1. Wanem nao samfela samting wea savvy mekem olketa famili divaed?

OLKETA wea insaed famili wea garem love, way for meanim each wan, and peace, they hapi. Hem gud tumas sapos famili bilong iu hem olsem. Sorry tumas, planti famili they no olsem and they divaed from samfela different samting. Wanem nao mekem olketa famili divaed? Bae iumi story abaotem threefela samting long disfela chapter. Insaed samfela famili, olketa member no garem sem religion. Long otherfela famili, olketa pikinini kam from different dadi or mami. And long samfela moa, way for work hard for garem inaf shilling or fasin for laekem moa material samting hem mekem olketa member bilong famili they divaed. But, samfela samting wea mekem wanfela famili divaed, narafela famili maet no worry long hem. Why nao olsem?

2. Wea nao samfela luk go long hem for guide-im them long famili laef, but wanem nao best samting for guide-im iumi?

² Way wea narawan lukluk long diswan hem important. Sapos iu really trae for meanim lukluk bilong hem, diswan bae helpem iu for keepim wan mind bilong famili. Mek-tu samting hem from wea nao iu kasem samting for guide-im iu. Planti pipol followim advice bilong olketa workfren, neibor, niuspepa, or otherfela pipol. But, samfela faend aot wanem nao Word bilong God talem abaotem samting wea kasem them, and they followim samting wea they learnim. Hao nao way for duim diswan hem helpem famili for keepim peace?—2 Timothy 3:16, 17.

SAPOS HASBAND BILONG IU GAREM DIFFERENT RELIGION

3. (a) Wanem nao kaonsel bilong Bible abaotem way for maritim samwan wea garem different religion? (b) Wanem nao samfela main principle wea fitim sapos wanfela partner hem believe and narawan hem no believe?

³ Bible givim strongfela kaonsel againstim way for maritim samwan wea garem different religion. (Deuteronomy 7:3, 4; 1 Corinthians 7:39) But, maet iu learnim truth from Bible bihaen iu marit, but no hasband bilong iu. Sapos olsem, wanem nao bae iu duim? Iu mas still keepim marit promis bilong iu. (1 Corinthians 7:10) Bible mek hae long way wea marit hem samting for olawe and hem encouragim olketa wea marit for stretem eni problem bilong them winim way for ranawe from problem. (Ephesians 5:28-31; Titus 2:4, 5) But, waswe sapos hasband bilong iu hem strong for againstim iu for followim religion bilong Bible? Maet hem trae for stopem iu for go long olketa meeting long kongregeson, or maet hem say hem no wantim waef bilong hem for go from haos tu haos, for story abaotem religion. Wanem nao bae iu duim?

4. Long wanem way nao waef savvy showim aot hem meanim feeling bilong hasband sapos hasband no garem sem religion olsem hem?

⁴ Askim iuseleva, ‘Why nao hasband bilong mi feel olsem?’ (Proverbs 16:20, 23) Sapos hem no really meanim samting wea iu duim, maet hem worry abaotem iu. Or maet hem kasem hevi from olketa relative bikos iu no share long samfela kastom wea important long them. “Taem mi stap seleva long haos, mi feel olsem evriwan lusim mi nao,” wanfela hasband hem say. Disfela man feel olsem religion hia tekem waef bilong hem from hem. But from hem praod, hem no talemaot hao hem feel lonely. Hasband bilong iu maet needim iu for talem hem hao way wea iu love-im Jehovah no meanim iu no love-im hem olsem bifor. Iu mas spendem taem withim hem.

5. Wanem way for balance nao waef wea hasband garem different religion mas garem?

⁵ But, for deal withim diswan long wisefela way, iu mas tingim wanfela samting wea moa important. Word bilong God encouragim olketa waef olsem: “Stap under long hasband bilong iufela, olsem hem fitim iufela for duim long Lord.” (Colossians 3:18) So, hem givim warning againstim way for garem independent tingting. And tu, taem disfela scripture say “olsem hem fitim iufela for duim long Lord,” hem show aot hao way for stap under long hasband mas fitim way for stap under long Lord tu. Diswan meanim way for balance.

6. Wanem nao olketa principle wea wanfela Kristian waef mas tingim olawe?

⁶ For wanfela Kristian, way for attendim olketa meeting bilong kongregeson and for witness long otherfela pipol abaotem faith wea kam from Bible, they important part bilong trufela worship wea hem mas no lusim. (Romans 10:9, 10, 14; Hebrews 10:24, 25) So, wanem nao bae iu duim sapos samwan hem talem iu stret for no followim wanfela samting wea God askim iu for duim? Olketa aposol bilong Jesus Kraest they say: “Mifela mas obeyim God olsem ruler, winim man.” (Acts 5:29) Disfela example hem fitim planti samting wea kamap long laef. Waswe, love bilong iu for Jehovah bae muvim iu for givim hem worship wea hem nomoa fit for kasem? Long semtaem, waswe, love and respect wea iu garem for hasband bilong iu bae mekem iu duim diswan long way wea hasband bae acceptim?—Matthew 4:10; 1 John 5:3.

7. Wanem way for believe strong nao wanfela Kristian waef mas garem?

⁷ Jesus say bae hem hard tumas for duim diswan samfela taem. Hem givim warning hao, way for againstim trufela worship bae mekem olketa wea believe insaed wanfela famili feel olsem they separate, olsem wanfela sword hem divaedem them from olketa insaed famili bilong them. (Matthew 10:34-36) Wanfela woman long Japan hem kasem diswan. Hasband bilong hem againstim hem for 11-fela year. Hem raf tumas long hem and planti taem lockim waef bilong hem aotsaed long haos. But woman hia stand strong. Olketa fren insaed long Kristian kongregeson helpem hem. Hem prea evritaem and kasem bigfela comfort from 1 Peter 2:20. Disfela Kristian woman hem barava believe hao sapos hem stand strong, wan day hasband bilong hem bae joinim hem for servim Jehovah. And datwan nao samting wea happen.

8, 9. Wanem nao olketa samting wea waef savvy duim mekem hasband no garem reason for complain?

⁸ Iu savvy duim planti gudfela samting for change-im tingting bilong partner bilong iu. For example, sapos hasband bilong iu no agree long religion bilong iu, no givim hem reason for complain long otherfela samting. Keepim haos klin. Keepim gud lukluk bilong iuseleva. Talem planti toktok bilong love and thankiu. No againstim hem but supportim hem. Showim aot hao iu luk long hem olsem hed. No change-im back samting sapos iu kasem no gud samting. (1 Peter 2:21, 23) Tingim hao iumi evriwan no perfect, and sapos wanfela raoa kamap, iu mas humble for say sorry firstaem.—Ephesians 4:26.

⁹ No letem way wea iu attendim olketa meeting hem mekem iu no readyim kaikai bilong hem long proper taem. Maet iu decide for share insaed Kristian ministry long olketa taem wea hasband bilong iu no stap long haos. Hem wise for Kristian waef for no preach long hasband bilong hem sapos hasband no laekem. But, hem mas followim disfela kaonsel bilong aposol Peter: “Iufela olketa waef, iufela mas stap under long olketa hasband bilong iufela, mekem sapos eniwan long them no obey long word, bae iufela savvy winim them, no long toktok, but thru long fasin bilong waef bilong them, from olketa lukim klinfela fasin bilong iufela withim way for barava show aot respect.” (1 Peter 3:1, 2) Olketa Kristian waef mas work hard for showim aot olketa fruit bilong spirit bilong God.—Galatians 5:22, 23.

TAEM WAEF GAREM DIFFERENT RELIGION

10. Hao nao hasband wea believe mas deal withim waef bilong hem sapos hem garem different religion?

¹⁰ Waswe sapos hasband nao hem wanfela Kristian but waef bilong hem no moa? Bible talem samting for duim long taem olsem. Hem say: “Sapos eni brata garem waef wea no believe, but waef bilong hem agree for stap withim hem, hem mas no lusim datfela woman.” (1 Corinthians 7:12) Hem kaonselem olketa hasband tu for: “Go ahed for love-im waef bilong iufela.”—Colossians 3:19.

11. Hao nao hasband savvy showim aot way for meanim samting and duim work bilong hed long gudfela way taem waef bilong hem garem different religion?

¹¹ Sapos iu hasband bilong waef wea garem different religion, iu mas barava lukluk gud long way for showim aot respect for waef bilong iu and tingim olketa feeling bilong hem. From hem wanfela full-grown person, fitim hem for followim olketa samting wea religion bilong hem believim, nomata sapos iu no agree withim them. Long firstfela taem wea iu story withim hem abaotem faith bilong iu, no ting bae hem lusim olketa samting wea hem believim for longtaem finis and bae hem interest long niufela samting. Winim way for talem strong hao olketa samting wea religion bilong hem duim, wea hem and famili bilong hem ting hae long them for longtaem finis, they giaman, trae for reason withim hem from olketa Scripture long patient way. Maet hem feel olsem iu no tingim hem sapos iu spendem planti taem long olketa samting bilong kongregeson. Maet hem againstim way wea iu servim Jehovah, but really maet tingting bilong hem olsem: “Mi needim iu for spendem moa taem withim mi!” Iu mas patient. From loving way wea iu tingim hem, go-go, maet diswan helpem hem for acceptim trufela worship.—Colossians 3:12-14; 1 Peter 3:8, 9.

TRAINIM OLKETA PIKININI

12. Nomata sapos hasband and waef garem different religion, hao nao they mas followim olketa Bible principle for trainim olketa pikinini bilong them?

¹² Insaed long famili wea no garem wan mind long religion, way for teachim olketa pikinini long saed bilong religion savvy mekem kwestin kamap. Hao nao olketa Bible principle fitim diswan? Bible hem givim main responsibility long dadi for teachim olketa pikinini, but mami tu garem important work long diswan. (Proverbs 1:8; lukim Genesis 18:19; Deuteronomy 11:18, 19.) Nomata sapos hem no acceptim way wea Kraest hem hed, dadi hem still hed bilong famili.

13, 14. Sapos hasband stopem waef bilong hem for tekem olketa pikinini long olketa Kristian meeting or for study withim them, wanem nao waef savvy duim?

¹³ Samfela dadi wea no believe they no againstim way wea mami hem teachim olketa pikinini long saed bilong religion. Otherfela they againstim diswan. Waswe sapos hasband bilong iu no letem iu for tekem olketa pikinini long olketa meeting bilong kongregeson or hem stopem iu tu for studyim Bible withim them long haos? Diswan meanim iu mas balance-im samfela obligation wea iu garem—obligation bilong iu for Jehovah God, for hasband bilong iu wea hem hed, and for olketa pikinini bilong iu wea iu love-im. Hao nao bae iu balance-im olketa samting hia?

¹⁴ Yes, bae iu prea abaotem diswan. (Philippians 4:6, 7; 1 John 5:14) But go-go, iu nao mas decide-im wanem for duim. Sapos iu showim aot way for tingim feeling bilong hasband, long way for mekem hem luksavvy hao iu no againstim hedship bilong hem, maet way wea hem againstim iu bae go daon. Nomata sapos hasband bilong iu stopem iu for tekem olketa pikinini go long olketa meeting or for duim Bible study withim them, iu savvy still teachim them. Long toktok bilong iu evriday and gudfela example bilong iu, trae for putim insaed long them love for Jehovah, faith long Word bilong hem, respect for dadi and mami—wea meanim dadi bilong them tu—way for care for otherfela pipol, and tingim way for work gud. Go-go, dadi maet lukim olketa gudfela samting wea kamaot from diswan and maet ting hae long hard work bilong iu.—Proverbs 23:24.

15. Wanem nao responsibility bilong wanfela dadi wea believe long way for trainim olketa pikinini?

¹⁵ Sapos iu wanfela hasband wea believe but waef bilong iu no moa, then iu nao garem responsibility for trainim olketa pikinini bilong iu long “discipline bilong Jehovah.” (Ephesians 6:4) And taem iu duim diswan, iu mas kaen, loving and iusim balance tingting taem iu deal withim waef bilong iu.

SAPOS IU GAREM DIFFERENT RELIGION FROM DADI AND MAMI

16, 17. Wanem nao olketa Bible principle wea olketa pikinini mas tingim sapos they acceptim wanfela religion wea different from dadi and mami bilong them?

¹⁶ Long distaem, samfela youngfela pikinini tu they acceptim different religion from dadi and mami bilong them. Waswe, iu wanfela wea duim datwan? Sapos olsem, Bible garem kaonsel for iu.

¹⁷ Word bilong God hem say: “Iufela mas obey long dadi and mami bilong iufela insaed long Lord, from hem nao raeteous fasin: ‘Honorim dadi and mami bilong iufela.’ ” (Ephesians 6:1, 2) Datwan meanim stretfela respect for dadi and mami. But, nomata way for obeyim dadi and mami hem important, pikinini mas tingim trufela God taem hem duim diswan. Taem wanfela pikinini hem kamap moa old and fit for decide-im samting, hem garem moa responsibility for givim ansa for olketa samting wea hem duim. Diswan hem no long law bilong gavman nomoa but hem moa tru for law bilong God. Bible hem say: “Each wan long iumi mas givim ansa for hemseleva long God.”—Romans 14:12.

18, 19. Sapos olketa pikinini garem different religion from dadi and mami bilong them, hao nao they savvy helpem dadi and mami for meanim gud religion bilong them?

¹⁸ Sapos olketa samting wea iu believim hem mekem iu change-im samfela samting insaed laef bilong iu, trae for meanim way wea dadi and mami ting long diswan. Bae they hapi sapos way wea iu learnim and followim olketa Bible teaching hem mekem iu showim aot moa respect, obey, and work hard long samting wea they askim iu for duim. But, sapos niu religion bilong iu mekem iu for rejectim tu belief and kastom wea olketa ting hae long them, maet they feel olsem iu rejectim way bilong laef wea they laek for givim long iu. Maet they worry long future bilong iu from samting wea iu duim hem samting wea planti pipol long ples bilong iu no laekem or hem tanem iu for no aftarem olketa samting wea they ting savvy helpem iu long material way. Maet praod fasin tu insaed diswan. Maet they ting, iu say iu nao stret and olketa nao rong.

¹⁹ So, kwiktaem arrange for dadi and mami bilong iu for meetim samfela elder or mature Witness from kongregeson. Encouragim dadi and mami bilong iu for visitim wanfela Kingdom Hall for herem seleva samting wea iumi story abaotem and for lukim seleva wanem kaen pipol nao Olketa Witness Bilong Jehovah. Go-go, maet tingting bilong dadi and mami bilong iu hem change. Nomata taem dadi and mami they strong for againstim pikinini, spoelem Bible literature, and stopem them for attendim olketa Kristian meeting, samfela otherfela chance stap for read long different ples, for story withim olketa Kristian brata and sista, and for witness and helpem otherfela long eniway taem. Iu savvy prea tu long Jehovah. Samfela young wan mas wait go kasem taem they big and lusim famili bifor they savvy duim moa samting. So, nomata wanem samting kamap, no forget for “honorim dadi and mami bilong iufela.” Duim share bilong iu for keepim peace long haos. (Romans 12:17, 18) Winim evri samting, keepim peace withim God.

CHALLENGE BILONG WAY FOR OLSEM STEPDADI OR STEPMAMI

20. Wanem feeling nao olketa pikinini maet garem sapos they garem stepdadi or stepmami?

²⁰ Insaed planti famili, samting wea bringim bigfela challenge hem no long saed bilong religion but olketa problem bilong stepfamili. Insaed planti famili distaem they garem olketa pikinini from firstfela marit. Insaed famili olsem, olketa pikinini maet feel jealous and they no savvy hu nao for obeyim. From diswan, maet they againstim olketa gudfela samting wea stepdadi or stepmami trae for duim. Wanem nao savvy help for mekem wanfela stepfamili hem win?

21. Nomata they garem different kaen living, why nao stepdadi or stepmami mas luk for help long olketa principle insaed Bible?

²¹ Olketa hia mas luksavvy hao nomata they garem different kaen living, olketa Bible principle wea helpem otherfela famili hem fitim them tu. For no followim olketa principle hia maet kavarem problem for lelebet taem, but hem savvy lead go long sorry bihaen. (Psalm 127:1; Proverbs 29:15) Mekem grow wisdom and fasin for meanim samting—wisdom for followim olketa principle bilong God for kasem gudfela samting bihaen, and fasin for meanim samting wea mekem man luksavvy why olketa member bilong famili talem and duim samting. Iumi need tu for garem feeling for narawan.—Proverbs 16:21; 24:3; 1 Peter 3:8.

22. Why nao olketa pikinini maet faendem hem hard for acceptim wanfela stepdadi or stepmami?

²² Sapos iu wanfela stepdadi or stepmami, maet iu remember hao olsem wanfela fren bilong famili, olketa pikinini they welkamim iu evritaem. But taem iu kamap stepdadi or stepmami bilong them, tingting bilong them hem change. Taem they tingim hao really dadi or mami bilong them no stap moa withim them, olketa pikinini maet no savvy hu nao for loyal long hem, maet they feel olsem iu want for aotem love wea they garem for datfela dadi or mami. Samfela taem, they maet talem iu stret hao iu no dadi or mami bilong them. Olketa toktok olsem savvy mekem iu feel no gud. Nomata olsem, “no hariap for letem spirit bilong iu for feel kros.” (Ecclesiastes 7:9) Iu needim fasin for meanim samting and savvy long feeling bilong pikinini for deal withim olketa feeling bilong hem.

23. Hao nao man savvy deal withim way for givim discipline insaed long famili wea garem olketa steppikinini?

²³ Olketa fasin hia they important tumas taem iu givim discipline. Hem important for evritaem givim discipline wea no change. (Proverbs 6:20; 13:1) And from olketa pikinini they no semsem, discipline wea wanfela kasem maet different from narawan. Samfela stepdadi or stepmami faendem hao long firstaem, maet hem moabeta for letem really dadi or mami for deal withim disfela work. But, hem important for tufela evriwan agree and supportim datfela discipline, no showim aot favor long pikinini bilong seleva winim steppikinini. (Proverbs 24:23) Fasin for obey hem important, but iu mas tingim tu way wea evriwan no perfect. No ova tumas. Givim discipline withim love.—Colossians 3:21.

24. Wanem nao savvy help for misstim olketa problem long saed bilong fasin wea no klin midlwan long olketa insaed long stepfamili?

²⁴ Way for famili story tugeta savvy help long bigfela way for stopem trabel for kamap. Diswan savvy helpem famili for tingting long olketa barava important samting long laef. (Lukim Philippians 1:9-11.) Diswan savvy helpem each wan tu for lukim hao hem savvy share for kasem olketa goal bilong famili. And tu, way for tok stret tugeta olsem famili abaotem fasin wea no klin savvy help for stopem datkaen problem. Olketa girl need for savvy hao for wearim kaleko and showim aot stretfela fasin taem they stap withim stepdadi and eni stepbrata bilong them, and olketa boy needim kaonsel long way for showim aot stretfela fasin long stepmami and eni stepsista bilong them.—1 Thessalonians 4:3-8.

25. Wanem nao olketa fasin wea savvy help for keepim peace insaed long stepfamili?

²⁵ For deal withim disfela spesel challenge bilong way for kamap stepdadi or stepmami, iu mas patient. Man needim taem for mekem grow niufela way for fren. For kasem love and respect bilong olketa pikinini wea no bilong iu hem bigfela work. But iu savvy duim diswan. Wisefela heart wea meanim samting, wea join withim strongfela feeling for mekem Jehovah hapi, hem nao key for kasem peace insaed long stepfamili. (Proverbs 16:20) Olketa fasin olsem savvy helpem iu tu for deal withim otherfela samting.

WASWE, MATERIAL SAMTING DIVAEDEM FAMILI BILONG IU?

26. Long wanem way nao olketa problem and way for tingim material samting savvy divaedem famili?

²⁶ Olketa problem and way for tingim material samting savvy divaedem olketa famili long planti way. Sorry tumas, samfela famili they brek daon from way for raoa abaotem shilling and for want for kamap rich—or kasem lelebet moa shilling. Way for divaed savvy kamap taem hasband and waef they work for shilling and start for garem tingting, “shilling bilong mi, shilling bilong iu.” Nomata they no savvy raoa abaotem diswan, taem hasband and waef work for shilling, maet they garem wanfela busy schedule wea mekem tufela no garem inaf taem for each other. Wanfela samting wea kamap big long world hem for olketa dadi go stap long different ples from famili bilong them for longtaem—samfela month or year tu—for kasem moa shilling winim samting wea they savvy kasem long ples bilong them. Diswan savvy lead go for olketa bigfela problem.

27. Wanem nao samfela principle wea savvy helpem famili wea garem hevi long saed bilong shilling?

²⁷ Iumi kanduit for putim olketa rul for olketa samting olsem, bikos olketa different famili need for deal withim different hevi and they garem different need. Nomata olsem, kaonsel bilong Bible savvy help. For example, Proverbs 13:10 showim aot hao man savvy misstim way for raoa taem olketa “story tugeta.” Diswan no meanim nomoa way for talemaot tingting bilong seleva but for askim advice tu and faend aot wanem nao tingting bilong narawan. And tu, for mekem wanfela gudfela budget savvy help for mekem famili garem wan mind. Samfela taem need maet kamap—maet for lelebet taem—for hasband and waef for work for shilling from they garem pikinini or otherfela pipol wea depend long them. Taem diswan happen, hasband savvy showim aot long waef hao hem still garem taem for hem. Hem and olketa pikinini savvy help long loving way withim samfela work wea waef seleva savvy duim bifor.—Philippians 2:1-4.

28. Sapos they tingim wanem samting nao bae famili savvy kasem help for wan mind?

²⁸ But, mas tingim hao nomata iumi needim shilling long disfela system, hem no savvy givim hapi. Hem no savvy givim laef. (Ecclesiastes 7:12) Yes, way for ova tumas long olketa material samting savvy spoelem man long spiritual way and long saed bilong fasin. (1 Timothy 6:9-12) Hem moabeta for lukaotem Kingdom bilong God firstaem and raeteous fasin bilong hem, wea givim promis for kasem blessing from hem for olketa samting wea iumi needim long evriday living! (Matthew 6:25-33; Hebrews 13:5) Taem iu putim olketa spiritual samting firstaem and lukaotem peace withim God firstaem, maet bae iu lukim hao famili bilong iu, nomata hem divaed from samfela different samting, bae kamap famili wea barava garem wan mind long olketa moa important way.

1. Wanem nao samfela problem wea haed insaed long samfela famili?

OLKETA just wasim finis and polisim gud oldfela truck bilong olketa. Pipol wea go pass lukim truck hem shine olsem niu wan. But underneath long truck, rasta go ahed for spoelem. Diswan hem semsem long samfela famili. Nomata long eye bilong pipol evri samting go ahed gud, smile long olketa face insaed famili hem haedem fraet and pain. Taem olketa stap long haos olketa no gud samting go ahed for spoelem peace insaed long famili. Tufela problem wea savvy mekem diswan kamap hem fasin for drink olawe and raf fasin.

WAY WEA FASIN FOR DRINK SPOELEM FAMILI

2. (a) Wanem nao Bible say abaotem way for iusim alcohol? (b) Wanem nao fasin for drink olawe?

² Bible hem no againstim way for drinkim alcohol long balance way, but hem againstim fasin for drunk. (Proverbs 23:20, 21; 1 Corinthians 6:9, 10; 1 Timothy 5:23; Titus 2:2, 3) But fasin for drink olawe hem meanim moa samting winim fasin for drunk; hem meanim for tingting olawe long alcohol and way wea man no savvy bossim haomas alcohol hem drinkim. Olketa full-grown man savvy kamap man wea depend long alcohol. And sorry tumas, olketa young pipol tu.

3, 4. Story abaotem hao fasin for drink olawe hem affectim waef bilong man wea drink olawe and olketa pikinini.

³ Longtaem bifor, Bible showim aot hao way for iusim alcohol long rongfela way savvy spoelem peace bilong famili. (Deuteronomy 21:18-21) No gud samting wea kamaot from fasin for drink olawe hem affectim full famili. Waef bilong man wea drink olawe maet busy tumas for trae for stopem way wea hasband hem drink or deal withim olabaot fasin bilong hem.a Hem trae for haedem drink, torowem, haedem shilling bilong hem, and askim hem for tingim love for famili bilong hem, for laef, and for God tu—but man wea depend long alcohol hem still drink. Taem hard work bilong woman hia hem fail, hem feel kros and feel olsem hem no fit for duim eni samting. Hem maet start for suffer long way for fraet, kros, guilty, seksek, worry, and no respectim seleva.

⁴ Way wea dadi or mami hem depend long alcohol hem affectim olketa pikinini tu. Samfela taem dadi or mami hitim them. Otherfela they spoelem them long saed bilong sex. Olketa pikinini maet ting say olketa nao duim rong samting dastawe dadi or mami savvy drink olawe. Planti taem hem hard tumas for olketa trustim eniwan bikos long olabaot fasin bilong dadi or mami wea depend long alcohol. From olketa no feel free for story abaotem samting wea happen insaed long famili, olketa pikinini maet learn for haedem olketa feeling bilong them, and planti taem diswan spoelem them. (Proverbs 17:22) Olketa pikinini olsem maet no trustim and respectim seleva taem olketa kamap full-grown man tu.

WANEM NAO FAMILI SAVVY DUIM?

5. Hao nao for deal withim fasin for drink olawe, and why nao diswan hem hard?

⁵ Nomata planti pipol say hem hard for healim man wea drink olawe, planti say man savvy kamap beta sapos hem stop evribit for drink. (Lukim Matthew 5:29.) But, for mekem man wea depend long alcohol for acceptim help hem no easy samting, bikos planti taem hem no ting hem garem wanfela problem. Nomata olsem, taem olketa member long famili duim samting for deal withim samting wea kamaot from way wea hem drink olawe, maet hem start for luksavvy hem garem wanfela problem. Wanfela doctor wea garem savvy for helpem olketa man wea depend long alcohol and famili bilong them hem say: “Mi ting firstfela important samting hem for famili for go ahed long evriday living long way wea show aot they strong. Then man wea depend long alcohol hem lukim klia hao long bigfela way hem different from olketa other wan insaed long famili.”

6. Wanem nao best ples for kasem kaonsel for olketa famili wea garem wanfela member wea depend long alcohol?

⁶ Sapos samwan wea depend long alcohol hem stap insaed famili bilong iu, kaonsel bilong God long Bible savvy helpem iu for garem living wea followim best way. (Isaiah 48:17; 2 Timothy 3:16, 17) Tingim samfela principle wea helpem finis olketa famili for win taem they deal withim fasin for drink olawe.

7. Sapos wanfela member bilong famili hem depend long alcohol, hu nao mas givim ansa?

⁷ No tekem full blame. Bible hem say: “Each wan bae karem load bilong hemseleva,” and, “each wan long iumi mas givim ansa for hemseleva long God.” (Galatians 6:5; Romans 14:12) Dat wan wea depend long alcohol maet trae for say olketa member bilong famili nao mekem hem olsem. For example, hem maet say: “Sapos iufela showim aot gudfela fasin long mi, bae mi no drink.” Sapos olketa other wan agree withim hem, olketa encouragim hem for go ahed for drink. But nomata iumi kasem no gud samting from living or from otherfela pipol, iumi evriwan—and olketa wea depend long alcohol tu—mas givim ansa for samting wea iumi duim.—Lukim Philippians 2:12.

8. Wanem nao samfela way for helpem dat wan wea depend long alcohol for face-im olketa samting wea kamaot from problem bilong hem?

⁸ No ting say iu mas evritaem protectim dat wan wea depend long alcohol from olketa samting wea kamaot from way wea hem drink. Wanfela proverb bilong Bible abaotem samwan wea kros hem fitim tu wanfela man wea depend long alcohol: “Sapos iu sevem hem, bae iu go ahed for duim moa and moa.” (Proverbs 19:19) Letem dat wan wea depend long alcohol for kasem samting wea kamaot from way bilong hem for drink. Letem hemseleva klinim evri dirty wea hem mekem or ringim boss bilong hem long nextfela morning bihaen hem drink for talem why hem no go work.

9, 10. Why nao famili bilong olketa wea depend long alcohol mas acceptim help, and help bilong hu nao olketa mas lukaotem?

⁹ Acceptim help from otherfela pipol. Proverbs 17:17 hem say: “Wanfela trufela fren hem show aot love evritaem, and hem wanfela brata wea born for taem bilong trabel.” Taem samwan wea depend long alcohol hem stap insaed famili bilong iu, trabel hem stap. Iu needim help. No hold back for depend long olketa ‘trufela fren’ for supportim iu. (Proverbs 18:24) For story withim otherfela pipol wea meanim datfela problem or wea face-im sem kaen samting maet givim iu samfela gudfela idea long wanem for duim and wanem for no duim. But mas balance. Story withim olketa wea iu trustim, olketa wea bae keepim “secret toktok.”—Proverbs 11:13.

¹⁰ Learn for trustim olketa Kristian elder. Olketa elder insaed Kristian kongregeson savvy givim bigfela help. Olketa mature man hia garem savvy from Word bilong God and savvy long way for followim olketa principle bilong hem. Olketa savvy kamap “olsem wanfela ples for haed from wind and wanfela ples for haed from bigfela rain, olsem wata wea ran insaed long ples wea hem drae, olsem shadow bilong wanfela bigfela stone long hotfela ples.” (Isaiah 32:2) Olketa Kristian elder protectim full kongregeson and comfortim, strongim, and show aot interest long each wan wea garem olketa problem. Kasem gudfela samting from help bilong them.

11, 12. Hu nao savvy givim barava bigfela help for olketa famili wea garem samwan wea depend long alcohol, and hao nao hem givim datfela support?

¹¹ Winim evri samting, kasem strong from Jehovah. Bible givim iumi disfela comfort: “Jehovah hem stap klosap long olketa wea heart bilong them brek; and hem savvy sevem olketa wea spirit bilong them pisis.” (Psalm 34:18) Sapos iu feel olsem heart bilong iu brek or spirit bilong iu pisis from olketa hevi wea kamap taem wanfela member bilong famili hem depend long alcohol, luksavvy hao “Jehovah hem stap klosap.” Hem meanim hao famili living bilong iu hem hard tumas.—1 Peter 5:6, 7.

¹² Way for believim samting wea Jehovah talem insaed long Word bilong hem savvy helpem iu for deal withim worry. (Psalm 130:3, 4; Matthew 6:25-34; 1 John 3:19, 20) Way for studyim Word bilong God and for live followim olketa principle bilong hem bae mekem iu fit for kasem help bilong holy spirit bilong God, wea savvy strongim iu withim ‘paoa bilong God’ for deal withim each day.—2 Corinthians 4:7.b

13. Wanem nao mek-tu problem wea savvy spoelem planti famili?

¹³ Way for iusim alcohol long rongfela way savvy mekem narafela problem wea spoelem planti famili hem kamap—raf fasin insaed famili.

NO GUD SAMTING WEA KAMAOT FROM RAF FASIN INSAED FAMILI

14. Wanem taem nao raf fasin long famili hem start, and waswe long distaem?

¹⁴ Firstfela raf samting wea happen long history bilong olketa man hem raf fasin insaed famili midlwan long tufela brata, Cain and Abel. (Genesis 4:8) Start kam long datfela taem, planti different kaen raf fasin kamap insaed famili. Olketa hasband wea hitim waef, waef wea attackim hasband, dadi and mami wea whipim no gud olketa young pikinini, and olketa big pikinini wea spoelem dadi and mami wea olo.

15. Raf fasin long famili hem affectim olketa member bilong famili long wanem way?

¹⁵ No gud samting wea kamaot from raf fasin long famili hem no just long saed bilong body nomoa. Wanfela waef wea hasband bilong hem hitim hem, hem say: “Iu mas deal withim way for feel guilty and feel shame. Planti morning, iu no laek for get ap, iu hope hem wanfela no gud dream nomoa.” Olketa pikinini wea lukim and kasem raf fasin long famili savvy kamap raf taem they grow ap and garem famili bilong themseleva.

16, 17. Wanem nao raf fasin long saed bilong feeling, and hao nao hem affectim olketa member bilong famili?

¹⁶ Raf fasin long famili hem no meanim for hitim nomoa narawan. Planti taem, diswan meanim toktok tu. Proverbs 12:18 hem say: “Toktok bilong man wea tok olabaot hem olsem sword wea katem man.” Diskaen way for “katem man” wea hem part long raf fasin insaed famili hem way for kolem man long enikaen no gud nem and for shout tumas, tok spoelem hem evritaem, tok daonem long no gud way, and toktok for duim raf fasin. Olketa kill long saed bilong feeling they samting wea otherfela pipol no savvy lukim planti taem.

¹⁷ Samting wea no gud tumas hem for spoelem pikinini long saed bilong feeling—for evritaem tok daonem samting wea pikinini duim, tingim, or hem olsem wanfela person. No gud toktok olsem savvy spoelem way wea pikinini trustim hemseleva. Hem tru, evri pikinini needim discipline. But Bible say long olketa dadi: “No mekem olketa pikinini bilong iufela kros evritaem, nogud iufela mekem heart bilong olketa hevi.”—Colossians 3:21.

HAO FOR MISSTIM RAF FASIN INSAED FAMILI

18. Wea nao raf fasin long famili hem start, and wanem way nao Bible showim aot for stopem diswan?

¹⁸ Raf fasin long famili hem start long heart and mind; samting wea iumi duim hem start withim way wea iumi tingting. (James 1:14, 15) For stopem diskaen raf fasin, man wea duim need for change-im way wea hem tingting. (Romans 12:2) Waswe, hem savvy duim olsem? Yes. Word bilong God garem paoa for change-im pipol. Hem savvy aotem tu “olketa strongfela” tingting wea spoelem man. (2 Corinthians 10:4; Hebrews 4:12) From stretfela savvy from Bible savvy help for change-im pipol evribit, diswan hem olsem olketa kamap niufela man.—Ephesians 4:22-24; Colossians 3:8-10.

19. Hao nao Kristian mas tingim and deal withim marit partner bilong hem?

¹⁹ Way for ting long marit partner. Word bilong God hem say: “Olketa hasband mas love-im waef bilong them olsem themseleva. Man wea love-im waef bilong hem love-im hemseleva.” (Ephesians 5:28) Bible hem say tu hao hasband mas givim “honor long hem olsem samting wea hem no strong tumas.” (1 Peter 3:7) Olketa waef kasem kaonsel “for love-im hasband bilong them” and for showim aot “bigfela respect” for them. (Titus 2:4; Ephesians 5:33) Tru nao, no eni hasband wea fraet long God fit for say hem really honorim waef sapos hem hitim and tok spoelem hem. And no eni waef wea singaot long hasband bilong hem, tok no gud or evritaem hotem hem savvy say hem really love-im and respectim hem.

20. Front long hu nao dadi and mami garem work for luk aftarem olketa pikinini bilong them, and why nao dadi and mami mas no wantim pikinini for duim samting wea no fitim olketa?

²⁰ Stretfela way for ting long olketa pikinini. Olketa pikinini fit for kasem, yes needim, love and care from dadi and mami bilong them. Word bilong God say olketa pikinini “kam from Jehovah” and olketa “wanfela reward.” (Psalm 127:3) Olketa dadi and mami garem work front long Jehovah for luk aftarem disfela samting wea kam from Jehovah. Bible hem story abaotem “olketa way bilong wanfela baby” and “kranky fasin” bilong pikinini. (1 Corinthians 13:11; Proverbs 22:15) Olketa dadi and mami mas no sapraes taem they lukim kranky fasin wea olketa pikinini bilong them garem. Olketa young wan they no full-grown man. Dadi and mami mas no wantim pikinini for duim samting wea no fitim age, famili living, or savvy bilong hem.—Lukim Genesis 33:12-14.

21. Wanem nao tingting bilong God abaotem way for tingim and deal withim olketa dadi and mami wea olo?

²¹ Way for ting long dadi and mami wea olo. Leviticus 19:32 hem say: “Iu mas stand ap front long man wea garem gray hair, and iu mas kaen long olo man.” Law bilong God hem encouragim way for ting hae long olketa olo. Diswan maet wanfela challenge taem dadi or mami wea olo hem ova tumas long samting wea hem wantim or hem sik and maet hem no duim samting or tingting kwiktaem. Nomata olsem, olketa pikinini mas “go ahed for peim back samting wea they kasem from dadi and mami bilong them.” (1 Timothy 5:4) Diswan meanim for deal withim them long way bilong respect, and maet for helpem them long saed bilong shilling. For no deal withim olketa dadi and mami long gudfela way hem againstim fasin wea Bible talem iumi for followim.

22. Wanem nao barava important fasin for winim raf fasin long famili, and hao nao for showim aot diswan?

²² Mekem grow fasin for bossim seleva. Proverbs 29:11 hem say: “Kranky man hem aotem evri spirit bilong hem, but wisefela man hem stap kwaet go kasem end.” Hao nao iu savvy bossim spirit bilong iu? Winim way for letem kros hem grow insaed long iu, duim samting kwiktaem for stretem eni problem wea kamap. (Ephesians 4:26, 27) Go awe sapos iu feelim iu bae no bossim iuseleva. Prea for holy spirit bilong God for mekem iu for garem fasin for bossim seleva. (Galatians 5:22, 23) For go wakabaot or mekem body work maet helpem iu tu for bossim olketa feeling bilong iu. (Proverbs 17:14, 27) Trae hard for “no kros kwiktaem.”—Proverbs 14:29.

FOR SEPARATE OR STAP TUGETA?

23. Wanem nao savvy happen sapos wanfela member bilong Kristian kongregeson hem showim aot fasin for kros and raoa evritaem, maet for hitim olketa insaed famili, and hem no repent?

²³ Bible joinim “jealous fasin, fasin for kros, . . . raoa” withim olketa samting wea God againstim, and hem say “olketa wea duim olketa samting olsem bae no kasem kingdom bilong God.” (Galatians 5:19-21) So, eniwan wea say hem wanfela Kristian wea evritaem showim aot fasin for kros and raoa, maet long way for hitim partner or olketa pikinini, and hem no repent, olketa savvy disfellowshipim hem from Kristian kongregeson. (Lukim 2 John 9, 10.) Long disfela way kongregeson hem stap klin from olketa man wea spoelem narawan.—1 Corinthians 5:6, 7; Galatians 5:9.

24. (a) Wanem nao wanfela wea partner bilong hem spoelem maet decide for duim? (b) Hao nao olketa fren and elder savvy supportim wanfela wea partner bilong hem spoelem hem, but wanem nao they mas no duim?

²⁴ Waswe long olketa Kristian distaem wea partner bilong them hitim them, but no show aot hem want for change? Samfela choose for stap withim partner bilong them from samfela reason. Otherfela they choose for lusim hem, from they ting body, mind, and spiritual saed bilong them—maet laef bilong them tu—hem stap long danger. Samting wea man wea kasem raf fasin insaed famili hem choose for duim hem samting wea hemseleva mas decide-im front long Jehovah. (1 Corinthians 7:10, 11) Olketa fren and relative wea want for help, or olketa Kristian elder maet helpem and givim hem advice, but they mas no force-im hem for duim samting wea they tingim. Diswan hem samting wea hemseleva nao mas decide-im.—Romans 14:4; Galatians 6:5.

OLKETA PROBLEM WEA SPOELEM MAN BAE FINIS

25. Wanem nao purpose bilong Jehovah for olketa famili?

²⁵ Taem Jehovah joinim Adam and Eve tugeta long marit, purpose bilong hem no for problem olsem fasin for drink olawe or raf fasin for spoelem famili. (Ephesians 3:14, 15) Purpose bilong hem for famili kamap ples wea love and peace bae grow and each member kasem gud samting long mind, feeling, and spiritual way. But, taem sin kamap, famili laef kwiktaem go-go daon.—Lukim Ecclesiastes 8:9.

26. Wanem future nao stap for olketa wea trae for garem living wea followim olketa law bilong Jehovah?

²⁶ Iumi hapi tumas from Jehovah no lusim purpose bilong hem for famili. Hem promis for bringim wanfela niu world bilong peace wea pipol “bae garem safe living, and no eniwan bae mekem them seksek.” (Ezekiel 34:28) Long datfela taem, fasin for drink olawe, raf fasin long famili, and otherfela problem wea spoelem famili distaem bae they samting bilong bifor. Pipol bae smile, no for haedem fraet and pain, but bikos they bae “hapi tumas long bigfela peace wea they garem.”—Psalm 37:11.

1, 2. Taem marit hem kasem hevi, wanem kwestin nao man mas askim?

LONG 1988, Lucia, wanfela woman from Italy, hem feel sorry tumas.a Marit bilong hem ready for finis, bihaen tenfela year. Hem trae planti taem for stap gud moa withim hasband bilong hem, but hem hard tumas. So hem separate from hasband bilong hem bikos tufela no savvy stap gud tugeta, and hem mas luk aftarem seleva tufela dota bilong hem. Taem hem ting go back, Lucia hem say: “Mi barava sure hao no eni samting savvy sevem marit bilong mi tufela.”

² Sapos iu garem olketa problem insaed marit bilong iu distaem, maet iu meanim feeling bilong Lucia. Maet marit bilong iu kasem problem and maet iu daot sapos iu savvy sevem. Sapos olsem, hem gud sapos iu ting raonem disfela kwestin: Waswe, mi followim evri gudfela advice wea God givim insaed long Bible for help for mekem marit hem win?—Psalm 119:105.

3. Nomata divorce kamap big tumas, hao nao planti wea divorce and famili bilong them feel abaotem diswan?

³ Taem evri problem midlwan long hasband and waef kamap hard tumas, way for finisim marit maet luk olsem hem easy way for stretem. But, nomata namba bilong olketa famili wea brek daon long planti kantri hem kamap moa big, olketa report showim aot hao planti man and woman wea divorce feel sorry bihaen. Samfela long olketa kasem moa problem long health bilong them, long body and mind, winim olketa wea decide for stap tugeta. Olketa pikinini wea dadi and mami bilong them divorce, they savvy konfius and no hapi for planti year. Dadi and mami and fren bilong famili wea brek daon they suffer tu. And waswe long tingting bilong God long diswan, Man Wea Startim marit?

4. Hao nao for deal withim olketa problem insaed long marit?

⁴ Olsem otherfela chapter story abaotem finis, purpose bilong God hem for marit mas stap for full laef bilong man. (Genesis 2:24) Sapos olsem, why nao planti marit they brek daon? Diswan maet no samting wea kwiktaem for happen. Planti taem, samfela samting happen wea olsem warning. Olketa smallfela problem insaed long marit savvy kamap big and big go kasem taem hem luk olsem hem hard tumas for winim. But sapos olketa kwiktaem for deal withim olketa problem hia withim help from Bible, planti marit savvy misstim way for brek daon.

ACCEPTIM REALLY SAMTING

5. Wanem stretfela tingting nao man mas garem long marit?

⁵ Wanfela samting wea maet lead go long olketa problem hem taem hasband or waef or tufela evriwan no acceptim really samting. Olketa love story insaed buk, magasin, television program, and movie savvy mekem man garem hope and dream wea different evribit from samting wea savvy happen long really laef. Taem olketa dream olsem no kamap tru, man maet feel olsem samwan giamanim hem, hem no satisfy, and hem kros tu. So, hao nao tufela wea no perfect savvy faendem hapi insaed long marit? Tufela need for work hard for kasem gudfela marit.

6. (a) Wanem balance tingting abaotem marit nao Bible hem givim? (b) Wanem nao samfela samting wea hasband and waef no savvy agree long them insaed long marit?

⁶ Bible savvy helpem iumi. Hem talemaot hapi wea marit bringim, but hem givim warning tu abaotem hao olketa wea marit “bae kasem trabel long body.” (1 Corinthians 7:28) Olsem iumi story abaotem finis, hasband and waef no perfect and savvy sin. Tingting and feeling and living bilong each partner hem different. Samfela taem hasband and waef no agree long saed bilong shilling, pikinini, and olketa in-law. Way for no garem inaf taem for duim samting tugeta and olketa problem long saed bilong sex savvy mekem problem kamap tu.b They needim taem for deal withim olketa samting hia, but no givap! Planti hasband and waef face-im olketa problem olsem and they deal withim long gudfela way.

STORY ABAOTEM OLKETA PROBLEM

7, 8. Sapos hasband and waef feel no gud or no meanim gud each other, hao nao Bible hem say they savvy deal withim diswan?

⁷ Planti faendem hem hard tumas for story long kwaet way abaotem olketa no gud feeling, way for no meanim samting, or samting wea they fail long hem. Winim way for tok stret olsem: “Mi feel olsem iu no meanim mi,” hasband or waef maet letem feeling kamap strong and mekem datfela problem kamap big tumas. Planti bae say: “Iu worry abaotem iuseleva nomoa,” or, “Iu no love-im mi.” From hem no want for raoa, narafela partner maet no want for ansarem hem.

⁸ Wanfela beta samting for duim hem for followim disfela kaonsel long Bible: “Iufela savvy kros, but iufela mas no sin; no letem sun go daon taem iufela still kros yet.” (Ephesians 4:26) They askim wanfela hasband and waef wea garem hapi marit, taem they kasem mek-60 year wea they marit, abaotem secret bilong gudfela marit bilong them. Datfela hasband hem say: “Mifela learn for no go sleep sapos mifela no stretem problem, nomata olketa problem hia they small nomoa.”

9. (a) Wanem nao Bible say hem important part bilong way for story tugeta? (b) Wanem nao hasband and waef need for duim planti taem, nomata sapos diswan meanim they mas garem strong and humble fasin?

⁹ Taem hasband and waef no agree long samting, each wan need for “kwiktaem for listen, slow for toktok, slow for kros.” (James 1:19) Bihaen they listen gud, tufela evriwan maet lukim need for say sorry. (James 5:16) For say withim feeling, “Mi sorry for mekem iu feel no gud,” they need for humble and strong. But for deal withim olketa problem long way olsem bae helpem hasband and waef no for stretem olketa problem bilong them nomoa, but for mekem grow tu way for fren tugeta wea bae mekem them moa hapi taem they stap tugeta.

GIVIM SAMTING WEA IU OWE-IM INSAED LONG MARIT

10. Wanem samting wea aposol Paul say bae protectim olketa Kristian long Corinth maet fitim wanfela Kristian distaem?

¹⁰ Taem aposol Paul raet go long olketa long Corinth, hem say hem gud for they marit “bikos fornication hem kamap big tumas.” (1 Corinthians 7:2) World distaem hem barava no gud olsem Corinth bifor, maet hem moa worse. Olketa dirty story wea pipol story abaotem evritaem, no gud way wea they wearim kaleko, and dirty story insaed olketa magasin and buk, long TV, and olketa movie, evri samting hia muvim pipol for barava laekem dirty fasin. Aposol Paul hem say olsem long olketa long Corinth wea stap midlwan long pipol olsem: “Hem moabeta for marit winim way for tingting evritaem for wantim sex.”—1 Corinthians 7:9.

11, 12. (a) Wanem nao hasband and waef owe-im long each other, and they mas givim diswan withim wanem kaen tingting? (b) Sapos for lelebet taem tufela kanduit for givim samting wea they owe-im insaed long marit, hao nao they mas deal withim diswan?

¹¹ So, Bible givim disfela komand long olketa Kristian wea marit: “Hasband mas givim samting wea hem owe-im long waef bilong hem; but waef tu mas duim sem samting long hasband bilong hem.” (1 Corinthians 7:3) Lukim hao hem strongim way for give—no for force-im. Sex insaed marit savvy mekem tufela barava satisfy only sapos each partner tingim gudfela samting for narawan. For example, Bible komandim olketa hasband for deal withim olketa waef bilong them “long way wea fitim savvy.” (1 Peter 3:7) Diswan hem barava tru long way for givim and kasem samting wea tufela owe-im insaed long marit. Sapos hasband no deal withim waef long kaenfela way, maet waef faendem hem hard for enjoyim disfela part bilong marit.

¹² Samfela taem hasband and waef no fit for givim samting wea they owe-im insaed long marit. Diswan maet hem tru for waef samfela taem long month or taem hem feel tired tumas. (Lukim Leviticus 18:19.) Maet hem tru for hasband taem hem deal withim wanfela bigfela problem long work and feel tired long saed bilong feeling. Sapos for lelebet taem hasband and waef kanduit for givim samting wea they owe-im insaed long marit, best way for tufela deal withim diswan hem for they story gud abaotem and “tufela evriwan agree.” (1 Corinthians 7:5) Diswan bae stopem eniwan long tufela for kwiktaem garem rongfela tingting. But, sapos wanfela waef hem meanim for no givim long hasband or hasband barava no showim aot love long saed bilong sex, diswan maet mekem moa easy for partner fall daon long test. Taem samting olsem kamap, olketa problem savvy kamap insaed long marit.

13. Hao nao olketa Kristian savvy keepim tingting bilong olketa klin?

¹³ Olsem evri Kristian, olketa servant bilong God wea marit mas stap klia long olketa dirty buk, wea savvy mekem man garem dirty and no gud tingting. (Colossians 3:5) They mas lukaot long tingting and samting wea they duim taem they deal withim narafela man or woman. Jesus givim disfela warning: “Evriwan wea go ahed for lukluk long wanfela woman for barava laekem hem, hem duim adultery finis withim hem long heart bilong hem.” (Matthew 5:28) Taem they followim kaonsel bilong Bible long saed bilong sex, olketa hasband and waef fit for misstim way for fall daon long test and duim adultery. They savvy go ahed for enjoyim sex insaed long marit wea givim hapi and wea olsem gudfela present from Man Wea Startim marit, Jehovah.—Proverbs 5:15-19.

OLKETA REASON FROM BIBLE FOR DIVORCE

14. Wanem no gud samting savvy kamap samfela taem? Why nao olsem?

¹⁴ Long klosap evri Kristian marit, they savvy deal withim eni problem wea kamap. But, samfela taem diswan no savvy happen. From olketa man no perfect and stap insaed world wea garem sin and wea stap under long paoa bilong Satan, samfela marit they kasem taem wea they ready for brek daon. (1 John 5:19) Hao nao olketa Kristian mas deal withim hardfela samting olsem wea kamap?

15. (a) Wanem nao only reason from Bible wea letem man for divorce and marit moa? (b) Why nao samfela they decide for no divorce-im marit partner bilong them wea no faithful?

¹⁵ Olsem Chapter 2 bilong disfela buk hem story abaot, fornication hem only reason wea Bible letem man for divorce and marit moa.c (Matthew 19:9) Sapos iu garem trufela proof hao marit partner bilong iu hem no faithful, then iu garem hardfela samting for decide-im. Waswe, bae iu go ahed long marit bilong iu or divorce? No eni rul stap for diswan. Samfela Kristian they forgivim partner bilong them wea really repent, and datfela marit hem go ahed gud. Samfela they decide for no divorce from they tingim olketa pikinini bilong them.

16. (a) Wanem nao samfela samting wea muvim samfela for divorce-im marit partner bilong them wea duim rong samting? (b) Taem wanfela wea no duim rong hem decide for divorce or no divorce, why nao no eniwan mas tok againstim samting wea dat wan hem decide-im?

¹⁶ Long otherfela saed, datfela rong maet lead go long way for babule or kasem sik wea kamaot from dirty fasin. Or maet iu need for protectim olketa pikinini from dadi or mami wea spoelem them long saed bilong sex. Yes, man mas tingim planti samting bifor hem decide-im wanem for duim. But, sapos bihaen iu savvy long way wea marit partner bilong iu hem no faithful, and then iu duim sex moa withim partner bilong iu, there nao iu showim aot iu forgivim partner bilong iu and iu want for go ahed long marit. So olketa reason for divorce from olketa Scripture wea letem man for marit moa they no moa nao. No eniwan mas poke-nose and trae for talem iu wanem for decide-im, or tok againstim samting wea iu decide-im. Iu nao bae stap withim samting wea kamaot from wanem iu decide-im. “Each wan bae karem load bilong hemseleva.”—Galatians 6:5.

OLKETA REASON FOR SEPARATE

17. Sapos no eniwan long tufela duim fornication, wanem nao Bible hem say long saed bilong way for separate or divorce?

¹⁷ Waswe, samfela otherfela reason stap wea savvy mekem man separate or divorce nomata partner no duim fornication? Yes, but long olketa taem olsem, Kristian hem no free for fren withim narawan withim goal for marit moa. (Matthew 5:32) Bible, taem hem letem way for separate olsem, hem say dat wan wea lusim narawan mas “no marit moa or hem mas go back moa.” (1 Corinthians 7:11) Wanem nao samfela big samting wea kamap wea maet mekem hem moabeta for separate?

18, 19. Wanem nao samfela bigfela samting wea maet lead go for samwan for ting maet hem moabeta for separate long way wea fitim law or for divorce, nomata hem kanduit for marit moa?

¹⁸ Well, famili maet kamap barava poor bikos long barava lazy fasin and no gud way bilong hasband.d Maet hem gamble withim shilling bilong famili or iusim for baem drug or alcohol wea hem depend long them. Bible hem say: “Sapos eniwan no luk aftarem . . . famili bilong hem, hem lusim Kristian faith and hem moa worse winim man wea no garem eni faith.” (1 Timothy 5:8) Sapos man olsem no want for change-im olketa way bilong hem, and maet hem tekem tu shilling wea waef bilong hem work for kasem for baem samting wea hem wantim, waef savvy choose for protectim hemseleva and olketa pikinini bilong hem long way for separate wea fitim law.

¹⁹ Way for separate wea fitim law hem samting wea wanfela savvy duim tu sapos partner bilong hem raf tumas long hem, maet hem hitim hem evritaem go kasem taem health and maet laef tu stap long danger. And tu, sapos wanfela hem evritaem trae for force-im marit partner bilong hem for brekem olketa komand bilong God long samfela way, dat wan maet fit for separate from hem, diswan hem moa tru sapos spiritual laef bilong hem stap long danger. Datfela partner wea stap long danger maet decide hao for “obeyim God olsem ruler, winim man,” hem mas separate long way wea fitim law.—Acts 5:29.

20. (a) Taem wanfela famili hem brek daon, wanem nao olketa mature fren and elder savvy givim? Wanem nao they mas no givim? (b) Olketa wea marit mas no iusim olketa reason from Bible for separate and divorce olsem excuse for duim wanem?

²⁰ For evriwan wea partner bilong them barava spoelem them, no eniwan mas force-im dat wan wea no duim rong for separate or for stap withim partner bilong hem. Nomata olketa mature fren and olketa elder maet supportim and givim kaonsel from Bible, olketa hia kanduit for savvy long evri samting wea happen long hasband and waef. Jehovah nomoa savvy lukim datwan. Hem tru, Kristian waef no honorim marit arrangement bilong God sapos hem iusim olketa small excuse for finisim marit. But sapos bigfela danger hem stap, no eniwan mas tok againstim hem sapos hem choose for separate. Sem samting hem fitim wanfela Kristian hasband wea want for separate. “Iumi evriwan bae stand ap front long judgment chair bilong God.”—Romans 14:10.

HAO MARIT WEA BREK DAON KAMAP GUD MOA

21. Wanem experience nao show aot hao kaonsel bilong Bible abaotem marit hem really helpem man?

²¹ Threefela month bihaen Lucia, wea iumi story abaot bifor, hem separate from hasband bilong hem, hem meetim Olketa Witness Bilong Jehovah and start for studyim Bible withim olketa. “Mi sapraes tumas,” hem say, “hao Bible givim olketa gudfela ansa for problem bilong mi. Bihaen wanfela week nomoa wea mi study, mi stret awe want for go back and stap withim hasband bilong mi. Distaem, mi savvy Jehovah hem savvy hao for sevem olketa marit wea kasem trabel bikos olketa teaching bilong hem helpem olketa hasband and waef for ting hae long each other. Hem no tru, olsem samfela say, hao Olketa Witness Bilong Jehovah they divaedem olketa famili. For mi, samting wea different evribit nao happen.” Lucia learn for followim olketa Bible principle insaed laef bilong hem.

22.Wanem nao evri hasband and waef fit for trustim?

²² Samting wea happen long Lucia hem no niu samting. Marit should olsem wanfela blessing, no wanfela hevi. For kasem datwan, Jehovah provide-im nambawan kaonsel for marit wea winim eni other samting—Word bilong hem. Bible savvy mekem “man wea no garem savvy for kamap wise.” (Psalm 19:7-11) Hem sevem planti marit wea klosap brek daon and hem mekem planti otherfela wea garem bigfela problem for kamap moabeta. Letem evri hasband and waef garem full trust long kaonsel for marit wea Jehovah God hem givim. Hem really helpem man!

1, 2. (a) Wanem nao samfela change wea happen taem man kamap olo? (b) Hao nao olketa man bifor, wea love-im God, they satisfy taem olketa kamap olo?

PLANTI samting change taem iumi kamap olo. Body bilong iumi no strong moa. Taem iumi luk long mirror, iumi lukim laen long face start for kamap and hair start for change color—and fall daon tu. Iumi maet hard for rememberim samting. Olketa niufela way for fren kamap taem olketa pikinini marit, and tu taem olketa granpikinini they born. For samfela, way for retire from work for shilling hem mekem them garem different living.

² Hem tru for say, olketa year wea man kamap olo they hard. (Ecclesiastes 12:1-8) But, tingim olketa servant bilong God wea stap bifor. Nomata go-go olketa dae, they kasem wisdom and way for meanim samting, wea mekem olketa satisfy taem they kamap olo. (Genesis 25:8; 35:29; Job 12:12; 42:17) Hao nao olketa win for hapi, taem olketa go-go for olo? Hem from olketa live followim olketa principle wea iumi faendem distaem insaed long Bible.—Psalm 119:105; 2 Timothy 3:16, 17.

3. Wanem kaonsel nao Paul givim for olketa man and woman wea olo?

³ Insaed leta bilong hem for Titus, aposol Paul givim gudfela advice long olketa wea go-go for olo. Hem raet: “Letem olketa olo man no ova tumas long way bilong olketa, garem fasin for ting hevi, garem stretfela tingting, strong long faith, long love, and long way for stand strong. Long sem way tu, letem olketa olo woman show aot fasin wea holy, no tok spoelem nem bilong pipol, and tu no drinkim tumas wine, kamap teacher long olketa gudfela samting.” (Titus 2:2, 3) Sapos iu followim olketa toktok hia, diswan bae helpem iu for face-im olketa challenge wea kasem olketa wea kamap olo.

ACCEPTIM HAO PIKININI BILONG IU BAE LUK AFTAREM HEMSELEVA

4, 5. Hao nao feeling bilong planti dadi and mami taem olketa pikinini bilong them lusim hom, and hao nao samfela they change fitim diswan?

⁴ Taem man garem different work, hem need for change fitim datwan. Diswan hem barava tru taem olketa full-grown pikinini they marit and lusim hom! For planti dadi and mami, diswan hem firstfela samting wea mekem olketa luksavvy hao they start for olo nao. Nomata olketa hapi from pikinini bilong them full-grown nao, planti taem olketa dadi and mami worry sapos they duim best bilong them for readyim olketa pikinini for luk aftarem themseleva. And maet they misstim way for garem olketa pikinini long haos tu.

⁵ Olketa dadi and mami worry abaotem living bilong olketa pikinini bilong them bihaen taem they lusim hom tu. “Sapos mi herem nius from them, for mekem mi sure they stap gud—datwan bae mekem mi hapi,” wanfela mami hem say. Wanfela dadi say: “Taem dota bilong mifela lusim hom, hem hard tumas. Hem leavim wanfela empty ples insaed famili bikos mifela duim evri samting tugeta.” Hao nao olketa dadi and mami olsem savvy deal withim way wea olketa pikinini lusim them? Planti taem, hem long way for helpem otherfela pipol.

6. Wanem nao bae help for keepim stretfela way for fren insaed long famili?

⁶ Taem olketa pikinini marit, work bilong dadi and mami hem change. Genesis 2:24 hem say: “Man bae lusim dadi and mami bilong hem and hem mas stap withim waef bilong hem and they mas kamap wan body.” Way for luksavvy long olketa principle bilong God abaotem hedship and for followim order, bae helpem dadi and mami for garem stretfela tingting abaotem evri samting.—1 Corinthians 11:3; 14:33, 40.

7. Wanem gudfela tingting nao wanfela dadi hem garem taem olketa dota bilong hem marit and lusim hom?

⁷ Bihaen tufela dota bilong wanfela hasband and waef they marit and muv go long different ples, hasband and waef hia feel olsem wanfela samting hem lus from laef bilong them. Firstaem, hasband hem no really acceptim olketa son-in-law bilong hem. But taem hem ting raonem principle bilong hedship, hem luksavvy hao olketa hasband bilong olketa dota bilong hem nao garem work for luk aftarem famili bilong themseleva. So, taem olketa dota bilong hem askim hem for advice, hem askim olketa abaotem wanem nao tingting bilong hasband bilong them, and then hem trae for supportim datwan. Distaem olketa son-in-law bilong hem ting long hem olsem wanfela fren and hapi for herem kaonsel bilong hem.

8, 9. Hao nao samfela dadi and mami change taem full-grown pikinini bilong them savvy luk aftarem olketa seleva?

⁸ Waswe sapos tufela wea just marit duim samting wea, nomata hem no againstim Bible, datwan hem no samting wea dadi and mami tingim hem best way? “Mifela evritaem helpem them for lukluk long tingting bilong Jehovah,” wanfela hasband and waef wea garem olketa pikinini wea marit they say, “but sapos mifela no agree withim wanfela samting wea they decide-im, mifela acceptim and supportim and encouragim olketa.”

⁹ Long samfela kantri long Asia, samfela mami faendem hem hard tumas for acceptim way wea son bilong them savvy luk aftarem hemseleva. But, sapos they respectim Kristian order and hedship, they luksavvy hao diswan mekem olketa problem withim dota-in-law bilong them no big tumas. Wanfela Kristian woman faendem hao taem olketa son lusim hom, diswan hem “samting wea givim hem feeling for thankiu wea kamap moa big.” Hem hapi tumas for lukim way wea they fit for luk aftarem niufela famili bilong them. Diswan mekem hevi wea hem and hasband kasem long saed bilong body and mind, taem they kamap olo, hem no big tumas.

STRONGIM MOA MARIT BILONG IU

10, 11. Wanem kaonsel from Scripture nao bae helpem pipol for misstim olketa trap wea kamap taem man start for olo?

¹⁰ Pipol deal withim way wea they start for olo long different way. Samfela man wearim kaleko long different way for trae for luk young moa. Planti woman worry taem olketa stop for kasem sik bilong woman. Sorry tumas, samfela wea kasem 40 year and ova they mekem olketa partner bilong them feel jealous taem they play raon withim narafela young girl or young boy. But olketa olo man wea love-im God they “tingting stret,” bossim olketa no gud samting wea body wantim. (1 Peter 4:7) Olketa mature woman tu duim samting for keepim marit bilong them strong, from love wea they garem for hasband and way wea olketa want for mekem Jehovah hapi.

¹¹ Under long spirit bilong God, King Lemuel raetem praise abaotem “gudfela waef” wea givim reward long hasband withim “gudfela samting, and no badfela samting, long full laef bilong hem.” Kristian hasband bae no fail for ting hae long way wea waef trae hard for deal withim eni hardfela samting long saed bilong feeling wea hem kasem taem hem start for olo. Love bae muvim hem for ‘praisim hem.’—Proverbs 31:10, 12, 28.

12. Hao nao hasband and waef savvy kamap moa klos long each other taem tufela start for olo?

¹² Long olketa year wea iu busy for luk aftarem olketa pikinini, iu tufela no ting tumas long samting wea iu tufela seleva wantim, but long samting wea olketa pikinini needim. Bihaen they go, hem taem nao for strongim moa marit bilong iu tufela. “Taem olketa dota bilong mi lusim hom,” wanfela hasband hem say, “mi startim moa way for fren withim waef bilong mi.” Narafela hasband say: “Mifela care for health bilong each other and talem long each other hao mi tufela needim exercise.” For no mekem tufela feel lonely, hem and waef bilong hem showim aot fasin for welkamim otherfela member bilong kongregeson. Yes, for interest long otherfela pipol hem bringim olketa blessing. And tu, hem mekem Jehovah hapi.—Philippians 2:4; Hebrews 13:2, 16.

13. Hao nao way for talemaot feeling and for honest hem helpem hasband and waef taem tufela kamap olo?

¹³ No letem way for no story tugeta kamap midlwan long iu and partner bilong iu. Free for toktok tugeta. (Proverbs 17:27) “Mifela mekem way for meanim each other kamap moa big taem mi tufela care and tingim each other,” wanfela hasband hem say. Waef bilong hem agree and say: “Taem mifela kamap olo, mifela enjoyim way for drink tea tugeta, story tugeta, and work tugeta.” Way wea iu talemaot feeling and iu honest savvy help for strongim marit bilong iu, so hem fit for winim olketa samting wea Satan, man for spoelem marit, iusim for spoelem marit bilong iu.

HAPI LONG OLKETA GRANPIKININI BILONG IU

14. Wanem part nao granmami bilong Timothy garem long way wea hem grow ap olsem wanfela Kristian?

¹⁴ Olketa granpikinini they “crown” bilong olketa olo. (Proverbs 17:6) Way for kampani withim olketa granpikinini hem samting wea savvy givim hapi—savvy mekem man feel gud and strong. Bible story long gudfela way abaotem Lois, wanfela granmami wea, withim dota bilong hem Eunice, share-im olketa samting wea hem believim withim small granpikinini bilong hem, Timothy. Taem disfela pikinini hem grow ap, hem savvy hao mami and granmami bilong hem ting hae long truth bilong Bible.—2 Timothy 1:5; 3:14, 15.

15. Long saed bilong olketa granpikinini, wanem gudfela samting nao olketa grani savvy duim, but wanem nao they mas stap klia long hem?

¹⁵ So, diswan hem spesel way wea grandadi and granmami savvy garem gudfela share. Olketa grandadi and granmami, iu share-im finis savvy bilong iu abaotem olketa purpose bilong Jehovah withim olketa pikinini bilong iu. Distaem iu savvy duim sem samting tu withim narafela genereson! Planti young pikinini hapi tumas for herem olketa grani talem them olketa Bible story. Hem tru, iu no tek ova long responsibility bilong dadi for teachim olketa Bible truth long olketa pikinini bilong hem. (Deuteronomy 6:7) But, iu helpem hem long diswan. Letem iu prea olsem man wea raetem psalm: “Go kasem taem mi olo and garem gray hair, O God, no lusim mi, go kasem taem wea mi savvy tok abaotem hand bilong iu long genereson, long evriwan wea bae kam, abaotem strong bilong iu.”—Psalm 71:18; 78:5, 6.

16. Hao nao olketa grani savvy stap klia long way for mekem no gud feeling kamap insaed long famili bilong them?

¹⁶ Sorry tumas, samfela grani they ova tumas for mekem olketa small wan hapi and diswan mekem no gud feeling kamap midlwan long olketa and full-grown pikinini bilong them. But, way wea iu showim aot trufela kaenfela fasin maet mekem hem easy for olketa granpikinini bilong iu for story withim iu taem they no want for talem samting long dadi and mami bilong them. Samfela taem olketa young wan hope for olketa grani bilong them for saed withim them for againstim dadi and mami bilong them. Sapos olsem, wanem nao bae iu duim? Showim aot wisdom and encouragim olketa granpikinini bilong iu for no hold back for story withim dadi and mami bilong them. Iu savvy meanim hao diswan hem mekem Jehovah hapi. (Ephesians 6:1-3) Sapos need hem stap, iu savvy askim granpikinini bilong iu sapos hem wantim iu for talem dadi and mami bilong hem firstaem abaotem problem bilong hem. Tok stret withim olketa granpikinini bilong iu abaotem samting wea iu learnim insaed olketa year wea go past. Way wea iu honest and tok stret savvy helpem olketa.

CHANGE FITIM WAY WEA IU KAMAP OLO

17. Wanem samting wea man for raetem psalm hem decide-im nao olketa Kristian wea go-go for olo mas followim?

¹⁷ Taem iu kamap moa olo, bae iu faendem hao iu kanduit for duim evri samting wea iu savvy duim bifor or wea iu want for duim. Hao nao man savvy acceptim and deal withim way for kamap olo? Long mind bilong iu, maet iu ting iu 30 year old, but taem iu luk insaed mirror iu lukim different samting. No feel weak daon. Man wea raetem psalm askim Jehovah olsem: “No raosem mi taem mi kamap olo; taem paoa bilong mi hem weak daon, no lusim mi.” Decide strong for followim samting wea man for raetem psalm hem decide-im. Hem say: “Mi bae go ahed for wait. And mi bae givim bigfela praise moa long iu.”—Psalm 71:9, 14.

18. Hao nao mature Kristian savvy iusim gud taem wea hem retire?

¹⁸ Planti prepare firstaem for mekem praise bilong them for Jehovah kamap moa big bihaen they retire from work. “Mi planim firstaem samting wea bae mi duim taem dota bilong mifela finis skul,” wanfela dadi wea retire distaem hem say. “Mi decide for start long full-taem preaching ministry, and mi sellim bisnis mekem mi free for servim Jehovah long bigfela way moa. Mi prea for God helpem mi.” Sapos iu klosap for retire, kasem comfort from disfela toktok bilong Nambawan Creator: “Taem man kamap olo mi nao sem Wan; and mi bae lukaotem man wea garem gray hair.”—Isaiah 46:4.

19. Wanem kaonsel nao stap for olketa wea go-go for olo?

¹⁹ For change-im living taem man retire from work for shilling maet hem no easy. Aposol Paul givim kaonsel long olketa olo man for “no ova tumas long way bilong olketa.” Diswan meanim man mas bossim seleva, no followim feeling for want for garem easy living. Maet bigfela need moa hem stap for garem schedule and way for disciplinim seleva taem iu retire winim bifor. So, go ahed for busy, “garem planti samting for duim insaed long work bilong Lord, from iufela savvy iufela no hard work nating insaed long Lord.” (1 Corinthians 15:58) Duim moa samting for helpem otherfela pipol. (2 Corinthians 6:13) Planti Kristian duim diswan taem they strong for preachim gud nius long way wea fitim them. Taem iu kamap olo, go ahed for “garem gudfela faith, long love, and way for stand strong.”—Titus 2:2.

DEAL WITHIM TAEM WEA PARTNER BILONG IU HEM DAE

20, 21. (a) Long disfela system, wanem nao savvy separate-im hasband and waef? (b) Hao nao Anna showim aot gudfela example for olketa wea partner bilong them dae?

²⁰ Samting wea mekem man sorry but hem trufela samting wea happen insaed long disfela system, hem way wea dae hem separate-im hasband and waef. Olketa Kristian wea partner bilong them dae they savvy olketa hia wea they love-im they sleep distaem, and olketa savvy they bae lukim them moa. (John 11:11, 25) But way for lusim samwan, hem samting wea mekem man sorry tumas. Hao nao dat wan wea laef savvy deal withim?a

²¹ For tingim samting wea samwan long Bible hem duim bae helpem iu. Anna hem kamap wanfela widow woman bihaen hem marit for sevenfela year nomoa, and hem 84 year old taem Bible story abaotem hem. Iumi sure hao hem feel sorry taem hem lusim hasband bilong hem. Hao nao hem deal withim datwan? Hem duim holy service for Jehovah God long temple long naet and day. (Luke 2:36-38) Laef bilong hem for duim service hem samting wea barava helpem hem for deal withim sorry and way for feel lonely taem hem kamap widow.

22. Hao nao samfela widow woman and widow man deal withim way for feel lonely?

²² “Barava bigfela challenge for mi hem for no garem partner for story withim,” hem nao samting wea wanfela 72-year-old woman talem taem hasband bilong hem dae tenfela year go finis. “Hasband bilong mi hem man wea savvy listen gud tumas. Mifela savvy story abaotem kongregeson and way wea mifela share insaed long Kristian ministry.” Narafela widow woman say: “Nomata taem hem help for aotem sorry, mi faendem hem moa stret for say samting wea man duim withim taem nao really helpem hem. Iu garem taem for really helpem otherfela pipol.” Wanfela 67-year-old widow man hem agree, and say: “Wanfela gudfela way for deal withim sorry hem for givim iuseleva for comfortim otherfela pipol.”

GOD TING HAE LONG OLKETA OLO

23, 24. Wanem bigfela comfort nao Bible givim for olketa wea olo, diswan hem moa tru for olketa wea lusim partner bilong them?

²³ Nomata dae hem tekem awe partner wea iu love-im, Jehovah hem stap faithful, and no lusim iu. “Wanfela samting nao mi askim from Jehovah,” King David hem sing olsem taem hem olo, “hem nao samting wea mi bae lukaotem, for mi stap insaed long haos bilong Jehovah for full laef bilong mi, for lukim olketa nicefela samting bilong Jehovah and for ting hae long temple bilong hem.”—Psalm 27:4.

²⁴ “Givim honor long olketa widow woman wea they barava widow,” aposol Paul hem say. (1 Timothy 5:3) Kaonsel wea hem givim bihaen disfela toktok showim aot olketa widow woman wea no garem eni klos relative maet garem need for kongregeson supportim olketa long material way. Nomata olsem, meaning bilong toktok for “givim honor” hem meanim tu for ting hae long olketa. Olketa widow woman and widow man wea love-im God kasem comfort taem olketa savvy Jehovah ting hae long olketa and bae luk aftarem olketa!—James 1:27.

25. Wanem goal nao still stap for olketa olo?

²⁵ “Samting for kasem praise bilong olketa olo man hem way wea olketa garem gray hair,” Word bilong God hem say. Hem crown wea luk “nice tumas long man wea garem raeteous fasin.” (Proverbs 16:31; 20:29) So, go ahed strong, nomata iu marit or single moa, for mekem service bilong Jehovah olsem first samting long laef bilong iu. Iu bae garem gud nem withim God distaem and hope for laef olawe insaed world wea pain wea olketa olo kasem bae finis.—Psalm 37:3-5; Isaiah 65:20.

1. Wanem kaon nao iumi garem long dadi and mami bilong iumi, so hao nao iumi mas feel, and wanem nao iumi mas duim long them?

“LISTEN long dadi bilong iu wea mekem iu kamap, and no ting daonem mami bilong iu from hem olo distaem,” hem kaonsel bilong wanfela wise man wea stap bifor. (Proverbs 23:22) ‘Mi no savvy duim datwan!’ iu maet say. Winim way for ting daonem mami—or dadi—planti long iumi garem bigfela love for olketa. Iumi luksavvy hao iumi garem bigfela kaon long tufela. First samting, dadi and mami bilong iumi nao givim iumi laef. Hem tru hao Jehovah hem Man wea Givim laef, but sapos dadi and mami no stap, iumi kanduit for laef tu. No eni samting wea iumi fit for givim long dadi and mami bilong iumi hem garem hae price olsem laef. Then, tingim way for sakrifaesim seleva, for luk aftarem, shilling, and loving care wea insaed long way for helpem pikinini taem hem baby go kasem taem hem full grown. Dastawe, Word bilong God givim disfela stretfela kaonsel: “Honorim dadi and mami bilong iufela . . . mekem iufela no kasem trabel and stap longtaem long disfela earth”!—Ephesians 6:2, 3.

LUKSAVVY LONG NEED LONG SAED BILONG FEELING

2. Hao nao olketa full-grown pikinini savvy “peim back samting wea they kasem” from dadi and mami bilong them?

² Aposol Paul raet olsem long olketa Kristian: “Letem [olketa pikinini or granpikinini] nao learnim fasin for love-im God firstaem insaed long famili bilong themseleva and for peim back samting wea they kasem from dadi and mami and grandadi and granmami, from diswan hem samting wea God hapi long hem.” (1 Timothy 5:4) Olketa full-grown pikinini “peim back samting wea they kasem” taem they showim aot they ting hae long olketa year wea dadi and mami and grandadi and granmami showim aot love, work, and care for olketa. Wanfela way wea olketa pikinini savvy duim diswan hem for luksavvy hao olsem evri otherfela man, olketa olo needim love and way for comfortim them—planti taem they barava needim diswan. Olsem iumi evriwan, olketa need for savvy hao samwan ting hae long olketa. Olketa need for feelim hao laef bilong olketa garem meaning.

3. Hao nao iumi savvy honorim dadi, mami, grandadi and granmami?

³ So iumi savvy honorim dadi, mami, grandadi and granmami taem iumi talem them iumi love-im them. (1 Corinthians 16:14) Sapos dadi and mami no stap withim iumi, iumi mas remember hao way for story withim them hem samting they barava ting hae long hem. For raetem gudfela leta, ringim olketa long telephone, or visitim them bae mekem olketa barava hapi. Miyo, wea stap long Japan, raet olsem taem hem 82 year: “Dota bilong mi [wea hasband bilong hem wanfela traveling minister] hem say olsem long mi: ‘Mami, please iu “go-go” withim mifela.’ Hem sendem kam nem bilong kongregeson and telephone namba for each week. Mi savvy openem map and say: ‘Yes. Olketa long hia nao distaem!’ Mi say thankiu evritaem long Jehovah for blessing wea mi garem from pikinini hia.”

HELP LONG MATERIAL WAY

4. Hao nao kastom bilong Jew religion encouragim way for no garem feeling for olketa dadi and mami wea olo?

⁴ Waswe, way for honorim dadi and mami meanim tu for help long material way? Yes. Planti taem hem meanim diswan tu. Long taem bilong Jesus, olketa bigman bilong Jew religion keepim kastom wea say sapos wanfela man talemaot hao shilling or land bilong hem, hem “wanfela present wea [hem] dedicate-im long God,” hem free from responsibility for iusim samting hia for luk aftarem dadi and mami bilong hem. (Matthew 15:3-6) They nating garem feeling for sorry! Yes, olketa bigman bilong religion long datfela taem encouragim pipol for no honorim dadi and mami but for showim aot no gud fasin and selfish for no givim samting wea olketa needim. Iumi nating want for olsem!—Deuteronomy 27:16.

5. Nomata gavman bilong samfela kantri provide-im samfela samting, why nao way for honorim dadi and mami hem samfela taem meanim for givim help long saed bilong shilling?

⁵ Long planti kantri distaem, gavman garem olketa program wea provide-im samfela samting wea olketa olo needim long material way, olsem kaikai, kaleko, and haos. For join withim datwan, olketa olo seleva maet bifor keepim samfela shilling for helpem them taem they olo. But sapos olketa samting hia finis or no inaf, olketa pikinini honorim dadi and mami taem they duim samting wea they fit for duim for helpem olketa. Yes, for luk aftarem dadi and mami wea olo show aot man garem fasin for love-im God, wea meanim, hem worshipim Jehovah God, dat Wan Wea Startim famili arrangement.

LOVE AND WAY FOR SAKRIFAESIM SELEVA

6. Wanem nao samfela samting wea samfela duim for luk aftarem dadi and mami bilong them?

⁶ Planti full-grown pikinini duim samting for helpem dadi and mami bilong them wea kamap sik withim love and way for sakrifaesim seleva. Samfela they tekem dadi and mami bilong them for stap withim them or they muv go for stap klosap long olketa. Samfela they go and stap withim dadi and mami bilong olketa. Planti taem, olketa samting hia kamap olsem blessing for olketa dadi and mami and olketa pikinini.

7. Why nao hem no gud for duim samting kwiktaem long taem wea iu decide-im samting for dadi and mami wea olo?

⁷ But, samfela taem, olketa no kasem gudfela samting taem they duim olsem. Why? Maet bikos they kwiktaem tumas for decide-im samting or samting wea they decide-im hem from feeling nomoa. “Man wea wise hem tingting firstaem long samting wea hem bae duim,” Bible hem givim disfela warning. (Proverbs 14:15) For example, sapos mami bilong iu wea olo hem faendem hard for stap seleva and iu ting say iu savvy helpem hem sapos hem kam stap withim iu. Taem iu tingting firstaem long samting wea iu bae duim, maet iu savvy tingim olketa samting hia: Wanem nao hem really needim? Waswe, hem savvy kasem help from gavman? Waswe, hem want for muv? Sapos hem wantim, wanem nao olketa way wea diswan bae affectim living bilong hem? Waswe, bae hem lusim olketa fren bilong hem? Hao nao diswan maet affectim feeling bilong hem? Waswe, iu story abaotem olketa samting hia withim hem? Hao nao diswan bae affectim iu, partner bilong iu, and olketa pikinini bilong iu? Sapos mami bilong iu needim samwan for luk aftarem hem, hu nao bae duim? Waswe, iu savvy share-im disfela responsibility? Waswe, iu story abaotem diswan withim otherfela famili member?

8. Hu nao iu savvy askim taem iu decide long way for helpem dadi and mami wea olo?

⁸ From responsibility for luk aftarem olketa olo hem bilong evri pikinini insaed long famili, maet hem wise for havem wanfela famili meeting mekem evriwan savvy share for decide-im samting. For story withim olketa elder insaed long Kristian kongregeson or long samfela fren wea kasem sem samting savvy help tu. “Olketa plan savvy kamap no gud taem pipol no story tugeta,” Bible say, “but taem planti they story tugeta, bae they kasem gudfela samting.”—Proverbs 15:22.

SHOWIM AOT FEELING AND WAY FOR MEANIM OLKETA

9, 10. (a) Nomata olketa kamap moa olo, wanem nao iumi mas tingim taem iumi deal withim olketa olo? (b) Long eni samting wea wanfela full-grown pikinini duim for dadi and mami bilong hem, wanem nao hem mas evritaem givim long olketa?

⁹ For honorim dadi and mami wea olo, iumi need for showim aot feeling and way for meanim olketa. Taem olketa kamap moa olo, olketa maet faendem hem moa hard for wakabaot, kaikai, and rememberim samting. Maet they needim help. Planti taem olketa pikinini savvy worry tumas long dadi and mami and trae for givim them advice. But olketa olo they full-grown man wea garem planti wisdom and savvy, wea for full laef bilong them they luk aftarem themseleva and decide-im samting seleva. Living bilong olketa and way for respectim seleva maet garem faondeson long way wea they garem paoa olsem dadi and mami wea full grown. Sapos they feel olsem, maet they bae feel sorry or kros taem they mas letem olketa pikinini for bossim living bilong them. Samfela they againstim and faetem samting wea they ting say hem stopem way wea they independent.

¹⁰ No eni easy ansa hem stap for olketa problem hia, but way for letem dadi and mami wea olo for luk aftarem seleva and decide-im samting seleva sapos hem fitim, hem kaenfela fasin. Hem wise for no decide-im samting wea gud for dadi and mami sapos iu no story withim olketa firstaem. Maet they lusim planti samting from they olo. No tekem awe samting sapos iu no need for duim. Maet iu faendem hao taem iu no bossim tumas living bilong dadi and mami, way wea iu fren withim olketa bae moabeta. They bae moa hapi, and iu tu bae hapi. Nomata sapos iu need for strong long samfela samting wea bae helpem them, way for honorim dadi and mami meanim iu mas showim them respect wea they fit for kasem. Word bilong God givim kaonsel hia: “Iu mas stand ap front long man wea garem gray hair, and iu mas kaen long olo man.”—Leviticus 19:32.

KEEPIM STRETFELA TINGTING

11-13. Sapos wanfela full-grown man hem no fren gud withim dadi and mami bilong hem taem hem pikinini, hao nao hem savvy deal withim challenge for luk aftarem them taem they olo?

¹¹ Samfela taem, wanfela problem wea olketa full-grown pikinini face-im taem they honorim dadi and mami wea olo, hem join withim way wea they fren withim dadi and mami bilong them bifor. Maet dadi bilong iu no showim aot feeling and love, mami bilong iu hem laek boss tumas and raf. Maet iu still feel no gud, kros, or feel pain bikos they garem fasin wea iu ting dadi and mami no fit for garem. Waswe, iu savvy winim olketa feeling olsem?a

¹² Basse, wea grow ap long Finland, hem say: “Stepdadi bilong mi hem wanfela SS officer long Nazi Germany. Hem savvy kros kwiktaem, and then hem savvy duim no gud samting. Hem hitim mami bilong mi planti taem front long eye bilong mi. Wanfela taem wea hem kros long mi, hem swingim belt bilong hem and datfela belt hitim face bilong mi. Hem barava hitim mi strong and mi fall daon on top long bed.”

¹³ Nomata olsem, hem garem otherfela fasin tu. Basse say moa: “Long narafela saed, hem barava work hard and hem duim evri samting wea hem fit for duim for luk aftarem famili long material way. Hem nating showim aot love long mi olsem dadi, but mi savvy hem garekil long saed bilong feeling. Mami bilong hem raosem hem aot from haos taem hem young boy nomoa. Hem faet evritaem taem hem grow ap and hem go long war taem hem youngfela man. Mi savvy meanim fasin bilong hem lelebet and mi no blame-im hem. Taem dadi bilong mi kasem sik, mi want for helpem hem go kasem taem hem dae. Hem no easy, but mi duim samting wea mi fit for duim. Go kasem taem hem dae mi trae for go ahed olsem gudfela son and mi ting hem acceptim mi olsem.”

14. Wanem scripture nao fitim evri samting wea kamap, wea insaed diswan tu hem way for luk aftarem dadi and mami wea olo?

¹⁴ Long saed bilong famili, olsem long otherfela samting, kaonsel bilong Bible hem still fitim: “Havem olsem kaleko long iufela seleva fasin for feel sorry and care, kaenfela fasin, humble long mind, kwaet fasin, and long-suffering. Go ahed for show aot patient fasin long each other and forgivim each other sapos eniwan garem samting for complain abaot. Olsem Jehovah forgivim iufela, iufela mas duim olsem tu.”—Colossians 3:12, 13.

OLKETA WEA LUK AFTAREM OLO NEEDIM CARE TU

15. Why nao way for luk aftarem dadi and mami hem mekem man sorry tumas samfela taem?

¹⁵ Hem hard work for luk aftarem wanfela olo, planti different work, bigfela responsibility, and bigfela taem they insaed diswan. But planti taem barava hardfela samting hem long saed bilong feeling. Hem mekem man feel sorry tumas for lukim dadi and mami lusim gudfela health, tingting, and way for independent. Sandy, wea kam from Puerto Rico, hem say: “Mami nao main wan insaed famili bilong mifela. Mi feel no gud tumas taem mi lukim hem suffer. Firstaem, hem wakabaot no gud; then hem needim wanfela walking stik, then hem needim tufela stik, then wheelchair. Bihaen, hem kamap moa worse go kasem taem hem dae. Hem garem cancer long bone and needim samwan for luk aftarem hem evritaem—day and naet. Mifela swimim hem, feedim hem and read for hem. Hem barava hard—diswan moa tru long saed bilong feeling. Taem mi luksavvy mami bilong mi bae dae, mi krae bikos mi love-im hem tumas.”

16, 17. Wanem advice nao savvy helpem dat wan wea luk aftarem olketa olo for garem balance tingting long evri samting?

¹⁶ Sapos iuseleva kasem sem samting, wanem nao iu savvy duim for deal withim? Sapos iu listen long Jehovah long way for readim Bible and story withim hem thru long prea, diswan bae barava helpem iu. (Philippians 4:6, 7) Hem gud for mek sure iu kaikai gud and trae for sleep gud. Sapos iu duim diswan, bae iu fit, long saed bilong feeling and body, for luk aftarem dat wan wea iu love-im. Maet iu savvy arrange for havem lelebet spel from samting wea iu duim evriday. Nomata sapos hem hard for iu go holiday, hem wisefela samting for markem taem for relax. For garem samfela taem awe, maet iu savvy arrangim for samwan for stap withim dadi or mami wea sik.

¹⁷ Planti taem olketa wea luk aftarem olketa olo ting say they mas duim samting wea hem hard tumas. But no feel guilty from iu kanduit for duim samfela samting. Samfela taem, maet iu need for putim dat wan wea iu love-im insaed long hospital. Sapos iu wanfela wea luk aftarem olo, markem olketa gudfela goal for iuseleva. Iu mas balance-im samting wea dadi and mami bilong iu needim and tu bilong olketa pikinini bilong iu, partner bilong iu, and iuseleva.

STRONGFELA PAOA BILONG GOD

18, 19. Wanem promis for givim support nao Jehovah talem finis, and wanem experience nao show aot hem fulfillim datfela promis?

¹⁸ Thru long Word bilong hem, Bible, long loving way Jehovah provide-im kaonsel wea savvy barava helpem man for luk aftarem dadi and mami wea olo, but datwan hem no only help wea hem givim. “Jehovah hem stap klosap long olketa wea kolem hem,” hem nao samting wea man for raetem psalm hem talem. “Singaot bilong olketa for help bae hem herem, and bae hem sevem olketa.” Jehovah bae sevem, or keepim, olketa faithful wan bilong hem long olketa barava hardfela samting.—Psalm 145:18, 19.

¹⁹ Myrna, wea stap long Philippines, learnim diswan taem hem luk aftarem mami bilong hem, wea no savvy duim eni samting bikos hem kasem stroke. “No eni samting savvy mekem iu barava sorry olsem taem iu lukim wanfela wea iu love-im hem suffer, and hem no savvy talem iu ples wea hem feel pain,” hem nao samting wea Myrna raetem. “Hem olsem iu lukim hem easyeasy for draon, and iu no savvy duim eni samting for helpem hem. Planti taem mi nildaon and story long Jehovah abaotem hao mi feel tired tumas. Mi krae big olsem David, wea barava askim Jehovah for putim olketa tear bilong hem insaed wanfela botol and for rememberim hem. [Psalm 56:8] And olsem Jehovah promisim finis, hem givim mi strong wea mi needim. ‘Jehovah kamap olsem man wea supportim mi.’”—Psalm 18:18.

20. Wanem nao olketa promis long Bible wea helpem olketa wea luk aftarem olketa olo for garem gudfela tingting, nomata sapos dat wan wea they luk aftarem hem dae?

²⁰ Pipol say way for luk aftarem dadi and mami wea olo hem olsem wanfela “story wea no garem hapi end.” Nomata iumi luk aftarem olketa long best way, olketa olo savvy dae, olsem mami bilong Myrna. But olketa wea trust long Jehovah they savvy, dae hem no end bilong diswan. Aposol Paul hem say: “Mi garem hope long God . . . hao wanfela resurrection bae kamap for olketa wea raeteous and olketa wea no raeteous.” (Acts 24:15) Olketa wea lusim finis dadi and mami wea olo they kasem comfort from resurrection hope wea join withim promis bilong nambawan niu world bilong God wea “dae bae no moa.”—Revelation 21:4.

21. Wanem gudfela samting nao kamaot from way for honorim dadi and mami wea olo?

²¹ Olketa servant bilong God ting hae tumas long dadi and mami bilong olketa, nomata they kamap olo. (Proverbs 23:22-24) They honorim them. Taem they duim olsem, they kasem samting wea proverb hem talem: “Dadi and mami bilong iu bae hapi, and woman wea bornim iu bae hapi.” (Proverbs 23:25) And winim evri samting, olketa wea honorim dadi and mami bilong them wea olo they honorim and mekem Jehovah God hapi.

1. Wanem nao purpose bilong Jehovah for famili arrangement?

TAEM Jehovah joinim Adam and Eve long marit, Adam talemaot hapi bilong hem long firstfela toktok bilong Hebrew poetry. (Genesis 2:22, 23) But, Creator tingim moa samting for olketa pikinini bilong hem long earth winim way for mekem them hapi nomoa. Hem wantim hasband and waef and olketa famili for duim will bilong hem. Hem talem firstfela man and woman: “Garem pikinini and kamap planti and fulimap earth and luk aftarem, and olketa fish bilong sea and olketa bird bilong heven and evri living samting wea muv long graon mas stap under long iufela.” (Genesis 1:28) Datwan hem nambawan assignment! Sapos they and olketa pikinini wea they bae garem obeyim evribit will bilong Jehovah, bae Adam and Eve hapi tumas!

2, 3. Hao nao olketa famili savvy faendem bigfela hapi distaem?

² Distaem tu, olketa famili they moa hapi taem they work tugeta for duim will bilong God. Aposol Paul raet olsem: “Way for love-im God hem helpem iu long evri samting, from hem garem promis bilong laef distaem and datwan wea bae kam bihaen.” (1 Timothy 4:8) Famili wea followim way for love-im God and followim kaonsel bilong God insaed long Bible bae faendem hapi long “laef distaem.” (Psalm 1:1-3; 119:105; 2 Timothy 3:16) Nomata sapos wanfela member long famili nomoa followim olketa Bible principle, living hem moabeta winim way wea no eniwan followim.

³ Disfela buk hem story finis abaotem planti Bible principle wea help for mekem famili hapi. Maet iu luksavvy finis hao samfela principle hia kamap planti taem insaed disfela buk. Why nao olsem? Bikos they show aot olketa strongfela truth wea givim gudfela samting for helpem evri different part bilong famili laef. Famili wea trae hard for followim olketa Bible principle hia bae faendem hao way for love-im God hem really ‘garem promis for laef distaem.’ Letem iumi story moa abaotem fofela long olketa important principle hia.

GUDFELA SAMTING BILONG FASIN FOR BOSSIM SELEVA

4. Why nao fasin for bossim seleva hem important insaed long marit?

⁴ King Solomon hem say: “Olsem wanfela taon wea olketa brekem for go insaed, wea no garem wall, hem olsem man wea no holem back spirit bilong hem.” (Proverbs 25:28; 29:11) Fasin for “holem back spirit,” for bossim seleva, hem important for olketa wea wantim hapi marit. For letem olketa rongfela feeling olsem way for barava kros or feeling for wantim dirty fasin for winim iumi, bae bringim no gud samting wea tek longtaem tumas for stretem—maet hem hard for stretem.

5. Hao nao olketa man wea no perfect savvy mekem grow fasin for bossim seleva, and wanem gud samting nao bae olketa kasem?

⁵ Hem tru, no eniwan wea kam from Adam savvy bossim evribit body bilong hem wea no perfect. (Romans 7:21, 22) Nomata olsem, fasin for bossim seleva hem wanfela fruit bilong spirit. (Galatians 5:22, 23) Spirit bilong God bae mekem fasin for bossim seleva kamap sapos iumi prea for garem disfela fasin, sapos iumi followim kaonsel abaotem diswan wea stap insaed Bible, and sapos iumi kampani withim olketa wea showim aot fasin hia and stap klia from olketa wea no showim aot. (Psalm 119:100, 101, 130; Proverbs 13:20; 1 Peter 4:7) Way olsem bae helpem iumi for “ranawe from fornication,” nomata sapos iumi kasem test. (1 Corinthians 6:18) Iumi bae rejectim raf fasin and bae stap klia or winim fasin for drink olawe. And iumi bae deal long kwaet way withim eni samting wea spoelem iumi and olketa hardfela samting. Letem evriwan—and olketa pikinini tu—learn for mekem grow disfela important fruit bilong spirit.—Psalm 119:1, 2.

STRETFELA TINGTING ABAOTEM HEDSHIP

6. (a) Wanem nao arrangement wea kam from God abaotem hedship? (b) Wanem nao man mas rememberim sapos hem wantim hedship bilong hem for bringim hapi long famili bilong hem?

⁶ Mek-tu important principle hem way for luksavvy long hedship. Paul story abaotem stretfela order taem hem say: “Mi wantim iufela for savvy hed bilong evri man hem Kraest; hed bilong woman hem man; and hed bilong Kraest hem God.” (1 Corinthians 11:3) Diswan meanim man nao lead insaed long famili, waef bilong hem mas faithful for supportim hem, and olketa pikinini mas obeyim dadi and mami bilong them. (Ephesians 5:22-25, 28-33; 6:1-4) But, lukim hao hedship hem lead go long hapi only sapos they followim diswan long stretfela way. Olketa hasband wea love-im God they savvy hedship hem no meanim way for decide-im evri samting. Olketa followim Jesus, wea hem Hed bilong olketa. Nomata Jesus hem “hed ovarem evri samting,” hem “kam, no for olketa work for hem, but for hem nao work.” (Ephesians 1:22; Matthew 20:28) Long sem way tu, Kristian man hem showim aot hedship, no for kasem gud samting for hemseleva, but for luk aftarem waef and olketa pikinini bilong hem.—1 Corinthians 13:4, 5.

7. Wanem nao olketa Bible principle wea bae helpem waef for fulfillim work wea God markem for hem insaed long famili?

⁷ Waef wea love-im God hem no trae for winim or trae for bossim hasband bilong hem. Hem hapi for supportim and work tugeta withim hasband bilong hem. Samfela taem Bible story abaotem waef olsem wanfela wea hasband “ownim,” wea barava show aot klia hao hem hed bilong waef. (Genesis 20:3) Thru long marit, hem kam under long “law bilong hasband bilong hem.” (Romans 7:2) Long semtaem, Bible kolem hem wanfela for “helpem” and “balance-im” man. (Genesis 2:20) Hem garem olketa fasin and savvy wea hasband short long hem, and givim support wea hem needim. (Proverbs 31:10-31) Bible say tu hao waef hem wanfela “partner,” wanfela wea work tugeta withim partner bilong hem. (Malachi 2:14) Olketa Bible principle hia helpem hasband and waef for meanim position bilong each other and for showim aot proper respect and honor long each other.

“KWIKTAEM FOR LISTEN”

8, 9. Meanim samfela principle wea bae helpem evriwan insaed long famili for kamap moabeta long way for story tugeta.

⁸ Disfela buk hem mek hae planti taem long need for story tugeta. Why nao olsem? Bikos hem moa easy for stretem olketa problem taem pipol story withim and really listen long each other. Planti taem disfela buk strongim hao way for story tugeta hem meanim tufela evriwan nao mas toktok tugeta. Disaepol James say olsem abaotem diswan: “Evri man mas kwiktaem for listen, slow for toktok.”—James 1:19.

⁹ Hem important tu for careful long hao iumi toktok. Way for talem toktok and no ting firstaem, raf, laek for raoa, or tok daonem narawan hem no mekem gudfela way for story kamap. (Proverbs 15:1; 21:9; 29:11, 20) Nomata samting wea iumi talem hem stret, sapos iumi talem long way wea raf, praod, and no tingim feeling bilong narawan, bae diswan spoelem hem and no helpem hem. Toktok bilong iumi mas gud, “olsem withim salt.” (Colossians 4:6) Olketa toktok bilong iumi mas olsem “olketa gold apple wea stap long wanfela silver carving.” (Proverbs 25:11) Olketa famili wea learn for story gud tugeta they duim important samting for kasem hapi.

IMPORTANT WORK BILONG LOVE

10. Wanem kaen love nao hem important insaed long marit?

¹⁰ Datfela word “love” kamap planti taem insaed disfela buk. Waswe, iu rememberim wanem kaen love nao datwan? Hem tru, love midlwan long man and woman (Greek, eʹros) hem important part insaed long marit, and long olketa marit wea stap gud, deep feeling and way for fren (Greek, phi·liʹa) savvy grow midlwan long hasband and waef. But datwan wea moa important hem love wea Greek word a·gaʹpe hem meanim. Iumi mekem grow diskaen love for Jehovah, for Jesus, and for neibor bilong iumi. (Matthew 22:37-39) Hem nao love wea Jehovah showim aot for olketa man. (John 3:16) Hem gud tumas for showim aot semkaen love long marit partner and olketa pikinini!—1 John 4:19.

11. Hao nao love hem mekem marit go ahed gud?

¹¹ Insaed long marit, disfela nambawan love hem barava “perfect way for garem wan mind.” (Colossians 3:14) Hem joinim hasband and waef and mekem tufela want for duim samting wea hem best for each other and for olketa pikinini bilong them. Taem olketa famili face-im hardfela samting, love bae helpem them for deal withim olketa samting long wan mind. Taem hasband and waef start for kamap olo, love helpem them for supportim and go ahed for ting hae long each other. “Love . . . no lukaotem samting bilong hemseleva nomoa. . . . Hem kavarem evri samting, believim evri samting, hope long evri samting, hem stand strong long evri samting. Love hem nating savvy fail.”—1 Corinthians 13:4-8.

12. Why nao love for God wea hasband and waef garem hem strongim marit bilong tufela?

¹² Marit hem kamap barava strong taem hasband and waef no just garem love midlwan long tufela, but taem they garem love for Jehovah. (Ecclesiastes 4:9-12) Why nao olsem? Aposol John hem raet olsem: “Diswan nao meaning bilong love bilong God, for iumi obeyim evri komandment bilong hem.” (1 John 5:3) So, hasband and waef mas trainim olketa pikinini bilong them for love-im God no from they barava love-im olketa pikinini nomoa but bikos hem komand bilong Jehovah. (Deuteronomy 6:6, 7) They mas stap klia long dirty fasin no from they love-im each other nomoa but main samting hem from they love-im Jehovah, wea “bae judge-im olketa wea duim fornication and adultery.” (Hebrews 13:4) Nomata sapos wanfela partner mekem bigfela problem kamap insaed long marit, love for Jehovah bae muvim narawan for go ahed for followim olketa Bible principle. Yes, hapi nao olketa famili wea love for each other hem kamap barava strong from they garem love for Jehovah!

FAMILI WEA DUIM WILL BILONG GOD

13. Hao nao way wea man decide strong for duim will bilong God helpem hem for tingting olawe long olketa samting wea really important?

¹³ Main samting long living bilong wanfela Kristian hem for duim will bilong God. (Psalm 143:10) Diswan nao really meaning bilong way for love-im God. Way for duim will bilong God bae helpem olketa famili for ting long olketa samting wea really important. (Philippians 1:9, 10) For example, Jesus givim disfela warning: “Mi kam for divaedem pipol, for mekem man againstim dadi bilong hem, and girl againstim mami bilong hem, and youngfela waef againstim mami-in-law bilong hem. Tru nao, enemy bilong man bae kamaot from famili bilong hem.” (Matthew 10:35, 36) For fitim warning bilong Jesus, planti follower bilong hem they kasem persecution from olketa famili member bilong them. Diswan hem mekem man feel sorry tumas! Nomata olsem, iumi mas no letem love bilong iumi for famili winim way wea iumi love-im Jehovah and Jesus Kraest. (Matthew 10:37-39) Sapos wanfela hem stand strong nomata famili againstim hem, olketa wea againstim hem maet change taem they lukim olketa gudfela samting wea kamaot from way wea hem love-im God. (1 Corinthians 7:12-16; 1 Peter 3:1, 2) Nomata sapos datwan hem no happen, man bae no kasem eni gud samting sapos hem stop for servim God bikos pipol againstim hem.

14. Hao nao way for want for duim will bilong God helpem dadi and mami for duim best samting for olketa pikinini bilong them?

¹⁴ For duim will bilong God hem helpem dadi and mami for decide-im samting long stretfela way. For example, long samfela ples, dadi and mami ting long olketa pikinini olsem samting for kasem shilling, and they depend long olketa pikinini for luk aftarem them taem they olo. Nomata hem stret for olketa full-grown pikinini for luk aftarem dadi and mami wea olo, tingting olsem mas no mekem dadi and mami leadim olketa pikinini for garem laef wea lukaotem material samting. Dadi and mami no helpem pikinini sapos they teachim them for ting hae long olketa material samting winim olketa spiritual samting.—1 Timothy 6:9.

15. Hao nao Eunice, mami bilong Timothy, hem showim aot nambawan example bilong mami wea duim will bilong God?

¹⁵ Nambawan example long diswan hem Eunice, mami bilong Timothy, youngfela fren bilong Paul. (2 Timothy 1:5) Nomata hem maritim man wea no believe, Eunice and Lois, granmami bilong Timothy, tufela teachim Timothy for love-im God. (2 Timothy 3:14, 15) Taem Timothy kamap big, Eunice letem hem for lusim hom and duim Kingdom-preaching work olsem wanfela missionary withim Paul. (Acts 16:1-5) Hem mas hapi tumas taem son bilong hem kamap wanfela nambawan missionary! Way wea hem love-im God taem hem full-grown man showim aot gudfela training wea hem kasem taem hem small. Tru nao, Eunice hem satisfy and hapi for herem olketa report abaotem faithful ministry bilong Timothy, nomata hem maet misstim hem long hom.—Philippians 2:19, 20.

FAMILI AND FUTURE BILONG IU

16. Olsem wanfela son, wanem stretfela way for tingim mami nao Jesus showim aot, but wanem nao main goal bilong hem?

¹⁶ Jesus hem big kam insaed wanfela famili wea love-im God and, taem hem full-grown man, hem showim aot stretfela way for wanfela son for tingim mami bilong hem. (Luke 2:51, 52; John 19:26) But, main goal bilong Jesus hem for fulfillim will bilong God, and for hem, diswan meanim tu for openem way for olketa man for enjoyim laef olawe. Hem duim diswan taem hem offerim perfect laef bilong hem olsem man for wanfela ransom for olketa man wea sin.—Mark 10:45; John 5:28, 29.

17. Wanem nao olketa nambawan hope wea faithful fasin bilong Jesus hem openem for olketa wea duim will bilong God?

¹⁷ Bihaen long dae bilong Jesus, Jehovah raisim hem for laef long heven and hem givim hem bigfela paoa, and go-go hem kamap King long Kingdom long heven. (Matthew 28:18; Romans 14:9; Revelation 11:15) Sakrifaes bilong Jesus mekem way for samfela kamap fit for rul withim hem insaed long datfela Kingdom. Hem openem tu way for otherfela man wea garem gudfela heart for enjoyim perfect laef long wanfela earth wea bae kamap paradaes moa. (Revelation 5:9, 10; 14:1, 4; 21:3-5; 22:1-4) Wanfela nambawan privilege wea iumi garem distaem hem for talemaot gud nius long olketa neibor bilong iumi.—Matthew 24:14.

18. Wanem samting nao olketa famili and man wanwan they kasem encouragement for duim?

¹⁸ Olsem aposol Paul showim aot, way for garem living wea showim aot love for God hem mekem pipol garem hope for kasem olketa blessing long laef “wea bae kamap bihaen.” Yes, diswan nao barava best way for kasem hapi! Remember, “world hem ready for finis and evri samting wea hem wantim tu, but man wea duim will bilong God bae stap olawe.” (1 John 2:17) So, nomata iu wanfela pikinini or dadi or mami, wanfela hasband or waef, or wanfela single person wea garem or wea no garem pikinini, trae hard for duim will bilong God. Nomata taem iu kasem hevi or face-im barava hardfela samting, no forget hao iu wanfela servant bilong living God. So, letem olketa samting wea iu duim givim hapi long Jehovah. (Proverbs 27:11) And letem fasin bilong iu givim iu hapi distaem and givim iu laef olawe insaed niu world wea bae kam!