Jesus Christ—Pruv wea Showimaot Hem Stap Long Earth Bifor

Jesus Christ—Pruv wea Showimaot Hem Stap Long Earth Bifor

PLANTI pipol nating meetim datfala famous scientist wea nem bilong hem Albert Einstein. Long samfala kantri pipol nating savve hu nao hem. Nomata olsem, olketa report abaotem olketa samting wea hem duim pruvim hao hem really stap bifor. Olketa samting wea hem faendemaot saed long science barava affectim living distaem. Olsem example, planti pipol kasem gud samting from electric paoa wea olketa kasem thru long wei for iusim samfala idea bilong Einstein.

Diswan fitim tu Jesus Christ, wea hem wanfala man wea barava affectim full history bilong olketa man. Samting wea pipol raetem abaotem hem and tu wei wea hem affectim pipol distaem hem strongfala pruv wea showimaot hem really stap bifor. Olsem iumi lukim long firstfala article, hem interesting hao olketa faendem datfala raeting abaotem James, nomata olsem, for pruvim Jesus hem really stap bifor hem no depend long diswan or long eni nara oldfala samting. Bikos, really, iumi savve faendem pruv hao Jesus really stap bifor insaed olketa samting wea olketa man for raetem history talem abaotem hem and olketa follower bilong hem.

Pruv From Olketa Man for Raetem History

Olsem example, tingim pruv bilong Flavius Josephus, wanfala Pharisee long first century wea raetem history bilong olketa Jew. Hem tok abaotem Jesus Christ insaed buk bilong hem Jewish Antiquities. Nomata samfala daotem firstfala toktok wea Josephus talem abaotem Jesus olsem Messiah, Professor Louis H. Feldman from Yeshiva University hem sei planti no daotem mek-tu toktok wea hem talem. Long there Josephus sei: “[Ananus datfala hae priest] hem hipimap olketa judge bilong Sanhedrin and tekem kam front long olketa wanfala man wea nem bilong hem James, wea hem brata bilong Jesus wea olketa kolem Christ.” (Jewish Antiquities, XX, 200) Tru nao, wanfala Pharisee, wea hem member bilong sekson wea enemy bilong Jesus, bilivim hao “James, brata bilong Jesus,” hem really stap.

Wei wea Jesus hem really stap bifor hem showaot thru long waka bilong olketa follower bilong hem. Taem aposol Paul hem stap long prison long Rome long samting olsem 59 C.E., olketa bigman bilong olketa Jew talem hem: “Mifala savve hao long evri ples pipol tok againstim disfala sect.” (Acts 28:17-22) Olketa kolem olketa disaepol bilong Jesus “disfala sect.” Sapos pipol evriwea againstim olketa, bae olketa man for raetem history raet abaotem olketa tu.

Tacitus, wea born long samting olsem 55 C.E. and wea planti ting long hem olsem man for raetem history wea winim evri narawan, hem story abaotem olketa Christian insaed Annals wea hem raetem. Taem hem raet abaotem wei wea Nero sei olketa Christian nao startim bigfala fire long Rome long 64 C.E., hem sei: “Nero accusim and barava spoelem datfala sekson wea olketa heitim, and wea pipol kolem olketa Christian. Christ, wea datfala nem Christian hem kam from, kasem panis for dae from Pontius Pilatus wanfala bigman long taem wea Tiberius hem rul.” Diswan hem semsem witim information insaed Bible abaotem Jesus.

Narafala man for raet wea story abaotem olketa follower bilong Jesus hem Pliny the Younger, wea hem governor bilong Bithynia. Long samting olsem 111 C.E., Pliny raet long Emperor Trajan, and ask hao nao for deal witim olketa Christian. Pliny sei hao pipol wea samfala accusim olketa for sei olketa Christian, willing for prea long olketa god and worshipim idol bilong Trajan, for pruvim hao olketa no Christian. Pliny sei moa: “Olketa sei hem hard tumas for forcem olketa wea really Christian, for duim eni samting hia.” Diswan showimaot hao Christ hem really laef bifor, from olketa follower bilong hem redy for dae for showim hao olketa biliv long hem.

Bihaen hem storyim olketa reference abaotem Jesus Christ and olketa follower bilong hem wea olketa man for raetem history insaed first tufala century talem, The Encyclopædia Britannica (2002 edition) hem sei: “Olketa story hia wea kam from olketa difren pipol pruvim hao long taem bifor olketa enemy bilong Christian Wei nating daotem hao Jesus really stap. Gogo, long mek-18, mek-19 and mek-20 century nomoa pipol start for kwestinim diswan nomata olketa no garem pruv long hem.”

Pruv From Olketa Follower Bilong Jesus

The Encyclopedia Americana hem sei: “Niu Testament hem provaedem klosap evri pruv wea showimaot Jesus really stap bifor and olketa samting wea happen long hem, and hem showimaot tu hao nao olketa firstfala Christian ting long wei wea hem important.” Samfala wea daot maet no acceptim samting wea Bible talem olsem pruv hao Jesus hem stap bifor. Bat, tufala point wea garem faondeson from Bible savve help for pruvim hao Jesus hem really stap long earth bifor.

Olsem iumi lukim finis, olketa nambawan idea bilong datfala man Einstein, pruvim hao hem really stap bifor. Long sem wei tu, teaching bilong Jesus pruvim hem really stap bifor. Olsem example, tingim datfala Sermon Long Maunten, wanfala story wea Jesus talem wea planti pipol savve long hem. (Matthew, chapter 5-7) Aposol Matthew raet abaotem wei wea disfala sermon hem affectim pipol: “Pipol sapraes fogud long wei bilong hem for teach from hem teachim olketa olsem man wea garem paoa.” (Matthew 7:28, 29) Abaotem wei wea datfala sermon hem affectim pipol insaed olketa century wea go pas, Professor Hans Dieter Betz hem sei: “Datfala Sermon Long Maunten hem no affectim nomoa pipol bilong Jew religion and Christian Wei, and olketa wea followim Western kastom.” Hem sei tu hao disfala sermon hem “spesol from pipol evriwea long world laekem.”

Tingim olketa wise toktok bilong datfala Sermon Long Maunten wea barava stret and gud: “Sapos eniwan hem slapem iu long raet saed long feis bilong iu, tanem narasaed for hem slapem tu.” “Luk aot gud for no showimaot raeteous fasin bilong iufala front long olketa man.” “No wari abaotem next day, from next day bae garem wari bilong hemseleva.” “No givim. . . olketa pearl bilong iufala long olketa pigpig.” “Go ahed for askem, and olketa bae givim long iufala.” “Evri samting wea iufala wantem olketa man for duim long iufala, iufala tu mas duim olsem long olketa.” “Go insaed long smolfala gate.” “From frut bilong olketa iufala bae luksavve long olketa.” “Evri gudfala tree hem garem gudfala frut.”—Matthew 5:39; 6:1, 34; 7:6, 7, 12, 13, 16, 17.

For sure iu herem finis samfala long olketa toktok hia or maet main point bilong olketa. Maet hem kamap wanfala toktok long languis bilong iu. Evriwan hia hem kam from datfala Sermon Long Maunten. Wei wea disfala sermon hem affectim planti pipol and kastom barava showimaot hao “datfala nambawan teacher” hem really stap bifor.

Tingim sapos wanfala man nao hem mekem ap story abaotem Jesus Christ. Tingim sapos man hia hem kleva for mekem ap olketa kaen teaching wea Jesus hem talem insaed Bible. Then hem bae trae for mekem story bilong Jesus and olketa teaching bilong hem kamap samting wea evri pipol acceptim. Bat, aposol Paul hem sei: “Olketa Jew ask for olketa saen and olketa Greek luk aotem wisdom; bat mifala preach abaotem Christ wea olketa nilam, long olketa Jew hem samting wea mekem olketa stambol bat for olketa nation hem krangge samting.” (1 Corinthians 1:22, 23) Olketa Jew and olketa nation nating laekem datfala message abaotem wei wea olketa killim dae Christ. Bat, hem nao datfala Christ wea olketa first-century Christian preach abaotem. Why nao Bible story abaotem Christ olsem man wea olketa killim dae? Only ansa wea fit for mekem man satisfae hem hao olketa man wea raetem Christian Greek Scripture olketa raetem tru samting abaotem laef and dae bilong Jesus.

Nara samting wea pruvim hao Jesus hem stap bifor hem nao wei wea olketa follower bilong hem nating stop for preach abaotem olketa teaching bilong hem. Samting olsem 30 year bihaen Jesus startim ministry bilong hem, Paul fit for sei hao “olketa preachim finis [datfala gud nius] evriwea anda long heven.” (Colossians 1:23) Tru nao, teaching bilong Jesus kasem evriwea long world long datfala taem nomata pipol againstim datwan. Paul, wea kasem persecution from hem wanfala Christian, raet olsem: “Sapos Christ nating laef bak, preaching bilong iumi hem barava iusles, and faith bilong iumi hem iusles.” (1 Corinthians 15:12-17) Sapos wei for preach abaotem Christ wea nating laef bak hem iusles, then bae hem barava moa iusles sapos olketa preach abaotem wanfala Christ wea nating stap bifor. Olsem iumi readim finis long report bilong Pliny the Younger, hem sei olketa first-century Christian willing for dae for biliv bilong olketa long Christ Jesus. Olketa willing for putim laef bilong olketa long danger for Christ bikos hem wanfala really man wea stap bifor and olketa Gospel nao storyim laef bilong hem.

Iu Lukim Pruv

Olketa Christian mas garem faith long datfala resurrection bilong Jesus Christ bifor olketa savve go and preach. Iu tu savve lukim datfala Jesus wea resurrect finis long mind bilong iu sapos iu lukim wei wea Jesus affectim pipol distaem.

No long taem bifor Jesus hem dae, hem talem wanfala bigfala profesi abaotem taem long future wea hem bae stap moa. Hem talem tu hao hem bae resurrect and bae sidaon long raet saed bilong God and weitim taem wea hem bae deal witim olketa enemy bilong hem. (Psalm 110:1; John 6:62; Acts 2:34, 35; Romans 8:34) Bihaen datwan, hem bae tek akson and aotem Satan and olketa demon bilong hem from heven.—Revelation 12:7-9.

Wanem taem nao evri samting hia bae happen? Jesus givim olketa disaepol bilong hem ‘saen for markem taem wea hem bae stap moa and taem bilong end bilong disfala system.’ Insaed datfala saen wea showimaot wei wea hem stap moa, nomata iumi no savve lukim hem, hem olketa bigfala war, kaikai bae short, olketa earthquake, olketa false profet kamap, wei for brekem law kamap moa big, and olketa bigfala sik. Olketa man mas expectim olketa trabol olsem, bikos wei wea Devil Satan hem aot from heven hem minim “trabol for earth.” Devil hem kam daon long earth “and hem kros tumas, from hem savve hem garem shortfala taem nomoa.” And tu, part long disfala saen hem waka for preachim gud nius bilong Kingdom “evriwea long earth for givim witness long evri nation.”—Matthew 24:3-14; Revelation 12:12; Luke 21:7-19.

Olketa samting wea Jesus profesi abaotem happen finis. Start long World War I long 1914, iumi lukim planti pruv wea showimaot hao Jesus Christ hem stap finis, nomata iumi no savve lukim hem. Hem go ahed for rul olsem King long Kingdom bilong God and hem garem barava strongfala paoa. Wei wea iu holem disfala magasin long hand bilong iu pruvim hao datfala Kingdom preaching waka really go ahed distaem.

For minim gud hao wei wea Jesus hem stap bifor hem affectim iumi, iu need for studyim Bible. Hem gud sapos iu askem Olketa Jehovah’s Witness abaotem olketa samting wea showimaot Jesus hem stap moa.

[Olketa Piksa long page 5]

Josephus, Tacitus, and Pliny the Younger story abaotem Jesus Christ and olketa follower bilong hem

[Credit Line]

[Piksa long page 7]

Olketa first Christian barava biliv Jesus hem really stap bifor