Jehovah Blessim and Protectim Olketa wea Obey

“Saed long man wea lisin long mi, hem bae stap sef and no wari long fraet bilong bigfala trabol.”—PROVERBS 1:33.

1, 2. Why nao hem important for obeyim God? Givim example.

OLKETA soft, yellow baby kokorako busy for kaikai long grass area, and barava no savve hao wanfala hawk hem flae hae ovarem olketa. Seknomoa, mami bilong olketa singaotem warning and openem wing bilong hem. Olketa baby ran go long hem, and kwiktaem nomoa olketa sef andanit olketa wing. Datfala hawk hard for attak nao.a Wanem nao leson iumi savve lanem from diswan? Wei for obey hem sevem laef!

² Datfala leson hem barava important for olketa Christian distaem bikos Satan hem barava trae hard for kasholem and spoelem pipol bilong God. (Revelation 12:9, 12, 17) Goal bilong hem, hem for distroem spiritual saed bilong iumi mekem Jehovah no appruvim iumi and for iumi lusim chance for kasem laef olowe. (1 Peter 5:8) Bat, sapos iumi stap klosap long God and no hol bak for followim direction wea iumi kasem thru long Word and organization bilong hem, hem promis for protectim iumi. Man wea raetem psalm hem sei: “Witim wing bilong hem bae hem kavarem iu, and andanit long wing bilong hem bae iu stap sef.”—Psalm 91:4.

Wanfala Nation wea No Obey Hem Lus

3. Wanem nao kamaot from wei wea Israel go ahed for no obey?

³ Taem nation bilong Israel obeyim Jehovah, hem evritaem lukaftarem olketa. Bat sorre tumas, planti taem olketa lusim Creator bilong olketa and worshipim olketa god wea wood and ston—“olketa giaman god wea no savve duim eni samting and wea no savve sevem man.” (1 Samuel 12:21) Bihaen olketa bighed olsem for planti handred year, datfala nation barava kamap apostate and no eni wei moa for sevem hem. Dastawe Jesus talem witim sorre: “Jerusalem, Jerusalem, wea killim dae olketa profet and sutim long ston olketa wea kam long hem,—planti taem mi laek hipimap olketa pikinini bilong iu, olsem wanfala mami kokorako hem hipimap olketa baby bilong hem andanit long wing! Bat iufala pipol no laekem. Lukim! God hem lusim haos bilong iufala nao.”—Matthew 23:37, 38.

4. Hao nao wei wea Jehovah lusim Jerusalem evribit hem showaot klia long 70 C.E.?

⁴ Wei wea Jehovah lusim Israel wea no faithful hem showaot klia tumas long sorre samting wea happen long 70 C.E. Long datfala year, olketa army bilong Rome wea holemap hae olketa saen bilong olketa wea garem piksa bilong eagle long hem, olketa attakim Jerusalem and killim dae staka pipol. Long datfala taem, Jerusalem hem fulap witim pipol wea kam for celebratem Passover. Nomata olketa offerim planti sakrifaes, olketa fail for mekem God appruvim olketa. Diswan hem barava olsem samting wea Samuel talem for King Saul wea no obey: “Waswe, Jehovah hem hapi long olketa bone offering and sakrifaes olsem long wei for obeyim toktok bilong Jehovah? Lukim! Fasin for obey hem winim sakrifaes, fasin for lisin hem winim gris bilong olketa sheep.”—1 Samuel 15:22.

5. Jehovah laekem wanem samting nao for muvim iumi for obeyim hem, and wanem nao pruvim iumi fit for obey long wei olsem?

⁵ Nomata Jehovah barava wantem iumi for obeyim hem, hem savve long olketa wik point bilong iumi olketa man wea no perfect. (Psalm 130:3, 4) Hem laekem iumi for garem honest heart and for olketa fasin olsem faith, love, and feeling for no laek mekem hem no hapi for muvim iumi for obeyim hem. (Deuteronomy 10:12, 13; Proverbs 16:6; Isaiah 43:10; Micah 6:8; Romans 6:17) Wei wea wanfala ‘bigfala cloud bilong olketa witness bifor’ go ahed faithful nomata olketa feisim olketa hardfala test and dae tu, pruvim hao iumi tu fit for obey. (Hebrews 11:36, 37; 12:1) Olketa hia barava mekem heart bilong Jehovah hapi! (Proverbs 27:11) Bat samfala narawan faithful firstaem bat fail for go ahed for obey. Wanfala long olketa hem King Jehoash bilong Judah bifor.

Olketa Nogud Kaban Spoelem Wanfala King

6, 7. Jehoash hem wanem kaen king taem Jehoiada hem laef?

⁶ Taem King Jehoash hem baby, waef bilong Hae Priest Jehoiada haedem hem from olketa wea laek killim hem dae. Taem Jehoash hem seven year, witim fasin for no fraet Hae Priest Jehoiada tekem hem aot from ples wea olketa haedem hem and mekem hem king. From Jehoiada wea fraet long God hem kamap olsem dadi and man for givim advaes long Jehoash, datfala young ruler “go ahed for duim samting wea stret long eye bilong Jehovah for full laef bilong Jehoiada datfala priest.”—2 Chronicles 22:10–23:1, 11; 24:1, 2.

⁷ Insaed olketa gudfala samting wea Jehoash duim hem wei wea hem mekem temple bilong Jehovah niu moa—samting wea “heart bilong Jehoash laekem tumas.” Hem remindim Hae Priest Jehoiada hao olketa need for kolektem temple tax from Judah and Jerusalem, olsem ‘Moses givim order for duim,’ for peim kost bilong datfala waka. Luk olsem, Jehoiada win for encouragem disfala young king for studyim and obeyim Law bilong God. From diswan, datfala waka long temple and olketa samting bilong temple hem finis kwiktaem.—2 Chronicles 24:4, 6, 13, 14; Deuteronomy 17:18.

8. (a) Wanem nao main samting wea spoelem Jehoash long spiritual wei? (b) Gogo, wei wea hem no obey leadim datfala king for duim wanem samting?

⁸ Sorre tumas, Jehoash no go ahed for obeyim Jehovah. Why nao olsem? Word bilong God hem sei: “Bihaen Jehoiada hem dae, olketa prince bilong Judah kam and baodaon long datfala king. Long datfala taem king hem lisin long olketa. And gogo olketa lusim haos bilong Jehovah, God bilong olketa laen dadi bilong olketa and start for servem olketa holy post and olketa idol, mekem kros kamap againstim Judah and Jerusalem from wei wea olketa guilty.” Nogud wei bilong olketa prince bilong Judah affectim datfala king mekem hem no laek herem olketa profet bilong God, olsem Zechariah, son bilong Jehoiada wea no hol bak for repruvim Jehoash and olketa pipol for wei wea olketa no obey. Winim wei for repent, Jehoash givim order for olketa sutim Zechariah dae witim olketa ston. Jehoash hem kamap man wea no obey and no tingim feeling bilong pipol—diswan hem bikos olketa nogud kaban barava spoelem hem!—2 Chronicles 24:17-22; 1 Corinthians 15:33.

9. Hao nao samting wea kasem Jehoash and olketa prince showimaot klia wei for no obey hem krangge samting?

⁹ From hem lusim Jehovah, wanem nao happen long Jehoash and olketa wicked prince wea hem kaban witim? Wanfala army bilong Syria—wanfala “smol” namba bilong olketa man—kam for attakim Judah and “killim dae evri prince bilong olketa.” Datfala army forcem king for givim tu evri samting bilong hem and olketa gold and silver bilong temple. Nomata Jehoash no dae, hem wik and sik. No longtaem bihaen, samfala servant bilong hem wea againstim hem killim hem dae. (2 Chronicles 24:23-25; 2 Kings 12:17, 18) Toktok bilong Jehovah long Israel hem tru tumas: “Sapos iufala bae no lisin long voice bilong God bilong iufala Jehovah for careful for duim evri komandment bilong hem and olketa law bilong hem. . . , evri curse hia tu mas kasem iufala and kavarem iufala”!—Deuteronomy 28:15.

Wei for Obey Sevem Wanfala Secretary

10, 11. (a) Why nao hem gud for ting raonem kaonsel wea Jehovah givim for Baruch? (b) Wanem nao kaonsel wea Jehovah givim for Baruch?

¹⁰ Waswe, samtaem iu feel wiki bikos tu-thri nomoa wea iu meetim long Christian ministry showimaot interest long gud nius? Waswe, enitaem iu feel jealous lelebet long pipol wea garem rich and gudfala living? Sapos olsem, tingim Baruch, secretary bilong Jeremiah, and loving kaonsel wea Jehovah givim for hem.

¹¹ Taem Baruch go ahed for raetem wanfala profesi message, Jehovah tan go long hem for givim hem kaonsel. Why nao olsem? Bikos Baruch start for no satisfae witim living bilong hem and hem wantem samting wea moabeta winim spesol privilege bilong hem long service bilong God. Taem Jehovah luksavve hao tingting bilong Baruch hem change, hem givim hem disfala klia bat kaenfala kaonsel: “Iu go ahed for lukaotem bigfala samting for iuseleva. No go ahed for lukaotem. From mi bae bringim bigfala trabol long evri flesh, . . . and bae mi givim iu soul bilong iu olsem reward long evri ples wea iu bae go long hem.”—Jeremiah 36:4; 45:5.

12. Why nao iumi mas no lukaotem “bigfala samting” for iumiseleva insaed disfala world?

¹² Waswe, iu luksavve from toktok bilong Jehovah hao Hem barava interest long disfala gudfala man wea no fraet and servem hem long faithful wei witim Jeremiah? Distaem tu, Jehovah barava laek for helpem olketa wea ting for lukaotem samting wea olketa tingse hem moabeta insaed disfala world. Hem gud tumas hao, olsem Baruch, planti wea garem datkaen tingting acceptim loving help from olketa mature spiritual brata for stretem olketa. (Luke 15:4-7) Tru nao, hem gud for iumi evriwan luksavve hao no eni future hem stap for olketa wea lukaotem “bigfala samting” for olketa seleva long disfala world. Olketa barava no faendem trufala hapi, and samting wea moa worse, klosap nao olketa bae finis witim disfala world and evri selfish wei bilong hem.—Matthew 6:19, 20; 1 John 2:15-17.

13. Iumi lanem wanem important leson abaotem hambol fasin from samting wea kasem Baruch?

¹³ Datfala story abaotem Baruch hem teachim iumi tu wanfala gudfala leson abaotem hambol fasin. Lukim wei wea Jehovah no givim kaonsel stret long Baruch bat hem talem thru long Jeremiah wea no perfect and wea Baruch mas savve gud long evri fasin bilong hem. (Jeremiah 45:1, 2) Nomata olsem, Baruch no letem praod fasin spoelem hem; long hambol wei hem luksavve hao Jehovah nao really wan wea givim datfala kaonsel. (2 Chronicles 26:3, 4, 16; Proverbs 18:12; 19:20) So, sapos iumi ‘go rong lelebet taem iumi no minim yet’ and kasem kaonsel from Word bilong God wea iumi needim, iumi mas followim example bilong Baruch wea mature, garem spiritual tingting, and wea hambol.—Galatians 6:1.

14. Why nao hem gud for iumi obeyim olketa wea leadim iumi?

¹⁴ Sapos iumi hambol olsem, hem helpem tu olketa wea givim kaonsel for iumi. Hebrews 13:17 hem sei: “Obeyim olketa wea lead long iufala and stap anda long olketa, from olketa lukaftarem soul bilong iufala olsem olketa wea bae givim ansa; mekem olketa duim diswan witim hapi and no witim sorre, from datwan bae spoelem iufala.” Planti taem olketa elder barava prea strong long Jehovah for strong, wisdom and fasin for tingim feeling bilong narawan taem olketa duim disfala hard part bilong shepherding waka! Iumi mas “tinghae long olketa man olsem.”—1 Corinthians 16:18.

15. (a) Hao nao Jeremiah showimaot hem barava trustim Baruch? (b) Wanem nao reward bilong Baruch for wei wea hem hambol for obey?

¹⁵ Hem klia hao Baruch stretem tingting bilong hem bikos bihaen datwan Jeremiah givim hem wanfala assignment wea hem bigfala challenge—for go long temple and readim big datfala judgment message bilong Jeremiah wea Baruch raetem. Waswe, Baruch obey? Yes, hem duim “evri samting wea Jeremiah datfala profet komandim hem.” And tu, hem readim datfala sem message long olketa prince bilong Jerusalem, samting wea barava needim fasin for no fraet. (Jeremiah 36:1-6, 8, 14, 15) Eitin year bihaen, taem olketa bilong Babylon tekovarem Jerusalem, tingim hapi bilong Baruch from hem stap laef from hem lisin long warning from Jehovah and hem finis for lukaotem “bigfala samting” for hemseleva!—Jeremiah 39:1, 2, 11, 12; 43:6.

For Obey Long Taem Bilong Attak Hem Sevem Laef

16. Hao nao Jehovah showimaot fasin for kea for olketa Jew long Jerusalem taem olketa bilong Babylon attakim olketa long 607 B.C.E.?

¹⁶ Taem Jerusalem hem finis long 607 B.C.E., fasin bilong God for kea long olketa wea obey hem showaot klia moa. Taem olketa bilong Babylon go ahed for attak, Jehovah hem sei long olketa Jew: “Mi putim front long iufala pipol wei bilong laef and wei bilong dae. Man wea stap nomoa long disfala taon bae dae from sword and bigfala hangre and nogud sik; bat man wea hem go aot and sarenda long olketa bilong Chaldea wea attakim iufala, bae hem stap laef, and bae hem sevem soul bilong hemseleva.” (Jeremiah 21:8, 9) Nomata olketa bilong Jerusalem fit for dae, long last minute Jehovah showimaot fasin for kea for olketa wea obeyim hem.b

17. (a) Wanem nao tufala wei wea fasin bilong Jeremiah for obey hem kasem test taem Jehovah talem hem for talem olketa Jew for “sarenda long olketa bilong Chaldea”? (b) Hao nao example bilong Jeremiah for no fraet for obey savve helpem iumi?

¹⁷ For sure, hem testim tu fasin bilong Jeremiah for obey taem hem mas talem olketa Jew for sarenda. Wanfala reason hem bikos Jeremiah garem strongfala love for nem bilong God. Hem no laekem olketa enemy for tokdaonem nem bilong God and sei olketa idol bilong olketa nao mekem olketa win. (Jeremiah 50:2, 11; Lamentations 2:16) And tu, Jeremiah luksavve hao wei for talem olketa for sarenda putim laef bilong hemseleva long danger bikos planti bae tingse toktok bilong hem showaot hem againstim nation. Nomata olsem, hem no fraet bat hem obey and talemaot toktok bilong Jehovah. (Jeremiah 38:4, 17, 18) Olsem Jeremiah, iumi tu talemaot wanfala message wea planti pipol no laekem. Pipol lukdaonem Jesus for talemaot disfala sem message. (Isaiah 53:3; Matthew 24:9) So iumi mas no ‘fraet long man,’ bat olsem Jeremiah, iumi mas strong for obeyim Jehovah, trustim hem evribit.—Proverbs 29:25.

Obey Taem Gog Hem Attak

18. Wanem nao olketa test long wei for obey wea olketa servant bilong Jehovah bae feisim long future?

¹⁸ Klosap nao, evri part bilong wicked system bilong Satan bae finis insaed wanfala “big trabol” wea winim eni nara trabol bifor. (Matthew 24:21) Iumi sure hao bifor and midol long datfala taem, pipol bilong God bae kasem samfala bigfala test bilong faith and wei for obey. Olsem example, Bible talem iumi hao Satan, olsem “Gog bilong land bilong Magog,” bae barava attakim olketa servant bilong Jehovah, and bae hem iusim sekson wea Bible kolem “wanfala bigfala army . . . , olsem olketa cloud for kavarem land.” (Ezekiel 38:2, 14-16) Pipol bilong God wea smol namba nomoa and wea no savve defendim olketa seleva bae lukaotem sef ples anda long “olketa wing” bilong Jehovah wea hem iusim for protectim olketa wea obey.

19, 20. (a) Why nao hem barava important for olketa Israelite obey taem olketa kasem Red Sea? (b) Hao nao wei for ting raonem witim prea samting wea happen long Red Sea savve helpem iumi distaem?

¹⁹ Disfala samting mekem iumi tingim taem olketa Israelite go aot from Egypt. Bihaen hem kosim tenfala nogud trabol for kasem Egypt, Jehovah leadim pipol bilong hem, no long shortfala wei for kasem Promis Land, bat hem leadim olketa go daon long Red Sea, wea hem hard for olketa ranawe from eni attak. Diswan luk olsem wanfala nogud plan. Waswe sapos iu long there? Bae iu obeyim toktok bilong Jehovah thru long Moses and march go daon long Red Sea witim full trust, nomata iu savve datfala road hem no lead go long Promis Land?—Exodus 14:1-4.

²⁰ Taem iumi read go moa insaed Exodus chapter 14, iumi lukim wei wea Jehovah showimaot bigfala paoa bilong hem for sevem pipol bilong hem. For spendem taem for studyim and ting raonem olketa story olsem savve barava strongim faith bilong iumi! (2 Peter 2:9) And strongfala faith savve strongim iumi for obeyim Jehovah, nomata taem hem luk olsem samting hem askem hem no stret long tingting bilong iumi olketa man. (Proverbs 3:5, 6) So askem iuseleva, ‘Waswe, mi trae hard for strongim faith bilong mi thru long Bible study, prea, and wei for ting raonem samting, and tu thru long wei wea mi evritaem kaban witim pipol bilong God?’—Hebrews 10:24, 25; 12:1-3.

Wei for Obey Givim Hope

21. Wanem nao olketa blessing wea olketa wea obeyim Jehovah kasem distaem and long future?

²¹ Olketa wea evritaem obeyim Jehovah experiencem wei wea Proverbs 1:33 hem fulfill, wea hem sei: “Saed long man wea lisin long [wei for obeyim] mi, hem bae stap sef and no wari long fraet bilong bigfala trabol.” Disfala toktok bilong comfort bae barava fitim day bilong Jehovah for pei bak wea klosap for kam! Tru nao, Jesus talem olketa disaepol bilong hem: “Taem evri samting hia start for happen, standap stret and liftimap hed bilong iufala, from taem for sevem iufala hem kam klosap nao.” (Luke 21:28) Hem klia tumas, only olketa wea obeyim God bae garem trust wea olketa needim for followim datfala toktok.—Matthew 7:21.

22. (a) Why nao pipol bilong Jehovah fit for garem trust? (b) Nextfala article bae storyim wanem samting?

²² Narafala reason for garem trust hem bikos “Sovereign Lord Jehovah bae no duim eni samting sapos hem no firstaem talem secret samting bilong hem long olketa servant bilong hem, olketa profet.” (Amos 3:7) Distaem, Jehovah no iusim olketa profet long wei wea hem iusim bifor; bat hem appointim wanfala faithful slave class for provaedem spiritual kaikai long taem wea fitim for famili bilong hem. (Matthew 24:45-47) Dastawe, hem barava important for iumi redy for obeyim datfala “slave”! And tu, olsem nextfala article bae showim, wei for obey showimaot hao iumi ting long Jesus, masta bilong datfala ‘slave.’ Hem nao Datwan wea ‘olketa pipol obeyim hem.’—Genesis 49:10.

[Olketa Footnote]

Waswe, Iu Remember?

• Wanem nao kamaot from wei wea Israel go ahed for no obey?

• Hao nao olketa wea kaban witim King Jehoash affectim hem taem hem young and bihaen?

• Wanem nao olketa leson wea iumi savve lanem from Baruch?

• Why nao pipol bilong Jehovah wea obey no garem reason for fraet taem disfala system hem gogo for finis?

[Piksa long page 13]

Taem hem followim lead bilong Jehoiada, young Jehoash obeyim Jehovah

[Piksa long page 15]

Olketa nogud kaban pullim Jehoash, gogo hem givim order for killim dae profet bilong God

[Piksa long page 16]

Waswe sapos iu stap long dat taem? Bae iu obeyim Jehovah and lukim bigfala paoa bilong hem for sev?