Wicked Fasin Hem Big Winim Gudfala Fasin
LONG world distaem, maet hem luk olsem no staka pipol willing for duim samting for helpem nara pipol. Nomata olsem, samfala pipol stap wea laek helpem olketa narawan. Evri year, staka pipol givim plande billion dollar for samfala need or organization wea olketa tingse bae helpem pipol. Olsem example, long Britain long 2002, pipol donatem $13 billion (U.S.), long olketa organization for helpem pipol wea poor, wea no enitaem bifor olketa givim big selen olsem. Start kam long 1999, tenfala rich pipol wea kaen tumas, givim, or promis for givim, winim $38 billion (U.S.) for helpem poor pipol.
Samfala gud samting wea pipol wea waka long olketa organization olsem duim hem for peim medical bilong olketa poor famili, teachim and givim direction long olketa pikinini wea garem dadi or mami nomoa, provaedem selen for olketa immunization program long olketa poor kantri, givim buk for olketa pikinini, provaedem olketa animal olsem buluka or kokorako for olketa farmer long olketa poor kantri, and tekem olketa relief supply long pipol wea safa from olketa natural disaster.
Evri samting hia showimaot hao pipol fit for duim gud samting long nara pipol. Bat sorre nao, samfala pipol stap wea duim olketa barava wicked samting.
Wicked Fasin Hem Kamap Moa Big
Start kam from taem wea World War II hem finis, olketa record showimaot hao wei wea olketa difren sekson killim dae staka pipol bilong wanfala tribe or for samfala reason wea join witim politik, hem happen samting olsem 50 taems. Datfala magasin, American Political Science Review, talem hao “samting olsem 12 million go kasem 22 million pipol wea no soldia olketa dae from olketa samting hia, and diswan hem moa big winim namba bilong evri pipol wea dae long evri big and smol war bihaen long 1945.”
Long mek-tu haf bilong mek-20 century, wanfala sekson killim dae samting olsem 2.2 million pipol long Cambodia saed long politik. Fasin for heitim pipol bilong difren tribe lead go long wei for killim dae winim 800,000 man, woman, and pikinini long Rwanda. Long Bosnia, olketa killim dae winim 200,000 pipol saed long religion and politik.
Long 2004, secretary-general bilong United Nations hem storyim samfala nara wicked samting wea happen distaem. Hem sei: “Long Iraq, iumi lukim olketa killim dae plande pipol wea no olketa soldia, and olketa tekem olketa man wea waka saed long relief, olketa niusman, and olketa nara pipol and holem olketa olsem prisoner and killim olketa dae long barava raf wei. Long semtaem iumi lukim nara sekson barava spoelem olketa prisoner long Iraq. Long Darfur, iumi lukim hao olketa full community mas ranawe from olketa militant wea spoelem haos bilong olketa and rapem olketa woman. Long north part bilong Uganda, olketa pikinini garekil nogud and olketa militant forcem olketa for duim barava nogud raf fasin. Long Beslan, wanfala sekson holem olketa pikinini olsem prisoner and killim olketa dae long barava raf wei.”
Nomata long olketa rich kantri, criminal fasin bilong pipol wea heitim wanfala tribe or sekson hem kamap moa big distaem. Olsem example, Independent News talem long 2004 hao long Britain “namba bilong pipol wea samwan attakim olketa from olketa garem difren kala skin hem kamap eleven taems moa big insaed last tenfala year.”
Why nao olketa man wea savve duim plande gud samting duim olketa wicked samting hia? Waswe, bae enitaem wicked fasin hem finis? Olsem nextfala article hem showimaot, Bible garem olketa gudfala ansa for olketa kwestin hia.