Hao Nao Technology Hem Affectim Pikinini Blo Iu?
Olketa pikinini distaem savve tumas hao for iusim technology, dastawe samfala sei ‘olketa born insaed technology,’ and bikos olketa adult savve slow for lanem technology pipol savve sei, ‘olketa bushman lo technology.’
Nomata olsem, samfala lukim hao olketa pikinini wea spendem tumas taem online olketa savve . . .
addict tumas lo device blo olketa.
kamap online bully.
lukim pornography, nomata olketa chus for duim or nomoa.
SAMTING IU NEED FOR SAVVE
ADDICT
Samfala samting online, olsem olketa game, savve mekem man kamap addict. Iumi no sapraes lo diswan. Wanfala buk, Reclaiming Conversation hem sei, “Diswan hem bikos olketa designim olketa app for mekem pipol gohed busy lo phone.” Sapos iumi evritaem iusim olketa app wea olketa wakem for kasem selen, bae olketa wea advertise online savve kasem moa selen from datwan.
SAMTING FOR TINGIM: Waswe, luk olsem pikinini blo iu addict lo device blo olketa? Hao nao bae iu helpem olketa for iusim gud taem blo olketa?—EPHESUS 5:15, 16.
ONLINE BULLY
Samfala pipol, taem olketa online wei blo olketa savve kamap nogud tumas, savve raf, and no tingim feeling blo narawan. Olketa wea garem kaen wei olsem savve kamap bully.
Why samfala savve showim olketa nogud wei lo social media, hem bikos olketa laekem staka pipol for interest lo post blo olketa or for garem staka follower. Or sapos samwan faendaot dat olketa narawan no invaetem hem, olsem lo wanfala party, datwan maet mekem hem tingse olketa bullyim hem.
SAMTING FOR TINGIM: Waswe, pikinini blo mi garem gudfala wei taem hem go online? (Ephesus 4:31) Hao nao olketa deal witim wei wea narawan no invaetem olketa?
PORNOGRAPHY
Hem isi tumas for lukim olketa rabis piksa lo Internet. Parents shud luksavve dat nomata olketa putim setting lo phone for blokem datwan, hem still savve happen.
Sexting hem minim for sendem and kasem olketa nogud piksa wea man tek photo lo body blo hemseleva. Staka taem pipol duim diswan lo mobile phone. Diswan savve againstim law. Lo samfala ples, olketa savve arrestim man wea duim sexting bikos lo law and age blo olketa wea duim. Olketa kolem diswan child pornography.
SAMTING FOR TINGIM: Hao nao iu savve helpem pikinini blo iu for faet againstim feeling for lukluk or sendem rabis piksa online?—EPHESUS 5:3, 4.
WAT IU SAVVE DUIM
TRAINIM OLKETA PIKININI BLO IU
Nomata olketa “pikinini born insaed technology” and maet savve tumas hao for iusim, olketa still needim training from parents. Datfala buk Indistractable hem sei wei for givim pikinini wanfala smartphone or eni nara device taem hem no redi yet for iusim gud, hem “olsem olketa letem hem for jamp insaed wanfala pool wata taem hem no savve hao for swim yet.”
BIBLE PRINCIPLE: “Tisim pikinini fo falom stretfala wei, taem hemi bikman, bae hemi no lusim.”—PROVEBS 22:6.
Chusim olketa idea wea iu laek for followim, or raetem daon own idea blo iu.
Story witim pikinini blo mi abaotem hao for showim gudfala wei online
Helpem pikinini blo mi for deal witim wei wea olketa narawan no invaetem hem
Blokem eni samting wea savve spoelem pikinini
Chekim phone blo pikinini blo mi evritaem
Markem taem for pikinini iusim phone
No letem pikinini iusim device lo rum for full naet
No letem pikinini iusim device lo taem for kaikai