Niu Circuit Assembly Program

Jehovah barava fit for kasem glory. Hao nao iumi savve givim glory long Jehovah? Wanem nao mekem hem hard for samfala no givim glory long Jehovah? Olketa wea givim glory long God distaem bae kasem olketa wanem blessing? Circuit assembly program for 2008 service year bae givim olketa gudfala ansa for olketa kwestin hia. Theme bilong Circuit assembly program nao hem “Duim Evri Samting Long Wei wea Givim Glory Long God.” (1 Cor. 10:31) Tingim olketa samting wea bae iumi kasem long tufala day bilong nambawan spiritual instruction.

Distrik overseer bae storyim olketa tok hia “Why Nao Iumi Shud Givim Glory Long God?” and “Showimaot Gudfala Example Long Wei for Duim Wanem God Laekem Iumi for Duim.” Hem bae givim wanfala pablik tok, “Hu Nao Pipol wea Givim Glory Long God?,” and lastfala tok, “Wan Mind for Givim Glory Long God Evriwea Long World.” Hem bae conductim tu disfala Theocratic Ministry Skul. Circuit overseer bae storyim olketa tok, “Hapi for Showimaot Glory Bilong God,” “Need Bilong Circuit,” and “Gohed ‘Strong Long Truth,’” wea hem kam from 2 Peter 1:​12. And tu, bae iumi lanem hao “Pioneer Ministry Hem Honorim God.” First wan long tufala tok wea garem fofala part wea muvim man “Givim Glory Long God Long Evri Samting wea Iumi Duim,” bae minim gud toktok wea stap long 1 Corinthians 10:31. Lastfala tok wea garem fofala part “Duim Holy Service for Praisem Jehovah” bae storyim samfala part long worship bilong iumi. Iumi bae hapi for herem olketa main point bilong Wastaoa and story bilong text for Sunday. Samfala bae garem chance tu for baptaes.

Plande pipol no laek for luksavve hao God hem stap. Olketa hia tingim nomoa olketa plan bilong man wea mekem olketa for no ting raonem gud nambawan plan bilong Jehovah. (John 5:​44) Bat iumi tinghae long gud samting iumi bae kasem taem iumi “Duim Evri Samting Long Wei wea Givim Glory Long God.” Mekem plan for attendim fofala session evriwan and for barava kasem gud samting from datfala assembly program.