July

Taem samwan no kaen or tok raf lo iumi datwan maet mekem iumi wari tumas. Especially sapos man wea mekem iumi feel nogud hem klos fren or relative. For deal witim datfala wari, iumi savve lane from Bible example blo Hannah, wea kasem hard taem from wei wea mek-tu waef blo hasband blo hem savve barava tok spoelem hem. (Fas Samuel 1:12) Olsem Hannah, iumi tu savve story longtaem witim Jehovah and talem hem wanem iumi wari abaotem and fraetem. Prea blo iumi no need for perfect or olsem wanfala poem. Maet iumi prea bikos iumi feel nogud tumas and gogo iumi krae tu. Nomata olsem, Jehovah no taet for lisin lo iumi. Taem iumi prea abaotem olketa problem blo iumi, iumi need for tingim tu toktok wea stap lo Philippi 4:6, 7. Paul talem klia dat taem iumi prea, iumi shud talem thankiu lo Jehovah. Iumi garem staka reason for thankiu lo hem. Olsem example, iumi savve thankiu for laef wea hem givim iumi, olketa samting hem wakem, love blo hem, and nambawan hope wea hem givim. w20.02 21 ¶3; 22 ¶6

Wei for toktok hem present from Jehovah. (Eksodas 4:10, 11; Rev. 4:11) Insaed Bible, Jehovah helpem iumi luksavve lo hao for iusim gud disfala present. Iumi shud evritaem redi for story abaotem Jehovah and Kingdom. (Matt. 24:14; Rome 10:14) Taem olsem, iumi followim example blo Jesus. Wanfala lo olketa main reason why Jesus kam lo earth hem for talemaot truth abaotem Dadi blo hem. (John 18:37) Bat iumi mas tingim dat hao iumi story hem important tu. So taem iumi story lo olketa narawan abaotem Jehovah, iumi mas duim datwan witim wei for “hambol and showimaot bigfala respect,” and iumi shud showimaot iumi tingim feeling blo pipol and wanem olketa bilivim. (1 Pet. 3:15) Taem olsem, iumi no just toktok nomoa, bat iumi teachim olketa and maet iumi savve kasem heart blo olketa. Olketa elder mas no hol bak for talem samting sapos olketa luksavve dat wanfala brata or sista needim kaonsel. Bat, olketa mas chusim raet taem for story mekem datfala brata or sista no feel shame. w20.03 18-19 ¶2-4

Wanem nao iumi savve prea abaotem? Iumi savve prea and askem Jehovah for “strongim go moa faith” bilong iumi. (Luke 17:5; John 14:1) Iumi needim faith bikos Satan bae testim evriwan wea followim Jesus. (Luke 22:31) Hao nao faith savve helpem iumi? Taem iumi duim evri samting wea iumi fit for duim for deal witim wanfala hard taem, faith bae muvim iumi for leavim evri wari bilong iumi long hand bilong Jehovah. Bikos iumi trustim hao Jehovah nao savve wanem for duim winim iumi, datwan helpem iumi for garem peace long mind and heart. (1 Pet. 5:6, 7) Prea helpem iumi for gohed garem peace long mind nomata iumi feisim eni hard taem. Tingim example bilong Robert, wanfala faithful elder wea distaem hem winim 80 year. Hem sei: “Toktok long Philippi 4:6, 7 helpem mi for deal witim staka hard taem long laef bilong mi. Mi mas deal witim olketa problem saed long selen. And tu, for lelebet taem mi lusim privilege bilong mi olsem wanfala elder.” Wanem nao helpem Robert for gohed garem peace long mind? Hem sei: “Taem mi start for wari, mi kwiktaem for prea. Mi luksavve taem mi prea staka taem and barava prea strong from heart, datwan helpem mi for garem peace long mind.” w19.04 9-10 ¶5-7

Child abuse hem wanfala sin againstim God. Taem samwan sin againstim nara man, datwan minim hem sin againstim God tu. Tingim example wea stap long Law wea God givim long olketa Israelite. Law sei sapos man hem ravem or laea long narawan, datwan minim hem sin againstim Jehovah. (Levitikas 6:1-4a) So taem samwan wea part long kongregeson abusim wanfala pikinini, hem sin againstim Jehovah bikos hem ravem or laea long datfala pikinini. Pikinini hia trustim hem bat hem iusim datfala trust for spoelem datfala pikinini, from datwan pikinini hia no feel sef nao. Man wea abusim pikinini hia hem barava spoelem nem bilong Jehovah. Dastawe, iumi fit for sei wei for duim child sexual abuse hem wanfala serious sin againstim God and iumi barava heitim datwan. Staka article long Wastaoa and Awake! storyim hao nao samwan wea kasem sexual abuse savve deal witim olketa feeling wea kamap from samting wea happen. Olketa storyim tu hao olketa narawan savve helpem and encouragem olketa, and wanem olketa parents savve duim for protectim pikinini. Olketa elder tu kasem training wea kam from Bible long wanem for duim taem samwan hem duim child sexual abuse. Organization gohed reviewim hao olketa elder savve deal witim olketa case bilong child abuse. w19.05 9 ¶8-9

Bible hem olsem wanfala sharp sword wea savve showimaot klia olketa laea wea Satan mekhae long hem. (Eph. 6:17) Olsem example, Bible talemaot klia olketa wea dae no savve story witim olketa wea laef. (Sams 146:4) Bible remindim iumi tu hao only Jehovah nomoa savve wanem bae kamap long future. (Aesaea 45:21; 46:10) Sapos iumi readim and ting raonem Bible evritaem, datwan bae helpem iumi for redi for rejectim and heitim olketa laea wea olketa demon laekem iumi for bilivim. So no duim eniting wea join witim spiritism. From iumi olketa tru Christian, iumi no duim eniting wea join witim eni wei for duim spiritism. Olsem example, iumi no go long olketa kastom man or trae for story long eni wei witim olketa wea dae finis. Iumi mas stap klia from olketa funeral kastom wea mekhae long biliv wea sei olketa wea dae olketa gohed for laef samwea. And iumi no iusim olketa star or eni nara samting for trae for savve long wanem bae happen long future. Iumi savve evri wei olsem hem barava danger tumas and hem savve mekem wei for Satan and olketa demon for affectim iumi. w19.04 21-22 ¶8-9

Pipol wea laek for followim wisdom bilong world tingse olketa standard long Bible saed long sex hem no fitim. Olketa kaen pipol olsem savve sei, ‘Why nao God wakem olketa man witim feeling for laekem sex and then long semtaem hem talem olketa for kontrolem datfala feeling?’ Datfala kwestin kamap bikos olketa tingse man mas duim samting followim wanem body laekem. Bat Bible no tok olsem. Bible respectim wei wea iumi man fit for chus for kontrolem iumiseleva for no duim samting wea no stret. (Col. 3:5) And tu, Jehovah provaedem marit olsem stretfala wei for satisfaem disfala feeling for duim sex. (1 Cor. 7:8, 9) Bible teachim iumi stretfala wei for ting long sex, and diswan barava difren from wisdom bilong disfala world. Bible sei sex hem wanfala hapi samting insaed marit. (Provebs 5:18, 19) Nomata olsem, Bible sei: “Iufala wanwan mas savve hao for kontrolem body bilong iufala mekem iufala holy and God hem hapi long iufala. Iufala mas no letem feeling for laekem tumas sex for kontrolem iufala.”—1 Thess. 4:4, 5. w19.05 22-23 ¶7-9

God bae no letem olketa nation for distroem pipol blo hem. Olketa pipol blo hem praod for garem nem blo hem, and olketa obeyim komand blo hem for ranawe from Bigfala Babylon. (Acts 15:16, 17; Rev. 18:4) Olketa waka hard tu for helpem olketa narawan for go aot from Bigfala Babylon. From datwan, olketa wea worshipim Jehovah bae no ‘kasem olketa nogud samting wea bae kasem Bigfala Babylon.’ Nomata olsem, faith blo olketa bae kasem test. (Esikiel 38:2, 8) Bihaen Jehovah distroem evri false religion, pipol blo hem nomoa bae showaot klia olsem taem wanfala tree hem standap seleva bihaen bigfala cyclone. Datwan bae mekem Satan for barava kros. Bae hem showimaot kros blo hem thru lo olketa “message wea no klin,” wea minim olketa laea story wea demon nao bihaenem wea bae kosim olketa nation for join tugeta for attakim pipol blo Jehovah. (Rev. 16:13, 14) Datfala grup blo olketa nation hem nao ‘Gog from land blo Magog.’ Taem olketa nation start for attakim pipol blo Jehovah, datwan minim olketa kasem nao datfala tokpiksa ples Armageddon.—Rev. 16:16. w19.09 11 ¶12-13

Lo taem blo olketa Israelite, Satan iusim false religion for mekhae lo sex. Distaem hem duim sem samting tu. False religion acceptim nomoa eni kaen wei for duim sex, and tu, hem sei diswan hem normal samting nomoa. From diswan, olketa wea sei olketa worshipim God nating followim olketa kliafala standard blo God saed lo fasin. Lo leta blo aposol Paul for olketa lo Rome, hem storyim wanem nao kamaot from wei for no followim standard blo God. (Rome 1:28-31) Samfala lo olketa “rabis samting” wea Paul storyim hem nao evrikaen wei for duim sex wea no stret, insaed diswan hem wei for homosexual. (Rome 1:24-27, 32; Rev. 2:20) Hem barava important for iumi obeyim olketa klia teaching wea stap insaed lo Bible! Olketa tingting and idea blo man encouragem wei for againstim or rejectim olketa raeteous standard blo Jehovah. Hem no helpem iumi for garem olketa wei blo holy spirit, bat hem mekem iumi followim “olketa nogud samting wea man laek for duim.” (Gal. 5:19-23) Olketa kaen tingting hia mekem pipol for praod and bikos lo datwan olketa “tingim olketa seleva nomoa.” (2 Tim. 3:2-4) Olketa wei hia barava opposite lo wei for hambol wea hem nao wanem God hem laekem pipol blo hem for garem.—Mektu Samuel 22:28. w19.06 5-6 ¶12-14

Lo taem wea Elijah worshipim Jehovah, laef hem no isi and hem feisim olketa bigfala challenge. Taem Jehovah talem Elijah for givim samfala waka blo hem for Elisha, datwan barava helpem Elijah bikos Elisha kamap gudfala fren wea helpem hem for deal witim olketa hevi blo hem. Lo sem wei tu, taem iumi story witim wanfala gudfala fren wea iumi trustim, bae hem savve helpem iumi for deal witim olketa hevi blo iumi. (Mektu Kings 2:2) Sapos iu feel olsem iu no garem eniwan wea iu trustim for story lo hem, prea lo Jehovah for helpem iu for faendem wanfala mature brata or sista wea savve encouragem iu. Jehovah helpem Elijah for deal witim stress wea hem kasem and datwan helpem hem for gohed faithful for staka year. Story blo Elijah givim iumi hope. Samfala taem, maet iumi barava stress and datwan kosim body and feeling blo iumi for barava taed. Nomata olsem, sapos iumi depend lo Jehovah, hem bae givim iumi strong wea iumi needim for gohed worshipim hem.—Aesaea 40:28, 29. w19.06 15 ¶4; 16 ¶9-10

Taem iumi talemaot lo pipol gud nius abaotem Kingdom blo God, datwan strongim wei wea iumi no fraet. Why nao olsem? Bikos preaching waka savve teachim iumi for trustim Jehovah and winim wei for fraetem olketa man. For man garem strongfala masol hem mas duim exercise evritaem. Olsem tu, iumi savve strongim wei for no fraet taem iumi preach lo pablik, from haos tu haos, lo enitaem witnessing, and lo olketa bisnis territory. Sapos iumi no fraet for preach distaem, datwan bae redyim iumi for gohed preach lo future nomata sapos gavman banim waka blo iumi. (1 Thess. 2:1, 2) Iumi savve lanem staka samting from example blo wanfala faithful sista wea showimaot hem no fraet. Hem nao Nancy Yuen, wea tol blo hem 1.5 meter nomoa. Bat nomata hem wanfala short woman nomoa, hem nating fraet. Hem no laek stop for preachim gud nius abaotem Kingdom blo God. From datwan, olketa putim hem lo prison lo Communist China for winim 20 year. Olketa police wea kwestinim hem sei lo full kantri blo olketa, hem nomoa “wanfala woman wea garem strongfala tingting” wea no eniwan fit for changem! w19.07 5 ¶13-14

Samfala pipol wea iumi meetim barava laek for lane abaotem Bible, bat staka narawan maet luk olsem olketa no interest. Maet iumi nao mas duim samting for mekem olketa interest. For iumi duim gud ministry, iumi mas barava prepare gud. Chusim olketa subject wea pipol wea iumi meetim bae interest lo hem. Then tingim hao nao for startim story for fitim datfala topic. Olsem example, maet iu savve askem haosholder: “Staka problem wea iumi feisim distaem hem affectim pipol evriwea lo world, hao nao lukluk blo iu lo olketa samting hia? Iu tingse sapos full world garem wanfala gavman nomoa, bae datwan savve finisim evri problem hia?” Then story witim hem abaotem Daniel 2:44. Or iu savve askem samwan, “Wanem nao savve helpem iumi for teachim olketa pikinini for garem gudfala wei? Mi laek for herem tingting blo iu.” Then story witim hem abaotem Diutronomi 6:6, 7. Tru nao, iumi barava hapi taem iumi helpem pipol for kamap disaepol blo Christ. w19.07 15 ¶4, 6-7

Lo wanfala kantri lo Far East, wanfala brata wea savve preach lo pipol wea no interest lo religion, sei: “Staka taem, sapos pipol lo hia sei, ‘Mi no biliv lo God,’ really olketa minim olketa no bilivim olketa kastom god blo olketa. So mi savve sei, hem tru, staka lo olketa god hia man nomoa wakem bat olketa hia no really god. Mi readim Jeremiah 16:20 and ask olsem: ‘Hao nao bae iumi luksavve lo wanfala really god and god wea man nomoa wakem?’ Mi lisin gud lo hem, then mi readim Isaiah 41:23, NW, wea sei: ‘Talem mi wanem nao bae happen lo future mekem mifala luksavve iufala olketa god.’ Then mi showim example lo hao Jehovah talem samting wea kamap lo future.” Nara brata sei: “Mi savve showim samfala example blo wisdom lo Bible, olketa Bible profesi wea fulfill, and olketa law wea kontrolem universe. Then mi showim hao evri samting hia pruvim wanfala wise Creator hem stap. Taem samwan start for bilivim hao wanfala God maet stap, then mi showim hem wanem Bible talem abaotem Jehovah.” w19.07 23-24 ¶14-15

Olketa samting hia wea important nao, hem for mekem nem blo Jehovah holy, olketa promis blo hem kamap tru, and wei wea kongregeson garem peace and wan mind. (Matt. 6:9, 10; John 13:35) Taem iumi mekem olketa samting hia kamap important lo laef blo iumi, datwan pruvim iumi lovem Jehovah. Aposol Paul talem tu for iumi “mas klin” or perfect. Datwan no minim for iumi mas barava perfect. Jehovah bae ting lo iumi olsem iumi perfect, sapos iumi barava duim best for strongim love blo iumi and duim olketa samting wea barava important. Wanfala wei for showimaot love blo iumi hem for traem best for no mekem narawan stambol. Instruction wea Paul talem for no mekem narawan stambol hem wanfala warning. Hao nao iumi maet mekem narawan stambol? Maet hapitaem, kaleko, or waka wea iumi chusim hem mekem narawan for stambol. Maet iumi no duim eni rong samting. Bat sapos wanem iumi chusim hem spoelem konsens blo narawan or datwan mekem hem stambol, datwan hem serious samting.—Matt. 18:6. w19.08 10 ¶9-11

Start kam lo 1935, olketa Jehovah’s Witness luksavve hao datfala big crowd lo vision blo John, hem nao datfala grup blo olketa faithful Christian wea garem hope for laef olowe lo earth. (Rev. 7:9, 10) For olketa laef go thru lo datfala big trabol, datfala big crowd mas lane abaotem olketa wei blo Jehovah bifor datfala Wan Thousand Year Rul hem start. Olketa need for showimaot olketa garem strong faith for mekem olketa winim olketa “samting hia wea bae happen” bifor Wan Thousand Year Rul blo Christ. (Luke 21:34-36) Datfala big crowd hapi lo hope wea olketa garem. Olketa luksavve Jehovah nao bae chusim wea nao hem laekem olketa wea faithful for worshipim hem for go, lo heven or lo earth. Olketa anointed and olketa lo big crowd luksavve hao reward wea olketa bae kasem hem no bikos lo wanem olketa duim bat bikos Jehovah kaen tumas taem hem provaedem ransom sakrifaes blo Jesus Christ.—Rome 3:24. w19.09 28 ¶10; 29 ¶12-13

Waswe, iu garem wanfala niu assignment? Iu savve duim gud niu assignment blo iu. No tingse change wea kamap hem bikos iu no duim gud old assignment blo iu, or iu no fit. Tingim staka wei wea Jehovah gohed helpem iu and iu mas no givap for preach. Followim example blo olketa faithful Christian lo first century. Nomata wea nao olketa stap, olketa gohed for “talemaot gud nius long pipol long evri ples wea olketa kasem.” (Acts 8:1, 4) Taem iu gohed waka hard for preach, iu bae kasem staka gud samting. Olsem example, samfala pioneer wea gavman raosem from wanfala kantri, go lo nara kantri wea stap klosap, wea garem big need for preach lo pipol wea story lo sem languis blo olketa. Insaed tu-thri month nomoa, staka languis grup nao kamap and olketa gohed for grow. Nomata sapos iumi lovem tumas assignment blo iumi, samting wea shud mekem iumi hapi hem bikos iumi lovem Jehovah. So gohed depend lo Jehovah for leadim iumi, givim iumi wisdom, and sapotim iumi. Reason why iu lovem old assignment blo iu hem bikos iu laek duim best blo iu for helpem pipol lo there. So duim best lo assignment blo iu and bae iu lukim hao Jehovah bae helpem iu for lovem disfala assignment tu.—Eklesiastes 7:10. w19.08 24-25 ¶15-16

Iumi shud stap anda lo Jehovah bikos hem nao Creator blo iumi. Hem nao garem raet for markem olketa standard for iumi followim bikos hem nao wakem iumi. (Rev. 4:11) Bat nara important reason for obeyim Jehovah, hem bikos rul blo hem nao barava nambawan. Lo history, iumi lukim samfala man kasem paoa for rul ovarem olketa narawan. Bat taem iumi comparem witim hao Jehovah rul, Jehovah nao barava wise, garem love, mercy, and hem tingim pipol. (Eksodas 34:6; Rome 16:27; 1 John 4:8) Iumi stap anda lo Jehovah taem iumi duim best for obeyim hem lo evri samting and for iumi againstim wei for laek depend lo savve blo iumiseleva. (Provebs 3:5) Hem no hard for stap anda lo Jehovah taem iumi savve lo olketa gudfala wei blo hem. Why nao olsem? Bikos olketa gudfala wei blo hem showaot lo evri samting wea hem duim. (Sams 145:9) Taem iumi lanem moa samting abaotem Jehovah datwan hem helpem iumi for lovem hem go moa. And taem iumi lovem Jehovah, iumi no needim staka rul wea talem iumi wanem for duim and no duim. w19.09 14 ¶1, 3

Satan putim hevi lo pipol, wea datwan mekem olketa no garem eni hope. Olsem example, hem laekem iumi for bilivim hao Jehovah no savve forgivim olketa sin blo iumi and hem no lovem iumi. Datfala nogud laea hem mekem pipol barava feel wikdaon! (John 8:44) Taem iumi “kam long” Christ, iumi kasem forgiveness for olketa sin blo iumi. (Matt. 11:28) And tru samting nao, Jehovah barava lovem iumi evriwan. (Rome 8:32, 38, 39) Waka wea Jesus askem iumi for duim hem no hevi olsem olketa nara waka wea iumi mas duim. Olsem example, taem iumi waka for selen, lo end blo day, iumi taed and no satisfae tu. Bat taem iumi iusim taem blo iumi for servem Jehovah and Christ, iumi barava feel satisfae. Iumi maet taed tumas and iumi forcem iumiseleva for go lo kongregeson meeting lo datfala evening. Bat taem iumi kasem bak haos bihaen meeting, iumi barava strong and no taed nao. And tu, taem iumi waka hard for preach and duim study seleva, gud samting wea iumi kasem hem winim nao hard waka wea iumi duim! w19.09 20 ¶1; 23-24 ¶15-16

Insaed lo lelebet taem wea hem stap yet bifor “day bilong Jehovah” hem start, Jehovah expectim iumi for gohed busy for preach. Iumi mas mek sure iumi duim staka samting “long waka bilong Lord.” (1 Cor. 15:58) Taem Jesus storyim olketa big samting wea bae happen lo olketa last day, hem sei tu: “Waka for preachim gud nius mas gohed long evri kantri firstaem.” (Mark 13:4, 8, 10; Matt. 24:14) So tingim diswan: Each taem iu go preach, iu help for fulfillim datfala Bible profesi! Evri year, staka pipol moa herem disfala gud nius. Olsem example, tingim hao evriwea lo world namba blo olketa wea talemaot gud nius abaotem Kingdom hem gohed for grow lo olketa last day. Lo 1914, iumi garem 5,155 pablisa lo 43 kantri. Distaem, samting olsem 8.5 million pablisa nao stap lo 240 kantri! Nomata olsem, waka blo iumi hem no finis yet. Iumi mas gohed for talemaot hao Kingdom blo God nomoa savve finisim olketa problem wea man garem.—Sams 145:11-13. w19.10 8 ¶3; 9-10 ¶7-8

Jehovah iusim Barzillai for helpem King David. Taem David ranawe from son blo hem Absalom, David and olketa pipol “hanggre an taet, an olketa barava dae fo wata tu.” Barzillai hem olo lo datfala taem, hem and olketa narawan putim laef blo olketa lo danger for helpem David and olketa wea gogo witim hem. Barzillai no tingse bikos hem olo, Jehovah bae no savve iusim hem nao. Bat hem kaen tumas for givim wanem hem garem for helpem olketa servant blo God. (Mektu Samuel 17:27-29) Wanem nao iumi lanem from diswan? Nomata iumi young or olo, Jehovah savve iusim iumi for helpem olketa brata and sista wea needim help, maet lo ples blo iumi or lo nara kantri. (Provebs 3:27, 28; 19:17) Nomata sapos iumi no savve go for helpem olketa, iumi savve givim contribution lo waka raonem world mekem olketa selen hia helpem olketa brata and sista lo eni ples and lo taem wea olketa needim.—2 Cor. 8:14, 15. w19.10 21 ¶6

Maet iumi no savve feel free for story lo olketa narawan, bikos maet samwan bin mekem iumi feel nogud. (Provebs 18:19) Or maet iumi feel iumi no garem inaf taem and strong for mek fren witim olketa narawan. Nomata olsem, iumi shud no givap. Sapos iumi laekem olketa brata blo iumi for sapotim iumi lo olketa hard taem, then iumi mas lane for trustim olketa lo wei for talemaot tingting and feeling blo iumi lo olketa distaem. Datwan hem wanfala important samting wea helpem iumi for kamap olketa tru fren. (1 Pet. 1:22) Jesus showimaot hem trustim olketa fren blo hem taem hem feel free for story witim olketa. (John 15:15) Iumi followim example blo Jesus taem iumi storyim hapi, olketa wari, and feel nogud blo iumi. Taem iu lisin gud lo narawan, maet datwan helpem iu for luksavve dat samfala tingting, feeling, and goal blo iutufala hem semsem. Sapos iu nao feel free for story witim olketa narawan, datwan bae strongim wei wea iufala fren gud tugeta.—Provebs 27:9. w19.11 4 ¶8-9

Lo taem blo datfala bigfala trabol, luk olsem message wea iumi bae talemaot bae hem change. Distaem, iumi preachim gud nius abaotem Kingdom and iumi traem best for helpem pipol kamap disaepol. Bat lo datfala taem, maet iumi bae talemaot wanfala strong message wea Bible sei hem olsem hail ston. (Rev. 16:21) Maet iumi bae talemaot hao world blo Satan hem redi for finis. Lo datfala taem nao, bae iumi savve wanem nao datfala message and hao for talemaot. Waswe, bae iumi iusim olketa sem wei for duim ministry wea iumi bin duim or bae iumi iusim olketa nara wei moa? Iumi lukluk nomoa, iumi no savve yet. Nomata hao nao iumi bae duim datwan, luk olsem iumi bae garem datfala privilege for no fraet for talemaot judgment message blo Jehovah! (Esikiel 2:3-5) Luk olsem, message blo iumi bae mekem olketa nation for trae for finisim disfala preaching waka for olowe. Olsem iumi depend lo Jehovah distaem for sapotim iumi lo preaching waka, iumi bae needim sapot blo hem tu lo datfala taem. Iumi sure God blo iumi bae givim paoa for strongim iumi for duim wanem hem laekem.—Maeka 3:8. w19.10 16 ¶8-9

Datfala toktok for “lusim” hem minim iumi shud no letem wei for laek kasem olketa samting wea iumi no needim for mekem iumi go difren. From datwan, bae iumi letem heart blo iumi “laekem samting wea spoelem” iumi. (1 Tim. 6:9) Winim wei for letem olketa feeling olsem for grow insaed heart blo iumi, iumi mas ting lo olketa samting hia olsem weapon wea savve spoelem iumi. Iumi maet garem selen for baem staka material samting. Waswe, hem rong for baem olketa samting wea iumi laekem bat iumi no barava needim? Maet nomoa. Bat tingim olketa kwestin hia: Nomata sapos iumi fit for baem wanfala samting, waswe iumi garem taem and strong for iusim and lukaftarem datwan? And waswe, iumi start for laekem tumas olketa samting wea iumi garem finis? Hao nao wei for laekem tumas olketa material samting bae mekem iumi olsem datfala young man wea rejectim invitation blo Jesus for duim moa samting lo waka blo God? (Mark 10:17-22) Hem barava gud for iumi garem simpol laef and spendem taem and strong wea iumi garem for duim wanem God laekem! w19.11 18 ¶15-16

God savve givim iu strong for duim samting mekem iu duim wanem iu disaedem. (Phil. 2:13) So prea lo Jehovah for givim holy spirit for strongim iu. Gohed prea nomata sapos iu tingse iu no kasem yet ansa for prea blo iu. Olsem Jesus sei: “Gohed for ask and iufala bae kasem [holy spirit] wea iufala ask for hem.” (Luke 11:9, 13) And tu, mekem wanfala plan. For finisim eni project wea iu startim, iu needim wanfala plan. Then iu need for waka followim datfala plan. Lo sem wei, taem iu mekem wanfala disison, iu need for mekem wanfala list lo olketa samting wea iu bae duim for followim wanem iu disaedem. Taem iu divaedem olketa bigfala waka go lo olketa sismol waka, bae hem isi for iu lukim wanem iu duim finis and wanem iu need for duim moa. Aposol Paul encouragem olketa lo Corinth for putim lelebet samting for contribution blo olketa “long evri first day long week,” winim for weit and trae for kolektem selen taem hem arrive. (1 Cor. 16:2) Wei for divaedem olketa bigfala waka go lo olketa sismol waka bae helpem iumi for no feel olsem waka hia hem big tumas. w19.11 29 ¶13-14

For savve lo Jehovah, hem minim for savve lo nem blo God or for savve abaotem samfala samting wea God talem or duim. Bat, for savve gud lo Jehovah hem winim moa datwan. Iumi need for spendem taem for lane abaotem Jehovah and olketa nambawan wei blo hem. Datwan nomoa bae helpem iumi start for minim wanem nao muvim Hem for talem or duim samting. Taem olsem, bae iumi luksavve sapos Jehovah hapi lo wanem iumi tingim, olketa disison blo iumi, and wanem iumi duim. Taem iumi luksavve wanem Jehovah laekem iumi for duim, iumi need for followim wanem iumi lanem. Samfala pipol maet tok spoelem iumi bikos iumi laek for servem Jehovah, and olketa maet againstim iumi taem iumi start for associate witim pipol blo hem. Nomata olsem, sapos iumi trustim Jehovah, hem bae no lusim iumi. Datkaen wei for trust hem mekem iumi garem strong faondeson for fren witim Jehovah for full laef blo iumi. Waswe, iumi fit for savve gud lo Jehovah olsem? Yes, iumi savve duim! w19.12 16-17 ¶3-4

Samfala taem olketa challenge wea parents feisim hem mekem olketa feel olsem laef hem hard tumas, nomata olsem olketa pikinini hem present from Jehovah. Hem evritaem redi for helpem olketa parents. Hem willing for lisin lo prea blo olketa. And hem ansarem olketa prea hia thru lo Bible, olketa pablikeson, and example and advaes blo olketa nara mature parents lo kongregeson. Samfala sei wei for teachim pikinini hem wanfala 20-year project, bat for kamap dadi and mami hem for olowe nao. Wanfala lo olketa best samting wea olketa savve givim lo pikinini hem love, taem, and training wea kam from Bible. Hao each pikinini followim training wea hem kasem hem no semsem. Nomata olsem, staka pikinini wea parents blo olketa lovem Jehovah, olketa feel olsem Joanna Mae, wanfala sista lo Asia wea sei: “Mi barava thankiu lo wei wea parents blo mi olketa disciplinem mi and teachim mi for lovem Jehovah. Olketa no just givim mi laef nomoa, bat olketa givim mi laef wea garem mining.” (Provebs 23:24, 25) Staka million brata and sista feel olsem tu. w19.12 27 ¶21-22.

Hem no hard for faendem olketa brata and sista wea needim comfort. Iumi need for lukaotem chance for helpem narawan nomata sapos iumi fraet lelebet. Olsem example, maet iu fraet from iu no savve wanem for talem or duim for helpem samwan wea kasem hard taem. Nomata olsem, iumi savve kamap pipol wea savve comfortim olketa narawan sapos iumi showimaot iumi kea lo olketa. Taem iumi klosap lo end blo disfala world, evri samting lo world bae kamap moa worse and laef bae kamap moa hard. (2 Tim. 3:13) And from iumi no perfect and iumi sin, iumi bae kasem olketa problem, from datwan iumi bae gohed for needim comfort. Aposol Paul gohed faithful go kasem end lo laef blo hem bikos lo comfort wea hem kasem from olketa nara Christian. Taem iumi followim example blo olketa, iumi tu savve helpem olketa brata and sista blo iumi for gohed faithful for servem Jehovah.—1 Thess. 3:2, 3. w20.01 12-13 ¶17-19

Olketa wea anointed no expectim narawan for treatim olketa lo spesol wei. (Phil. 2:2, 3) And olketa savve hao taem Jehovah anointim olketa, hem no duim datwan lo wei wea evriwan bae savve. So wanfala anointed wan hem no sapraes sapos samfala no kwiktaem bilivim dat hem anointed. Hem luksavve hao Bible talem iumi for no kwiktaem bilivim samwan wea sei God givim hem wanfala spesol responsibility. From wanfala wea anointed no laekem pipol for mekhae lo hem, lo firstaem wea hem meetim samwan, bae hem no talem olketa dat hem anointed. And hem bae no tok praod abaotem datwan lo olketa narawan. (1 Cor. 4:7, 8) Olketa anointed Christian bae no trae for faendem olketa nara anointed wan for olketa storyim hao olketa kasem anointing, or for olketa seleva kam tugeta olsem wanfala grup for duim Bible study. (Gal. 1:15-17) Kongregeson bae no wan mind sapos olketa anointed wan duim olsem. Sapos olketa duim datwan olketa againstim holy spirit wea helpem pipol blo God for garem peace and wan mind.—Rome 16:17, 18. w20.01 28 ¶6-7

Insaed bigfala trabol, olketa pipol wea religion blo olketa distroe maet kros bikos olketa lukim hao Olketa Jehovah’s Witness nao only religion wea stap yet. Just tingim go hao datwan bae mekem olketa kros tumas, maet olketa bae iusim tu social media for letem pipol savve hao olketa barava kros. Olketa nation and ruler blo olketa, Satan, bae barava heitim iumi bikos iumi nomoa religion wea stap. Olketa no kasem goal blo olketa for finisim evri religion lo earth. So iumi bae kamap main target blo olketa. Taem hia nao, olketa nation bae kamap datfala Gog blo Magog. Olketa bae hipap tugeta and iusim evri paoa blo olketa for attakim pipol blo Jehovah. (Esikiel 38:2, 14-16) Taem iumi ting abaotem olketa samting hia wea bae happen hem maet mekem iumi wari bikos iumi no barava savve lo evri samting. Bat samting iumi sure lo hem nao: Iumi no need for fraetem datfala big trabol. Bikos Jehovah bae givim iumi instruction for sevem laef blo iumi.—Sams 34:19. w19.10 16-17 ¶10-11

Iumi no just tinghae lo Jehovah nomoa, bat iumi showimaot iumi tinghae thru lo toktok and wanem iumi duim. Diswan nao mekem pipol luksavve iumi difren from staka pipol distaem. Iumi stap lo world wea pipol no tinghae lo wanem God duim for olketa. Wanfala samting wea showimaot iumi stap lo “olketa last day” hem wei wea pipol no savve sei thankiu. (2 Tim. 3:1, 2) Iumi no laek for duim olsem! Jehovah laekem evri pikinini blo hem for fren gud tugeta. Tru nao, love wea iumi garem for each other nao showimaot iumi olketa tru Christian. (John 13:35) Iumi agree witim toktok blo man wea raetem psalm wea sei: “Hemi barava gud tumas taem olketa pipol blong God i wanmaen an stap tugeta.” (Sams 133:1) Taem iumi lovem olketa brata and sista blo iumi, iumi showimaot lo Jehovah dat iumi lovem hem. (1 John 4:20) Hem barava naes for kamap part lo wanfala famili blo olketa brata and sista wea “kaen long narawan and sorre” lo each other!—Eph. 4:32. w20.02 9 ¶6-7

Olketa samting wea mekem Hannah for wari tumas, hem no finis stretawe. Hannah hem mas still stap lo sem haos witim Peninnah. And tu, Bible no storyim sapos wei blo Peninnah hem change. So luk olsem Hannah mas gohed for deal witim olketa toktok blo Peninnah. Bat Hannah hem kasem bak nao peace and gohed keepim datwan. Tingim hao taem Hannah hem putim evri samting lo hand blo Jehovah, hem no wari nao. Hem letem Jehovah for comfortim hem and helpem hem for garem peace. Samfala taem bihaen, Jehovah ansarem prea blo Hannah and hem garem olketa pikinini! (Fas Samuel 1:19, 20) Iumi savve kasem bak peace nomata sapos olketa samting wea mekem iumi wari tumas hem still stap. Nomata sapos iumi gohed for prea and attendim olketa meeting evritaem, samfala problem wea iumi feisim hem no savve finis. Bat olsem iumi lanem from example blo Hannah, Jehovah bae gohed helpem iumi for garem peace lo heart. Jehovah bae no forgetim iumi, and hem bae blessim iumi bikos iumi gohed faithful.—Heb. 11:6. w20.02 22 ¶9-10

Olketa elder no hol bak for storyim olketa Bible principle for helpem olketa narawan for duim stret samting. Why nao hem barava important for olketa no hol bak for talem samting lo taem wea man needim? Tingim example blo Eli: Hae Priest Eli garem tufala son wea hem lovem tumas. Bat tufala son hia no respectim Jehovah. Tufala garem important position olsem priest lo tabernacle. Bat tufala iusim rong lo paoa wea olketa garem, tufala no respectim olketa offering wea olketa givim lo Jehovah, and no shame for durong. (Fas Samuel 2:12-17, 22) For fitim Law blo Moses, tufala shud dae, bat Eli tok lo tufala nomoa and letem tufala for gohed waka lo tabernacle. (Diutronomi 21:18-21) Hao nao Jehovah ting lo wei wea Eli deal witim datwan? Jehovah sei lo Eli: ‘Why nao yu tinghae long tufala san blong yu winim for tinghae long mi?’ So Jehovah disaed for killim dae tufala wicked son blo Eli.—Fas Samuel 2:29, 34. w20.03 19 ¶4-5