Olketa Bigman blo Politik Givim Warning Abaotem Armageddon—Wat Nao Bible Talem Abaotem Diswan?

Lo morning lo Monday, October 10, 2022, Russia sendem missile go lo olketa city lo Ukraine bihaen wanfala big explosion hem happen tufala day bifor and hem distroem wanfala main bridge wea joinim Crimea and Russia. Olketa samting hia happen no long taem go nomoa bihaen olketa bigman blo politik givim warning hao Armageddon hem klosap for happen.

“Iumi no feisim eni nuclear threat wea savve lead go lo Armageddon nomata lo taem blo [U.S. President John F.] Kennedy and datfala Cuban Missile Crisis. . . . Mi savve taem iumi iusim olketa nuclear weapon, for sure hem bae lead go lo Armageddon.”—U.S. President Joe Biden, October 6, 2022.
“Mi agree dat klosap bae iumi kasem Armageddon, full planet hem stap lo danger.”—Ukraine President Volodymyr Zelensky, taem olketa askem hem abaotem olketa nogud samting wea happen from olketa iusim olketa nuclear weapon, BBC News, October 8, 2022.

Hao, wei for iusim olketa nuclear weapon bae lead go lo Armageddon? Wat nao Bible talem abaotem diswan?

Waswe, nuclear weapon nao bae kosim Armageddon?

Nomoa. Disfala word “Armageddon,” hem kamap wanfala taem nomoa lo Bible, lo Revelation 16:16. Hem no storyim war between tufala kantri bat hem war between God and “olketa king evriwea long earth.” (Revelation 16:14) God bae iusim datfala war blo Armageddon, for finisim rul blo olketa man.—Daniel 2:44.

For lanem moa samting abaotem wat bae happen lo earth lo taem blo Armageddon, readim disfala article Wat Nao War blo Armageddon?

Waswe, nuclear war bae distroem disfala earth and olketa pipol wea stap insaed?

Nomoa. Nomata olketa man wea rulim disfala earth iusim olketa nuclear weapon lo future, God bae no letem olketa man for distroem disfala earth. Bible sei:

“Disfala earth bae stap for olowe.”—Ecclesiastes 1:4.
“Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Psalm 37:29, SIPB

Bat, olketa Bible profesi and samting wea gohed for happen distaem showimaot hem klosap tumas for wanfala big change bae happen lo disfala eath. (Matthew 24:3-7; 2 Timothy 3:1-5) Lanem moa abaotem samting wea Bible talem abaotem future lo free Bible course blo mifala.