¿Qoʼ ỹiset daʼ ỹitaxa necʼalégue jenʼ sóxote ỹileu?

DIʼ ʼENAPÉGA JANʼ BIBLIA

«Ỹitaxa necʼalaxadiséguem» (Hechos 24:15, Dios Nivíta Jen’ Siỹaxadipi).

TÁʼNOOCHE NʼÓOTA DAʼ SAỸÁTENAQ DÓJOʼ

Sesomqalégue qomle gaʼ nʼañaqtaxanaxac daʼ ỹileu gaʼ qadaqáỹa (2 Corintios 1:3, 4).

Sevitaʼaguet qomle daʼ ʼuoʼ daʼ noqolánaxa tʼádaic daʼ nelouaxa (Hebreos 2:15).

ʼUo daʼ qadasóxonataxanaxac ỹiỹamqáchiiñi daʼ ỹitaxa seloqoʼot jenʼ qadaỹi ʼme sóxote ỹileu (Juan 5:28, 29).

¿QOʼ ỸISET DAʼ ỸÁCHI SʼAMAQTÉNAQ JENʼ ʼENAAC JANʼ BIBLIA?

ʼÉeta, tresolqa náajoiʼ, ʼuo jenʼ laỹi:

•  Ñiʼ Dios lʼonatac daʼ chaalataxac. Janʼ Biblia ỹiỹáxanaxanec ñiʼ Jehová «chiỹaqapiỹi daʼ chaalataxac» (Salmo 36:9, Traducción del Nuevo Mundo; Hechos 17:24, 25). Daʼ ỹiset daʼ ỹanem daʼ lʼóiỹaxac ỹima naʼ siỹaxadipi, sa qodoqolguétanec ʼuo daʼ loiquiaxac daʼ ỹitaxa ỹʼiỹílaxatot daʼ nachaalataxac jenʼme sóxote ỹileu.

•  Ñiʼ Dios sóxote ʼen necʼalidiséguem caʼlioʼ saaʼ siỹaxaʼu. Janʼ Biblia ʼenaac ocho diaaʼme siỹaxaʼu ʼme necʼaledéegue, léʼem qataxa ỹauo, ỹodetʼaʼt daʼ liaxa, qanaʼchi ỹitaxa nedalégue jenʼ ʼaléua caʼlioʼ. ʼUo jenʼ sa copʼa daʼ ỹileu; qaláxasa ʼuo soʼ siỹaxaua ʼme sóxote cuatro saaʼ noloxoʼte daʼ sóxote qaỹa (Juan 11:39-44).

•  Ñiʼ Dios ỹidiáqʼa daʼ ỹʼiỹílaxatot daʼ nachaalataxac jenʼ napaʼlpi. Ñiʼ Jehová niquiỹáʼa daʼ nelouaxa soʼ huáʼachi ʼen ʼenáʼam daʼ lasáxaua daʼ ỹilotʼot (1 Corintios 15:26). Ỹáchi nomteguet daʼ lamaic daʼ ʼen qaỹa dójoʼ lasáxaua chiỹaqáʼa ʼen necʼaléegue qomle jenʼ sóxote ỹileu. Lamaic daʼ ỹivíta gaʼ noloʼ daʼ ʼen nalégue jenʼ ʼaléua jenʼme netouéetec (Job 14:14, 15).