¿Naeʼ gaʼme noqoʼ gaʼ Lʼonataxanaxac ñiʼ Dios?

DIʼ ʼENAPÉGA JANʼ BIBLIA

«Ñiʼ Dios ʼme netague diʼ piỹem ỹisóiñi gaʼ maiʼchi lʼonataxanaxac ʼme ʼuana ỹiset daʼ ʼuo gaʼ noláxachiñi» (Daniel 2:44, Traducción del Nuevo Mundo).

«Jegaʼme ỹátaqta letʼádaic, qataxa qoỹimatáʼac qomle daʼ lecʼóxot ñiʼme Dios ʼme ỹátaqta letʼádaic. Ñiʼ qadesaliaxanec Dios ỹanaỹi qomle gaʼme daʼ netʼa [...]. Dójoʼ lʼonataxanaxac daʼ netʼa, daʼme qaỹa ʼte loiquiaqaʼ» (Lucas 1:32, 33, Dios Nivíta Jenʼ Siỹaxadipi).

TÁʼNOOCHE NʼÓOTA DAʼ SAỸÁTENAQ DÓJOʼ

•  Nʼonataxanaxac chimaqáchiiñi ʼme ỹiset daʼ ʼam ỹitauan (Isaías 48:17, 18).

•  Ỹamtaaʼle gaʼ dálaxaic nʼacháqaʼ ʼónaxaic, ỹima jenʼ ʼaléua, ʼen qoʼmi madetʼape qataxa qaỹaʼte napiteʼnádi (Apocalipsis 21:3, 4).

¿QOʼ ỸISET DAʼ ỸÁCHE SʼAMAQTÉNAQ JENʼ ʼENAAC JANʼ BIBLIA?

ʼÉeta, doosolqa náajoiʼ, ʼuo jenʼ laỹi:

•  Soʼ Jesús ỹaloxon daʼme lañoqtaxanaxac daʼ Lʼonataxanaxac ñiʼ Dios. Soʼme ỹapaxaguenque soʼ lauégaqatacpi daʼ netamen qanaʼchi ỹiỹáxanaaque daʼ janac daʼ Lʼonataxanaxac ñiʼ Dios qataxa qoỹíʼet daʼ ʼéetapeec ñiʼ Dios jenʼme ʼaléua (Mateo 6:9, 10). Naʼchi ʼenáʼam ỹaloxon daʼ diʼỹoq qomle soʼ niỹaxanaxac.

  Caʼli netalégue jenʼ ʼaléua, soʼ Jesús ỹiquiʼỹáxan soʼ siỹaxadipi ʼme ỹoqouat, nataden naʼ louaxaicpi qataxa ỹivídita daʼ ỹiʼỹilaxatot daʼ nachaalataxac saua siỹaxaʼu ʼme sóxote ỹileu (Mateo 15:29-38; Juan 11:38-44). Qaloo qáʼa tátʼa daʼ netʼa daʼ Lʼonataxanaxac ñiʼ Dios, ỹaʼuo soʼ laloxonatac naaʼme ʼónaxaiqa qoỹʼaalaʼaque ʼme daʼme Nʼonataxanaxac ỹíʼetec jenʼme quétapegue (Apocalipsis 11:15).

•  Daʼme huetalégue naỹi ỹima jenʼ ʼaléua ỹichoxot ʼme daʼ Lʼonataxanaxac ñiʼ Dios ỹamtaaʼle nóviʼ. Soʼ Jesús ỹʼaxátaguet caʼlioʼ ʼme qomle nadietaquéna daʼ Lʼonataxanaxac ñiʼ Dios ʼme ỹaiñi daʼ nʼemáxadic jenʼme ʼaléua, qanaʼchi jenʼ siỹaxadipi sanelaʼat nalaadaʼt, noqouáxa qataxa dedáxa jenʼ ʼaléua (Mateo 24:3, 7).

  Naỹi naʼ noloxoʼte qanaʼchi cʼotenaqátaxac ỹima náajoiʼ laqalastʼe. Chiỹaqáʼa ʼuana soqolguétaq daʼ nachidáta daʼ Lʼonataxanaxac ñiʼ Dios ʼme nadietaquéna ʼen qaỹa dójoʼ.