Sunday, August 31
Olketa wea garem wei for minim samting nomoa bae minim.—Dan. 12:10.
For minim olketa Bible profesi, iumi need for ask for help. Tingim disfala illustration: Imaginim iu visitim ples wea iu no kasem bifor, bat wanfala fren wea savve gud lo datfala area hem travel witim iu. Hem savve gud lo wea nao iutufala lo hem and wea nao each road go lo hem. For sure, iu hapi tumas fren blo iu hem kam witim iu! Jehovah hem olsem datfala fren. Hem savve lo wea nao iumi lo hem distaem and wat bae happen lo future blo iumi. So for minim olketa Bible profesi, iumi mas hambol and askem help from Jehovah. (Dan. 2:28; 2 Pet. 1:19, 20) Jehovah hem olsem parents wea laekem olketa pikinini for garem hapi future. (Jeremiah 29:11) Bat Jehovah difren from olketa parents bikos hem savve talem wat bae happen lo future, and wat hem talem hem evritaem kamap tru. Hem includim olketa profesi lo Bible mekem iumi savve lo olketa important event bifor olketa happen.—Isa. 46:10. w23.08 8 ¶3-4
Monday, September 1
Bae olsem laet wea shaen taem sun kamap long early morning.—Luke 1:78.
God givim paoa lo Jesus for finisim evri problem wea kasem iumi. Olketa mirakol wea Jesus duim showimaot hem fit finisim olketa problem wea iumiseleva hard for finisim. For example, hem garem paoa for mekem iumi free from sin wea hem nao main samting wea kosim sik and dae. (Matt. 9:1-6; Rome 5:12, 18, 19) Olketa mirakol wea hem duim pruvim hem savve “healim enikaen sik” and resurrectim olketa wea dae tu. (Matt. 4:23; John 11:43, 44) And tu, hem garem paoa for kontrolem big wind and mekem pipol kamap free from olketa wicked spirit. (Mark 4:37-39; Luke 8:2) Hem barava comfortim iumi for savve Jehovah givim bigfala paoa olsem lo Son blo hem! Iumi savve sure olketa promis blo God bae kamap tru anda lo Kingdom. Olketa mirakol wea Jesus duim showimaot wanem hem bae duim lo future evriwea lo earth taem hem King lo Kingdom blo God lo heven. w23.04 3 ¶5-7
Tuesday, September 2
Spirit helpem iumi for minim evri samting, nomata wisdom bilong God wea big tumas tu.—1 Cor. 2:10.
Sapos iu lo wanfala big kongregeson and staka taem olketa no kolem iu nomata iu handsap, maet datwan mekem iu ting for givap. Bat hem gud for no givap for trae for koment. Preparem tu-thri koment for each meeting, then if conductor no chusim iu lo start, iu still garem chance for koment lo meeting. Taem iu preparem Wastaoa Study article, ting abaotem hao datfala paragraf join witim theme blo article. If iu duim olsem, bae iu garem staka naes koment for givim lo full article. And tu, maet hem gud for preparem koment lo olketa paragraf wea storyim olketa deep truth wea maet no isi for explainim. Why nao olsem? Bikos staka nao maet no handsap lo datfala paragraf. Hao sapos bihaen tu-thri meeting, iu still no garem chance for koment? Story witim conductor bifor lo meeting, and talem hem paragraf wea iu laek ansa lo hem. w23.04 21-22 ¶9-10