Young Pipol Askem . . .
Hao Nao Bae Mi Stop for Wari?
“Wanfala samting wea young pipol warim tumas hem future. Iu warim iuseleva. Waswe, mi shud lusim haos? Go skul? Duim full-taem ministry? Marit? Staka samting stap wea iu savve chusim gogo hem mekem iu fraet.”—Shane, 20 year.
WASWE, iu savve wari tumas? Staka young pipol olsem, and from difren reason. Wanfala leta wea olketa pablisim for helpem parents hem sei: “Wanfala survey long olketa teenager midolwan 15 and 18 year, long 41 kantri, showaot wei for kasem gudfala waka for selen nao main wari midolwan olketa teenager distaem.” Next samting hem wei for warim health bilong parents. Fraet for lusim samwan olketa lovem long dae tu hem nara main wari.
Wanfala survey long U.S. Department bilong Education hem faendem hao “hevi for garem hae mark long skul” hem wanfala main wari bilong young pipol long United States. Disfala sem survey showaot staka young pipol kasem sem feeling olsem Shane (wea iumi storyim long start). Narafala young wan, Ashley, hem sei: “Mi warim future bilong mi.”
Bat samfala nara young wan warim safety bilong olketa. Olsem wanfala survey long 1996 showimaot, klosap 50 percent long young pipol long United States ting skul bilong olketa kamap moa raf. Winim eit million teenager (37 percent) sei olketa savve long samwan wea olketa sutim long gun!
Bat no evri wari hem nogud tumas olsem. For staka young pipol, barava big wari hem saed long wei for fren witim pipol. Wanfala magasin for parents hem sei: “Olketa teenager savve warim wei for garem boyfren or girlfren, bat winim diswan olketa wari abaotem wei for no garem eni fren.” Wanfala teenage girl, Meagan, hem wari olsem: “Hao nao man savve luk and act stedy? Mi needim samfala fren.” Wanfala young Christian, Natanael, storyim sem samting tu: “Olketa pikinini long skul wari abaotem stael. Olketa wari abaotem hao olketa wakabaot, toktok, and hao pipol ting long olketa. Olketa fraet for luk krangge.”
Olketa Problem—Part Long Laef
Hem bae naes tumas for garem living wea free from wari. Bat, Bible hem sei: “Man, wea born from woman, garem shortfala laef and fulap witim trabol.” (Job 14:1) Olketa problem—and olketa wari wea join witim—olketa part long laef. Bat sapos iu letem wari for bossim tingting bilong iu, hem savve barava spoelem iu. Bible givim warning: “Wari wea stap insaed heart bilong man bae mekem hem wikdaon.”—Proverbs 12:25.
Wanfala wei for missim wei for wari krangge hem for bossim wanem iu duim. Ana wea sixtin year hem sei: “Staka skulfren bilong mi wari abaotem wei for babule or for kasem sik saed long sex.” Bat iu savve missim wari olsem taem iu followim Bible standard saed long fasin. (Galatians 6:7) Nomata olsem, maet no evri problem bilong iu hem klia wan olsem, or isi for deal witim. Hao nao iu savve daonem wari?
“Wari Long Wisefala Wei”
Staka pipol letem wari for mekem olketa fraet. Bat wanfala article insaed wanfala magasin for olketa teenager hem sei, man savve “wari long wisefala wei” taem hem mekem wari for muvim hem for duim gud samting! Bible garem planti principle for helpem iu duim diswan. Tingim Proverbs 21:5: “Olketa plan bilong man wea careful bae kasem reward.” Olsem example, iu laek for invaetem samfala fren insaed kongregeson for kam long haos bilong iu. Iu savve barava daonem wari sapos iu plan gud. Askem iuseleva, ‘Hu nao bae mi invaetem? Wanem taem nao mi laekem olketa for arrive? Wanem taem nao mi laekem olketa for go? Haomas kaikai and drink nao mi really needim? Olketa wanem samting nao bae evriwan enjoy for duim?’ Sapos iu iusim moa taem for plan gud, bae disfala hipap bilong iu go ahed gud.
Bat, iu savve mekem wari kamap sapos iu planim tumas samting. Jesus Christ givim disfala advaes long wanfala woman wea provaedem tumas samting for olketa wea kam long haos bilong hem: “Iumi needim tu-thri samting nomoa, or wanfala samting nomoa.” (Luke 10:42) So askem iuseleva, ‘Wanem nao really important for mekem disfala hipap go ahed gud?’ Wei for simpol bae help for daonem wari bilong iu.
Nara wari maet hem safety bilong iu long skul. Maet iu hard for duim eniting for changem problem hia. Bat iu savve duim samfala samting for protectim iuseleva. Proverbs 22:3 hem sei: “Man wea wise hem lukim trabol and start for haedem hemseleva.” For stap klia from olketa danger ples—no just olketa dark ples bat tu ples wea no pablik wea olabaot pipol hange raon long hem—savve daonem chance bilong iu for insaed danger.
Skul waka savve kosim wari tu. Maet iu garem tu-thri homwak and iu wari iu bae no finisim evriwan long taem olketa markem. Principle long Philippians 1:10 bae help: “Mek sure long olketa samting wea moa important.” Yes, lane for duim olketa moa important samting firstaem! Luksavve wanem assignment nao moa important and duim datwan firstaem. Then, muv go long next wan. Gogo iu bae lukim hao iu savve deal witim diswan.
Kasem Advaes
Taem Aaron hem young, hem wari tumas for pasim test gogo hem kasem pain long chest bilong hem. Hem sei: “Mi story witim parents bilong mi, and tufala sendem mi go long doctor. Doctor stretawe lukim hao no eniting rong witim heart bilong mi and hem explainim wei wea wari savve affectim body. Bihaen, dadi and mami bilong mi helpem mi for luksavve hao mi duim finis evriting mi fit for duim for redy for test, and hao distaem mi need for wari for lukaftarem miseleva. Wari bilong mi finis, olketa pain long chest go awe, and mi duim gud long test bilong mi.”
Sapos wari putim hevi long iu, no safa kwaet witim datwan. Full toktok bilong Proverbs 12:25 hem sei: “Wari wea stap insaed heart bilong man bae mekem hem wikdaon, bat gudfala toktok nao bae mekem hem hapi.” Only sapos iu tok abaotem “wari” bilong iu then iu savve kasem “gudfala toktok” bilong encouragement!
Firstaem, iu maet laek for storyim gud witim parents bilong iu; tufala maet garem samfala idea. Olketa wea mature long spiritual wei insaed Christian kongregeson bilong iu tu savve givim iu saport. Janelle wea hem fiftin year hem sei: “Mi bin wari abaotem wei for attendim hae skul, mi fraetem evriting—olketa drug, sex, raf fasin—go kasem taem mi story witim wanfala kongregeson elder. Hem givim mi staka gudfala idea. Mi stretawe feel moabeta bikos mi lukim mi savve deal witim.”
No Delay
Samtaem iumi need for duim samting, bat iumi delay from iumi no laek for duim. Olsem example, Shevone wea hem naentin year garem problem witim wanfala nara Christian. Hem savve hem need for go stretem, bat hem delay. “Taem mi delayim, datwan go ahed for spoelem mind bilong mi,” hem sei. Then Shevone rememberim toktok bilong Jesus long Matthew 5:23, 24, wea encouragem olketa Christian for stretem problem kwiktaem. “Taem mi duim olsem,” Shevone hem sei, “mi feel moabeta.”
Waswe, iu delay for story witim samwan or duim wanfala assignment wea iu no mas laek duim? Kwiktaem for duim and bae iu katem daon wari.
Olketa Serious Wari
No evri wari hem isi for stretem. Tingim wanfala young wan wea nem bilong hem Abdur. Mami bilong hem garem cancer, and hem need for saportim mami and smol brata bilong hem. Tru nao, Abdur hem wari abaotem mami bilong hem. Bat hem sei: “Mi lanem samting from toktok bilong Jesus, ‘Hu nao long iufala wea wari tumas, hem savve addim wanfala cubit long laef bilong hem?’ Winim wei for letem wari winim mi, mi trae for tingting gud raonem problem and disaedem wanem nao bae really help.”—Matthew 6:27.
For no fraet long taem bilong bigfala problem hem no isi. Samfala wari tumas gogo olketa no lukaftarem olketa seleva, les for kaikai. Bat, disfala buk Helping Your Teenager Deal With Stress givim warning hao taem iu no kaikai gud, “bae hem moa hard for iu faetem nogud wei wea wari affectim iu and hem moa isi for iu kasem big sik.” So kea gud for health bilong iu. Kasem inaf rest and gudfala kaikai.
Iu savve faendem bigfala help taem iu followim disfala advaes from Bible: “Torowem hevi bilong iu long Jehovah, and hem nao bae strongim iu. Hem bae nating letem raeteous wan for seksek.” (Psalm 55:22) Shane, wea iumi storyim long start, hem bin wari abaotem future bilong hem. “Mi start for ting strong moa long Word bilong God and purpose bilong hem,” hem sei. Gogo hem lukim hao future bilong hem bae hapi sapos hem iusim laef bilong hem for servem God. (Revelation 4:11) Shane hem sei: “Mi stop for wari abaotem miseleva. Mi garem moa important samting for tingim.”
So taem iu wari tumas, lukaotem olketa wei wea bae helpem iu deal witim problem bilong iu. Kasem advaes from mature pipol. Winim evriting, talem olketa wari bilong iu long Jehovah ‘bikos hem kea for iu.’ (1 Peter 5:7) Witim help bilong hem, maet iu savve daonem wari bilong iu.
[Piksa long page 27]
Storyim wari bilong iu long parents bilong iu
[Piksa long page 28]
Bae iu no wari sapos iu deal witim problem kwiktaem