo hem lo Thousand Year Rul blo Christ. Olketa bae garem taem for duim olketa spiritual samting. Wei for worshipim God nao main samting wea mekem iumi hapi distaem, and lo niu world bae hem olsem tu. Yes, iumi garem gud reason for hapi lo olketa gudfala waka and spiritual samting wea iumi bae duim anda lo Thousand Year Rul blo Christ. w19.12 12 ¶15; 13 ¶17-18

Datfala Hebrew toktok for teach, hem minim for “teachim and remindim olketa thru lo wei for repeatim samting evritaem.” For duim datwan, parents need for spendem staka taem witim pikinini. Maet parents savve feel nogud taem olketa repeatim evritaem sem toktok lo pikinini. Nomata olsem, parents savve ting lo diswan olsem wanfala wei for helpem pikinini minim Toktok blo God and for followim datwan. Savve gud lo pikinini blo iu. Sams 127 comparem olketa pikinini witim olketa arrow. (Sams 127:4) Olsem olketa arrow wea olketa wakem from olketa difren kaen material and garem olketa didifren size, evri pikinini no semsem. So parents need for luksavve hao nao for trainim each pikinini. Wanfala couple lo Israel distaem, wea teachim gud tufala pikinini blo tufala for servem Jehovah, storyim samting wea helpem tufala, “Mitufala conductim Bible study witim each pikinini.” Each hed lo famili nao bae disaed sapos diskaen wei for study hem fitim situation blo olketa or nomoa. w19.12 26-27 ¶18-20

Taem iumi go thru lo hard taem, iumi barava tinghae lo olketa wea duim samting for sapotim iumi! Ryan, wea dadi blo hem seknomoa dae lo accident, hem sei: “Taem man safa, staka normal samting wea hem savve duim evriday hem kamap hard tumas. Taem samwan duim samting for help, nomata hem tingse datwan hem smol samting nomoa, hem savve barava comfortim man.” No tingse smol samting wea iu duim for helpem narawan hem no important, hem savve barava comfortim narawan. Mark hem wanfala disaepol wea busy tumas lo first century. Hem garem staka responsibility lo waka blo Jehovah, insaed diswan hem assignment for raetem Bible buk wea garem nem blo hem. Nomata olsem, hem willing for spendem taem for comfortim aposol Paul, and Paul feel free for askem Mark for helpem hem. Angela, wea olketa killim dae wanfala famili member blo hem, tinghae lo wei wea narawan willing for comfortim hem. Hem sei: “Taem olketa fren willing for help, hem isi tumas for story lo olketa. Olketa bae no les or hol bak for helpem iu.” Iumi savve askem iumiseleva, ‘Waswe, mi samwan wea willing for duim samting for comfortim olketa brata and sista?’ w20.01 11-12 ¶14-16

Hao nao maet wanfala anointed kaikaim bred and drinkim wine lo Memorial lo wei wea “no showimaot respect”? Hem duim olsem taem hem kaikaim bred and drinkim wine bat hem no followim olketa standard blo Jehovah. (Heb. 6:4-6; 10:26-29) Olketa wea anointed luksavve olketa mas gohed faithful sapos olketa laek for kasem “datfala prize for laef long heven wea God givim” thru lo Christ Jesus.” (Phil. 3:13-16) Holy spirit blo Jehovah helpem pipol blo hem for hambol and for no praod. (Eph. 4:1-3; Col. 3:10, 12) So olketa wea anointed no tingse olketa nao gud winim olketa narawan. Olketa savve hem no evritaem minim dat olketa anointed wan savve kasem moa holy spirit from Jehovah winim olketa nara servant blo hem. Olketa no tingse olketa nao savve lo olketa deep truth insaed Bible winim olketa narawan. And olketa bae no talem narawan hao hem tu kasem anointing and shud kaikaim bred and drinkim wine lo Memorial. Bat, olketa hambol for luksavve only Jehovah nomoa savve invaetem pipol for go lo heven. w20.01 27-28 ¶4-5

Jehovah laekem iumi for fren klos witim hem and for story witim hem. Hem laekem iumi for ‘gohed prea’ and hem evritaem redi for lisin lo iumi. (Rome 12:12) No enitaem hem busy or taed for herem iumi. Iumi tu savve lisin lo hem taem iumi readim Bible, and olketa pablikeson wea helpem iumi for minim gud Bible. Iumi herem Jehovah tu taem iumi lisin gud lo olketa meeting. Wei for story gud evritaem witim Jehovah savve helpem iumi for fren klos witim hem. Ting raonem hao iumi story lo God. Hem laekem iumi for talemaot evri tingting and feeling blo iumi lo hem. (Sams 62:8) So hem gud for askem iumiseleva disfala kwestin: ‘Waswe, taem mi prea toktok blo mi hem olsem mi copyim nomoa wanfala leta wea narawan raetem, or hem olsem wanfala leta wea miseleva raetem from heart for wanfala klos fren?’ For sure, iu barava lovem Jehovah, and laek for strongim wei wea iu fren witim hem. For duim datwan, iu mas story witim hem evritaem. Storyim lo Jehovah evri samting wea hard for iu talem lo eni nara man. Storyim olketa hapi and feel nogud blo iu. Barava trustim hao iu savve askem hem for helpem iu. w20.02 9 ¶4-5

Jehovah givim important responsibility lo olketa elder for lukaftarem olketa pipol blo hem. Olketa elder savve lane from hao Nehemiah treatim pipol blo Jehovah. From Nehemiah hem governor blo Judah, hem garem paoa for disaedem staka samting. (Nehemaea 1:11; 2:7, 8; 5:14) Tingim samfala hard samting wea Nehemiah mas feisim. Hem herem dat pipol lo there duim samting wea no showimaot respect lo temple blo Jehovah, and olketa no sapotim olketa Levite olsem Law talem. Olketa Jew no obeyim law blo Sabbath, and samfala lo olketa maritim olketa woman wea no Jew. Governor Nehemiah mas deal witim datfala hard situation. (Nehemaea 13:4-30) Nehemiah no iusim paoa wea hem garem for forcem pipol blo God for followim tingting blo hemseleva. Bat, hem prea and barava askem Jehovah for helpem hem, and hem teachim pipol abaotem Law blo Jehovah. (Nehemaea 1:4-10; 13:1-3) Nehemiah hambol tu for waka tugeta witim olketa brata blo hem for buildim bak wall blo Jerusalem.—Nehemaea 4:15. w19.09 16 ¶9-10