Mie Noumw Tohnleng Men Me Kin Sinsile Komwi?
KE KAMEHLELE me mie noumw tohnleng men me kin sinsile komwi? Aramas tohto kin kamehlele met. Mie emen lih ni palikapi en Canada me dene e ahneki kisakis tohrohr me kin pidada tohnleng kan. Ma ke pahn ndahiong ih edomw oh kihong ih tala 200, lih menet kose me dene e kak wiahda pwe ken tuhwong noumw tohnleng me kin sinsile komwi. Keieu, e kin doudouloale duwen met ni ah kin kangkakil kisiniei en kandehla ehu. Mwuri, e kilangada kasansal ehu oh nan kasansal wet noumw tohnlengo kin padahkihong ih rohng ehu me en pousehiong uhk. Patohngete met, liho kin mahlenihda ia mwomwen noumw tohnlengo.
Ong ekei, met mwomwen kin duwehte koasoi ehu duwen King Louis IX en wehin Prans. E pwainda wunen menpihr pweilaud kei me dene pwupwsang ni pehn pihr kan en Tohnleng Lapalap Michael. Nindoken re kin peidengki koasoi wet, me tohto pahn mwadangete kamehlele dahme lihen Canada kin koasoia.
Dahkihla Tohnleng kan
Nan ahnsou pwukat, aramas tohto kin men wehwehki duwen tohnleng kan. Nan TV kan, nan kasdo kan, nan pwuhk kan, nan makasihn kan, oh nan nuhs kan, re kin padahkihong kitail duwen tohnleng kan me kin kamweitala me soumwahu kan, me nsensuwed kan, oh me tohnleng pwukat kin kihong aramas loalokong, oh kapitasang aramas kan mehla. Nan United States, mpen aramas rar pak 20 kin kilang kasdohn nan TV ehu me kin wiawi nan wihk koaros, duwen tohnleng kan me kin pidada nan mouren aramas akan. Ehu sidowahn pwuhk kasalehda me mie pohnangin pwuhk 400 me kin koasoia duwen tohnleng kan.
Mie pwuhk kapw ehu me kin koasoia duwen eksperiens en iaduwen tohnleng kan kin doarehla mouren sounpei kan nan mahwen. Ni mwurin sidohsa kan, mie kisin nting kan me kin koasoia me tohnleng kan kin pere me tangahki sidohsao. Ekei pwihn en aramas akan kin kangoange aramas en kasawihada mwekid en tohnleng kan oh sukuhlki irail oh kin koasoia me dene met kak sewese aramas kan en koasoiong tohnleng kan.
Eileen Freeman ntingihdi pwuhk siluh duwen tohnleng kan oh wiahda makasihn ehu me kin koasoiahte tohnleng kan. E koasoia: “I kamehlele me tohnleng me kin sinsile aramas nan sampah me tohto duwehte tohnleng kan nanleng, oh tohnleng pwukat kin pwukoahki kaidehn ihte kapinga Koht nanleng ahpw en uhdahn apwalih aramas akan oh mour teikan nan sampah. Emen tohnleng en silasil kin ale pwais en apwalih kitail ni ahnsou me kitail kin wiawihda nan kapehd oh en pere kitail sang ni ahnsou me kitail kekeirada nan kapehd, lellahng ahnsou me kitail ipwidi, oh pil lellahng atail mour nan sampah wet, lao tohnlengo kahluwa kitail sang nan sampah wet ong nan lingan en nanleng.” Lamalam wet kin kasalehda dahme aramas tohto kin lemelemehki tohnleng kan me dene kin sinsile aramas.
Mehlel, nan ahnsou kapwunod oh kahpwal pwukat, e kin wia mehn kamweit ehu en kamehlele me mie pein neitail tohnleng men me kin sinsile kitail, me pwukoahki en pere kitail. Ahpw, dahme Mahsen en Koht, Pwuhk Sarawi, koasoiahki duwen met? E pahn mwahu ma kitail pahn song en koasoiong tohnleng kan? Re kin nsenohki ma kitail kin tiahk mwahu de soh? Re kin tehk duwen dahme kitail kin kamehlele nin duwen padahk kan en pelien lamalam? Soahngen sawas dah kan me kitail kak kasik sang rehrail? Peidek pwukat pahn pasapengla nan artikel en mwuri.