¿Naeʼ gaʼ ʼéeta daʼ ʼauloʼoguet jenʼ natʼaquéna?

DIʼ ʼENAPÉGA JANʼ BIBLIA

«Ñiʼme Dios [...] ỹiỹoiʼ ʼenaʼuaque nauaʼ láchiʼ jenʼme. Huáʼa, qanaʼchi sa ỹitaxa daʼ ỹileu gaʼ siỹaxaua, qataxa sa ỹitaxa noỹíitac ʼuootaxa daʼ nʼalqátañi, ʼuootaxa daʼ ʼuo daʼ laỹaliaxa. Qáʼa ỹima jenʼ seloqótaỹi naỹi, ỹima ỹiméta» (Apocalipsis 21:3, 4, Dios Nivíta Jen’ Siỹaxadipi).

TÁʼNOOCHE NʼÓOTA DAʼ SAỸÁTENAQ DÓJOʼ

ʼUo jenʼ qadʼónatac qomle ʼme qadoqopita qataxa ʼen qoʼmi madetʼape (Isaías 65:21-23).

Qaỹa daʼ qadachoxodec qataxa daʼ qoʼmi huetalóoʼte napiteʼnádi (Isaías 25:8; 33:24).

Qoʼmi madetʼape sonqátaʼñi naʼ qadecʼóqoʼtepi qataxa qanáigaxauapi naʼchi ʼeetaʼt (Salmo 37:11, 29).

¿QOʼ ỸISET DAʼ ỸÁCHI SʼAMAQTÉNAQ JENʼ ʼENAAC JANʼ BIBLIA?

ʼÉeta, dosolqa náajoiʼ, ʼuo jenʼ laỹi:

•  Ñiʼ Dios ʼuo daʼ loiquiaxac daʼ ʼen diʼỹoq dójoʼ ỹʼaxátʼaguet. Janʼ Biblia ʼenaac daʼ ʼoonolec ñiʼ Dios ʼme pʼasáiỹi daʼ loiquiaxac, soʼ huáʼachi daʼ loiquiaxac qaỹa ʼte loiquiaqaʼ (Apocalipsis 15:3). Chiỹaqáʼa daʼ ʼuo gaʼ ỹʼaxat daʼ ỹátaqta ʼen naiỹet ʼme ʼen taỹa jenʼ ʼaléua ʼónaxaic nʼacháqaʼ, ỹiset daʼ qoʼmi ỹátaqta sepʼiỹaqáʼa daʼ ỹañoxot daʼ ʼen diʼỹoq. Daʼ ʼenaac janʼ Biblia, «ñiʼme Dios ʼme qaỹa ʼte ỹaqalánaac» (Mateo 19:26).

•  Ñiʼ Dios ʼuo daʼ lamaic daʼ ʼen diʼỹoq daʼ dójoʼ ỹʼaxátʼaguet. Saloqtenaxanaxa, jenʼ siỹaxadipi ʼme sóxote ỹileu, janʼ Biblia ʼenaac macoʼ ñiʼ Jehová ỹáchi noqopita daʼ ỹʼiỹílaxatot daʼ nachaalataxac (Job 14:14, 15).

  Naʼchi ʼenáʼam ỹʼaxátʼa ʼme soʼ Jesús, ʼme Dios Lecʼóxot, nataden jenʼ louaxaicpi. ¿Nóoʼchi daʼ ỹíʼet? Huáʼachi naqaida daʼ ỹiỹamaxaden (Marcos 1:40, 41). Daʼ lʼonataxanaxac naqaida daʼ ʼen diʼỹoq daʼ lamaic ñiʼme Letʼa daʼ ỹitauan jenʼme choxodaicpi (Juan 14:9).

  Dójoʼ ỹiset daʼ qoʼmi sepʼiỹaqáʼa ñiʼme Jehová qataxa ñiʼ Jesús noqopidéta daʼ ʼuo daʼ dójoʼ nátauo sétaaque ʼónaxaic (Salmo 72:12-14; 145:16; 2 Pedro 3:9).