Tingting Bilong Bible
Satan Should Kasem Blame Long Sin Bilong Iumi?
SATAN kasem blame long firstfala sin wea kasem man. “Datfala snek—hem giaman long mi so mi kaikai,” Eve hem say. (Genesis 3:13) Start long taem hia “snek bilong firstaem datwan wea olketa kolem Devil and Satan” hem go ahed for againstim olketa man, for “blindim mind” bilong pipol and for “giamanim olketa man long earth.” (Revelation 12:9; 2 Corinthians 4:4) No eniwan savvy ranawe long olketa hevi hia, but waswe, diswan meanim iumi kanduit for againstim olketa trik bilong hem? And taem iumi sin, waswe, hem should kasem blame evritaem?
Bible hem meanim hao Satan hem giamanim Eve. (1 Timothy 2:14) Eve hem tingsay sapos hem brekem komand bilong God, hem bae kasem savvy bilong God and way for independent. (Genesis 3:4, 5) Datfala tingting mekem hem sin, but nomata olsem God still talemaot hem guilty and judgim hem for dae. Why? From nomata Satan giaman long hem, hem savvy evribit long komand bilong God. No eniwan fosem hem for no obey; but, hem savvy long wanem hem duim, and barava fit for againstim olketa trik bilong Satan.
Againstim Devil
Iumi olketa man savvy againstim Devil. Long Ephesians 6:12, hem talem long iumi hao “iumi garem wanfala faet” againstim “olketa badfala spirit wea stap long heven.” So, luk olsem, God wantem iumi for faet againstim olketa trik bilong Satan. But hao nao man savvy winim barava strongfala paoa bilong Satan and olketa demon? Hem askim iumi for go insaed faet wea iumi sure bae iumi lus long hem? Nomoa nao, from God no talem iumi for faetem Devil long strong bilong iumi seleva. Jehovah givim iumi different way wea iumi savvy againstim and winim olketa trik bilong Devil. Bible hem talem iumi hu nao Devil, way wea hem work, and hao nao iumi savvy protectim iumi seleva.—John 8:44; 2 Corinthians 2:11; 11:14.
Hao for “Againstim Devil”
Bible showimaot tufala way for againstim Devil. Hem say olsem: “Stap under long God; but againstim Devil, and hem bae ranawe from iufala.” (James 4:7) Firstfala way for iumi stap under long God hem join withim fasin for obeyim olketa komand bilong hem. Way for evritaem luksavvy hao God hem stap, long gudfala fasin bilong hem, long nambawan strong and paoa bilong hem, and long olketa haefala principle bilong hem bae givim iumi strong for againstim Satan. Way for prea evritaem long God hem barava important tu.—Ephesians 6:18.
Tingim taem wea Devil hem testim Jesus. Way wea hem tingim and talem samfala komand bilong God mas helpem Jesus for win. From hem kanduit sweetim Jesus for sin, Satan lusim hem. Bihaen long test hia, Jehovah sendem angel bilong hem for strongim Jesus moa. (Matthew 4:1-11) Dastawe, Jesus savvy encouragim olketa disaepol bilong hem for askim God for ‘sevem olketa from badfala man.’—Matthew 6:13.
Taem God sevem iumi hem no meanim bae hem putim wanfala shield for protectim iumi. But, hem talem iumi for aftarem olketa fasin bilong God, olsem truth, raeteous fasin, peace, and faith. Olketa fasin hia hem olsem “kaleko for faet” wea savvy helpem iumi for “stand strong againstim evri trik bilong Devil.” (Ephesians 6:11, 13-18) So withim help bilong God iumi savvy stopem olketa test bilong Devil.
Mek-tu way wea James 4:7 talem hem for “againstim Devil.” Diswan meanim man mas strong for duim samting, and ranawe from olketa nogud trik bilong hem. Man mas stap klia long olketa giaman paoa and rejectim fasin for aftarem material samting tumas and dirty fasin wea hem kamap big tumas distaem. Way for againstim Devil olsem wea join withim laef wea iumi dedicatim long God hem barava important long faet bilong iumi againstim Satan. But waswe, evri sin hia barava kamaot from olketa trik bilong Devil?
Faet Wea Stap Insaed Long Iumi
Man for raet long Bible James hem talem: “Each wan hem kasem test taem samting wea hemseleva kavetem hem pullim and sweetim hem. Then disfala way for kavet, taem hem grow, hem bornim sin.” (James 1:14, 15) Sorry tumas, iumi kanduit winim evribit weak point and sin wea iumi born withim. (Romans 5:12) “No eni raeteous man stap long earth wea go ahed for duim gudfala samting and wea no sin,” Bible hem talem.—Ecclesiastes 7:20.
Diswan hem no meanim iumi no savvy kontrolem olketa sin hia. Samtaem, from rong wea iumi choosim, iumi mekem test for iumi seleva. So nomata way wea iumi kavet maet kamap from iumi no perfect or from olketa trik bilong Satan, iumi seleva nao fit for disaed sapos iumi letem or rejectim. Hem fitim for aposol Paul raetem: “Eni samting man hem plantim, datwan nao bae hem harvestim tu.”—Galatians 6:7.
Acceptim Responsibility
Planti taem pipol no luksavvy long olketa weak point, rong, mistek—yes, sin bilong olketa seleva. (Psalm 36:2) Wanfala samting wea savvy helpem iumi for acceptim responsibility for sin bilong iumi hem for savvy hao God hem no tingsay iumi mas perfect distaem. “Hem no panisim iumi for fitim sin bilong iumi; and hem no bringim samting wea iumi fit for kasem,” David hem talem long Psalms. (Psalm 103:10) Nomata God hem savvy forgive, hem still wantem iumi for faet strong for disciplinim iumi seleva, and for againstim olketa trik bilong Devil and feeling bilong iumi seleva for duim sin.—1 Corinthians 9:27.
Hem important for iumi savvy hao nomata God hem luksavvy Devil nao savvy pullim iumi long samting iumi duim and hem garem bigfala blame for sin bilong olketa man distaem, diswan no mekem iumi free from way for givim ansa long sin bilong iumi. Dastawe, Romans 14:12 hem talem: “Each wan long iumi mas givim ansa for hemseleva long God.”
But, sapos iumi “barava hate-im bad samting” and “hold strong long gud samting,” iumi savvy winim badfala fasin. (Romans 12:9, 21) Firstfala woman Eve hem fail for duim diswan so hem kasem panis from hem no obey; hem fit for againstim Satan and obeyim God. (Genesis 3:16) Nomata olsem, God no forgetim way wea Devil giaman long hem. God panisim and judgim Devil for finis evribit. (Genesis 3:14, 15; Romans 16:20; Hebrews 2:14) Klosap nao bae iumi no need for faet againstim olketa nogud trik bilong hem.—Revelation 20:1-3, 10.
[Credit Line long page 22]
Erich Lessing/Art Resource, NY