Iu Needim Conscience wea Kasem Training
Hem luk olsem bae wanfala spesol day for olketa passenger and wakman bilong Air New Zealand Flight 901, wea gogo for Antarctica. Olketa camera redy, and hapi feeling kamap taem olketa klosap long datfala whitefala land, and aeroplane hia flae low for olketa passenger lukim gud barava naesfala ples hia.
CAPTAIN bilong plane hem bin pilot for 15 year and taem wea hem flaem plane hem winim 11,000 hour. Bifor plane hem tek-off, hem putim go plan bilong disfala gogo long computer bilong plane, bat hem no savve hao olketa namba wea olketa givim long hem, hem no stret. Taem hem flae thru long cloud 600 meter from graon, disfala plane bangam nao Maunt Erebus and killim dae evri 257 passenger.
Long sem wei wea olketa aeroplane distaem depend long computer for leadim gogo bilong olketa, olketa man garem conscience for leadim gogo bilong olketa long laef. And trabol wea kasem Flight 901 savve teachim iumi strongfala leson abaotem conscience bilong iumi. Olsem example, long sem wei wea safety bilong aeroplane hem depend long wei wea olketa computer waka gud and leadim olketa stret, safety long spiritual wei, saed long fasin, and physical wei tu hem depend long wei wea conscience waka gud and stretfala mark for leadim man saed long fasin.
Sorre tumas, long distaem, kaen standard olsem kwiktaem gogo for lus or pipol les for followim. “Iumi staka taem herem hao staka skulboy long United States no savve read, hao olketa no savve raet, and hao olketa no savve faendem France long Map,” wanfala teacher long America hem talem. “Hem tru tu hao olketa skulboy hia faendem hard for luksavve stret samting from rong samting. Witim wei for no savve read and duim maths, iumi mas addim wei for konfius saed long fasin olsem wanfala long olketa staka problem saed long education.” Hem lukim tu hao “young pipol distaem no klia saed long fasin. Askem eniwan long olketa sapos ‘stret and rong’ stap, and seknomoa iu lukim hem kamap konfius, no savve talem eniting, no feel isi, and no feel sure. . . . Winim wei for kamap moabeta, disfala wei for konfius kamap worse taem olketa go long college.”
Wanfala samting wea kosim diskaen wei for konfius hem tingting wea big distaem hao olketa standard hem depend long wanem hem fitim man or ples hem kam from. Tingim wanem bae happen sapos olketa pilot flaem plane, no followim mark wea no savve change, bat followim olketa laet wea muv olabaot and samfala taem lus evribit! Bae banga olsem datwan long Maunt Erebus kamap staka taem. Long sem wei tu, from olketa followim enikaen standard saed long fasin, world harvestim bigfala sorre and dae taem olketa famili brekdaon from wei for no faithful insaed marit and planti million safa from AIDS or samfala nara sik bilong dirty fasin.
Difren standard for difren man maet here kleva, bat really, pipol wea followim disfala tingting olketa olsem pipol bilong Nineveh bifor wea nating savve hao ‘raet hand bilong olketa difren from left hand bilong olketa.’ Olketa hia olsem apostate Israel wea sei “gud samting hem nogud and nogud samting hem gud.”—Jonah 4:11; Isaiah 5:20.
So wea nao iumi savve tan go long hem for kasem olketa law and principle wea klia and tok stret, wea iumi savve iusim for trainim conscience bilong iumi mekem hem fit for leadim iumi? Staka million pipol faendem finis hao Bible nao barava duim diswan. From saed long fasin go kasem fasin long waka ples and from wei for trainim pikinini go kasem wei for worshipim God, Bible no missim eni important samting. (2 Timothy 3:16) Insaed planti handred year, Bible showaot olsem samting wea man fit for trustim evribit. From olketa Bible standard saed long fasin kam from paoa wea hae winim evri narawan, hem nao Creator bilong iumi, olketa fitim evri man. Dastawe, iumi no garem eni reason for garem living wea iumi no sure long saed long fasin.
Bat distaem, conscience bilong iu kasem attak wea worse winim enitaem bifor. Hao nao olsem? And hao nao iu savve protectim conscience bilong iu? Firstaem, hem gud for savve hu nao attak and olketa wei bilong hem for attak. Next article bae storyim diswan moa.