Vegan Laefstael—Wat Nao Bible Talem Abaotem Datwan?

Evriwea lo world, staka pipol interest lo veganism.

• “Veganism hem wei for tingting and wei blo laef wea pipol duim best for no spoelem animals or eatim, werem clothes wea olketa wakem from animals, or eni nara reason.”—The Vegan Society.

Samfala pipol wea followim vegan laefstael no just concern for animals, bat olketa laek tek kea lo environment, health, or religious reasons.

• “Veganism difren from staka nara diet bikos staka taem pipol ting lo veganisim olsem wanfala biliv, wat wanfala person disaedem seleva, and each wan duim samting for mekem world kamap gud.”—Britannica Academic.

Hao, veganism hem solution for problems blo planet earth? Wat nao Bible talem abaotem datwan?

Hao Creator ting lo human beings and animals

Bible showim dat Creator, wea hem nao Jehovah Goda ting human beings hae winim animals, and hem givim pipol paoa for tek kea lo animals. (Genesis 1:27, 28) Gogo, God allowim human beings for eatim animals. (Genesis 9:3) Nomata olsem, hem no hapi taem pipol no tek kea lo animals.—Provebs 12:10, SIPB.

Bible talem dat if wanfala person disaed for eatim meat, datwan disison blo hemseleva.b Wat iumi chus for duim no mekem iumi gud pipol lo eye blo God. (1 Corinth 8:8) No eniwan shud criticizem wanfala person if hem chus for eatim meat.—Rome 14:3.

Wat bae mekem gud future

Bible showim dat laefstael wea iumi chusim bae no stretem problems lo world. Staka problems happen bikos lo political, social, and economic system blo world, and no eniwan savve fixim. Bible sei:

• “Enisamting wea hemi no stret, yumi no save stretem.”—Eklesiastes 1:15, SIPB.

Creator bae solvem problems wea iumi feisim distaem. Bible iusim illustration for describem wat hem bae duim.

• “Then mi lukim wanfala niu skae and wanfala niu earth bikos skae and earth wea stap bifor hem nomoa nao, and sea hem nomoa tu.”—Revelation 21:1.

God bae changem olketa human gavman, wea minim ‘skae wea stap bifor’ witim “wanfala niu skae,” wea hem nao Kingdom gavman blo hem lo heven. Datfala Kingdom bae aotem “earth wea stap bifor,” wea minim wicked pipol, and Kingdom bae rulim “wanfala niu earth,” wea hem nao pipol wea willing for stap anda lo rul blo Kingdom.

Only anda lo rul blo Kingdom blo God nomoa, human beings bae lanem hao for stap lo peace witim animals and tek kea lo environment.—Isaiah 11:6-9.