Why Nao Iumi Shud Followim Taem?

HEM no isi evritaem for followim taem. Maet iumi leit bikos ples iumi go for hem, hem farawe, traffic hem busy, or iumi mas duim staka samting. Nomata olsem, hem important for iumi followim taem. Tingim man wea waka for selen. Sapos hem evritaem followim taem, boss bae trustim hem and ting long hem olsem gudfala wakaman. Bat man wea leit evritaem savve spoelem waka bilong olketa narawan and bisnis wea hem waka long hem. Tingim tu olketa wea skul. Sapos student hem leit, hem savve missim samfala subject and datwan savve spoelem skul bilong hem. And sapos man garem appointment for lukim doctor or dentist bat hem leit, maet datwan mekem doctor or dentist hariap nomoa for chekim hem.

Bat tingim, long samfala ples pipol no tinghae for followim taem. Sapos iumi stap long ples olsem, maet gogo hem kamap wei bilong iumi tu for leit. Sapos olsem, hem important for iumi traem best for no leit. Wei for luksavve why hem important for followim taem bae helpem iumi for no leit. Wanem nao samfala reason why iumi mas followim taem? Wanem nao savve helpem iumi for evritaem duim datwan? And wanem gud samting nao bae iumi kasem?

Jehovah Evritaem Followim Taem

Main reason why iumi followim taem hem bikos iumi laek followim God wea iumi worshipim. (Eph. 5:⁠1) Jehovah showimaot nambawan example long diswan. No enitaem hem leit. Taem hem markem taem for duim samting followim plan bilong hem, hem duim nao long barava taem wea hem markem. Tingim taem wea Jehovah disaed for finisim nogud pipol long taem bilong Noah. Hem sei long Noah: “Wakem wanfala ark from tree wea garem resin.” Taem flood klosap for kam, Jehovah talem Noah for go insaed long ark and hem sei: “Bihaen sevenfala day nomoa bae mi mekem bigfala rain for kam. Bae hem rain for foti day and foti naet. Bae mi finisim evri samting wea mi wakem wea stap long earth.” Jehovah barava followim taem wea hem markem. “Sevenfala day bihaen hem start for rain big long earth.” (Gen. 6:​14; 7:​4, 10) Tingim samting wea maet kasem Noah and famili sapos olketa leit for go insaed long ark. Sapos olketa laek for stap laef olketa mas followim taem olsem God wea olketa worshipim.

Samting olsem 450 year bihaen Flood, Jehovah sei long Abraham bae hem garem wanfala son, and datfala Pikinini wea Jehovah promisim long bifor, bae kam from laen bilong datfala son bilong Abraham. (Gen. 17:​15-​17) God sei long Abraham: “Isaac bae born long semtaem olsem next year.” Waswe, datwan kamap tru? Bible sei: “Gogo Sarah hem babule, and hem bornem wanfala boy. Long datfala taem Abraham hem olo finis. Sarah hem bornem datfala pikinini long barava taem wea God talem long Abraham.”​—⁠Gen. 17:21; 21:⁠2.

Bible storyim staka example wea showimaot God hem evritaem followim taem. (Jer. 25:​11-​13; Dan. 4:​20-​25; 9:​25) Bible sei for iumi weitim day bilong Jehovah wea hem bae judgem pipol. Nomata sapos pipol tingse datfala day hem “no kam kwiktaem,” iumi savve “hem bae no leit.”​—⁠Hab. 2:⁠3.

Followim Taem, Taem Iumi Worship

Taem olketa “festival bilong Jehovah kamap evri year,” evri Israelite man mas attend and olketa mas kam long barava taem. (Lev. 23:​2, 4) God markem tu olketa difren taem wea olketa Israelite mas givim samfala sakrifaes. (Ex. 29:​38, 39; Lev. 23:​37, 38) Datwan showimaot God laekem pipol bilong hem for mas followim taem, taem olketa worship!

Long first century, aposol Paul talem olketa long Corinth abaotem hao for conductim olketa Christian meeting. Hem sei: “Duim evri samting long wei wea hem stret and wea no olobaot.” (1 Cor. 14:40) Hem semsem tu distaem. Dastawe olketa Christian meeting, assembly, and convention mas start long taem wea olketa markem. Tingting bilong Jehovah abaotem wei for followim taem hem nating change. (Mal. 3:⁠6) So wanem nao iumi savve duim mekem iumi no leit long olketa Christian hipap olsem?

Wanem Iumi Savve Duim for No Leit

Samfala sei wei for plan firstaem barava helpem olketa for no leit. (Prov. 21:⁠5) Sapos ples wea iumi mas go long hem, hem farawe lelebet, waswe, bae hem fitim for iumi markem lelebet taem nomoa for kasem datfala ples? Hem bae wise for iumi go early lelebet mekem nomata sapos “seknomoa samting hem happen,” bae iumi no leit! (Eccl. 9:​11) Wanfala young man wea nem bilong hem José evritaem followim taem.a Hem sei: “Samting wea savve helpem iumi for no leit hem for tingim haomas taem nao bae hem tekem for iumi kasem ples wea iumi laek go long hem.”

Maet samfala wea waka mas mekem arrangement for lusim waka early mekem olketa savve garem inaf taem for no arrive leit long olketa Christian meeting. Hem nao samting wea wanfala brata long Ethiopia duim. From hem luksavve waka wea hem duim bae mekem hem leit for 45 minute for kongregeson meeting, hem arrangem nara wakaman for changem shift bilong hem early long olketa naet bilong meeting. From wakaman hia duim datwan, datfala brata agree for duim extra 7-hour shift for datfala wakaman.

Sapos iumi garem olketa smol pikinini, maet hem no isi for arrive early for olketa meeting. Maet mami nao evritaem redyim olketa pikinini, bat olketa narawan long famili savve help tu and olketa shud duim datwan. Wanfala sista from Mexico wea nem bilong hem Esperanza, hemseleva lukaftarem eitfala pikinini. Firstborn pikinini hem 23 year and lastborn hem 5 year. Esperanza storyim wanem nao helpem famili bilong hem for no leit. Hem sei: “Olketa big gele bilong mi helpem olketa smol wan for redi. Diswan helpem mi for finisim olketa waka long haos and redi long taem wea mifala markem for go long olketa meeting.” Disfala famili markem taem for lusim haos, and evriwan waka tugeta mekem olketa savve followim datfala taem.

Kasem Gud Samting From Wei for Kam Early Long Meeting

Taem iumi tingim olketa blessing wea iumi kasem taem iumi kam early long meeting, datwan savve strongim iumi for duim best bilong iumi for followim taem. Wanfala young sista wea nem bilong hem Sandra evritaem kam early for olketa meeting. Hem sei: “Mi laek tumas for kam early long olketa meeting bikos datwan mekem mi garem chance for hello long olketa brata and sista, story witim olketa, and for savve gud long olketa.” Taem iumi kam early long Kingdom Hall, iumi savve kasem gud samting taem iumi story witim olketa faithful brata and sista wea gohed strong. And story bilong iumi tu savve strongim olketa brata and sista and mekem olketa laek “showimaot love and duim olketa gudfala samting.”​—⁠Heb. 10:​24, 25.

Song and prea long start bilong meeting hem important part long worship bilong iumi. (Ps. 149:⁠1) Olketa song wea iumi singim hem praisem Jehovah, helpem iumi for tingim olketa gudfala wei wea iumi shud garem, and strongim iumi for duim ministry. And waswe long prea wea startim meeting? Long bifor, Jehovah sei temple bilong hem, hem “haos for pipol prea insaed.” (Isa. 56:⁠7) Distaem iumi kam long olketa meeting for prea long God. Iumi savve hao prea wea startim meeting hem for askem Jehovah for leadim iumi and givim holy spirit long iumi, bat datfala prea hem for helpem iumi tu for redyim heart bilong iumi for kasem gud samting from wanem iumi bae herem. Iumi shud trae hard for kam long meeting bifor firstfala song and prea hem start.

Helen wea hem 23 year storyim wanem nao mekem hem for laek kam early long meeting. Hem sei: “Mi tingim hem wanfala wei for showimaot mi lovem Jehovah, bikos hem nao provaedem evri information wea iumi herem, wea samfala nao hem olketa song and prea for startim meeting.” Iumi tu shud garem sem tingting olsem Helen! So waka hard for followim taem long evri samting wea iumi duim. Main samting nao hem for followim taem long olketa samting wea iumi duim for worshipim tru God.

[Footnote]

[Piksa long page 26]

Plan gud firstaem

[Piksa long page 26]

Markem inaf taem nogud “seknomoa samting hem happen”

[Piksa long page 26]

Kasem gud samting from wei for kam early long meeting