LAEF BILONG CHRISTIAN
Wanem Nao Bae Helpem Iumi for Studyim Gud Bible?
Taem iumi kasem eni test iumi laek for faithful olsem Daniel. Daniel studyim gud toktok bilong God and olketa profesi tu. (Da 9:2) Wei for studyim gud Bible savve helpem iumi for gohed faithful. Hao nao olsem? Datwan bae strongim faith bilong iumi hao Jehovah evritaem duim wanem hem promisim. (Jos 23:14) And tu, diswan bae helpem iumi for fren gud witim Jehovah and for laek duim olketa stret samting. (Ps 97:10) Bat wanem nao savve helpem iumi for studyim gud Bible? Tingim olketa samting hia.
Wanem nao bae iu studyim? Iumi need for prepare for olketa meeting. And tu, wei for duim research long eni samting iu no minim taem iu duim Bible reading evri week bae mekem datwan barava interesting. Nara samting samfala laek for duim hem for lanem moa samting abaotem olketa Bible profesi, or studyim olketa gudfala wei wea holy spirit helpem iumi for garem, or read abaotem missionary gogo bilong Paul, or lane abaotem olketa samting wea Jehovah wakem. Sapos iu tingim wanfala subject wea iu laek for studyim, hem gud for raetem daon datwan, mekem iu tingim taem iu duim study bilong iu.
Wea nao iu savve faendem information? Bae iu lukim samfala idea long datfala video Olketa Research Tul wea Bae Helpem Iu Studyim Bible. Bihaen datwan, duim research abaotem olketa wild animal long Daniel chapter 7 wea piksarem olketa world paoa.
Haomas taem nao bae iu iusim for duim study? For kamap strong long spiritual wei iumi need for duim study evri week. Maet iu duim lelebet study firstaem and then isisi duim moa. Wei for studyim Bible hem olsem man wea digdig for faendem olketa riches. Taem hem faendem samfala riches, bae hem laek gohed digdig. (Pr 2:3-6) Semsem tu witim Bible study, taem iu studyim Bible bae iu barava enjoyim datwan, and bae hem kamap samting iu duim evritaem.—1Pe 2:2.
WANEM WORLD PAOA NAO OLKETA WILD ANIMAL LONG DANIEL CHAPTER 7 PIKSAREM?
NARA KWESTIN:
Hao nao toktok long Daniel 7:8, 24 kamap tru?
NARA SAMTING FOR STUDYIM:
Wanem nao olketa wild animal long Revelation chapter 13 piksarem?