July

Iumi mas fren witim Jesus sapos iumi laekem olketa prea blo iumi for kasem ansa. Datwan minim for iumi no just talem nomoa disfala toktok “lo nem blo Jesus” lo end lo prea blo iumi. Bat iumi mas luksavve hao Jehovah iusim Jesus for ansarem olketa prea blo iumi. Jesus talem olketa aposol blo hem: “Bae mi duim eni samting wea iufala askem long nem bilong mi.” (John 14:13) Nomata Jehovah nao herem and ansarem olketa prea blo iumi, hem givim paoa lo Jesus for duim samting wea hem disaedem. Bifor God ansarem prea blo iumi, hem bae lukluk sapos iumi obeyim Jesus. Olsem example, Jesus sei: “Sapos iufala forgivim nara pipol wea sin againstim iufala, Dadi bilong iufala long heven bae forgivim iufala tu. Bat sapos iufala no forgivim nara pipol wea sin againstim iufala, Dadi bilong iufala bae no forgivim sin bilong iufala.” (Matt. 6:14, 15) So hem barava important for iumi treatim olketa narawan lo kaenfala wei olsem hao Jehovah and Jesus treatim iumi! w20.04 22 ¶6

Aposol Paul luksavve lo wanem audience blo hem interest lo hem, and then hem changem story for fitim olketa. Olsem example, crowd lo Lystra wea Paul story lo olketa garem lelebet savve or no savve lo olketa Scripture. So Paul storyim samting wea isi for olketa minim. Hem storyim taem blo harvest and wei for enjoyim laef. Iumi need for luksavve tu lo wat nao pipol lo territory interest lo hem and changem story for fitim olketa. Taem iu go lo haos blo samwan, hao nao iu savve faendaot lo wanem hem interest lo hem? Hem gud for lukluk firstaem. Maet iu lukim hem waka lo garden, readim buk, repairim trak, or duim nara samting. Sapos fitim, iu savve iusim datwan for startim story blo iu. (John 4:7) Kaleko wea man werem maet showimaot samting abaotem hem, olsem ples wea hem kam from, waka blo hem, or favorite sports team blo hem. w20.04 11 ¶11-12

Samfala brata and sista savve stress taem olketa stap midolwan lo staka pipol. Nomata olsem, olketa gohed attendim olketa meeting, assembly, and convention. Nomata samfala faendem hem hard for story lo olketa stranger, olketa savve story lo pipol lo ministry. Sapos diswan kasem iu, tingim hao olketa narawan kasem datwan. Tingim hao Jehovah hem hapi from iu duim best blo iu. Jehovah hem helpem iu for no givap and givim iu strong wea iu needim. (Phil. 4:6, 7) Sapos iu gohed servem Jehovah nomata iu deal witim sik lo body or feeling wea mekem iu no savve duim staka samting, iu savve sure iu mekem Jehovah hapi. Staka lo iumi no strong for duim samfala samting, bat iumi gohed and no givap. (2 Cor. 4:16) From Jehovah helpem iumi, iumi evriwan bae ranran lo disfala resis go kasem end! w20.04 31 ¶20-21

Hao God wakem earth, showimaot klia wisdom blo hem. (Heb. 3:4) Earth hem spesol bikos hem garem evri samting wea man needim for stap laef. Maet iumi savve sei earth hem olsem wanfala ship wea float lo open sea. Bat lo samfala wei, earth hem barava difren from ship wea olketa man wakem and wea fulap witim pipol. Olsem example, hao long nao olketa pipol wea stap lo wanfala ship savve laef sapos olketa seleva mas producem oxygen, kaikai, and wata, and sapos olketa no torowem eni waste from ship? No longtaem nomoa pipol lo datfala ship bae dae. Bat disfala earth hem difren, bikos staka billion pipol and animal savve gohed laef. Earth producem oxygen, kaikai, and wata wea iumi needim and no enitaem iumi short lo olketa samting hia. Olketa waste lo earth no go lo space, nomata olsem disfala earth hem still luk naes and pipol fit for stap lo hem. Hao nao olsem? Jehovah designim olketa samting lo earth for recycle. w20.05 20 ¶3-4

Taem Satan laea olsem lo Eve and Eve bilivim hem, Satan kamap devil, wea minim man for laea. (1 Tim. 2:14) Eve barava trustim Satan winim Jehovah. Datwan mekem Eve for mekem wanfala barava rong disison. Hem disaed for no obeyim Jehovah. Eve kaikaim frut blo datfala tree wea Jehovah tambuim and bihaen hem givim samfala lo Adam tu. (Jenesis 3:6.) Tingim sapos Eve sei lo Satan: “Mi no savve hu nao iu, bat mi savve lo Dadi blo mi Jehovah, and mi lovem and trustim hem. Hem givim mitufala Adam evriting wea mitufala garem. Iu tingse iu hu ia, mekem iu talem nogud samting abaotem hem? Go nao!” Tingim hao Jehovah bae barava hapi tumas for herem dota blo hem talem toktok olsem wea showimaot hem lovem and sapotim hem! (Provebs 27:11.) Bat Eve nating faithful for sapotim Jehovah, and Adam tu olsem. From tufala no lovem Dadi blo tufala, Adam and Eve nating defendim nem blo God from wei wea Satan laea for spoelem hem. w20.06 4 ¶10-11

Olketa sista fit for kasem praise for waka wea olketa duim for Jehovah. Samfala duim construction waka, maintenance lo olketa building, sapotim languis grup, or volunteer lo Bethel. Samfala help lo disaster relief waka, transleitim olketa pablikeson blo iumi, pioneer, or duim missionary waka. Nara samting, olketa waef helpem hasband wea garem olketa big responsibility lo kongregeson and lo organization. Olketa brata hia wea olsem “present” from Jehovah bae no fit for duim olketa responsibility hia sapos waef no sapotim olketa. (Eph. 4:8) Olketa elder luksavve olketa sista olsem bigfala army wea talemaot gud nius and duim gud datfala preaching waka. And tu, olketa elder tinghae lo olketa faithful mature sista wea helpem olketa young sista for deal witim olketa challenge wea olketa feisim. (Titus 2:3-5) Tru nao, iumi barava tinghae lo olketa faithful sista blo iumi! w20.09 23-24 ¶13-14

Jehovah no forgetim pipol blo hem wea maet stop for associate witim kongregeson for lelebet taem, and hem no forgetim tu waka wea olketa duim for hem. (Heb. 6:10) Profet Isaiah storyim wanfala tokpiksa wea showimaot hao Jehovah hem kea for pipol blo hem. Hem sei: “Hemi lukaftarem gudfala olketa pipol blong hem, olsem wanfala man hu hemi lukaftarem olketa sipsip blong hem. Ya, hemi olsem man hu hemi karim olketa smolwan long am blong hem.” (Aesaea 40:11) Hao nao datfala Jehovah feel taem hem lukim wanfala lo olketa sheepsheep blo hem lus? Jesus showimaot feeling blo Jehovah taem hem ask olsem lo olketa disaepol blo hem: “Hao nao tingting bilong iufala? Sapos wanfala man hem garem 100 sheepsheep bat wanfala hem lus, bae hem mas leavim nara 99 sheepsheep antap long maunten and go lukaotem datwan wea lus, iaman? Hem hapi from hem garem 99 sheepsheep, bat sapos hem faendem moa datfala sheepsheep wea lus, bae hem barava hapi tumas nao.”—Matt. 18:12, 13. w20.06 19-20 ¶8-9

Hem privilege for duim wanem Jehovah laekem iumi for duim. (Sams 27:4; 84:10) Sapos wanfala brata savve duim wanfala responsibility insaed organization blo Jehovah, datwan hem gud samting. Bat taem hem kasem wanfala assignment, hem shud no ting lo hemseleva olsem hem important winim narawan. (Luke 17:7-10) Hem duim datfala assignment for helpem olketa narawan. (2 Cor. 12:15) Bible garem olketa warning example blo pipol wea tinghae tumas lo olketa seleva, olsem Diotrephes. Hem no hambol and hem laek for kamap leader insaed kongregeson. (3 John 9) Uzziah tu praod tumas and laek for duim waka wea Jehovah no markem hem for duim. (Mektu Kronikols 26:16-21) Absalom trae switim pipol for sapotim hem bikos hem laek for kamap king. (Mektu Samuel 15:2-6) Olsem olketa story hia showimaot, Jehovah no hapi witim pipol wea tingim seleva nomoa. (Provebs 25:27) Olketa wea praod and wea laekem pipol for tinghae lo olketa, gogo olketa bae kasem problem.—Provebs 16:18. w20.07 4 ¶7-8

Samfala famili muv go lo nara kantri bikos lo hard taem olketa feisim or for faendem waka for selen. Lo niu kantri, pikinini blo olketa maet iusim main languis blo datfala kantri lo skul . Parents tu maet need for lanem main languis blo datfala kantri mekem olketa savve faendem waka. Bat waswe sapos wanfala kongregeson or grup hem stap lo hom languis blo olketa? Which kongregeson nao datfala famili shud attendim? Waswe, bae olketa go lo kongregeson wea iusim languis blo datfala kantri, or kongregeson wea iusim languis blo olketa? Famili hed nao mas disaedem datwan, so hem mas tingim wanem nao best samting for famili blo hem. Iumi need for respectim disison blo famili hed. Nomata wanem nao hem disaedem, iumi acceptim disison blo hem taem iumi welkamim famili hia for kamap part lo kongregeson blo iumi.—Rome 15:7. w20.08 30 ¶17-18

Iumi laek for duim staka samting for Jehovah, bat no tingse strong blo iumiseleva, education, background blo iumi, or olketa material samting nao hem main important samting. Staka brata and sista no garem hae education, paoa, or hae position. (1 Cor. 1:26) So no ting olketa samting olsem savve stopem iu for worshipim Jehovah. Jehovah savve helpem iu for duim staka samting. Olsem example, sapos iu feel fraet bikos pipol trae for mekem iu daotem wanem iu bilivim, prea lo Jehovah for givim iu strong for no fraet mekem iu savve defendim wanem iu bilivim. (Eph. 6:19, 20) Sapos iu stragol for deal witim wanfala big sik, askem Jehovah for givim iu strong mekem iu savve gohed busy for duim best blo iu lo service blo hem. Each taem iu lukim wei wea Jehovah helpem iu, faith blo iu bae grow and iu bae kamap strong. w20.07 16 ¶9

Sapos iumi laekem Kingdom blo God for first samting lo laef, iumi mas olsem Abraham wea willing for duim olketa samting wea mekem God hapi. (Mark 10:28-30; Heb. 11:8-10) Nomata olsem, no expectim laef blo iumi for free from trabol. Nomata olketa wea worshipim Jehovah for full laef, olketa deal witim olketa problem. (Jas. 1:2; 1 Pet. 5:9) Iumi laek for tingim olketa blessing lo future. Staka samting wea happen distaem showimaot iumi barava klosap lo end blo disfala nogud world. Wanfala lo olketa blessing wea iumi bae enjoyim anda lo rul blo Kingdom nao hem for iumi lukim moa olketa wea iumi lovem wea dae finis. Lo datfala taem, Jehovah bae rewardim Abraham tu for faith and patient fasin blo hem. Jehovah bae mekem Abraham and famili blo hem for laef bak moa lo disfala earth. Waswe, bae iu laef lo datfala taem, mekem iu welkamim olketa? Olsem Abraham, iu bae fit for laef lo niu world sapos iu willing for mekem olketa sakrifaes for Kingdom blo God, gohed garem strong faith nomata iu feisim olketa problem, and patient for weit lo Jehovah.—Maeka 7:7. w20.08 5-6 ¶13-14; 7 ¶17

Iumi savve nomata olketa enemy blo iumi killim iumi dae, Jehovah bae mekem iumi for laef moa. Iumi sure no eni samting savve spoelem wei wea iumi fren witim Jehovah. (Rome 8:35-39) Wei wea Jehovah givim datfala resurrection hope hem barava showimaot wisdom blo Jehovah. Hem mekem iumi no fraet sapos samwan sei bae hem killim iumi dae and hem givim iumi strong for gohed faithful lo Jehovah. Sapos olketa enemy blo Jehovah laek for killim iu dae, waswe, iu sure Jehovah bae resurrectim iu? Hao nao iumi savve showimaot datwan? Wanfala wei hem for askem iuseleva. ‘Waswe, olketa smol disison wea mi mekem each day hem showimaot mi trustim Jehovah?’ (Luke 16:10) Nara kwestin, ‘Waswe, mi trustim Jehovah for provaedem olketa material need blo mi sapos mi putim Kingdom firstaem?’ (Matt. 6:31-33) Sapos ansa blo iu for olketa kwestin hia hem yes, iu redi for olketa test wea bae kamap.—Provebs 3:5, 6. w20.08 18 ¶15-16

Iumi need for savve gud hao for iusim Bible. Iumi savve lanem hao for duim datwan lo olketa meeting. Bat for iumi savve helpem narawan for tinghae lo Bible, iumi need for garem gudfala schedule for duim study seleva. Iumi need for iusim Bible for strongim faith blo iumi. Diswan minim iumi no just readim Bible nomoa, bat iumi need for ting raonem wanem iumi readim and duim research lo olketa pablikeson mekem iumi savve lo stretfala mining blo olketa scripture and hao for followim datwan. (1 Tim. 4:13-15) Then iumi bae fit for iusim Bible for teachim olketa narawan. Taem iumi preach, bae iumi no laek readim nomoa wanfala verse lo Bible. Iumi laek for helpem olketa for minim datfala verse, and savve hao for followim. Taem iumi duim study seleva, datwan bae helpem iumi for savve gud hao for iusim Bible for teachim olketa narawan.—2 Tim. 3:16, 17. w20.09 28 ¶12

Taem iumi ting raonem olketa samting wea Jehovah duim for helpem iumi bae iumi hapi for gohed busy lo preaching waka. Olsem example, hem provaedem staka spiritual kaikai thru lo olketa pablikeson wea olketa printim, olketa electronic pablikeson, olketa audio and video recording, and broadcast lo Internet. Lo website blo iumi, olketa information stap lo winim 1,000 languis! (Matt. 24:45-47) Nara samting wea bae strongim iumi for duim preaching waka hem for followim example blo Jesus. Hem no letem eni samting for stopem hem for witness abaotem truth. (John 18:37) Hem no letem Satan switim hem taem hem laek givim hem “evri kantri long world and olketa nambawan samting wea olketa garem,” and hem no letem olketa narawan switim hem for mekem hem kamap king. (Matt. 4:8, 9; John 6:15) Hem no interest for garem staka material samting, and nomata pipol againstim hem datwan no stopem hem. (Luke 9:58; John 8:59) Taem iumi feisim olketa test, iumi savve gohed strong sapos iumi tingim toktok blo aposol Paul lo text for tuday. w20.09 9-10 ¶6-7

Iumi hapi for garem staka sista wea waka hard lo kongregeson! Olketa savve tekpart lo olketa meeting and lo ministry. Samfala help for lukaftarem olketa Kingdom Hall, and olketa duim samting for helpem olketa narawan lo kongregeson. Bat olketa feisim olketa challenge tu. Samfala mas lukaftarem olo parents. Olketa narawan mas deal witim olketa famili member wea againstim olketa. And samfala sista olketa singol parents wea waka hard for provaed for pikinini blo olketa. Why nao iumi shud sapotim olketa sista? Bikos staka taem pipol lo world no treatim olketa woman witim respect. And tu, Bible encouragem iumi for sapotim olketa. Olsem example, aposol Paul talem olketa lo kongregeson lo Rome for welkamim Phoebe and “helpem hem long eni samting wea hem needim.” (Rome 16:1, 2) Paul, hem wanfala Pharisee bifor, and olketa Pharisee savve ting daonem olketa woman. Bat taem Paul kamap wanfala Christian hem followim example blo Jesus for respectim and kaen lo olketa woman. w20.09 20 ¶1-2

For helpem Bible study blo iumi for laek sharem gud nius witim olketa narawan, iumi maet askem hem olketa kwestin olsem: “Hao nao wei wea iu acceptim datfala Kingdom message mekem laef blo iu kamap moabeta? Waswe, iu tingse olketa narawan need for herem disfala message? Wanem nao iu savve duim for helpem olketa?” (Provebs 3:27; Matt. 9:37, 38) Tingim diswan, Jesus talem iumi for teachim olketa narawan “for followim evri samting” wea hem komandim olketa for duim. So tufala komand Bible study shud followim hem for lovem God and for lovem neiba. Tufala komand hia join witim preaching waka and waka for teachim pipol for kamap disaepol. (Matt. 22:37-39) Love nao main samting wea mekem iumi laek for duim preaching waka. Nomata olsem, samfala Bible study fraet for duim preaching waka. Bat iumi savve encouragem olketa and storyim hao Jehovah bae helpem olketa and gogo bae olketa winim wei for fraetem man.—Sams 18:1-3; Provebs 29:25. w20.11 3 ¶6-8

Taem iu prepare for teachim wanfala Bible study, prea lo Jehovah abaotem hem and need blo hem. Askem Jehovah for helpem iu for teachim hem from Bible lo wei wea bae kasem heart blo hem. Tingim hao goal blo iumi hem for helpem Bible study for laek baptaes. Bible study blo iu tu need for story witim Jehovah. hem lisin and story witim Jehovah. Hem savve lisin lo God taem hem readim Bible evriday. (Josua 1:8; Sams 1:1-3) Hem savve story lo Jehovah thru lo prea evriday. So taem iu startim and finisim study talem prea wea kam from heart blo iu, and prea for hem tu. Taem hem lisin lo prea blo iu, bae hem lane hao for prea from heart blo hem, for story lo Jehovah, and for prea lo nem blo Jesus. (Matt. 6:9; John 15:16) Tingim hao wei for readim Bible evriday (lisin lo Jehovah) and wei for prea (story lo Jehovah) bae helpem student for barava fren witim God!—Jas. 4:8. w20.10 8 ¶8; 9 ¶10-11

Olketa Christian lo first century laek for organize and garem peace. Organization blo Jehovah distaem laek for garem peace tu. (Acts 16:4, 5) Olsem example, sapos iu attendim Wastaoa Study lo nara kongregeson or nara kantri, iu savve finis hao olketa bae conductim study and which article for studyim. So bae iu feel olsem iu lo kongregeson blo iu nomoa! Spirit blo God mekem iumi for wan mind olsem. (Sefenaea 3:9) Wanem nao iu savve duim? Hem gud for tingim olketa kwestin hia: ‘Waswe, mi keepim wan mind and peace insaed kongregeson? Waswe, mi obeyim olketa wea lead? Waswe, olketa narawan savve depend lo mi, especially sapos mi garem responsibility insaed kongregeson? Waswe, mi followim taem, and willing for helpem narawan?’ (Jas. 3:17) Sapos iu luksavve iu need for kamap gud lo eni samting hia, prea for holy spirit. Then taem iu changem samfala samting, olketa brata and sista bae tinghae lo iu and barava lovem iu. w20.10 23 ¶12-13

Toktok blo God hem olsem wanfala mirror for iumi. (Jas. 1:23-25) Iumi savve luk lo mirror evri morning bifor iumi lusim haos. Iumi duim datwan bikos iumi laek for savve sapos iumi need for stretem samfala samting bifor olketa narawan lukim iumi. Olsem tu, taem iumi readim Bible each day, iumi bae lukim samfala samting wea iumi need for stretem lo tingting and lo wei blo iumi. Staka faendem hem gud for readim text each morning bifor olketa lusim haos. Olketa letem wanem olketa readim for affectim tingting blo olketa. Then insaed lo datfala day, olketa savve duim samting for followim kaonsel wea kam from toktok blo God. Nara samting, iumi mas garem schedule for studyim Bible, olsem wei for read and ting raonem toktok blo God evriday. Hem barava important samting for duim bikos hem bae helpem iumi for gohed wakabaot lo road for laef. Toktok blo God hem olsem X-ray machine wea mekem iumi lukim wanem nao insaed lo iumi. Bat iumi mas hambol sapos iumi laek for kasem gud samting from kaonsel lo Bible or from olketa wea Jehovah iusim. w20.11 18 ¶3; 19 ¶8

Nomata olketa first century Christian kasem persecution, olketa kasem taem blo peace tu. Hao nao olketa disaepol iusim gud disfala chance? Olketa faithful man and woman hia preachim gud nius and no givap. Acts hem storyim hao “olketa obeyim Jehovah.” Olketa faithful Christian gohed for preachim gud nius and from datwan, namba blo olketa hem kamap staka. Jehovah blessim hard waka blo olketa for preach lo taem wea olketa garem peace. (Acts 9:26-31) Olketa disaepol lo first century iusim evri chance wea olketa garem for preachim gud nius. Olsem example, taem aposol Paul luksavve staka pipol lo Ephesus interest lo gud nius, hem iusim taem blo hem for preach and for mek disaepol lo datfala taon. (1 Cor. 16:8, 9) Olketa disaepol waka hard for talem “gud nius abaotem message blo Jehovah.” (Acts 15:30-35) Wanem gud samting nao kamaot from datwan? Scripture for text blo tuday storyim datwan. w20.09 16 ¶6-8

Taem Adam sin, datwan mekem olketa lo laen blo hem for kasem nogud samting. Iumi tu kasem nogud samting from datwan. Bat from God resurrectim Son blo hem iumi fit for kasem barava difren samting! Aposol Paul sei: “Pipol laef bak bikos long wanfala man [Jesus].” Hem sei tu: “Evriwan dae bikos long Adam, and tu, evriwan bae laef bak bikos long Christ.” (1 Cor. 15:22) Taem Paul sei “evriwan dae bikos long Adam” wanem nao hem minim? Paul tingim olketa lo laen blo Adam wea no perfect bikos Adam hem sin, and datwan mekem olketa for dae. (Rome 5:12) Adam bae no “laef bak” bikos hem wanfala perfect man wea chus for disobeyim God so Jesus no dae for kaen man olsem. Adam bae kasem sem samting olsem olketa wea “son bilong man” bae judgem olsem “goat.” Olketa bae “dae and no laef moa.”—Matt. 25:31-33, 46; Heb. 5:9. w20.12 5 ¶13-14

Sapos iumi no kasem wanfala privilege wea iu laekem lo organization, tingim example blo olketa faithful angel. Olsem example, wantaem Jehovah askem olketa for givim idea blo olketa lo hao for trikim nogud King Ahab. Nomata staka angel givim idea blo olketa, God sei idea blo wanfala angel nomoa hem bae waka. (Fas Kings 22:19-22) Waswe, olketa nara angel feel wikdaon and ting, ‘Why nao mi weistim taem blo mi for givim idea?’ Hard for olketa angel ting olsem. Olketa barava hambol and laekem for evri praise and glory go lo Jehovah. (Jajis 13:16-18; Rev. 19:10) Iumi mas tingim privilege wea iumi garem for talemaot nem blo God and Kingdom blo hem. Olketa assignment wea iumi duim no mekem Jehovah lovem iumi. Bat hem and olketa brata and sista lovem iumi from iumi hambol. So askem Jehovah for helpem iumi gohed for hambol. Tingim staka gudfala example lo Bible blo olketa wea hambol. Iumi laek for helpem olketa brata and sista lo eni samting wea iumi fit for duim.—1 Pet. 5:5. w20.12 26 ¶16-17

Datfala helmet hem hope wea iumi garem for laef olowe. From iumi duim wanem Jehovah laekem, iumi sure nomata iumi dae bae hem resurrectim iumi. (1 Thess. 5:8; 1 Tim. 4:10; Titus 1:1, 2) Hope wea iumi garem hem protectim tingting blo iumi. Taem iumi garem olketa problem bae iumi no wari tumas and bae iumi gohed for tingim olketa promis blo God for future. Iumi showimaot iumi werem datfala helmet taem iumi garem sem tingting olsem Jehovah abaotem olketa samting. For example, bae iumi no trustim olketa material samting for mekem iumi hapi, bat bae iumi hope lo God for givim iumi evri samting. (Sams 26:2; 104:34; 1 Tim. 6:17) Datfala sword hem toktok blo God lo Bible. Bible hem olsem sword bikos hem garem paoa for “aotem tingting bilong pipol wea hem no stret.” So Bible helpem pipol for luksavve lo olketa laea teaching and for lusim olketa nogud wei. (2 Cor. 10:4, 5; 2 Tim. 3:16, 17; Heb. 4:12) Iumi lane for iusim gud sword taem iumi duim study seleva and followim training wea iumi kasem from organization blo God.—2 Tim. 2:15. w21.03 27 ¶4; 29 ¶10-11

Nomata taem aposol John no savve go aot for preach, hem tingim olketa brata and sista. For example, hem raetem toktok lo Revelation and sendem datwan lo olketa kongregeson, mekem olketa savve lo “olketa samting wea no longtaem nomoa mas happen.” (Rev. 1:1) Then bihaen John go free from Patmos, hem raet abaotem laef and ministry blo Jesus lo Bible buk John. Hem raetem tu thrifala leta for encouragem and strongim olketa brata and sista. Iumi savve followim example blo John for lovem pipol and wanem iumi disaed for duim lo laef showimaot sapos iumi lovem pipol. Pipol lo world blo Satan bae encouragem iumi for duim samting for iumiseleva, and busy for kasem selen or bignem. Bat pipol blo Jehovah no duim olsem. Olketa busy for preachim gud nius and for teachim pipol abaotem Jehovah. w21.01 10 ¶9-10

Maet Jonathan savve jealous lo David. From hem son blo King Saul, hem garem raet for kamap next king. (Fas Samuel 20:31) Bat Jonathan no jealous bikos hem hambol, and hem faithful lo Jehovah. Hem sapotim disison blo Jehovah for chusim David for kamap next king. And tu, Jonathan protectim David, nomata dadi blo hem, Saul, barava kros lo hem. (Fas Samuel 20:32-34) Jonathan no fraet for faetem olketa enemy blo Israel and hem savve tumas hao for iusim bow and arrow. Nomata olsem, Jonathan no tingse hem gud winim David. Bible sei Jonathan and dadi blo hem, Saul, tufala savve “muv kuiktaem winim bikfala igol” and tufala “strong winim laeon.” (Fas Samuel 1:22, 23) Datwan fit for mekem Jonathan for praod. Bat Jonathan no laek winim David, and hem no jealous lo olketa samting wea David duim. Hem tinghae lo wei blo David for no fraet and for trustim Jehovah. And taem David killim dae Goliath, Jonathan barava tinghae lo wanem David duim and laek for fren witim hem. w21.01 21 ¶6; 22 ¶8-9

Evri Christian stap anda lo Jesus Christ, wea hem perfect. Bat taem wanfala sista hem marit, hem stap anda lo hasband tu. From hasband no perfect, maet datwan no isi. So taem hem interest lo wanfala brata, hem gud for ting raonem samfala kwestin olsem: ‘Waswe, brata hia showimaot hem fit for kamap gudfala hed blo famili? Waswe, hem strong for duim olketa spiritual samting? Sapos nomoa, waswe, bae hem helpem mitufala for gohed strong lo spiritual wei bihaen mifala marit?’ Hem gud tu for sista lukluk gud lo hemseleva and ting raonem olketa kwestin olsem: ‘Waswe, mi garem olketa gudfala wei, olsem for patient and kaen mekem mi kamap gudfala waef? Waswe, mi strong for duim olketa spiritual samting?’ (Eklesiastes 4:9, 12) Sapos sista ting raonem gud olketa kwestin hia bifor hem marit, datwan savve helpem hem for hapi lo marit blo hem. Staka sista wea marit showimaot gud example from olketa stap anda lo hasband, and iumi barava tinghae lo olketa! w21.02 8 ¶1-2

Lo olketa year wea go pas, staka pablisa markem goal for lanem nara languis mekem olketa savve duim moa samting lo ministry and for serve lo kongregeson wea needim help from olketa nara pablisa. Diswan hem disison blo olketa seleva for duim moa samting lo ministry. Nomata hem tek longtaem for olketa story gud lo wanfala niu languis, olketa duim staka gud samting. Olketa gudfala wei and experience blo olketa savve strongim kongregeson. Iumi tinghae lo sakrifaes wea olketa brata and sista hia duim! Sapos wanfala brata muv go lo kongregeson wea iusim nara languis, olketa elder shud no hol bak for recommendim hem for elder or ministerial servant nomata hem no savve gud lo datfala languis. Olketa elder bae iusim olketa mark insaed lo Bible for luksavve sapos wanfala brata fit for kamap elder or ministerial servant, and olketa no lukluk sapos hem savve gud hao for story lo languis wea kongregeson iusim.—1 Tim. 3:1-10, 12, 13; Titus 1:5-9. w20.08 30 ¶15-16

Staka pipol sei olketa savve hapi nomoa, sapos olketa healthy, garem staka selen, and stap gud witim olketa lo famili. Bat hapi wea James storyim hem from holy spirit blo God mekem man for olsem, and hem no depend lo samting wea happen lo laef blo hem. (Gal. 5:22) Olketa Christian hapi from olketa duim wanem Jehovah laekem and followim example blo Jesus. (Luke 6:22, 23; Col. 1:10, 11) Iumi savve comparem datkaen hapi witim laet insaed lo kerosene lamp. Glass stopem rain or wind for killim dae datfala laet, so bae hem gohed for laet. Olsem tu, iumi savve gohed hapi nomata iumi kasem eni hard samting. So nomata iumi sik, no garem inaf selen, pipol tok spoelem iumi, or eniwan lo famili or narawan againstim iumi, bae iumi gohed for hapi. Taem iumi kasem olketa hard taem olsem, datwan showimaot iumi nao olketa disaepol blo Christ. (Matt. 10:22; 24:9; John 15:20) Dastawe James talem toktok wea stap lo scripture lo text for tuday. w21.02 28 ¶6

Taem iumi readim olketa Bible verse wea showimaot hem important for no wari tumas and trustim Jehovah, trae for baeheartim olketa verse hia. Wanfala wei for duim datwan hem for readim big olketa verse, or raetem lo wanfala buk and evritaem readim moa olketa verse hia. Jehovah talem Joshua for evritaem readim buk blo Law mekem hem disaedem olketa stret samting. Wanem hem readim lo Law helpem hem for no fraet for mekem olketa disison wea affectim olketa Israelite. (Josua 1:8, 9) Staka verse lo Bible savve helpem iumi for no wari tumas taem samting happen wea savve mekem iumi fraet or wari. (Sams 27:1-3; Provebs 3:25, 26) Lo olketa meeting iumi kasem gud samting from olketa tok, olketa koment blo olketa brata and sista, and taem iumi story witim olketa bifor and bihaen lo meeting. (Heb. 10:24, 25) Nara samting, taem iumi storyim samting iumi warim lo olketa fren blo iumi lo kongregeson, datwan savve helpem iumi. w21.01 6 ¶15-16

Taem iu baptaes, iu showimaot iu garem faith and trustim Jehovah. And Jehovah hem hapi tumas for welkamim iu lo famili blo hem. Important samting hem for gohed depend lo Jehovah. Maet hem isi for depend lo Jehovah taem iu mekem olketa bigfala disison, bat waswe lo taem wea iu mas disaedem olketa nara samting? Iu need for depend lo Jehovah bifor iu mekem eni disison, nomata hem abaotem hapitaem, waka for selen, or olketa goal blo iu! No depend lo savve blo iuseleva, bat tingim eni Bible principle wea join witim wanem iu mas disaedem and followim principle hia. (Provebs 3:5, 6) Taem iu duim datwan Jehovah bae hapi witim iu and olketa lo kongregeson bae tinghae lo iu.From iufala young wan no perfect, samfala taem bae iufala duim mistek. Bat no letem datwan stopem iu for duim waka for Jehovah. w21.03 6 ¶14-15

Waswe, samfala famili member againstim iu bikos iu worshipim Jehovah? Or waswe, iu stap lo kantri wea gavman tambuim waka blo Olketa Jehovah’s Witness? Sapos olsem, bae iu kasem encouragement taem iu readim 2 Timothy 1:12-16 and 2 Timothy 4:6-11, and 17-22. Aposol Paul raetem olketa toktok hia taem hem stap lo prison. Bifor iu readim olketa verse hia, talem Jehovah abaotem hard samting wea iu deal witim and feeling blo iu abaotem datwan. Then askem Jehovah for mekem iu luksavve lo eni Bible principle from story blo aposol Paul wea savve helpem iu for deal witim samting wea iu feisim. Jehovah warnim Paul finis bae hem kasem persecution from hem wanfala Christian. (Acts 21:11-13) So hao nao Jehovah helpem Paul? Hem ansarem olketa prea blo Paul, and helpem and strongim hem. Jehovah talem Paul from hem waka hard tumas bae hem kasem reward for datwan. And tu, Jehovah iusim olketa fren blo Paul for helpem hem. w21.03 18 ¶14-15, 19