EKSODUS

1 Eri iet eden nein Israel pwutak kan me iang Seikop kohdo Isip, emenemen irail kohdo iangahki tohnimwe:+ 2 Reupen, Simion, Lipai oh Suda;+ 3 Isakar, Sepulon oh Pensamin; 4 Dan oh Napdali; Kad oh Aser.+ 5 Oh irail* koaros me ipwidiong Seikop* iei aramas* 70, ahpw Sosep mihmier nan Isip.+ 6 Kedekedeo Sosep ahpw mehla,+ oh pil rie ko koaros oh pil diho koaros. 7 Oh mehn Israel ko* eri kaparaparala oh tepida tohtohla, irail mwadangete ngederla oh kehlailla, irail eri audehla sahpwo.+

8 Kedekedeo nanmwarki kapw men me sehse Sosep ahpw kesepwilda nan Isip. 9 Ih eri ndaiong nah aramas ako: “Kilang! Aramas en Israel kan tohtohsang oh kehlailsang kitail.+ 10 Kitail wiahiong irail mehkot, pwe ren dehr tohtohla. Ma soh, irail pahn wie tohtohla, oh ma mahwen pahn wiawi, irail pahn iangala atail imwintihti kan oh peiong kitail oh kohkohlahsang sahpwet.”

11 Irail eri idihada kaunen lidu kan* pohrail pwe ren kin kalokehkin irail doadoahk laud,+ oh irail kauwada kahnimw en wasahn nahk kan ong Parao, me iei Pitom oh Rameses.+ 12 Ahpw ni uwen ar kin kaloke irail, ih pil uwen ar kin tohtohla oh kohkohpeseng nan sahpwo, kahrehda irail uhdahn masakala oh kailongkihla mehn Israel ko.+ 13 Kahrehda, mehn Isip ko kin kaliduwih mehn Israel ko oh itonehng irail ren doadoahk laud.+ 14 Irail kahrehiong arail mour en apwal ni ar kin doadoahk laud, ni ar kin wiahda siment oh prik kan* oh wia soangen doadoahk en lidu koaros nan sahpwo. Ei, mehn Isip ko kin koadoadoahkih irail ni elen lemei ni soangen doadoahk en lidu koaros.+

15 Mwuhr nanmwarkien Isipo ahpw koasoiong sounkeneitik en Ipru riemeno me adaneki Sipra oh Pua, 16 oh ndaiong ira: “Ni amwa pahn sewese lihen Ipru kan en neitik,+ kumwa pahn kilang serio ni eh neitikidi.* Ma kisin pwutak kis, kumwa pahn kemehla; ahpw ma serepein men, e pahn mour.” 17 Ahpw, sounkeneitik ko kin lemmwiki Koht mehlelo, oh ira sohte wia dahme nanmwarkien Isipo ndaiong ira; pwe ira kin kamourala kisin pwutak kan.+ 18 Kedekedeo nanmwarkien Isipo ahpw ekerodo sounkeneitik ko oh ndaiong ira: “Dahme kumwa kin kamourkihla kisin pwutak kan?” 19 Sounkeneitik ko ahpw ndaiong Parao: “Lihen Ipru kan sohte duwehte lihen Isip kan. Irail kehlail oh re kin neitikla mwohn sounkeneitiko eh kin lel rehrail.”

20 Koht eri ketin kapaiahda sounkeneitik ko, aramas ako eri wie tohtohla oh uhdahn kehlailla. 21 Pwehki sounkeneitik ko kin lemmwiki Koht mehlelo, Koht eri ketin kapaiahkin ira pein ara peneinei. 22 Parao eri kehkehlingkihong nah aramas ako koaros: “Kumwail pahn kesehla nan Pillap Nail nein mehn Ipru kan pwutak kan koaros me ahpwtehn ipwidi, a serepein kan koaros kumwail pahn kamourala.”+

2 Ni ahnsowo, ohl emen sang keinek en Lipai ahpw pwoudikihda lih emen sang keinek en Lipai.+ 2 Liho eri liseianda oh naitikihada pwutak emen. Ni eh kilangada uwen kaselel en pwutako, e ahpw ekihla ih erein sounpwong siluh.+ 3 Ni eh solahr kak ekieki,+ e ahpw ale kopwou* ehu me wiawihkihda ahlek* oh litopwiheki mehkot me duwehte tahr oh kihdiong serio loale oh pwilikihdi kopwowo nanpwungen ahlek kan ni keilen Pillap Nail. 4 Ahpw rie serepeino+ kesikesihnen kailalahsang, pwehn kilang dahme pahn wiawihong ih.

5 Ni nein Parao serepeino eh kohdidohng duhdu ni Nail, nah sounpapah lih ko wie alialu ni keilen Nail. Ih eri kilangada kopwowo nanpwungen ahlek ko. Ih eri mwadangete ilakih nah lidu serepeino en wadohng.+ 6 Ni eh pahkada kopwowo, e kilangada serio, oh pwutako wie sengiseng. E poakepoakehda serio, ahpw e nda: “Ih emen nein mehn Ipru ko seri.” 7 Rien serio serepeino eri ndaiong nein Parao serepeino: “I en patohla oh ekerodo emen lihen Ipru en, pwe en kadihdihada serien ong komwi?” 8 Nein Parao serepeino ahpw ndaiong ih: “Nna, kohla!” Ni ahnsowohte serepeino ahpw kohla oh ekerodo en serio eh nohno.+ 9 Nein Parao serepeino eri ndaiong liho: “Wahda seriet oh kadihdihada ong ie, oh I pahn pwainohng uhk.” Liho eri wahda serio oh kadihdihada. 10 Ni serio eh laudla, liho ahpw wahdo rehn nein Parao serepeino, oh e wiahkihla ih nah pwutak.+ E kihong ede Moses* oh nda: “Pwehki I kihsang ih nan pihlo.”+

11 Ni Moses eh laudlahr,* e ahpw kohieila rehn rie mehn Ipru ko pwehn kilang duwen apwal en doadoahk me re kin wia,+ oh e kilangada mehn Isip men eh kemekeme emen irail. 12 Ih eri kilikilengseli oh sohte me e kilangada, ih eri kemehla mehn Isipo oh ekihla nan pihko.+

13 Ahpw mandahn rahno e kohieila, oh mie ohlen Ipru riemen wie pepeipene. Ih eri ndaiong ohl me sapwungo: “Dahme ke kemehki iengomwen?”+ 14 Ih eri nda: “Ihs me idihiukada ken wia at kaun oh sounkopwung? Ke pahn kemeiehla duwehte omw kemehla mehn Isipo?”+ Moses eri masepwehkada oh nda: “Aramas akan uhdahn esedahr ire wet!”

15 Parao eri rongada duwen met, e ahpw song en kemehla Moses; ahpw Moses tangasang Parao oh kohla kousoanla nan sapwen Midian,+ ih eri mwohndi ni pwarer ehu. 16 Eri samworo en Midian men+ naineki serepein isimen, oh irail kodohn idipil oh audehda deupen pihl ko pwe ren kanimpile nein arail pahpao pelinmen kan. 17 Ahpw nin duwen me kin kalapw wiawi, silepen sihpw kei kohdo oh kasareirailla. Moses ahpw uhda oh sewese* lih ako oh kanimpile neirail pelinmen ko. 18 Ni arail pwurodo ni imwarailo rehn arail pahpao Reuel,*+ e ngihl laudida nda: “Dahme kumwail mwadang en pwurkihdo rahnwet?” 19 Irail ahpw sapengki: “Mehn Isip men+ me doareikitala sang silepen sihpw ko, oh e pil idipiliong kiht oh kanimpile pelinmen ko.” 20 E ndaiong nah serepein ko: “A ia ih? Dahme kumwail kohkohdosangki ohlo? Kumwail pwurowei oh ekerodo ih, pwe e pahn iang kitail mwenge.” 21 Mwurin mwo Moses ahpw pwungkihda en kousoanla rehn ohlo, oh e kihong Moses nah serepein Sipora+ pwe en pwoudiki. 22 Mwuhr e naitikihada pwutak emen, Moses eri kihong ede Kersom,*+ pwe e nda, “I wiahla mehn liki men nan sapwen mehn liki.”+

23 Mwurin ahnsou reirei,* nanmwarkien Isipo ahpw mehla,+ ahpw mehn Israel ko kin ingihngtik pwehki ar wia lidu oh re kin wie sengiseng ni kaulim, oh ngilen ar peksawas kin leldalahng rehn Koht mehlelo.+ 24 Kedekedeo Koht ahpw ketin karongehda ar ingihngtik,+ oh Koht ketin tamanda sapwellime inou lapo rehn Eipraam, Aisek oh Seikop.+ 25 Koht eri ketin sohpeiong mehn Israel ko oh ketin mahsanihada arail lokolok.

3 Moses wiahla sounsilepen sihpw ong nein semen eh pwoudo Sedro,+ samworo en Midian pelin sihpw kan. Ni eh kahkahre pelin sihpwo kohla palikapi en sapwtehno, e ahpw lella Orep,+ ni nahnahn Koht mehlelo. 2 Sapwellimen Siohwa tohnleng men ahpw pwarohng ih nan mpwulen kisiniei ehu nanpwungen tuhke tekatek kis.+ Ni eh kilikilang, e tehkada me tuhke tekateko wie lullul, ahpw tuhkeo sohte roangala. 3 Moses eri nda: “I pahn keila pwe I en tehk soahng kapwuriamwei wet, pwe I en kilang dahme tuhke tekateko sohte roangkihla.” 4 Ni Siohwa eh ketin mahsanihada me Moses keilahng kilang, Koht ahpw ketin eker sang nan tuhke tekateko oh mahsanih: “Moses! Moses!” E ahpw sapeng, patohwan: “Iet ngehi, maing.” 5 Koht eri ketin mahsanih: “Ke dehr keido met. Kihsang omw suht kan ni nehmwen, pwehki wasa me ke kesikesihneniehn me sarawi.”

6 E pil ketin mahsanih: “Ngehi me Koht en semomwo, Koht en Eipraam,+ Koht en Aisek,+ oh Koht en Seikop.”+ Moses eri perehla meseo, pwehki e masak kilang Koht mehlelo. 7 Siohwa ketin doula mahsanih: “I uhdahn kilangehr apwal en nei aramas akan nan Isip, oh I rongehr ngilen ar peksawas pwehki irail kan me kin itonehng ren doadoahk; I uhdahn ese medek me re wie lokolongki.+ 8 I pahn kohdihla pwe I en kapitirailla sang ni pehn mehn Isip kan+ oh kahreirailsang nan sahpwo oh kahreirailla nan sahpw ehu me mwahu oh lapala, sahpw ehu me inenen pwelmwahu,*+ sapwen mehn Kenan kan, mehn Id kan, mehn Amor kan, mehn Peris kan, mehn Ip kan oh mehn Sepus kan.+ 9 Eri kilang! I rongehr ngilen aramas en Israel kan ar peki sawas, oh I pil kilangehr duwen mehn Isip kan ar kin kaloke irail ni lemei.+ 10 Eri met, I pahn kadaruhkalahng rehn Parao, oh ke pahn wahsang nei aramas akan, mehn Israel kan, nan Isip.”+

11 Moses ahpw patohwanohng Koht mehlelo: “Ihs ngehi pwe I en patohla rehn Parao oh wahsang mehn Israel kan nan Isip?” 12 Koht eri ketin mahsanih: “I pahn kin ieiang uhk,+ oh ih kilel en met ong kowe me ngehi me kadaruhkewei: Mwurin omw pahn wahsang aramas akan nan Isip, kumwail pahn papah* ie, Koht mehlelo, pohn nahna wet.”+

13 Ahpw Moses patohwanohng Koht mehlelo: “Ia duwen ma I kohla rehn mehn Israel ko oh ndaiong irail, ‘Koht en samamwail mehn mahs ako ketin poaroneiehdo rehmwail,’ oh irail pahn sapengkin ie, ‘Ia mwarehn?’+ Dahme I pahn sapengkin irail?” 14 Koht eri ketin mahsanihong Moses: “I Pahn Wiahla Dahme I Pilada* en Wiahla.”*+ Oh e ketin doula mahsanih: “Iet me ke pahn ndaiong mehn Israel kan, ‘I Pahn Wiahla me ketin poaroneiehdo rehmwail.’”+ 15 Koht eri pil ketin pwurehng mahsanihong Moses:

“Iet me ke pahn ndaiong mehn Israel kan, ‘Siohwa, Koht en samamwail mehn mahs ako, Koht en Eipraam,+ Koht en Aisek,+ oh Koht en Seikop,+ ketin poaroneiehdo rehmwail.’ Ih mwarei en met kohkohlahte,+ oh dih koaros pahn kin tamataman mwar wet. 16 Eri kohla, oh kapokonepene ohl mah kan en Israel oh ndaiong irail, ‘Siohwa, Koht en samamwail mehn mahs ako ketin pwarohng ie, Koht en Eipraam, Aisek oh Seikop, oh e ketin mahsanih: “I sohpeiong kumwail oh mahsaniher+ dahme kin wiawihong kumwail nan Isip. 17 Eri I inoukihong kumwail me I pahn kapitkumwailsang lokolok+ me kumwail mi loale pwehki mehn Isip kan oh kahluweikumwailla nan sapwen mehn Kenan kan, mehn Id kan, mehn Amor kan,+ mehn Peris kan, mehn Ip kan oh mehn Sepus kan,+ nan sahpw ehu me inenen pwelmwahu.”’*+

18 “Irail uhdahn pahn rong uhk,+ oh ke pahn kohla rehn nanmwarkien Isip, kowe oh ohl mah kan en Israel, oh kumwail pahn ndaiong ih: ‘Siohwa, Koht en mehn Ipru kan+ ketin mahseniongkitehr. Eri, menlau mweidohng kiht pwe sen wia seiloak en rahn siluh kohla nan sapwtehn pwe sen wia meirong ong Siohwa at Koht.’+ 19 Ahpw I uhdahn ese me nanmwarkien Isip sohte pahn mweidohng kumwail en kohkohla ihte ma mehkot idingkihong ih.+ 20 Eri I pahn kapahwei limeiet oh kalokehki Isip wiewia kapwuriamwei koaros me I pahn wia wasao, mwurin mwo e ahpw pahn kadarkumwailla.+ 21 Oh I pahn kahrehiong aramas pwukat ren kenikenla rehn mehn Isip kan, oh ni amwail pahn mwesel, kumwail sohte pahn mwesel kahiep.+ 22 Emenemen lih pahn peki rehn mehn mpe oh rehn lih me kin kousoan nan imwe soahng kan me wiawihkihda silper oh kohl oh pil likou, oh kumwail pahn kapwatahkihda noumwail pwutak kan oh serepein kan; oh kumwail pahn kihsang en mehn Isip kan+ kepwe kan.”

4 Moses ahpw sapeng patohwan: “A ia duwen ma irail sohte kamehlele ie oh sohte rong ie,+ pwe re pahn nda, ‘Siohwa sohte ketin pwarohng uhk.’” 2 Siohwa eri ketin mahsanihong ih: “Dahme mi nan pehmwen?” A e patohwan: “Sokon pwoat.” 3 E ketin mahsanih: “Kesehdiong nanpwelen.” Ih eri kesehdiong nanpwelo, a e wiahla serpent men;+ Moses ahpw pweieklahsang. 4 Siohwa eri ketin mahsanihong Moses: “Kapahwei pehmwen oh koledi pwadaikien.” Moses eri kapahla peho oh koledi, oh e wiahla sokon pwoat. 5 Koht eri ketin mahsanih: “Iei met me re pahn kamehlelehki me Siohwa, Koht en samarail mehn mahs ako, Koht en Eipraam, Koht en Aisek, oh Koht en Seikop,+ pwarohng uhk.”+

6 Siohwa eri pil ketin pwurehng mahsanihong Moses: “Menlau, kapwadolong pehmwen nan omw likowen.” Ih eri kapwadolong peho nan eh likowo. Ni eh kapwadeisang, peho ahpw diren tokutokla duwehte sinoh!+ 7 Koht eri ketin mahsanih: “Kapwurehlong pehmwen nan omw likowen.” Moses eri kapwurehlong peho nan eh likowo. Ni eh kapwadeisang peho nan eh likowo, e mwahula duwehte wasa teikan ni paliwereo! 8 Koht ketin mahsanih: “Ma irail sohte pahn kamehleleiuk de sohte tehk keieun kilelo, irail uhdahn pahn tehk kilel teio.+ 9 Ahpw ma re sohte pahn kamehlele kilel riau pwukat oh kahng rong uhk, ke pahn idipada ekis pihl sang nan Pillap Nail oh wudekihdiong pohn pwehl madekeng, oh pihl me ke idipasang nan Nail pahn wiahla nta pohn pwehl madekengo.”+

10 Moses eri patohwanohng Siohwa: “Komw kupwure ie, maing Siohwa, I me soakoahiek en pato, sangete mahso de pil sang ni ahnsou me komw mahseniong sapwellimomwi ladu, pwe I me soakoahiek en pato* oh loweiet me toutou.”+ 11 Siohwa eri ketin mahsanihong ih: “Ihs me wiahda ewen aramas, de ihs me kin wiahiong irail ren sohla kak lokaia, salengeponla, kak kilang mwahu wasa, de maskunla? Kaidehn ngehi, Siohwa? 12 Eri kohla, oh I pahn ieiang uhk ni omw pahn koasoi,* oh I pahn padahkihong uhk dahme ke pahn nda.”+ 13 Ahpw e patohwanohng: “Komw kupwure ie maing Siohwa, komw kupwurkalahngan oh ketin poaronehla emen me komw kupwurki.” 14 Siohwa eri ketin engiengda pahn Moses oh mahsanih: “Ia duwen riomwo Aaron+ mehn Lipaio? I ese me e uhdahn kadek lokaia. Oh met e kohkodohng tuhwong uhk wasaht. Ni eh pahn kilang uhk, e* pahn perenda.+ 15 Eri ke pahn koasoiong ih oh padahkihong ih ei mahsen kan,+ oh I pahn ieiang kumwa ni amwa pahn koasoi,+ oh I pahn padahkihong kumwa dahme kumwa pahn wia. 16 E pahn wilianuhkedi oh koasoiong aramas akan, oh e pahn wia noumw sounkair, oh ke pahn wia wiliepen Koht ong ih.+ 17 Oh ke pahn ale sokon pwoatet nan pehmwen oh wiahkihda kilel kan.”+

18 Moses eri pwurala rehn Sedro semen eh pwoudo+ oh ndaiong ih: “Menlau, I men pwurala rehn riei ko me mi nan Isip pwe I en kilang ma re momourte.” Sedro eri ndaiong Moses: “Kohwei ni popohl.” 19 Mwurin mwo Siohwa ketin mahsanihong Moses nan Midian: “Kohla, pwurala Isip, pwehki irail koaros me men kemeiukala melahr.”+

20 Moses eri ale eh pwoudo oh nah pwutak ko oh kidahng irail pohn dongki men, ih eri tepida pwuralahng nan sapwen Isip. Moses pil wahda sokon me Koht mehlelo ketin kehkehlingkihong ih en wahda. 21 Siohwa eri ketin mahsanihong Moses: “Mwurin omw pahn pwurala Isip, ke uhdahn pahn wiahda mwohn Parao manaman kapwuriamwei kan koaros me I kihong uhk kehl en wia.+ Ahpw I pahn mweidohng eh mohngiong en keptakaila,+ oh e sohte pahn kadarala aramas ako.+ 22 Ke pahn ndaiong Parao, ‘Iet me Siohwa ketin mahsanihen: “Israel iei nei pwutak, nei mesenih.+ 23 I ndaiong uhk, Kadarala nei pwutaken pwe en papah ie. Ahpw ma ke kahng kadarala ih, I pahn kemehla noumw pwutaken, noumw mesenihen.”’”+

24 Pohn ahlo ni wasahn pweidi ehu, Siohwa+ ketin tuhwong ih oh ketin raparapahki en kemehla.+ 25 Sipora+ eri ale kisin takai keng* ehu oh sirkumsaisihala nah pwutako oh kasairehki kilin imwin eh dipwisoun kaparaparo ni neh ko* oh nda: “Pwehki kowe ohl kamwohd men ong ngehi sang ni nta wet.” 26 Ih eri mweidala ih. Ahnsowo liho ahpw nda, ‘ohl kamwohd men sang ni nta wet,’ pwehki sirkumsaiso.

27 Siohwa eri ketin mahsanihong Aaron: “Kohla nan sapwtehno pwe ken tuhwong Moses.”+ Ih eri kohla oh tuhwong Moses ni nahnahn Koht mehlelo+ oh rahnmwahwih oh metik ih. 28 Moses eri ndaiong Aaron mahsen ko koaros sang rehn Siohwa me ketin poaronehla ih,+ oh kilel ko koaros me E ketin kehkehlingkihong ih en wia.+ 29 Mwurin mwo Moses oh Aaron ahpw kohla oh kapokonepene ohl mah koaros en Israel.+ 30 Aaron ndaiong irail mahsen ko koaros me Siohwa ketin mahsanihong Moses, oh e wiahda kilel ko+ mwohn mesen aramas ako. 31 Aramas ako eri kamehlelehla.+ Ni ar rongada me Siohwa ketin sohpeiongehr mehn Israel kan+ oh me e ketin mahsaniher ar lokolok kan,+ re ahpw dairukedi oh lukupoardi.

5 Mwurin mwo, Moses oh Aaron ahpw kohlongala oh ndaiong Parao: “Iet me Siohwa, Koht en Israel ketin mahsanih, ‘Kadarala nei aramas akan pwe ren wia kasarawi ehu ong ie nan sapwtehn.’” 2 Parao eri nda: “Ihs Siohwa,+ pwe I en peikiong ih oh kadarala Israel?+ I sohte mwahn ese Siohwa, oh pil, I sohte pahn kadarala Israel.”+ 3 Ahpw ira nda: “Koht en mehn Ipru kan ketin mahseniongkitehr. Menlau, se men wia seiloak en rahn siluh kohla nan sapwtehn oh wia meirong ong Siohwa at Koht;+ ma soh, e pahn ketin kalokehkin kiht soumwahu de kedlahs.” 4 Nanmwarkien Isipo eri sapengkin ira: “Moses oh Aaron, dahme kahrehda kumwa pahn kihsang aramas akan nan ar doadoahk? Kumwail pwuralahng amwail doadoahk!”*+ 5 Parao pil doula nda: “Kilang uwen tohtohlahn aramas pwukat nan sahpwet, oh kumwa men ren kommoaldihsang ar doadoahk.”

6 Rahnohte, Parao ahpw kehkehlingkihong kaunen doadoahk ko oh neirail kaunen pwihnen doadoahk ko: 7 “Kumwail sohla pahn kihong aramas akan reh meng pwe ren wiahda prik kan.*+ Ren pein kohla oh kihpene reh meng kan. 8 Ahpw, kumwail pahn itonehng irail ren wiahda uwen tohtohn prik me re kin wiahda mahso. Kaleke kumwail kamalaulauwihala ong irail, pwe re pohnkahke. Ihme re wie pekipekihki, ‘Se men kohla, se men wia meirong ong at Koht!’ 9 Koadoadoahkih irail laudsang mahso, oh ren kin soupisek pwe ren dehr rong koasoi likamw kan.”

10 Kaunen doadoahk ko+ oh neirail kaunen pwihnen doadoahk ko ahpw kohieila oh ndaiong aramas ako: “Iet dahme Parao mahsanihen, ‘I sohla pahn kihong kumwail reh meng. 11 Kohla oh pein ale amwail reh meng wasa me kumwail kak diar ie, ahpw amwail doadoahk sohte mwahn pahn tikitikla.’” 12 Aramas ako eri kohpeseng nan sapwen Isip pwon pwe ren rikpene diperen dihpw kan.* 13 Kaunen doadoahk ko ahpw kin pwurupwurehng ndaiong irail: “Emenemen kumwail anahne kanekehla amwail doadoahk rahn koaros, duwehte ahnsou me reh meng kan kin kohieng kumwail.” 14 Kaunen pwihnen doadoahk en mehn Israel ko me nein Parao kaunen doadoahk ko idihada ren kaun irail, pil kamakam.+ Nein Parao kaunen doadoahk ko ahpw idek rehrail: “Dahme kumwail sohte wiahkihda uwen tohtohn prik duwehte me kumwail kin wiahda mahso? Met wiawi aio oh pil rahnwet.”

15 Kaunen pwihnen doadoahk en mehn Israel ko ahpw kohla oh kaulimiong Parao: “Dahme komw wiahkihong sapwellimomwi ladu kat met? 16 Sohte reh meng kin kohieng sapwellimomwi ladu kat, ahpw re kin ndaiong kiht, ‘Wiahda prik kan!’ Sapwellimomwi ladu kat kin kamakam, ahpw pein sapwellimomwi aramas akan me sapwung.” 17 Ahpw Parao nda: “Kumwail pohnkahke, kumwail pohnkahke!+ Ihme kumwail ndindahki, ‘Se men kohla, se men wia meirong ong Siohwa.’+ 18 Eri kumwail kohla, pwurala doadoahk! Sohte reh meng pahn kohieng kumwail, ahpw kumwail pahn wiahda uwen tohtohn prik kan duwehte mahs.”

19 Kaunen pwihnen doadoahk en mehn Israel ko ahpw tehkada me re milahr nan apwal laud pwehki kehkehliko: “Kumwail sohte mwahn pahn kamalaulauwihala uwen tohtohn prik kan me kumwail kin wiahda ehuehu rahn.” 20 Mwurin mwo re tuhwong Moses oh Aaron. Ira wie kesikesihnen mwo pwehn tuhwong irail ni ar kohieido sang rehn Parao. 21 Ahnsowohte re ndaiong ira: “Siohwa en ketin mahsanih kumwa oh kadeik kumwa, pwehki amwa kahrehiong Parao oh sapwellime ladu kan ren kailongkinkitala* oh kumwa kihongehr kedlahs pwoat nan pehrail pwe ren kemeikitala.”+ 22 Moses eri sohpeiong Siohwa oh patohwanohng: “Maing Siohwa, dahme komw ketin kalokehki aramas pwukat? Dahme komw ketin poaronekiniehdo? 23 Sangete ahnsou me I patohla mwohn Parao pwe I en pato ni mwaromwi,+ e kin wiakauwe aramas pwukat laudsang mahs,+ komwi ahpw sohte mwahn ketin kapitala sapwellimomwi aramas akan.”+

6 Siohwa eri ketin mahsanihong Moses: “Met ke pahn kilang dahme I pahn wiahiong Parao.+ Roson en nin limei pahn idingohng ih en kadarirailla, oh roson en nin limei pahn idingohng ih en kasareirailla sang nan sapweo.”+

2 Koht ahpw ketin mahsanihong Moses: “Ngehi me Siohwa. 3 Oh I kin pwarohng Eipraam, Aisek oh Seikop nin duwen Koht me Keieu Manaman,+ ahpw me pid duwen mwarei Siohwa,+ I sohte mweidohng irail en uhdahn ese ihs ngehi.+ 4 I pil wiahda ei inou lap rehrail, pwe I en kihong irail sapwen Kenan, sahpw me re kin kousoan loale nin duwen mehn liki kei.+ 5 Met I rongehr aramas en Israel kan ar ingihngtik, me mehn Isip kan kin kaliduwih, oh I tamanda ei inou lapo.+

6 “Eri, ndaiong mehn Israel kan: ‘Ngehi me Siohwa, oh I pahn waikumwailsang pahn wisik en mehn Isip kan oh kapitkumwailla sang wia arail lidu,+ I pahn pwurehng alei kumwail ni ei pahn kapahla limeiet oh kaloke irail mwuledek.+ 7 Oh I pahn alei kumwail duwehte nei aramas, oh I pahn wia amwail Koht,+ oh kumwail uhdahn pahn ese me ngehi me Siohwa amwail Koht me pahn ketin waikumwailsang pahn wisik toutou en Isip. 8 I pahn waikumwaillahng nan sahpw me I kahukihla* me I pahn kihong Eipraam, Aisek oh Seikop; oh I pahn kihong kumwail sahpwo pwe kumwail en sapwenikihla.+ Ngehi me Siohwa.’”+

9 Mwuhr Moses ahpw kihong mehn Israel ko rohng pwoatet, ahpw re sohte rong Moses pwehki re mworusala oh pwehki apwal laud en kalidu.+

10 Siohwa eri ketin mahsanihong Moses: 11 “Kohla oh ndaiong Parao, nanmwarkien Isip, en kadarala mehn Israel kan sang nan sapweo.” 12 Ahpw, Moses sapeng Siohwa, patohwan: “Kilang! Mehn Israel kan sohte rong ie;+ a ia duwen Parao eh pahn karonge ie, ni ei soakoahiek en pato?”+ 13 Ahpw Siohwa ketin pwurehng mahsanihong Moses oh Aaron kehkehlik kan me ira pahn kairehki mehn Israel kan oh pil Parao, nanmwarkien Isip, pwe en ketin kahluwahsang mehn Israel kan nan sapwen Isip.

14 Iet eden ohl akan me wia moangen keineko: Keinek en Reupen, iei Anok, Pallu, Esron oh Karmi.+ Pwutak pwukat nein Reupen, nein Israel mesenih.+

15 Nein Simion pwutak kan iei Semuel, Seimin, Ohad, Sakin, Sohar oh Saul, nein lihen Kenan men.+ Ih peneinei en Simion kan met.

16 Iet eden nein Lipai pwutak kan,+ nin duwen irekidien arail peneinei: Kerson, Kohad oh Merari.+ Lipai momourki sounpar 137.

17 Nein Kerson pwutak kan me kileldi nin duwen arail peneinei, iei Lipni oh Simei.+

18 Nein Kohad pwutak kan iei Amram, Isar, Ipron oh Ussiel.+ Kohad momourki sounpar 133.

19 Nein Merari pwutak kan iei Mahli oh Musi.

Ih peneinei en mehn Lipai kan met, nin duwen irekidien arail peneinei.+

20 Amram eri ale Sokeped, rien eh pahpao serepein, pwehn pwoudikihda.+ E naitikihong ih Aaron oh Moses.+ Amram momourki sounpar 137.

21 Nein Isar pwutak kan iei Kora,+ Nepek oh Sikri.

22 Nein Ussiel pwutak kan iei Misael, Elisapan+ oh Sidri.

23 Aaron eri ale Elisehpa, nein Aminadap serepein, rien Nahson serepein,+ pwehn pwoudikihda. E naitikihong ih Nadap, Apihu, Eliesar oh Idamar.+

24 Nein Kora pwutak kan iei Assir, Elkana oh Apiasap.+ Ih peneinei en mehn Kora kan met.+

25 Eliesar,+ nein Aaron pwutak, ahpw ale emen nein Putiel serepein ko pwehn pwoudikihda. E naitikihong ih Pineas.+

Irail pwukat me kaunen peneinei en mehn Lipai kan, nin duwen irekidien arail peneinei.+

26 Aaron oh Moses iei ira me Siohwa ketin mahsanihong: “Wahsang aramas en Israel kan nan sapwen Isip, nin duwen pwihn kan.”*+ 27 Ih ira me koasoiong Parao, nanmwarkien Isip, pwe ira en wahsang aramas en Israel kan nan Isip. Iei Moses oh Aaron met.+

28 Eri, rahno Siohwa ketin mahseniong Moses nan sapwen Isip, 29 oh rahnohte Siohwa ketin mahsanihong Moses: “Ngehi me Siohwa. Ndaiong Parao, nanmwarkien Isip, soahng koaros me I koasoiaiong uhk.” 30 Moses eri patohwan mwohn silangin Siohwa: “Kilang! I me soakoahiek en pato, a ia duwen Parao eh pahn karonge ie?”+

7 Siohwa eri ketin mahsanihong Moses: “Kilang, I wiahiong uhk ken duwehte Koht* ong Parao, oh riomw Aaron pahn wia omw soukohp.+ 2 Ke pahn koasoiaiong riomw Aaron mehkoaros me I kehkehlingkihong uhk, oh Aaron pahn koasoiong Parao, oh e pahn kadarala mehn Israel kan sang nan sapweo. 3 A ngehi, I pahn mweidohng en Parao mohngiong en keptakaila,+ oh I pahn katohtohwehla ei kilel kan oh ei manaman kapwuriamwei kan nan sapwen Isip.+ 4 Ahpw Parao sohte pahn rong uhk, oh I pahn pwil limeiet pohn Isip oh wahsang nei aramas ngeder kan,* mehn Israel kan, sang nan sapwen Isip ni ei pahn kaloke irail mwuledek.+ 5 Oh mehn Isip kan uhdahn pahn ese me ngehi me Siohwa+ ni ei pahn kapahwei limeiet pohn Isip oh wahsang mehn Israel kan sang nanpwungarail.” 6 Moses oh Aaron eri kapwaiada dahme Siohwa ketin kehkehlingkihong ira; ira uhdahn kapwaiada. 7 Moses sounpar 80 oh Aaron sounpar 83 ni ahnsou me ira koasoiong Parao.+

8 Siohwa eri ketin mahsanihong Moses oh Aaron: 9 “Ma Parao pahn ndaiong kumwa, ‘Wiahda manaman ehu,’ ke pahn ndaiong Aaron, ‘Ale noumw sokonen oh kesehdi mwohn Parao.’ E pahn wiahla lapalahn sineik men.”+ 10 Moses oh Aaron eri kohla rehn Parao oh wia duwehte me Siohwa ketin kehkehlingki. Aaron eri kesehdi nah sokono mwohn Parao oh nah ladu ko, oh e wiahla lapalahn sineik men. 11 Ahpw, Parao ekerpene ohl loalokong kan oh sounakmanaman kan, oh samworo en Isip kan me kin wia akmanaman+ pil wia soahngohte sang ni ar akmanaman.+ 12 Emenemen irail kesehdi neirail sokon, oh sokon ko wiahla lapalahn sineik kei; ahpw en Aaron sokono kadallehla neirail sokon ko. 13 Ahpw en Parao mohngiong keptakaite,+ oh e sohte rong ira, duwehte me Siohwa ketin mahsaniher.

14 Siohwa eri ketin mahsanihong Moses: “En Parao mohngiong keptakai.+ E kahng kadarala aramas akan. 15 Kohla rehn Parao nimenseng. Kilang! E pahn kohieila ni pihlo! Oh ke pahn kesikesihnen ni keilen Pillap Nail pwe ken tuhwong ih; oh wahda noumw sokon me wiahla sineiko.+ 16 Oh ke pahn ndaiong ih, ‘Siohwa, Koht en mehn Ipru kan ketin poaroneiehdo rehmw,+ oh e ketin mahsanih: “Kadarala nei aramas akan pwe ren papah ie nan sapwtehn,” ahpw lel met ke sohte peikiong ie. 17 Iet me Siohwa ketin mahsanihen: “Ke pahn ese me ngehi me Siohwa+ sang ni dahme I pahn wia. Met I pahn poakiheki pilen Pillap Nail sokon me mi ni limeiet, oh e pahn wiahla nta. 18 Oh mwahmw kan me mi nan Nail pahn mehla, oh Nail pahn pwohsuwedla, oh mehn Isip kan sohla pahn kak nimpil sang nan Nail.”’”

19 Siohwa eri ketin mahsanihong Moses: “Ndaiong Aaron, ‘Ale noumw sokonen oh kapahla pehmwen pohn pihl en Isip kan,+ pohn pillap akan, pohn dahu kan,* pohn leh kan,+ oh pohn wasahn nahk pihl koaros, pwe ren wiahla nta.’ Nta pahn mihla nan sapwen Isip pwon, pil nan dahl kan me wiawihkihda tuhke oh takai.” 20 Ahnsowohte Moses oh Aaron ahpw kapwaiada duwehte me Siohwa ketin kehkehlingki. E pwekada sokono oh poakiheki pilen Pillap Nail mwohn mesen Parao oh nah ladu ko, oh pilen pillapo pwon ahpw wiahla nta.+ 21 Oh mwahmw akan me mi nan pillapo ahpw mehla,+ pillapo eri tepida pwohsuwedla, oh mehn Isip kan sohla kak nimpil sang nan Nail,+ oh nta mihla nan sapwen Isip pwon.

22 Ahpw, samworo en Isip kan me kin wia akmanaman pil wia soahngohte sang ni ar akmanaman rir kan,+ kahrehda en Parao mohngiong pil keptakaite, oh e sohte rong ira, duwehte me Siohwa ketin mahsanih.+ 23 Parao eri pwuralahng ni imweo, oh e sohte mwahn nsenohki duwen met. 24 Eri mehn Isip kan koaros ahpw weirada keilen Nail pwon pwehn rapahki pilen nimpil, pwehki re sohte kak nim pilen Nail. 25 Oh rahn isuh dower powe mwurin Siohwa eh ketin kadarala kalokolok ehu pohn Nail.

8 Siohwa eri ketin mahsanihong Moses: “Kohla rehn Parao oh ndaiong ih, ‘Iet me Siohwa ketin mahsanihen: “Kadarala nei aramas akan pwe ren papah ie.+ 2 Ma ke pahn usehlahte kahng kadarirailla, I pahn kalokehki sapwomwen pwon kairu.+ 3 Oh Pillap Nail pahn direkihla kairu, oh re pahn kohdahdo oh pedolong nan imwomw, nan omw perehn meir, pohn omw peht, nan imwen noumw ladu kan oh noumw aramas akan, nan noumw mehn uhmw kan, oh nan noumw mehn kapal pilawa kan.*+ 4 Kairu kan pahn kohdahdo pohmw, pohn noumw aramas akan, oh pil pohn noumw ladu kan koaros.”’”

5 Mwuhr Siohwa ahpw ketin mahsanihong Moses: “Ndaiong Aaron, ‘Kapahla sokon me mi nan pehmwen pohn pillap akan, dahu en Nail kan, oh leh kan, oh kapwarehda kairu kan pohn sapwen Isip.’” 6 Aaron eri kapahla peho pohn pihl en Isip kan, kairu kan ahpw tepida kohda oh kipehdi sapwen Isip. 7 Ahpw, samworo en Isip kan me kin wia akmanaman pil wia soahngohte sang ni ar akmanaman rir kan, oh irail pil kapwarehda kairu kan pohn sapwen Isip.+ 8 Parao eri ekerodo Moses oh Aaron oh nda: “Kumwa peki rehn Siohwa en ketikihsang kairu kan sang rehi oh nei aramas akan,+ pwe I men kadarala aramas akan pwe ren wia meirong ong Siohwa.” 9 Moses eri ndaiong Parao: “Komwi me pahn padahkihong ie iahd me I pahn peki en ketikihsang kairu kat rehmwi, rehn sapwellimomwi ladu kan, rehn sapwellimomwi aramas akan, oh nan tehnpasomwi kan. Ihte nan Pillap Nail me re pahn mi loale.” 10 Parao ahpw sapeng: “Lakapw.” A Moses nda: “E pahn pweida nin duwen me komw mahsanih, pwe komwi en ese me sohte emen me duwehte Siohwa at Koht.+ 11 Kairu kan pahn pweiekla sang komwi, tehnpasomwi kan, sapwellimomwi ladu kan oh sapwellimomwi aramas akan. Ihte nan Nail me re pahn mi loale.”+

12 Moses oh Aaron eri kohieila sang rehn Parao, Moses ahpw patohwan peki rehn Siohwa duwen kairu ko me E ketikihdo rehn Parao.+ 13 Siohwa eri ketin kapwaiada me Moses pekio, kairu kan ahpw tepida mehla nan ihmw kan, nan wasa kelpene kan, oh nan sahpw akan. 14 Aramas ako eri koasoakehda kairu ko wiahda koasoakoasoak tohto, sahpwo ahpw tepida pwohsuwedla. 15 Ni Parao eh tehkada me kalokoloko uhdi, e ahpw kakeptakaila eh mohngiong+ oh kahng rong ira, duwehte me Siohwa ketin mahsaniher.

16 Siohwa eri ketin mahsanihong Moses: “Ndaiong Aaron, ‘Kapahla sokon me mi nan pehmwen oh poakiheki pwelpar en sampah, oh e pahn wiahla kisin amwin wel kan nan sapwen Isip pwon.’” 17 Ira eri wia met. Aaron kapahla sokon me mi nan peho oh poakiheki pwelpar en sampah, oh kisin amwin wel kan ahpw kipehdi aramas oh mahn akan. Pwelpar en sampah koaros ahpw wiahla kisin amwin wel kan nan sapwen Isip pwon.+ 18 Samworo kan me kin wia akmanaman ahpw pil song wia soahngohte pwe ren kapwarehda kisin amwin wel kan sang ni ar akmanaman rir kan,+ ahpw re sohte kak. Oh kisin amwin wel kan ahpw kipehdi aramas oh mahn akan. 19 Eri samworo kan me kin wia akmanaman ahpw ndaiong Parao: “Limen* Koht met!”+ Ahpw en Parao mohngiong pil keptakaite, oh e sohte rong, duwehte me Siohwa ketin mahsanih.

20 Siohwa eri ketin mahsanihong Moses: “Sangkenei pirida oh kohla kesihnenda mwohn Parao. Kilang! E pahn kohieido ni pihlen! Oh ke pahn ndaiong ih, ‘Iet me Siohwa ketin mahsanihen: “Kadarala nei aramas akan pwe ren papah ie. 21 Ahpw ma ke sohte kadarala nei aramas akan, I pahn kadarowohng uhk, noumw ladu kan, oh noumw aramas akan oh nan imwomw kan loahng;* oh ihmw kan nan Isip pahn direkihla loahng, oh re pil pahn kipehdi pwehl kan me re* kin kesihnen powe. 22 Rahno, I uhdahn pahn katohrehla sapwen Kosen, wasa me nei aramas akan kin koukousoan ie. Sohte loahng pahn mi mwo,+ oh pwehki met ke pahn ese me ngehi, Siohwa, mihmi nan sahpwet.+ 23 Oh I pahn kasalehda wekpeseng en nanpwungen nei aramas akan oh noumw aramas akan. Lakapw kilel wet pahn wiawi.”’”

24 Siohwa eri ketin kapwaiada met, oh mwutumwut en loahng kan ahpw tepida kohlongala nan imwen Parao oh imwen nah ladu kan oh sapwen Isip pwon.+ Sahpwo ahpw ohkihla loahng.+ 25 Parao eri ekerodo Moses oh Aaron oh nda: “Kumwail kohwei wia meirong ong amwail Kohto nan sahpwet.” 26 Moses ahpw nda: “Met sohte konehng en wiawi, pwehki dahme se pahn meirongkihong at Koht Siohwa pahn kasaut ong mehn Isip kan.+ Ma se pahn wiahda meirong ehu me mehn Isip kan kin sautki mwohn masarail kan, re sou pahn kateikitedi? 27 Se pahn wia seiloak en rahn siluh kohla nan sapwtehn, oh wasao me se pahn wia meirong ong at Koht Siohwa, duwehte me e ketin mahsanihongkitehr.”+

28 Parao eri nda: “I pahn kadarkumwailla pwe kumwail en wia meirong ong amwail Koht Siohwa nan sapwtehn. Ihte, kumwail sohte pahn kohla wasa doh. Kumwail kapakapkin ie.”+ 29 Moses eri nda: “Met I pahn kohkohlahsang komwi, oh I pahn patohwan peki rehn Siohwa, oh loahng kan pahn pweiekla sang komwi Parao, sapwellimomwi ladu kan, oh sapwellimomwi aramas akan lakapw. Ahpw komwi Parao anahne uhdihsang pitih* kiht ni omwi kahng kadarala nei aramas akan pwe ren wia meirong ong Siohwa.”+ 30 Moses eri kohieila sang rehn Parao oh patohwan peki rehn Siohwa.+ 31 Siohwa eri ketin kapwaiada dahme Moses pekio, oh loahng ko ahpw pweiekla sang rehn Parao, nah ladu kan, oh nah aramas akan. Sohte emen me luhwehdi. 32 Ahpw, Parao pil pwurehng kakeptakaila eh mohngiong oh sohte kadarala aramas ako.

9 Siohwa eri ketin mahsanihong Moses: “Kohla rehn Parao oh ndaiong ih, ‘Iet me Siohwa, Koht en mehn Ipru kan ketin mahsanihen: “Kadarala nei aramas akan pwe ren papah ie.+ 2 Ahpw ma ke kahng kadarirailla oh kolokolete irail, 3 kilang! Limen Siohwa+ pahn kaloke noumw pelinmen kan nan sahpwo. E pahn mie soumwahu laud ehu ong oahs kan, dongki kan, kamel kan, pelin kou kan, oh pelin sihpw kan.+ 4 Oh Siohwa pahn ketin kasalehda wekpeseng en nanpwungen nein mehn Israel kan pelinmen oh nein mehn Isip kan pelinmen, oh sohte nein mehn Israel kan mahn pahn mehla.”’”+ 5 Oh pil Siohwa ketin koasoanehdi ahnsou ehu, oh ketin mahsanih: “Lakapw Siohwa pahn ketin wia met nan sahpwet.”

6 Siohwa eri ketin kapwaiada met mandahn rahno, oh soangsoangen pelinmen koaros nan Isip ahpw tepida mehla,+ ahpw sohte emen nein mehn Israel ko pelinmen mehla. 7 Ni Parao eh tehkada, a kilang! sohte emen nein mehn Israel ko pelinmen mehla. Ahpw en Parao mohngiong keptakaite, oh e sohte kadarala aramas ako.+

8 Siohwa eri ketin mahsanihong Moses oh Aaron: “Audehkihda pehmwa kan pehs sang nan wasahn uhmw ehu, oh Moses pahn kesedahng nan wehwe mwohn Parao. 9 Oh e pahn wiahla pwelpar wasa koaros nan sapwen Isip, oh e pahn wiahla mpwos suwed rehn aramas oh mahn akan nan sapwen Isip pwon.”

10 Ira eri ale pehs sang nan wasahn uhmw ehu oh kesihnenda mwohn Parao, Moses eri kesedahng nan wehwe, oh e wiahla mpwos suwed rehn aramas oh mahn akan. 11 Samworo kan me kin wia akmanaman sohte kak kesihnenda mwohn Moses pwehki mpwos ko, pwe e kohda rehn samworo ko me kin wia akmanaman oh rehn mehn Isip kan koaros.+ 12 Ahpw Siohwa ketin mweidohng en Parao mohngiong en keptakaila, oh e sohte rong ira, duwehte me Siohwa ketin mahsanihong Moses.+

13 Siohwa eri ketin mahsanihong Moses: “Sangkenei pirida oh kohla kesihnenda mwohn Parao, oh ndaiong ih, ‘Iet me Siohwa, Koht en mehn Ipru kan ketin mahsanihen: “Kadarala nei aramas akan pwe ren papah ie. 14 Pwe met I pahn kadarewei ei kalokolok koaros rehmw, rehn noumw ladu kan, oh rehn noumw aramas akan, pwe ken ese me sohte emen me duwe ie nan sampah pwon.+ 15 Pwe met I kakete kapahwei limeiet pwehn kalokehkin uhk oh noumw aramas akan soumwahu laud ehu, oh ke pahn sohrala* sang sampah. 16 Ahpw I mweidohng uhk ken momour sang ni kahrepe wet: pwe I en kasalehiong uhk ei manaman oh I en wiahiong mwarei en lohkseli nan sampah pwon.+ 17 Ke kin wie aklapalapongete nei aramas akan ni omw sohte kadarirailla? 18 I pahn kahrehiong keteu aihs takai kamasepwehk en mweredi lakapw ni soangen ahnsou wet, soahng me saikinte wiawi nan Isip sangete ahnsou me e wiawihda leledo met. 19 Kahrehda ileklahng noumw ladu kan ren wahdo noumw pelinmen kan koaros oh soahng koaros me ahmw nan sahpwo ren kohdo nan ihmw. Emenemen aramas oh mahn me mi nan mohso oh sohte wisiklongodo nan ihmw pahn mehla ni keteu aihs takai eh pahn mwerediong pohrail.”’”

20 Nanpwungen nein Parao ladu ko me kin lemmwiki sapwellimen Siohwa mahsen ahpw mwadangete wahlongodo nah ladu kan oh nah pelinmen kan nan imwarail kan, 21 ahpw irail me sohte nsenohki sapwellimen Siohwa mahseno pwilikihdihte neirail ladu kan oh pelinmen kan nan mohso.

22 Siohwa eri ketin mahsanihong Moses: “Kauwadalahng pehmwen nanleng, pwe keteu aihs takai en mwerediong nan sapwen Isip pwon,+ pohn aramas oh mahn oh dihpw koaros nansapw.”+ 23 Moses eri kauwadalahng nah sokono nanleng, Siohwa eri ketin kadaridi nansapwe oh keteu aihs takai, oh kisiniei* ahpw mwerediong sampah, oh Siohwa ketin pousehlahte kamwakamwerehdi keteu aihs takai nan sapwen Isip. 24 Keteu aihs takai mweredi, oh kisiniei piripir nanpwungen keteu aihs takai ko. E uhdahn kamasepwehk; sohte mehkot ehu me duwehte met me wiawi nan sahpwo sangete ahnsou me Isip wiahla wehi ehu.+ 25 Keteu aihs takaio kauwehla soahng koaros nan sapwen Isip pwon, aramas iangahki mahn akan, oh e kauwehla dihpw oh tuhkehn nansapw akan koaros.+ 26 Ihte nan sapwen Kosen wasa me mehn Israel kan mi ie, me sohte keteu aihs takai.+

27 Parao eri ileklahng rehn Moses oh Aaron oh ndaiong ira: “Met I dipadahr. Siohwa me ketin pwung, a ngehi oh nei aramas akan me sapwung. 28 Peki rehn Siohwa pwe nansapwe oh keteu aihs takai en tokedi. I ahpw pahn kadarkumwailla, oh kumwail sohla pahn mihmi met.” 29 Moses eri ndaiong ih: “Ni ahnsou me I pahn kohieila sang nan kahnimw wet, I pahn kihpeseng pehi kat mwohn silangin Siohwa. Nansapwe ahpw pahn uhdi oh keteu aihs takai sohla pahn wiawi, pwe komwi en ese me sampah iei sapwellimen Siohwa.+ 30 A komwi oh sapwellimomwi ladu kan, I eseier me pil ni ahnsowo, kumwail sohte pahn lemmwiki Siohwa Koht.”

31 Plaks* oh parli kan ohla, pwehki parli kan miehier wah oh plaks kan kereniongehr masalpeseng. 32 Ahpw wihd kan* sohte ohla, pwehki re kin wa mwuhr.* 33 Moses eri kohieila sang nan kahnimwo rehn Parao oh kihpeseng peh ko mwohn silangin Siohwa, oh nansapwe oh keteu aihs takai ahpw uhdi oh keteu pil tokedihsang mweremwerediong nin sampah.+ 34 Ni Parao eh kilangada me keteu, keteu aihs takai, oh nansapwe uhdi, e ahpw pwurehng dipada oh kakeptakaila eh mohngiong,+ ih oh pil nah ladu kan. 35 Oh en Parao mohngiong keptakaite, oh e sohte kadarala mehn Israel ko, duwehte me Siohwa ketin mahsanih ni eh ketin doadoahngki Moses.+

10 Siohwa eri ketin mahsanihong Moses: “Kohla rehn Parao, pwe I mweidohng eh mohngiong oh mohngiong en nah ladu kan en keptakaila,+ pwe I en kasalehda ei kilel kat mwohn mese,+ 2 oh pwe ken padahkihong noumw seri kan oh nein noumw seri kan uwen laud en ei kaloke mehn Isip kan oh kilel dah kan me I wiahiong irail;+ oh kumwail uhdahn pahn ese me ngehi me Siohwa.”

3 Moses oh Aaron ahpw kohla rehn Parao oh ndaiong ih: “Iet me Siohwa, Koht en mehn Ipru kan ketin mahsanihen, ‘Ia erein omw sohte pahn uhpahiong ie?+ Kadarala nei aramas akan pwe ren papah ie. 4 Pwe ma ke usehlahte kahng kadarala nei aramas akan, eri, I pahn wahdo loukust kan nan sapwomw kan lakapw. 5 Oh irail pahn kipehdi pohn sampah, oh sohla me pahn kak kilang pwehl. Re pahn kangala mehkoaros me pitsang keteu aihs takaio oh luhwehdi ong kumwail, oh re pahn kangala amwail tuhke koaros me kekeirda nansapw.+ 6 Irail pahn audehla nan imwomw kan, imwen noumw ladu kan koaros, oh ihmw en Isip koaros ni uwe ieu me semomw ko oh omw pahpa kahlap ako saikinte kilang sangete ahnsou me re mi nan sahpwet leledo rahnwet.’”+ Ih eri sohpeila oh kohieila sang rehn Parao.

7 Nein Parao ladu ko ahpw ndaiong ih: “Ia erein ohl menet eh pahn usehlahte kahpwalih* kitail? Kadarala aramas akan pwe ren papah arail Koht Siohwa. Komw sohte mahsanih me Isip ohlahr?” 8 Moses oh Aaron eri kapwurpwurdo rehn Parao, oh e ndaiong ira: “Kumwail kohla papah amwail Koht Siohwa. Ahpw ihs me pahn iang kohla?” 9 Moses eri nda: “Se pahn kohla iangahki nait me pwulopwul kan, nait me mah kan, nait pwutak kan, nait serepein kan, nait sihpw kan, oh nait kou kan,+ pwehki se pahn wia kasarawi ehu ong Siohwa.”+ 10 Ih eri ndaiong ira: “Ma I pahn kadarkumwailla oh noumwail seri kan, eri Siohwa uhdahn ketin ieiang kumwail!+ E sansal me kumwail koasoakoasoane en wia mehkot suwed. 11 Eri, soh! Kumwail ohl akante me pahn kohla oh papah Siohwa, pwe ih me kumwail peki.” Ira eri pekeusieisang mwohn Parao.

12 Siohwa eri ketin mahsanihong Moses: “Kapahla pehmwen pohn sapwen Isip pwe loukust kan en pwarada nan sahpwet pwon oh kangala dihpw koaros nan sahpwet, mehkoaros me luhwehdi sang keteu aihs takaio.” 13 Moses eri kapahla nah sokono pohn sapwen Isip, oh Siohwa ketin kahrehiong kisinieng en palimese en ipido pohn sahpwo rahno pwon oh pwohngo pwon. Nimenseng en mandahn rahno, kisinieng en palimese ahpw wahdo loukust kan. 14 Loukust ko ahpw kohda pohn sapwen Isip pwon oh mihla wasa koaros nan Isip.+ E uhdahn suwed;+ sangete mahso sohte soangen tohtohn loukust kat, de pil e sohte pahn pwurehng wia soangen tohto wet. 15 Irail kipehdi pwelen sahpwo pwon, oh sahpwo rotorotala pwehki irail; irail kangala dihpw koaros nan sahpwo oh wahntuhke koaros me luhwehdi sang keteu aihs takaio; sohte tehntuhke pwoat de kisin dihpw kis me luhwehdi nan sapwen Isip pwon.

16 Parao eri mwadangete ekerodo Moses oh Aaron oh nda: “I dipadahr ong Siohwa amwail Koht oh ong kumwail. 17 Eri, menlau mahkohng dipeiet ahnsou wette, oh peki rehn Siohwa amwail Koht en ketikihsang kalokolok wet pohi.” 18 Ih* eri kohieila sang rehn Parao oh wia eh pekipek ong Siohwa.+ 19 Siohwa eri ketin wekidala kisiniengo, oh e uhd wiahla kisinieng en palikapi me kehlail, oh e ipirasang loukust ko oh ipiriraillahng nan Sehd Weitahtao. Sohte emente loukust me luhwehdi nan sapwen Isip pwon. 20 Ahpw, Siohwa ketin mweidohng en Parao mohngiong en keptakaila,+ oh e sohte kadarala mehn Israel ko.

21 Siohwa eri ketin mahsanihong Moses: “Kauwadalahng pehmwen nanleng pwe rotorot en kipehdi sapwen Isip, rotorot mosul.” 22 Moses eri mwadangete kauwadalahng peho nanleng, oh rotorot mosul ehu ahpw kipehdi sapwen Isip pwon erein rahn siluh.+ 23 Irail sohte kilang emenemen, oh sohte emen irail kohsang wasa me re mihmi ie erein rahn siluh; ahpw mie marain wasa me mehn Israel ko koukousoan ie.+ 24 Parao eri ekerodo Moses oh nda: “Kumwail kohla papah Siohwa.+ Ihte noumwail sihpw kan oh noumwail kou kan me pahn mihmi. Pil noumwail seri kan kak iang kumwail kohla.” 25 Moses ahpw nda: “Komwi me pahn ketikihong kiht* meirong kan oh meirong isihs kan, oh se pahn meirongkihong Siohwa at Koht mepwukat.+ 26 Nait pelinmen kan pil pahn iang kiht kohla. Sohte mweimwei mahn emen en mihmi, pwehki se pahn doadoahngki ekei pwehn kaudokiong Siohwa at Koht, oh se sehse dahme se pahn meirongkihla nan at kaudok ong Siohwa lao se lella mwo.” 27 Siohwa eri ketin mweidohng en Parao mohngiong en keptakaila, oh e sohte pwungki kadarirailla.+ 28 Parao eri ndaiong Moses: “Kohkohweisang mwohi! Ke dehpa pil song en pwurehng kilang meseiet, pwe rahnohte me ke pahn kilang meseiet, ke pahn mehla.” 29 Moses eri nda: “Nin duwen me komw mahsanih, I sohte pahn song en pwurehng kilang silangomwi.”

11 Siohwa eri ketin mahsanihong Moses: “Kalokolok ehu luhwe me I pahn wadohng pohn Parao oh Isip. Mwurin mwo e pahn kadarkumwailla sang wasaht.+ Ni eh pahn kadarkumwailla, e uhdahn pahn kasareikumwailla sang wasaht.+ 2 Eri ndaiong aramas akan me ohl oh lih koaros pahn peki rehn mehn mparail kan soahng kan me wiawihkihda silper oh kohl.”+ 3 Siohwa eri ketin kahrehiong aramas ako ren kenikenla rehn mehn Isip kan. Oh Moses pil waunla mehlel nan sapwen Isip rehn nein Parao ladu ko oh aramas ako.

4 Moses eri nda: “Iet me Siohwa ketin mahsanihen, ‘Erein lukepen pwong I pahn kohieila nan Isip,+ 5 oh mesenih koaros nan sapwen Isip pahn mehla,+ sangete mesenihen Parao me mwomwohd pohn mwoale lel mesenihen lidu serepein me kin ngidar pilawa,* oh mesenihen pelinmen koaros.+ 6 Nan sapwen Isip pwon, e pahn mie mwahiei laud ehu me saikinte wiawi sang mahs oh pil sohte pahn pwurehng wiawi.+ 7 Ahpw sohte kidi men me pahn ngongih mehn Israel kan, aramas akan de neirail pelinmen kan, pwe kumwail en ese me Siohwa kak ketin kasalehda wekpeseng en nanpwungen mehn Isip kan oh mehn Israel kan.’+ 8 Oh sapwellimomwi ladu kan koaros uhdahn pahn kohdihdo rehi oh lukupoardiong ie, nda, ‘Kohla, kowe oh aramas akan koaros me idawehn uhk.’+ Mwurin mwo I ahpw pahn patopatohla.” Ih eri kohieila sang rehn Parao ni eh lingeringer laud.

9 Siohwa eri ketin mahsanihong Moses: “Parao sohte pahn rong uhk.+ Met pahn wiawi pwe ei manaman kapwuriamwei kan en tohtohla nan sapwen Isip.”+ 10 Moses oh Aaron ahpw wiahda manaman kapwuriamwei kat koaros mwohn Parao,+ ahpw Siohwa ketin mweidohng en Parao mohngiong en keptakaila, kahrehda e sohte kadarala mehn Israel kan sang nan sapweo.+

12 Siohwa eri ketin mahsanihong Moses oh Aaron nan sapwen Isip: 2 “Sounpwong wet iei tepin sounpwong ong kumwail. Met pahn wia keieun sounpwong en pahr ong kumwail.+ 3 Ndaiong mwomwohdisohn Israel pwon, ‘Ni kaeisek en rahnen sounpwong wet, emenemen irail pahn pilada emen sihpw+ ong arail peneinei,* emen sihpw ong ehu ihmw. 4 Ahpw ma tohnpeneineio me nohn malaulau ong sihpwo, irail oh mehn mparail* me keieu keren pahn ehukihpene nanpwungarail sihpwo nan imwarail ni uwen tohtohn aramas ako.* Ni ar pahn wadekedi meh depe, ren koasoanehdi uwen me emen pahn tungoale sihpwo. 5 Noumwail sihpwo pahn roson mwahu,+ sihpw wol men me sounpar ehu. Kumwail kak pilada sang rehn sihpw wol pwulopwul kan de kuht kan. 6 Kumwail pahn apwalih sihpwo lao lel ni 14 en sounpwong wet,+ oh mwomwohdisohn Israel pwon pahn anahne kemehla sihpwo nin soutik mwohn eh pahn rotorotala.*+ 7 Irail pahn ale ekis ntao oh usupihki uhr riau en wenihmw kan oh temwen wenihmw en ihmw kan me re pahn tungoale sihpwo ie.+

8 “‘Irail pahn tungoale uduko nipwongohte.+ Irail pahn karangada pohn kisiniei oh seliehki pilawa me sohte doal ihs+ oh tehntuhke katik kan.+ 9 Dehr tungoale uduko amas de pwoail, ahpw karangada pohn kisiniei, moange iangahki neh kan* oh kepwehn loale kan. 10 Kumwail dehpa nekidala mehkot lel nimenseng, ahpw ma mie luhwe lel nimenseng, kumwail anahne isikala.+ 11 Oh iet duwen amwail pahn tungoale uduko, kumwail katengehki lukopamwail kan mehn kateng, kihong suht kan ni nehmwail kan, oh kolokol noumwail sokon nan pehmwail kan; oh kumwail pahn tungoale pitipit. Met sapwellimen Siohwa Pahsohpa. 12 Pwe nipwongohte I pahn keidwei nan sapwen Isip oh kemehla mesenih koaros nan sapwen Isip, sangete aramas lel mahn akan;+ oh I pahn kadeikada koht en Isip kan koaros.+ Ngehi me Siohwa. 13 Ntao pahn wia kilel en ihmw kan me kumwail mi ie; oh I pahn kilang ntao oh daulih kumwail, oh kalokolok sohte pahn lelohng kumwail pwehn kamwomwkumwailla ni ei pahn kaloke sapwen Isip.+

14 “‘Rahno pahn wia mehn kataman ehu ong kumwail, oh kumwail pahn wia met nin duwen kasarawi ehu ong Siohwa erein dih kan me pahn kohdo. Kumwail pahn wia kasarawi wet nin duwen koasoandi poatopoat ehu. 15 Erein rahn isuh kumwail pahn tungoale pilawa me sohte doal ihs.+ Ei, ni keieun rahn, kumwail pahn kihsang ihs* nan imwamwail kan, pwehki mehmen me tungoale mehkot me doal ihs sang ni keieun rahn lel ni keisuhwen rahn, aramaso* pahn kamakamala.* 16 Ni keieun rahn kumwail pahn wia kapokon sarawi ehu, oh ni keisuhwen rahn, pil ehu kapokon sarawi. Sohte doadoahk pahn wiawi ni rahn pwukat.+ Ihte kumwail kak kaunopada uwen mwenge ieu me emenemen anahne tungoale.

17 “‘Kumwail uhdahn pahn wia Kasarawien Pilawa me Sohte Doal Ihs,+ pwe ih rahno me I pahn wahieisang noumwail aramas ngeder kan* sang nan sapwen Isip. Oh kumwail uhdahn pahn kolokol rahnwet erein dih kan me pahn kohdo nin duwen koasoandi poatopoat ehu. 18 Ni keieun sounpwong, ni 14 en sounpwongo, nin soutik, kumwail pahn tungoale pilawa me sohte doal ihs lao lel nin soutik en 21 en sounpwongo.+ 19 Sohte ihs* pahn dierek nan imwamwail kan erein rahn isuh, pwehki ma mehmen pahn tungoale mehkot me doal ihs, mehnda ma ih mehn liki men de pwilidak en Israel men,+ aramaso* pahn kamakamala.*+ 20 Kumwail sohte pahn tungoale mehkot me doal ihs. Nan imwamwail kan koaros, kumwail pahn tungoale pilawa me sohte doal ihs.’”

21 Moses eri mwadangete ekerodo ohl mah kan koaros en Israel+ oh ndaiong irail: “Kumwail kohla oh pilada mahn pwulopwul kan* ong ehuehu amwail peneinei kan, oh kemehla mahn en Pahsohpa. 22 Kumwail ahpw pahn kaduh rahn isop pwoat nan nta me mi nan peisin ehu oh usupihki ntao ni temwen wenihmwo oh uhr riau en wenihmw kan; oh sohte emen kumwail pahn kohieila sang nan imwe lao lel nimenseng. 23 Oh ni Siohwa eh pahn ketin keidwei nan sahpwo pwe en ketin kaloke mehn Isip kan oh mahsanihada nta ni temwen wenihmwo oh uhr riau en wenihmw kan, Siohwa uhdahn pahn ketin daulih wenihmwo, oh e sohte pahn ketin mweidohng kalokolok en mehla* en pedolong nan imwamwail kan.+

24 “Kumwail pahn kapwaiada wiewia wet nin duwen koasoandi poatopoat ehu ong kumwail oh noumwail seri kan.+ 25 Oh ni amwail pahn pedolong nan sahpw me Siohwa pahn ketikihong kumwail duwen me e ketin mahsaniher, kumwail pahn kapwaiada kasarawi wet.+ 26 Oh ni noumwail seri kan ar pahn idek rehmwail, ‘Ia wehwehn kasarawi wet?’+ 27 Kumwail pahn nda, ‘Met meirong en Pahsohpa ong Siohwa, me ketin daulih imwen mehn Israel kan nan Isip ni eh ketin kaloke mehn Isip kan, ahpw e ketin doarehla tohnimwatail kan.’”

Aramas ako eri kelepwikihdi oh lukupoardi. 28 Mehn Israel kan eri kohla oh kapwaiada duwehte me Siohwa ketin kehkehlingkihong Moses oh Aaron.+ Irail uhdahn kapwaiada.

29 Ni lukepen pwong Siohwa eri ketin kemehla mesenih koaros nan sapwen Isip,+ sangete mesenihen Parao me mwomwohd pohn mwoale lel mesenihen en me sensel nan imweteng,* oh mesenihen mahn akan koaros.+ 30 Parao eri pwourda nipwongo iangahki nah ladu ko koaros oh mehn Isip teikan koaros, oh mwahiei laud ehu ahpw wiawi nanpwungen mehn Isip kan, pwehki sohte ihmw ehu mie me sohte emen mehla ie.+ 31 Nipwongohte e ahpw ekerodo Moses oh Aaron+ oh nda: “Uhda, kohkohlahsang rehn nei aramas akan, kumwa oh mehn Israel teikan. Kumwail kohla oh papah Siohwa, duwehte me kumwail ndao.+ 32 Wahda noumwail pelin sihpw kan oh kuht kan oh kou kan oh kohkohla, duwehte me kumwail ndao.+ Ahpw kumwail pil anahne kapaiaiehda.”

33 Oh mehn Isip ko ahpw tepida kangoangehki aramas ako ren mwadang mweselsang+ nan sahpwo, oh re kin ndaiong irail: “Ma kumwail sohte pahn kohkohla, kiht koaros pahn mehla!”+ 34 Aramas ako eri kapaikada arail pilawa amas me saikinte doalihsda, iangahki neirail mehn kapal pilawa kan* me koarukpene nan arail likou kan. 35 Mehn Israel ko eri kapwaiada dahme Moses ndaiong irail ren wia oh peki rehn mehn Isip kan soahng kan me wiawihkihda silper oh kohl oh pil likou.+ 36 Siohwa ketin kahrehiong aramas ako ren kenikenla rehn mehn Isip ko, irail eri kihong aramas ako dahme re peki, oh aramas ako kihsang en mehn Isip ko kepwe kan.+

37 Mehn Israel ko eri mweselsang Rameses+ kohla Sukot,+ likin seri kan, mpen ohl 600,000 me alu.+ 38 Oh pokon en mehn liki kei*+ pil iangirailda, iangahki pelin sihpw kan oh kuht kan oh kou kan, pelinmen tohto. 39 Irail eri tepida umwunda pilawa ko me re wahsang Isip, re wiahda pilawa pwonopwon me sohte doal ihs. E sohte doalihsda, pwehki re mwadangete pekeusieisang Isip kahrehda re sohte kaunopada kanarail mwenge.+

40 Mehn Israel kan me mweselsang Isip+ koukousoanki sounpar 430 nan sapwen mehn liki.+ 41 Ni kaimwiseklahn sounpar 430, ni rahnohte, sapwellimen Siohwa aramas ngeder ko koaros* ahpw mweselsang nan sapwen Isip. 42 Iei pwohng wet me irail pahn kasarawih Siohwa eh ketin kahluwairailsang nan sapwen Isip. Aramas en Israel koaros pahn kasarawih pwohng wet ong Siohwa erein dih kan me pahn kohdo.+

43 Siohwa eri ketin mahsanihong Moses oh Aaron, “Iet koasoandi kan ong Pahsohpa: Sohte mehn liki men pahn iang tungoale mwengehn pahsohpao.+ 44 Ahpw ma mehmen me naineki lidu ohl men me pweipweikihda mwohni, ke pahn anahne sirkumsaisihala.+ Eri e ahpw pahn kak iang tungoale. 45 Mehn liki men me kin kousoan nanpwungamwail oh tohndoadoahk alahlda men sohte pahn iang tungoale. 46 Nan ehu ihmw kumwail pahn tungoalehla mahno pwon. Ke sohte pahn wahla ekis uduko likin ihmwo, oh kumwail sohte pahn katimpeseng apwoat tihn mahno.+ 47 Mwomwohdisohn Israel pwon pahn kin kasarawi Pahsohpao. 48 Ma mehn liki me kin kousoan rehmwail oh e men iang kasarawih Pahsohpao ong Siohwa, ohl koaros me mi nan imwe pahn anahne sirkumsaisla. Mwurin mwo, e ahpw pahn kak iang kasarawih met, oh e pahn duwehla pwilidak en sahpwo. Ahpw ohl emen me sohte sirkumsaisla sohte pahn iang tungoale.+ 49 Kosonned tehieu pahn doadoahk rehn pwilidak kan oh rehn mehn liki kan me kin kousoan nanpwungamwail.”+

50 Mehn Israel ko koaros eri kapwaiada duwehte me Siohwa ketin kehkehlingkihong Moses oh Aaron. Irail uhdahn kapwaiada. 51 Ni rahnohte, Siohwa ketin wahieisang mehn Israel ko iangahki neirail aramas ngeder kan* sang nan sapwen Isip.

13 Siohwa pil ketin mahsanihong Moses: 2 “Kasarawihong* ie mesenih ohl koaros* en mehn Israel kan. Mesenih ohl me ipwisang aramas oh mahn iei nei.”+

3 Moses eri ndaiong aramas ako: “Kumwail tamataman rahnwet me kumwail kohieisang nan Isip,+ wasa me kumwail wia lidu ie,* pwehki Siohwa ketin waikumwailsang wasaht sang nin lime manaman.+ Kahrehda kumwail sohte pahn tungoale mehkot me doal ihs. 4 Kumwail kohieila sang Isip rahnwet, ni sounpwong en Apip.*+ 5 Ni Siohwa eh pahn ketin kahluweiukalahng nan sapwen mehn Kenan kan, mehn Id kan, mehn Amor kan, mehn Ip kan oh mehn Sepus kan+ me e ketin kahukihong semomw mehn mahs ako me e pahn ketikihong uhk,+ sahpw ehu me inenen pwelmwahu,*+ eri ke ahpw pahn kapwaiada kasarawi wet ni sounpwong wet. 6 Rahn isuh ke pahn kin tungoale pilawa me sohte doal ihs,+ oh ni keisuhwen rahn, e pahn mie kasarawi ehu ong Siohwa. 7 Ke pahn tungoale pilawa me sohte doal ihs erein rahn isuh ko;+ oh sohte mehkot me doal ihs pahn dierek rehmw,+ oh sohte ihs* pahn dierek rehmw nan sapwomw pwon. 8 Oh ke pahn ndaiong noumw seri kan rahno, ‘I kin wia met pwehki dahme Siohwa ketin wiahiong ie ni ei kohieido sang Isip.’+ 9 Oh met pahn wia kilel ehu ong uhk ni pehmwen oh mehn kataman ehu pohn temwomwen,*+ pwe sapwellimen Siohwa kosonned en mihmi nan ewomwen, pwe Siohwa ketin waiukasang nan Isip sang nin lime manaman. 10 Ke pahn kapwaiada koasoandi wet ni ahnsou me kileldi nan pahr koaros.+

11 “Ni Siohwa eh pahn ketin kahluwaiukalahng nan sapwen mehn Kenan kan, me e ketin kahukihong uhk oh semomw mehn mahs ako me e pahn ketikihong uhk,+ 12 ke pahn anahne katohrehla mesenih ohl koaros* ong Siohwa, oh pil mesenih wol koaros en pelinmen kan me ke alehda. Ohl kan iei sapwellimen Siohwa.+ 13 Ke pahn pwainsapahlkihda mesenihen dongki koaros sihpw men, oh ma ke sohte pwainda sapahl dongkio, eri ke pahn katimpeseng tepinwere. Oh ke pahn anahne pwainda sapahl mesenihen noumw pwutak kan koaros.+

14 “Ma noumw seri men pahn idek rehmw mwuhr, ‘Ia wehwehn met?’ ke pahn ndaiong ih, ‘Sang nin lime manaman, Siohwa ketin waikitodo sang nan Isip, wasa me se wia lidu ie.*+ 15 Ni Parao eh keptakaila oh kahng kadarkitala,+ Siohwa ketin kemehla mesenih koaros nan sapwen Isip, sangete mesenihen aramas lel mesenihen mahn.+ Ihme kahrehda I kin meirongkihong Siohwa mesenih ohl koaros,* oh I kin pwainda sapahl mesenih koaros en nei pwutak kan.’ 16 Met pahn wia kilel ehu ni pehmwen oh rasehng mehkot me pirapiriong pohn temwomwen,*+ pwe Siohwa ketin waikitaildo sang nan Isip nin lime manaman.”

17 Eri ni Parao eh kadarala aramas ako, Koht sohte ketin kahluwairailla nan ahl me kolahng sapwen mehn Pilisdia kan, mendahki eh keren. Pwe Koht ketin mahsanih: “Aramas kat kakete wekidala arail madamadau ni ar pahn lelohng mahwen oh pahn pwurala Isip.” 18 Koht eri ketin kahrehiong aramas ako ren pidekla ni ahl me kolahng nan sapwtehn me mi limwahn Sehd Weitahtao.+ Ahpw mehn Israel ko mweselsang nan sapwen Isip ni ireken mahwen. 19 Moses pil wahda tihn Sosep ko, pwehki Sosep kahrehiong kadaudok en Israel kan ren kahukihla: “Koht uhdahn pahn ketin sewese kumwail, oh kumwail pahn wahsang ei tih kat wasaht.”+ 20 Irail eri mweselsang Sukot oh kauwada imwarail impwal kan nan Edam, ni irepen sapwtehno.

21 Nin rahn, Siohwa kin ketin tieng mwohrail ni uhren depwek ehu pwehn ketin kahluwa irail nan ahlo,+ a nipwong ni uhren kisiniei ehu pwehn ketin kamarainih irail, pwe irail en kak seiloak nin rahn oh nipwong.+ 22 Uhren depweko sohte kin mwekidsang mwohn aramas ako erein ni rahn, oh pil uhren kisinieio sohte kin mwekidsang mwohrail nipwong.+

14 Siohwa eri ketin mahsanihong Moses: 2 “Ndaiong mehn Israel kan ren pwurodo oh kauwada imwarail impwal kan mwohn Piairod, nanpwungen Mikdol oh sehdo, sallahng Paal-sepon.+ Kumwail pahn kauwada imwamwail impwal kan sallahng Paal-sepon, limwahn sehdo. 3 Parao ahpw pahn ndahki mehn Israel kan, ‘Irail pingipingseli nan sahpwo. Irail tengalahr nan sapwtehno.’ 4 I pahn mweidohng en Parao mohngiong en keptakaila,+ oh e pahn pwakihirailla, oh I pahn kalinganeiehla ni ei pahn kalowehdi Parao oh nah karis en sounpei kan koaros;+ oh mehn Isip kan uhdahn pahn ese me ngehi me Siohwa.”+ Eri ih met me re wia.

5 Mwuhr pakair ahpw wiawihong nanmwarkien Isipo me aramas ako tangehr. Ni ahnsowohte Parao oh nah ladu ko ahpw wekidala arail madamadau ong aramas ako,+ irail eri nda: “Dahme kitail wiahki met oh kadarala Israel ni ar liduliduwih kitail?” 6 Ih eri kaunopada were kurumahn mahwen ko oh kahrehda nah aramas ako.+ 7 E wahda were kuruma 600 me keieu mwahu oh kurumahn Isip teikan koaros, oh mie sounpei kan nan ehuehu kuruma ko. 8 Kahrehda Siohwa ketin mweidohng mohngiong en Parao nanmwarkien Isip, en keptakaila, oh e pwakihala mehn Israel ko, nindoken mehn Israel ko ar mwesemwesel sang nan sahpwo ni eimah.*+ 9 Mehn Isip ko eri pwakihirailla,+ oh oahs en weren Parao kuruma ko koaros oh nah sountangahki ko koaros oh nah karis en sounpei ko koaros ahpw koanoairaildi wasa me re kauwada imwarail impwal ko limwahn sehdo, limwahn Piairod, sallahng Paal-sepon.

10 Ni Parao eh kerendo, mehn Israel ko ahpw kilengla oh kilangada mehn Isip ko ar pwakipwakih irail. Mehn Israel ko ahpw masepwehkada oh tepida likweriong Siohwa.+ 11 Irail eri ndaiong Moses: “Pwehki eh sohte wasahn seridi nan Isip me ke wahkinkitodo met pwe sen mehla nan sapwtehnet?+ Dahme ke wiahiongkitehr ni omw kahreikitasang nan Isip? 12 Kaidehn ih met me se ndaiong uhk nan Isip, ni at nda, ‘Piseksang kiht, pwe sen papah mehn Isip kan’? Pwe e mwahuwong kiht en papah mehn Isip kan sang at pahn mehla nan sapwtehnet.”+ 13 Moses eri ndaiong aramas ako: “Kumwail dehr masak.+ Kesihnenda teng oh kilang sapwellimen Siohwa komour me e pahn ketin wiahiong kumwail rahnwet.+ Pwe mehn Isip pwukan me kumwail kilikilang rahnwet, kumwail sohla douluhl pahn pwurehng kilang irail.+ 14 Pein Siohwa me pahn ketin mahwenkin kumwail,+ kumwail pahn nennenlahte.”

15 Siohwa eri ketin mahsanihong Moses: “Dahme ke likilikwerihkin ie? Ndaiong mehn Israel kan ren kihpene imwarail impwal kan. 16 A kowe, pwekada noumw sokonen oh kapahwei pehmwen pohn sehden oh pwalangpeseng, pwe mehn Israel kan en kak aluhwei nanwerengen sehden pohn ngalangal. 17 A ngehi, I pahn mweidohng mohngiong en mehn Isip kan en keptakaila, pwe ren pwakihirailwei; eri I pahn kalinganeiehla ni ei pahn kalowehdi Parao oh nah karis en sounpei kan koaros, were kurumahn mahwen kan koaros, oh nah sountangahki kan koaros.+ 18 Oh mehn Isip kan uhdahn pahn ese me ngehi me Siohwa ni ahnsou me I pahn kalinganeiehla ni ei pahn kalowehdi Parao, were kurumahn mahwen kan, oh nah sountangahki kan.”+

19 Tohnleng en Koht mehlelo+ me kin tieng mwohn mehn Israel ko ahpw kohla mwurirail, oh uhren depwek me mi mwohrailo pil keseula mwurirail oh mihmihte mwurirail.+ 20 E kohdo nanpwungen mehn Isip ko oh mehn Israel ko.+ Ehu pali depwek rotorot. A pali teio maramarain nipwong.+ Eri pwihn wet sohte kerendohng pwihn teio erein pwohngo pwon.

21 Moses eri kapahla peho pohn sehdo;+ Siohwa eri ketin kahrehiong kisinieng kehlail ehu sang palimese en wie ipihpdo erein pwohngo pwon, oh sehdo ahpw tepida kohpeseng ni pali riau,+ oh pwehl me sehdo mi ieo ahpw madada.+ 22 Mehn Israel ko eri kotehla nanwerengen sehdo pohn ngalangal,+ pihl ko eri kohda wiahda dihd ni arail palimaun oh arail palimeing.+ 23 Mehn Isip ko pwakihirailla, oh nein Parao oahs koaros, were kurumahn mahwen ko koaros, oh nah sountangahki ko koaros ahpw tepida pwakihirailongala nanwerengen sehdo.+ 24 Erein nin sohrahno,* Siohwa ketin mahsanihada mehn Isip ko sang ni uhren kisinieio oh depweko,+ ih eri ketin kapingada mehn Isip ko. 25 E kin ketin kahrehiong daiahn wararail kuruma ko en pwupwusang, pwe ren apwal en tangahki, oh mehn Isip ko ndinda: “Kitail tangasang mehn Israel kat, pwehki Siohwa me ketin pepeikin irail ong kitail, mehn Isip kan.”+

26 Siohwa eri ketin mahsanihong Moses: “Kapahwei pehmwen pohn sehden pwe pihl kan en pwilidohng pohn mehn Isip kan, pohn wararail kurumahn mahwen kan, oh pohn neirail sountangahki kan.” 27 Ahnsowohte Moses ahpw kapahla peho pohn sehdo, oh ni eh rahnpeseng, sehdo ahpw pwurpenehng nan dewe. Ni mehn Isip ko ar tangasang sehdo, Siohwa ketin sipedala mehn Isip ko nanwerengen sehdo.+ 28 Pihl me pwurpeneo ahpw koaduhpwaldi kurumahn mahwen ko oh sountangahki ko oh nein Parao karis en sounpei ko koaros me pwakihirailongala nan sehdo.+ Sohte emen nanpwungarail me pitila.+

29 Ahpw mehn Israel ko alu pohn ngalangal nanwerengen sehdo,+ oh pihl ko kohda wiahda dihd ni arail palimaun oh arail palimeing.+ 30 Siohwa eri ketin kapitala Israel rahno sang ni pehn mehn Isip kan,+ oh Israel kilang mehn Isip ko ar mehla pohn oaroahro. 31 Israel pil kilang manaman* lapalap me Siohwa ketin doadoahngkihong mehn Isip ko, oh aramas ako ahpw tepida lemmwiki Siohwa oh pwosonla Siohwa oh sapwellime ladu Moses.+

15 Ni ahnsowo Moses oh mehn Israel ko eri koulkihong Siohwa koul pwoatet:+

“I pahn kouliong Siohwa, pwe sapwellime lingan lapalapala.+

E ketin kakihrala oahso oh soundakepeo nansedo.+

 2 Ei kehl oh ei roson iei Iah,* pwehki e ketin wialahr sounkomourpei.+

Ih me ei Koht, oh I pahn kapinga ih;+ Koht en semeio,+ oh I pahn kawauwih.+

 3 Siohwa iei sounpei kehlail men.+ Siohwa iei mware.+

 5 Ilok en sehd kan koaduhpwaliraildi; irail kihrla wasa loal rasehng takai.+

 9 Imwintihtio nda: ‘I pahn pwakih! I pahn koanohdi!

I pahn nehkpeseng dipwisou lohdi kan lao I nsenamwahula!

I pahn usada nei kedlahs! Pehiet pahn kaloweiraildi!’+

11 Maing Siohwa, ihs nanpwungen koht akan me duwei komwi?+

Ihs me duwei komwi, me kin kasalehda sarawihe kowahlap?+

Me warohng ale lemmwin ni koulen kaping kan, me kin ketin wiewia soahng kapwuriamwei kan.+

12 Komw ketin kapahwei palimaun en nin limomwi, a sampah ahpw kadalleirailla.+

Tohn Kenan kan koaros pahn nan kapehd tikitikla.+

16 Re pahn masepwehkada oh rerrer.+

18 Siohwa pahn ketin kaun nin duwen nanmwarki kohkohlahte.+

20 Miriam lih soukohpo, rien Aaron liho, ahpw ale dampwurin ehu, oh lih koaros idawehnla ih wa dampwurin kei oh kahkahlek. 21 Miriam ahpw sapengala ohl ako ni eh koulki koul pwoatet:

“Kumwail kouliong Siohwa, pwe sapwellime lingan lapalapala.+

E ketin kakihrala oahso oh soundakepeo nansedo.”+

22 Mwuhr Moses ahpw kahrehsang mehn Israel ko sang ni Sehd Weitahtao, oh irail kohieila nan sapwtehn en Sur oh karis kohla erein rahn siluh nan sapwtehno, ahpw irail sohte diar pihl. 23 Irail eri leledo Marah,*+ ahpw irail sohte kak nim pilen Marah pwehki eh katik. Ihme kahrehda e kahdaneki Marah. 24 Aramas ako ahpw tepida lipahnede Moses,+ nda: “Dahme se pahn nim?” 25 Ih eri likweriong Siohwa,+ oh Siohwa ketin kasalehiong ih tuhke pwoat. Ni eh kesehdiong tuhkeo nan pihlo, pihlo pa ioula.

Wasao E ketin wiahiong irail koasoandi ehu oh poahsoanpen kadeik ehu, oh wasao E ketin kasawih irail.+ 26 E ketin mahsanih: “Ma ke uhdahn pahn rong kapitien Siohwa omw Koht oh wia dahme pwung mwohn silangi oh pahn peikiong sapwellime kehkehlik kan oh kapwaiada sapwellime koasoandi kan,+ I sohte pahn kihong uhk ehu soangen soumwahu ko me I kihong mehn Isip ko,+ pwe ngehi, Siohwa me kamwakamwawihiukla.”+

27 Mwurin mwo irail ahpw kohdo Elim, wasa me mie utuhnpihl 12 oh tuhke pahm* 70. Irail eri kauwada imwarail impwal kan wasao limwahn pihlo.

16 Mwurin arail mweselsang Elim, mwomwohdisohn mehn Israel ko pwon ahpw leledo nan sapwtehn en Sin,+ me mi nanpwungen Elim oh Sainai, ni 15 en keriaun sounpwong mwurin ar mweselsang sapwen Isip.

2 Mwomwohdisohn mehn Israel ko pwon ahpw tepida kaulime Moses oh Aaron nan sapwtehno.+ 3 Mehn Israel kan kin ndindaiong ira: “Ma se mehlahte nin limen Siohwa nan sapwen Isip ni at kin mwomwohdete limwahn einpwoat en sali kan+ oh tungutungoale pilawa lao se medla. Kumwa waikitodohr nan sapwtehnet pwehn kemehkihla mwomwohdiso wet pwon duhpek.”+

4 Siohwa eri ketin mahsanihong Moses: “I pahn kamwerehdiong kumwail pilawa sang nanleng,+ oh emenemen aramas akan pahn kohieila rikpene uwen me itarohng ih ehuehu rahn,+ pwe I en kasawih irail oh kilang ma re pahn kin kekeid nan ei kosonned de soh.+ 5 Ahpw ni keweneun rahn+ ni ar pahn kaunopada dahme re rikpeneier, re en rikpene pak riau uwen me re kin rikpene rahn teiko.”+

6 Moses oh Aaron ahpw ndaiong mehn Israel ko koaros: “Nin soutik kumwail uhdahn pahn ese me Siohwa me ketin waikumwaildo sang nan sapwen Isip.+ 7 Nimenseng kumwail pahn kilang sapwellimen Siohwa lingan, pwe e ketin karongeier amwail kaulim kan ong Siohwa. Ihs kiht pwe kumwail en kaulimei kiht?” 8 Moses eri doula nda: “Ni Siohwa eh ketikihong kumwail sali pwe kumwail en tungoale nin soutik oh pilawa nimenseng lao kumwail medla, kumwail pahn kilang me Siohwa ketin karongeier amwail kaulim kan me kumwail kaulimehki. Pwe ihs kiht? Kumwail sohte kaulimei kiht, ahpw Siohwa.”+

9 Moses eri ndaiong Aaron: “Ndaiong mwomwohdisohn mehn Israel ko pwon, ‘Kumwail keido mpen Siohwa, pwe e ketin karongeier amwail kaulim kan.’”+ 10 Ni ahnsowohte me Aaron koasoiong mwomwohdisohn mehn Israel ko pwon, re ahpw sohpeila oh kilenglahng nan sapwtehno, a kilang! sapwellimen Siohwa lingan pa pwarada nan depweko.+

11 Siohwa pil ketin doula mahsanihong Moses: 12 “I rongehr en mehn Israel kan ar kaulim.+ Ndaiong irail, ‘Nin soutik mwohn eh pahn rotorotala* kumwail pahn tungoale uduk, oh nimenseng kumwail pahn medkihla pilawa,+ oh kumwail uhdahn pahn ese me ngehi me Siohwa amwail Koht.’”+

13 Ni eh soutikpene kuail kan* ahpw kohdo oh kipehdi kahnimpwalo,+ oh nimenseng pwoaik ahpw mwarahkpeseng pidakihdi kahnimpwalo. 14 Ni mweremweren pwoaik ko ar sohrala, mie mehkot tikitik kei kipehdi pohn pwelen sapwtehno+ duwehte sinoh. 15 Ni mehn Israel ko ar kilangada met, re ahpw tepida ndapene nanpwungarail, “Dahkot met?” pwe irail sehse dahkot mwo. Moses eri ndaiong irail: “Met iei pilawa me Siohwa ketikihong kumwail ong kanamwail mwenge.+ 16 Iet me Siohwa ketin kehkehlingki, ‘Emenemen pahn rikpene pilawa kat ni uwen me e kak tungoale. Kumwail pahn sosohngki omer*+ ehu ong emenemen ni uwen tohtohn aramas* me mi nan eh impwal.’” 17 Mehn Israel ko eri tepida wia met; re rikpene pilawa ko, ekei rikpene tohto a ekei rikpene me malaulau. 18 Ni ar kin sosohngki omero, me kin rikpene me tohto sohte kin tohtohsang oh me kin rikpene me malaulau sohte kin malaulausang.+ Irail koaros rikpene ni uwen me re kak tungoale.

19 Moses eri ndaiong irail: “Sohte me pahn kanaidi luhwen pilawa lao lel nimenseng.”+ 20 Ahpw re sohte rong Moses. Ni ekei aramas ako ar kin kanaidi luhwen pilawa lel nimenseng, e kin mwahsda oh matala, Moses eri lingeringerda pahrail. 21 Irail kin rikpene nimenseng koaros, emenemen kin rikada uwen me e kak tungoale. Ni ketipin eh kin karakarala, e kin peipeseng.

22 Ni keweneun rahno, irail rikada pak riau uwen pilawa me itarohng irail,+ sosohng en omer riau ong emenemen aramas. Eri koaros kaunen mwomwohdiso ahpw kohdo oh pakairkihong Moses. 23 Ih eri ndaiong irail: “Ih met me Siohwa ketin mahsaniher. Lakapw pahn mie rahnen kommoal unsek ehu,* sapad sarawi ehu ong Siohwa.+ Umwunda dahme kumwail anahne umwun, oh pwoailihada dahme kumwail anahne pwoailih;+ kumwail eri kanaidi dahme luhwehdi oh kolokol lao lel nimenseng.” 24 Irail eri kanaidi lel nimenseng, duwehte me Moses kehkehlingki, oh e sohte pwohsuwedla de pil mwesenloangda loale. 25 Moses eri nda: “Kumwail tungoale met rahnwet, pwehki rahnwet iei sapad ehu ong Siohwa. Rahnwet kumwail sohte pahn diar pohn pwehl. 26 Kumwail pahn rikpene erein rahn weneu, ahpw ni keisuhwen rahn, me iei Sapad,+ kumwail sohte pahn diar.” 27 Ahpw, ekei aramas ako kohieila pwehn rik ni keisuhwen rahno, ahpw sohte mehkot re diar.

28 Siohwa eri ketin mahsanihong Moses: “Ia erein amwail pahn kahng kapwaiada ei kehkehlik kan oh ei kosonned kan?+ 29 Kumwail dehr manokehla me Siohwa me ketikihong kumwail Sapad.+ Ihme kahrehda ni keweneun rahno, e ketikihong kumwail pilawa ong rahn riau. Koaros pahn mihmihte nan dewe; sohte me pahn kohkohsang eh wasa ni keisuhwen rahn.” 30 Aramas ako eri kapwaiada Sapad* ni keisuhwen rahno.+

31 Aramas en Israel ko eri kahdaneki pilawao “manna.”* E pwetepwet duwehte werentuhke koriander,* ahpw nemeneme duwehte keik menipinip me doal sukehn loangalap.+ 32 Moses eri nda: “Iet me Siohwa ketin kehkehlingki, ‘Audehda pilawa ni uwen omer ehu ong nin duwen mehkot me pahn nekinekohng erein dih kan me pahn kohdo,+ pwe ren kilang pilawa me I kihong kumwail en tungoale nan sapwtehn, ni ei waikumwaildo sang nan sapwen Isip.’” 33 Moses eri ndaiong Aaron: “Ale apwoat sahn oh audehiong manna ni uwen sosohng en omer ehu oh kihdiong mwohn silangin Siohwa nin duwen mehkot me pahn nekinekohng erein dih kan me pahn kohdo.”+ 34 Aaron eri kihdiong saho mwohn kohpwahn Kadehdeo*+ pwe en kak mihmi werei, nin duwen me Siohwa ketin kehkehlingkihong Moses. 35 Mehn Israel ko kin tungoale manna erein sounpar 40,+ lao re leledo nan sahpw ehu me aramas kin kousoan ie.+ Re tungutungoale manna lao re leledo ni irepen sapwen Kenan.+ 36 Omer iei eisek kis ehun sosohng en ihpah.*

17 Mwomwohdisohn mehn Israel ko pwon ahpw mweselsang nan sapwtehn en Sin,+ re kin lella ehuehu wasa me Siohwa ketin kehkehlingki,+ irail eri kauwada imwarail impwal kan nan Repidim.+ Ahpw sohte pihl me aramas ako kak nim.

2 Aramas ako eri tepida akamaiong Moses+ oh nda: “Kihdo nimat pihl.” Ahpw Moses ndaiong irail: “Dahme kumwail akamaikihong ie? Dahme kumwail kin kasongosongehki Siohwa?”+ 3 Ahpw aramas ako uhdahn men nimpilda wasao, oh irail kin lipilipahnede Moses+ oh nda: “Dahme ke wahkinkitodo sang Isip? Pwe kiht oh nait seri kan oh nait pelinmen kan en mehkihla men nimpil?” 4 Moses eri likweriong Siohwa, patohwan: “Dahme I pahn wiahiong aramas pwukat? Keieng ekis irail pahn katehkin ie takai!”

5 Siohwa eri ketin mahsanihong Moses: “Kohwei mwohn aramas akan, oh kahrehda ekei ohl mah en Israel kan oh wahda noumw sokon me ke poakiheki Pillap Nail.+ Wahda oh aluhwei. 6 Kilang! I pahn uh mwohmw wasao pohn paipo nan Orep. Ke pahn poakih paipo, oh pihl pahn kusieisang loale, oh aramas akan pahn nim.”+ Moses eri wia met mwohn mesen ohl mah en Israel ko. 7 Ih eri kahdaneki wasao Massah*+ oh Meripa,*+ pwehki akamai en mehn Israel ko oh pwehki irail kasonge Siohwa+ ni ar nda: “Siohwa ketiket nanpwungatail de soh?”

8 Mehn Amalek ko+ eri kohdo oh peiong mehn Israel ko nan Repidim.+ 9 Moses eri ndaiong Sosua:+ “Pilada ekei ohl akan oh kohieila peiong mehn Amalek kan. Lakapw I pahn kesihnen pohn kadoken dohlo, kolokol sokon me Koht mehlelo ketin kehkehlingkihong ie en wahda.” 10 Sosua eri kapwaiada dahme Moses padahkihong ih,+ oh e peiong mehn Amalek kan. Moses, Aaron oh Urr+ ahpw kohdahla pohn kadoken dohlo.

11 Nindoken Moses eh kin kapakapahda peh ko, mehn Israel ko kin pweida, ahpw ni eh kin kadaridi peh ko, mehn Amalek ko kin pweida. 12 Ni pehn Moses ko eh daula, Aaron oh Urr ahpw ale takai ehu oh kihdiong pah oh e mwohndiong powe. Emenemen ira kesihnen apali oh kolada peh ko, pwehn dehr mwekid lao ketipino kihrla. 13 Sosua eri kalowehkihdi Amalek oh nah aramas ako kedlahs.+

14 Siohwa eri ketin mahsanihong Moses: “Ntingihedi met nan pwuhk ehu nin duwen mehn kataman ehu oh pwurehng ndaiong Sosua, ‘I pahn kasohrehla douluhl katamanpen Amalek sang sampah.’”*+ 15 Moses eri kauwada pei sarawi ehu oh kahdaneki Siohwa-nissai,* 16 oh nda: “Pwehki peh ko uhwong mwoalen Iah,*+ Siohwa pahn ketin mahweniong Amalek erein dih kan koaros me pahn kohdo.”+

18 Sedro samworoun Midian, semen en Moses eh pwoud,+ ahpw rongada duwen soahng koaros me Koht ketin wiahiong Moses oh sapwellime aramas en Israel kan, duwen Siohwa eh ketin wahsang Israel nan Isip.+ 2 Sedro, semen en Moses eh pwoudo me apwalih Sipora, en Moses eh pwoudo, ni Moses eh kadarala reh, 3 iangahki nein Sipora pwutak riemeno.+ Emen pwutak ko adaneki Kersom,*+ pwehki Moses nda, “I wiahla mehn liki men nan sapwen mehn liki,” 4 a meteio adaneki Elieser,* pwehki e nda, “Koht en semeio iei sawasepei, me ketin kapitiehla sang nein Parao kedlahs.”+

5 Sedro, semen en Moses eh pwoudo, iangahki nein Moses pwutak ko oh eh pwoudo, ahpw kohdo rehn Moses nan sapwtehno wasa me e kauwada ie imwe impwal ko limwahn nahnahn Koht mehlelo.+ 6 Ih eri kadarala rehn Moses koasoi pwukat: “Ngehi Sedro, semen omw pwoudo+ kohkohdo rehmw iangahki omw pwoud oh nah pwutak riemeno.” 7 Ahnsowohte Moses ahpw kohieila tuhwong semen eh pwoudo, ih eri poaridi oh metik ih. Ira koaros idek iren emenemen, irail eri kohlongala nan impwalo.

8 Moses eri ndaiong semen eh pwoudo mehkoaros me Siohwa ketin wiahiong Parao oh Isip pwehn sewese Israel,+ apwal koaros me wiawihong irail erein arail seiloak,+ oh duwen Siohwa eh ketin doareirailla. 9 Sedro eri perenkihda soahng mwahu koaros me Siohwa ketin wiahiong Israel ni eh ketin kapitirailla sang Isip.* 10 Sedro eri nda: “Kaping en kohwong Siohwa, me ketin kapitkumwailla sang Isip oh Parao, oh ketin kapitala aramas akan sang pahn kaundahn Isip. 11 Met I eseier me Siohwa ketin lapalapasang koht teikan koaros,+ pwehki dahme e ketin wiahiong irail kan me kin aklapalap ong sapwellime aramas akan.” 12 Sedro semen en Moses eh pwoudo eri wiahda meirong isihs ehu oh meirong teikan ong Koht. Aaron oh ohl mah en Israel koaros ahpw kohdo iang semen en Moses eh pwoudo mwenge mwohn silangin Koht mehlelo.

13 Mandahn rahno, Moses eri mwohndi nin duwen me e kin kalapw wia, pwehn kopwung aramas akan, oh aramas ako kesikesihnen mwohn Moses sang nimenseng lel nin soutik. 14 Ni ahnsou me semen en Moses eh pwoudo tehkada mehkoaros me e wiewiahiong aramas ako, e ahpw nda: “Dahkot met, me komw wiewiahiong aramas akan? Dahme komw kelehpw mwomwohdki wasaht a aramas kat koaros kesikesihnen mwohmw sangete nimenseng lel nin soutik?” 15 Moses eri ndaiong semen eh pwoudo: “Pwehki aramas akan kin kohkohdo rehi pwe ren kalelapak rehn Koht. 16 Ni kahpwal ehu eh kin pwarada nanpwungen aramas riemen, ira kin kohdo rehi oh ndaiong ie duwen kahpwalo. Mwuri, I pahn kopwung irairo oh kasalehda sapwellimen Koht mehlelo koasoandi kan oh sapwellime kosonned kan.”+

17 Semen en Moses eh pwoudo ahpw ndaiong ih: “Dahme komw wiewiahn sohte mwahu. 18 Komw uhdahn pahn pwangada, komwi oh aramas pwukat me mi rehmw, pwehki doadoahk wet me nohn toutou ong komwi oh komw sohte kak kelehpw kapwaiada met. 19 Eri rong ie mahs. I pahn kihong komwi kaweid, oh Koht pahn ketin ieiang komwi.+ Komwi me wia wiliepen aramas akan mwohn silangin Koht mehlelo,+ oh komw pahn patohwanla kahpwal kan rehn Koht mehlelo.+ 20 Komw pahn padahkihong irail duwen koasoandi kan oh kosonned kan+ oh kasalehiong irail ahl me re pahn weweid ie oh doadoahk me re pahn wia. 21 Ahpw komw pahn pilada sang nanpwungen aramas akan ohl koahiek kan+ me kin lemmwiki Koht, ohl likilik kan me sohte kin rapahki mwohni ni ahl mwersuwed,+ oh idihada ohl pwukat pohrail nin duwen kaunen meh kid, kaunen meh epwiki, kaunen meh limehk, oh kaunen meh ehk.+ 22 Irail pahn kopwung aramas akan ni ahnsou me mie kahpwal pwarada,* oh irail pahn wahdo kahpwal laud kan koaros rehmw,+ ahpw kahpwal tikitik kan koaros irail pahn kapwungala. Wiahiong met en mengeiong komwi, sang ni omw pahn mweidohng ren pil iang komwi nan doadoahk wet.+ 23 Ma komw pahn wia met, oh Koht ketin kehkehlingkihong komwi, komw pahn kak kapwaiada doadoahk wet, oh koaros pahn pwurala ni imwarail kan nsenamwahu.”

24 Moses mwadangete rong semen eh pwoudo oh wia mehkoaros me e nda. 25 Moses eri pilada ohl koahiek kei sang rehn mehn Israel ko koaros oh idihada irail en kaun aramas ako, nin duwen kaunen meh kid, kaunen meh epwiki, kaunen meh limehk, oh kaunen meh ehk. 26 Irail eri kin kopwung aramas ako ni kahpwal kan ar kin pwarada. Irail kin wahla kahpwal laud kan rehn Moses,+ a kahpwal tikitik koaros irail kin kapwungala. 27 Mwurin mwo Moses eri rahnmwahwihala semen eh pwoudo,+ oh e pwurala nan sapweo.

19 Ni kesiluhwen sounpwong mwurin mehn Israel ko ar kohieisang nan sapwen Isip, ni rahnohte,* re kohdo nan sapwtehn en Sainai. 2 Irail kohsang Repidim+ oh kohdo nan sapwtehn en Sainai oh kauwada imwarail impwal kan nan sapwtehno. Mehn Israel ko kauwada imwarail impwal ko wasao mwohn nahnao.+

3 Moses eri kohdahla pohn nahnao pwe en tuhwong Koht mehlelo, Siohwa eri ketin malipe ih sang ni nahnao,+ mahsanih: “Iet me ke pahn ndaiong kadaudok en Seikop kan, mehn Israel kan, 4 ‘Kumwail pein kilangehr dahme I wiahiong mehn Isip ko,+ pwe I en waikumwaildo duwehte ikel men me weuwa nah kan pohn peh kan oh waikumwaildo rehi.+ 5 Eri ma kumwail uhdahn pahn peikiong kapitiei oh kolokol ei inou lap, kumwail uhdahn pahn wiahla nei aramas tohrohr* sang nanpwungen aramas koaros,+ pwe ngehi me ahneki sampah pwon.+ 6 Kumwail pahn wiahla wehin samworo ehu oh wehi sarawi ehu ong ie.’+ Ih mahsen pwukat me ke pahn ndaiong mehn Israel kan.”

7 Moses eri kohla oh ekerpene ohl mah kan en aramas ako oh ndaiong irail mahsen pwukat koaros me Siohwa ketin kehkehlingkihong ih.+ 8 Mwurin mwo aramas ako koaros ahpw wiahkintehieu sapeng: “Se pahn kapwaiada mehkoaros me Siohwa ketin mahsaniher.”+ Moses eri mwadangete patohwanlahng Siohwa en aramas ako pasapeng. 9 Siohwa eri ketin mahsanihong Moses: “Kilang! I pahn kohdo rehmw nan depwek rotorot ehu, pwe aramas akan en rong ni ei pahn koasoiong uhk oh pwe ren pil pwoson uhk ahnsou koaros.” Moses eri patohwanlahng Siohwa en aramas ako koasoi ko.

10 Siohwa eri ketin mahsanihong Moses: “Kohla rehn aramas ako oh kasarawihirailla rahnwet oh lakapw, oh irail pahn anahne lopworada arail likou kan. 11 Oh irail pahn onopada ong ni kesiluhwen rahn, pwehki ni kesiluhwen rahno Siohwa pahn ketidihdo pohn Nahnahn Sainai mwohn mesen aramas akan koaros. 12 Ke pahn anahne wiahda irepen nahnaht pwon ong aramas akan oh ndaiong irail, ‘Kanahieng pwe kumwail de kohdahla pohn nahnao de sair irepeo. Mehmen me pahn sair nahnao uhdahn pahn kamakamala. 13 Sohte me pahn doahke ih, e pahn kostakaidi de kesikdi.* Mehnda ma mahn de aramas, e sohte pahn mour.’+ Ahpw ni ngilen pepeuk en koden sihpw wol eh pahn wiawi+ re pahn kak kohdahdo pohn nahnaht.”

14 Moses eri kohdihdo sang pohn nahnao oh kohdo rehn aramas ako, ih eri tepida kasarawihala aramas ako, oh irail lopworada arail likou kan.+ 15 Ih eri ndaiong aramas ako: “Onopada ong ni kesiluhwen rahn. Liksang wia nsenen pwopwoud.”*

16 Nimenseng en kesiluhwen rahno, nansapwe ahpw pos oh lioal piripir, oh mie depwek mosul ehu+ pohn nahnao oh ngilen mehn pepeuk* ngihl laud ehu pa wiawi, oh aramas ako koaros nan kahnimpwalo ahpw tepida rerrer.+ 17 Moses eri kahrehda aramas ako sang nan kahnimpwalo pwe ren tuhwong Koht mehlelo, irail eri mihmi nin tepin nahnao. 18 Nahna Sainai ahpw ediedida wasa koaros, pwehki Siohwa ketidihdo pohn nahnao ni mpwulen kisiniei;+ oh ediniei en nahnao kohkohda rasehng ediniei en wasahn uhmw ehu, oh nahnao pwon uhdahn rerada.+ 19 Ni ngilen mehn pepeuko eh wie lalaudla, Moses ahpw pato, oh kapitien Koht mehlelo ahpw ketin sapeng ih.

20 Siohwa eri ketidihdo pohn kadoken Nahna Sainai. Siohwa eri ketin malipehdo Moses pohn kadoken nahnao, Moses eri kohdahla.+ 21 Siohwa eri ketin mahsanihong Moses: “Kohdihla oh kehkehlingkihong aramas ako ren dehpa song kohdo kilang Siohwa, pwe ma re pahn wia met, me tohto rehrail pahn mehla. 22 Oh samworo kan me kin kaukaule papah Siohwa ren kasarawihala pein irail, pwe Siohwa en dehr kemeirailla.”+ 23 Moses eri patohwanohng Siohwa: “Aramas ako sohte kak kohdahdo pohn Nahna Sainai pwehki komw ketin kehkehlingkihong kiht, ni omwi ketin mahsanih, ‘Wiahda irepen nahnaht, oh wiahki met mehkot sarawi.’”+ 24 Ahpw, Siohwa ketin mahsanihong ih: “Kohdihwei oh pwuradahdo, kowe oh Aaron, ahpw dehr mweidohng samworo kan oh aramas akan ren kohdahdo rehn Siohwa, pwe en dehr kemeirailla.”+ 25 Moses eri kohdihla rehn aramas ako oh ndaiong irail.

20 Koht eri ketin mahsanih mahsen pwukat koaros:+

2 “Ngehi me Siohwa omw Koht, me waiukasang nan sapwen Isip, wasa me ke wia lidu ie.*+ 3 Ke sohte pahn ahneki koht teikan likin ngehi.*+

4 “Ke sohte pahn wiahiong uhk sansal perperda ehu de sansal en* mehkot me mi nanleng de nin sampah de nan pihl kan pahn sampah.+ 5 Ke sohte pahn poaridiong irail de pil papah* irail,+ pwe ngehi, Siohwa omw Koht, iei Koht emen me kupwurki aramas en poadidiong ih kelehpw,+ me pahn wadohng seri kan kalokepen sapwung en ar pahpa kan, lel dih kesiluh oh dih kapahieu en irail kan me kin kailongkin ie, 6 ahpw pahn kasalehda limpoak loalopwoat ong kadaudok en irail kan me kin poakohng ie oh kapwaiada ei kehkehlik kan lel dih kid.+

7 “Ke dehr doadoahngki mwaren Siohwa omw Koht ni ahl soh katepe,+ pwe Siohwa uhdahn pahn kaloke me kin doadoahngki mware ni ahl soh katepe.+

8 “Tamataman rahnen Sapad pwe ken wiahki met rahn sarawi ehu.+ 9 Ke pahn doadoahk oh wiahda omw doadoahk koaros erein rahn weneu,+ 10 ahpw ni keisuhwen rahn iei sapad ong Siohwa omw Koht. Ke sohte pahn wia doadoahk sohte lipilipil, kowe de pil noumw pwutak de pil noumw serepein de pil noumw lidu ohl de pil noumw lidu serepein de pil noumw mahn mand de pil noumw mehn liki men me kin mi nan amwail wasahn kousoan kan.*+ 11 Pwe erein rahn weneu me Siohwa ketin wiahkihda nanleng oh sampah, sehd, oh audeparail kan koaros, oh e ketin tepida kommoal ni keisuhwen rahn.+ Ihme kahrehda Siohwa ketin kapaiahda rahnen Sapad oh wiahki met rahn sarawi ehu.

12 “Kahkahki semomw oh inomw,+ pwe ken mour werei nan sahpw me Siohwa omw Koht pahn ketikihong uhk.+

13 “Ke dehr kemehla aramas.+

14 “Ke dehr kamwahl.+

15 “Ke dehr pirap.+

16 “Ke dehr wia kadehde likamw ni omw wia sounkadehde men ong iengomw.+

17 “Ke dehr noahroke imwen iengomw. Ke dehr noahroke en iengomwo eh pwoud+ de pil nah lidu ohl de pil nah lidu serepein de pil nah kouwol de pil nah dongki de pil mehkot me ahn iengomwo.”+

18 Aramas ako koaros ahpw rong nansapweo oh ngilen mehn pepeuko,* oh kilang lioal eh piripir oh nahnao eh wie edied; oh ni aramas ako ar kilang oh rong mepwukat, re ahpw wie rerrer oh kesihnen kailala.+ 19 Irail eri ndaiong Moses: “Komwi me pahn koasoiong kiht, oh se pahn rong, ahpw dehr mweidohng Koht en mahseniong kiht, pwe se masak se de mehla.”+ 20 Moses eri ndaiong aramas ako: “Kumwail dehr masak, pwe Koht mehlelo ketidohr pwe en ketin kasawih kumwail,+ pwe kumwail en pousehlahte lemmwiki ih pwe kumwail en dehr dipada.”+ 21 Aramas ako kesikesihnente kailala, ahpw Moses kohla limwahn depwek rotoroto wasa me Koht mehlelo ketiket ie.+

22 Siohwa eri ketin mahsanihong Moses: “Iet me ke pahn ndaiong mehn Israel ko, ‘Kumwail pein kilangehr ei koasoiong kumwail sang nanleng.+ 23 Kumwail sohte pahn wiahda koht silper kei pwehn kaudokiong irail likin ngehi, oh kumwail sohte pahn pein wiahiong kumwail koht kohl kan.+ 24 Ke pahn wiahda pei sarawi pwehl ehu ong ie, oh ke pahn meirongki omw meirong isihs kan, omw meirong en kaminimin kan,* noumw pelin sihpw kan, oh noumw pelin kou kan powe. Wasa koaros me I kahrehiong aramas akan ren tamataman mwarei+ I pahn kohdo rehmw oh I pahn kapaiaiukada. 25 Ma ke wiahda pei sarawi takai ehu ong ie, ke dehr kauwada met ni omw doadoahngki takai perperda kan.+ Pwe ma ke doadoahngki noumw sisel pohn takaio, ke pahn kasaminehla met. 26 Oh ke dehr doadoahngki kehndake pwehn kohdahla ni ei pei sarawio, pwe kumwail en dehr salla* powe.’

21 “Iet kosonned kan me ke pahn ndaiong irail:+

2 “Ma ke pwainda lidu mehn Ipru men,+ e pahn papah nin duwen lidu men erein sounpar weneu, ahpw ni keisuhwen sounparo, e pahn saledekla ni eh sohte pwain mehkot.+ 3 Ma e kiripw ni eh wiahla omw lidu, e pahn pil kiripw ni eh kohkohla. Ma e kohdo iangahki eh pwoud, eri eh pwoudo pahn iang ih kohkohla. 4 Ma eh soumaso kihong ih eh pwoud oh liho naitikihong ih pwutak kei de serepein kei, liho oh nah seri ko pahn wiahla nein eh soumaso, oh e pahn kelehpw kohkohla.+ 5 Ahpw ma liduwo pahn ngidingidki eh nda, ‘I poakohng ei soumaso, ei pwoudo, oh nei seri kan; I sohte men saledekla,’+ 6 eh soumaso ahpw pahn wahla ih mwohn silangin Koht mehlelo. E pahn wahla ih ni wenihmwo de ni uhren wenihmwo, oh eh soumaso pahn doakoahki salengeo mehn dok ehu, oh e pahn wiahla nah lidu erein eh mour.

7 “Ma aramas emen netikihla nah serepein nin duwen lidu men, serepeino sohte pahn saledekla duwehte ohl lidu men eh pahn saledekla. 8 Ma eh soumaso sohte perenki ih oh e sohte men wiahki serepeino pekehi men ahpw rapahki emen me pahn pwain* ih, soumaso sohte pahn ahneki pwuhng en netikihla rehn mehn liki kan, pwe e pangalahr serepeino. 9 Ma e pilada serepeino ong nah pwutak, e pahn wiahki ih nah serepein. 10 Ma e* pwoudikihda emen lih tohrohr, e sohte pahn katikala eh kihong tepin eh pwoudo mwenge, likou oh pwuhng+ en eh pwoudo.* 11 Ma e sohte pahn kapwaiong serepeino soahng siluh pwukat, eri e pahn saledekla ni eh sohte pahn pwainki mwohni.

12 “Mehmen me pahn keme aramas emen oh kemehla pahn anahne kamakamala.+ 13 Ahpw ma e sohte nsenki wia met oh Koht mehlelo ketin mweidohng met en wiawi, I pahn koasoanediong uhk wasa ieu me e kak tangala ie.+ 14 Ma aramas emen uhdahn lingeringerda pahn ienge men oh e nsenkihda en kemehla,+ aramaso pahn anahne kamakamala mehnda ma ke pahn anahne kihsang ih ni ei pei sarawio.+ 15 Mehmen me pahn keme seme de ine pahn anahne kamakamala.+

16 “Ma mehmen me pirapahla aramas emen+ oh netikihla ih de dierekda me e kolokol ih,+ e pahn anahne kamakamala.+

17 “Mehmen me pahn keriahla* seme de ine pahn anahne kamakamala.+

18 “Iet me pahn wiawi ma ohl akan akamaida oh emen sungki iengeo takai ehu de kumwuten peh* oh e sohte mehla ahpw e mihmihte nan eh peht: 19 Ma e kak uhda oh alu likin ihmw ni eh doadoahngki sokon, eri me kemeo pahn saledeksang kalokolok. Ihte e pahn pwain pweinen ahnsou ko me ohl me ohlao sohte doadoahk lao e uhdahn mwahula.

20 “Ma ohl emen kemehki nah lidu ohl de nah lidu serepein tuhke pwoat oh e mehla sang ni pehn ohlo, e uhdahn pahn ale kalokolok.+ 21 Ahpw, ma e momourki rahn ehu de riau, ohlo sohte pahn ale kalokolok, pwehki eh pwainkihda liduwo nah mwohni.

22 “Ma ohl ekei peida oh re kamedekihala lih liseian men oh liho neitikla ahnsowohte*+ ahpw sohte mehla* wiawi, me kamedekihalao pahn anahne pwain ohlao me en liho pwoudo kapwukoahki ih; oh e pahn anahne pwain nin duwen me sounkopwung kan koasoanehdi.+ 23 Ahpw ma mehla wiawi, eri ke pahn wiliankihdi mour ong mour,*+ 24 pwoaren mas ong pwoaren mas, ngih pwoat ong ngih pwoat, peh ong peh, neh ong neh,+ 25 mwasikala ong mwasikala, ohla ong ohla, wowoki ong wowoki.

26 “Ma ohl emen poakih pwoaren mesen nah lidu ohl de pwoaren mesen nah lidu serepein oh e kauwehla, e pahn kasaledekala liduwo pweinen meseo.+ 27 Oh ma e kauwehla ngihn nah lidu ohl de nah lidu serepein, e pahn kasaledekala liduwo pweinen ngiho.

28 “Ma kouwol men kodom ohl emen de lih emen oh e mehla, kouwolo pahn anahne kostakaidi lao e mehla+ oh sohte me pahn tungoale uduke; ahpw me naineki kouwolo pahn saledeksang kalokolok. 29 Ahpw ma kouwol men kin epwehnki kodom oh me nainekio aleier kehkehlik ahpw e sohte kin silehdi kouwolo oh e kemehla ohl emen de lih emen, kouwolo pahn kostakaidi oh me nainekio pil pahn kamakamala. 30 Ma me naineki kouwolo mweimwei en pwain* pwe en dehr kamakamala, eri e pahn anahne pwain uwen me anahn pwehn doarehla eh mour.* 31 Ma e kodom pwutak emen de serepein emen, met pahn wiawihong me naineki kouwolo nin duwen kosonned wet. 32 Ma kouwolo kodom lidu ohl men de lidu serepein men, e pahn kihong sekel* 30 rehn en liduwo soumaso, oh kouwolo pahn kostakaidi lao e mehla.

33 “Ma aramas emen kihsang pweinen pwoahr ehu de weirada pwoahr ehu oh sohte pwaindi oh kouwol men de dongki men pwupwudiong loale, 34 aramas me ahneki pwoahro pahn kihda pweinen mahno.+ E pahn pwainohng me naineki mahno, oh e pahn nainekihla mahn mehlao. 35 Ma nein emen kouwol kauwehla nein emen kouwol oh e mehla, ira pahn netikihla kouwol me momouro oh nehkpeseng pweinen kouwolo; ira pil pahn nehkpeseng mahn mehlao. 36 Ahpw ma e dehde me kouwol men kin epwehnki kodom ahpw me nainekio sohte kin silehdi, e pahn wiliankihdi kouwol ong kouwol, oh e pahn nainekihla me mehlao.

22 “Ma aramas emen pirapahda kouwol men de sihpw men oh e kemehla de netikihla mahno, e pahn kapwungkihla kouwol limmen ong kouwolo oh sihpw pahmen ong sihpwo.+

2 (“Ma lipirap men+ dierekda ni eh kauwehla ihmw ehu pwe en pedolong oh e wokdi oh mehla, me kemehla iho sohte pahn pwukoahkihdi dipen kamaramas. 3 Ahpw ma e wiawi mwurin dakadahn ketipin, e pahn pwukoahkihdi dipen kamaramas.)

“Lipirap men pahn anahne kapwungkihla mehkot. Ma sohte ah mehkot, eri e pahn anahne netikihla pein ih ong dipwisou kan me e pirapahda. 4 Ma dahme e pirapahdao dierek reh momour, mehnda ma kouwol men de dongki men de sihpw men, e pahn kapwungkihla meh riemen.

5 “Ma mehmen wahla nah mahn akan nan mwaht ehu de mwetin kreip ehu pwehn mwengeseli oh mweidohng ren mwenge nan ahn emen mwaht, e pahn anahne kapwungkihla eh mwaht me keieu mwahu de eh mwetin kreip me keieu mwahu.

6 “Ma kisiniei ehu lulda oh kohpeseng nan tuhke tekatek kan oh e kahrehiong kapakap en krein* kan de krein kan me kesikesihnen de mwaht ehu en mwasikala, aramas me tapiada isihso pahn anahne kapwungala dahme mwasikala ko.

7 “Ma aramas emen kihong ienge men mwohni de dipwisou kan en koledi oh mepwukat pirapala nan imwen iengeo, oh ma lipirapo dierek, e pahn anahne kapwungala pak riapak uwen me pirapala ko.+ 8 Ma lipirapo sohte dierek, me imwaneki ihmwo pahn anahne wisikdo mwohn silangin Koht mehlelo+ pwehn kasawih ma e ale* en iengeo kepwe ko de soh. 9 Repenpwung koaros duwen ahneki kepwe pirapala kan, me pid kouwol men, dongki men, sihpw men, likou ehu, de mehkot salongala ehu me aramaso ndahki, ‘Ahi met!’ ira koaros pahn kihda ara repenpwung mwohn silangin Koht mehlelo.+ Mehmen me Koht pahn ketin kasalehda me ih me dipada pahn anahne kapwungohng iengeo pak riapak uwen pweinen dipwisowo.+

10 “Ma aramas emen kihong iengeo dongki men de kouwol men de sihpw men de mahn mand emen pwe en apwalih oh mahno mehla de paliwereo ohla de kulsang ni eh sohte me kilikilang, 11 aramas me apwaliho pahn anahne kahukihla mwohn silangin Siohwa me e sohte doahke en iengeo dipwisou ko; oh me ahneki dipwisou ko pahn anahne pwungki. Eri, meteio sohte pahn anahne kapwungala.+ 12 Ahpw ma mahno pirapasang reh, e pahn kapwungohng me nainekio. 13 Ma mahn lawalo men me tehrpeseng, aramaso pahn wahdo luhwen mahno pwehn wia mehn kadehde. E sohte pahn anahne kapwungala mehkot me mahn lawalo men tehrpeseng.

14 “Ahpw ma mehmen peki mahn emen sang rehn ienge oh mahno ohla de mehla ni me nainekio eh sohte mi rehn mahno, aramas me peki mahno pahn anahne kapwungala. 15 Ma me nainekio mi mwo, aramas me pekihdao sohte pahn anahne kapwungala. Ma e pwain pwehn doadoahngki, mwohni me e pwainkio me pahn kapwungala.

16 “Ma ohl emen widingehdi meipwon men me sohte inoun pwopwoud oh ohlo wendi rehn serepeino, e anahne pwain pweinen lih kamwohd pwe serepeino en wiahla eh pwoud.+ 17 Ma en serepeino pahpao uhdahn kahng kihong ohlo serepeino, ohlo anahnehte pwain uwen pweinen lih kamwohd.

18 “Ke sohte pahn mweidohng lih emen me kin wia akmanaman en momour.+

19 “Mehmen me pahn eng rehn mahn emen uhdahn pahn kamakamala.+

20 “Mehmen me pahn wiahda meirong kan ong koht teikan likin Siohwa pahn kamwomwmwomwla.+

21 “Ke sohte pahn wiakauwe mehn liki men de kaloke ih,+ pwe kumwail pil wia mehn liki kei nan sapwen Isip.+

22 “Ke sohte pahn wiakauwe liohdi men de me sepwoupwou men.+ 23 Ma ke wiakauwe ih oh e likweriong ie, I uhdahn pahn karonge eh likwer;+ 24 oh I pahn engiengda, oh I pahn kemehkinkumwailla kedlahs, oh amwail pwoud kan pahn liohdihla, oh noumwail seri kan pahn sepwoupwoula.

25 “Ma ke kamangaiong mwohni ong emen nei aramas me semwehmwe,* emen me kin kousoan rehmw, ke sohte pahn wiahla emen me e pweipwand ong. Kumwail sohte pahn idingkihong ih en pwain wihn en mwohnio.+

26 “Ma ke ale en iengomw men eh likou puhp nin duwen kilelepen eh pweipwand,+ ke pahn kapwurelahng ih likou puhpo mwohn kihrlahn ketipin. 27 Pwe ihte eh likou puhp en mwo, eh likoun pwaindi paliwereo;* pwe dahme e pahn uhp ni eh pahn meir?+ Ni eh pahn likweriong ie, I uhdahn pahn karonge, pwe I me kin kupwurkalahngan.+

28 “Ke dehr lahlahwe* Koht+ de keriahla kaunen noumw aramas akan.+

29 “Ke sohte pahn pweiek en wiahda meirong kan sang omw wahnsahpw tohto oh reken omw wain kan oh leh kan.+ Ke pahn kihong ie mesenihen noumw pwutak kan.+ 30 Iet me ke pahn wiahiong mesenihen noumw kouwol kan oh noumw sihpw kan:+ Rahn isuh e pahn mihmi rehn eh nohno. Ni kawaluhn rahn, ke pahn kihong ie.+

31 “Kumwail pahn wia nei aramas sarawi kei,+ oh kumwail sohte pahn tungoale uduken mahn me mi nan mohso me mahn lawalo men tehrpeseng.+ Kumwail pahn kesehiong kidi kan.

23 “Ke sohte pahn pakairkiseli* rohng me sohte mehlel.+ Ke dehr sewese aramas suwed men ni omw wia sounkadehde men me men kamedekihala meteio.+ 2 Ke sohte pahn idawehnla pokon pwehn wia me suwed, oh ke sohte pahn kasapwungehla pwung pahrek ni omw wia kadehde pwehn idawehnla pokon.* 3 Ke dehr lipilipilki aramas nan repenpwung en me semwehmwe men.+

4 “Ma ke kilang nein omw imwintihti nah kouwol de nah dongki eh alialuseli, ke pahn kapwurelahng reh.+ 5 Ma ke kilang nein emen me kailongkin uhk nah dongki eh pwupwudi oh wonohn pahn eh wisik, ke sohte pahn pohnsehsehla oh kohkohlahsang. Ke pahn anahne sewese ih sapwadada mahno.+

6 “Ke sohte pahn kasapwungehla kopwung en me semwehmwe men rehmwail nan eh repenpwung.+

7 “Dehr iang pidada kedip* likamw ehu, oh dehr kemehla emen me sohte dipe oh me pwung men, pwe I sohte pahn nda me aramas suwed me pwung.*+

8 “Ke sohte pahn ale kisakis ni ahl sapwung, pwe kisakiso kin karotongehla emen me kin koahiek en madamadau oh kak kawekala en me pwung kan koasoi.+

9 “Ke sohte pahn kaloke mehn liki men. Kumwail ese mwomwen pepehm en mehn liki men,* pwehki kumwail pil wia mehn liki kei nan sapwen Isip.+

10 “Ke pahn kamwarak werentuhke nan sapwomw oh rikpene wah kan erein sounpar weneu.+ 11 Ahpw ni keisuhwen sounparo ke sohte pahn koadoahke oh sohte pahn doadoahngki, oh me semwehmwe kan rehn noumwail aramas akan pahn tungoale wah ko, oh dahme re luhwehkihdi, mahn lawalo en nansapw kan pahn kang. Ih met me ke pahn wiahiong omw mwetin kreip oh omw tuhkehn olip kan.

12 “Ke pahn doadoahk erein rahn weneu; ahpw ni keisuhwen rahn ke sohte pahn doadoahk, pwe noumw kouwol oh noumw dongki en kommoal oh omw lidu* oh mehn liki men en kak rosonda.+

13 “Kanahieng pwe kumwail en wia soahng koaros me I ndaiong kumwail,+ oh kumwail sohte pahn nda eden koht teikan; adarail kan sohte pahn kohsang ni kilin awamwail kan.*+

14 “Ke pahn wia kasarawi siluh ong ie nan sounpar koaros.+ 15 Ke pahn wia Kasarawien Pilawa me Sohte Doal Ihs.+ Ke pahn tungoale pilawa me sohte doal ihs erein rahn isuh, duwehte me I kehkehlingkihong uhk, ni ahnsou me kileldi nan sounpwong en Apip,*+ pwe ih ahnsowo me ke kohieido sang nan Isip. Sohte me pahn pwarodo mwohi kahiep.+ 16 Oh pil, ke pahn wia Kasarawien Rahk* en tepin wahnsahpw sang omw doadoahk, sang dahme ke padokedi nan mwahto;+ oh Kasarawien Kihpene* ni imwin pahro, ni omw pahn kihpene wahn omw doadoahk kan sang nan mwahto.+ 17 Pak siluh nan sounpar ehu noumw ohl kan koaros pahn pwarodo mwohn silangin Kaun mehlelo, Siohwa.+

18 “Ke sohte pahn kihda ntahn mahn me ke pahn meirongkihong ie iangahki mehkot me doal ihs. Oh meirong en wih kan me meirongala ni ei kasarawi kan sohte pahn mihmi pwohng ehu pwon lao lel nimenseng.

19 “Ke pahn wadohng nan tehnpesen Siohwa omw Koht tepin wahnsahpw me keieu mwahu+ sang nan sapwomw.

“Ke sohte pahn pwoailih kuht pwulopwul men nan pilendihdi en eh nohno.+

20 “I pahn kadarewei tohnleng men mwohmw+ pwehn pereiuk nanialo oh kahluwaiukalahng wasa me I kaunopadahro.+ 21 Rong kanahieng ih oh peikiong ngile. Dehr uhwong ih, pwe e sohte pahn mahkohng amwail kauwehla kosonned kan,+ pwehki e kin weuwa mwarei. 22 Ahpw, ma ke uhdahn peikiong ngile oh wia mehkoaros me I nda, I pahn imwintihtiong omw imwintihti kan oh uhwong irail me kin uhwong uhk. 23 Pwe nei tohnlengo pahn tiengwei mwohmw oh kahluwaiukalahng mehn Amor kan, mehn Id kan, mehn Peris kan, mehn Kenan kan, mehn Ip kan oh mehn Sepus kan, oh I pahn kamwomwirailla.+ 24 Ke sohte pahn poaridiong arail koht akan de papah* irail, oh ke sohte pahn idawehn arail tiahk kan.+ Ahpw ke pahn anahne kauwehla arail dikedik kan oh sukpeseng arail uhr sarawi kan.+ 25 Kumwail pahn anahne papah Siohwa amwail Koht,+ oh e pahn ketin kapaiahkin uhk pilawa oh pihl.+ I pahn kihsang rehmw soumwahu.+ 26 Sohte lih emen nan sapwomw pahn iohla de depwen,+ oh I pahn kihong uhk mour werei.

27 “I pahn kahrehiong irail en masak ie mwohn omw pahn leledo,+ oh I pahn kapingada aramas koaros me peiong uhk, oh I pahn kahrehiong omw imwintihti kan koaros en tangasang uhk ni ar lohdi.+ 28 Mwohn omw lella, I pahn kahrehiong irail en mworusala,*+ oh met pahn kasarehla mehn Ip kan, mehn Kenan kan oh mehn Id kan mwohmw.+ 29 I sohte pahn kasareirailla sang mwohmw nan erein sounpar ehu, pwe sahpwo en dehr tehnla oh mahn lawalo en nansapw kan en dehr tohtohla oh kauweiukala.+ 30 Ekisekis I pahn kasareirailla sang mwohmw, lao ke pahn ngederla oh sapwenikihla sahpwo.+

31 “I pahn koasoanehdi irepen sapwomw sang Sehd Weitahta lella sehden Pilisdia oh sang sapwtehn lella Pillapo;*+ pwe I pahn kihong tohn sahpwo nan pehmwail kan, oh ke pahn kasareirailla sang mwohmw.+ 32 Ke sohte pahn wiahda inou lap ehu rehrail de rehn arail koht akan.+ 33 Irail sohte pahn kousoan nan sapwomw, pwe ren dehr kahrehiong uhk ken dipada ong ie. Ma ke pahn papah arail koht akan, e uhdahn pahn wiahla lidip ehu ong uhk.”+

24 Ih eri ketin mahsanihong Moses: “Patohdahla rehn Siohwa, kowe oh Aaron, Nadap oh Apihu,+ oh ohl mah en Israel 70, oh kumwail pahn poaridi sang wasa doh. 2 Moses kelehpw me pahn patohla rehn Siohwa; a meteikan sohte pahn iang kohla, oh aramas akan sohte pahn iang ih kohdahla.”+

3 Moses eri kohdo oh padahkihong aramas ako mahsen en Siohwa koaros oh kosonned kan koaros,+ oh aramas ako koaros eri wiahkintehieu sapengki: “Se pahn kapwaiada mahsen kan koaros me Siohwa ketin mahsaniher.”+ 4 Moses eri ntingihedi mahsen en Siohwa koaros.+ Ih eri sangkenei pirida oh kauwada pei sarawi ehu oh uhr 12 me pahrekiong keinek 12 en Israel nin tepin nahnao. 5 Mwurin mwo e kadarala mwahnakapw en Israel kei, oh irail wiahda meirong isihs kei oh meirongkihla kouwol kei nin duwen meirong en kaminimin+ ong Siohwa. 6 Moses eri ale elep en ntao oh kihong nan pwohl kei, oh elep en ntao e usupihki pohn pei sarawio. 7 Ih eri ale pwuhken inou lapo oh wadekohng aramas ako ni ngihl laud.+ Irail eri nda: “Se pahn kapwaiada oh peikiong mehkoaros me Siohwa ketin mahsaniher.”+ 8 Moses eri ale ntao oh usupihki aramas ako+ oh nda: “Iet ntahn inou lapo me Siohwa ketin wiahiong kumwail me poahsoankihda mahsen pwukat koaros.”+

9 Moses, Aaron, Nadap, Apihu oh ohl mah en Israel 70 ahpw kohdahla, 10 oh irail kilangada Koht en Israel.+ Pahn aluweluwe ko mwomwen duwehte tat takai me wiawihkihda sapair, oh e min duwehte nanleng.+ 11 E sohte ketin kaloke ohl lapalap en Israel ko,+ oh irail kilangada kaudiahl en Koht mehlelo erein ar mwenge oh nim.

12 Siohwa eri ketin mahsanihong Moses: “Kohdahdo rehi pohn nahnaht oh mihmi wasaht. I pahn kihong uhk pelien takai patapat ko me I pahn ntingihedi kosonned oh kehkehlik pwehn kaweid irail.”+ 13 Moses eri onopada iangahki nah sounpapah Sosua,+ oh Moses kohdahla pohn nahnahn Koht mehlelo.+ 14 Ahpw e ndaiong ohl mah ko: “Kumwail awih kiht wasaht lao se pahn pwurodo rehmwail.+ Aaron oh Urr+ mi rehmwail. Mehmen me mie eh repenpwung kak kohla rehra.”+ 15 Moses eri kohdahla pohn nahnao ni depwek eh kipehdi nahnao.+

16 Sapwellimen Siohwa lingan+ mihmi pohn Nahna Sainai,+ oh depwek kipehdi nahnao erein rahn weneu. Ni keisuhwen rahn, e ketin malipe Moses sang nanpwungen depwek ko. 17 Ong mehn Israel ko me kilikilang, mwomwen sapwellimen Siohwa lingan duwehte kisiniei me kin kamwomwala wasa pohn kadoken nahnao. 18 Moses eri kohlongala nan depweko oh kohdahla pohn nahnao.+ Oh Moses mihmihki pohn nahnao erein rahn 40 oh pwohng 40.+

25 Siohwa eri ketin mahsanihong Moses: 2 “Ndaiong aramas en Israel kan ren kihda kisakis ong ie; kumwail pahn alehsang rehn aramas koaros me ar mohngiong kin kamwakid irail en kisikise ie.+ 3 Iet kisakis me kumwail pahn alehsang irail: kohl,+ silper,+ prons,+ 4 dereht poh mei, dereht ntahnmwel sang wunen sihpw,* dereht weitahta,* linen kaselel, wunen kuht, 5 kilin sihpw wol me kaduh nan poh weitahta, kilin sihl, tuhke akesia,+ 6 leh ong lamp kan,+ palsam* ong lehn kei+ oh ong warpwohmwahu,+ 7 takai oniks kan oh takai teikan me pahn mi ni ihpodo+ oh perehpen mwaremware.+ 8 Irail pahn wiahda wasa sarawi ehu ong ie, oh I pahn kousoan* nanpwungarail.+ 9 Kumwail pahn wiahda impwal sarawio oh kepwe kan koaros loale, idawehnte mwohmw* me I kasalehiong uhko.+

10 “Irail pahn wiahda kohpwa ehu sang tuhkehn akesia, me pahn reireiki kiupid* riau elep oh tehlapki kiupid ehu elep oh ilehki kiupid ehu elep.+ 11 Ke pahn kidimkihla kohpwao kohl tohr.+ Ke pahn kidimala loale oh liki, oh ke pahn kapilkipene mehn kapwat kohl.+ 12 Oh ke pahn wiahda rihng kohl pahieu ong kohpwao oh kihong rihng ko pohnangin neh pahieu en kohpwao, rihng riau apali oh rihng riau pali teio. 13 Oh ke pahn wiahda tuhkehn wisik kan sang tuhke akesia oh kidimkihla kohl.+ 14 Ke pahn kadil tuhkehn wisik ko nan rihng ko ni keilen Kohpwao pwehn wa Kohpwao. 15 Tuhkehn wisik ko pahn mihmihte nan rihng en Kohpwao; tuhke ko sohte pahn kin kohsang.+ 16 Ke pahn kihdiong nan Kohpwao pelien takai patapat me kadehde ko ntingdi powe, me I pahn kihong uhk.+

17 “Ke pahn wiahda pweine me kohl tohr, me pahn reireiki kiupid riau elep oh tehlapki kiupid ehu elep.+ 18 Ke pahn wiahda kerup kohl riemen; ke pahn wiairahda sang ni kohl sukusukda ni imwi riau en pweineo.+ 19 Wiahda kerup ko ni imwi riauwo koaros, emenemen kerup ni imwin pweine. 20 Kerup ko pahn kapapeseng pehra ko oh koaduhpwalihdi pweineo,+ oh ira pahn sohpeipene. Mesen kerup ko pahn sohpeilahng pweineo. 21 Ke pahn kihdiong pweineo+ pohn Kohpwao, oh ke pahn kihdiong nan Kohpwao pelien takai patapat me kadehde ko ntingdi powe, me I pahn kihong uhk. 22 I pahn kasalehiong uhk pein ngehi wasao oh mahseniong uhk sang pohn pweineo.+ Sang nanpwungen kerup riemeno me mi pohn kohpwahn Kadehdeo, I pahn kasalehiong uhk mehkoaros me I pahn kehkehlingkihong uhk ong mehn Israel kan.

23 “Ke pahn pil wiahda tehpel ehu+ sang tuhkehn akesia, me pahn reireiki kiupid riau oh tehlapki kiupid ehu oh ilehki kiupid ehu elep.+ 24 Ke pahn kidimkihla kohl tohr oh kapilkipene mehn kapwat kohl. 25 Ke pahn wiahda keile kapilpene ni tehlap en sosohng en peh* ehu oh kapilkipene mehn kapwat kohl ni keileo. 26 Ke pahn wiahda rihng kohl pahieu ong tehpelo oh kihdiong rihng ko ni keimw pahieu ko, wasa me neh pahieu ko mi ie. 27 Rihng ko pahn mi karanih keile ko mehn koledi tuhkehn wisik ko pwehn wa tehpelo. 28 Ke pahn wiahda tuhkehn wisik ko sang tuhke akesia oh kidimkihla kohl oh wa tehpelo.

29 “Ke pahn pil wiahda ong tehpelo pileit kan, kep kan, oh sah kan oh pwohl kan me re pahn doadoahngki pwehn wudekih meirong en wain kan. Ke pahn wiahkihda mepwukat kohl tohr.+ 30 Oh ke pahn kaukaule kihdi pilawahn kasansalo pohn tehpelo mwohi.+

31 “Ke pahn wiahda dewen lamp ehu+ me kohl tohr. Dewen lampo pahn sukusukda. Poahsoane, pwuloi, rah, kisin teh kan,* mpwek, oh masal pahn wiawihda ni ehute mehkot.+ 32 Oh rah wenepwoat pahn uhsang ni keilen dewen lampo, rah silipwoat apali oh rah silipwoat ni pali teio. 33 Kisin teh siluh me mwomwen wahnrohs almond pahn mi apali rah ko, iangahki mpwek oh masal kairekla, oh ke pil pahn wia soahngohte ong rah silipwoat me mi pali teio. Ih mwomwen rah wenepwoato ar pahn uhsang ni pwuloi en dewen lampo. 34 Ni pwuloi en dewen lampo mie kisin teh pahieu me mwomwen wahnrohs almond, iangahki mpwek oh masal kairekla. 35 Ehu mpwek pahn mi pahn tepin rah riapwoat me uhsang ni pwuloio oh ehu mpwek mi pahn rah riapwoat oh pil ehu mpwek mi pahn rah riapwoat, pwe rah wenepwoat en uhsang ni pwuloio. 36 Mpwek ko oh rah ko oh dewen lampo pwon pahn sukusukda ehute sang ni kohl tohr.+ 37 Ke pahn wiahda lamp isuh ong dewen lamp wet, oh ni lamp ko ar pahn isihsda, re pahn kamarainih wasao mwohn lampo.+ 38 Tihpw ko oh dewen mwoalus ko pahn pil kohl tohr.+ 39 Dewen lampo pahn wiawihda iangahki dipwisou pwukat sang ni dalend* ehu en kohl tohr. 40 Kilang pwe ken wiahda mepwukat en duwehte mwohmw* me kasansalohng uhk pohn nahnao.+

26 “Ke pahn wiahkihda impwal sarawio+ lepin likoun impwal eisek me wiawihkihda linen pinipin kaselel, dereht poh mei, dereht ntahnmwel sang wunen sihpw, oh dereht weitahta.* Ke pahn wiahda mepwukat ni kilel en deiad+ en kerup kan.+ 2 Ehuehu lepin likoun impwalo pahn reireiki kiupid* 28 oh tehlapki kiupid 4. Lepin likoun impwal ko koaros pahn wehteieu.+ 3 Lepin likoun impwal limau ko pahn kohpene pwehn irekla mwurin ehuehu, oh lepin likoun impwal limau teiko pahn kohpene irekla mwurin ehuehu. 4 Ke pahn wiahda pwakel en dereht poh mei ni keilen ehu lepin likoun impwal ni imwin ireken likou ko, oh ke pil pahn wia soahngohte ni imwin pali teio wasa me e pahn kohpene ieo. 5 Ke pahn wiahda pwakel 50 ni ehu lepin likoun impwalo oh pwakel 50 ni keilen lepin likoun impwal teio pwe ren pelialipene wasa me re pahn kohpene ieo. 6 Ke pahn wiahda mehn kateng kohl 50 oh kolkipene lepin likoun impwal ko mehn kateng ko, oh impwal sarawio pahn wiahla ehu.+

7 “Ke pahn pil wiahda lepin likou sang wunen kuht+ ong pweinen impwal sarawio. Ke pahn wiahda lepin likoun impwal 11.+ 8 Ehuehu lepin likoun impwal pahn reireiki kiupid 30 oh tehlapki kiupid 4. Lepin likoun impwal 11 ko koaros pahn wehteieu. 9 Ke pahn kihpene lepin likoun impwal limau ko oh kihpene lepin likoun impwal weneu teiko, oh ke pahn welikpene mwohn impwalo keweneun lepin likoun impwalo. 10 Oh ke pahn wiahda pwakel 50 ni keilen lepin likoun impwalo, me mi ni imwio ni ireken likou ko, oh pwakel 50 ni keilen lepin likoun impwalo ni pali teio wasa me re pahn kohpene ieo. 11 Ke pahn wiahda mehn kateng prons 50 oh kihong mehn kateng ko nan pwakel ko oh kolpene impwalo, oh e pahn kohpene wiahla ehu. 12 Kisehn lepin likoun impwalo me luhwehdi pahn wie mwotomwotou. Elep en lepin likoun impwalo me luhwehdi pahn wie mwotomwotou ni mwurin impwal sarawio. 13 Luhwen lepin likoun impwalo pahn langada ni impwal sarawio kiupid ehu reirei ni pengepenge ko koaros, pwehn pwaindi impwal sarawio.

14 “Ke pahn pil wiahda pweipwei ehu ong impwalo sang ni kilin sihpw wol me kaduh nan poh weitahta oh ehu pweipwei pohn met sang ni kilin sihl.+

15 “Ke pahn wiahda lepin uhr kei*+ me inenda sang ni tuhkehn akesia ong impwal sarawio.+ 16 Ehuehu lepin uhr pahn reireiki kiupid eisek oh tehlapki kiupid ehu elep. 17 Mie kisin tuhke riau me pahn sikieisang imwin ehuehu lepin uhr ko oh kisin tuhke riauwo pahn pahrekpene. Ih mwomwen omw pahn wiahda lepin uhr ko koaros ong impwal sarawio. 18 Ke pahn wiahda lepin uhr 20 ong palieir en impwal sarawio.

19 “Oh ke pahn wiahda poahsoan silper 40+ me pahn mi pahn lepin uhr 20 ko: poahsoan riau pahn mi pahn ehuehu lepin uhr ong kisin tuhke riau ko me sikieisang.+ 20 A pali teio ni paliepeng en impwal sarawio, wiahda lepin uhr 20 21 oh poahsoan silper 40, poahsoan riau pahn mi pahn ehuehu lepin uhr. 22 A ong mwurin impwal sarawio me sallahng palikapi, ke pahn wiahda lepin uhr wenepwoat.+ 23 Ke pahn wiahda lepin uhr riapwoat pwehn wia uhr en keimw riauo mwurin impwal sarawio. 24 Lepin uhr wet pahn mie lepin tuhke riapwoat sang pah kohdatehieu lel powe, wasa ira pahn katengdiong ni tepin rihngo. Met pahn wiawihong ira koaros, oh ira pahn wiahla uhr en keimw riauo. 25 Oh e pahn mie lepin uhr welipwoat oh poahsoan silper 16, poahsoan riau pahn mi pahn ehuehu lepin uhr.

26 “Ke pahn wiahda tuhkehn ndape kei sang ni tuhkehn akesia, meh limau ong lepin uhr ko me mi apali impwal sarawio,+ 27 oh tuhkehn ndape limau ong lepin uhr ko me mi apali impwal sarawio, oh tuhkehn ndape limau ong lepin uhr ko ni palikapi en impwal sarawio, mwurin impwalo. 28 Tuhkehn ndape me tang nanwerengen lepin uhr ko pahn uhsang ni ehu imwi kohla lel ni ehu imwi.

29 “Ke pahn kidimkihla lepin uhr ko kohl,+ oh ke pahn wiahkihda rihng ko kohl mehn koledi tuhkehn ndape ko, oh ke pahn kidimkihla tuhkehn ndape ko kohl. 30 Ke pahn kauwada impwal sarawio nin duwen koasoandi me kasansalohng uhk pohn nahnao.+

31 “Ke pahn wiahda kahdeng ehu+ sang ni dereht poh mei, dereht ntahnmwel sang wunen sihpw, oh dereht weitahta, oh linen pinipin kaselel. Kilel en kerup kei me pahn deiadidi powe. 32 Ke pahn langadahng ni uhr pahieu en tuhke akesia me kidikidki kohl. Mehn kateng ko pahn kohl. Uhr ko pahn kohdiong pohn poahsoan silper pahieu. 33 Ke pahn langahda kahdengo pahn mehn kateng ko oh wahdo kohpwahn Kadehdeo+ wasao masloalen kahdengo. Kahdengo pahn irepeseng Wasa Sarawio+ oh Wasa Sarawiheo.+ 34 Ke pahn anahne kihdiong pweineo pohn kohpwahn Kadehdeo nan Wasa Sarawiheo.

35 “Ke pahn kihdiong tehpelo likin kahdengo, oh dewen lampo+ pahn mi palilahsang tehpelo ni palieir en impwal sarawio; a tehpelo ke pahn kihdiong ni paliepeng. 36 Ke pahn wiahda kahdeng ehu ong wasahn pedolong nan impwalo sang ni omw pahn pahda dereht poh mei, dereht ntahnmwel sang wunen sihpw, dereht weitahta, oh linen pinipin kaselel.+ 37 Ke pahn wiahda uhr akesia limpwoat ong kahdengo oh kidimkihla kohl uhr pwukat. Mehn kateng ko pahn kohl, oh ke pahn wiahda poahsoan prons limau ong uhr pwukat.

27 “Ke pahn wiahda pei sarawio sang tuhkehn akesia;+ e pahn reireiki kiupid* limau oh tehlapki kiupid limau. Pei sarawio pahn keimw pahieu oh kiupid siluh ile.+ 2 Ke pahn wiahda kode+ ni keimw pahieu ko; kode ko pahn wia kisehn pei sarawio, oh ke pahn kidimkihla pei sarawio prons.+ 3 Ke pahn wiahda pekid kan ong kihsang pehs kan,* pil sapwel kan, pwohl kan, pwohk kan, oh dewen mwoalus kan, oh ke pahn wiahda dipwisou pwukat koaros sang ni prons.+ 4 Ke pahn wiahda mehn inihn pasapas ehu ong pei sarawio, mehn inihn prons, oh ni mehn inihno rihng prons pahieu ni keimw pahieu ko. 5 Ke pahn kihdiong mehn inihno pahnangin keilen pei sarawio, oh mehn inihno pahn kohdi lel ni lukepen pei sarawio. 6 Ke pahn wiahda tuhkehn wisik kan sang tuhke akesia ong pei sarawio oh kidimkihla prons. 7 Tuhkehn wisik ko pahn kadilong nan rihng ko pwe tuhke ko en kak mi pali koaros ni pei sarawio ni ahnsou me e pahn wisik.+ 8 Ke pahn wiahkihda pei sarawio dinapw ni mwomwen kohpwa ehu me sohte kanenge.* E pahn wiawihda nin duwen me E ketin kasalehiong uhk pohn nahnao.+

9 “Ke pahn wiahda wasa me kelpene+ ni impwal sarawio. Ni palieir, wasa me kelpeneo pahn mie kahdeng me wiawihdahsang linen pinipin kaselel me wie langalang, oh pali wet pahn reireiki kiupid 100.+ 10 E pahn mie uhr 20 iangahki poahsoan prons 20. Mehn kateng uhr ko oh mehn kadokepene* uhr ko pahn wiawihkihda silper. 11 Kahdeng ko me langalang ni paliepeng pil pahn reireiki kiupid 100, iangahki uhr 20 oh poahsoan prons 20, oh pil mehn kateng uhr ko oh mehn kadokepene* uhr ko pahn wiawihkihda silper. 12 E pahn mie kahdeng kei me langalang ni palikapi me pahn reireiki kiupid 50 nan wasa me kelepeneo, iangahki uhr eisek oh poahsoan eisek. 13 Tehlap en wasa me kelpeneo ni palimese me sallahng wasa me ketipino kin dakada ieo kiupid 50. 14 E pahn mie kahdeng kei me langalang me pahn reireiki kiupid 15 ehu pali, iangahki uhr silipwoat oh poahsoan siluh.+ 15 Oh ni pali teio, e pahn mie kahdeng kei me langalang me pahn reireiki kiupid 15, iangahki uhr silipwoat oh poahsoan siluh.

16 “Ni wasahn pedolong en wasa me kelpeneo pahn mie kahdeng ehu me pahn reireiki kiupid 20 oh peipeida sang dereht poh mei, dereht ntahnmwel sang wunen sihpw, dereht weitahta,* oh linen pinipin kaselel,+ iangahki uhr pahpwoat oh poahsoan pahieu.+ 17 Uhr ko koaros me kapilpene wasa me kelpeneo pahn mie mehn kadokepene kan me silper oh mehn kateng silper kan, ahpw poahsoane ko pahn prons.+ 18 Wasa me kelpeneo pahn reireiki kiupid 100,+ tehlapki kiupid 50, oh likou langalang ko me wiawihdahsang linen pinipin kaselel pahn ilehki kiupid 5, oh pahn mie poahsoan prons kan. 19 Dipwisou koaros me kin kadoadoahk ong papah nan impwal sarawio, iangahki metehn kateng impwalo oh metehn kateng koaros en wasa me kelpeneo, pahn wiawihkihda prons.+

20 “Ke pahn kehkehlingkihong mehn Israel kan ren wahdo lehn olip tohr ong lampo, pwe lampo en kin kak wie lullul.+ 21 Nan impwal en mihtingo, likin kahdengo me mi limwahn kohpwahn Kadehdeo,+ Aaron oh nah pwutak ko pahn koasoanehdi lampo en kin ngkengken sang nin soutik lao lel nimenseng mwohn silangin Siohwa.+ Met iei koasoandi poatopoat ehu ong mehn Israel kan, me re pahn kapwaiada erein arail dih kan koaros.+

28 “Ke pahn wahdo sang rehn mehn Israel kan riomw Aaron, iangahki nah pwutak kan, pwe en kak papah ie nin duwen samworo men+—Aaron+ iangahki nah pwutak kan+ Nadap oh Apihu,+ Eliesar oh Idamar.+ 2 Ke pahn wiahda likou sarawi kei ong riomw Aaron, ong lingan oh kaselel.+ 3 Ke pahn koasoiong koaros me koahiek,* irail kan me I audehkidahr erpit,+ oh irail pahn wiahda en Aaron likou ko pwehn kasalehda me e sarawilahr, pwe en kak papah ie nin duwen samworo men.

4 “Iet likou kan me re pahn wiahda: perehpen mwaremware ehu,+ ihpod ehu,+ likou reirei me sohte peh,+ likou reirei teker ehu, lisoarop ehu,+ oh kateng ehu;+ irail pahn wiahda likou sarawi pwukat ong riomw Aaron oh nah pwutak kan, pwe en kak papah ie nin duwen samworo men. 5 Tohndoadoahk koahiek kan pahn doadoahngki kohl, dereht poh mei, dereht ntahnmwel sang wunen sihpw, dereht weitahta,* oh linen kaselel.

6 “Irail pahn wiahda ihpod sang ni kohl, dereht poh mei, dereht ntahnmwel sang wunen sihpw, dereht weitahta, oh linen pinipin kaselel, oh e pahn deiadida.+ 7 E pahn mie mwein likou reirei riau ni pwopweo me pahn katengepene imwi riau me mi powe. 8 Kateng peipeidao,*+ me patehngete ihpodo mehn pirepene ihpodo, pahn wiawihdahsang ni soahng kohte: kohl, dereht poh mei, dereht ntahnmwel sang wunen sihpw, dereht weitahta, oh linen pinipin kaselel.

9 “Ke pahn ale takain oniks riau+ oh parada pohn takai ko eden nein Israel pwutak kan,+ 10 ahd weneu ni ehu takai oh ahd weneu teiko ni takai teio, ni irekidien arail ipwidi. 11 Soun parada takai men pahn parada eden nein Israel pwutak kan pohn takai riauo duwehte eh pahn parada mehn sidamp ehu.+ Kowe eri kihdiong takai ko pohn dewera kohl ko. 12 Ke pahn kihdi takai riauo pohn mwein likou reirei ko en ihpodo ni pwopweo nin duwen takain kataman kei ong nein Israel pwutak kan,+ oh Aaron pahn weuwa adarail kan mwohn silangin Siohwa pohn mwein likou reirei riauo ni pwopweo nin duwen mehn kataman ehu. 13 Ke pahn wiahkihda dewera kan kohl 14 oh sein riapwoat kohl tohr me ingkolpene duwehte sahl pwoat,+ oh ke pahn kapatahiong sein ko ni dewera ko.+

15 “Ke pahn kihong soun deiad men en wiahda perehpen mwaremware en kopwung.+ E pahn wiawihda duwehte ihpodo, sang ni kohl, dereht poh mei, dereht ntahnmwel sang wunen sihpw, dereht weitahta, oh linen pinipin kaselel.+ 16 E pahn keimw pahieu ni eh pahn weliwelpene nanwerenge, e pahn reireiki span ehu* oh tehlapki span ehu. 17 Ke pahn koasoanehdi takai ko ni irek pahieu. Ni kairek keieuo iei rupi, topas oh emerald. 18 Kairek keriauo iei turkuois, sapair oh sasper. 19 Kesiluhwen kaireko iei takai leshem,* akat oh amedist. 20 Kapahieun kaireko iei krisolaid, oniks oh seid. Takai ko pahn koasoandi pohn dewerail kohl ko. 21 Takai ko pahn pahrekiong eden nein Israel pwutak 12 ko. Ehuehu pahn perperda duwehte sidamp ehu, ehuehu ahd pahn kasalehda ehuehu keinek 12 ko.

22 “Ke pahn wiahda sein me ingkolpene pohn perehpen mwaremwareo, duwehte sahl me kohl tohr.+ 23 Ke pahn wiahda rihng kohl riau ong perehpen mwaremware oh kihong rihng riauo ni imwi riauo pohn perehpen mwaremwareo. 24 Ke pahn kadil sahl kohl riapwoato ni rihng riauo ni imwin perehpen mwaremware. 25 Ke pahn kadilong imwin sahl riauo ni dehu riauo, oh ke pahn katengehdi pohn mwein likou reirei ko en ihpodo ni pwopweo, mwohn ihpodo. 26 Ke pahn wiahda rihng kohl riau oh kihdiong loalen keimw riau en perehpen mwaremwareo, limwahn ihpodo.+ 27 Ke pil pahn wiahda rihng kohl riau mwohn ihpodo, pahnangin mwein likou reirei riauo ni pwopweo, limwahn wasahn katengo, pohnangin kateng peipeida* en ihpodo.+ 28 Perehpen mwaremware pahn katengkipene sahl poh mei ehu, e pahn pirapiriong rihng en ihpod ko. Met pahn kolokolete perehpen mwaremwareo nan dewe ni ihpodo, pohnangin kateng peipeidao.*

29 “Aaron pahn wa eden nein Israel pwutak kan pohn perehpen mwaremware en kopwung ni eh mohngiong, ni ahnsou me e kin pedolong nan Wasa Sarawio nin duwen mehn kataman ehu mwohn silangin Siohwa ahnsou koaros. 30 Ke pahn kihong Urim oh Dumim*+ ni perehpen mwaremware en kopwungo, oh e pahn mi ni en Aaron mohngiongo ni eh pahn kin kohdo mwohn silangin Siohwa, oh Aaron pahn wa mepwukat ahnsou koaros ni eh mohngiong mwohn silangin Siohwa pwehn wiahda pilipil kan me pid mehn Israel kan.

31 “Ke pahn wiahda likou reirei me sohte peh mehn likawih loalen ihpodo sang ni dereht poh mei tohr.+ 32 E pahn mie pwoaren moangen likowo nanwerenge. Pwungipeo me kapilpene pwoahr en tepinweren likou reireio pahn peipeida duwehte pwungipen likou mete,* pwe e sohte pahn mengei en teipeseng. 33 Ke pahn wiahda pwohmakraneid sang ni dereht poh mei, dereht ntahnmwel sang wunen sihpw, oh dereht weitahta kapilpene pwungipen likowo pwon, iangahki pehl kohl ko nanpwungarail. 34 Ke pahn kairekehla pehl kohl oh pwohmakraneid, pehl kohl ehu oh pwohmakraneid ehu, kapilpene pwungipen likou reirei me sohte peho pwon. 35 Aaron pahn kin likawih pwe en kak papah, oh ngilen pehl ko pahn kin sekesek ni eh kin kohlongala nan wasa sarawio mwohn silangin Siohwa oh ni eh kin pedoila, pwe en dehr mehla.+

36 “Ke pahn wiahda mete patapat lingaling ehu me kohl tohr oh parada powe duwehte emen eh pahn wiahda sidamp ehu: ‘Sarawi iei sapwellimen Siohwa.’+ 37 Ke pahn katengehkihdi meteo sahl poh mei ni lisoaropo;+ e pahn mi ni temwen lisoaropo. 38 E pahn mi ni temwen Aarono, oh Aaron pahn pwukoahki ni emen eh wiahda sapwung ehu ong mehkan me sarawi,+ me mehn Israel kan kasarawihala nin duwen kisakis sarawi kei. Ahnsou koaros e pahn kin mi pohn temweo, pwe ren kak ale kupwuramwahu mwohn silangin Siohwa.

39 “Ke pahn pahda likou reirei tekero sang ni linen kaselel, oh ke pahn wiahda lisoarop ehu sang ni linen kaselel, oh wiahda kateng peipeida ehu.+

40 “Ke pil pahn wiahda likou reirei kei, kateng kei, oh likoun moange kei ong nein Aaron pwutak ko,+ ong lingan oh kaselel.+ 41 Ke pahn kalikawihada riomw Aaron oh nah pwutak kan, oh ke pahn keieiraildi+ oh kasapwilirailda*+ oh kasarawihirailla, oh irail pahn papah ie nin duwen samworo kei. 42 Ke pil pahn wiahda arail lepin rausis* linen pwehn perehla arail kilisou.+ Met pahn reirei sang ni lukope lel ni tepin denge. 43 Aaron oh nah pwutak kan pahn kin likawih met ni ahnsou me re pahn kin kohdo nan impwal en mihtingo de ni ar pahn kin kohla ni pei sarawio pwehn papah nan wasa sarawio, pwe ren dehr dipada oh kamakamala. Met iei koasoandi poatopoat ehu ong ih oh kadaudoke kan.

29 “Iet me ke pahn wia pwehn kasarawihirailla pwe ren papah ie nin duwen samworo kei: Ale koupwul wol men, oh sihpw wol riemen me sohte sapwung kis rehra,+ 2 pilawa me sohte doal ihs, lopwon me mwomwen rihng me sohte doal ihs ahpw doal leh, oh pilawa menipinip me sohte doal ihs me irihrkihla leh.+ Ke pahn wiahkihda mepwukat pilawa amas mwahu sang wihd 3 oh kihong mepwukat nan kopwou ehu oh meirongki mepwukat,+ iangahki kouwolo oh sihpw wol riemeno.

4 “Ke pahn kahrehdo Aaron oh nah pwutak ko ni wasahn pedolong en impwal en mihtingo+ oh kaduhpkin irail pihl.+ 5 Kowe eri ale likou ko+ oh kalikawihkihda Aaron likou reireio, likou reirei me sohte peho en ihpodo, ihpodo, oh perehpen mwaremwareo, oh ke pahn pirehdi teng kateng peipeida* en ihpodo ni lukopeo.+ 6 Ke pahn kihong lisoaropo pohn moangeo oh kihong kilel en kasarawio* ni lisoaropo;+ 7 oh ale lehn keio+ oh wudekihdiong pohn moangeo oh keiehdi ih.+

8 “Kowe eri kahrehdo nah pwutak ko oh kalikawihkinirailda likou reirei ko+ 9 oh pirekipene kateng ko ni lukoparail kan, Aaron iangahki nah pwutak kan, oh kihong arail likoun moange ko; oh irail pahn ahnekihla pwukoahn samworo nin duwen koasoandi poatopoat ehu.+ Ih mwomwen omw pahn kasapwilada Aaron oh nah pwutak kan ren papah nin duwen samworo kei.*+

10 “Ke pahn wahdo kouwolo mwohn impwal en mihtingo, oh Aaron oh nah pwutak ko pahn pwil pehrail kan pohn moangen kouwolo.+ 11 Kemehla kouwolo mwohn silangin Siohwa, ni wasahn pedolong en impwal en mihtingo.+ 12 Ale ekis ntahn kouwolo ni sendin pehmwen oh kihong ni kod kan en pei sarawio,+ oh wudekihla luhwen ntao pwon ni poahsoan en pei sarawio.+ 13 Kowe eri ale wih koaros+ me pwaindi mwasahle kan, oh wih en eho, oh mwidihlik riauo iangahki eh wih ko, oh isikala pwe ren kak edinieida pohn pei sarawio.+ 14 Ahpw uduken kouwolo oh kilio oh kanengen kapehdeo, ke pahn isikala likin kahnimpwalo. Met iei meirong en dihp.

15 “Kowe eri ale emen sihpw wol ko, oh Aaron oh nah pwutak ko pahn pwil pehrail kan pohn moangen sihpw wolo.+ 16 Kemehla sihpw wolo oh ale ntaho oh usupihki pohn keilen pei sarawio pwon.+ 17 Lupukpene sihpw wolo, oh widenda mwasahle ko+ oh neh ko,* oh koasoanehdi mepwukat iangahki moangeo. 18 Ke pahn isikala sihpw wolo pwon oh wiahda pwehn edinieida pohn pei sarawio. Met iei meirong isihs ehu ong Siohwa, pwoh kansenamwahu ehu.+ Iei meirong ehu sang kisiniei ong Siohwa.

19 “Mwuri ke pahn ale sihpw wol teio, oh Aaron oh nah pwutak ko pahn pwil pehrail kan pohn moangen sihpw wolo.+ 20 Kemehla sihpw wolo oh ale ekis eh ntao oh kihong ni palimaun en imwin salengen Aarono oh ni palimaun en imwin salengen nah pwutak ko oh palimaun en sendinpehlaparail ko oh palimaun en sendinnehlaparail ko, oh usupihki ntao pohn keilen pei sarawio pwon. 21 Kowe eri ale ekis ntao me mi pohn pei sarawio oh ekis lehn keio+ oh usupihki pohn Aaron oh eh likowo oh pohn nah pwutak ko oh arail likou kan, pwe ih oh eh likowo oh nah pwutak ko oh arail likou ko en sarawi.+

22 “Kowe eri ale wih en sihpw wolo, pwadaiki wiho, wih me pwaindi mwasahle kan, wih en eho, mwidihlik riauo iangahki eh wih ko,+ oh palimaun en neho, pwe met iei sihpw wol ong kesepwil en samworo.+ 23 Pil ale ehu pilawa pwonopwon oh lopwon en pilawa me mwomwen rihng me doal leh oh pilawa menipinip sang nan kopwou en pilawa me sohte doal ihs me mi mwohn silangin Siohwa. 24 Ke pahn pil kihong mepwukat koaros nan pehn Aaron oh nan pehn nah pwutak ko, oh ke pahn kin kamwakid kohwei kohdo nin duwen meirong en oaloahl ehu mwohn silangin Siohwa. 25 Ke ahpw pahn kihsang nan pehrail ko oh isikala mepwukat pohn pei sarawio, pohn meirong isihs ko, pwe en wia pwoh kansenamwahu ehu mwohn silangin Siohwa. Met iei meirong ehu sang kisiniei ong Siohwa.

26 “Kowe eri ale mwaremwaren sihpw wol ong kesepwil+ en samworo, me wiawihda pwehn idihada Aaron, oh kamwakid kohwei kohdo nin duwen meirong en oaloahl ehu mwohn silangin Siohwa, oh met pahn wiahla pwaisomw. 27 Ke pahn kasarawihala mwaremwaren meirong en oaloahlo oh nehn meirong sarawi me oaloahlo oh me kohsang ni sihpw wol ong kesepwil en samworo,+ sang dahme meirongala ong idihdidahn Aaron oh nah pwutak ko. 28 Met pahn kohieng Aaron oh kadaudoke kan* nin duwen koasoandi poatopoat ehu me mehn Israel kan pahn kapwaiada, pwehki e wia meirong sarawi ehu, oh e pahn wia meirong sarawi ehu me mehn Israel kan pahn kihda.+ Iei met arail meirong sarawi ong Siohwa sang ni arail meirong en kaminimin kan.+

29 “En Aaron likou sarawi ko+ pahn kin kohieng kadaudoke kan+ me pahn wiliandi ih ni ahnsou me re keidi oh kasapwilda nin duwen samworo kei. 30 Samworo men sang nanpwungen kadaudoke ko me pahn wiliandi ih oh kin kohdo nan impwal en mihtingo pwehn papah nan wasa sarawio, pahn likawih likou pwukat erein rahn isuh.+

31 “Ke pahn ale sihpw wol ong kesepwil en samworo oh pwoailihada udukeo nan wasa sarawi ehu.+ 32 Aaron oh nah pwutak ko pahn tungoale+ uduken sihpw wolo oh pilawa me mi nan kopwouo ni wasahn pedolong en impwal en mihtingo. 33 Irail pahn tungoale soahng kan me kadoadoahk ong tomw me wiawi pwehn kasapwilirailda nin duwen samworo kei* oh kasarawihirailla. Ahpw emen me sohte mweimwei* sohte pahn tungoale mepwukat, pwe soahng sarawi kei met.+ 34 Ma mie luhwen uduken meirong en kesepwilo oh pilawao lao lel nimenseng, ke pahn isikala dahme luhwehdi.+ Sohte me pahn tungoale, pwe met mehkot sarawi.

35 “Ih mwomwen omw pahn wiahn met ong Aaron oh nah pwutak kan, nin duwen soahng koaros me I kehkehlingkihong uhk. Ke pahn doadoahngki rahn isuh pwehn kasapwilirailda nin duwen samworo kei.*+ 36 Rahn koaros ke pahn meirongki kouwol en meirong en dihp ong tomw ehu, oh ke pahn kamwakelehda pei sarawio sang dihp ni omw pahn wiahda tomwpen met, oh ke pahn keiehdi pei sarawio pwehn kasarawihala.+ 37 Ke pahn doadoahngki rahn isuh pwehn wiahda tomwpen pei sarawio, oh ke pahn kasarawihala pwe en wiahla pei sarawi ehu me uhdahn sarawi.+ Mehmen me pahn doahke pei sarawio pahn anahne sarawi.

38 “Iet me ke pahn meirongki pohn pei sarawio: ehuehu rahn sihpw wol riemen me sounpar ehu, ke pahn kaukaule wia met.+ 39 Meirongki emen sihpw wol pwulopwul nimenseng a sihpw wol teio nin soutik mwohn eh pahn rotorotala.*+ 40 Eisek kis ehun sosohng en ihpah* en pilawa amas mwahu me doalki pahkis ehun ihn* en lehn olip, oh pahkis ehun ihn en meirong en wain, pahn iangete keieun sihpw wol pwulopwulo. 41 Ke pahn meirongki keriemen en sihpw wol pwulopwulo nin soutik mwohn eh pahn rotorotala,* iangahki soangen krein oh meirong en wain duwehte nimensengo. Ke pahn wiahda met nin duwen pwoh kansenamwahu ehu, meirong ehu sang kisiniei ong Siohwa. 42 Met iei meirong isihs ehu me pahn kin kaukaule wiawi erein dih kan me pahn kohdo ni wasahn pedolong en impwal en mihtingo mwohn silangin Siohwa, wasao me I pahn kasalehiong kumwail pein ngehi pwehn mahseniong uhk.+

43 “I pahn kasalehiong mehn Israel kan pein ngehi wasao, oh wasao pahn sarawihla sang ni ei lingan.+ 44 I pahn kasarawihala impwal en mihtingo oh pei sarawio, oh I pahn kasarawihala Aaron oh nah pwutak ko+ pwe ren kak papah ie nin duwen samworo kei. 45 I pahn kousoan* nanpwungen aramas en Israel kan, oh I pahn wiahla ar Koht.+ 46 Oh irail uhdahn pahn esehla me ngehi me Siohwa arail Koht, me wairailsang nan sapwen Isip pwe I en kousoan nanpwungarail.+ Ngehi me Siohwa arail Koht.

30 “Ke pahn wiahda ehu pei sarawi ong wasahn isihs warpwohmwahu;+ ke pahn wiahkihda tuhkehn akesia.+ 2 E pahn keimw pahieu, reireiki kiupid ehu,* tehlapki kiupid ehu, oh ilehki kiupid riau. Kode ko oh pei sarawio pahn wiawihda ni ehute mehkot.+ 3 Ke pahn kidimkihla kohl tohr: powe, ni keile ko koaros, oh kode ko; oh ke pahn kapilkipene pei sarawio mehn kapwat kohl. 4 Ke pil pahn wiahda rihng kohl riau ong pei sarawio pahnangin mehn kapwat kohlo ni pali riauo koaros, oh mepwukat me pahn kolada tuhkehn wisik ko, mehn wa pei sarawio. 5 Wiahda tuhkehn wisik ko sang tuhke akesia oh kidimkihla kohl. 6 Ke pahn kihdi pei sarawio mwohn kahdengo me mi limwahn kohpwahn Kadehdeo,+ mwohn pweineo me mi pohn kohpwahn Kadehdeo, wasa me I pahn kasalehiong uhk pein ngehi.+

7 “Aaron+ pahn kin isik warpwohmwahu+ powe,+ e pahn wiahda pwehn edinieida pohn pei sarawio ni eh kin kaunopada lamp kan+ nimenseng koaros. 8 Pil ni Aaron eh pahn kin isikada lamp ko nin soutik mwohn eh pahn rotorotala,* e pahn isik warpwohmwahwo. Met iei meirong en warpwohmwahu me pahn kaukaule wiawi mwohn silangin Siohwa erein dih kan me pahn kohdo. 9 Ke sohte pahn meirongki warpwohmwahu keinepwi+ de meirong isihs ehu de meirong en krein ehu pohn pei sarawio, oh ke sohte pahn widekihong meirong en wain powe. 10 Aaron pahn wiahda tomw pohn kode ko pak ehu sounpar ehu.+ Ni eh doadoahngki ekis ntahn meirong en dihp en tomwo,+ e pahn wiahda tomwpen met pak ehu sounpar ehu erein dih kan me pahn kohdo. Met uhdahn sarawi ong Siohwa.”

11 Siohwa eri ketin mahsanihong Moses: 12 “Ni ahnsou me ke pahn wia wadawad en aramas oh wadek ohl en Israel kan,+ emenemen pahn anahne patohwanohng Siohwa pweinen pweipwei sapahl ong eh mour* ni ahnsou me re pahn wadawadedi. Met pahn wiawi pwe sohte kalokolok en lelohng irail ni ahnsou me re kileldi. 13 Iet me koaros me kileldi pahn kihda: elep en sekel* nin duwen wadawad en sekel en wasa sarawio.*+ Kera* rieisek pahrekiong sekel ehu. Elep en sekel iei kisakis ong Siohwa.+ 14 Koaros me kileldi me mahki sounpar 20 kohda pahn patohwanohng Siohwa kisakis.+ 15 Me kepwehpwe sohte pahn kihda laudsang oh me semwehmwe sohte pahn kihda tikitik sang elep en sekel* nin duwen kisakis ong Siohwa pwehn wiahda tomwpen amwail mour.* 16 Ke pahn ale mwohni silper en tomwo sang rehn mehn Israel kan oh kihda pwehn utung doadoahk me kin wiawi nan impwal en mihtingo, pwehn wia mehn kataman ehu mwohn silangin Siohwa ong mehn Israel kan, pwehn wiahda tomwpen amwail mour.”*

17 Siohwa ketin doula mahsanihong Moses: 18 “Wiahda ehu peisin prons oh neh kan, mehn wideud;+ kowe eri kihdi peisino nanpwungen impwal en mihtingo oh pei sarawio oh audehiong pihl.+ 19 Aaron oh nah pwutak kan pahn widen pehrail kan oh nehrail kan wasao.+ 20 Ni ahnsou me re pahn kohlongala nan impwal en mihtingo de ni ar pahn keiong ni pei sarawio pwehn papah oh wiahda meirong en kisiniei oh ediniei ong Siohwa, irail pahn wideudki pihl pwe ren dehr mehla. 21 Irail pahn widen pehrail kan oh nehrail kan pwe ren dehr mehla, oh met pahn wia koasoandi poatopoat ehu ong irail, ong ih oh kadaudoke kan, erein arail dih kan me pahn kohdo.”+

22 Siohwa ketin doula mahsanihong Moses: 23 “Mwuri, ale leh pwohmwahu kan me keieu kaselel: sekel 500 en mir kekeluwak, oh elep en met, iei sekel 250 en sinamon pwohmwahu, sekel 250 en kalamus* pwohmwahu, 24 oh sekel 500 en kasia,* me sosohngdi nin duwen wadawad en sekel en wasa sarawio,*+ oh pil ihn* en lehn olip ehu. 25 Kowe eri wiahkihda mepwukat lehn kei sarawi; mepwukat pahn doalpene ni keneinei.*+ E pahn wia lehn kei sarawi ehu.

26 “Ke pahn keiehki met impwal en mihtingo+ oh kohpwahn Kadehdeo, 27 iangahki tehpelo oh dipwisawi kan koaros, dewen lampo oh dipwisawi kan, pei sarawi en warpwohmwahwo, 28 pei sarawi en meirong isihso oh dipwisawi kan koaros, oh peisino oh neh ko. 29 Ke pahn kasarawihala mepwukat pwe ren uhdahn sarawihla.+ Mehmen me pahn doahke mepwukat pahn anahne sarawi.+ 30 Oh ke pahn keiehdi Aaron+ oh nah pwutak kan+ oh kasarawihirailla pwe ren papah ie nin duwen samworo kei.+

31 “Ke pahn ndaiong mehn Israel kan, ‘Met pahn pousehlahte wia lehn kei sarawi ong ie erein dih kan me pahn kohdo.+ 32 E sohte pahn kadoadoahk ong paliwar en aramas akan, oh kumwail sohte pahn wiahda wiepen doal ehu me duwehte met. Met mehkot sarawi. E pahn doulahte wia mehkot sarawi ehu ong kumwail. 33 Mehmen me pahn wiahda leh pwohmwahu duwehte met oh doadoahngki ekis ong emen me sohte mweimwei* pahn anahne kamakamala.’”+

34 Siohwa eri ketin mahsanihong Moses: “Ale soangen uwehte ieu sang leh pwohmwahu pwukat:+ dingiding en stakte,* onika,* kalpanum pwohmwahu,* oh warpwohmwahu pwetepwet* tohr. 35 Wiahiong mepwukat ni warpwohmwahu ehu;+ doalepe pwohmwahu ko pahn doalpene ni keneinei,* e pahn soahldi,+ min, oh sarawi. 36 Ke pahn sukpene ekei lao e pehsla oh kihong ekei mwohn kohpwahn Kadehdeo nan impwal en mihtingo, wasa me I pahn kasalehiong uhk pein ngehi. Met uhdahn pahn sarawi ong kumwail. 37 Kumwail sohte pahn wiahda pein amwail warpwohmwahu me duwehte wiepen doal wet pwehn doadoahngki.+ Ke pahn wiahki met mehkot sarawi ong Siohwa. 38 Mehmen me pahn wiahda mehkot me duwehte met pwehn perenki nedened pwowe pahn anahne kamakamala.”

31 Siohwa ketin doula mahsanihong Moses: 2 “Kilang, I piladahr* Pesalel+ nein Uri nein Urr sang keinek en Suda.+ 3 I pahn audehkihda ih sapwellimen Koht ngehn sarawi,* oh I pahn kihong ih erpit, koahiek en wehwehki, oh loalokong en samanih wia soangen doadoahk koaros, 4 ong mahlenihada pilahn kan, ong doadoahngki kohl, silper oh prons, 5 ong parada oh koasoanehdi takai kan,+ oh ong wiahda soangsoangen dipwisou kan sang ni tuhke.+ 6 Oh pil, I idihadahr Oliap+ nein Aisamak sang keinek en Dan pwehn sewese Pesalel, oh I pahn kihong erpit nan mohngiong en koaros me koahiek,* pwe ren wiahda soahng koaros me I kehkehlingkihong uhk:+ 7 impwal en mihtingo,+ kohpwahn Kadehdeo+ oh pweineo+ me mi powe, dipwisoun impwalo koaros, 8 tehpelo+ oh dipwisawi kan koaros, dewen lamp kohl tohro oh dipwisawi kan koaros,+ pei sarawi en warpwohmwahwo,+ 9 pei sarawi en meirong isihso+ oh dipwisawi kan koaros, peisino oh neh ko,+ 10 likou kan me deideida mwahu, likou sarawi ko ong samworo Aaron, en nah pwutak ko likoun papah nin duwen samworo kei,+ 11 lehn keio, oh warpwohmwahu ong wasa sarawio.+ Irail pahn wia mehkoaros me I kehkehlingkihong uhk.”

12 Siohwa ketin doula mahsanihong Moses: 13 “Koasoiong mehn Israel kan oh ndaiong irail, ‘Kumwail uhdahn pahn kapwaiada ei sapad,+ pwe met iei kilel ehu nanpwungen ngehi oh kumwail erein dih kan me pahn kohdo pwe kumwail en ese me ngehi, Siohwa, me kasarawihkumwailla. 14 Kumwail pahn kapwaiada Sapad, pwe met mehkot sarawi ong kumwail.+ Mehmen me pahn kasaminehla pahn kamakamala. Ma mehmen pahn wia doadoahk sohte lipilipil rahno, aramaso* pahn kamakamala.+ 15 Doadoahk pahn wiawi erein rahn weneu, ahpw ni keisuhwen rahn iei sapad rahnen kommoal unsek ehu.+ Met mehkot sarawi ong Siohwa. Mehmen me pahn doadoahk rahnen Sapad pahn kamakamala. 16 Mehn Israel kan pahn anahne kapwaiada Sapad; irail pahn anahne kapwaiada Sapad erein arail dih kan koaros. Met iei inou lap poatopoat ehu. 17 Met iei kilel poatopoat ehu nanpwungen ngehi oh aramas en Israel kan,+ pwe erein rahn weneu me Siohwa ketin wiahda nanleng oh sampah oh ni keisuhwen rahn e ketin uhdihsang doadoahk oh kommoal.’”+

18 Ni ahnsowohte me e ketin kaerala eh mahmahseniong Moses pohn Nahna Sainai, e ketikihong Moses pelien takai patapat riapalio me kadehde ko ntingdi powe,+ pelien takai patapat ko me sapwellimen Koht rekileng nting powe.+

32 Erein ahnsowo, aramas ako tehkada me Moses pwand en kohdihdo sang pohn nahnao.+ Aramas ako eri pokonpene rehn Aaron oh ndaiong ih: “Wiahiong kiht emen kohten me pahn tiengla mwoht,+ pwehki se sehse dahme wiawihongehr Moses menet, ohl me kahreikitodo sang nan sapwen Isip.” 2 Aaron eri ndaiong irail: “Kihsang tiati kohl kan+ ni salengen amwail pwoud kan, noumwail pwutak kan, oh noumwail serepein kan oh wadohng ie.” 3 Aramas ako koaros ahpw tepida kihsang tiati kohl kan ni salengarail kan oh wadohng rehn Aaron. 4 Ih eri ale kohl ko sang irail oh wiahkihda sansal en koupwul men sang ni dipwisoun perper ehu.+ Irail ahpw tepida nda: “Israel, iet omw Kohto, me kahluwaiukasang nan sapwen Isip.”+

5 Ni Aaron eh kilangada met, e kauwada pei sarawi ehu mwohn koupwulo. Aaron eri pakairki: “Lakapw mie kasarawi ehu ong Siohwa.” 6 Irail eri sangkenei pirida mandahn rahno oh tepida wia meirong isihs kan oh kihda meirong en kaminimin kan. Mwurin mwo aramas ako mwohndi pwe ren mwenge oh nim. Irail ahpw uhda pwe ren pereperen.+

7 Siohwa eri ketin mahsanihong Moses: “Kohdihwei, pwehki noumw aramas akan, me ke kahrehsang nan sapwen Isip, kauweiraillahr.+ 8 Re mwadangete wetsang ahl me I kehkehlingkihong irail en idawehn.+ Re wiadahr ong pein irail sansal en koupwul men, oh re kin poaridiong sansalo oh meirongohng ih ndinda, ‘Israel, iet omw Kohto, me kahluwaiukasang nan sapwen Isip.’” 9 Siohwa ketin doula mahsanihong Moses: “I kilangehr me aramas pwukat me keptakai.*+ 10 Eri ke dehr kapweiekiehdi, pwe I pahn kasohreirailla nan ei engieng kowahlap, oh I pahn wiahda wehi laud ehu sang rehmw.”+

11 Moses eri peki rehn Siohwa eh Koht,+ patohwan: “Maing Siohwa, dahme komw pahn ketin mweidohngki omwi engieng kowahlap en kahrehiong komwi en men wia met ong sapwellimomwi aramas akan, mwurin omw ketin kahreirailsang nan sapwen Isip ni manaman lapalap oh nin limomwi roson?+ 12 Dahme mehn Isip kan ren pil ndahki, ‘E koasoakoasoane mehkot suwed ni eh kahreirailla. E men kemeirailla ni nahna kan oh kasohreirailla sang pohn sampah’?+ Komw ketin sohpeisang omwi engieng kowahlap oh ketin pwurehng medewe* omw pilipil en wahdo kahpwal wet pohn sapwellimomwi aramas akan. 13 Komw ketin tamanda sapwellimomwi ladu ko Eipraam, Aisek, oh Israel, me komw ketin kahukihla ni mwaromwi oh mahsanih: ‘I pahn kangederehla kadaudokomw duwehte usuhn nanleng,+ oh I pahn kihong kadaudokomw sahpwet pwon me I koasoanediongehr kadaudokomw, pwe ren kak sapwenikihla kohkohlahte.’”+

14 Siohwa eri ketin pwurehng medewe* duwen kahpwal me e ketin mahsanih en wahdo pohn sapwellime aramas ako.+

15 Moses eri sohpeila oh kohkohdihla sang pohn nahnao wa pelien takai patapat riapalio me kadehde ko ntingdi powe.+ Pelien takai patapat ko nting pali koaros; re ntingdi mwowe oh mwuri. 16 Pelien takai patapat ko iei wiepen nin limen Koht, oh pein Koht me ketin parada nting ko pohn pelien takai patapat ko.+ 17 Ni Sosua eh tepida rongada ngilen aramas ako pwehki ar wie weriwer, e ndaiong Moses: “Mie ngilen mahwen nan kahnimpwalo.” 18 Ahpw Moses nda:

19 Ni ahnsowohte me Moses kerenlahng limwahn kahnimpwalo oh kilangada koupwulo+ oh aramas ako ar kahkahlek, e ahpw lingeringerda, ih eri kese pelien takai patapat ko oh pwalangpeseng mepwukat ni tepin nahnao.+ 20 E ahpw ale koupwul me re wiahdao oh isikala oh kamwutepene lao e pehsla;+ ih eri kamwerehdi pehso nan pihlo oh kanimpilehki mehn Israel ko.+ 21 Moses eri ndaiong Aaron: “Dahme aramas pwukat wiahiong uhk me ke wahkihdo dihp laud wet pohrail?” 22 Aaron eri sapengki: “Maing ei kaun, komw dehr lingeringer. Komw uhdahn ese duwen aramas pwukat ar kin wia me suwed.+ 23 Eri, re ndaiong ie, ‘Wiahiong kiht emen kohten me pahn tiengla mwoht, pwe se sehse dahme wiawihongehr Moses menet, ohl me kahreikitodo sang nan sapwen Isip.’+ 24 Ngehi eri ndaiong irail, ‘Mehmen me mie nah kohl en kihsang oh kidohng ie.’ Ngehi eri kesehiong nan kisinieio a koupwul menet pa pwarada.”

25 Moses eri tehkada me aramas ako wiewiaseli nsenarail. Pwehki Aaron eh mweidohng nsenarail, me kahrehda re kanamenekihala pein irail mwohn ar imwintihti kan. 26 Moses eri kesihnenda ni ewen kelen kahnimpwalo oh nda: “Ihs me iang en Siohwa pali? En kohdo rehi!”+ Mehn Lipai ko koaros eri pokonpene reh. 27 Ih eri ndaiong irail: “Iet me Siohwa, Koht en Israel ketin mahsanihen, ‘Emenemen kumwail en katengehdi nah kedlahs oh kohwei daulih kahnimpwal pwon sang ehu ewen kehl lel ehu ewen kehl, oh kemehla rie, mehn mpe, oh kompoakepah keren.’”+ 28 Mehn Lipai ko eri kapwaiada dahme Moses ndao. Eri mpen ohl 3,000 me kamakamala rahno. 29 Moses eri nda: “Katohreikumwailla* ong Siohwa rahnwet, pwe emenemen kumwail peiong pein nah pwutak oh pein rie;+ rahnwet e pahn ketikihong kumwail kapai ehu.”+

30 Mandahn rahnohte, Moses ahpw ndaiong aramas ako: “Kumwail wiadahr dihp laud ehu, oh met I pahn kohdahla rehn Siohwa pwehn kilang ma I kak wiahda tomwpen dipamwail kan.”+ 31 Moses eri pwurala rehn Siohwa oh patohwan: “Ia uwen dihp laud me aramas pwukat wiadahr! Irail wiadahng pein irail koht kohl men!+ 32 Ahpw ma komw ketin kupwurki, a komw ketin kupwurmahkohng diparailo;+ ma soh, a komw kupwurkalahngan oh ketin irisasang ie nan sapwellimomwi pwuhk me komw ketin ntingihedier.”+ 33 Ahpw, Siohwa ketin mahsanihong Moses: “Mehmen me wiahda dihp ong ie, I pahn irisasang ih nan nei pwuhk. 34 Eri kohwei oh kahluwahla aramas ako wasa me I mahsanihonguhko. Kilang! Nei tohnleng pahn tiengwei mwohmw,+ oh ni rahn me I pahn kadeik irail, I pahn wadohng irail kalokolok pwehki diparailo.” 35 Siohwa eri ketin tepida kaloke aramas ako pwehki ar wiahda koupwulo, me Aaron wiahdao.

33 Siohwa ketin doula mahsanihong Moses: “Mweselsang wasaht iangahki aramas akan me ke kahluwahsang nan sapwen Isip. Seiloaklahng nan sahpw me I kahukihong Eipraam, Aisek oh Seikop, ni ei nda, ‘I pahn kihong kadaudokomw sahpwet.’+ 2 I pahn kadarala tohnleng men mwohmw+ oh kasarehla mehn Kenan kan, mehn Amor kan, mehn Id kan, mehn Peris kan, mehn Ip kan oh mehn Sepus kan.+ 3 Kohdahla nan sahpw ehu me inenen pwelmwahu.*+ Ahpw I sohte pahn mi nanpwungamwail kohwei, pwe kumwail aramas keptakai,*+ oh I pahn kakete kasohreikumwailla nanialo.”+

4 Ni aramas ako ar rongada mahsen kamedek kat, re ahpw tepida mwahiei, oh sohte emen irail kapwatkihda eh mehn kapwat. 5 Siohwa eri ketin mahsanihong Moses: “Ndaiong mehn Israel kan, ‘Kumwail aramas keptakai.*+ Ni ahnsoutehkis I kak kohwei nanpwungamwail oh kasohreikumwailla.+ Eri kumwail dehr kapwatkihda amwail mehn kapwat kan erein ei pahn medemedewe dahme I pahn wiahiong kumwail.’” 6 Eri sang Nahna Orep kohla, mehn Israel kan solahr kapwatki* arail mehn kapwat kan.

7 Moses eri ale imwe impwalo oh kauwada likin kahnimpwalo, ekis dohsang kahnimpwalo, oh e kahdaneki impwalo impwal en mihting. Koaros me kin kalelapak rehn Siohwa+ kin kohieila ni impwal en mihtingo, me mi likin kahnimpwalo. 8 Ni ahnsowohte me Moses kin kohieila ni impwalo, aramas ako koaros kin uhda oh kesihnen ni wasahn pedolong en arail impwal kan, oh re kin kilikilang Moses lao e pedolong nan impwalo. 9 Ni ahnsowohte me Moses kin kohla nan impwalo, uhren depweko+ kin kohdihdo oh mi ni wasahn pedolong en impwalo erein Koht eh ketin mahseniong Moses.+ 10 Ni aramas ako koaros ar kilangada uhren depweko eh mi ni wasahn pedolong en impwalo, emenemen irail ahpw uhda oh poaridiong ni wasahn pedolong en eh impwal. 11 Siohwa ketin mahseniong Moses+ duwehte ohl emen eh pahn lokaiaiong emen ohl tohrohr. Ni eh pwuralahng ni kahnimpwalo, Sosua+ nein Nun, nah sounpapaho oh sounsawaso,+ sohte kin kohkohsang ni impwalo.

12 Moses eri patohwanohng Siohwa: “Maing, komw ketin mahsanihong ie, ‘Kahluwa aramas pwukat,’ ahpw komw saik ketin padahkihong ie ihs me komw pahn ketin poaronehla pwehn iang ie kohla. Oh pil, komw ketin mahsanihier, ‘I uhdahn wehwehkin uhk,* oh ke pil kenikenla mwohn silangi.’ 13 Ma komw ketin kupwure ie, a komw kupwurkalahngan oh ketin wiahiong ie I en esehla alomwi kan,+ pwe I en esei komwi oh komwi en ketin pousehlahte kupwure ie. Oh pil, komw ketin taman me wehi wet iei sapwellimomwi aramas kei.”+ 14 Koht eri ketin mahsanih: “Pein ngehi* me pahn iang uhk kohla,+ oh I pahn kakommoaleiukedi.”+ 15 Moses eri patohwanohng ih: “Ma komw* sohte pahn iang ketila, a komw dehr kahluwaikitsang wasaht. 16 Pwe ia duwen eh pahn sansal me komw ketin kupwure ie, ngehi oh sapwellimomwi aramas akan? Kaidehn sang ni omw pahn iang kiht ketila,+ pwe ngehi oh sapwellimomwi aramas akan en weksang aramas teikan koaros nin sampah?”+

17 Siohwa eri ketin doula mahsanihong Moses: “I pil pahn kapwaiada dahme ke pekien, pwehki kenikenla mwohn silangi oh I uhdahn wehwehkin uhk.”* 18 Ih eri patohwan: “Komw kupwurkalahngan oh ketin kasalehiong ie mahs omwi lingan.” 19 Ahpw e ketin mahsanih: “I pahn daulihiuk oh ke pahn kak kilang uwen ei mwahu koaros, oh I pahn lohki mwohmw mwaren Siohwa;+ I pahn kupwurki mehmen me I kupwurperenki, oh I pahn kasalehda kadek kalahngan ong mehmen me I men kasalehiong kadek kalahngan.”+ 20 Ahpw e ketin doula mahsanih: “Ke sohte kak kilang silangiet, pwe sohte aramas emen kak kilang ie oh momour.”

21 Siohwa pil ketin mahsanih: “Iet wasa kis limwahi. Kesihnenda pohn paipen. 22 Ni ei lingan eh pahn daulihiuk, I pahn kihdiong uhk nan peden paipo, oh I pahn perehkinuhkala limeiet lao I daulihiuk. 23 Mwurin mwo I pahn kihsang limeiet, oh ke pahn kilang tihnseweiet. Ahpw ke sohte pahn kilang silangiet.”+

34 Siohwa eri ketin mahsanihong Moses: “Parada pelien takai patapat riapali duwehte mehn tapio ko,+ oh I pahn ntingihedi pohn pelien takai patapat ko mahsen ko me pwarada pohn pelien takai patapat en nin tapio,+ me ke pwalangpesengo.+ 2 Onopadahng nimenseng, pwe nimenseng ke pahn kohdahdo Nahna Sainai oh kesihnenda mwohi wasao pohn kadoken nahnao.+ 3 Ahpw sohte me pahn iang uhk kohdahdo, oh sohte me pahn mihmiseli pohn nahnao. Pil sohte pelin sihpw de pelin kou pahn mwengemwengeseli mwohn nahnao.”+

4 Moses eri parada pelien takai patapat riapalio duwehte mehn tapio ko oh sangkenei pirida oh kohdahla Nahna Sainai, duwehte me Siohwa ketin kehkehlingkihong ih, oh e wahda pelien takai patapat riapalio. 5 Siohwa eri ketidihdo+ nan pelien depweko oh ket rehn Moses wasao oh ketin lohki mwaren Siohwa.+ 6 Siohwa ketin kekeid mwowe oh mahmahsanih: “Siohwa, Siohwa, Koht emen me kadek kalahngan+ oh kupwurkalahngan,+ me sohte kin mwadang lingeringerda+ oh diren limpoak loalopwoat*+ oh mehlel,*+ 7 oh kasalehda limpoak loalopwoat lel dih kid kei,+ me kin mahkohng sapwung oh kauwehla kosonned oh dihp,+ ahpw e sohte mwahn pahn mweidohng me suwed en sohte ale kalokepe,+ e pahn wadohng seri kan oh nein neirail seri kan kalokepen sapwung en ar pahpa kan, lel dih kesiluh oh dih kapahieu.”+

8 Moses eri mwadangete kelepwikihdi oh lukupoardi. 9 Ih eri patohwan: “Maing Siohwa, ma komw ketin kupwurei ie, Maing Siohwa, a komw kupwurkalahngan oh ketin iang kiht ketila oh ketiket nanpwungat,+ mendahki kiht aramas keptakai kei,*+ oh komw ketin mahkohng at sapwung oh dipat kan,+ oh wiahkinkitala sapwellimomwi.” 10 Koht eri ketin mahsanih: “Met I pahn wiahda inou lap ehu: Mwohn noumw aramas akan koaros, I pahn wia soahng kaselel kan me saikinte wiawi* nan sampah pwon de nan wehi kan koaros,+ oh aramas akan koaros me ke mi nanpwungarail pahn kilang sapwellimen Siohwa doadoahk, pwe met mehkot kapwuriamwei ehu me I pahn wiahiong uhk.+

11 “Peikiong dahme I kehkehlingkihong uhk rahnwet.+ Met I pahn kasarehsang mwohmw mehn Amor kan, mehn Kenan kan, mehn Id kan, mehn Peris kan, mehn Ip kan oh mehn Sepus kan.+ 12 Kanahieng pwe ke de wiahda inou lap ehu rehn tohn sahpwo me ke kohkolahng ie,+ pwe met pahn kakete wia lidip ehu ong uhk.+ 13 Ahpw ke pahn karangkehdi arail pei sarawi kan, ke pahn pwalangpeseng arail uhr sarawi kan, oh ke pahn pelehdihsang arail tuhke sarawi kan.*+ 14 Ke sohte pahn poaridiong emen koht tohrohr,+ pwe Siohwa iei Koht me kin ketin kupwurki* aramas en poadidiong ih kelehpw.* Ei, ih Koht emen me kupwurki aramas en poadidiong ih kelehpw.+ 15 Kanahieng ken dehr wiahda inou lap ehu rehn tohn sahpwo, pwe ni ar pahn mwekid ni salelepek oh kaudokiong ar koht kan* oh meirongohng ar koht kan,+ mie me pahn lukeiuk oh ke pahn iang tungoale eh meirong.+ 16 Eri ke pahn kapwopwoudiheki noumw pwutak kan neirail serepein kan,+ oh neirail serepein kan pahn mwekid ni salelepek ni ar kaudokiong ar koht kan* oh kahrehiong noumw pwutak kan ren salelepek ni ar kaudokiong ar koht kan.*+

17 “Ke sohte pahn wiahda koht kan sang ni mete.+

18 “Ke pahn wia Kasarawien Pilawa me Sohte Doal Ihs.+ Ke pahn tungoale pilawa me sohte doal ihs, duwehte me I kehkehlingkihong uhk; ke pahn wia met erein rahn isuh ni ahnsou me kileldi nan sounpwong en Apip,*+ pwehki sounpwong en Apip me ke kohieido sang nan Isip.

19 “Mesenih ohl koaros* iei nei,+ iangahki noumw pelinmen koaros, mehnda ma mesenihen kouwol de sihpw.+ 20 Ke pahn pwainsapahlkihda mesenihen dongki men sihpw men. Ahpw ma ke sohte pwainda sapahl dongkio, eri ke pahn katimpeseng tepinwere. Ke pahn anahne pwainda sapahl mesenihen noumw pwutak kan koaros.+ Sohte me pahn pwarodo mwohi kahiep.

21 “Ke pahn doadoahk erein rahn weneu, ahpw ni keisuhwen rahn ke pahn kommoal.*+ Mehnda ma erein ahnsoun deipwel oh ahnsoun dolung, ke pahn kommoal.

22 “Oh ke pahn wia omw Kasarawien Wihk kan iangahki meirong en tepin wahn wihd, oh Kasarawien Kihpene* ni imwin pahr.+

23 “Pak siluh nan sounpar ehu, noumw ohl kan koaros pahn pwarodo mwohn silangin Kaun mehlel, Siohwa, Koht en Israel.+ 24 Pwe I pahn kasarehsang wehi kan mwohmw,+ oh I pahn kalaudehla omw wasa, oh sohte me pahn men sapweniki sapwomw erein omw kohdalahng kilang silangin Siohwa omw Koht pak siluh nan sounpar ehu.

25 “Ke sohte pahn kihda ntahn mahn me ke pahn meirongkihong ie iangahki mehkot me doal ihs.+ Meirong en kasarawien Pahsohpa sohte pahn mihmi pwohng ehu pwon lao lel nimenseng.+

26 “Ke pahn wadohng nan tehnpesen Siohwa omw Koht tepin wahnsahpw me keieu mwahu sang nan sapwomw.+

“Ke sohte pahn pwoailih kuht pwulopwul men nan pilendihdi en eh nohno.”+

27 Siohwa ketin doula mahsanihong Moses: “Ke pahn ntingihedi mahsen pwukat,+ pwehki nin duwen mahsen pwukat, I pahn wiahda inou lap ehu rehmw oh rehn Israel.”+ 28 Oh Moses mihmihte wasao rehn Siohwa rahn 40 oh pwohng 40. E sohte tungoale pilawa oh nimpil.+ Ih eri ketin ntingihedi pohn takai patapat ko mahsen en inou lapo, Kosonned Eisek ko.*+

29 Moses eri kohdihla sang pohn Nahna Sainai, oh pelien takai patapat riapalio me kadehde ko ntingdi powe mi nan peho.+ Ni eh kohdihla sang pohn nahnao, Moses sehse me meseo lingaling pwehki eh patopato ong Koht. 30 Ni Aaron oh mehn Israel ko koaros ar kilangada Moses, re diarada me meseo lingaling oh re masak keilahng mpe.+

31 Ahpw Moses eker irail, Aaron oh kaunen mwomwohdiso koaros eri kohdo reh. Moses eri koasoiong irail. 32 Mwurin mwo mehn Israel ko koaros ahpw keidohng mpe, ih eri padahkihong irail kehkehlik koaros me Siohwa ketikihong ih pohn Nahna Sainai.+ 33 Ni Moses eh kin kaimwisekala eh koasoiong irail, e kin perehkihla meseo koaduhpwel ehu.+ 34 Ahpw ni Moses eh kin patohlongala mwohn silangin Siohwa pwehn patohong ih, e kin kihsang koaduhpwelo lao lel e pahn kohieila.+ Ih eri kohieila oh kasalehiong mehn Israel ko kehkehlik ko me e alehdi.+ 35 Oh mehn Israel ko kilang me mesen Moseso lingaling; Moses eri kapwurehiong koaduhpwelo pohn meseo lao e kohlongala pwe en patohong Koht.*+

35 Mwuhr Moses eri kapokonepene mwomwohdisohn mehn Israel kan pwon oh ndaiong irail: “Iet akan me Siohwa ketin kehkehlingki en wiawi:+ 2 Doadoahk pahn wiawi erein rahn weneu, ahpw keisuhwen rahn pahn wia mehkot sarawi ong kumwail, sapad rahnen kommoal unsek ehu ong Siohwa.+ Mehmen me pahn doadoahk rahno pahn kamakamala.+ 3 Kumwail sohte pahn saunda kisiniei nan amwail wasahn kousoan kan ni rahnen Sapad.”

4 Moses eri ndaiong mwomwohdisohn mehn Israel ko pwon: “Iet me Siohwa ketin kehkehlingki, 5 ‘Kumwail kihda kisakis ehu ong Siohwa sang nanpwungamwail.+ Koaros me inengieng met nan ar mohngiong+ en wahdo kisakis ehu ong Siohwa: kohl, silper, prons, 6 dereht poh mei, dereht ntahnmwel sang wunen sihpw, dereht weitahta,* linen kaselel, wunen kuht,+ 7 kilin sihpw wol me kaduh nan poh weitahta, kilin sihl, tuhke akesia, 8 leh ong lamp kan, palsam* ong lehn kei oh ong warpwohmwahu,+ 9 takai oniks kan oh takai teikan me pahn mi ni ihpodo+ oh perehpen mwaremware.+

10 “‘Koaros me koahiek*+ nanpwungamwail en kohdo oh wiahda mehkoaros me Siohwa ketin kehkehlingki, 11 me iei, impwal sarawio iangahki lepin likoun impwal ko, mehn kateng kan oh lepin uhr kan,* tuhkehn ndape kan, uhr kan, oh poahsoane kan; 12 Kohpwa+ oh tuhkehn wisik kan,+ pweine,+ oh kahdeng+ en perehpe; 13 tehpel+ oh tuhkehn wisik kan oh dipwisawi kan koaros oh pilawahn kasansal;+ 14 dewen lamp+ ong marain oh dipwisawi kan oh lamp kan oh lehn lamp kan;+ 15 pei sarawi en warpwohmwahu+ oh tuhkehn wisik kan; lehn kei oh warpwohmwahu;+ kahdeng en wasahn pedolong en impwal sarawio; 16 pei sarawi en meirong isihs+ oh mehn inihn pasapas prons, tuhkehn wisik kan oh dipwisawi kan koaros; peisin oh neh kan;+ 17 kahdeng me langalang ni wasa me kelpene,+ uhr kan oh poahsoane kan; kahdeng en wasahn pedolong en wasa me kelpeneo; 18 metehn kateng impwalo oh metehn kateng en wasa me kelpeneo oh sahl akan;+ 19 likou kan me deideida mwahu+ ong papah nan wasa sarawio, likou sarawi ko ong samworo Aaron,+ oh en nah pwutak ko likoun papah nin duwen samworo kei.’”

20 Eri mwomwohdisohn mehn Israel ko pwon ahpw kohkohsang rehn Moses. 21 Eri koaros me ar mohngiong oh pepehm* kamwakid irail+ ahpw kohdo oh wahdo arail kisakis ong Siohwa pwehn kadoadoahk ong ni impwal en mihtingo, ong soahng koaros me anahnepe mie ong ni kaudok, oh ong likou sarawi ko. 22 Irail kin kohkohdo, ohl akan iangahki lih akan, emenemen me inengieng met nan eh mohngiong kin wahdo mehn kapwat pihn kan, tiati kan, rihng kan, oh mehn kapwat teikan, iangahki soangen mehn kapwat kohl koaros. Irail koaros patohwanohng Siohwa arail meirong* kohl kan.+ 23 Oh koaros me naineki dereht poh mei, dereht ntahnmwel sang wunen sihpw, dereht weitahta, linen kaselel, wunen kuht, kilin sihpw wol me kaduh nan poh weitahta, oh kilin sihl kan, wahdo mepwukat. 24 Koaros me men kihda silper oh prons wahdo kisakis ong Siohwa, oh koaros me mie ar tuhke akesia ong doadoahko, pil wahdo tuhke ko.

25 Lih koahiek koaros+ ngkoalki pehrail kan, oh irail wahdo dahme re ngkoalehda: dereht poh mei, dereht ntahnmwel sang wunen sihpw, dereht weitahta, oh linen kaselel. 26 Oh lih koahiek koaros me arail mohngiong kamwakid irail ngkoalehda wunen kuht.

27 Oh kaun akan wahdo takai oniks kan oh takai teikan me pahn mi ni ihpodo oh perehpen mwaremware,+ 28 oh palsam, oh leh ong lamp oh ong lehn kei+ oh ong warpwohmwahu.+ 29 Ohl oh lih koaros me arail mohngiong kamwakid irail wahdo mehkot ong doadoahko me Siohwa ketin kehkehlingki sang rehn Moses; mehn Israel kan wahdo mepwukat nin duwen meirong ehu sang ni nsenarail ong Siohwa.+

30 Moses eri ndaiong mehn Israel kan: “Kilang, Siohwa ketin piladahr Pesalel nein Uri nein Urr sang keinek en Suda.+ 31 E ketin audehkihda ih sapwellimen Koht ngehn sarawi,* oh e ketikihong ih erpit, koahiek en wehwehki, oh loalokong en samanih wia soangen doadoahk koaros 32 ong mahlenihada pilahn kan, ong doadoahngki kohl, silper oh prons, 33 ong parada oh koasoanehdi takai kan, oh ong wiahda soangsoangen dipwisou lingan kan sang ni tuhke. 34 Oh Koht ketikihong nan eh mohngiong koahiek en padahkih meteikan, ih oh Oliap+ nein Aisamak sang keinek en Dan. 35 E ketin audehkinirailda koahiek*+ pwe ren wia soangen doadoahk koaros nin duwen tohndoadoahk saman kan, pilahnihada likou, oh deiad doadoahngki dereht poh mei, dereht ntahnmwel sang wunen sihpw, dereht weitahta, oh linen kaselel, oh pahda likou. Ohl pwukat pahn wia soangen doadoahk koaros oh kaunopada soangen pilahn koaros.

36 “Pesalel pahn doadoahk iangahki Oliap oh ohl koahiek koaros* me Siohwa ketikihong erpit oh koahiek en wehwehki ire kan pwe ren ese mwomwen arail pahn wia doadoahk ko koaros ong wasa sarawio duwehte me Siohwa ketin kehkehlingkier.”+

2 Moses eri ekerodo Pesalel oh Oliap oh ohl koahiek koaros me Siohwa ketikihong erpit nan arail mohngiong,+ koaros me arail mohngiong kamwakid irail en toukihda pein irail en wia doadoahk.+ 3 Irail eri ale sang rehn Moses kisakis koaros+ me mehn Israel kan wahdo ong doadoahk en wasa sarawio. Ahpw, nimenseng koaros aramas pwukat kin usehlahte wadohng ih meirong kan me re nsenki wiahda.

4 Mwurin ar tapiada doadoahk sarawio, tohndoadoahk koahiek ko koaros ahpw kohdo, emen mwurin emen, 5 oh irail kin ndaiong Moses: “Aramas akan wahwahdo laudsang dahme anahn ong doadoahk me Siohwa ketin kehkehlingki en wiawi.” 6 Moses eri kehkehlingki me pakair ehu en wiawi nan kahnimpwalo pwon, nda: “Ohl akan oh lih akan, kumwail tokedihsang wahdo kepwe kan ong kisakis sarawio.” Aramas ako eri tokedihsang wapene mehkot. 7 Kepwe ko itarohng kanekehla doadoahk ko koaros, oh tohtohsang uwen me itar.

8 Eri tohndoadoahk koahiek ko koaros+ wiahkihda impwal sarawio+ lepin likoun impwal eisek me wiawihkihda linen pinipin kaselel, dereht poh mei, dereht ntahnmwel sang wunen sihpw, oh dereht weitahta;* e* wiahda mepwukat ni kilel en kerup kei deiadidi powe.+ 9 Ehuehu lepin likoun impwalo reireiki kiupid* 28 oh tehlapki kiupid 4. Lepin likoun impwal ko koaros wehteieu. 10 Ih eri kihpene lepin likoun impwal limau ko, oh e kihpene lepin likoun impwal limau teiko. 11 Mwurin mwo e wiahda pwakel en dereht poh mei ni keilen ehu lepin likoun impwalo wasa me e patpene ieo. E pil wia soahngohte ni keilen imwin lepin likoun impwalo wasa me e patpene ieo. 12 E wiahda pwakel 50 ni ehu lepin likoun impwalo oh pwakel 50 ni keilen lepin likoun impwal teio wasa me e patpene ieo, pwe pwakel ko en pelialipene. 13 Ih eri wiahda mehn kateng kohl 50 oh kolkipene lepin likoun impwal ko mehn kateng ko, pwe impwal sarawio en wiahla ehu.

14 Ih eri wiahda lepin likoun impwalo sang wunen kuht ong pweinen impwal sarawio. E wiahda lepin likoun impwal 11.+ 15 Ehuehu lepin likoun impwalo reireiki kiupid 30 oh tehlapki kiupid 4. Lepin likoun impwal 11 ko koaros wehteieu. 16 Ih eri kihpene lepin likoun impwal limau ko, oh e kihpene lepin likoun impwal weneu teiko. 17 Mwuri e wiahda pwakel 50 ni keilen imwin lepin likoun impwalo wasa me e patpene ieo, oh e wiahda pwakel 50 ni keilen lepin likoun impwal teio wasa me e patpene ieo. 18 Oh e wiahda mehn kateng prons 50 pwehn kolpene impwalo wiahla ehu.

19 E wiahda pweipwei ehu ong impwalo sang ni kilin sihpw wol me kaduh nan poh weitahta oh ehu pweipwei sang ni kilin sihl pwehn mi pohn met.+

20 Ih eri wiahda lepin uhr kei* me inenda+ sang ni tuhkehn akesia+ ong impwal sarawio. 21 Ehuehu lepin uhr reireiki kiupid eisek oh tehlapki kiupid ehu elep. 22 Mie kisin tuhke riau me sikieisang imwin ehuehu lepin uhr ko oh kisin tuhke riauwo pahrekpene. Ih mwomwen eh wiahda lepin uhr ko koaros ong impwal sarawio. 23 E wiahda lepin uhr kei ong palieir en impwal sarawio, lepin uhr 20. 24 Ih eri wiahda poahsoan silper 40 pwehn mi pahn lepin uhr 20 ko, poahsoan riau mi pahn ehuehu lepin uhr ong kisin tuhke riau ko me sikieisang.+ 25 A pali teio ni paliepeng en impwal sarawio, e wiahda lepin uhr 20 26 oh poahsoan silper 40, poahsoan riau mi pahn ehuehu lepin uhr.

27 A ong mwurin impwal sarawio me sallahng palikapi, e wiahda lepin uhr wenepwoat.+ 28 E wiahda lepin uhr riapwoat pwehn wia uhr en keimw en impwal sarawio, ni keimw riau mwurio. 29 Uhr en keimw ko mie lepin tuhke riapwoat sang pah kohdatehieu lel powe, wasa ira pahn katengdiong ni tepin rihngo. Ih met me e wiahiong uhr en keimw riauo. 30 Eri lepin uhr welipwoat wiawihda iangahki poahsoan silper 16, poahsoan riau mi pahn ehuehu lepin uhr.

31 Ih eri wiahda tuhkehn ndape kei sang ni tuhkehn akesia, meh limau ong lepin uhr ko me mi apali impwal sarawio+ 32 oh tuhkehn ndape limau ong lepin uhr ko me mi apali impwal sarawio, oh tuhkehn ndape limau ong lepin uhr ko ni palikapi en impwal sarawio, mwurin impwalo. 33 E wiahda tuhkehn ndape me tang nanwerengen lepin uhr ko me uhsang ni ehu imwi kohla lel ni ehu imwi. 34 E kidimkihla lepin uhr ko kohl, oh e wiahkihda rihng ko kohl mehn koledi tuhkehn ndape ko, oh e kidimkihla tuhkehn ndape ko kohl.+

35 Ih eri wiahda kahdeng ehu+ sang ni dereht poh mei, dereht ntahnmwel sang wunen sihpw, oh dereht weitahta, oh linen pinipin kaselel. E wiahda met ni kilel en kerup kei+ deiadidi powe.+ 36 Ih eri wiahda ong kahdengo uhr pahpwoat sang tuhkehn akesia oh kidimkihla kohl, iangahki mehn kateng kohl ko, oh wiahda poahsoan silper pahieu ong mepwukat. 37 Mwuri e wiahda kahdeng ehu ong wasahn pedolong nan impwalo sang ni eh pahda dereht poh mei, dereht ntahnmwel sang wunen sihpw, dereht weitahta, oh linen pinipin kaselel,+ 38 oh pil uhr limpwoat oh mehn kateng uhr kan. E kidimkihla kadoken uhr ko oh mehn kadokepene* uhr ko kohl, ahpw poahsoan limau ko prons.

37 Pesalel+ eri wiahda Kohpwao+ sang tuhkehn akesia. E reireiki kiupid* riau elep oh tehlapki kiupid ehu elep oh ilehki kiupid ehu elep.+ 2 E kidimkihla Kohpwao kohl tohr loale oh liki oh kapilkipene mehn kapwat kohl.+ 3 Mwurin mwo e wiahda rihng kohl pahieu ong Kohpwao, pohnangin neh pahieu en Kohpwao, rihng riau apali oh rihng riau pali teio. 4 Mwuri, e wiahda tuhkehn wisik kan sang tuhke akesia oh kidimkihla kohl.+ 5 Ih eri kadil tuhkehn wisik ko nan rihng ko ni keilen Kohpwao, mehn wa Kohpwao.+

6 E wiahda pweine me kohl tohr.+ E reireiki kiupid riau elep oh tehlapki kiupid ehu elep.+ 7 Ih eri wiahda kerup riemen+ me sukusukda sang kohl ni imwi riau en pweineo.+ 8 Emen kerup ni ehu imwi, a kerup teio ni imwi teio. E wiahda kerup ko ni imwi ko koaros en pweineo. 9 Kerup riemen ko kapapeseng pehra ko oh koaduhpwalihdi pweineo.+ Ira sohpeipene, oh masara ko sohpeilahng pweineo.+

10 Ih eri wiahda tehpel ehu sang tuhkehn akesia.+ E reireiki kiupid riau oh tehlapki kiupid ehu oh ilehki kiupid ehu elep.+ 11 Oh e kidimkihla kohl tohr oh kapilkipene mehn kapwat kohl. 12 Mwuri, e wiahda keile kapilpene ni tehlap en sosohng en peh* ehu oh kapilkipene mehn kapwat kohl ni keileo. 13 Oh pil, e wiahda rihng kohl pahieu ong tehpelo oh kihdiong rihng ko ni keimw pahieu ko, wasa me neh pahieu ko mi ie. 14 Rihng ko mi limwahn keile ko mehn koledi tuhkehn wisik ko, mehn wa tehpelo. 15 Ih eri wiahda tuhkehn wisik ko sang tuhke akesia oh kidimkihla kohl mehn wa tehpelo. 16 Mwurin mwo e wiahkihda kohl tohr dipwisou kan me mi pohn tehpelo—pileit kan, kep kan, oh pwohl kan oh sah kan ong wudekih meirong en wain kan.+

17 Ih eri wiahda dewen lamp ehu+ me kohl tohr. E sukuda dewen lampo. Poahsoane, pwuloi, kisin teh kan,* mpwek, oh masal wiawihda ni ehute mehkot.+ 18 Rah wenepwoat uhsang ni pwuloio, rah silipwoat en dewen lampo apali oh rah silipwoat ni pali teio. 19 Kisin teh siluh me mwomwen wahnrohs almond mi apali rah ko, iangahki mpwek oh masal kairekla, oh e pil wia soahngohte ong rah silipwoat me mi pali teio. Met wiawihong rah wenepwoato me uhsang pwuloi en dewen lampo. 20 Oh ni pwuloi en dewen lampo mie kisin teh pahieu me mwomwen wahnrohs almond, iangahki mpwek oh masal kairekla. 21 Mie ehu mpwek mi pahn tepin rah riapwoat me uhsang ni pwuloio oh ehu mpwek mi pahn rah riapwoat oh pil ehu mpwek mi pahn rah riapwoat, pwe rah wenepwoat en uhsang ni pwuloi en dewen lampo. 22 Mpwek ko oh rah ko oh dewen lampo pwon sukusukda ehute sang ni kohl tohr. 23 Ih eri wiahda lamp isuh ko+ oh tihpw ko oh dewen mwoalus ko ong dewen lampo sang kohl tohr. 24 E wiahda dewen lampo iangahki dipwisawi kan koaros sang ni dalend* ehu en kohl tohr.

25 Ih eri wiahda pei sarawi en warpwohmwahwo+ sang tuhkehn akesia. E keimw pahieu, reireiki kiupid ehu, tehlapki kiupid ehu, oh ilehki kiupid riau. Kode ko oh pei sarawio wiawihda ni ehute mehkot.+ 26 E kidimkihla kohl tohr, powe, ni keile ko koaros, oh kode ko, oh e kapilkipene mehn kapwat kohl. 27 E wiahda rihng kohl riau ong pei sarawio pahnangin mehn kapwat kohlo ni pali riauo koaros mehn koledi tuhkehn wisik ko, mehn wa pei sarawio. 28 Mwurin mwo e wiahda tuhkehn wisik ko sang tuhke akesia oh kidimkihla kohl. 29 E pil wiahda lehn kei sarawi+ oh warpwohmwahu min,+ me doalpene ni keneinei.*

38 E wiahda pei sarawi en meirong isihso sang tuhkehn akesia. E keimw pahieu, reireiki kiupid* limau, tehlapki kiupid limau, oh ilehki kiupid siluh.+ 2 Ih eri wiahda kode kan ni keimw pahieu ko. Kode ko oh pei sarawio wiawihda ni ehute mehkot. Mwuri e kidimkihla prons.+ 3 Mwurin mwo e wiahda dipwisoun pei sarawio koaros, pekid kan, sapwel kan, pwohl kan, pwohk kan, oh dewen mwoalus kan. E wiahkihda dipwisou ko koaros prons. 4 E pil wiahda mehn inihn pasapas ehu ong pei sarawio, mehn inihn prons, pahnangin keilen pei sarawio, kohdi lel ni lukepen pei sarawio. 5 E wiahda rihng pahieu ni keimw pahieu ko limwahn mehn inihn pasapas pronso, mehn koledi tuhkehn wisik ko. 6 Mwurin mwo e wiahda tuhkehn wisik kan sang tuhke akesia oh kidimkihla prons. 7 E kadilong tuhkehn wisik ko nan rihng ko ni keilen pei sarawio pwehn wisingki. E wiahkihda pei sarawio dinapw ni mwomwen kohpwa ehu me sohte kanenge.*

8 Ih eri wiahda peisin prons+ oh neh kan; e doadoahngki mehn irongen kan* me lih akan naineki, lih akan me kin papah nin duwen koasoandi ni wasahn pedolong en impwal en mihtingo.

9 Ih eri wiahda wasa me kelpene.+ Ni palieir en wasa me kelpeneo, e wiahda kahdeng langalang kei sang linen pinipin kaselel, me reireiki kiupid 100.+ 10 Mie uhr 20 oh poahsoan 20 me wiawihkihda prons, oh mehn kateng uhr ko oh mehn kadokepene* uhr ko wiawihkihda silper. 11 Oh pil, ni paliepeng, mie kahdeng kei me langalang me reireiki kiupid 100. Pil mie uhr 20 oh poahsoan 20 me wiawihkihda prons. Mehn kateng uhr ko oh mehn kadokepene* uhr ko wiawihkihda silper. 12 Ahpw ni palikapi, mie kahdeng kei me langalang me reireiki kiupid 50. Mie uhr eisek oh poahsoan eisek, oh mehn kateng uhr ko oh mehn kadokepene* uhr ko wiawihkihda silper. 13 Ni palimese me sallahng wasa me ketipino kin dakada ieo, tehlapki kiupid 50. 14 Mie kahdeng kei me langalang me reireiki kiupid 15 ehu pali, iangahki uhr silipwoat oh poahsoan siluh. 15 Oh ni pali teio ni wasahn pedolong en wasa me kelpeneo, pil mie kahdeng kei me langalang me reireiki kiupid 15, iangahki uhr silipwoat oh poahsoan siluh. 16 Kahdeng langalang ko koaros me kapil wasa me kelpeneo wiawihkihda linen pinipin kaselel. 17 Poahsoan en uhr ko wiawihkihda prons, mehn kateng uhr ko oh mehn kadokepene* uhr ko wiawihkihda silper, kadoken uhr ko kidikidki silper, oh mie mehn kadokepene kan me silper ong uhr koaros en wasa me kelpeneo.+

18 Kahdeng en wasahn pedolong en wasa me kelpeneo peipeida sang dereht poh mei, dereht ntahnmwel sang wunen sihpw, dereht weitahta,* oh linen pinipin kaselel. E reireiki kiupid 20 oh ilehki kiupid 5, e ile duwehte kahdeng me langalang wasa me kelpeneo.+ 19 Uhr pahpwoat oh poahsoan pahieu wiawihkihda prons. Mehn kateng uhr ko oh mehn kadokepene uhr ko* wiawihkihda silper, oh kadoken uhr ko kidikidki silper. 20 Metehn kateng koaros ong impwal sarawio oh pil ong wasa me kelpeneo wiawihkihda prons.+

21 Iet kileldien dipwisou kan me kadoadoahk ong kauwada impwal sarawio, impwal sarawi en Kadehdeo,+ me kileldi sang ni ruwes en Moses, nin duwen pwukoahn mehn Lipai kan+ pahn kaweid en Idamar+ nein samworo Aaron. 22 Pesalel+ nein Uri nein Urr sang keinek en Suda wiahda soahng koaros me Siohwa ketin kehkehlingkihong Moses. 23 Me iang ih iei Oliap+ nein Aisamak sang keinek en Dan. Ih tohndoadoahk saman men oh soun deiad men oh sounpahda dereht poh mei, dereht ntahnmwel sang wunen sihpw, dereht weitahta, oh linen kaselel.

24 Kohl koaros me kadoadoahk ong doadoahk koaros ong wasa sarawio duwehte uwen kohl en meirong en oaloahlo,+ dalend* 29 oh sekel* 730 nin duwen wadawad en sekel en wasa sarawio.* 25 Oh silper me kohsang rehn irail me kileldier nan mwomwohdiso iei dalend 100 oh sekel 1,775 nin duwen wadawad en sekel en wasa sarawio.* 26 Emenemen irail, me kileldi sang sounpar 20 kohda,+ wahdo elep en sekel me poahsoankihda wadawad en sekel en wasa sarawio.* Ohl pwukat patpene meh 603,550.+

27 Wiawihdahn poahsoanen wasa sarawio oh poahsoanen kahdengo patpene dalend 100; poahsoan 100 pahrekiong dalend 100, dalend ehu ong ehuehu poahsoan.+ 28 Sang sekel 1,775, e wiahkihda mehn kateng uhr ko oh kidimala kadoken uhr ko oh katengepene mepwukat.

29 Prons me meirongala* iei dalend 70 oh sekel 2,400. 30 E doadoahngki met oh wiahda poahsoan en wasahn pedolong en impwal en mihtingo, pei sarawi pronso oh mehn inihn pasapas pronso, dipwisoun pei sarawio koaros, 31 poahsoan kan me kapil wasa me kelpeneo, poahsoan kan en wasahn pedolong en wasa me kelpeneo, oh metehn kateng impwalo koaros oh metehn kateng koaros+ me kapil wasa me kelpeneo.

39 Sang ni ar doadoahngki dereht poh mei, dereht ntahnmwel sang wunen sihpw, oh dereht weitahta,*+ re wiahda likou kan me deideida mwahu ong papah nan wasa sarawio. Re wiahda likou sarawi kei ong Aaron,+ duwehte me Siohwa ketin kehkehlingkihong Moses.

2 E wiahda ihpod+ sang ni kohl, dereht poh mei, dereht ntahnmwel sang wunen sihpw, dereht weitahta, oh linen pinipin kaselel. 3 Re sukedi pileit kohl kan lao menipinipla, oh e lupukedi met pwehn wiahda dereht pwe en doadoahngki met iangahki dereht poh mei, dereht ntahnmwel sang wunen sihpw, dereht weitahta, oh linen kaselel, oh ihpodo deiadida. 4 Re wiahda mwein likou reirei riau ni pwopweo me katengepene imwi riau me mi powe. 5 Oh kateng peipeidao,* me patehngete ihpodo mehn pirepene ihpodo,+ wiawihdahsang ni soahng kohte, kohl, dereht poh mei, dereht ntahnmwel sang wunen sihpw, dereht weitahta, oh linen pinipin kaselel, duwehte me Siohwa ketin kehkehlingkihong Moses.

6 Irail eri kihdiong takai oniks ko nan dewara kohl ko, oh re parada eden nein Israel pwutak kan pohn takai ko, duwehte ar kin parada mehn sidamp ehu.+ 7 E kihdi takai ko pohn mwein likou reirei ko en ihpodo ni pwopweo nin duwen takain kataman kei ong nein Israel pwutak kan,+ duwehte me Siohwa ketin kehkehlingkihong Moses. 8 Ih eri wiahda perehpen mwaremware.+ Met iei doadoahk en soun deiad men, duwehte wiawihdahn ihpod. Met wiawihkihda kohl, dereht poh mei, dereht ntahnmwel sang wunen sihpw, dereht weitahta, oh linen pinipin kaselel.+ 9 E keimw pahieu ni eh weliwelpene nanwerenge. Re wiahda perehpen mwaremware, me reireiki oh tehlapki span en peh* ni eh weliwelpene. 10 Re koasoanehdi takai ko ni irek pahieu. Ni kairek keieuo iei rupi, topas oh emerald. 11 Kairek keriauo iei turkuois, sapair oh sasper. 12 Kesiluhwen kaireko iei takai leshem,* akat oh amedist. 13 Oh kapahieun kaireko iei krisolaid, oniks oh seid. Takai ko koasoansoandi pohn dewerail kohl ko. 14 Takai ko pahrekiong eden nein Israel pwutak 12 ko, oh ahd ko perperda duwehte sidamp ehu. Ehuehu ahd kasalehda ehuehu keinek 12 ko.

15 Irail eri wiahda sein me ingkolpene pohn perehpen mwaremwareo, duwehte sahl me kohl tohr.+ 16 Oh irail wiahda dehu kohl riau oh rihng kohl riau oh katengehdiong rihng riauo ni keimw riau en perehpen mwaremware. 17 Mwurin mwo irail kadil sahl kohl riapwoato ni rihng riauo ni keimwen perehpen mwaremware. 18 Irail eri kadilong imwin sahl riauo ni dehu riauo, oh katengehdi pohn mwein likou reirei ko en ihpodo ni pwopweo, mwohn ihpodo. 19 Mwurin mwo re wiahda rihng kohl riau oh kihdiong loalen keimw riau en perehpen mwaremwareo, limwahn ihpodo.+ 20 Irail pil wiahda rihng kohl riau oh kihdi mepwukat mwohn ihpodo, pahnangin mwein likou reirei riauo ni pwopweo, limwahn wasahn katengo, pohnangin kateng peipeida* en ihpodo. 21 Mwuri, re pirehkihdi perehpen mwaremware sahl poh mei ehu sang ni rihng en perehpen mwaremwareo lel ni rihng en ihpodo, pwehn kolokolete perehpen mwaremwareo nan dewe ni ihpodo, pohnangin kateng peipeidao,* duwehte me Siohwa ketin kehkehlingkihong Moses.

22 Ih eri wiahda likou reirei me sohte peh mehn likawih loalen ihpodo, me sounpahda likou men pahda, sang ni dereht poh mei tohr.+ 23 Mie pwoaren moangen likowo nanwerenge. Pwungipeo me kapilpene pwoahr en tepinweren likou reireio peipeida duwehte pwungipen likou mete,* pwe e sohte pahn mengei en teipeseng. 24 Mwuri irail wiahda pwohmakraneid ni pwungipen likou reirei me sohte peho sang ni dereht poh mei, dereht ntahnmwel sang wunen sihpw, oh dereht weitahta, me ingkolpene. 25 Oh irail wiahda pehl kohl tohr oh kihdi pehl ko nanpwungen pwohmakraneid ko kapilpene pwungipen likou reirei me sohte peho pwon, nanpwungen pwohmakraneid ko; 26 irail kairekehla pehl oh pwohmakraneid, pehl ehu oh pwohmakraneid ehu, kapilpene pwungipen likou reirei me sohte peho pwon, me kadoadoahk ong doadoahk en samworo, duwehte me Siohwa ketin kehkehlingkihong Moses.

27 Oh irail wiahda likou reirei kei sang ni linen kaselel, me sounpahda likou men pahda, ong Aaron oh nah pwutak ko,+ 28 oh lisoarop+ sang ni linen kaselel, likoun moange+ lingan sang ni linen kaselel, lepin rausis* linen+ sang ni linen pinipin kaselel, 29 oh kateng me peipeida sang ni linen pinipin kaselel, dereht poh mei, dereht ntahnmwel sang wunen sihpw, oh dereht weitahta, duwehte me Siohwa ketin kehkehlingkihong Moses.

30 Mwuri, irail wiahda mete patapat lingaling ehu, kilel en kasarawio,* sang kohl tohr oh parada powe duwehte emen eh pahn wiahda sidamp ehu: “Sarawi iei sapwellimen Siohwa.”+ 31 Irail katengehdiong sahl pwoat me wiawihkihda dereht poh mei meteo pwehn kihdiong pohn lisoaropo, duwehte me Siohwa ketin kehkehlingkihong Moses.

32 Eri doadoahk koaros ong impwal sarawio, impwal en mihtingo, imwisekla, oh mehn Israel kan kapwaiada mehkoaros me Siohwa ketin kehkehlingkihong Moses.+ Irail uhdahn kapwaiada.

33 Irail eri wahdo impwal sarawio+ rehn Moses, impwalo+ oh dipwisawi kan koaros: mehn kateng kan,+ lepin uhr kan,*+ tuhkehn ndape kan+ oh uhr kan oh poahsoane kan;+ 34 pweine me wiawihda sang kilin sihpw wol me kaduh nan poh weitahta,+ pweine sang kilin sihl, kahdeng en perehpe;+ 35 kohpwahn Kadehdeo oh tuhkehn wisik kan+ oh pweineo;+ 36 tehpelo, dipwisawi kan koaros+ oh pilawahn kasansalo; 37 dewen lamp kohl tohr, lamp kan+ me irekla, oh dipwisawi kan koaros+ oh lehn lamp kan;+ 38 pei sarawi+ kohl, lehn kei,+ warpwohmwahu,+ kahdeng+ ong wasahn pedolong nan impwalo; 39 pei sarawi prons,+ oh mehn inihn pasapas prons, tuhkehn wisik kan,+ dipwisawi kan koaros,+ peisin oh neh kan;+ 40 kahdeng me langalang ni wasa me kelpene, uhr kan oh poahsoane kan;+ kahdeng+ ong wasahn pedolong en wasa me kelpeneo, sahl kan en impwalo oh metehn kateng kan en impwalo+ oh dipwisawi kan koaros ong doadoahk en nan impwal sarawio, ong impwal en mihtingo; 41 likou kan me deideida mwahu ong papah nan wasa sarawio, likou sarawi ko ong samworo Aaron,+ oh en nah pwutak ko likoun papah nin duwen samworo kei.

42 Mehn Israel ko wiahda doadoahk koaros nin duwen mehkoaros me Siohwa ketin kehkehlingkihong Moses.+ 43 Ni Moses eh dawih arail doadoahk koaros, e tehkada me re wiadahr mepwukat duwehte me Siohwa ketin kehkehlingki; oh Moses kapaiairailda.

40 Siohwa eri ketin mahsanihong Moses: 2 “Ni keieun rahn en keieun sounpwong, ke pahn kauwada impwal sarawio, me iei impwal en mihtingo.+ 3 Kihdi kohpwahn Kadehdeo loale,+ oh perehkihla Kohpwao kahdeng.+ 4 Ke pahn wahdo tehpelo+ loale oh koasoanehdi dipwisawi kan powe oh wahdo dewen lampo+ oh isikada lamp kan.+ 5 Mwuri, kihdi pei sarawi kohl ong warpwohmwahwo+ mwohn kohpwahn Kadehdeo oh kihda kahdeng ong wasahn pedolong en impwal sarawio nan dewe.+

6 “Ke pahn kihdi pei sarawi en meirong isihso+ mwohn wasahn pedolong en impwal sarawio, impwal en mihtingo, 7 oh kihdi peisino nanpwungen impwal en mihtingo oh pei sarawio oh audehiong pihl.+ 8 Mwuri, wiahda wasa me kelpeneo+ kapil impwal sarawio oh kihda kahdeng+ ong wasahn pedolong en wasa me kelpeneo. 9 Mwuri ke pahn ale lehn keio+ oh keiehdi impwal sarawio oh mehkoaros me mi loale,+ oh kasarawihala impwal sarawio oh dipwisawi kan koaros, pwe en wiahla mehkot sarawi. 10 Ke pahn keiehdi pei sarawi en meirong isihso oh dipwisawi kan koaros oh kasarawihala pei sarawio, pwe en wiahla pei sarawi ehu me uhdahn sarawi.+ 11 Oh keiehdi peisino oh neh kan oh kasarawihala.

12 “Mwuri wahdo Aaron oh nah pwutak kan limwahn wasahn pedolong en impwal en mihtingo, oh widenirailkihda pihl.+ 13 Oh ke pahn kalikawihkihda Aaron likou sarawi ko+ oh keiehdi ih+ oh kasarawihala, oh e pahn papah ie nin duwen samworo men. 14 Mwurin mwo wahdo nah pwutak kan, oh kalikawihkinirailda likou reirei ko.+ 15 Ke pahn keieiraildi duwehte omw keiehdi samarailo,+ pwe re pahn papah ie nin duwen samworo kei, oh pwehki keidi wet, pwukoahn samworo pahn usehlahte mi rehrail, erein dih kan me pahn kohdo.”+

16 Moses kapwaiada mehkoaros nin duwen me Siohwa ketin kehkehlingkihong ih.+ E uhdahn kapwaiada.

17 Impwal sarawio kokouda ni keieun rahnen keieun sounpwong, ni keriaun pahr.+ 18 Ni Moses eh kauwada impwal sarawio, e kihdi poahsoane kan,+ kauwada lepin uhr ko,*+ kadilong tuhkehn ndape ko,+ oh kauwada uhr ko. 19 E kihpeseng likoun impwalo+ pohn impwal sarawio oh kihda pweinen+ impwalo powe, duwehte me Siohwa ketin kehkehlingkihong Moses.

20 Mwurin mwo e ale pelien takai patapat me kadehde ko ntingdi powe+ oh kihong nan Kohpwao+ oh kihdi tuhkehn wisik ko+ ni Kohpwao oh kihdi pweineo+ pohn Kohpwao.+ 21 E wahdo Kohpwao nan impwal sarawio oh kihda kahdeng+ en perehpeo nan dewe oh perehkihla kohpwahn Kadehdeo,+ duwehte me Siohwa ketin kehkehlingkihong Moses.

22 Mwuri, e kihdi tehpelo+ nan impwal en mihtingo ni paliepeng en impwal sarawio, likin kahdengo, 23 oh e koasoanehdi koasoakoasoak en pilawa ko+ powe mwohn silangin Siohwa, duwehte me Siohwa ketin kehkehlingkihong Moses.

24 E kihdi dewen lampo+ nan impwal en mihtingo mwohn tehpelo, ni palieir en impwal sarawio. 25 E isikada lamp ko+ mwohn silangin Siohwa, duwehte me Siohwa ketin kehkehlingkihong Moses.

26 Mwuri e kihdi pei sarawi kohlo+ nan impwal en mihtingo mwohn kahdengo, 27 pwe en isik warpwohmwahu+ powe,+ duwehte me Siohwa ketin kehkehlingkihong Moses.

28 Ih eri kihda kahdeng+ ong wasahn pedolong en impwal sarawio nan dewe.

29 E kihdi pei sarawi en meirong isihso+ ni wasahn pedolong en impwal sarawio, impwal en mihtingo, pwe en wiahda meirong isihs+ oh meirong en krein powe, duwehte me Siohwa ketin kehkehlingkihong Moses.

30 Ih eri kihdi peisino nanpwungen impwal en mihtingo oh pei sarawio oh audehiong pihl en wideud.+ 31 Moses oh Aaron oh nah pwutak ko kin widen pehrail ko oh nehrail ko ni peisino. 32 Ahnsou koaros me re kin kohlongala nan impwal en mihtingo de keila ni pei sarawio, re kin wideuda,+ duwehte me Siohwa ketin kehkehlingkihong Moses.

33 Ih eri wiahda wasa me kelpeneo+ kapil impwal sarawio oh pei sarawio oh kihda kahdeng ong wasahn pedolong en wasa me kelpeneo.+

Moses eri kanekehla doadoahko. 34 Oh pelien depweko ahpw tepida kipehdi impwal en mihtingo, oh sapwellimen Siohwa lingan kadirehla impwal sarawio.+ 35 Moses sohte kak kohlongala nan impwal en mihtingo pwehki pelien depweko mihmihte powe, oh sapwellimen Siohwa lingan kadirehla impwal sarawio.+

36 Oh ni pelien depweko eh kin saradasang pohn impwal sarawio, mehn Israel ko kin kihpene imwarail impwal ko, re kin wia met erein arail seiloak pwon nan sapwtehno.+ 37 Ahpw, ma pelien depweko sohte kin saradasang, re sohte kin kihpene imwarail impwal kan lao lel rahn me e saradasang.+ 38 Pwe erein arail seiloak pwon, aramas en Israel kan koaros kak kilang sapwellimen Siohwa pelien depweko eh kin mihmi pohn impwal sarawio nin rahn, a nipwong kisiniei ehu me kin mi powe.+