May

Taem Jesus young, hem chus for obeyim wanem parents blo hem talem. Jesus no enitaem rejectim advaes blo tufala bat “hem gohed for obeyim tufala.” For sure, Jesus duim gud responsibility blo hem olsem firstborn lo famili. Hem waka hard for lane from Joseph, dadi blo hem, hao for duim waka blo carpenter mekem hem savve help for sapotim famili. Luk olsem parents blo Jesus explainim hao paoa blo holy spirit mekem Mary babule, and tufala storyim tu samting wea olketa angel talem abaotem hem. (Luke 2:8-19, 25-38) Jesus studyim olketa Scripture for lanem moa samting abaotem wanem tufala storyim. Hao nao iumi savve lo datwan? Bikos taem hem smol boy yet, olketa teacher lo Jerusalem “barava sapraes long hao hem ansarem olketa kwestin and long bigfala savve wea hem garem.” (Luke 2:46, 47) And taem hem 12 year, Jesus savve finis Jehovah nao Dadi blo hem.—Luke 2:42, 43, 49. w20.10 29-30 ¶13-14

Iumi biliv lo resurrection bikos iumi sure Jesus hem resurrect. Taem aposol Paul storyim resurrection, hem storyim thrifala samting. Hem nao (1) “Christ hem dae for olketa sin blo iumi.” (2) “Olketa berem Christ.” (3) “Olketa Holy Raeting sei Christ laef bak long mek-thri day.” (1 Cor. 15:3, 4) Wanem nao thrifala samting hia minim for iumi? Isaiah profesi hao samfala bae killim dae Messiah, and then berem hem witim olketa nogud man. And no just datwan nomoa. Isaiah sei moa hao Messiah bae dae for sin blo evri man. Jesus duim datwan thru lo ransom sakrifaes blo hem. (Aesaea 53:8, 9, 12; Matt. 20:28; Rome 5:8) So wei wea Jesus dae, olketa berem hem, and hem resurrect, hem wanfala strongfala faondeson for hope blo iumi for kamap free from sin and dae and for iumi lukim moa olketa wea iumi lovem wea dae finis. w20.12 2-3 ¶4-6; 5 ¶11

Staka taem aposol Paul preach lo sinagog blo olketa Jew. Olsem example, lo sinagog lo Thessalonica for “thrifala Sabbath hem iusim olketa Holy Raeting for story witim olketa [Jew].” (Acts 17:1, 2) Luk olsem Paul feel free for story insaed sinagog bikos hem growap olsem wanfala Jew. (Acts 26:4, 5) Paul minim gud olketa Jew, dastawe hem no fraet for preach lo olketa. (Phil. 3: 5.) Bihaen Paul mas ranawe from olketa wea persecutim hem lo Thessalonica and lo Beroea, hem kasem Athens. Lo there tu, hem “story long olketa Jew and nara pipol wea worshipim God.” (Acts 17:17) Bat taem hem preach lo market, Paul garem difren audience. Samfala wea lisin hem olketa savveman and olketa Gentile wea ting lo message blo Paul olsem wanfala “niu teaching.” Olketa sei lo hem: “Iu storyim samfala samting wea here difren long mifala.”—Acts 17:18-20. w20.04 9 ¶5-6

No feel iusles taem iu stragol witim wanfala wik point. Remember, for kamap raeteous lo eye blo God hem no samting wea iumi kasem from wanem iumi duim, bat hem bikos God kaen tumas and givim ransom. (Eph. 1:7; 1 John 4:10) Olketa brata and sista lo kongregeson savve encouragem iumi! Olketa savve lisin taem iumi need for story and savve talem toktok wea encouragem iumi. (Provebs 12:25; 1 Thess. 5:14) Joy, wanfala sista lo Nigeria wea stragol witim wei for feel wikdaon sei: “Sapos mi no garem olketa lo kongregeson, mi no savve hu nao bae encouragem mi. Olketa brata and sista showimaot Jehovah ansarem olketa prea blo mi. From olketa encouragem mi, mi savve encouragem olketa narawan tu.” Bat, iumi need for tingim hao olketa brata and sista maet no evritaem savve iumi needim encouragement. So iumi need for story lo olketa and talemaot problem blo iumi. w20.12 23-24 ¶7-8

Staka taem, first samting wea iu duim for kamap gudfala fren blo samwan, hem nao for spendem taem witim hem. Taem iutufala story, sharem olketa idea and experience, iutufala bae kamap gudfala fren. Bat, for kamap gudfala fren blo Jesus iumi bae feisim samfala challenge, wanfala lo olketa challenge hia nao iumi no meetim Jesus enitaem. Staka Christian lo first century tu feisim sem challenge. Nomata olsem, aposol Peter sei: “Nomata iufala no lukim hem enitaem, iufala lovem hem. Nomata iufala no lukim hem distaem tu, iufala showimaot faith long hem.” (1 Pet. 1:8) So iumi fit for kamap gud fren blo Jesus nomata iumi no meetim hem enitaem. And tu, iumi no savve story lo Jesus. Taem iumi prea, iumi story lo Jehovah. Hem tru, iumi prea lo nem blo Jesus, bat iumi no story lo hem, and Jesus no laekem iumi for prea lo hem. Why nao olsem? Bikos prea hem wanfala wei for worship, and only Jehovah nomoa iumi shud worshipim. (Matt. 4:10) Nomata olsem, iumi savve showimaot iumi lovem Jesus. w20.04 20 ¶1-3

Olketa wea ranran lo olketa game lo Greece bifor feisim samfala challenge, olsem for taed tumas and feel pain. Only samting wea bae helpem olketa for win hem training wea olketa kasem and strong blo olketa seleva. Iumi olsem olketa tu bikos iumi kasem training lo hao for ran lo resis wea iumi insaed. Bat iumi garem wanfala samting wea olketa hia no garem. Iumi savve kasem strong from paoa blo Jehovah wea no savve finis. Sapos iumi depend lo Jehovah, hem promis for trainim iumi and strongim iumi tu! Aposol Paul tu deal witim staka challenge. Olketa pipol tok spoelem and persecutim hem, and samfala taem hem feel wik and mas deal witim samting wea hem sei hem olsem “wanfala nila wea stap long body” blo hem. (2 Cor. 12:7) Bat winim wei for ting lo olketa challenge hia olsem reason for givap, hem ting lo datwan olsem chance for depend lo Jehovah. (2 Cor. 12:9, 10) From Paul garem diskaen tingting, Jehovah helpem hem for winim evri hard taem wea kasem hem. w20.04 29 ¶13-14

Iumi garem spesol present wea iumi no savve lukim wea hem nao wei wea iumi “waka tugeta witim” Jehovah, Jesus, and olketa angel. (2 Cor. 6:1) Iumi duim diswan taem iumi duim ministry. Paul sei olsem abaotem hemseleva and olketa wea share insaed disfala waka: “Mifala waka tugeta witim God.” (1 Cor. 3:9) Taem iumi share lo ministry, iumi waka tugeta witim Jesus tu. Tingim hao bihaen hem givim komand lo olketa follower blo hem for “teachim pipol long evri kantri for kamap disaepol,” Jesus sei: “Bae mi stap witim iufala.” (Matt. 28:19, 20) Waswe lo olketa angel? Hem nambawan blessing for olketa angel leadim iumi taem iumi talemaot “gud nius . . . long evriwan long earth”! (Rev. 14:6) From iumi garem disfala sapot from heven, diswan helpem iumi for duim wanem? Taem iumi plantim Kingdom message, samfala seed foldaon lo gudfala heart and grow. (Matt. 13:18, 23) Hu nao mekem olketa seed hia grow and garem frut? Jesus explainim datwan lo text for tuday. w20.05 30 ¶14-15

Staka hasband and waef savve divorce. Nomata lo samfala famili wea parents and pikinini stap tugeta, maet olketa no fren gud. Wanfala savveman sei: “Lo staka famili, mami, dadi, and olketa pikinini no savve story lo each other, and olketa busy nomoa for lukluk lo computer, tablet, mobile, or pleim video game. Nomata olketa stap lo sem haos, olketa no savve fren gud witim each other.” Iumi no laek for olsem staka pipol lo world wea no showimaot love. Bat iumi laek for strongim love for olketa lo famili blo iumi and for olketa brata and sista lo kongregeson. (Rome 12:10) Olketa lo famili wea lovem each other barava fren gud tugeta. Hem nao kaen love wea iumi shud garem for olketa brata and sista insaed lo spiritual famili blo iumi. Taem iumi showimaot love for olketa brata and sista, datwan bae helpem iumi for stap gud tugeta and wan mind for worshipim Jehovah.—Maeka 2:12. w21.01 20 ¶1-2

Wanfala sports team wea wan mind bae win and no datwan wea no wan mind nao bae win. Heart blo iu savve olsem team wea win sapos tingting, wanem iu laekem, and feeling blo iu hem waka tugeta for servem Jehovah. Tingim, Satan laekem tumas for mekem heart blo iu divaed. Hem laekem tingting, wanem iu laekem, and feeling blo iu for go difren and againstim olketa standard blo Jehovah. Bat, for iu servem Jehovah, heart blo iu mas no divaed. (Matt. 22:36-38) No letem Satan for divaedem heart blo iu! Prea lo Jehovah olsem David duim: “Mekem full heart blo mi for fraet lo nem blo iu.” Then followim wanem iu prea abaotem. Each day, mek sure wanem iu disaedem, nomata hem big or smol, hem showimaot iu barava respectim holy nem blo Jehovah. From iu wanfala Jehovah’s Witness, wei for duim datwan bae mekem pipol for respectim datfala nem. (Provebs 27:11) And bae iumi evriwan fit for talem sem toktok olsem profet Micah wea sei: “Bae yumi gohed fo wosipim hem an obeim hem olowe.”—Maeka 4:5. w20.06 13 ¶17-18

Datfala attak wea king blo north witim evri gavman lo world duim, bae mekem Olmaeti God for barava kros and then war blo Armageddon bae start. (Rev. 16:14, 16) Lo datfala taem, king blo north and evri nation wea join tugeta for kamap Gog blo Magog bae finis, and “no eniwan bae helpem hem.” (Dan. 11:45, NW) Lo next verse Daniel storyim samfala information moa abaotem hao king blo north and olketa wea sapotim hem bae finis, and hao iumi bae sev. (Daniel 12:1) Wat nao disfala verse hem minim? Michael hem nara nem blo King blo iumi Jesus Christ wea rul distaem. Hem bin “lukaftarem” pipol blo God start kam lo 1914 taem Kingdom blo hem start lo heven. Klosap nao, bae hem duim samting for distroem olketa enemy blo hem lo war blo Armageddon. Datfala war bae kamap lo end blo taem wea Daniel hem kolem lo ‘taem blo trabol’ wea barava nogud tumas winim eni nara taem.—Rev. 6:2; 7:14. w20.05 15-16 ¶15-17

Taem Joseph kamap slave and then olketa putim hem lo prison, hem no savve duim staka samting. Wanem nao helpem hem for no wikdaon? Winim wei for gohed tingim olketa samting wea hem no fit for duim, hem duim best lo waka wea olketa givim hem. From Joseph evritaem duim wanem Jehovah laekem, Jehovah blessim evri samting wea Joseph duim. (Jenesis 39:21-23) Story blo Joseph mekem iumi tingim hao world hem nogud tumas, and pipol savve treatim narawan nogud. Nomata olketa brata and sista tu maet duim samting wea mekem iumi feel nogud. Bat sapos iumi tingim Jehovah hem olsem sef ples blo iumi for haed, bae iumi no wikdaon or stop for servem hem. (Sams 62:6, 7; 1 Pet. 5:10) Tingim tu, hao maet Joseph samting olsem 17 year nomoa taem Jehovah givim hem tufala spesol dream. Diswan showimaot Jehovah trustim olketa young wan tu. Distaem, staka young wan olketa olsem Joseph. Olketa garem strongfala faith lo Jehovah and samfala go lo prison bikos olketa gohed faithful lo Jehovah.—Sams 110:3. w20.12 16 ¶3; 17 ¶5, 7

Aposol Peter and John ,tufala ting lo wei wea olketa kasem persecution olsem wanfala privilege bikos tufala gohed for followim Jesus and preach abaotem hem. (Acts 4:18-21; 5:27-29, 41-42) Olketa disaepol no garem eni reason for feel shame. Samting wea olketa hambol Christian hia duim hem gud and helpem staka pipol winim samting wea olketa enemy blo olketa duim. Olsem example, olketa Bible buk wea samfala Christian hia raetem, hem gohed helpem and givim hope lo staka million pipol kam kasem distaem. And Kingdom wea olketa preach abaotem, hem rul distaem and klosap nao bae hem rul ovarem evriwan. (Matt. 24:14) Bat lo narasaed, Rome wea persecutim olketa Christian hem distroe longtaem finis, bat olketa faithful disaepol olketa kamap king distaem lo heven. Olketa enemy blo olketa, olketa dae longtaem finis, and nomata sapos olketa resurrect lo future, bae olketa mas stap anda lo kingdom wea olketa Christian wea olketa persecutim nao rulim.—Rev. 5:10. w20.07 15 ¶4

From Abraham garem strong faith lo olketa promis blo God, hem olsem hem lukim finis datfala Anointed Wan, or Messiah, wea bae kamap King lo Kingdom blo God. Dastawe Jesus talem olketa Jew: “Grani bilong iufala, Abraham, barava luk forward long samting wea mi bae duim. Hem lukim datwan and hem hapi tumas.” (John 8:56) So Abraham savve olketa lo laen blo hem bae kamap part lo Kingdom blo Jehovah, and hem willing for weitim Jehovah for fulfillim datfala promis. Hao nao Abraham showimaot hem weitim datfala Kingdom blo God? Wanfala samting, Abraham no part lo eni kingdom lo earth. Hem disaed for no stap lo wanfala ples and sapotim eni king blo world. And tu, Abraham no laek garem kingdom blo hemseleva bat hem gohed obeyim Jehovah and weitim olketa promis blo hem for kamap tru. Olketa samting hia showimaot Abraham garem strongfala faith lo Jehovah. w20.08 3 ¶4-5

Jehovah promisim taem Christ hem rul bae no eniwan sei: “Mi sik.” (Aesaea 33:24) So olketa wea laef bak bae kasem body wea healthy. Nomata olsem, olketa bae no perfect. Sapos olketa stretawe kamap perfect, maet hem hard for olketa famili and fren for luksavve lo olketa. Luk olsem insaed datfala thousand year wea Christ hem rul, bae evriwan isisi kamap perfect. Lo end blo datfala thousand year, Jesus bae givim bak datfala Kingdom lo Dadi blo hem. Lo datfala taem datfala Kingdom hem stretem finis evri samting followim hao Jehovah laekem, and evriwan bae perfect finis. (1 Cor. 15:24-28; Rev. 20:1-3) Tingim go taem wea iu bae welkamim bak olketa wea iu lovem wea dae finis. Waswe, bae iu laf or krae from iu hapi tumas? Waswe, bae iu singsing for praisem Jehovah? Wanfala samting wea iu savve sure lo hem nao, love blo iu for Jehovah and son blo hem Jesus bae barava strong bikos lo nambawan present blo datfala resurrection wea tufala givim. w20.08 16-17 ¶9-10

Aposol Paul encouragem olketa Christian for ting raonem sapos olketa savve gohed singol for servem Jehovah. (1 Cor. 7:8-9) Tru nao, Paul no ting daonem olketa Christian wea singol. Hem chusim young Timothy wanfala singol brata for lukaftarem olketa big responsibility. (Phil. 2:19-22) So hem no stret for ting lo wanfala brata wea fit for duim wanfala waka or nomoa, bikos hem marit or singol. (1 Cor. 7:32-35, 38) Jesus and Paul, no teachim hao olketa Christian mas marit or mas gohed for singol. So wanem nao bae iumi savve talem abaotem wei for marit and for singol? The Watchtower blo October 1, 2012, givim wanfala naes ansa, hem sei: “Really, [marit and wei for singol] tufala evriwan olsem present from God. . . . Jehovah hem no ting lo [wei for singol] olsem samting for shame lo hem or for sorre abaotem.” So taem iumi tingim datwan, iumi need for respectim olketa singol brata and sista blo iumi lo kongregeson. w20.08 28 ¶8-9

Lo samfala kantri, pipol barava laek for herem gud nius abaotem Kingdom. Olketa savve sei hem samting wea olketa bin weit for hem! Bat lo olketa nara kantri, maet pipol no interest lo God or Bible. Wanem nao tingting blo pipol lo ples wea iu stap? Nomata wanem kaen tingting nao pipol garem, Jehovah expectim iumi for gohed preach go kasem taem Jehovah sei disfala waka hem finis. Lo taem wea Jehovah markem, preaching waka bae finis and end bae kam. (Matt. 24:14) Jesus talem olketa disaepol blo hem abaotem olketa samting wea bae happen lo olketa last day. Hem savve olketa samting hia maet mekem olketa wea follower blo hem for no busy lo preaching waka. So hem talem olketa for “gohed for lukaot.” (Matt. 24:42) Lo taem blo Noah tu, staka samting mekem pipol busy and no laek herem warning blo Noah. Olketa sem samting savve happen distaem tu. (Matt. 24:37-39; 2 Pet. 2:5) Dastawe, iumi laekem waka wea Jehovah givim iumi for main samting lo laef blo iumi. w20.09 8 ¶1-2, 4

Satan “kros fogud,” and iumi hard for bilivim hem bae no kros lo iumi. (Rev. 12:12) Klosap nao, faith blo iumi evriwan bae kasem test. World bae kasem ‘bigfala trabol wea hem winim eni trabol wea happen start kam long taem world hem start, kam kasem distaem.’ (Matt. 24:21) Lo datfala taem, olketa famili member maet againstim iumi and gavman maet banim waka blo iumi. (Matt. 10:35, 36) Waswe, bae iumi olsem King Asa, wea trustim Jehovah for helpem and protectim hem? (Mektu Kronikols 14:11) Jehovah hem bin helpem iumi lo spiritual wei for redi for wanem bae happen lo future. Thru lo “wakaman wea faithful and wise” hem provaedem staka spiritual ‘kaikai lo barava taem’ for helpem iumi for gohed faithful lo worship blo iumi. (Matt. 24:45) Bat iumi tu mas duim part blo iumi and gohed for strongim faith blo iumi lo Jehovah.—Heb. 10:38, 39. w20.09 18 ¶16-18

Taem wanfala samting join witim plan blo Jehovah, maet bae hem iusim holy spirit blo hem for mekem pipol wea garem paoa for duim samting followim wanem hem laekem. Olketa man savve dig and tanem wata for go lo wanfala direction followim plan blo olketa. Olsem tu, Jehovah savve iusim holy spirit blo hem for changem tingting blo olketa ruler for duim samting for fulfillim plan blo hem. Lo taem olsem, olketa wea garem paoa mekem olketa disison wea helpem pipol blo God. (Comparem Esra 7:21, 25, 26.) Wanem nao iumi savve duim? Iumi savve “prea for olketa king and olketa bigman” taem olketa bae mekem eni disison wea bae affectim laef blo iumi and ministry blo iumi. (1 Tim. 2:1, 2; Nehemaea 1:11) Olsem olketa Christian lo first century, iumi tu prea lo God for olketa brata and sista blo iumi wea stap lo prison.—Acts 12:5; Heb. 13:3. w20.11 15 ¶13-14

Sapos iu study witim samwan wea baptaes, iu bae barava hapi for lukim datwan! (1 Thess. 2:19, 20) Olketa niu wan wea baptaes olketa olsem ‘leta wea pruvim iumi fit’ for study witim olketa, and for full kongregeson tu. (2 Cor. 3:1-3) Iumi hapi for lukim hao insaed fofala year, evriwea lo world iumi reportim samting olsem 10,000,000 Bible study. And lo fofala year hia tu, samting olsem 280,000 baptaes each year and kamap Jehovah’s Witness. Iumi laek for gohed helpem olketa Bible study blo iumi for gogo olketa baptaes. From Jehovah patient and givim taem and chance for pipol kamap disaepol blo Christ, iumi laek duim best blo iumi for helpem olketa for muv ahed for baptaes taem chance still stap yet. Lelebet taem nomoa stap!—1 Cor. 7:29a; 1 Pet. 4:7. w20.10 6 ¶1-2

Taem King Saul no obeyim Jehovah, profet Samuel go storyim datwan lo hem, bat Saul no agree. Hem mek excuse and sei samting wea hem duim hem smol nomoa and hem blamem olketa narawan. (Fas Samuel 15:13-24) Lo narataem bifor, Saul duim sem samting. (Fas Samuel 13:10-14) Sorre samting nao hem letem heart blo hem for kamap praod. Hem no stretem tingting blo hem, so Jehovah kaonselem hem and rejectim hem. For lane from example blo Saul, hem gud for tingim olketa kwestin hia: ‘Taem mi readim kaonsel from Bible, waswe, mi mek excuse for no followim datwan? Waswe, mi tingse wei wea mi no obey hem smol samting nomoa? Waswe, mi blamem olketa narawan for samting wea mi duim?’ Sapos iumi ansarem yes lo eni kwestin hia, iumi need for stretem tingting and wei blo iumi. Sapos nomoa bae iumi kamap praod and Jehovah bae no acceptim iumi for fren witim hem. w20.11 20 ¶4-5

Iufala young wan mas disaedem sapos iu laek for worshipim Jehovah. Iu mas pruvim lo iuseleva hu nao Jehovah, wanem nao insaed lo olketa plan blo hem, and hao iu savve duim wanem hem laekem lo laef blo iu. (Rome 12:2) Then iu bae fit for mekem disison wea barava important, wea hem nao for gohed worshipim Jehovah. (Josua 24:15) Sapos iu garem schedule for Bible reading and study seleva, iu bae barava lovem Jehovah and strongim faith blo iu. Datwan bae helpem iu for duim wanem Jehovah laekem. World blo Satan promisim hao sapos iu iusim savve wea iu garem for duim samting for iuseleva, iu bae hapi. Bat iumi savve hao pipol wea aftarem olketa material samting bae kasem “staka problem wea barava spoelem olketa.” (1 Tim. 6:9, 10) Bat sapos iu obeyim Jehovah and evritaem duim wanem hem laekem, bae iu duim samting wea wise and garem gudfala laef.—Josua 1:8. w20.10 30-31 ¶17-18

Lo first century, message wea Jesus preachim givim hope lo evri man. Hem talem olketa follower blo hem for gohed duim waka wea hem startim and for preach lo “evri farawe ples long earth.” (Acts 1:8) Bat olketa no savve duim waka hia lo strong blo olketa seleva. Olketa needim holy spirit wea Jesus promis for givim for helpem olketa. (John 14:26; Sekaraea 4:6) Olketa follower blo Jesus kasem holy spirit lo Pentecost 33 C.E. Datwan helpem olketa for preach and no longtaem nomoa staka acceptim gud nius. (Acts 2:41; 4:4) Taem pipol persecutim olketa disaepol, olketa no fraet bat askem God for helpem olketa. Olketa prea olsem: “Mekem olketa wakaman bilong iu no fraet for talemaot message bilong iu.” Then olketa kasem holy spirit and “olketa nating fraet nao for talemaot message bilong God.”—Acts 4:18-20, 29, 31. w20.10 21 ¶4-5

Why nao iumi barava sure Jehovah mekem Jesus laef bak? Staka wea witnessim hao Jesus hem laef bak storyim datwan. (1 Cor. 15:5-7) Firstfala witness wea aposol Paul storyim hem aposol Peter (Cephas). Samfala disaepol sei hem tru hao Peter lukim Jesus bihaen hem resurrect. (Luke 24:33, 34) Nara samting, “twelvfala aposol” tu lukim Jesus bihaen hem laef bak. Then maet lo datfala spesol hipap wea kamap lo Galilee wea Matthew 28:16-20 storyim “winim 500 brata nao lukim” Jesus. James, datfala haf brata blo Jesus wea bifor hem no bilivim hem Messiah. hem tu lukim Jesus bihaen hem resurrect. (John 7:5) Datwan mekem James for bilivim Jesus nao Messiah. Lo samting olsem 55 C.E. taem Paul raetem leta blo hem, staka wea lukim Jesus bihaen hem resurrect olketa still laef yet. So eniwan wea daot fit for askem olketa hia abaotem tru samting wea olketa lukim. w20.12 3 ¶5, 7-8

Taem iumi sik, and especially taem iumi deal witim sik wea body hem pain evritaem, maet hem no isi for garem stretfala tingting. So depend lo Jehovah for helpem iumi. Hem bae no finisim datfala sik, bat hem bae comfortim and strongim iumi for deal witim datwan. (Sams 94:19) Olsem example, hem maet iusim olketa brata and sista for helpem iumi, olsem for duim samfala waka lo haos. Hem maet iusim tu olketa brata for prea witim iumi. Or hem maet helpem iumi for tingim toktok lo Bible wea savve comfortim iumi, olsem hope for laef olowe wea no eniwan bae sik or kasem pain lo niu world. (Rome 15:4) Nomata olsem, iumi maet feel iumi no fit for duim wanem iumi laek for duim lo ministry. For 37 years, wanfala sista wea nem blo hem Laurel leidaon insaed machine wea helpem hem for brith! Hem garem cancer, hem kasem olketa operation, and garem sik wea affectim skin blo hem tu. Bat datwan no stopem hem for preach. Hem preach lo olketa nurse and olketa narawan wea kam for helpem hem, and hem helpem samting olsem 17 pipol for lane abaotem Jehovah! w20.12 24 ¶9; 25 ¶12

Aposol Paul needim help. Lo samting olsem 56 C.E., wanfala full grup pullim hem from temple lo Jerusalem and trae for killim hem dae. Lo next day, taem olketa tekem kam Paul lo Sanhedrin, olketa enemy blo hem klosap killim hem dae. (Acts 21:30-32; 22:30; 23:6-10) Lo datfala taem, Paul maet ting, ‘Waswe, bae mi fit for gohed winim disfala hard taem?’ Wanem help nao Paul kasem? Lo datfala naet bihaen olketa arrestim Paul, “Lord” Jesus, standap saed lo hem and sei: “Iu no fraet! Iu talem finis long evriwan long Jerusalem olketa samting abaotem mi, and iu mas talem pipol abaotem mi long Rome tu.” (Acts 23:11) Datfala encouragement kam lo barava taem! Jesus praisem Paul for waka wea hem bin duim lo Jerusalem. And hem promisim hao Paul bae stap sef kasem taem hem arrive lo Rome, and lo there hem bae gohed for duim waka blo hem. Masbi encouragement wea Paul kasem helpem hem for feel olsem pikinini wea feel sef taem dadi blo hem karem hem. w20.11 12 ¶1; 13 ¶3-4

Hope wea iumi garem “hem olsem wanfala anka for laef bilong iumi” wea mekem iumi stedy taem iumi kasem hard taem or warim samting. Hem gud for tingim olketa promis blo Jehovah for future. Lo datfala taem bae iumi no warim eni samting. (Aesaea 65:17) Tingim taem iu lo niu world and no eni nogud samting hem happen. (Maeka 4:4) Bae iumi strongim hope blo iumi taem iumi storyim diswan lo nara pipol, so iumi shud busy lo preaching waka and helpem pipol for kamap disaepol. Taem iumi duim datwan, “diswan bae mekem [iumi] barava biliv strong long datfala hope go kasem end.” (Heb. 6:11) From world hem klosap for finis, bae iumi feisim staka problem wea savve mekem iumi wari. Iumi savve deal witim olketa problem hia mekem iumi no wari tumas and for trustim Jehovah for strongim iumi. Iumi laek for showimaot iumi garem faith lo wanem Jehovah talem. Hem sei: ‘Sapos yufala trastem mi an stap kuaet, bae mi mekem yufala strong.’—Aesaea 30:15. w21.01 7 ¶17-18

James 5:11 storyim hao Jehovah lovem iumi, bat datfala verse sei tu Jehovah showimaot mercy. (Eksodas 34:6) Wanfala wei Jehovah showimaot mercy hem taem hem forgivim olketa sin blo iumi. (Sams 51:1) Bible sei for showimaot mercy hem minim for forgivim narawan. Bat tu, taem samwan showimaot mercy hem garem strong feeling for laek helpem narawan wea kasem hard samting. Jehovah sei datfala strong feeling wea hem garem for helpem iumi, hem winim feeling wea mami garem for lukaftarem pikinini blo hem. (Aesaea 49:15) Sapos iumi kasem olketa hard samting, Jehovah showimaot mercy taem hem helpem iumi. (Sams 37:39; 1 Cor. 10:13) Sapos olketa brata and sista mekem iumi feel nogud, iumi showimaot mercy lo wei for forgivim olketa and no gohed for kros. (Eph. 4:32) Bat main wei for showimaot mercy lo olketa brata and sista, hem for helpem olketa taem olketa kasem hard samting. Iumi laek followim example blo Jehovah wea evritaem showimaot love.—Eph. 5:1. w21.01 21 ¶5

Hed blo famili mas balance. Dadi shud no busy tumas lo waka blo hem gogo hem no duim nao olketa spiritual samting witim famili and spendem taem witim olketa and trainim olketa. Jehovah trainim and stretem iumi bikos hem laek for helpem iumi. (Heb. 12:7-9) Jesus followim example blo Dadi blo hem for trainim olketa disaepol. (John 15:14, 15) Nomata hem kaonselem olketa, hem duim lo kaenfala wei. (Matt. 20:24-28) Jesus savve iumi no perfect and iumi savve mekem olketa mistek. (Matt. 26:41) Hed blo famili bae laek for followim example blo Jehovah and Jesus. Hem bae luksavve waef and olketa pikinini savve mekem mistek and hem mas “no barava kros” lo olketa. (Col. 3:19) Taem hem need for stretem eni famili member, hem “mas kaen” olsem principle lo Galatia 6:1 storyim. Dadi shud luksavve hem tu savve mekem mistek. Hem laek followim example blo Jesus, and luksavve best wei for trainim olketa pikinini hem for showimaot gudfala example. w21.02 6-7 ¶16-18

Jesus sakrifaesim laef blo hem for olketa lo kongregeson and for eni narawan wea bae showimaot faith lo hem. (Mark 10:45; Acts 20:28; 1 Cor. 15:21, 22) So hem fitim for Jehovah markem Jesus for hed blo kongregeson. From Jesus hem hed blo iumi, hem garem raet for mekem olketa rul for iumi and for olketa kongregeson, and for mek sure iumi followim olketa rul hia. (Gal. 6:2) Bat Jesus no mekem olketa rul nomoa. Hem lovem iumi and barava lukaftarem iumi gud. (Eph. 5:29) Olketa sista showimaot olketa luksavve Christ hem hed blo olketa taem olketa followim direction blo olketa elder, wea Jesus markem for lukaftarem olketa. Olketa brata showimaot olketa luksavve Christ hem hed blo kongregeson taem olketa respectim olketa sista. Taem evriwan lo kongregeson tinghae and followim hao Jehovah organizem famili blo hem for samfala stap anda lo narawan, then evriwan lo kongregeson bae stap gud tugeta. And tu, datwan bae mekhae lo Dadi blo iumi lo heven, Jehovah. w21.02 18-19 ¶14-17

David and olketa man blo hem witim famili blo olketa ranawe from Saul and stap lo ples blo olketa Philistine. Wantaem olketa lusim famili blo olketa lo there and go for faetem samfala enemy. Taem David and olketa man blo hem go faet, samfala enemy attakim taon wea famili blo olketa stap and tekem olketa. Maet David tingse from hem savve hao for faet, hem fit for mekem plan for tekem bak famili blo olketa, bat hem no duim datwan. Hem askem Jehovah olsem: “Waswe, bae mi go bihaen long olketa wea i spoelem mifala?” Jehovah talem David for aftarem olketa enemy and hem sei bae David sevem famili blo olketa. (Fas Samuel 30:7-10) Wanem nao iufala young brata lanem from samting wea happen lo David? Hem gud for iu askem advaes from narawan bifor iu mekem olketa disison. Olketa young wan, story witim parents blo iu, or askem advaes from olketa elder wea garem experience. Jehovah trustim olketa elder, so iu fit for trustim olketa tu. Jehovah ting lo olketa olsem “present” for iumi lo kongregeson. (Eph. 4:8) Iu savve mekem olketa wise disison sapos iu followim gudfala advaes and example blo olketa. w21.03 4-5 ¶10-11

Jesus sei sapos iumi no followim wanem iumi lanem, iumi olsem man wea wakem haos blo hem lo sandbis. Hem hard waka nating nomoa. Why nao iumi sei olsem? Bikos taem big wind or flood kam, bae haos blo hem foldaon. (Matt. 7:24-27) Lo sem wei tu, sapos iumi no followim wanem iumi lanem iumi hard waka nating. Taem iumi kasem test or persecution bae iumi no garem strongfala faith. Bat sapos iumi study and followim wanem iumi lanem, datwan bae helpem iumi for mekem olketa gudfala disison, for garem peace, and for garem strongfala faith. (Aesaea 48:17, 18) For gohed faithful nomata iumi kasem hard taem, iumi need for prea lo Jehovah and studyim Bible. And iumi mas luksavve hem important for evritaem duim samting wea mekhae lo Jehovah. Iumi barava sure Jehovah bae no lusim iumi and no eniwan savve duim samting for stopem iumi for kasem love blo hem.—Heb 13:5, 6. w21.03 15 ¶6; 18 ¶20