Kwestin From Reader
Long Israel bifor, datfala mirakol laet wea samfala taem olketa kolem Shechinah, wea shaen insaed Most Holy long tabernacle and temple, hem stand for wanem?
Jehovah datfala loving Dadi and Datwan wea protectim pipol bilong hem, showimaot hem stap witim Israel. Wanfala wei hem duim diswan, hem thru long wanfala braet cloud wea laet insaed ples for worshipim hem.
Datfala braet laet piksarem wei wea Jehovah stap long there nomata olketa Israelite no lukim hem. Laet hia shaen insaed Most Holy long tabernacle and temple wea Solomon buildim. Bat, datfala mirakol laet no minim Jehovah really stap long there. God no savve stap insaed eni building wea olketa man wakem. (2 Chronicles 6:18; Acts 17:24) Disfala braet laet wea God mekem shaen insaed holy ples bilong Hem bae mekem hae priest and evri nara Israelite feel sure hao Jehovah stap and protectim olketa, and tu, hem kea and provaedem wanem olketa needim.
Bihaen olketa finis for raetem Bible, olketa kolem disfala laet Shechinah (shekhi·nahʹ) long Aramaic languis, wea hem minim “datwan wea stap long there” or “datfala ples.” Bible no garem disfala word, bat hem stap long olketa Aramaic transleison bilong olketa Hebrew Scripture, wea olketa kolem Targums.
Taem Jehovah talem instruction long Moses for buildim tabernacle, hem sei long hem: “Iu mas putim datfala kava antap long datfala Ark and insaed datfala Ark bae iu putim law wea bae mi givim iu. And mi bae kam long iu long there and story witim iu from antap long datfala kava, from midolwan tufala cherub wea stap antap long ark.” (Exodus 25:21, 22) Datfala Ark hem wanfala gold box wea stap insaed Most Holy. Tufala gold cherub stap antap long lid bilong datfala Ark.
Long wea nao Jehovah bae story kam? Jehovah ansarem datwan taem hem sei long Moses: “Bae mi showaot insaed wanfala cloud antap long kava.” (Leviticus 16:2) Disfala cloud hange nating long air antap long datfala holy Ark midolwan tufala gold cherub. Bible no storyim hao big nao datfala cloud or hao hae nao hem stap antap long tufala cherub.
Disfala cloud shaen evriwea insaed Most Holy. Hem nomoa laet insaed datfala rum. From diswan, hae priest savve lukim evri samting taem hem go insaed datfala rum long Day Bilong Atonement. Hem standap front long Jehovah.
Waswe, disfala mirakol laet hem garem eni mining for olketa Christian? Aposol John lukim insaed vision wanfala taon wea ‘hem no savve naet.’ Datfala taon hem New Jerusalem, wea minim olketa anointed Christian wea resurrect long heven for rul witim Jesus. Laet bilong disfala tokpiksa taon hem no kam from sun or moon. Glory bilong Jehovah God nao givim laet for disfala organization, olsem Shechinah cloud shaen insaed Most Holy. And tu, “lamp” bilong datfala taon hem datfala Lamb, Jesus Christ. For leadim pipol wea God baem bak from evri nation, datfala “taon” shaenim spiritual laet bilong hem and blessim olketa.—Revelation 21:22-25.
From olketa kasem staka blessing olsem from God, olketa wea worshipim Jehovah savve feel sure hao Jehovah nao Shepherd wea protectim olketa and hem wanfala loving Dadi.