Komw Kak Likih Kadeikpen Loalomw?

PAHN irair me pwung, kompas (lokaiahn wai: compass) kin wia dipwisou likilik ehu. Dikek en kompas kin koasoansoandiong powe sang ni kehl (magnetic field) en sampah, pwehn kin ahnsou koaros idih ni paliepeng. Ihme irail sounseiloak kan kin kak likih kompaso pwehn kahluwa irail ni ahnsou me sohte kilel en sahpw en kahluwa irail. Ahpw dahme pahn wiawi ma mehkot me ahneki kehl wet (magnet) kin pwildi limwahn kamposo? Dikek en kompaso sohla pahn idilahng ni paliepeng. E sohla pahn wia dipwisou likilik ehu.

Mehkot me duwehte met kak pil wiawihong kadeikpen loalen aramas. Sounkapikadao padokedi koahiek wet loaletail pwehn wia mehn kaweid likilik ehu. Pwehki kitail wiawihda ni mwomwen Koht, kadeikpen loale anahne en ahnsou koaros idihong kitail nan ahl me pwung ni ahnsou me kitail anahne wiahda koasoandi kan. E pahn kamwekid kitail en kasalehda kosonned mwakelekel en Koht. (Senesis 1:27) Pak tohto, e kin wia met. Karasepe ehu, Kristian wahnpoaron Pohl ntingihdi me pil ekei me sohte ahneki kosonned sansal en Koht “kin kapwaiada audepen Kosonnedo sang ni pein nsenarail.” Dahme karehda? Pwehki “kadeikpen loalerail kin kasalehda duwen mehlel en met.”​—⁠Rom 2:​14, 15.

Mendahki met, kadeikpen loale sohte kin ahnsou koaros kihda kaweid ni ahnsou me e konehng en wia met. Pwehki aramas soh unsek, kitail kin kalapw wiahda mehkan me kitail ese me sapwung. Pohl wehkada: “Nan kapehdi kin perenkihda kosonned en Koht. Ahpw I kin kilang ehu soangen koasoandi tohrohr me kin wia eh doadoahk ni paliwereiet-ehu soangen koasoandi me kin uhwong kosonnedo me mohngiongi kin pwungki. Koasoandi tohrohr wet kahrehiong ei selidi pahn kosonned en dihp me kin wia doadoahk ni paliwereiet.” (Rom 7:​22, 23) Ma kitail kin kalapw dukla pahn atail lamalam sapwung kan, kadeikpen loaletail pahn ekis ekis konsla oh kedekedeo sohla kin padahkiohng kitail me soahngen wiewia ehu sapwung.

Ahpw, mendahki soh unsek, kitail kak kaineneieng kadeikpen loaletail en parekiong kosonned kan en Koht. Mehlel, e inenen kesempwal kitail en wia met. Kadeikpen loalen emen me mwakelekel, oh kaiahnda pwung sohte pahn ihte kahluwalahng ehu nanpwung keren, oh limpoak rehn Koht ahpw e pil kesempwal ong atail komourla. (Ipru 10:22; 1 Piter 1:​15, 16) Pil ehu, ma kadeikpen loaletail me mwahu e pahn sewese kitail en wiahda koasoandi loalokong kan nan mour, me pahn wadohng kitail meleilei oh nsenamwahu. Sounmelkahkao koasoiahki aramas men me kin ahneki soahngen kadeikpen loale wet: “Kosonned en eh Koht kin poad nan eh mohngiong oh e sohte mwahn kin mweisang.”​—⁠Melkahka 37:⁠31.

Kaianehda Kadeikpen Loale

Kaianehda kadeikpen loale kin pidada laud sang ihte wadlikihala kosonned kan oh pil kapwaiada kosonned pwukat ni oaretik. Ih met me Parisi kan ni mwein Sises kin wia. Irail kaun en lamalam pwukat ese Kosonnedo oh kin wiahda tiahk oaretik kan, oh re dene me met pahn sewese aramas kan en liksang kauwehla Kosonnedo. Ihme karehda, re mwadangete uhwongada sapwellimen Sises tohnpadahk kan ni ahnsou me tohnpadahk ko dolungete wahn wihd ko oh kang ni rahn en Sapad. Oh re uhwongada Sises ni ahnsou me e kamwahuwiala ohl emen me mwoator apali peh ni rahn en Sapad. (Madiu 12:​1, 2, 9, 10) Nin duwen me tiahk en mehn Parisi kan kin kasalehda, wiewia riau pwukat koaros, kin kauwehla kosonned kapahieuwo.​—⁠Eksodus 20:​8-11.

E sansal me, Parisi kan kin onopkiehr Kosonnedo. Ahpw kadeikpen loalerail kin pahrekiong kosonned en Koht? Uhdahn soh! Mwurinte arail kin rapahki kisin sapwung tikitik kan ong dahme re kin wiahki me kin kauwehla kosonned en Sapad, Parisi kan wie lamalamki Sises “pwe ren kemehla ih.” (Madiu 12:14) Medewehla duwen met​—⁠kaun en lamalam pohnmwahso pwukat kin engiengki en tohnpadahko dolungete wahn wihd oh kang oh kamwahuwiala aramas ni rahn en Sapad; ahpw re sohte suwedki pilahni en kemehla Sises!

Samworo lapalap kan kin kasalehda soahngen lamalam sapwungohte. Ohl mwersuwed pwukat sohte kin ekiste pehm me re kauwehla kosonned ni ahnsou me re kihong Sudas mwohni silper 30 sang nan wasahn nekinek en mwohni nan tehnpaso pwehn pangkihla Sises. Ahpw ni ahnsou me Sudas kapwurehdo mwohni ko, oh kesehdiong nan tehnpaso, iren kosonned ehu kin koarompwahda kadeikpen loalen samworo lapalap ko. Re koasoia: “Mwohni pwukat iei pweinen kamaramas, ihme atail kosonned akan keinepwihki kitail en dehr kihong nan wasahn nekinek en meirong en Tehnpas Sarawiet.” (Madiu 27:​3-6) E sansal me, samworo lapalap ko kin pwunodki me nein Sudas mwohni ko ahnsouwo saminlahr. (Pil kilang Deuderonomi 23:⁠18.) Ahpw mendahki met, pwihn en ohl pwukatte sohte kin wiahki mehkot sapwung en doadoahngki mwohni pwehn pwainda pengipengalahn sapwellimen Koht Ohlo!

En Pahrekiong Madamadau en Koht

Karasaras kan mwowe kin kasalehda me kaianehda kadeikpen loale kin pidada laud sang ihte audehkihda lamalam dahme kitail en wia oh dahme kitail en dehr wia. Mehlel, loalokongkihla kosonned kan en Koht me kesempwal oh peikiong kosonned pwukat me anahn ong komourala. (Melkahka 9:​7-​11) Ahpw, patohngete sukuhliki kosonned kan en Koht, kitail anahne kekeirada mohngiongatail en pahrekiong madamadau en Koht. Eri kitail kak lelohng pweidahn kokohp en Siohwa ki Aiseia me ketihtihki: “Kauno pahn ketikihong kumwail nan apwal, ahpw pein ih pahn ket rehmwail pwe en ketin padahkih kumwail, oh kumwail solahr pahn rapahkih ih. Ma kumwail pahn salongasang nan ahlo oh kolahng ni palimeing de maun, kumwail pahn rong kapitie sang mwurimwail me mahsanih, ‘Iet ahlo. kumwail idawehn.’”​—⁠Aiseia 30:20, 21; 48:17.

Ni mehlel, met sohte kin wehwehki me ni ahnsou me kitail pahn wiahda koasoandi toutou ehu, ngihl ehu pahn padahkiohng kitail dahme kitail en wia. Mendahki met, ni ahnsou me atail madamadau ong ire ehu kin pahrekiong madamadau en Koht, kadeikpen loaletail kaunopadaiehr mwahu pwehn sewese kitail en wiahda koasoandi kan me pahn kaperenda Ih.​—⁠Lepin Padahk 27:11.

Tehk duwen Sosep, me momour nan senturi 18 B.C.E. Ni ahnsou me en Podipar pwoudo idingkihong ih en wiahda dipen kamwahl reh, Sosep sohte men dukila pah, oh nda: “Ia duwen ei pahn wiahda soangen sapwung laud wet, oh dipikihda mwohn Koht?” (Senesis 39:⁠9) Ni mwein Sosep, sohte kosonned nting ehu sang rehn Koht me kin kadeik tiahk en kamwahl. Pil ehu, Sosep kin koukousoan nan Isip, dohsang kaiahn en peneinei de kosonned en ah papah. Eri, dahme kahreong Sosep en kak pelianda kasongosongo? Pwehki kadeikpen loale me kaiahnda mwahu. Sosep ahnekier madamadau en Koht me ohl pwopwoud men oh lih pwopwoud men kin wiahla “uduk ehu.” (Senesis 2:24) Ihme e wehwehki me e sapwung en alehda en emen ohl tohrohr pwoud. Madamadau en Sosep kin pahrekiong madamadau en Koht me pid ire wet. E wehwehki me kamwahl kaidehn tiahk mwakelekel.

Rahnwet, aramas malaulaute me duwehte Sosep. Tiahk en nenek reklahr wasa koaros, oh me tohto sohte kin lemeleme me re pwukoahki en mour mwakelekel ong ahr Sounkapikada, de ong pein irail, de pil ong arail pwoud kan. Irair wet duwehte irairo me sansalda nan pwuhk en Seremaia: “I karokaronge kanahieng, ahpw kumwail sohte kin lokaia mehlel. Sohte emen rehmwail me kin koluhkihla eh wiewia suwed kan; sohte emen me kalelepek, ‘Sapwung dah me I wiadahr?’ Koaros wenlahte wiewia nsene, duwehte oahs emen eh kin tangatang kolahng nan mahwen.” (Seremaia 8:⁠6) Ihme karehda, mie anahn laud sang mahs ong kitail en kapahrekiong atail madamadau en duwehte madamadau en Koht. Kitail ahneki sawas kaselel ehu me kak sewese kitail en wia met.

Mehn Sawas ong Kaianehda Kadeikpen Loale

Nting Sarawi kan kin “mwahu ong atail padahkihong aramas akan me mehlelo, ong atail peneu ong tiahk pwung, ong atail kapwungala wiewia sapwung kan, oh pil ong atail padahk duwen mour lelepek; pwe irail kan me kin papah Koht en kak wia oh koahiekla ni soangen wiewia mwahu koaros.” (2 Timoty 3:​16, 17) Atail onopki Paipel pahn sewese kitail en kaianehda me Paipel kin kahdaneki atail “koahiek en kasawihada” pwe kitail en kak kasawihada dahme pwung sang dahme sapwung. (Ipru 5:​14) E pahn karehong kitail en kekeirada atail limpoak ong mehkan me Koht kin poakohng oh tateki mehkan me Koht kin ketin kalahdeki.​—⁠Melkahka 97:10; 139:21.

Eri, karepen atail kin onop Paipel iei en audaudkihda ngehnin oh mouren padahk mehlel ahpw kaidehn en ihte loalokongkihla Paipel. Nan The Watchtower en September 1, 1976, e koasoia: “Nan atail onop en Pwuhk Sarawi kitail en nantiong wehwehkihla sapwellimen Koht kopwungpwung, limpoak, oh pwung oh padokedi teng mehpwukat nan mohngiongatail pwe ren wiahla kisehn atail mwekid kan duwehte mwenge oh esingek. Kitail en nantiong song pehmitikihong en ahneki pepehm me kitail pwukoahki en kasalehda tiahk mwakelekel ni atail pahn kekeirada wehwehkihla dahme pwung oh dahme sapwung. Me laud sang met, kitail en kaianehda kadeikpen loaletail en ahneki pepehm kehlail me e pwukoahki ah wiewia kan ong Sounketikihda Kosonned oh Sounkopwungo me unsek. (Aiseia 33:22) Eri ni atail kin sukusukuhlki mehkan me pid Koht, kitail en nantiong kalemengih Ih nan irair kan koaros en mour.”

Alehda “Lamalam en Krais”

Atail onopki Paipel pil pahn sewese kitail en alehda “lamalam en Krais,” irair en madamadau en peik oh aktikitik me Sises kasalehda. (1 Korint 2:​16) Wiewia kupwuren Semeo kin wia mehkot me kaperen, kaidehn ihte tiahk ehu me e anahne wia ni soh madamadau. Sounmelkahkao Depit kin kasalehda ni karasaras en Sises lamalam ni ah ntingihdi: “Maing ei Koht, ia uwen ei kin ngoangki kapwaiada kupwuromwien. I kin kolokol sapwellimwomwi padahk kan nan mohngiongiet.”a​—⁠Melkahka 40:8.

Alehda “lamalam en Krais” me kesempwal ong kaianehda kadeikpen loale. Uwen lauden atail sukuhlki duwen Sises, ih uwen mwahu en atail pahn kaunopada pwehn kahlemengih Samatail nanleng, Siohwa. (Episos 5:​1, 2) Ma kadeikpen loaletail kin pahrekiong madamadau en Koht, e pahn kahluwa kitail nan ahl me pwung. Siohwa ketin inoukihong irail ko me kin likih ih: “I pahn padahkihong uhk ahl me ke pahn weid ie; I pahn kaweid uhk oh panauwihiuk.”​—⁠Melkahka 32:⁠8.

Paiekihda Kadeikpen Loale me Kaiahnda

Pwehki e ese duwen sapeik en aramas soh unsek, Moses panawihki mehn Israel kan: “Kumwail rong kanahieng mehkoaros me I kehkehlingkihong kumwail rahnwet. Kumwail kangoangehki noumwail seri kan, pwe re en loalopwoatohng kapwaiada sapwellimen Koht padahk pwukat.” (Deuderonomi 32:46) Kitail en pil ntingihdiong nan mohngiongatail kan kosonned en Koht. Ma kitail pahn wiahda met, kadeikpen loaletail pahn uhdahn kahluwa atail kahk kan oh sewese kitail en wiahda koasoandi kan me pwung.

Ni mehlel, kitail anahne en kanaieng. Lepin padahk en Paipel mahsanih: “Ahl me ke lemeleme me iei pwung, kakete kahluwaiukalahng mehla.” (Lepin Padahk 14:12) Dahme karehda met kin kalapw wiawiki? Pwehki nin duwen me Paipel kasalehda: “Ihs me wehwehki audepen mohngiong en aramas? Sohte mehkot me duwehte me diren piht; sohte kamwahupe ieu kak dierekda.” (Seremaia 17:9) Ihme karehda, kitail koaros anahne en idawehn kehkehlik me kileledi nan Lepin Padahk 3:​5, 6: “Likih Kauno [Siohwa] ni mohngiongomw unsek. Dehr koapworopworki mehkan me ke pein lemeleme me ke ese. Tamanda Kauno [Siohwa] ni omw wiewia kan koaros, oh e pahn ketin kasalehiong uhk ahl me pwung.”

[Nting tikitik me mi pah]