Report Bilong Olketa wea Talemaot Kingdom
Helpem Evri Difren Kaen Pipol Long Netherlands
ABRAHAM hem man bilong barava strong faith. Aposol Paul hem sei, “taem God kolem hem,” Abraham obeyim toktok bilong God and “hem go, nomata hem no savve wea nao hem go.” Bihaen hem muvim full famili bilong hem, Abraham “stap olsem wanfala stranger long land bilong promis” for lastfala wan handred year bilong laef bilong hem.—Hebrews 11:8, 9.
Olsem tu distaem, planti long Olketa Witness Bilong Jehovah acceptim challenge for muv go long nara kantri for serve long ples wea garem bigfala need. Samfala moa lanem difren languis mekem olketa savve witness long pipol from difren ples wea kam for stap long kantri bilong olketa. Olsem olketa example long daon showimaot, disfala nambawan fasin openem “wanfala bigfala door wea lead go for waka” long Netherlands, wea wan million long 15 million long olketa kam from narafala ples.—1 Corinthians 16:9.
◻ Bahram, wanfala Kung Fu instructor bifor, hem from wanfala kantri long Middle East. Hem kasem wanfala copy bilong Bible and samfala buk bilong Watch Tower. Insaed wanfala month nomoa, Bahram luksavve hem faendem truth. Olketa start for study witim hem and waef bilong hem, bat wanfala problem stap—man wea teachim Bible long tufala no savve long languis bilong tufala. Olketa story witim akson nomoa, toktok witim “hand and leg.” Gogo, Bahram and waef bilong hem faendem wanfala kongregeson wea iusim languis bilong tufala, and bihaen, tufala muv ahed kwiktaem. Bahram hem wanfala baptaes Witness distaem.
◻ Wanfala pioneer hasband and waef from Netherlands kam long wanfala man bilong Indonesia wea standap front long wanfala supermarket. Hem sapraes tumas taem tufala tok long languis bilong hem. Olketa arrange for go visitim hem long haos bilong hem. Olketa faendem hao hem stap bifor long Russia for winim 20 year, and long datfala taem hem kamap wanfala doctor bilong woman. Hem sei hem wanfala man wea no biliv long God, bat hem talemaot hao evritaem hem helpem woman for bornem pikinini, hem savve sapraes, “Body bilong man hem barava perfect! Hem wanfala mirakol!” Hem agree for studyim Bible and kwiktaem start for biliv hao wanfala God stap wea care long olketa man. (1 Peter 5:6, 7) Distaem hem wanfala baptaes brata and serve witim kongregeson bilong Indonesia long Amsterdam.
◻ Long Rotterdam, wanfala long olketa bigfala shipping port long world, wanfala grup bilong olketa pioneer iusim savve bilong olketa for preach long olketa difren kaen languis grup wea kam long wharf evriday. Samting wea kamaot from waka bilong disfala hapi grup for preach nao, samfala seaman, insaed long diswan hem wanfala captain, wanfala marine officer, and wanfala bodygard bifor, evriwan acceptim truth. Distaem olketa tu help for spreadim gud nius bilong Kingdom bilong God evriwea long world.—Matthew 24:14.
Sem olsem narafala part long world, Olketa Witness Bilong Jehovah long Netherlands barava disaed strong for duim part bilong olketa for talemaot gud nius bilong olowe long evri nation, tribe, languis, and pipol.—Revelation 14:6.