Chapter 15

Buildim Famili wea Honorim God

1-3. Why nao samfela pipol no savvy stretem olketa problem wea kamap planti taem insaed long marit and way for luk aftarem pikinini, but why nao Bible savvy help?

SAPOS wantaem yu plan for buildim haos bilong yuseleva. Firstaem yu buyim wanfela piece land. Long mind bilong yu, yu lukim datfela niufela haos bilong yu, and yu luk forward long datwan. But waswe sapos yu no garem any tul and no savvy hao for buildim any samting? Datwan bae spoelem work bilong yu nao!

² Planti hasband and waef they startim marit bilong them and ting say they bae garem hapi famili, but they no garem olketa tul and savvy wea they needim for buildim datwan. No long taem bihaen long wedding day, samfela no gud fashion start for kamap. Way for faet and rowa kamap everyday. Taem pikinini hem born, niufela dadi and mami hia they no savvy hao for luk aftarem hem long sem way wea they no savvy hao for mekem marit bilong them hapi.

³ But, Bible savvy givim help. Olketa principle bilong Bible they olsem olketa tul wea mekem yu fit for buildim hapi famili. (Proverbs 24:⁠3) Yumi lukim hao nao diswan hem olsem.

OLKETA TUL FOR BUILDIM HAPI MARIT

4. Why nao marit bae garem olketa problem, and wanem nao olketa mark wea stap insaed long Bible?

⁴ Nomata hem luk olsem wanfela man and woman they barava fitim each other, they different long saed bilong feeling, samting wea they kasem taem they pikinini and famili living bilong them. So, samfela problem bae kamap bihaen long marit. Hao nao they bae deal withim? Well, taem olketa man buildim wanfela haos, they lukluk long plan bilong haos. Diswan hem olketa samting for guide-im them. Bible hem provide-im olketa mark bilong God for buildim hapi famili. Distaem bae yumi lukluk long samfela.

5. Hao nao Bible show aot hao hem important tumas for garem loyal fashion insaed long marit?

⁵ Loyal fashion. Jesus hem say: “Samting wea God hem joinim tugeta no any man mas divaedem.”a (Matthew 19:⁠6) Aposol Paul hem raet olsem: “Marit mas garem honor midlwan long everywan, and marit bed mas klin every bit, from God bae judge-im olketa wea duim fornication and adultery.” (Hebrews 13:⁠4) So olketa wea marit mas givim ansa long Jehovah long way wea they stap faithful long partner bilong them.​—⁠Genesis 39:​7-9.

6. Hao nao loyal fashion bae help for keepim wanfela marit?

⁶ Loyal fashion hem mekem marit garem respect and way for feel safe. Loyal hasband or waef savvy nomata wanem samting happen, tufela bae supportim each other. (Ecclesiastes 4:​9-12) Diswan hem different every bit from olketa wea lusim marit bilong them taem they kasem smallfela problem nomoa! Olketa olsem they kwiktaem for say they ‘choosim rongfela partner,’ they ‘no love-im moa each other,’ and only ansa hem for garem niufela partner. But tingting olsem hem no givim chance long hasband or waef for grow long saed bilong feeling. But, olketa wea no loyal olsem they tekem go olketa sem problem long niufela partner bilong them. Taem man wea garem gudfela haos hem faend aot roof long haos hem leak, bae hem trae for fixim. Hem no just muv go long narafela haos. Olsem tu, way for change-im partner bae no stretem olketa samting wea startim problem long marit. Taem olketa problem kamap, no trae for finisim marit, but work hard for mekem marit go ahed. Man wea garem loyal fashion olsem hem ting long marit olsem samting wea hem fit for luk aftarem gud, keepim, and ting hae long hem.

7. Why nao planti taem hem hard for marit pipol for story tugeta, but hao nao way for havem “niufela fashion” hem savvy help long diswan?

⁷ Way for story tugeta. Wanfela toktok long Bible hem say: “Olketa plan they savvy kamap no gud taem pipol no toktok tugeta.” (Proverbs 15:22) But, way for story tugeta hem hardfela samting for samfela hasband and waef. Why nao olsem? Bikos pipol garem different way for story. Diswan hem planti taem mekem olketa no meanim each other and feel kros. Teaching bilong dadi and mami tu savvy affectim diswan. For example, samfela maet grow ap insaed long famili wea dadi and mami they rowa olawe. Distaem they marit, and they maet no savvy hao for story withim partner bilong them long kaen and loving way. Nomata olsem, hom bilong yu no need for kamap wanfela no gud ‘haos wea fulap withim rowa.’ (Proverbs 17:⁠1) Bible mek hae long way for havem “niufela fashion,” and hem no say fashion for againstim man and for singaot big and swear hem olraet nomoa.​—⁠Ephesians 4:​22-24, 31.

8. Wanem nao savvy helpem yu taem yu no agree withim partner bilong yu?

⁸ Wanem nao yu savvy duim taem yu tufela no agree long samting? Sapos yu or partner bilong yu start for kros, hem gud for followim advice long Proverbs 17:14: “Bifor rowa hem bursta, go awe.” Yes, yu savvy leavim story for bihaen, taem yu and partner bilong yu no kros. (Ecclesiastes 3:​1, 7) Nomata wanem samting hem happen, trae hard for “kwiktaem for listen, slow for toktok, slow for kros.” (James 1:19) Goal bilong yu hem for stretem problem, no for winim rowa. (Genesis 13:​8, 9) Choosim gud olketa word bilong yu and tok long way wea bae mekem yu and partner bilong yu for no kros. (Proverbs 12:18; 15:​1, 4; 29:⁠11) Winim every samting, no go ahed for feel kros, but lukaotem help long way for story withim God taem yu pray tugeta long humble way.​—⁠Ephesians 4:​26, 27; 6:⁠18.

9. Why nao yumi savvy say way for story tugeta hem start from heart?

⁹ Wanfela proverb long Bible hem say: “Heart bilong wisefela man hem mekem hem show aot gudfela tingting taem hem tok, and way wea hem talem samting mekem man want for listen.” (Proverbs 16:23) So, key for win long way for story tugeta hem samting wea stap insaed long heart, no long mouth. Wanem nao tingting bilong yu abaotem partner bilong yu? Bible encouragim olketa Kristian for showim aot “feeling for each other.” (1 Peter 3:⁠8) Waswe, yu savvy duim diswan taem marit partner bilong yu kasem bigfela worry? Sapos olsem, diswan bae helpem yu for savvy hao for givim ansa.​—⁠Isaiah 50:⁠4.

10, 11. Hao nao hasband savvy followim kaonsel long 1 Peter 3:⁠7?

¹⁰ Honor and Respect. Kristian hasband mas stap withim waef bilong hem “long way wea fitim savvy, givim honor long them olsem wanfela samting wea no strong tumas, wanfela woman.” (1 Peter 3:⁠7) For honorim waef hem meanim for luksavvy long gudfela fashion bilong hem. Hasband wea stap withim waef bilong hem “long way wea fitim savvy” hem ting hae long olketa feeling, gudfela point, savvy bilong hem, and respectim hem. Hem mas want for learnim tu tingting bilong Jehovah abaotem olketa woman and way wea hem wantim man for deal withim them.

¹¹ Insaed long haos bilong yu, maet yu garem wanfela dish wea easy for brek. Waswe, bae yu luk aftarem gud? Well Peter use-im datfela toktok “wanfela samting wea no strong tumas” long sem way, and diswan mas muvim Kristian hasband for showim aot way for barava care long waef bilong hem wea hem love-im.

12. Hao nao waef savvy show aot hem garem bigfela respect for hasband bilong hem?

¹² But wanem kaen kaonsel nao Bible givim for waef? Paul raet olsem: “Waef mas garem bigfela respect for hasband bilong hem.” (Ephesians 5:33) Olsem waef need for feelim honor and love from partner bilong hem, hasband tu need for feelim way wea waef respectim hem. Waef wea show aot respect bae no talemaot long everywan olketa weak point bilong hasband bilong hem, nomata hasband hem wanfela Kristian or no moa. Hem bae no mekem hasband feel shame long way for spoelem and tok daonem hem taem they stap seleva or front long otherfela pipol.​—⁠1 Timothy 3:11; 5:⁠13.

13. Hao nao tufela savvy talemaot tingting bilong them long kaenfela way?

¹³ Diswan no meanim waef hem kanduit for talemaot tingting bilong hem. Sapos samting mekem hem feel no gud, hem savvy talem datwan long way wea show aot respect. (Genesis 21:​9-12) Way for talem wanfela idea long hasband bilong hem, maet olsem sapos hem throwim wanfela ball long hem. Hem savvy throwim easy mekem hasband bilong hem easy for kasem, or hem savvy sutim long way wea mekem hasband bilong hem feel pain. Hem moabeta taem hasband and waef stap klia long way for throwim any kaen toktok long each other, but tok long kaen and easy way!​—⁠Matthew 7:12; Colossians 4:⁠6; 1 Peter 3:​3, 4.

14. Wanem nao yu mas duim sapos partner bilong yu no interest for followim olketa Bible principle insaed marit?

¹⁴ Olsem yumi lukim finis, olketa Bible principle savvy helpem yu for buildim hapi marit. But waswe sapos partner bilong yu no interest long samting wea Bible talem? Yu still savvy duim bigfela samting sapos yu followim savvy bilong God long work bilong yu. Peter hem raet: “Yufela olketa waef, yufela mas stap under long olketa hasband bilong yufela, mekem sapos anywan long them no obey long word, bae yufela savvy winim them, no long toktok, but thru long fashion bilong waef bilong them, from olketa lukim klinfela fashion bilong yufela withim way for barava show aot respect.” (1 Peter 3:​1, 2) Tru nao, sem samting hem fitim tu hasband wea waef bilong hem no interest long Bible. Nomata wanem samting nao partner bilong yu choose for duim, letem olketa Bible principle mekem yu kamap beta hasband or waef. Savvy bilong God bae mekem yu kamap beta dadi or mami tu.

BRINGIM AP PIKININI FOLLOWIM SAVVY BILONG GOD

15. Hao nao samfela savvy learnim olketa rongfela way for bringim ap pikinini, but hao nao they savvy stopem diswan?

¹⁵ From hem garem wanfela saw or hammer hem no meanim man savvy long carpenter work. Long sem way tu, for garem pikinini no meanim man hem savvy hao for bringim ap pikinini. Nomata they savvy or no savvy, samfela taem dadi and mami they bringim ap pikinini followim way wea dadi and mami bilong them duim long them. So, olketa rongfela way for bringim ap pikinini hem pass go long nextfela genereson. Wanfela oldfela Hebrew toktok hem say: “Olketa dadi kaikaim fruit wea no ripe, but teeth bilong olketa son nao feel sour.” But, olketa Scripture show aot hao man no need for followim samting wea dadi and mami bilong hem duim. Hem savvy choosim different way, wanfela way wea followim olketa law bilong Jehovah.​—⁠Ezekiel 18:​2, 14, 17.

16. Why nao hem important for provide-im samting for famili bilong yu, and wanem nao insaed long diswan?

¹⁶ Jehovah wantim olketa Kristian dadi and mami for guide-im and luk aftarem pikinini bilong them long proper way. Paul hem raet olsem: “Tru nao, sapos anywan no luk aftarem olketa wea bilong hem, and diswan hem moa tru long famili bilong hem, hem lusim Kristian faith and hem moa worse winim man wea no garem any faith.” (1 Timothy 5:⁠8) Datwan hem strongfela toktok! For wanfela man wea followim God, work for provide-im samting, wea insaed long diswan hem for luk aftarem olketa samting wea pikinini needim long body, long spiritual way, and long saed bilong feeling, hem wanfela privilege and responsibility. Bible hem givim olketa principle wea savvy helpem dadi and mami for buildim hapi ples for pikinini bilong them. Tingim samfela long olketa hia.

17. Wanem nao yu need for duim sapos yu want for putim olketa law bilong God insaed long heart bilong pikinini bilong yu?

¹⁷ Showim aot gudfela example. Olketa Israelite dadi and mami kasem disfela komand: “Yu mas teachim them [olketa toktok bilong God] long son bilong yu and story long them taem yu sidaon long haos bilong yu and taem yu wakabaot long road and taem yu lay daon and taem yu get ap.” Dadi and mami mas teachim olketa mark bilong God long pikinini bilong them. But bifor datfela komand, disfela toktok hem kamap: “Olketa toktok hia wea mi komandim yu tuday mas stap long heart bilong yu.” (Deuteronomy 6:​6, 7) Tru nao, dadi and mami kanduit for givim samting wea they no garem. Olketa law bilong God mas stap firstaem insaed long heart bilong yu sapos yu want for putim them insaed long heart bilong pikinini bilong yu.​—⁠Proverbs 20:7; lukim Luke 6:⁠40.

18. Hao nao Jehovah showim aot nambawan example for olketa dadi and mami long way for talemaot love?

¹⁸ Talemaot love bilong yu. Taem Jesus hem baptaes, Jehovah hem say: “Yu nao Son bilong mi, dat wan wea mi love-im; mi hapi long yu.” (Luke 3:22) Jehovah talemaot Jesus nao Son bilong hem, and Hem hapi and love-im hem. Bihaen, Jesus say long Father bilong hem: “Yu love-im mi bifor yu workim world.” (John 17:24) So, olsem dadi and mami wea followim God, talemaot and showim aot love bilong yu long pikinini bilong yu​—⁠duim diswan everytaem. Mas everytaem remember hao “love hem buildim ap man.”​—⁠1 Corinthians 8:⁠1.

19, 20. Wanem nao insaed long stretfela way for givim discipline long olketa pikinini, and hao nao example bilong Jehovah savvy helpem olketa dadi and mami?

¹⁹ Discipline. Bible hem mek hae long way wea discipline wea garem love hem important. (Proverbs 1:⁠8) Dadi and mami wea no want for fulfillim responsibility bilong them for guide-im pikinini bilong them distaem bae kasem barava no gud samting from diswan long future. But, dadi and mami kasem warning for no ova tumas long diswan tu. “Yufela dadi,” Paul hem raet olsem, “no mekem olketa pikinini bilong yufela kros everytaem, nogud yufela mekem heart bilong olketa hevi.” (Colossians 3:21) Dadi and mami mas stap klia long way for ova tumas for stretem pikinini bilong them or complain everytaem abaotem weak point bilong them and tok spoelem samting wea they duim.

²⁰ Jehovah God, Father bilong yumi long heven, hem showim aot example for givim discipline. Way wea hem stretem man hem no ova tumas. “Mi bae givim discipline long yu long stretfela way,” God talem pipol bilong hem. (Jeremiah 46:28) Dadi and mami mas followim Jehovah long disfela way. Discipline wea ovarem mark wea fitim or wea winim goal for stretem and teachim pikinini savvy mekem hem feel no gud.

21. Hao nao dadi and mami bae savvy sapos discipline bilong them hem gud or no moa?

²¹ Hao nao dadi and mami bae savvy sapos discipline bilong them hem duim gudfela samting? They savvy askim themseleva olsem, ‘Wanem nao discipline bilong mi hem duim?’ Discipline mas teachim pikinini. Pikinini bilong yu mas meanim why nao hem kasem discipline. Dadi and mami mas tingim tu samting wea savvy kamaot from way wea they stretem pikinini bilong them. Hem tru, klosap every pikinini they no wantim discipline firstaem. (Hebrews 12:11) But discipline mas no mekem pikinini feel fraet or feel olsem yu lusim hem or mekem hem ting say hem nating savvy kamap gud. Bifor hem savvy stretem pipol bilong hem, Jehovah hem say: “Yufela no fraet, . . . from mi stap withim yufela.” (Jeremiah 46:28) Yes, yu mas stretem pikinini long way wea mekem hem savvy yu stap withim hem olsem wanfela loving dadi or mami wea supportim hem.

KASEM “GUDFELA KAONSEL FOR LEADIM”

22, 23. Hao nao yu savvy kasem gudfela kaonsel wea yu needim for leadim yu for buildim wanfela hapi famili?

²² Yumi thankyu tumas long Jehovah for provide-im olketa tul wea yumi needim for buildim hapi famili. But for garem olketa tul nomoa hem no inaf. Yumi mas practice for use-im them long proper way. For example, wanfela man for build maet start for use-im olketa tul bilong hem long no gud way. Hem maet use-im samfela tul long barava rong way. Sapos olsem, samting wea hem buildim bae no mas gud. Long sem way tu, yu maet luksavvy distaem long no gud fashion wea kam insaed long famili bilong yu. Samfela fashion hia maet hard tumas for change-im. But, followim disfela kaonsel bilong Bible: “Wanfela wisefela man bae listen and kasem moa instruction, and man wea meanim samting bae kasem gudfela kaonsel for leadim hem.”​—⁠Proverbs 1:⁠5.

²³ Yu savvy kasem gudfela kaonsel for leadim yu sapos yu go ahed for learnim savvy bilong God. Lukluk for olketa Bible principle wea fitim famili laef, and change-im olketa samting wea yu need for change-im. Studyim way bilong olketa mature Kristian wea showim aot gudfela example olsem marit partner and dadi and mami. Story withim them. Winim every samting, talem every samting wea yu worry abaot long Jehovah insaed long prayer. (Psalm 55:22; Philippians 4:​6, 7) Hem savvy helpem yu for enjoyim hapi famili laef wea honorim hem.

[Footnote]

TESTIM SAVVY BILONG YU

Hao nao loyal fashion, way for story tugeta, way for givim honor and respect they help for mekem marit hapi?

Long olketa wanem way nao dadi and mami savvy show aot love for pikinini bilong them?

Wanem nao insaed long way for givim stretfela discipline?

[Full piksa long page 147]