Kamwarak Werentuhke Kan En Padahk Mehlel En Wehio

“Padokedi nimenseng oh pil nin soutik.”​—EKLESIASDES 11:6.

1. Ni ahl dahieu irail Kristian akan nan rahnpwukat kin kamwarak werentuhke kan?

DOADOAHK en wiahda mwetuwel iei doadoahk kesempwal ehu ong mehn Ipru kan en mahs. Ih kahrepe Sises kin kalapw doadoahngki nan eh karasaras kan mehkan me kin pid doadoahk en wahnsapw, pwe e kin tikada nan Sapwen Inou nin duwen aramas men. Karasepe ehu, e karasaiong doadoahk en kalohki Rongamwahu en Wehin Koht ong kamwarak werentuhke kan. (Madiu 13:1-9, 18-23; Luk 8:5-15) Lao lel ni ahnsou wet, mehnda ma kitail kin mih nan sahpw ehu me kin kesempwaliki doadoahk en wahnsahpw akan de soh, kamwarak werentuhke kan ni pali ngehn iei doadoahk me keieu kesempwal ong Kristian akan.

2. Ia uwen kesempwal atail doadoahk en kalohk, oh nan rahnpwukat, dahme kin wiawi pwen sewese doadoahk wet en pweida?

² Pwais kaselel laud ehu en iang doadoahk en kamwarak werentuhke kan en padahk mehlel en Paipel nan imwin ahnsou wet. Rom 10:14, 15 kin kawehwehda mwahu duwen kesempwalpen doadoahk wet: “Oh iaduwen arail kak rong, ma mahsenpe sohte pahn wiawihong irail? Oh ia duwen mahsenpe pahn kak wiawihong irail, ma sohte meninkeder pahn pekederlahng irail? Nin duwen Pwuhk Sarawi eh mahsanih: ‘Meid lingan oh kaselel atail udiahl meninkeder kan ni ar kin wa kohdo rongamwahu!’” Ni ahnsowet e wia kesempwal sang mahs en wonowei ki madamadau en pweida pwen kapwaiada pwukoa wet me kin pwilsang rehn Koht. Ih kahrepe Sounkadehdehn Siohwa kan kin ngoangkihte wiahda oh kihseli Paipel kan oh sawaspen Paipel kan ni lokaia 340. Mie anahnpen irail 18,000 me kin pein toukihda ahr ahnsou en doadoahk nan poahsoan kauno oh rahn ohpis kan nan sahpw tohto pwehn wiahda makisihn wet. Kereniong Sounkadehde wene rar kin iang nan doadoahk wet en kihseli sawaspen Paipel pwukat nin sampah pwon.

3. Dahme kin wiawi sang doadoahk en kamwarek werentuhke kan en padahk mehlel en Wehio?

³ Ia wahn doadoahk laud wet? Nin duwen me kin wiawi ni tepin rahn akan en Kristian, aramas tohto nan rahnpwukat pil kin kamehlele padahk mehlel. (Wiewia 2:41, 46, 47) Ahpw, kesempwal sang aramas tohto me wiahla sounkalohk kan en Wehio me ahpwtehn papidaisla iei me kadehde laud wet kin kawahuwih mwaren Siohwa oh kasarawi Koht mehlelo. (Madiu 6:9) Oh pil, loalokongkihla Mahsen en Koht kin kamwahuwiahla mour en aramas tohto oh pil kak kahrehirailla en komourala.​—Wiewia 13:47.

4. Ia uwen laud irail wahnpoaron ko kin nsenohkin aramas akan me re kin kalohkong?

⁴ Wahnpoaron kan kin pohnese ni unsek duwen kesempwalpen Rongamwahu me kak komourala aramas akan, oh re pil kin poakohng laud aramas akan me re kin kalohk ong. Met kin sansal sang mahsen en wahnpoaron Pohl, ni ahnsou me e ntingihdi met: “Pwehki at poakohng kumwail, se onopadahr se en kihong kumwail, kaidehn Rongamwahuohte me sang rehn Koht, ahpw pil pein at mour. Pwe kumwail wialahr kompoakepaht mehlel!” (1 Deselonika 2:8) Ni ahnsou me Pohl oh wahnpoaron teikan kin kasalehda limpoak mehlel ong aramas teikan, irail kin kahlemengih Sises oh tohnleng teikan me kin iang pidada nan doadoahk en komourala aramas akan. Kitail en kousapahlih pwukoa kesempwal kan me irail sapwellimen Koht ladu kan me kin mih nanleng kin wia ong kamwarak werentuhke kan en padahk mehlel en Wehio, oh kitail en kilang iaduwen ahr mehn kahlemeng mwahu kin kangoange kitail en kapwaiada atail pwukoa kan.

Sises​—Sounkamwarak Men me kin Kamwarak Werentuhke en Padahk Mehlel en Wehio

5. Doadoahk dahieu me Sises kin keieu kesempwaliki en wia ni ahnsou e ketiket nin sampah?

⁵ Sises, ohl unsek men, sapwellimaniki manaman en ketikihong aramas akan dipwisou mwahu tohto ni ahnsou e ketiket nin sampah. Karasepe ieu, e kakete kapwungala sawehwe tohto duwen epwelipen wini ni ahnsowo, de e pil kak kamarainih aramas akan ni palien sains teikan. Ahpw, e kasalehda ni sansal ni ahnsou e tepida wia e doadoahk en kalohk me eh pwukoa iei en kalohki Rongamwahu. (Luk 4:17-21) Oh ni kaimwiseklahn eh doadoahk en kalohk, e kawehwehda met: “A iei, ong ni kahrepe wette me I kohkidohng sampah, pwe I en kadehdehda duwen me mehlel.” (Sohn 18:37) E kin soupisengki kamwarak werentuhke kan en padahk mehlel en Wehio. Padahkiong aramas akan duwen Koht oh sapwellimen Koht kupwur kan me kin wia doadoahk keieu kesempwal sang kasukuhl duwen oaralap teikan me Sises kak kihong irail.​—Rom 11:33-36.

6, 7. (a) Inou kaselel dahieu me Sises wiahda mwohn e ketdahla nanleng, oh iaduwen e kin kapwaiada eh inou ni ahnsouwet? (b) Iaduwen kupwuren Sises ong doadoahk en kalohk kin kamwekid pein kowe?

⁶ Sises kawehwehda pein ih nin duwen Sounkamwarak werentuhke kan en padahk mehlel en Wehio. (Sohn 4:35-38) E kamwarak werentuhke kan en Rongamwahu ahnsou koaros oh wasa koaros. Ni ahnsou e lahngada nin tuhkeo, e pil lohkiseli rongamwahu ni ah mahsanih duwen paradais nin sampah me pahn wiawi ni ahnsou kohkohdo. (Luk 23:43) Oh pil, e kin nsenohki laud duwen rongamwahu en lohkseli sohte uhdi ni ahnsou me e pwoula nin tuhken kalokolok. Mwohn e kohdala nanleng, e kehkehlikiong sapwellime wahnpoaron kan en pousehla kamwakamwarak werentuhke kan en padahk mehlel en Wehio oh katohnpadahk. Mwurin met, Sises wiahda inou kaselel ieu. E mahsanih: “Eri, kumwail en ese pwe I pahn ieiang kumwail ahnsou koaros lel ni imwin kawa.”​—Madiu 28:19, 20.

⁷ Ki sapwellimen Sises mahsen pwukat, e wiahda inou ehu en utungada oh kahre sapwellime tohnpadahk kan, oh apwapwalih doadoahk en kalohki rongamwahu “ahnsou koaros lel ni imwin kawa.” Lao lel atail ahnsou, Sises kin nsenohki doadoahk en kalohk. E kin wia atail Kaun: e kin kaunda doadoahk en kamwarek werentuhke kan en padahk mehlel en Wehio. (Madiu 23:10) Nin duwen Tapwin mwomwohdisohn Kristian, e kin pwukoahki doadoahk wet me kin wiawi wasa koaros nan sampah mwohn silangin Siohwa.​—Episos 1:22, 23; Kolose 1:18.

Tohnleng kan kin Lohkiseli Rongamwahu kan

8, 9. (a) Ni ahl dahieu irail tohnleng kan kin kasalehda me irail kin nsenohki aramas akan? (b) Ni ahl dahieu kitail kin rasehng aramas akan me kin mih nan wasahn kapoudial ehu, ahpw irail tohnleng kan kin uduhdiahl dah?

⁸ Ni ahnsou me Siohwa kapikada sampah, irail tohnleng kan “wiakihteieu kokoul, oh . . . ngisingiski ar peren.” (Sohp 38:4-7) Sang ni ahnsowo lel met, tohnleng pwukat kin nsenohki aramas akan. Siohwa kin doadoahngki irail en padahkiong aramas akan duwen sapwellime kupwur kan. (Melkahka 103:20) Met kin sansalda nin duwen arail kin utungada doadoahk en lohkiseli rongamwahu nan atail ahnsou. Nan kaudiahl me wahnpoaron Sohn aleier, e kilangada “emen tohnleng me pipihr nan wehwe” oh e kin “weuwa rongamwahu poatopoat ehu me e pahn lohkihong tohnsampah kan, wehi koaros, kadaudok koaros, lokaia koaros, oh sahpw koaros. E ahpw ngihl laudida, nda, “Kumwail lemmwiki Koht oh kapinga sapwellime roson lapalahpie! Pwe e lelehr ahnsoun eh pahn ketin kadeikada tohn sampah kan.’”​—Kaudiahl 14:6, 7.

⁹ Paipel kin koasoia duwen tohnleng kan nin duwen “ngehn kei me kin papah Koht, oh me kin ketin pekederdo pwehn sewese irail kan me pahn ale komour.” (Ipru 1:14) Ni ahnsou me tohnleng kan kin kapwaiada arail pwukoa kan, re kin kilang kitail wia atail doadoahk en kalohk. E kin duwehte atail kin mih nan wasahn kapoudiahl en mwadong ehu, ni atail kin wia atail doadoahk en kalohk oh tohnleng kan kin uduhdiahl kitail sang nanleng. (1 Korint 4:9) Ia uwen mehlel oh kaperen en wehwehki me kitail sohte kelepw ni atail kin wia doadoahk en kamwarak werentuhke kan en padahk mehlel en Wehio!

Kitail kin Ngoangki Kapwaiada Atail Pwukoa

10. Iaduwen kaweid pwung ehu nan pwuhken Eklesiasdes 11:6 kadoadoahkong atail doadoahk en kalohk?

¹⁰ Dahme kahrehda Sises oh tohnleng kan kin inenen nsenohki atail doadoahk? Sises mahsanih duwen ehu kahrepe: “Eri, ih duwen tohnleng en Koht kan, re kin perenkihda me dipan emen eh kin koluhla oh wiliakapwala.” (Luk 15:10) Kitail pil kin ni mehlel nsenohki aramas akan. Ih kahrepe kitail kin wia uwen me kitail kak en kamwarek werentuhke kan en padahk mehlel en Wehio wasa koaros. Mahsen kan en pwuhken Eklesiasdes 11:6 kak kadoadoahkong atail doadoahk. Iei wasa me Paipel kaweidkin kitail: “Padokedi nimenseng oh pil nin soutik; pwe ke sehse ma koaros pahn pweida mwahu de soh; oh ke pil sehse ma ehu pahn pweida mwahusang ehu.” Ahpw, ni mehlel, mwein ong aramas emen me pahn perenki oh pwungki atail padahk kan, pahn mie aramas epwiki kei de mwein kid kei me pahn kahng rong. Ahpw, duwehte irail tohnleng kan, kitail kin perenkihda kilang me “dipan emen” alehdi rongamwahu en komour.

11. Sawas laud dahieu doadoahngki sawaspen Paipel kan kak pweida?

¹¹ Doadoahk en kalohki rongamwahu iei doadoahk laud ehu. Sawas kesempwal ehu en kapwaiada doadoahk wet iei sawaspen Paipel kan me wiawihda ni pwuhk de makisihn kan me Sounkadehdehn Siohwa kan kin doadoahngki. Pwuhk pwukat kin rasehng werentuhke kan me kin kamwarekpeseng wasa koaros. Kitail sehse iawasa neitail pwuhk kan pahn pweida mwahu ie. Ekei ahnsou, pwuhk kan de makisihn kan de brochure kan de tract kan pahn kohwong emen me pahn uhd kihong emen tohrohr me men wadek. Sises oh tohnleng kan pil kak koasoanehdi irair akan en wiawi pwe aramas mehlel kan pahn kak rong padahk mehlel. Tehk duwen ekei ekspiriens kan me kin kasansalehda ahl kapwuriamwei kan me Siohwa kin kahrehong aramas akan en wadek sawaspen Paipel kan oh kin pweida mwahu.

Doadoahk en Koht Mehlel

12. Iaduwen makisihn mering ehu sewese ehu peneinei en esehla Siohwa?

¹² Nan pahr 1953, Robert, Lila, oh neira seri kan kousoan sang nan kanihmw laud ehu oh re uhd keseula nan ihmw mering ehu me mih nan mwetuwel en Pennsylvania, U.S.A. Ahnsoukis mwurin re kousoaniehr nan ihmwo, Robert tepiada wiahda imwen kainen ehu pahn kendake me mih nan ihmwo. Mwurin e kihsang dinapw kei, e diarada doaropwe kan, kilin wahn tuhke walnut kan, oh kihd teikan me kitik kan kin wahdohng loale. Nanpwungen kihd pwukat, mie makisihn ehu me oaralap koasoia The Golden Age. Robert wadek oh keieu perenki artikel ehu me kin pid duwen apwalih seri kan. E inenen perenkihda wadek nan makisihno kaweid sansal kan me kin poahsoanehda pohn Paipel, oh mwuhr e padahkiong Lila me irail koaros pahn iangala “pelien lamalam en The Golden Age.” Wihk kei mwurin met, Sounkadehdehn Siohwa kan kalohk rehrail, ahpw Robert padahkiong irail me ih oh eh peneinei men iangala “pelien lamalam en The Golden Age.” Eri, Sounkadehde pwukat kawehwehda me The Golden Age uhd adanekihla Awake!, Robert oh Lila tepida onop Paipel rehn Sounkadehde kan kaukaule, oh mwuri ira papidaisla. Ira uhd kamwarek werentuhke kan en padahk mehlel rehn neirail seri kan oh pweida mwahu. Rahnwet, tohto sang meh 20 me kohsang peneinei wet, iangahki nein Robert oh Lila seri isimen, me papidaisla oh wiahla lidun Siohwa Koht.

13. Dahme kamwekid pwopwoud ehu nan Puerto Rico en tepida perenkihda Paipel?

¹³ Mpen sounpar 40 samwalahro, William oh Ada, pwopwoud ehu sang Puerto Rico, sohte perenki onop Paipel. Ni ahnsou me Sounkadehdehn Siohwa kan pahn letelet ni wenihmw en imwara, pwopwoudo kin rukla mwomwen me sohte me mih nan ihmw. Ehu rahn, William kohla ni wasahn netikihla dipwisou kan me ohla, pwe e anahne pwainda mehkot ong kamwahuiala mehkot nan imwe. Ni ahnsou me e mweselsang wasao, e kilangada pwuhk ehu me pohn tehndihpw me mih nan lapalahn wasahn kihd ehu. Oaralap en pwuhk wet iei Religion oh Sounkadehdehn Siohwa kan wiahda pwuhk wet nan pahr 1940. William wahla pwuhko ni imweo oh perenki wadek duwen wekpeseng en pelien lamalam likamw akan sang kaudok mehlel. Mwurin met, ni ahnsou me Sounkadehdehn Siohwa kan pwurala rehra, William oh Ada perenki rong arail koasoi oh tepiada onop Paipel rehrail. Sounpwong kei mwurin met, ira papidaisla nan Kapokon en International en Kupwuren Koht, 1958. Sang ni ahnsowo lel met, ira sewesehda aramas 50 en iangala atail pirien Kristian.

14. Nin duwen ekspiriens wet, neitail sawaspen Paipel kan kin kak sewese aramas akan ni ahl dahieu?

¹⁴ Karl sounpar 11 oh e kin inenen ketihwo. Ong pein ih, e kin lemeleme me ahnsou koaros e kin lelohng kahpwal. Eh pahpa, sounpadahk men en pelien lamalam en German Methodist, kin padahkiong ih me aramas suwed akan pahn isisla mwurin mehla. Eri, Karl kin masak ehl. Ehu rahn nan pahr 1917, Karl kilangada kisin doaropwe nanial oh e pwekada doaropweo. Ni ahnsou me e wadek doaropweo, e kilang peidek wet: “Dahkot ehl?” Doaropweo iei luhk ehu ong kapahrek ong wehi pokon me oaralap koasoia ehl, oh irail Tohnsukuhl en Paipel kan (ni ahnsou wet irail adanekihla Sounkadehdehn Siohwa kan) me pahn wia padahk wet. Mpen sounpar ehu Karl kin onopki Paipel rehrail oh papidaisla oh e wiahla emen Tohnsukuhl en Paipel. Nan pahr 1925 luhk kohwong ih en iang doadoahk nan poahsoan kaun en Sounkadehdehn Siohwa kan​—iei ih wasao e kin doadoahk lao lel ni ahnsou wet. Kristian menet me kin iang doadoahk wet sounpar walihsek samwa tepikihda e kilangada kisin doaropwe ehu nanial.

15. Dahme Siohwa kak wia, nin duwen e kin kilang me konehng en wiawi?

¹⁵ Ni mehlel, aramas akan sohte kak wehwehki de ese ma tohnleng kan me kihda ahr sawas kan nan ekspiriens pwukat. Ahpw, kitail en dehr peikasalki me Sises oh tohnleng kan kin kihda sawas laud nan doadoahk en kalohk wet oh me Siohwa kak koasoanehdi irair akan nin duwen e kin lemeleme me konehng. Soangen ekspiriens pwukat kin kasansalehda me mie koapworopwor laud ong irail akan me ale neitail pwuhk kan, makisihn kan, brochure kan oh kisin doaropwe kan.

Kitail kin Ahneki Pai Kesempwal Ehu

16. Dahme kitail kak sukuhlikihsang mahsen en 2 Korint 4:7?

¹⁶ Wahnpoaron Pohl koasoia duwen “pai kesempwal ehu nan sah pwehl kan.” Pai wet iei pwukoa en kalohk me kohsang rehn Koht, oh sah pwehl kan kin rasehng aramas akan me Siohwa ketikihong irail pai wet. Pwehki aramas pwukat iei aramas soh-unsek, Pohl pousehla oh mahsanih kahrepen pwukoa wet me kin kohwong irail: “pwe en kadehdehda duwen manaman lapalap eh uhdahn sapwellimen Koht, a kaidehk aht.” (2 Korint 4:7) Ei, kitail kak liki me Siohwa pahn ketikihong kitail kehl me anahn en kapwaiada doadoahk wet.

17. Dahme kitail pahn lelohng ni ahnsou me kitail pahn kamwarek werentuhke kan en padahk mehlel en Wehio, oh dahme kahrehda kitail anahne kolokolte madamadau en pweida?

¹⁷ Pak tohto kitail anahne tohnmeteikihla mehkot. Mwein e sohte mengei en kalohk nan ekei wasahn kalohk kan. Nan ekei wasa pali moron en aramas sohte kin perenki rong, de ekei kin lemei. Ahpw, mehlel, mendahki sounkalohk kan kin nannanti nan soangen wasahn kalohk kan, aramas tohto sohte pahn perenki rong. Nannanti en sounkalohk pwukat sohte kin mwahl, pwe doadoahk wet, doadoahk katapan laud ehu: e kin pid mour en aramas akan. Tamataman me werentuhke kan me ke pahn kamwarek pahn kak kihong aramas peren ni ahnsou wet oh pil kihong irail mour soutuk ni ahnsou kohkohdo. Mahsen en Melkahka 126:6 kin pweida pak tohto: “Irail kan me sengiseng nindokon arail weuwa kohwei ar werentuhke kan re en koul oh ngisingiski peren ni arail pahn pwurodo, wa kohdo wahnsapwarail.”

18. Iaduwen kitail kak kanakanahieng pein atail doadoahk, oh dahme kahrehda kitail anahne wia met?

¹⁸ Kitail en isaneki ahnsou koaros en kamwarek werentuhke kan en padahk mehlel en Wehio. Kitail en dehr manokehla, mendahki kitail kin kamwarak kisin werentuhke oh kalamwurehki pihl, me Siohwa me kin ketin kakairada tuhkeo. (1 Korint 3:6, 7) Ahpw, nin duwen Sises oh tohnleng kan kin kapwaiada arail pwukoa en doadoahko, Siohwa kin kupwurki kitail en pil kapwaiada atail doadoahk ni unsek. (2 Timoty 4:5) Eri, kitail en kanakanahieng pein atail padahk kan, atail madamadau kan, oh atail ngoangkihte doadoahk wet. Dahme kahrehda? Pohl sapengki: “Pwe ma ke pahn wia, ke pahn doarehla pein kowe oh pil irail kan me kin rong uhk.”​—1 Timoty 4:16.

Dahme Kitail Sukuhliki?

• Ni ahl dah kei atail doadoahk en kamwarek werentuhke kan kin pweida mwahu?

• Iaduwen Sises Krais oh tohnleng kan kin pidada doadoahk en kalohk nan rahnpwukat?

• Dahme kahrehda nin duwen sounkamwarek werentuhke en padahk mehlel en Wehio kitail anahne kalohk wasa koaros?

• Ni ahnsou me kitail kin tuhwong aramas akan me sohte kin perenki rong de lemei ong atail doadoahk en kalohk, dahme pahn kak kamwekid kitail en dadaurete?

[Kilel nan Pali 25]

Duwehte soumwet kan nan Israel en mahs, Kristian akan nan rahnpwukat kin kamwarek werentuhke en padahk mehlel en Wehio

[Kilel kan nan Pali 26,27]

Sounkadehdehn Siohwa kan kin wiahda oh kihseli soangen sawaspen Paipel tohto ni lokaia 340