Pornography Savve Spoelem Marit blo Iu

Waef blo hem faendaot lo samting wea hem duim haed. Hem sei sorre tumas for wat hem duim. Hem promis for no duim moa, and hem stop—for lelebet taem. Bat then, hem duim bak sem samting, and sem problem hem happen moa.

Hao, iu insaed sem situation? If olsem, hem important for iu realizim hao habit for lukluk lo pornography hem gohed for affectim spouse blo iu, and wat iu savve duim for stop from disfala nogud habit for olowe.a

Lo disfala article

• Samting for tingim

• Wat iu savve duim

• If hasband blo iu watchim pornography

Samting for tingim

Pornography savve spoelem marit. Hem savve mekem innocent spouse for feel nogud and no trustim marit partner blo hem.b

Waef wea hasband blo hem watchim pornography maet garem olketa feeling olsem:

• Feel betray. Wanfala woman wea nem blo hem Sarah sei: “Hem olsem hasband blo mi duim adultery again and again.”

• No gud inaf. Wanfala waef sei habit blo hasband blo hem for watchim pornography mekem hem feel “ugly and feel shame.”

• No garem trust. Wanfala waef wea nem blo hem Helen sei: “Mi suspectim evriting wea hasband blo mi duim.”

• Anxiety. Wanfala waef wea nem blo hem Catherine sei: “Mi warim disfala habit blo hasband blo mi gogo hem kontrolem laef blo mi.”

Tingim diswan: Bible sei hasband mas lovem waef blo hem. (Ephesus 5:25) Hao, hem lovem waef blo hem if hem mekem waef for garem olketa kaen feeling olsem wea iumi just storyim?

Wat iu savve duim

Hem no isi for lusim habit for watchim pornography. Wanfala waef wea nem blo hem Stacey sei: “Hasband blo mi lusim smoke, marijuana, and alcohol, bat hem still stragol witim pornography.”

If iu insaed sem situation, olketa suggestion hia savve helpem iu for lusim disfala habit for olowe.

• Understandim why pornography hem bad samting. Pornography promotim selfish feeling for satisfaem man seleva nomoa, wea datwan spoelem love, trust, and loyalty wea olketa samting hia important for mekem marit hem hapi. Pornography hem disrespectim tu Creator blo marit, Jehovah God.

  Bible principle: “Evriwan mas respectim marit.”—Hebrews 13:4.

• Acceptim dat hem rong blo iu. Iu shud no sei: ‘If waef blo mi showim dat hem barava lovem mi, bae mi no watchim pornography.’ Hem no fair for iu blamem waef blo iu and iusim datwan olsem excuse for watchim bak pornography taem waef blo iu mekem iu feel nogud.

  Bible principle: “Samting wea man seleva laekem nao savve traem hem.”—James 1:14.

• Mas honest witim spouse blo iu. Wanfala hasband wea nem blo hem Kevin sei: “Evriday mi report bak lo waef blo mi, if mi continue for lukluk lo eni samting wea savve switim feeling blo mi or mi avoidim. Result blo diswan, waef blo mi no feel olsem mi haedem eniting from hem.”

  Bible principle: “Mifala laek for honest long evri samting wea mifala duim.”—Hebrews 13:18.

• Mas alert evritaem. Man savve foldaon moa datfala habit, nomata afta staka year wea hem lusim. Kevin, wea iumi storyim finis hem sei: “Mi no watchim pornography for ten years and miseleva convince dat problem hia hem finis nao. Bat datfala habit wea mi addict lo hem bifor hem stay haed nomoa, hem weit nomoa for eni chance then hem appear moa.”

  Bible principle: “Man wea tingse hem standap strong mas keakea nogud hem foldaon.”—1 Corinth 10:12.

• Taem iu kasem temptation, no kwiktaem duim samting. Nomata maet iu no fit for preventim datfala strong feeling for laek watchim pornography, iu fit for chus whether bae iu watchim or nomoa. Datfala feeling bae hem finis—maet bae hem even kwiktaem for finis if iu trainim mind blo iu for tingim difren activity.

  Bible principle: “Iufala wanwan mas savve hao for kontrolem body bilong iufala mekem iufala holy and God hem hapi long iufala. Iufala mas no letem feeling for laekem tumas sex for kontrolem iufala.”—1 Thessalonica 4:4, 5.

• Avoidim tings wea maet switim iu for watchim moa pornography. Datfala buk Willpower’s Not Enough hem sei: “If iu insaed situation wea mekem hem isi for foldaon lo temptation, hem olsem iu strikem masis. Lelebet fuel nomoa iu torowem go . . . bae fire hia laet nao.”

  Bible principle: “No letem eni nogud samting bossim mi.”—Psalm 119:133.

• No lus hope. Hem savve tek longtaem—even staka year—for kasem bak trust blo spouse blo iu. Bat staka couple succeed finis lo datwan.

  Bible principle: “Man wea garem love hem patient.”—1 Corinth 13:4.