Kasem Barava Best Advaes
FOR win long laef hem samting wea iumi evriwan laekem. Gudfala advaes and wei for duim samting followim datwan hem key for kasem kaen laef olsem insaed world wea fulap witim olketa problem. Nomata olsem, staka taem man no willing for followim gudfala advaes. Staka sei man shud duim eniting hem laekem witim laef bilong hem. For tok stret, record bilong Bible showim hao Satan, datfala first enemy wea againstim sovereign rul bilong God, givim long first man and woman wei for disaed seleva. Genesis 3:5 recordim toktok wea hem talem long Eve: “God hem savve hao long day wea iu kaikai from [tree bilong savve long gud and nogud samting] eye bilong iu bae open and iu bae kamap olsem God, savve long gud and nogud samting.”
Waswe, bihaen datwan Adam and Eve fit for win long laef and no kasem eni nogud samting, and followim nomoa tingting bilong tufala seleva? Nomoa nao. Stretawe bihaen datwan, tufala no hapi long olketa nogud samting wea kamaot, from tufala tingse tufala savve long gud and nogud samting. God no appruvim tufala and tufala startim hardfala laef wea no perfect, and dae end bilong datwan. (Genesis 3:16-19, 23) Dae hem kasem iumi evriwan. Bible sei: “Thru long wanfala man [Adam] sin hem kam insaed long world and dae hem kam from sin, dastawe dae hem kasem evri man bikos evriwan sin.”—Romans 5:12.
Nomata olketa barava nogud samting kamaot from wanem Adam and Eve chusim, staka no barava sure sapos hem fitim for followim advaes from Datwan wea Wakem man. Nomata olsem, Bible seleva sei Bible “kam from God and hem gud,” and hem savve helpem iumi for “fit evribit, barava redy for duim evri gudfala waka.” (2 Timothy 3:16, 17) Iumi bae barava moa hapi sapos iumi followim advaes insaed Bible. Bible savve barava helpem famili laef.
Faithful Long Marit Partner
Olsem Bible talem, hem purpose bilong God for marit stap for olowe. (Genesis 2:22-24; Matthew 19:6) And tu, Bible sei hao “marit bed [shud] no kamap dirty,” diswan hem minim for no spoelem marit long wei for duim sex witim nara man or woman. (Hebrews 13:4) Bat, maet iu savve hao staka marit distaem no followim disfala standard. Samfala pipol garem wei for switim feeling bilong narawan wea olketa waka witim wea hem no marit partner bilong olketa. Olketa narawan laea long famili mekem olketa savve spendem taem witim samwan wea olketa frenim wea no marit partner bilong olketa. Samfala lusim tu hasband or waef for stap witim samwan wea moa young. Reason for diswan olketa sei hem mekem olketa feel young and hapi, olsem wanem happen long Verónica wea first article storyim.
Nomata olsem, wei wea man selfish for aftarem samting wea hemseleva laekem nomoa, nomata diswan bae spoelem nara pipol, bae no mekem hem hapi for olowe. Ronald savve agree witim datwan. From hem barava sure hao laef bilong hem bae kamap moabeta, hem lusim waef bilong hem for startim niu famili witim woman wea hem frenim haed for sixfala year wea hem givim tufala pikinini long hem finis. Bat, no longtaem bihaen hem finisim first marit bilong hem, disfala woman wea hem frenim lusim hem! Gogo Ronald go stap witim parents bilong hem. Hem storyim diswan olsem “wanfala barava nogud samting.” Diswan wanfala example nomoa. Kaen fasin olsem wea kamaot from selfish feeling mekem staka divorce and wei for famili separate kamap distaem. Diswan mekem staka pipol safa—olketa full-grown man and pikinini.
Bat long narasaed, sapos man followim advaes from Bible diswan savve givim hem trufala hapi. Diswan nao samting wea happen long Roberto, wea sei: “From mi followim advaes insaed Bible, mi no lusim waef bilong mi. Iumi bae no kasem trufala hapi taem iumi foldaon long temptation witim samwan wea no hasband or waef bilong iumi, nomata hem luk olsem datfala man hem naes. Advaes wea Bible givim hem helpem mi for tinghae long waef bilong mi, wea stap witim mi for staka year.” Disfala advaes from Bible for “no brekem trust midolwan long iu and waef wea iu tekem taem iu young” mekem Roberto for garem diskaen tingting. (Malachi 2:15) Wanem moa nara wei wea iumi kasem gud samting from advaes bilong God?
Trainim Olketa Pikinini
Klosap foti year bifor, wanfala idea wea staka pipol acceptim for trainim olketa pikinini nao for parents shud no markem staka samting wea olketa pikinini no savve duim. Pipol tingse hem fitim for letem olketa pikinini disaed seleva saed long fasin and hao for ting long samting. Goal bilong diswan hem for no stopem wei wea olketa growap gud. Long samfala kantri, samfala samting saed long skul stap wea olketa student savve disaed sapos olketa bae attendim datfala leson or nomoa and olketa savve chusim haomas hapitaem or training olketa laek for kasem. Rul bilong wanfala skul olsem hem “for letem olketa pikinini talemaot feeling bilong olketa seleva and wanem olketa laekem and no eni full-grown man bae tok againstim or talem eniting.” Distaem, samfala pipol wea duim waka for givim advaes still no agree hao eni gud samting savve kamaot from wei for whipim pikinini, nomata sapos parents ting hem important for olketa discipline witim love.
Wanem nao kamaot from diswan? Staka pipol bilivim hao olketa wei for trainim pikinini wea no tambuim staka samting hem givim olketa pikinini bigfala freedom. Olketa talem hao diswan nao samting wea mekem criminal fasin and wei for iusim drug kamap big tumas. Wanfala survey long United States showimaot hao klosap 70 percent long pipol wea olketa askem ting olketa pikinini and young pipol no kasem inaf help and direction from parents. Taem olketa trae for explainim olketa sut-aot wea happen long skul and olketa nara barava nogud criminal fasin wea olketa teenager duim, staka sei diswan happen bikos “parents no barava kontrolem gud olketa pikinini.” And nomata sapos olketa pikinini no barava duim olketa nogud samting, parents and olketa pikinini kasem nogud samting from olketa no trainim pikinini long gudfala wei.
Wanem nao Bible talem abaotem diswan? Bible encouragem parents for showimaot paoa wea olketa garem witim love and witim strong for followim stret samting. Bible sei: “Krangge fasin hem stap insaed long heart bilong wanfala boy, stik bilong discipline nao bae aotem datwan from hem.” (Proverbs 22:15) Tru nao, evri discipline wea parents givim shud fitim samting wea happen. Long eni discipline, parents mas showimaot kwaet fasin, fasin for kontrolem seleva and wei for tingim pikinini. Taem parents givim kaen discipline olsem diswan showimaot love. Bae gud samting kamaot from wei wea parents showimaot paoa wea olketa garem, no long raf wei, bat long loving wei.
Iumi savve lukim gud samting sapos iumi followim disfala advaes. Arturo, wanfala man wea 30 year long Mexico wea just marit, sei: “Dadi talem klia long mi and olketa brata bilong mi hao hem and mami garem paoa insaed famili. Tufala no savve hol bak for disciplinem mifala. Nomata olsem, tufala evritaem garem taem for story witim mifala. Distaem mi wanfala full-grown man nao, mi tinghae long laef wea mi enjoyim from hem no olobaot, and mi savve hem kamap olsem from gudfala instruction wea mi kasem.”
Followim Evribit Best Advaes
Word bilong God, Bible, garem best advaes for olketa man. Hem no helpem nomoa famili. Hem helpem iumi long staka wei bikos hem teachim iumi wanem for duim insaed world wea staka pipol no willing for acceptim hao wisdom bilong God shud leadim olketa, and hao olketa bae kasem gud samting from diswan.
Jehovah God, Creator bilong olketa man, talem disfala promis long man wea raetem psalm, David: “Mi bae mekem iu for garem fasin for luksavve and teachim iu long wei wea iu mas followim. Mi bae givim advaes and lukluk long iu.” (Psalm 32:8) Hem naes for savve hao Creator lukluk kam long iumi mekem hem savve protectim iumi from eni danger? Kwestin wea each wan long iumi mas askem hemseleva nao: ‘Waswe, mi bae hambol for acceptim direction from Jehovah for keepim mi sef?’ Word bilong hem talem iumi long wei wea showimaot love bilong hem: “Trust long Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae mekem olketa wei wea iu followim stret.”—Proverbs 3:5, 6.
Wei for savve long Jehovah needim wei for waka hard and no givap, nomata evri man savve kasem diswan thru long Bible. Wei bilong laef wea hem talem “garem promis bilong laef distaem and datwan wea bae kam.” Tru nao, hem barava gudfala wei wea iumi savve kasem olketa nambawan samting.—1 Timothy 4:8; 6:6.
Sapos iu barava laekem advaes insaed Bible and olketa blessing wea bae kamaot taem man followim datwan, mekem wei for readim and ting raonem Bible kamap first samting long laef bilong iu. Taem iu duim olsem, diswan savve helpem iu win for feisim olketa challenge distaem and olketa wea bae kamap bihaen. And tu, iu bae lane abaotem hope for stap insaed niu world bilong God, wea Jehovah bae teachim evriwan and wea bigfala peace bae stap.—Isaiah 54:13.
[Piksa long page 5]
Advaes from Bible savve strongim wei for fren insaed marit
[Olketa Piksa long page 6]
Bible advaes hem faondeson for kasem gud direction, bat hem storyim tu need for garem lelebet hapitaem
[Olketa Piksa long page 7]
Pipol wea followim Bible advaes savve enjoyim gudfala laef wea balance