Chapter Seventin

Luksavve Long Olketa Tru Worshiper Long Taem Bilong End

1. Olsem Daniel chapter 7 talem, wanem bigfala samting nao kasem wanfala smol grup bilong pipol wea no strong long taem bilong iumi?

WANFALA maeti world paoa attakim wanfala smol grup bilong pipol. Grup hia winim datwan and kamap moa strong tu—no bikos long strong bilong olketa seleva bat bikos Jehovah God tinghae long olketa. Daniel chapter 7 talem profesi abaotem olketa samting hia, wea happen long start bilong mek-20 century. Bat, hu nao pipol hia? Sem chapter bilong Daniel story abaotem olketa olsem “olketa holy wan bilong Most Hae Wan,” Jehovah God. Hem showimaot tu hao gogo olketa hia bae rul insaed long Messiah Kingdom!—Daniel 7:13, 14, 18, 21, 22, 25-27.

2. (a) Hao nao Jehovah feel abaotem olketa anointed servant bilong hem? (b) Wanem nao bae wisefala samting for duim long distaem?

² Olsem iumi lanem long Daniel chapter 11, king bilong north bae finis evribit taem hem laek for spoelem sef spiritual land bilong olketa faithful pipol hia. (Daniel 11:45; markem Ezekiel 38:18-23.) Yes, Jehovah hem barava protectim olketa faithful anointed wan bilong hem. Psalm 105:14, 15 hem sei: “For saed bilong olketa [Jehovah] repruvim olketa king, hem sei: ‘Iufala man no tasim olketa anointed wan bilong mi, and no duim eni nogud samting long olketa profet bilong mi.’” So waswe, iu agree hao long distaem wea hard tumas, hem wise for “great crowd” kaban long barava klos wei witim olketa holy wan hia? (Revelation 7:9; Zechariah 8:23) Jesus Christ kaonselem pipol wea olsem sheep for barava duim datwan—kaban witim olketa spiritual anointed brata bilong hem long wei for saportim olketa long waka bilong olketa.—Matthew 25:31-46; Galatians 3:29.

3. (a) Why nao hem no isi for faendem olketa anointed follower bilong Jesus and stap klosap long olketa? (b) Hao nao Daniel chapter 12 bae givim help long diswan?

³ Nomata olsem, Enemy bilong God, Satan, hem faetem bigfala war againstim olketa anointed wan. Hem apim giaman religion, and fulimap world witim olketa giaman Christian. From diswan, hem giamanim planti pipol. Samfala moa lus hope nao for faendem olketa wea stand for trufala religion. (Matthew 7:15, 21-23; Revelation 12:9, 17) Olketa wea faendem datfala “little flock” and join witim olketa mas faet for keepim faith, bikos evritaem disfala world trae for spoelem faith. (Luke 12:32) Waswe long iu? Iu faendem finis “olketa holy wan bilong Most Hae Wan,” and waswe, iu join witim olketa? Waswe, iu luksavve long strongfala pruv wea showimaot iu faendem finis olketa hia wea God chusim? Pruv olsem savve strongim faith bilong iu. Hem savve redyim iu tu for helpem narafala pipol luksavve hao world distaem hem konfius long saed bilong religion. Daniel chapter 12 garem staka long disfala savve wea givim laef.

NAMBAWAN PRINCE DUIM SAMTING

4. (a) Daniel 12:1 talem profesi long wanem tufala difren samting abaotem Michael? (b) Long Daniel, planti taem wanem nao disfala toktok king “go ahed for stand” hem minim?

⁴ Daniel 12:1 hem read olsem: “Long datfala taem Michael bae standap, datfala nambawan prince wea go ahed for stand for saed bilong olketa son bilong pipol bilong iu.” Disfala verse talem profesi long tufala difren samting abaotem Michael: wanfala, hem “go ahed for stand,” wea showimaot samting wea go ahed insaed wanfala sekson bilong taem; mek-tu, hem “bae standap,” wea showimaot wanfala akson wea happen insaed long datfala sekson bilong taem. Firstaem, iumi want for savve long datfala sekson bilong taem wea Michael hem “go ahed for stand for saed bilong olketa son bilong pipol bilong [Daniel].” Tingim hao datfala nem Michael hem nem wea Jesus kasem taem hem garem waka olsem wanfala Ruler long heven. Toktok wea sei hem “go ahed for stand” hem mekem iumi tingim olketa narafala verse wea buk bilong Daniel iusim toktok hia. Planti taem hem story abaotem samting wea wanfala king duim, olsem wei wea hem kasem paoa for rul olsem king.—Daniel 11:2-4, 7, 20, 21.

5, 6. (a) Insaed long wanem sekson bilong taem nao Michael hem go ahed for stand? (b) Wanem taem and hao nao Michael bae “standap,” and wanem nao bae kamaot from datwan?

⁵ Long hia hem klia hao datfala angel point go long wanfala sekson bilong taem wea nara Bible profesi tu story abaotem. Jesus kolem datwan “taem wea [hem] bae stap moa” (Greek, pa·rou·siʹa), taem wea hem bae rul olsem King long heven. (Matthew 24:37-39) Disfala sekson bilong taem garem nem “olketa last day” and “taem bilong end.” (2 Timothy 3:1; Daniel 12:4, 9) Start long datfala taem long 1914, Michael hem go ahed for stand olsem King long heven.—Markem Isaiah 11:10; Revelation 12:7-9.

⁶ Bat, wanem taem nao Michael bae “standap”? Taem hem standap for tek spesol akson. Jesus bae duim diswan long future. Revelation 19:11-16 talem profesi abaotem Jesus olsem maeti Messiah King wea raed front long wanfala army bilong olketa angel and finisim evribit olketa enemy bilong God. Daniel 12:1 hem go ahed for sei: “And wanfala taem bilong trabol bae barava kamap wea nating happen bifor start from taem wea wanfala nation kamap go kasem datfala taem.” Olsem Man For Givim Judgment bilong Jehovah, Christ bae finisim full wicked system long datfala “great tribulation.”—Matthew 24:21; Jeremiah 25:33; 2 Thessalonians 1:6-8; Revelation 7:14; 16:14, 16.

7. (a) Wanem hope nao stap for evri faithful wan long “taem bilong trabol” wea bae kam? (b) Wanem nao buk bilong Jehovah, and why nao hem important for nem bilong iumi stap insaed?

⁷ Wanem nao bae kasem pipol wea showimaot faith long datfala nogud taem? Daniel herem disfala toktok moa: “Long datfala taem pipol bilong iu bae stap sef, evriwan wea nem bilong hem insaed long datfala buk.” (Markem Luke 21:34-36.) Wanem nao disfala buk? Hem piksarem wei wea Jehovah God rememberim olketa wea duim will bilong hem. (Malachi 3:16; Hebrews 6:10) Olketa wea garem nem insaed disfala buk bilong laef nao barava sef pipol long world, bikos God protectim olketa. Nomata wanem trabol maet spoelem olketa, hem savve finisim and bae finisim datwan. Nomata sapos dae hem winim olketa bifor datfala “taem bilong trabol,” olketa stap sef insaed memory bilong Jehovah. Hem bae rememberim olketa and resurrectim olketa insaed datfala Wan Thousand Year Rul bilong Jesus Christ.—Acts 24:15; Revelation 20:4-6.

OLKETA HOLY WAN “WEKAP”

8. Daniel 12:2 showimaot wanem hapi hope?

⁸ Hope bilong resurrection hem barava givim comfort. Daniel 12:2 storyim datwan taem hem sei: “Planti wea sleep insaed long graon bilong dust bae wekap, olketa hia for laef olowe and olketa long there for kasem shame and nogud samting for olowe.” (Markem Isaiah 26:19.) Olketa toktok hia mekem iumi tingim loving promis bilong Jesus Christ for wanfala resurrection. (John 5:28, 29) Hope hia muvim iumi for hapi! Tingim olketa fren and famili wea iu lovem—wea dae finis—bae kasem chance for laef moa long future! Bat main samting wea disfala promis wea buk bilong Daniel story abaotem hem narakaen resurrection—wea happen finis. Hao nao olsem?

9. (a) Why nao hem fitim for sei Daniel 12:2 bae fulfill long olketa last day? (b) Wanem kaen resurrection nao datfala profesi story abaotem, and hao nao iumi savve?

⁹ Tingim olketa verse wea stap raonem. Firstfala verse bilong chapter 12 no story abaotem end bilong disfala system nomoa bat tu, full taem bilong olketa last day. Tru nao, bigfala part bilong datfala chapter hem fulfill, no long paradaes wea bae kamap long earth, bat insaed long taem bilong end. Waswe, eni resurrection kamap insaed taem hia? Aposol Paul raet abaotem resurrection bilong “olketa wea bilong Christ” wea happen “long taem wea hem bae stap moa.” Bat, olketa wea resurrect for laef long heven bae “no savve rotten moa.” (1 Corinthians 15:23, 52) No eniwan long olketa resurrect “for kasem shame and nogud samting for olowe” wea Daniel 12:2 hem talem profesi abaotem. Waswe, narakaen resurrection moa hem stap? Long Bible, samfala taem resurrection garem spiritual mining. Olsem example, Ezekiel and Revelation garem olketa profesi abaotem spiritual wei for laef bak moa, or resurrection.—Ezekiel 37:1-14; Revelation 11:3, 7, 11.

10. (a) Long wanem wei nao anointed remnant resurrect long taem bilong end? (b) Hao nao samfala long olketa anointed wan wea laef bak wekap “for kasem shame and nogud samting for olowe”?

¹⁰ Waswe, olketa anointed servant bilong God laef bak moa long spiritual wei long taem bilong end? Yes! History showim hao long 1918 wanfala smol remnant bilong olketa faithful Christian kasem bigfala attak wea spoelem pablik ministry wea olketa organizem. Then, nomata luk olsem hem hard tumas, long 1919 olketa kasem laef moa long spiritual wei. Olketa samting hia fitim resurrection wea Daniel 12:2 hem talem profesi abaotem. Samfala “wekap” long spiritual wei long datfala taem and bihaen. Bat, sorre tumas no evriwan go ahed for wekap long spiritual wei. Olketa wea wekap bat bihaen chus for rejectim Messiah King and lusim service bilong God kasem “shame and nogud samting for olowe” wea Daniel 12:2 hem story abaotem. (Hebrews 6:4-6) Bat, olketa faithful anointed wan, wea iusim gud wei wea olketa laef bak moa long spiritual wei, olketa loyal for saportim datfala Messiah King. Gogo, olsem datfala profesi talem, faithful fasin bilong olketa lead go long “laef olowe.” Distaem, wei wea olketa strong long spiritual wei nomata pipol againstim olketa hem helpem iumi for luksavve long olketa.

OLKETA ‘SHAEN OLSEM OLKETA STAR’

11. Hu nao “olketa wea garem fasin for luksavve” distaem, and long wanem wei nao olketa shaen olsem olketa star?

¹¹ Tufala next verse bilong Daniel chapter 12 helpem iumi moa for luksavve long “olketa holy wan bilong Most Hae Wan.” Long verse 3 datfala angel talem Daniel: “Olketa wea garem fasin for luksavve bae shaen olsem laet bilong heven; and olketa wea tekem kam planti long raeteous fasin, olsem olketa star go kasem taem olketa no markem, and for olowe.” Hu nao “olketa wea garem fasin for luksavve” distaem? Pruv hem point moa long olketa sem “holy wan bilong Most Hae Wan.” Tru tumas, olketa faithful anointed remnant nomoa luksavve hao Michael, datfala Nambawan Prince, hem standap olsem King long 1914. Taem olketa preachim olketa truth olsem—and keepim tu Christian fasin bilong olketa—olketa “shaen olsem olketa laet” insaed disfala world wea dark long spiritual wei. (Philippians 2:15; John 8:12) Jesus talem profesi olsem abaotem olketa: “Long datfala taem olketa wea raeteous bae shaen braet olsem sun insaed long kingdom bilong Dadi bilong olketa.”—Matthew 13:43.

12. (a) Long taem bilong end, hao nao olketa anointed wan “tekem kam planti long raeteous fasin”? (b) Hao nao olketa anointed wan bae tekem kam planti long raeteous fasin and olketa ‘shaen olsem olketa star’ long Wan Thousand Year Rul bilong Christ?

¹² Daniel 12:3 talem iumi tu abaotem wanem waka nao olketa anointed Christian hia bae duim long taem bilong end. Olketa bae “tekem kam planti long raeteous fasin.” Anointed remnant startim waka for hipimap olketa lastfala namba bilong 144,000 wea bae rul witim Christ. (Romans 8:16, 17; Revelation 7:3, 4) Taem datfala waka finis—midolwan long olketa year bilong 1930—olketa start for hipimap wanfala “great crowd” bilong “narafala sheep.” (Revelation 7:9; John 10:16) Olketa hia tu showimaot faith long ransom sakrifaes bilong Jesus Christ. So, olketa stap klin front long Jehovah. Olketa hia wea kamap samfala million distaem, tinghae long hope wea olketa garem for winim taem wea disfala wicked world bae finis evribit. Long Wan Thousand Year Rul bilong Christ Jesus, bae hem and 144,000 king and priest bilong hem iusim evri samting bilong ransom for helpem olketa man wea obey long earth, and helpem olketa wea showimaot faith for lusim evri mark bilong sin wea olketa kasem from Adam. (2 Peter 3:13; Revelation 7:13, 14; 20:5, 6) Long full wei, anointed remnant bae share for “tekem kam planti long raeteous fasin” and bae ‘shaen olsem olketa star’ long heven. Waswe, iu tinghae long hope for laef long earth anda long datfala nambawan gavman long heven bilong Christ and olketa wea rul witim hem? Hem spesol privilege for share witim “olketa holy wan” for preachim disfala gud nius bilong Kingdom bilong God!—Matthew 24:14.

OLKETA “MUV RAON”

13. Long wanem wei nao toktok long buk bilong Daniel hem seal and stap olsem secret?

¹³ Toktok wea angel talem long Daniel, wea start kam long Daniel 10:20, hem finis distaem witim toktok hia wea muvim heart: “And for iu, O Daniel, mekem olketa toktok hia stap secret and sealim buk, go kasem taem bilong end. Planti bae muv raon, and trufala savve bae kamap staka.” (Daniel 12:4) Planti samting wea Daniel raetem hem barava stap olsem secret and olketa man no minim. Tru nao, Daniel seleva raet olsem bihaen: “For mi, mi herem, bat mi no savve minim.” (Daniel 12:8) Long disfala wei, buk bilong Daniel hem seal for planti handred year. Waswe distaem?

14. (a) Long “taem bilong end,” hu nao “muv raon,” and long wea? (b) Wanem pruv nao showimaot Jehovah blessim disfala wei for “muv raon”?

¹⁴ Iumi garem privilege for stap insaed “taem bilong end” wea buk bilong Daniel hem talem profesi abaotem. Olsem profesi talem, planti faithful wan “muv raon” insaed olketa page bilong Word bilong God. Wanem nao kamaot from diswan? Witim blessing bilong Jehovah, trufala savve kamap staka. Olketa faithful anointed Witness Bilong Jehovah kasem wei for luksavve wea mekem olketa fit for minim hao Son bilong man kamap King long 1914, olketa luksavve long olketa animal long profesi bilong Daniel, olketa givim warning abaotem “datfala barava rabis samting wea spoelem evribit”—hem tu-thri example nomoa. (Daniel 11:31) So, disfala bigfala savve hem narafala mark moa for luksavve long “olketa holy wan bilong Most Hae Wan.” Bat Daniel kasem moa pruv.

OLKETA BAE ‘SMAS LONG PISIS’

15. Wanem kwestin nao wanfala angel askem, and disfala kwestin mekem iumi ting long hu?

¹⁵ Daniel hem kasem olketa message hia from angel long saed bilong “bigfala river” Hiddekel, wea nara nem bilong hem Tigris. (Daniel 10:4) Distaem hem lukim thrifala angel and sei: “Mi lukluk, mi Daniel, and, lukim! tufala moa standap, wanfala long disfala saed bilong river and narawan long narasaed bilong river. Then wanfala sei long man wea werem linen kaleko, wea stap antap long olketa wata bilong river: ‘Hem bae hao long nao go kasem end bilong olketa nambawan samting?’” (Daniel 12:5, 6) Disfala kwestin wea angel askem maet mekem iumi tingim moa “olketa holy wan bilong Most Hae Wan.” Long start bilong “taem bilong end,” long 1914, olketa ting strong tumas long kwestin abaotem hao long nao go kasem taem wea olketa promis bilong God fulfill. Wei wea profesi nao point go long olketa hem showaot klia long ansa bilong disfala kwestin.

16. Wanem profesi nao angel talem, and hao nao hem strongim wei wea datwan mas fulfill evribit?

¹⁶ Story bilong Daniel go ahed: “And mi herem man wea werem linen kaleko, wea stap antap long olketa wata bilong river, taem hem apim raet hand and left hand bilong hem long heven and promis long Man wea laef for olowe: ‘Hem bae for wanfala taem wea set finis, olketa taem wea set finis and haf taem. And taem olketa finisim wei for smasem paoa bilong holy pipol long pisis, evri samting hia bae kasem end bilong olketa.’” (Daniel 12:7) Diswan hem barava serious samting. Datfala angel apim tufala hand for talem promis hia, maet for mekem tufala angel wea stap long tufala saed bilong waed river savve lukim samting wea hem duim. Long disfala wei hem strongim wei wea disfala profesi bae fulfill evribit. Bat, wanem taem nao olketa taem wea set finis hia? Ansa hem no hard tumas olsem iu maet tingim.

17. (a) Wanem nao olketa samting wea semsem insaed profesi long Daniel 7:25, Daniel 12:7, and Revelation 11:3, 7, 9? (b) Hao long nao thri and haf taem?

¹⁷ Disfala profesi hem klosap semsem witim tufala nara profesi. Wanfala, wea iumi lukluk long hem insaed Chapter 9 bilong disfala buk, hem stap long Daniel 7:25; narawan, long Revelation 11:3, 7, 9. Lukim samfala samting wea semsem. Each wan hem happen long taem bilong end. Tufala profesi hia abaotem olketa holy servant bilong God, wea showimaot hao olketa kasem persecution and for lelebet taem olketa no savve duim pablik preaching waka bilong olketa. Each profesi showim hao olketa servant bilong God laef bak and then startim moa waka bilong olketa, and win ovarem pipol wea persecutim olketa. And each profesi hem story abaotem hao long nao olketa holy wan kasem hardfala taem hia. Tufala profesi hia long Daniel (7:25 and 12:7) tok abaotem ‘wanfala taem, olketa taem, and haf taem.’ Planti savveman sei diswan hem minim thri and haf taem. Revelation story abaotem sem taem hia olsem 42 month, or 1,260 day. (Revelation 11:2, 3) Diswan minim thri and haf taem long Daniel hem thri and haf year wea evriwan garem 360 day. Bat wanem taem nao 1,260 day hia start?

18. (a) Olsem Daniel 12:7 hem talem, wanem nao bae markem end bilong 1,260 day? (b) Wanem taem nao olketa smasem “paoa bilong holy pipol” long pisis, and hao nao diswan happen? (c) Wanem taem nao 1,260 day hem start, and hao nao olketa anointed wan talemaot ‘profesi witim kaleko bilong sorre’ long datfala taem?

¹⁸ Disfala profesi hem talemaot klia long wanem taem nao 1,260 day bae finis—taem “olketa finisim wei for smasem paoa bilong holy pipol long pisis.” Long midol bilong 1918, olketa accusim long rong wei olketa member wea leadim waka bilong Watch Tower Bible and Tract Society, witim president, J. F. Rutherford, and judgem olketa for stap longtaem insaed prison. Olketa holy wan bilong God lukim waka bilong olketa ‘smas long pisis,’ hem olsem paoa bilong olketa hem brek. Sapos iumi kaont go bak thri and haf year from midol bilong 1918, bae iumi kasem end bilong 1914. Long datfala taem datfala smol sekson bilong olketa anointed wan redyim olketa seleva for persecution. World War I hem start nao, and wei for againstim waka bilong olketa kamap moa big. For year 1915, olketa garem yeartext bilong disfala kwestin wea Christ askem long olketa follower bilong hem: “Waswe, iufala savve drinkim kap bilong mi?” (Matthew 20:22, King James Version) Olsem Revelation 11:3 hem talem, datfala 1,260 day wea kamap bihaen hem wanfala taem bilong sorre for olketa anointed wan—hem olsem olketa talemaot profesi witim kaleko bilong sorre. Persecution kamap moa worse. Olketa putim samfala long prison, attakim samfala, and samfala moa olketa spoelem. Planti feel wikdaon taem firstfala president bilong Society, C. T. Russell, hem dae long 1916. Bat, wanem nao bae happen bihaen pipol killim dae olketa holy wan hia olsem wanfala organization for preach long end bilong disfala nogud taem?

19. Hao nao profesi long Revelation chapter 11 showim iumi olketa anointed wan bae no stap kwaet for longfala taem?

¹⁹ Profesi abaotem sem samting long Revelation 11:3, 9, 11 hem sei bihaen olketa killim dae “tufala witness,” bae tufala dae for short taem nomoa—thri and haf day—then bae tufala laef bak moa. Olsem tu, profesi long Daniel chapter 12 showimaot hao olketa holy wan bae no stap kwaet bat garem moa waka front long olketa.

OLKETA KAMAP ‘KLIN, WHITE, AND MOA STRET’

20. Olsem Daniel 12:10 hem talem, wanem blessing nao bae olketa anointed wan kasem bihaen hardfala taem bilong olketa?

²⁰ Olsem iumi lukim finis, Daniel raetem olketa toktok hia bat hem no savve minim. Nomata olsem, maet hem tingting sapos olketa holy wan bae finis long hand bilong pipol wea persecutim olketa, bikos hem ask olsem, “Wanem nao bae lastfala part bilong olketa samting hia?” Angel hem ansa: “Go, Daniel, bikos olketa toktok hia kamap secret and hem seal finis go kasem taem bilong end. Planti bae klinim olketa seleva and mekem olketa seleva kamap white and bae kamap moa stret. And wicked pipol bae duim nogud samting, and no eni wicked man bae minim; bat olketa wea garem fasin for luksavve bae minim.” (Daniel 12:8-10) Really hope hem stap for olketa holy wan! Olketa bae no finis evribit bat olketa bae kamap white, kasem blessing for stap klin front long Jehovah God. (Malachi 3:1-3) Wei wea olketa minim olketa spiritual samting bae mekem olketa fit for stap klin front long God. Long wei wea difren evribit, wicked pipol bae no want for minim olketa spiritual samting. Bat wanem taem nao evri samting hia bae happen?

21. (a) Datfala sekson bilong taem wea Daniel 12:11 talem profesi abaotem bae start taem wanem samting happen? (b) Wanem nao “datfala samting wea happen evritaem,” and wanem taem nao olketa aotem? (Lukim box long page 298.)

²¹ Daniel hem herem: “From taem wea olketa aotem datfala samting wea happen evritaem and olketa putim go datfala barava rabis samting wea spoelem evribit, bae hem wan thousand tu handred and naenti day.” So disfala sekson bilong taem bae start taem samfala samting happen. “Datfala samting wea happen evritaem”—or “sakrifaes wea go ahed evritaem”a—olketa mas aotem. (Daniel 12:11, footnote) Wanem sakrifaes nao angel minim? No olketa animal sakrifaes wea olketa offerim insaed eni temple long earth. Datfala temple long Jerusalem bifor hem “copyim really samting” nomoa—bigfala spiritual temple bilong Jehovah, wea start taem Christ kamap Hae Priest bilong hem long 29 C.E.! Insaed disfala spiritual temple, wea stand for arrangement bilong God for klinfala worship, no eni need stap for mekem sakrifaes evritaem, bikos “Christ offerim hemseleva wanfala taem for olowe for karem sin bilong planti.” (Hebrews 9:24 -28) Nomata olsem, evri tru Christian offerim sakrifaes long temple hia. Aposol Paul hem raet olsem: “Thru long [Christ] iumi mas evritaem givim wanfala sakrifaes bilong praise long God, hem nao, frut bilong mouth wea talemaot nem bilong hem long pablik.” (Hebrews 13:15) So firstfala samting wea mas happen long profesi—wei for aotem “datfala samting wea happen evritaem”—hem happen long midol bilong 1918 taem pipol klosap for stopem preaching waka.

22. (a) Wanem nao “datfala barava rabis samting” wea spoelem evribit, and wanem taem nao hem start? (b) Datfala sekson bilong taem wea Daniel 12:11 talem hem start long wanem taem, and wanem taem nao hem finis?

²² Bat, waswe long mek-tu samting wea mas happen—wei for “putim datfala barava rabis samting wea spoelem evribit”? Olsem iumi lukim long Daniel 11:31, disfala barava rabis samting hem firstaem League of Nations and bihaen hem kamap moa olsem United Nations. Tufala evriwan barava rabis samting bikos pipol mekhae long olketa olsem only hope for peace long earth. So, insaed heart bilong planti pipol, olketa organization hia nao changem Kingdom bilong God! Olketa startim League long January 1919. So long datfala taem, tufala samting wea Daniel 12:11 talem hem happen. Start bilong 1,290 day hem kamap long start bilong 1919 and hem go kasem autumn (North Saed Long Earth) bilong 1922.

23. Hao nao olketa holy wan bilong God muv ahed for kamap klin insaed long 1,290 day wea Daniel chapter 12 talem profesi abaotem?

²³ Long datfala taem, waswe, olketa holy wan muv ahed long wei for kamap white and klin long eye bilong God? Olketa barava duim datwan! Long March 1919, president bilong Watch Tower Society and olketa wea waka witim hem kamaot free from prison. Bihaen datwan olketa aotem giaman toktok wea pipol accusim long olketa bifor. From olketa luksavve waka bilong olketa no finis yet, olketa stretawe kamap busy, and organizem wanfala convention for September 1919. Long datfala sem year, olketa start for pablisim wanfala magasin for join witim Wastaoa. Datfala magasin wea firstaem olketa kolem The Golden Age (distaem Wekap!), hem evritaem saportim Wastaoa for strong for showimaot nogud fasin bilong disfala world and for helpem pipol bilong God for stap klin. Long end bilong datfala 1,290 day bilong profesi, olketa holy wan gogo for kamap klin and kamap moa stret. Long September 1922, long end bilong taem hia, wanfala important convention kamap long Cedar Point, Ohio, U.S.A. Hem barava strongim olketa for go ahed long preaching waka. Bat, need hem stap yet for muv ahed moa. Datwan nao for nextfala sekson bilong taem wea profesi talem.

HAPI FOR OLKETA HOLY WAN

24, 25. (a) Wanem sekson bilong taem nao Daniel 12:12 talem profesi abaotem, and luk olsem wanem taem nao hem start and finis? (b) Hao nao spiritual living bilong olketa anointed remnant long start bilong 1,335 day?

²⁴ Angel bilong Jehovah finisim profesi bilong hem abaotem olketa holy wan witim toktok hia: “Hapi nao dat wan wea go ahed for luk forward and stap long taem bilong wan thousand thri handred and thirti-faev day!” (Daniel 12:12) Angel no talem eni samting abaotem wanem taem nao disfala sekson bilong taem hem start or finis. History showimaot hem kamap kwiktaem bihaen datfala mek-tu taem. Sapos olsem bae hem start long autumn bilong 1922 go kasem end long spring bilong 1926 (North Saed Long Earth). Waswe, olketa holy wan kasem hapi long end bilong datfala taem? Yes, long olketa important spiritual wei.

²⁵ Nomata bihaen long convention bilong 1922 (piksa long page 302), samfala holy wan bilong God laekem tumas samting wea stap bifor. Main samting wea olketa iusim long meeting for study hem Bible and olketa volume bilong Studies in the Scriptures, wea C. T. Russell hem raetem. Long datfala taem, planti biliv hao 1925 nao year for resurrection start and for Paradaes kamap moa long earth. So, planti nao serve bikos long wanfala date wea olketa tingim. Samfala praod and no willing for share insaed waka for preach long pablik. Diswan hem no mas gud.

26. Taem 1,335 day go ahed, hao nao spiritual living bilong olketa anointed wan change?

²⁶ Bat, taem disfala 1,335 day go ahed, evri samting hia start for change. Preaching waka hem kamap main samting, taem olketa mekem arrangement for evriwan tekpart long field ministry evritaem. Olketa markem wanfala meeting for studyim Wastaoa evri week. English issue bilong March 1, 1925, garem barava important article “Wanfala Nation Hem Born,” wea minim evribit long pipol bilong God abaotem wanem nao happen long 1914-19. Bihaen 1925, olketa holy wan no servem God go kasem wanfala spesol date. Bat, wei for mekem nem bilong Jehovah holy nao hem important tumas. Disfala important truth hem kamaot klia winim enitaem bifor, insaed January 1, 1926, English Wastaoa article “Hu Nao Bae Honorim Jehovah?” Long convention long May 1926, olketa releasem buk Deliverance. (Lukim page 302.) Diswan hem part bilong wanfala set bilong olketa niu buk for changem Studies in the Scriptures. Olketa holy wan no tingting nao long olketa year bifor. Olketa luk long future and waka wea bae kamap. So, olsem profesi talem, datfala 1,335 day hem finis witim wei wea olketa holy wan hapi tumas.

27. Hao nao wei for lukluk long olketa main point bilong Daniel chapter 12 helpem iumi for barava luksavve long olketa anointed wan bilong Jehovah?

²⁷ Bat, no evriwan stand strong long disfala hardfala taem. Dastawe angel mekhae long wei wea hem important for “go ahed for luk forward.” Olketa wea stand strong and go ahed for luk forward kasem bigfala blessing. Diswan showaot klia from olketa main point bilong Daniel chapter 12. Olsem profesi hem talem, olketa anointed wan laef bak moa, or resurrect, long spiritual wei. Olketa kasem nambawan savve long Word bilong God, kasem paoa for “muv raon” insaed long hem, and holy spirit gaedem olketa, for kasem mining bilong olketa barava oldfala secret. Jehovah mekem olketa kamap klin and shaen long spiritual wei, for shaen braet olsem olketa star. From diswan, olketa helpem planti for stap raeteous front long Jehovah God.

28, 29. Wanem nao iumi mas disaed strong for duim long distaem wea “taem bilong end” hem klosap for finis?

²⁸ From evri profesi hia showimaot hu nao “olketa holy wan bilong Most Hae Wan,” wanem excuse nao stap for no luksavve and kaban witim olketa? Olketa nambawan blessing stap for datfala great crowd, wea joinim disfala smol anointed grup for servem Jehovah. Evriwan mas go ahed for luk forward long olketa promis bilong God for fulfill. (Habakkuk 2:3) Long taem bilong iumi, Michael, datfala Nambawan Prince hem go ahed for stand for saed bilong pipol bilong God for planti year finis. Klosap nao bae hem tek akson olsem man wea God appointim for finisim disfala system. Taem hem duim olsem, waswe long iumi?

²⁹ Ansa for datfala kwestin hem depend long wei wea iumi chus distaem for garem living wea faithful. For strongim wei wea iumi disaed for duim olsem taem disfala “taem bilong end” hem klosap for finis, letem iumi lukim lastfala verse long buk bilong Daniel. Nextfala chapter bae helpem iumi for lukim hao nao Daniel standap front long God bilong hem bifor and hao hem bae standap front long Hem long future.

[Footnote]

WANEM NAO IU LANEM?

• Insaed long wanem taem nao Michael “go ahed for stand,” and hao and wanem taem nao bae hem “standap”?

• Wanem kaen resurrection nao Daniel 12:2 story abaotem?

• Wanem nao olketa date wea markem start and end bilong

thri and haf taem wea Daniel 12:7 talem?

1,290 day wea Daniel 12:11 talem profesi abaotem?

1,335 day wea Daniel 12:12 talem profesi abaotem?

• Hao nao wei for tingting strong long Daniel chapter 12 helpem iumi for luksavve long olketa tru worshiper bilong Jehovah?

[Box on page 298]

AOTEM DATFALA SAMTING WEA HAPPEN EVRITAEM

Insaed buk bilong Daniel, datfala toktok “samting wea happen evritaem” kamap faevfala taem. Hem minim sakrifaes bilong praise—“frut bilong mouth”—wea olketa servant bilong Jehovah God offerim long hem evritaem. (Hebrews 13:15) Daniel 8:11, 11:31, and 12:11 talem profesi hao olketa bae aotem datwan.

Insaed long tufala world war, pipol bilong Jehovah kasem strongfala persecution anda long rul bilong “king bilong north” and “king bilong south.” (Daniel 11:14, 15) Wei for aotem “datfala samting wea happen evritaem” hem happen taem World War I gogo for finis taem pipol klosap for stopem preaching waka long midol bilong 1918. (Daniel 12:7) Long taem bilong World War II, World Paoa Bilong England-America “aotem” tu “datfala samting wea happen evritaem” for 2,300 day. (Daniel 8:11-14; lukim Chapter 10 bilong disfala buk.) “Olketa arm” bilong Nazi aotem datwan tu for wanfala sekson bilong taem wea Scripture no talem.—Daniel 11:31; lukim Chapter 15 bilong disfala buk.

[Chart/Piksa long page 301]

OLKETA PROFESI TAEM INSAED DANIEL

[Pictures on page 287]

Olketa rong for putim olketa servant bilong Jehovah wea duim bigfala waka long prison long Atlanta, Georgia, U.S.A. From left saed go long raet saed: (olketa wea sidaon) A. H. Macmillan, J. F. Rutherford, W. E. Van Amburgh; (olketa wea standap) G. H. Fisher, R. J. Martin, G. DeCecca, F. H. Robison, and C. J. Woodworth

[Caption on page 299]

Important convention kamap long Cedar Point, Ohio, U.S.A., long 1919 (antap) and 1922 (long daon)

[Full-page piksa long page 302]