“Kumwail Kohdo Rehi, . . . I Ahpw Pahn Kommoaleikumwailla”
‘Kalohki Mahseno’ Kin Wahdo Nan Kapehd Nsenamwahu
E WIA aramas unsek men oh ahneki pwukoah kesempwal ieu. Sapwellime padahk kan kin kamwekid nan kapehd en aramas tohto me kahrehda “pokon en aramas akan kin pwuriamweikihla wiepen ah kin wia padahk.” (Madiu 7:28) E pil sohte kin pwangahkihda padapadahk. Sapwellime ahnsou, kehl oh dahme e sapwellimaniki—e kin kihong padahki Wehin Koht. Ni mehlel, ohl menet, Sises Krais, kin seiloak ni doh oh lellap oh dohsang uhdake oh wia sounkalohk oh sounpadahk men me sohte me pahrekiong.—Madiu 9:35.
Sapwellimen Sises pwukoa karuwaru iei en padahkiseli “Rongamwahu en Wehio” ohng aramas akan me momour nan sapwellime ahnsou oh en kaiahnehda sapwellime tohnpadahk kan en pil wia doadoahkohte nan sampah pwon. (Madiu 4:23; 24:14; 28:19, 20) Iaduwen—pwukoa lap oh karuwaru wet kin wia mehkot katoutou ohng sapwellimen Sises tohnpadahk kan me mie arail irair en soh unsek kan?
Uhdahn soh! Mwurin eh kaweidiki sapwellime tohnpadahk kan en peki ni kapakap “Kaunen rahko,” Siohwa Koht, en ketikihdo pil ekei tohndoadoahk kan, Sises kadarirailpeseng en kasukuhlih aramas akan. (Madiu 9:38; 10:1) Ih eri kamehlelehiong irail me pwukoa en wia sapwellime tohnpadahk—me pid kalohk—pahn wahdo kamaiou oh nsenamwahu. Sises mahsanih: “Kumwail kohdo rehi, . . . I ahpw pahn kommoaleikumwailla.”—Madiu 11:28.
Iang Doadoahk en Kalohk Kin Wahdo Peren
Ia uwen nsenoh, limpoak oh kadek ngoren luhk wet! E kin kasalehda madamadau en nsenohki aramas me mih rehn sapwellimen Sises tohnpadahk kan. Sapwellime tohnpadahk kan kin diar nsenamwahu en nan madamadau ni arail kin kapwaiada arail pwukoa en kalohki “Rongamwahu” en Wehin Koht. Met kin wahdohng irail peren mehlel oh nsenamwahu.—Sohn 4:36.
Mwowe douluhl sang ahn Sises ketido sampah, Pwuhk Sarawi kamehlelehda me pere me pahn poahsoanihada doadoahk en papah Koht. Met sansal ni sounmelkahkao a koulki: “Ngisingiski kana ohng Siohwa, kumwail aramas koaros en sampah. Papah Siohwa ki pereperen. Pwarodo mwowe ki weriwer en peren.” (Melkahka 100:1, 2) Rahnwet, aramas koaros nan wehi kan kin kapinga Siohwa, oh arail kaping kan kin duwehte ngisingis en sounpei me kana nan mahwen. Irail me lelepek ong Koht kin uh mwowe “ki weriwer en peren.” Oh met me konehng pwe Siohwa iei “Koht en peren” me kupwurki sapwellime ladu kan en peren ni arail wia arail inou ong Ih.—1 Timoty 1:11.
Sounkalohk Nsenamwahu kan
Dahme kitail kak sohte pwangahkihda wia doadoahk laud nan atail wasahn kalohk kan, ahpw me e wia—e kin wahdo kansenamwahu ong atail mour? Eri, ong Sises, wia sapwellimen Siohwa doadoahk kin ketihnainihada ih duwehte mwenge (konot). E mahsanih: “Ei kapwaiada kupwuren Ih me ketin poaroneiehdo, oh wiahda sapwellime doadoahk, iei me ei tungoal.”—Sohn 4:34.
Pil duwehte, irail Kristian ngiangih kan nan rahnwet kin perenki arail “kalohki Mahseno.” (2 Timoty 4:2) Connie, lih Kristian men me kin wiahda awa 70 sounpwong ehu nan doadoahk en kalohk, koasoia: “Mwurin ahi kin kalohk, I kin nsenamwahu oh pehm me I wiahda mehkot me pweida mwahu, mehnda ma paliwerei kin pwangada ni imwin rahno.”
Ahpw, iaduwen ma sohte me men rong uhk nan ahmw kalohk? Connie doula oh kawehwehda: “Sohte lipilipil ma aramas rong ie de soh, sohte pak ehu me I koluhkihla ahi iang wia doadoahk en kalohk. Likin ahi wehwehki me Siohwa kin perenki ahi wia sapwellime doadoahk, I pil kin wiahki mehkot kapai ahi kin koasoi padahk mehlel pwe ni ahi kin wia met, koapworopwor kaselel akan me mih nan Paipel kin pwurehng kakehl nan pein ahi mohngiong.”
Sounkalohk kan kin diar me nin doken arail kin sewese meteikan en esehla loalokong pwung duwen Koht, e pil kin kihong irail wehwe mehlel ong pein arail mour. Peinakapw men me ede Meloney kin wiahda awa 50 nan ehuehu sounpwong nan doadoahk en kalohk koasoia: “Kalohk kin kansenamwahuwih kapedei pwehki e kin wiahiong ahi mour en mie katepe oh mie karepen ahi momour. Ahi kahpwal oh pwunod akan kin sohla wia mehkot katapan ni ahi kin iang kalohk.”
Millicent, pil emen Sounkadehdehn Siohwa me wia sounkalohk pwerisek men koasoia: “Kalohk kin kihong kesempwalpen ehuehu rahn me I kin koasoiong aramas teikan duwen sapwellimen Koht koasoandi ong aramas oh kawehwe iaduwen Paradais ah pahn pwurodohng pohn sampah. E kin wiahiong Siohwa en wia mehkot me uhdahn mie nan ahi lamalam ni rahn koaros oh kihong ie meleilei oh peren en nan loalei, mehkot me I sohte kak ale wasa ehu tohrohr.”
Irail me Kin Rong oh Mwekidki Rongamwahu Pahn Nsenamwahu
Mehlel, irail me kin wia sounkalohki Wehin Koht kin ale nan kapehd nsenamwahu sang arail kalohk, oh irail akan me kin rong oh mwekidki arail padahk pil kin ale nsenamwahu. Nan Portugal, edetehn sounpadahk en sukuhl emen alehda kasukuhl rehn irail padire oh lih kadek kan, e kin ahneki pepehm me ah anahn en pali ngehn akan me sohte unsekla. Saikinte emen kak sapeng eh peidek kan me pid duwen Paipel. Ih eri tepida onop Paipel rehn emen Sounkadehdehn Siohwa oh ih eri alehdi marain en Pwuhk Sarawi sang ni ehuehu onop akan. Sounpadahk en sukuhlo inenen perenkihda. E koasoia: “I kin inenen kasikasik Ni Esil koaros—rahn en ahi onop—pwehki ahi peidek koaros kin ale pasapengpe sang nan Paipel.” Rahnwet, lih menet wiahla lidu en Siohwa pwe e inoukihong Siohwa eh mour, oh e kin pil kansenamwahuwih nan kapehd en meteikan pwe e kin padahkiong irail padahk mehlel en Paipel.
E sansal mwahu me Sounkadehdehn Siohwa kan sohte kin toutoukihla laud en arail pwukoa en kalohk oh re pil sohte kin toutoukihla arail wasahn kalohk laud me mih nan sampah pwon me re ahneki. Uhwong kan oh pelian me kin kohwong irail sohte kin kihsang ngenen ngoangki kalohk me mih rehrail. Irail kin ngiangi oh kapwaiada arail pwukoa en kalohkiseli Wehio. Irail kin ehukihong aramas teikan Rongamwahu sohte lipilipil wasa me re tuhwong irail—(1) nan wasahn peidi truck kan nan United States, (2) ni airport en Korea, (3) nan Andes, (4) nan wasahn netinet nan London. Irail iengen Sises nan rahnpwukat kin, ni peren, wia arail pwukoa doadoahk wasa koaros nan sampah. Oh nin duwen me e inoukihong irail, e kin ketikihong irail kamaioupen ngenerail oh pil ngenen irail oko me re kin kalohk ong kan.—Kaudiahl 22:17.