Protectim Conscience Bilong Iu

FOR ting for flae long plane wea followim rong information long computer hem mekem man fraet. Bat, tingim sapos samwan spoelem information hia or min for talem rong information! Diswan nao barava samting samwan hem trae for duim long conscience bilong iu. Hem laek for spoelem samting wea leadim iu saed long fasin. Hem goal bilong hem for iu followim gogo wea againstim God!—Job 2:2-5; John 8:44.

Hu nao disfala man wea min for spoelem pipol? Insaed Bible, olketa kolem hem “datfala firstfala snek, datwan wea olketa kolem Devil and Satan, wea hem giamanim olketa man long earth.” (Revelation 12:9) Bible storyim hem long garden bilong Eden wea, thru long wei for oso-oso, hem switim Eve for no followim wanem hem savve hem stret and for againstim God. (Genesis 3:1-6, 16-19) Start from datfala taem, Satan nao main wan wea bihaenem olketa organization for giamanim staka pipol mekem olketa enemy witim God. Barava worse wan long olketa organization hia nao hem false religion.—2 Corinthians 11:14, 15.

False Religion Hem Spoelem Conscience

Long Bible buk bilong Revelation, wanfala jury woman wea garem nem Bigfala Babylon nao piksarem false religion. Olketa teaching bilong hem bendim tingting bilong staka pipol saed long fasin and kosim olketa for heitim and for raf tu long olketa wea garem difren biliv. Tru nao, olsem Revelation talem, God putim main blame long false religion for blood bilong “evriwan wea olketa killim dae long earth,” wea insaed diswan hem olketa trufala worshiper bilong God.—Revelation 17:1-6; 18:3, 24.

Jesus warnim olketa disaepol bilong hem abaotem hao big nao wei wea false religion bae bendim standard bilong fasin bilong samfala pipol taem hem sei: “Taem bae kam wea evriwan wea killim iufala dae bae tingse hem duim wanfala holy service long God.” Olketa wea raf hia barava blind saed long fasin! Jesus hem sei: “Olketa no savve long Father or long mi tu.” (John 16:2, 3) No longtaem bihaen Jesus talem toktok hia, samfala leader bilong religion bihaenem wei for killim hem dae, wea conscience bilong olketa letem olketa duim datfala crime. (John 11:47-50) Long wei wea difren, Jesus sei olketa tru follower bilong hem bae garem mark bilong love midolwan olketa seleva. Nomata olsem, love bilong olketa hem moa big winim diswan yet, bikos hem kasem olketa enemy bilong olketa tu.—Matthew 5:44-48; John 13:35.

Nara wei wea false religion spoelem conscience bilong pipol hem wei wea hem letem nomoa eni kaen fasin wea pipol laekem. Aposol Paul profesi abaotem diswan taem hem sei: “Wanfala taem bae kam wea olketa bae no acceptim gudfala teaching, bat, for fitim wanem olketa laekem, olketa bae hipimap olketa teacher for switim ear bilong olketa.”—2 Timothy 4:3.

Distaem, olketa leader bilong religion switim ear bilong pipol taem olketa sei wei for duim sex midolwan tufala wea no marit hem savve gud nomoa long God. Samfala moa ting homosexual fasin hem olraet. Samfala bigman seleva olketa homosexual. Wanfala article insaed British niuspepa The Times hem sei “olketa votem thirtin-fala, wea no haedem wei wea olketa homosexual,” for kamap part bilong General Synod bilong Church of England. Taem olketa church leader lusim fasin insaed Bible and church bilong olketa no duim eniting abaotem, wanem standard nao pipol bilong hem shud followim? Dastawe staka million pipol konfius tumas.

Hem barava moabeta for followim lead bilong fasin and spiritual truth, wea olsem laet, insaed Bible! (Psalm 43:3; John 17:17) Olsem example, Bible teachim hao pipol wea duim fornication or adultery bae “no kasem kingdom bilong God.” (1 Corinthians 6:9, 10) Hem talem iumi hao long eye bilong God, man and woman wea changem “fasin bilong olketa long samting wea no fit” olketa “duim barava dirty fasin.” (Romans 1:26, 27, 32) Olketa truth hia saed long fasin olketa no mekap idea bilong man wea no perfect; olketa nao standard wea kam from God, wea no enitaem hem changem. (Galatians 1:8; 2 Timothy 3:16) Bat Satan garem olketa nara wei for spoelem conscience.

Chus Gud Saed Long Hapitaem

Wei for forcem man for duim nogud samting hem nogud, bat for mekem hem laek for duim dat samting hem moa worse. Diswan nao goal bilong “ruler bilong disfala world,” Satan. For putim rabis tingting bilong hem long mind and heart bilong olketa wea no luksavve or no garem savve—hem moa tru for olketa young wan wea moa isi for foldaon—hem iusim olketa nogud buk, movie, music, computer game, and pornography long Internet.—John 14:30; Ephesians 2:2.

“Young pipol [long United States] lukim long television samting olsem 10,000 raf fasin evri year,” wanfala report sei olsem insaed buk Pediatrics, “olketa television program for pikinini nao barava raf.” Disfala report showaot tu hao “evri year, olketa teenager lukim klosap 15,000 toktok and mekfani wea join witim sex.” Hem sei, nomata olketa program long taem wea planti lukluk television, olketa “showim samting saed long sex 8-fala taem insaed wan hour, wea hem fofala taem moa big winim namba long 1976.” Iumi no sapraes hao disfala study faendem tu hao “dirty toktok hem barava kamap big.” Bat, Bible and staka study saed long science showaot hao wei for evritaem lukluk long olketa samting hia hem mekem pipol for kamap worse. So sapos iu really laek mekem God hapi and for kasem gud samting, followim Proverbs 4:23, wea sei: “Protectim gud heart bilong iu, from olketa samting bilong laef kamaot from hem.”—Isaiah 48:17.

Staka music wea pipol laekem tu spoelem conscience. Wanfala man for sing wea singsing bilong hem kamap nambawan song long staka kantri hem “barava trae hard for mekem pipol seke,” niuspepa bilong Australia The Sunday Mail hem talem. Disfala niuspepa sei “olketa song bilong hem apim drug, incest and rape,” and hem “sing abaotem wei for killim dae waef bilong hem and torowem body bilong hem long wanfala lake.” Narafala toktok insaed olketa song dirty tumas for talem long hia. Nomata olsem, music bilong hem mekem hem kasem wanfala hae prize. Waswe, bae iu laek plantim long mind and heart bilong iu kaen rabis tingting wea iumi just storyim, nomata sapos olketa switim witim music? Hem bae gud sapos nomoa, bikos olketa wea duim diswan olketa spoelem conscience bilong olketa and gogo bae kasem “wanfala wicked heart,” wea mekem olketa kamap enemy bilong God.—Hebrews 3:12; Matthew 12:33-35.

So showaot wisdom long wei wea iu chusim hapitaem bilong iu. Bible encouragem iumi: “Evri samting wea raeteous, evri samting wea klin, evri samting wea iumi fit for lovem, evri samting wea pipol tok gud long hem, evri gud samting and evri samting wea fit for praisem, go ahed for tingim evri samting hia.”—Philippians 4:8.

Kaban Bilong Iu Affectim Conscience Bilong Iu

Taem olketa pikinini, Neil and Franz savve kaban witim olketa tru Christian.a Bat, gogo, Neil hem sei, “mi start for kaban witim olketa nogud fren.” Samting wea kamaot from diswan, wea hem sorre tumas long hem, hem crime and prison. Franz tu olsem. “Mi tingse mi savve kaban witim young pipol bilong world and no letem olketa affectim mi,” hem tok sorre olsem. “Bat olsem Galatians 6:7 talem, ‘Iufala no savve mekful long God. Eni samting man hem plantim, datwan nao bae hem harvestim.’ Mi lanem long hardfala wei hao mi rong and Jehovah nao hem stret. Mi bae insaed prison for full laef nao for rong wea mi duim.”

Pipol olsem Neil and Franz no seknomoa kamap criminal; olketa firstaem barava no ting for duim kaen samting olsem. Change isisi kamap followim olketa step, wea first wan nao hem wei for kaban witim nogud pipol. (1 Corinthians 15:33) Staka taem maet drug or ova tumas long alcohol nao next step. Long wei wea barava fitim, pipol bin storyim conscience olsem datfala “part bilong fasin wea alcohol finisim.” Bihaen diswan hem smol step nomoa long crime or dirty fasin.

So why nao iu laek tekem first step? Winim diswan, kaban witim wise pipol wea lovem God. Olketa bae helpem iu for strongim conscience bilong iu mekem hem savve leadim iu stret, mekem iu missim staka pain. (Proverbs 13:20) Nomata tufala insaed prison yet, Neil and Franz luksavve distaem hao conscience bilong tufala hem present from God wea man need for trainim gud and, yes, for keepim gud. And tu, tufala waka hard for buildim gudfala wei for fren witim God bilong tufala, Jehovah. Duim wise samting, and lane from mistek bilong tufala.—Proverbs 22:3.

Protectim Conscience Bilong Iu

Iumi showim iumi laek for protectim conscience bilong iumi taem iumi buildim love and faith long God, tugeta witim stretfala wei for fraet long hem. (Proverbs 8:13; 1 John 5:3) Bible showimaot hao wanfala conscience wea no kasem olketa samting hia bae no stap strong saed long fasin. Olsem example, Psalm 14:1 storyim pipol wea sei insaed heart bilong olketa: “No eni Jehovah hem stap.” Hao nao disfala wei for short long faith affectim fasin bilong olketa? Datfala verse go ahed for sei: “Olketa duim nogud samting, olketa duim barava rabis samting.”

Pipol wea no garem trufala faith long God no garem tu strongfala hope for wanfala future wea moabeta. Dastawe, olketa laef for distaem nomoa, for satisfaem body. Olketa followim disfala tingting: “Letem iumi kaikai and drink, from tumoro bae iumi dae.” (1 Corinthians 15:32) Long narasaed, shortfala hapi bilong world no pullim olketa wea luk go long prize bilong laef olowe. Olsem wanfala stretfala computer wea leadim plane, conscience bilong olketa wea kasem training hem barava keepim olketa long road bilong loyal wei for obeyim God.—Philippians 3:8.

For conscience bilong iu stap strong and leadim iu stret, hem needim kaonsel from Word bilong God evritaem. Long tokpiksa wei Bible talem iumi hao kaen kaonsel olsem hem stap, hem sei: “Ear bilong iufala seleva bae herem wanfala voice bihaen long iufala wea sei: ‘Diswan nao wei. Wakabaot long hem, iufala pipol,’ nogud iufala go long raet or nogud iufala go long left.” (Isaiah 30:21) So markem taem for readim Bible evriday. Diswan bae strongim and encouragem iu taem iu stragol for duim wanem hem stret or taem iu kasem bigfala hevi and wari. Garem trust hao Jehovah bae leadim iu saed long fasin and long spiritual wei sapos iu putim full trust bilong iu long hem. Yes, followim man wea raetem psalm, wea hem raet: “Mi putim Jehovah front long mi evritaem. From hem stap long raet hand bilong mi, mi bae no seksek.”—Psalm 16:8; 55:22.

[Footnote]

[Olketa Piksa long page 5]

False religion, wea Bible kolem “Bigfala Babylon,” hem kasem blame for wei wea conscience bilong staka hem no waka

[Credit Line]

Priest blessing troops: U.S. Army photo

[Olketa Piksa long page 6]

Wei for lukluk long raf fasin and dirty fasin bae spoelem conscience bilong iu

[Piksa long page 7]

Wei for evritaem kasem kaonsel from Word bilong God bae protectim conscience bilong iu