Ihs Me Uhdahn Wia Sounkair Kan en Popohl?
NI May 31, 1996, nuhs kan pakairki rong kan me mwomwen rongen popohl. Rahn en mwuri, mehn kadehde sang koperment kasalehda me Benjamin Netanyahu, me pahn wiahla prime minister en Israel, kin “inenin loaleniong kareireihla mwekid en popohl, popohl me iangahki meleilei, nanpwungen wehin Israel oh wehi kan koaros limwa, iangahki wehin Palestine.”
Rongen usuhsdahn Netanyahu karehong me tohto en medemedewe ma popohl nan Middle East kaidehn ihte auraman ehu ahpw kak wiawi. Ma ehi, wehi teikan pahn pil alasang met, oh manokehla arail uhpene kan?
Mehlel, e mengei en inoukihda popohl sang en uhdahn wahdo popohl. Me tohto ni arail kin wehwehki duwen met, re sohte kin kamehlele met. Emen sounnuhs me adaneki Hemi Shalev inda, “elep tohn Israel kin lemeleme me kamaiouparail kerendohr, oh elep kin kamehlele me e mih nan hell pohn sampah.” Ni oarelap, e kosoia: “Ekei kin peren; oh ekei kin sengiseng.”
Ihduwen met aramas kin songosong en wahdo popohl. Kana en kaun emen oh irail kan me utung ih kin wehwehki me pali teio luhs. Sohitarki dahme wehi kan kak wahda kin karehda kansensuwed, oh insensuwed kin karehda uhwong. Mendahki ma nan Middle East, Latin America, Eastern Europe, de wasa soh lipilipil—en aramas nananti en wahdo popohl kin ihte wia auraman ehu.
Popohl Mehlel Kerendohr!
Erein ahnsouwo me rohngo me dene popohl pahn miehla nan Middle East kin lolohkseli, aramas kin pil rong ehu rongen popohl me tohror sang met. Met sohte kohsang kaparek kan en pelien politic; oh e pil sohte kohsang inoun popohl nanpwungen wehi kan. Ahpw, rong wet kin pakairki popohl me pahn kohdo ihte sang Wehin Koht. Iawasa rohng wet sansalda? Sang ni Kapokon en District me daulih 1,900 me oarelape kosoia “Sounkair kan en Popohl sang rehn Koht” me Sounkadehde kan en Siohwa wiahda nan sampah pwon erein 1996/1997.
Nan kapokon pwukat e sansalda me sohte koperment en aramas me kak wahdo popohl oh meleilei. Pwehkida? Pwehki met kin wehwehki me kitail anahne kihsang soang kan me kin kihsang rehtail popohl rahn koaros. Popohl mehlel kin wehwehki me ni atail kin pirda ni menseng koaros kitail sohla pahn mih nan keper en mahwin de pepei. Met kin wehwehki sohla mwersuwed, solahr anahnepen katengehdi wenihmw kan, solahr masak en alu pohn ahl akan, oh peneinei kan solahr pahn mwerpeseng. Menia koperment pohn sampah me kak wia met? Mehlel, koperment dahieu pohn sampah me kak inoukihda met?
Eri, Wehin Koht, kak oh pahn wahdo mepwukat. Paipel inoukihda: “Iet tehnpas en Koht rehn aramas akan! E pahn ketiket rehrail, oh irail pahn wiahla sapwelime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudial 21:3, 4) Ia uwen met pahn kansenamwahu ong tohnsampah lokolok kan!
Inou en Siohwa Koht kaidehn inou ehu me sohte audepe. Paipel kihong kitail mehn kamehlel wet: “Koht kaidehn aramas emen me kin lokaia likamw; pil kaidehk aramas emen me kin wekidala audepen kupwure. Ni eh pahn ketin inoukihda mehkot, e kin ketin kapwaiada; mehkot me e kin ketin mahsanih kin pweida.” (Nempe 23:19) Ehi, dahme Koht inoukihda pahn pweida—oh irail ko koaros me kesihnenda ong ah pali pahn ale kapaiparail.
Sapwelimen Koht Meninkeder kan en Popohl
Sounkadehde kan en Siohwa kin indanki arail ngoangki kalohkiseli Wehin Koht. Ehu ehu sounpar, irail koaros kin patpene oh doadoahngkihla pohnangin awa lik samwa ni arail kin ehukihong meteikan rong kaperen en Paipel. Met kin pweida sang ni kokohp en mahsan en Sises: “Oh Rohngamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:14) Rohng me Sounkadehde kan kin wahseli kin mehlel wia “rongamwahu,” pwehki e kin pakairki Wehin Koht nanleng me ihte koapworopwor en tohnsampah. Oh ia uwen met kin wia koapworopwor tengeteng ehu ong ahnsou kohkohdo!
Pil ahnsou wet Wehin Koht kin kapwarehda rehn towe kan sahl mehlel en popohl oh limpoak en Kristian. Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Sounkadehde kan en Siohwa kin nantiong kapwaiada kosonned wet me Kristian mehlel kan anahne peikiong. Pwehki met, arail perienpene kin kaminiminpene mehn Suhs oh mehn Arap, mehn Croatians oh mehn Serb, mehn Hutu oh mehn Tutsi. Soangen popohl wet me pali moaron en tohnsampah kin ihte auauramanih kin ahnsouwet mih rehn Sounkadehde kan en Siohwa rar kan nan sampah pwon.