August

Olketa wea fren gud witim Jesus nomoa bae kasem gud samting from ransom sakrifaes blo hem. Jesus sei hem “willing for dae for olketa fren bilong hem.” (John 15:13) Pipol wea worshipim God bifor Jesus kam lo earth, bae need for lane abaotem Jesus and for lovem hem bihaen olketa resurrect.Bae olketa need for kamap fren blo Jesus mekem olketa kasem laef olowe. (John 17:3; Acts 24:15; Heb. 11:8-12, 24-26, 31) Iumi hapi for waka tugeta witim Jesus for preachim and teachim gud nius abaotem Kingdom. Taem Jesus stap lo earth, hem teachim pipol. And taem hem go bak lo heven, Jesus wea hem hed blo kongregeson, gohed for leadim disfala waka for preach and teach. Hem lukim and hem tinghae lo hard waka blo iu for helpem staka pipol for savve lo hem and Dadi blo hem. Tru nao, Jehovah and Jesus nomoa savve helpem iumi for finisim disfala waka.—John 15:4. w20.04 22 ¶7-8

Lo firstaem, Bible showimaot “king blo north” and “king blo south” hem olketa gavman wea stap lo north and south saed lo land blo Israel. (Dan. 10:14, NW.) Kasem Pentecost 33 C.E., nation blo Israel nao pipol blo God. Bat bihaen datwan, Jehovah showimaot klia hao olketa wea faithful for followim Jesus nao pipol blo hem. So big part lo datfala profesi lo Daniel chapter 11, hem abaotem olketa follower blo Christ and no nation blo Israel. (Acts 2:1-4; Rome 9:6-8; Gal. 6:15, 16) Olketa gavman wea kamap king blo north and king blo south hem gohed for change. Nomata olsem, samfala samting wea olketa duim hem semsem. First samting, rul blo olketa king hia barava affectim pipol blo Jehovah. Mek-tu, hao olketa treatim pipol blo God showimaot olketa heitim trufala God, Jehovah. And mek-thri, tufala king hia compete witim each other for kasem paoa. w20.05 3 ¶3-4

Jehovah savve duim eni samting for mekem plan blo hem kamap tru. Jehovah savve mekem olketa servant blo hem wea no perfect tu for duim eni samting wea hem laekem. (Aesaea 64:8) No eni samting savve stopem Jehovah for mekem plan blo hem kamap tru. (Aesaea 46:10, 11) Taem iumi tingim wanem hem duim, and wanem hem helpem iumi for duim, datwan savve helpem iumi for tinghae lo Jehovah. Olsem example, taem iumi ting raonem olketa nambawan samting wea God wakem, datwan bae mekem iumi for barava tinghae lo evri samting wea Jehovah duim. (Sams 8:3, 4) And taem iumi ting raonem hao Jehovah hem helpem iumi for duim samting wea hem laekem, iumi barava respectim hem. Datfala nem Jehovah fit for kasem big respect! Mining blo datfala nem helpem iumi for tingim wei blo Dadi blo iumi, olketa samting wea hem duim finis, and evri samting wea hem bae duim lo future.—Sams 89:7, 8. w20.06 9-10 ¶6-7

Oxygen hem wanfala gas wea olketa man and animal needim for gohed laef. Olketa sei evri samting wea laef and brith, savve brithim wan handred billion ton blo oxygen insaed wan year. Olketa sem samting hia, brithim aot wanfala gas wea olketa kolem, carbon dioxide. Nomata olsem, evri samting hia no savve finisim evri oxygen, and atmosphere no savve fulap lo datfala “waste” gas, carbon dioxide. Why nao olsem? Bikos Jehovah creatim tu olketa didifren tree and plant wea tekem in carbon dioxide and givimaot oxygen. Datfala oxygen cycle hem pruvim hao toktok lo text blo tuday. Hao nao iumi savve showimaot iumi tinghae lo nambawan planet blo iumi and evri samting wea stap lo hem? (Sams 115:16) Wanfala wei hem for ting raonem olketa samting wea Jehovah wakem. Datwan bae mekem iumi laek thankiu lo Jehovah each day for olketa gud samting wea hem givim iumi. And iumi showimaot iumi tinghae lo disfala earth taem iumi traem best for keepim klin area wea iumi stap. w20.05 22 ¶5, 7

Taem Satan challengem Jehovah hem wise, patient, and duim samting followim justice. Hem showimaot tu bigfala paoa blo hem lo staka difren wei. And winim evri narafala wei hia, love blo hem barava showaot lo evri samting wea hem duim. (1 John 4:8) Jehovah hem evritaem duim samting for mekem nem blo hem kamap holy. Satan still talem olketa laea wea spoelem nem blo God, and mekem pipol daotem sapos God garem paoa, justice, wisdom, and love. Olsem example, Satan trae for mekem pipol bilivim Jehovah hem no Creator. And nomata sapos pipol bilivim God hem stap, Satan bae trae for mekem olketa bilivim hao God and olketa standard blo hem strict tumas and no stret. And tu, hem mekem pipol for bilivim Jehovah hem God wea raf and no tingim pipol, dastawe hem bonem pipol lo hellfire. Taem pipol bilivim olketa laea olsem, olketa rejectim raeteous rul blo Jehovah. Go kasem taem wea god finisim Satan, hem bae gohed trae spoelem iu tu. Waswe, hem bae win? w20.06 5 ¶13-15

Staka kongregeson garem olketa brata and sista wea traem best for lanem wanfala niu languis. Olketa maet faendem hem hard for storyim tingting blo olketa. Nomata olsem, olketa lovem Jehovah and barava laek for worshipim hem. Taem iumi luksavve lo datwan, bae iumi barava tinghae and respectim olketa brata and sista hia. Bae hem hard for iumi sei, “Mi no needim iu” from olketa no savve story gud lo languis blo iumi. (1 Cor. 12:21) Jehovah givim iumi nambawan privilege for garem ples insaed lo kongregeson blo hem. Nomata iumi man or woman, singol or marit, olo or young, iumi savve gud lo wanfala languis or nomoa, iumi spesol lo Jehovah and lo each other. (Rome 12:4, 5; Col. 3:10) Iumi bae traem best for duim samfala samting moa for showimaot iumi tinghae lo ples wea iumi garem and wea olketa narawan garem insaed kongregeson blo Jehovah. w20.08 31 ¶20-22

Paul no givap for helpem pipol blo Athens, nomata olketa worshipim idol, durong, and followim olketa heathen teaching. And Paul no letem wei wea olketa tok spoelem mekem hem laek givap. Bifor Paul kamap wanfala Christian hem tu ‘tok spoelem God, persecutim pipol, and nating showimaot respect.’ (1 Tim. 1:13) Nomata olsem, Jesus luksavve Paul fit for kamap disaepol, and Paul tu ting olsem abaotem pipol lo Athens. And samting wea hem tingim hem barava happen. (Acts 9:13-15) Lo first century, evri didifren kaen pipol nao kamap disaepol blo Christ. Taem Paul raet lo olketa Christian wea stap lo Corinth, hem storyim hao bifor samfala insaed datfala kongregeson olketa criminal and garem wei for durong. And hem sei, “Hem nao wei bilong samfala long iufala bifor. Bat God iusim spirit bilong hem for mekem iufala klin.” (1 Cor. 6:9-11) Sapos iu nao stap lo there, waswe, bae iu luksavve olketa hia savve change and kamap disaepol? w20.04 12 ¶15-16

Olketa elder shud no kwiktaem judgem man wea start for tingse hem no savve kasem gud samting taem hem worshipim Jehovah. Olketa elder bae trae for luksavve why nao hem tingim datwan, winim wei for judgem hem. Datwan bae helpem olketa elder for givim encouragement from Bible wea fitim need blo hem. Profet Elijah ranawe from Queen Jezebel. (Fas Kings 19:1-3) Hem feel olsem waka wea hem duim hem iusles nomoa and hem laek for dae nomoa. (Fas Kings 19: 10) Winim wei for judgem Elijah, Jehovah helpem hem for luksavve hao ino hemseleva nomoa stap, and hem shud trustim paoa blo God, and staka waka stap yet for hem duim. Jehovah lisin taem Elijah talemaot olketa wari blo hem, and givim hem olketa niu assignment. (Fas Kings 19:11-16, 18) Wanem nao leson? Iumi evriwan, especially olketa elder, shud treatim gud olketa sheepsheep blo Jehovah. Nomata sapos wanfala brata or sista talemaot kros blo hem, or hem talemaot hem tingse hem no fit for kasem mercy blo Jehovah, olketa elder bae lisin taem hem talemaot wanem lo heart blo hem. Then olketa bae trae for helpem datfala sheepsheep wea lus for luksavve Jehovah lovem hem tumas. w20.06 21-22 ¶13-14

Jehovah laekem iumi for enjoyim wei for associate witim olketa frens and famili. (Sams 133:1) Jesus garem tu olketa gud frens. (John 15:15) Bible storyim gud samting wea savve kamaot from wei for garem olketa gud frens. (Provebs 18:24) And hem talem tu hao hem nogud for man stap seleva tumas. (Provebs 18:1) Staka tingse social media hem wanfala wei for garem staka frens and bae iu feel olsem iu no stap seleva. Bat iumi mas careful taem iumi iusim social media. Staka research faendaot hao pipol wea spendem staka taem for scroll thru lo olketa post lo social media, maet end ap olketa feel lonely and sorre. Why nao olsem? Maet wanfala reason hem bikos staka taem pipol postim nomoa olketa best photo blo olketa, olsem best photo blo olketa seleva, olketa frens blo olketa, and olketa naes ples wea olketa go lo hem. Samwan wea lukim olketa post hia maet tingse laef blo hem no interesting and gud olsem laef blo olketa hia. w20.07 5-6 ¶12-13

The Watchtower blo October 1, 1988 sei: “Olketa elder luksavve hao Jesus Christ savve iusim holy spirit for helpem eni elder for tingim wanfala Bible principle for helpem olketa for deal witim eni samting or for mekem wanfala important disison. (Acts 15:-715) Evri elder savve kasem help blo holy spirit, and no wanfala nomoa.” Elder wea respectim olketa nara elder, bae no evritaem first wan for talem samting lo meeting blo olketa elder. Hem no man wea kontrolem story, or tingse evritaem tingting blo hem nao stret, bat hem hambol for talemaot tingting blo hem. Hem lisin gud taem olketa narawan story. Samting wea moa important nao, hem bae laek for sharem olketa Bible principle and lisin lo direction wea kam from “datfala wakaman wea faithful and wise.” (Matt. 24:45-47) Taem olketa elder gohed for story, olketa duim datwan lo wei for showimaot love and respect. Taem olsem, holy spirit blo God bae stap witim olketa and bae helpem olketa for mekem olketa stret disison.—Jas. 3:17, 18. w20.08 27 ¶5-6

Olketa enemy blo aposol Paul strong winim hem. Staka taem olketa talem pipol for killim hem and putim hem lo prison. Olketa fren blo Paul tu treatim hem nogud. Samfala lo Christian kongregeson againstim hem tu. (2 Cor. 12:11; Phil. 3:18) Bat Paul gohed for winim olketa wea againstim hem. Lo wanem wei? Hem gohed for preach nomata pipol againstim hem. Hem gohed for lovem olketa brata and sista blo hem nomata olketa duim samting wea mekem hem feel nogud. And hem faithful lo God go kasem taem hem dae. (2 Tim. 4:8) Hem winim olketa hard samting wea hem feisim bikos hem depend lo Jehovah and no lo strong blo hemseleva. Waswe, iu mas deal witim wei wea pipol tok spoelem iu or persecutim iu? Goal blo iumi hem for putim toktok blo God insaed mind and heart blo narawan. Iu savve kasem datfala goal sapos iu iusim Bible for ansarem olketa kwestin blo pipol, taem iu kaen and respectim olketa wea treatim iu nogud, and taem iu duim gud samting for evriwan, nomata olketa enemy blo iu.—Matt. 5:44; 1 Pet. 3:15-17. w20.07 18 ¶14-15

Waswe, iumi savve sei Jehovah hem hambol? Yes, hem nao wanem David talem lo text for tuday. (Sams 18:35) Maet David tingim taem wea profet Samuel kam lo haos blo dadi blo hem for anointim hem for kamap future king blo Israel. Nomata David hem lastborn lo eitfala boy, Jehovah chusim hem for changem King Saul. (Fas Samuel 16:1, 10-13) Masbi David agree witim toktok lo Sams 113 wea sei abaotem Jehovah: “Hemi luk kamdaon long skae an graon fo helpem olketa pipol. Hemi helpem olketa hu i pua, an hemi tekem olketa aot from trabol. Hemi mekhae long olketa.” (Sams 113:6-8) Jehovah pruvim hem hambol lo hao hem deal witim olketa wea worshipim hem. Hem acceptim worship blo iumi and hem ting lo iumi olsem fren blo hem. (Sams 25:14) For mekem iumi fit for fren witim hem, Jehovah letem son blo hem for dae for olketa sin blo iumi. Hem barava showimaot mercy lo iumi and tingim iumi! w20.08 8 ¶1-3

Jehovah markem finis day and hour wea hem bae finisim disfala nogud world. (Matt. 24:36) Hem bae gohed patient and no kwiktaem duim samting bifor datfala taem. Hem barava laek for resurrectim olketa wea dae, bat hem patient. (Job 14:14, 15) Hem weitim taem wea hem markem for hem mekem olketa wea dae for laef bak. (John 5:28) Iumi garem olketa gudfala reason for tinghae lo wei wea Jehovah patient. Tingim diswan: From Jehovah hem patient, staka pipol and iumi tu “garem chance for repent.” Jehovah laekem staka pipol moa for kasem laef olowe. So iumi laek for showimaot iumi tinghae lo patient fasin blo Jehovah. Lo wanem wei? Iumi laek for traem best for lukaotem olketa “wea showimaot olketa laekem laef olowe” and helpem olketa for lovem Jehovah and servem hem. (Acts 13:48) Then olketa bae kasem gud samting from patient fasin blo Jehovah, olsem iumi tu. w20.08 18 ¶17

Iumi laekem samting wea Bible student lanem shud kasem mind blo hem, and heart blo hem tu. Why nao olsem? Samting wea kasem heart blo man nao savve muvim hem for duim samting. Jesus teach lo wei wea kasem mind blo pipol. Bat olketa followim hem bikos wanem hem teachim kasem heart blo olketa tu. (Luke 24:15, 27, 32) Bible study blo iu need for luksavve Jehovah samwan wea hem savve fren gud witim from hem Dadi, God, and Fren blo hem. (Sams 25:5) Helpem Bible study for savve olketa nambawan wei blo God. (Eksodas 34:5, 6; 1 Pet. 5:6, 7) Nomata wanem subject nao iutufala storyim, helpem Bible study for tinghae lo olketa nambawan wei blo Jehovah, olsem love, kaen, and wei wea hem tingim iumi. Jesus sei ‘law wea no eni nara law hem important winim hem,’ hem for iumi mas ‘lovem God bilong iumi Jehovah.’ (Matt. 22:37, 38) Trae for helpem student blo iu for lovem Jehovah. w20.10 10 ¶12

Jesus treatim evri woman witim respect. (John 4:27) Hem tinghae lo olketa woman wea duim will blo Dadi blo hem. Hem ting lo olketa olsem olketa sista blo hem, and hem sei olketa olsem part lo spiritual famili blo hem. (Matt. 12:50) Jesus hem gudfala fren blo olketa woman tu. Tingim wei wea hem fren gud witim Mary and Martha, wea luk olsem tufala evriwan singol. (Luke 10:38-42) Toktok blo Jesus and samting wea hem duim mekem olketa no fraet lo hem. Mary no hol bak for go sidaon front lo Jesus, olsem olketa disaepol blo hem savve duim. And taem Mary no helpem Martha, hem feel free for talemaot tingting blo hem lo Jesus. Lo datfala taem Jesus helpem tufala for lanem olketa important leson. Jesus visitim Lazarus, Mary and Martha lo olketa nara taem tu and datwan showimaot hem tingim olketa evriwan. (John 12:1-3) Dastawe, taem Lazarus barava sik big, Mary and Martha feel free for askem Jesus for helpem olketa.—John 11:3. w20.09 20 ¶3; 21 ¶6

Olketa disaepol blo Jesus hope Kingdom bae “start lo datfala taem,” mekem olketa no stap anda lo rul blo olketa lo Rome. Iumi barava laekem Kingdom blo God for kam for finisim evri nogud samting and startim niu world wea garem olketa raeteous pipol. (2 Pet. 3:13) Bat iumi need for patient and weitim taem wea Jehovah markem. Jehovah givim Noah inaf taem for buildim ark and for “preach abaotem samting wea raeteous.” (2 Pet. 2:5; 1 Pet. 3:20) Jehovah lisin lo Abraham taem hem askem staka kwestin abaotem disison for distroem Sodom and Gomorrah. (Jenesis 18:20-33) For staka handred year, Jehovah patient tumas witim olketa Israelite wea no faithful. (Nehemaea 9:30, 31) Distaem tu Jehovah showimaot hem patient from hem givim taem for ‘evriwan garem chance for repent.’ (2 Pet. 3:9; John 6:44; 1 Tim. 2:3, 4) Example blo Jehovah givim iumi gudfala reason for patient witim pipol taem iumi preach and teach. w20.09 10 ¶8-9

Taem Jehovah resurrectim pipol, olketa bae rememberim evri samting wea happen lo olketa bifor and garem semkaen wei olsem bifor. Datwan showimaot Jehovah barava lovem iumi and hem savve rememberim evri samting abaotem tingting, feeling, wanem iumi talem and wanem iumi duim. So sapos iu dae and Jehovah resurrectim iu, hem bae isi nomoa for hem givim bak olketa memory blo iu, and wei blo iu. King David savve Jehovah interest lo iumi wanwan. (Sams 139:1-4) Taem iumi tingim hao Jehovah hem savve gud lo iumi, iumi shud no wari. Why nao olsem? Tingim, Jehovah barava lovem iumi. Hem tinghae lo wanem nao mekem each wan lo iumi for spesol. Hem savve gud lo iumi and wanem iumi experiencem and hao datwan affectim laef blo iumi. Datwan barava comfortim iumi! No enitaem iumi shud feel olsem iumi stap seleva. Each minute lo evriday, Jehovah stap witim iumi, and hem luk for eni chance for helpem iumi.—Mektu Kronikols 16:9. w20.08 17 ¶13-14

Jehovah laek for teachim pipol blo hem. Hem laekem iumi for savve lo hem, lovem hem, and for iumi olketa pikinini blo hem for kasem laef olowe. Hem nao why Jehovah teachim iumi. (John 17:3) Jehovah iusim first Christian kongregeson for teachim pipol blo hem. (Col. 1:9, 10) Holy spirit wea Jesus promisim helpem olketa disaepol for duim staka nambawan samting. (John 14:16) Holy spirit helpem olketa disaepol for minim toktok blo God, and for rememberim evri samting wea Jesus talem and duim, wea bihaen olketa raetem lo olketa Gospel. Savve hia strongim faith blo olketa Christian, and love blo olketa for God, Son blo hem, and for each other. Jehovah sei lo olketa last day, pipol lo evri kantri bae go ap lo maunten blo hem and bae hem teachim olketa abaotem olketa wei blo hem. (Aesaea 2:2, 3) Iumi lukim klia disfala profesi fulfill. w20.10 24 ¶14-15

Wanem nao savve mekem samwan les for followim gudfala kaonsel wea kam from fren blo hem? Man wea praod “laekem tumas for herem” nomoa samting wea here gud lo hem and “les for lisin long olketa tru teaching.” (2 Tim. 4:3, 4) Hem bae tingse hem nao savve winim olketa narawan. Bat, aposol Paul sei: “Sapos eniwan tingse hem important, hem laea long hemseleva, bikos hem nating important nomoa.” (Gal. 6:3) King Solomon sei tu: “Sapos king hemi olo tumas, bat hemi nating save herem waes toktok, ating hemi moabeta fo wanfala yang man hu hemi pua an hemi waes, fo sensim king.” (Eklesiastes 4:13) Tingim wanem Peter duim taem aposol Paul stretem hem front lo olketa narawan. (Gal. 2:11-14) Peter maet feel nogud lo wanem Paul talem sapos hem tingim nomoa hao Paul tok strong lo hem and hao hem stretem hem front lo evriwan. Bat Peter hem wise. Hem acceptim datfala kaonsel and no gohed kros lo Paul. Bihaen, hem sei “hem lovem tumas” Paul.—2 Pet. 3:15. w20.11 21 ¶9, 11-12

Wanem nao savve helpem Bible study for kamap gud lo spiritual wei? Hem need for kam lo olketa meeting. Hem bae herem olketa instruction wea bae helpem hem for garem moa savve abaotem Bible, strongim faith blo hem, and helpem hem for barava lovem God. (Acts 15:30-32) Nara samting, pablisa savve storyim lo Bible study hao love for Jehovah helpem hem for obeyim olketa komand blo God. (2 Cor. 7:1; Phil. 4:13) Taem Bible study start for savve lo olketa didifren pablisa lo kongregeson, hem bae lukim hao olketa followim komand blo Christ for lovem God and neiba. (John 13:35; 1 Tim. 4:12) Bible study bae lukim olketa pablisa mas deal witim olketa sem kaen challenge olsem hem and diswan savve helpem hem for luksavve hem fit for mekem olketa change for kamap disaepol blo Christ. (Diutronomi 30:11) Each wan lo kongregeson savve duim samting for helpem Bible student for kamap gud lo spiritual wei.—Matt. 5:16. w20.11 5 ¶10-12

Maet aposol Paul storyim hao hem faet witim olketa animal lo stadium lo Ephesus. (2 Cor. 1:8; 4:10; 11:23) Or maet hem minim nomoa olketa Jew and olketa narawan wea wei blo olketa olsem “wild animal.” (Acts 19:26-34; 1 Cor. 16:9) Paul feisim staka danger. Nomata olsem, hem tingim hope blo hem for future. (1 Cor. 15:30, 31; 2 Cor. 4:16-18) Iumi stap lo olketa taem wea danger tumas. Samfala brata and sista kasem hard taem from olketa criminal spoelem olketa. Samfala stap lo kantri wea war kamap and olketa no sef. And tu, samfala stap lo kantri wea olketa tambuim preaching waka. Nomata olsem, olketa brata and sista hia gohed for worshipim Jehovah. Datwan hem nambawan example for iumi. Olketa savve nomata olketa lusim laef blo olketa distaem, Jehovah bae duim staka gud samting for olketa lo future. w20.12 9 ¶3-4

Waswe, samfala taem iu maet feel wikdaon bikos pipol lo territory no interest or iu no meetim staka pipol lo haos? Sapos olsem, wanem nao iu savve duim mekem iumi enjoyim ministry? Hem important for garem stretfala tingting abaotem ministry. Wanem nao datwan minim? Iumi evritaem tingim hao waka blo iumi hem for talemaot nem blo God and Kingdom. Jesus talem finis tu-thri nomoa bae followim road for laef. (Matt. 7:13, 14) Taem iumi duim ministry, iumi garem privilege for waka tugeta witim Jehovah, Jesus, and olketa angel. (Matt. 28:19, 20; Rev. 14:6, 7) Jehovah nao leadim kam pipol wea laek for worshipim hem. (John 6:44) So sapos samwan no lisin lo message blo iumi distaem, maet nara taem hem bae lisin. Wanfala sista wea nem blo hem Deborah sei, “Satan iusim wei for feel wikdaon olsem wanfala samting for againstim iumi.” Bat no eni samting wea Satan iusim bae winim paoa blo Jehovah God. w20.12 26-27 ¶18-19, 21

Staka Christian mas waka full-taem for selen mekem olketa sapotim olketa seleva or famili blo olketa. Nomata olsem, olketa duim samting for sapotim organization blo Jehovah. For example, samfala duim disaster relief waka, samfala waka lo construction, and evriwan savve givim donation for waka raonem world. Olketa duim olsem bikos olketa lovem God and pipol. Olketa showimaot olketa lovem olketa brata from olketa evritaem go lo meeting nomata olketa taed. And olketa givim koment, nomata olketa fraet. And nomata maet olketa garem problem, olketa hapi for spendem taem bifor and bihaen lo meeting for encouragem olketa narawan. (Heb. 10:24, 25) Iumi tinghae lo evri samting wea olketa brata and sista hia duim! w21.01 10 ¶11

Man wea praod savve faendem hem hard for praisem narawan. Hemseleva bae laek for kasem praise. Hem savve comparem hemseleva witim narawan and laek for gud winim hem. Winim wei for trainim olketa narawan and givim responsibility lo olketa, hem maet sei, “Sapos miseleva nao duim datwan bae hem stret.” Hem wei blo man wea praod for laek garem hae position and jealous. Sapos iumi luksavve iumi savve praod, iumi shud prea strong lo Jehovah for helpem iumi for ‘changem tingting’ blo iumi mekem iumi lusim datfala nogud wei. (Rome 12:2) Iumi tinghae lo example wea Jehovah showimaot for iumi! (Ps. 18:35, NW) Hem hambol taem hem deal witim olketa wea worshipim hem, and iumi laek for garem sem wei. Nara samting, iumi laek for followim nambawan example blo olketa lo Bible wea hambol. Iumi laek for evritaem givim praise and honor lo Jehovah wea hem nomoa fit for kasem datwan.—Rev. 4:11. w20.08 13 ¶19-20

God nao startim arrangement for marit, bat olketa hasband and olketa waef no perfect. (1 John 1:8) Dastawe Bible sei olketa wea marit bae “kasem hard taem.” Jehovah expectim olketa hasband for helpem famili blo hem for fren gud witim Jehovah, hem tingim feeling blo olketa, and provaedem need blo olketa. (1 Tim. 5:8) Bat, olketa waef shud markem taem for readim Bible seleva, ting raonem wanem olketa readim, and prea lo Jehovah evriday. Maet datwan no isi from olketa waef savve busy tumas, bat hem barava important samting for duim. Why nao olsem? Bikos Jehovah laekem iumi wanwan for fren gud witim hem. (Acts 17:27) Hem tru, maet hem no isi for waef stap anda lo hasband wea no perfect. Bat samting wea bae helpem hem for duim datwan, hem taem waef minim and acceptim diswan hem followim arrangement blo Jehovah. w21.02 9 ¶3, 6-7

Iumi savve comparem hao iumi deal witim olketa hard samting witim hao olketa mekem wanfala pis iron for kamap strong. Olketa savve hotem pis iron insaed fire, and then pushim insaed cold wata. Olsem tu, taem iumi kasem hard samting and no givap, datwan strongim faith blo iumi. Dastawe James sei: “Letem disfala wei for no givap hem barava trainim iufala, mekem iufala barava fit nao.” (Jas. 1:4) Bae iumi hapi and no givap from iumi luksavve olketa hard taem savve mekem iumi garem strongfala faith. James storyim tu samfala samting wea savve mekem iumi for no hapi. Wanfala samting nao hem sapos iumi no savve wanem for duim. Taem iumi kasem hard samting, iumi shud askem Jehovah for helpem iumi for disaedem samting wea bae mekem hem hapi, wea hem gudfala example for olketa brata and sista, and wea helpem iumi for gohed faithful. (Jeremaea 10:23) Iumi needim wisdom mekem iumi luksavve lo wanem for duim or talem lo olketa wea againstim iumi. Sapos iumi no savve wanem for duim, datwan savve mekem iumi no hapi and laek for givap. w21.02 28 ¶7-9

Jehovah showimaot example for iumi followim. Sapos iumi gohed faithful lo Jehovah, no eni samting savve stopem iumi for kasem love blo hem. (Rome 8:38, 39) Samfala taem maet samting mekem hem no isi for fren witim olketa brata and sista, bat iumi need for waka hard for showimaot love. Taem olketa mekem iumi feel nogud, iumi mas gohed for ‘lovem olketa, no kros, mas stap gud tugeta, and traem best for keepim wei for wan mind wea holy spirit helpem iumi for garem.’ (Eph. 4:1-3) Iumi bae no gohed tingim wik point blo olketa. Iumi laek for olsem Jehovah for tingim olketa gudfala wei blo olketa brata and sista. (Fas Samuel 16:7; Ps. 130:3, NW) Samfala taem hem no isi for showimaot love lo olketa brata and sista bikos iumi lukim wik point blo olketa. Datwan happen lo samfala Christian lo first century olsem Euodia and Syntyche. Aposol Paul encouragem tufala for “mas wan mind.”—Phil. 4:2, 3. w21.01 22-23 ¶10-11

Olketa brata and sista tinghae lo iufala olketa young brata wea worshipim Jehovah “tugeta” witim olketa! (Sefenaea 3:9) Olketa tinghae lo iu from iu strong and iu duim gud staka waka lo kongregeson. Iufala olketa young brata, Jehovah hem lovem and trustim iufala. Hem talem finis lo olketa last day staka young man bae willing for duim waka for hem. (Sams 110:1-3) Jehovah savve iu lovem hem and iu laek for duim staka samting for helpem kongregeson, bat iu mas patient. And tu, taem samwan stretem iu from iu duim mistek, ting lo datwan olsem Jehovah hem trainim iu. (Heb. 12:6) Trae for duim gud eni waka wea iu kasem lo kongregeson. Barava important samting nao hem for duim olketa samting wea bae mekem Jehovah for hapi lo iu.—Provebs 27:11 w21.03 7 ¶17-18

Staka samting savve mekem iumi feel wikdaon, olsem olketa wik point blo iumi, or olketa health problem. Nara samting tu, iumi maet no kasem assignment lo organization blo Jehovah wea iumi laekem or maet iumi preach lo territory wea pipol no laek lisin. Sapos iumi no garem stretfala tingting abaotem olketa wik point blo iumi, maet iumi tingse from iumi mistek staka taem, Jehovah bae no laekem iumi for stap lo niu world blo hem. Datkaen tingting savve spoelem iumi. Bible sei Jesus Christ nomoa perfect, “evriwan sin.” (Rome 3:23) Jehovah no lukluk for olketa mistek blo iumi, or expectim iumi mas perfect. Hem Dadi wea lovem iumi and laek helpem iumi. Hem patient tu. Hem lukim iumi stragol for winim olketa wik point and for garem stretfala tingting abaotem iumiseleva, and hem redi for helpem iumi.—Rome 7:18, 19. w20.12 22 ¶1-3

Iumi evriwan insaed lo wanfala gogo for kasem niu world wea iumi bae stap anda lo rul blo Jehovah. Evriday, iumi trae for followim datfala road for kasem laef. Bat olsem Jesus sei, datfala road no isi for wakabaot followim. (Matt. 7:13, 14) From iumi no perfect, hem isi for iumi go difren from datfala road. (Gal. 6:1) Sapos iumi laek for gohed lo road for laef, iumi mas willing for changem tingting blo iumi, wei blo iumi, and samfala samting wea iumi duim. Aposol Paul encouragem iumi for gohed “stretem bak tingting blo [iumi].” Samfala taem heart blo iumi savve laea lo iumi, and maet iumi no savve wea nao heart laek leadim iumi. (Jeremaea 17:9) Hem isi tumas for iumi laea lo iumiseleva. (Jas. 1:22) So iumi mas iusim Bible for lukluk gud lo iumiseleva. Bible savve showimaot wanem nao insaed lo heart blo iumi and hem luksavve lo wanem nao insaed lo tingting blo iumi.—Heb. 4:12, 13. w20.11 18 ¶1-3

Sapos iumi hambol bae iumi hapi. Why nao olsem? Taem iumi luksavve iumi no fit for duim evri samting, bae iumi barava tinghae and hapi taem olketa narawan helpem iumi. Olsem example, tingim taem wea Jesus healim tenfala man wea garem leprosy. Wanfala man nomoa kam bak for sei thankiu lo Jesus bihaen hem kiurim hem from datfala nogud sik. Datfala man hem hambol and hem luksavve hem no fit for kiurim hemseleva, so hem tinghae lo bigfala help wea hem kasem, and hem givim glory lo God for datwan. (Luke 17:11-19) Staka taem olketa wea hambol bae stap gud witim olketa narawan and garem staka fren. Why nao olsem? Bikos olketa bae luksavve olketa narawan garem olketa gudfala wei and bae trustim olketa. Olketa wea hambol hapi tu taem olketa lukim narawan duim gud assignment blo hem and no hol bak for praisem hem. w20.08 12 ¶17-18