Likih Siohwa Koht me Uhdahn Mie
Miehier pak ke kilangdahn pahn lahng ni pwohng me sohte depwek oh kilang usu kid kid kei? Ke leme re kohsang ie?
SANG meleilei en pwohng, usu kan ni karasaras lokaiahng Nanmwarki Depit en Israel en kawao, oh “kamwekid” ih en ntingihdi: “Lahng kan lohki lingan en Koht; oh doadoahk en nin lime nan wehwe me sansal mwahu.” (Melkahka 19:1, New World Translation) Ei, Sounkapikpatail a kaidehn audepen kepikipik me konehng “ale kaping oh wahu oh manaman.”—Kaudiahl 4:11; Rom 1:25.
Pwuhk Sarawi mahsanih: “Koht—iei Ih me ketin wiahda mehkoaros.” (Ipru 3:4) Koht mehlel, ‘me mware iei Siohwa, iei Ih me lapalap sang mehkoaros nan sampah.’ (Melkahka 83:18, NW) Oh Ih kaidehn mehkot me mihte nan madamadau en aramas. Sises Krais mahsaniheki Seme nanleng: “Ih me ketin kadariehdo uhdahn mie.”—Sohn 7:28, NW.
Siohwa me Kin Kaunsekihala Sapwellime Koasoandi kan
Mwaren Koht, Siohwa, kin pwarada mpen pak 7,000 nan palien Pwuhk Sarawi ni lokaiahn Ipru te. Met kin kasalehda me Koht uhdahn mie. Kawehwehpen mwaren Koht iei met: “E Kahrehong en Wiahla.” Siohwa Koht eri kin kasalehda pein Ih me Ih Sounkaunsekihala sapwellime koasoandi kan. Ni ahn Moses peidek rehn Koht ia mware, Siohwa katehlapa wehwehn mware ni ahl wet: “I pahn kadehdehda ni mehlel dahme I pahn kadehdehda.” (Eksodus 3:14) Kawehwehpen Pwuhk Sarawi me adaneki “Rotherham’s translation” kawehwehda ni mehlel ni a koasoia: “I pahn wiahla dahme I mwahuki.” Siohwa kin kadehdehda ni mehlel, de pilada en wiahda, dahme anahn pwe sapwellime koasoandi kan oh inou kan en pweikihda. Kahrehda, e kin sapwellimaniki mwar tohto kei me duwehte Sounkapikada, Sahm, Kaun Lapalahpie, Silepe, Siohwa en Karis en Sounpei, Sounkaronge kapakap, Sounkopwung, Sounkaweid, Sounpwainda.—Sounkopwung 11:27; Melkahka 23:1; 65:2; 73:28; 89:26; Aiseia 8:13; 30:20; 40:28; 41:14.
Koht mehlel kelepw me konehng en mwareneki Siohwa pwehki aramas sohte kak kamehlelehda ma arail koasoandi kan pahn pweida de soh. (Seims 4:13, 14) Siohwa kelepw kak mahsanih met: “Nin duwen keteu a mweredi, oh pil iangahki sinoh, sang nanleng oh sohte kin pwurala wasao me sohte kadirehla nan pwehl en sampah oh kahrehda wah oh wosada, oh war eri kohieng sounkamwarek war oh pilawa ong me pahn kang, iei duwen ahi mahsen me kin pwilweisang ni sihlangiet a pahn wia. E sohte pahn pwurodohng ie ni sohte pweidahpe, ahpw e uhdahn pahn wiahda dahme I kupwurperenki, oh e uhdahn pahn pweida nin duwen dahme I kadarkihwei.”—Aiseia 55:10, 11.
Siohwa kin ketin wiahda sapwellime koasoandi ni mehlel ni ahl ehu me dahme likamwete sohte kak pohn aramas kin kak reh. Mwuri douluhl ni ahn Eipraam, Aisek, oh Seikop arail mehla, Sises mahsanihki duwen irail mahsanih: “Ih [Siohwa] iei me Koht emen, kaidehn en me mehla, ahpw ong me momour, pwe irail koaros momour ong Ih.” (Luk 20:37, 38) Irail tapwin keinek silimen lelepek pwukat mehlahr, ahpw sapwellimen Koht koasoandi en kaiasirailda inenen wia koasoandi teng ehu me kahrehda ohng Ih kin likamwete re wia momour. Kamourada aramas lelepek pwukat sohte apwal oh e duwehte a ketin kapikada tepin aramaso sang ni pwelen sampah.—Senesis 2:7.
Wahnpoaron Pohl pil kihda ehu mehn karasepe mehlel me Koht kin kahrehiong dahme e ketin koasoanehdi en pweida. Nan Pwuhk Sarawi, Eipraam kin adaneki “semen wehi tohto.” (Rom 4:16, 17) Sangete ahnsou me Eipram sohte nah seri, Siohwa wekidala ede ong Eipraam, me wehwehki: “Semen Pokon Kalaimwun.” Siohwa ketin kapwaiong wehwehn ahdo ni ah kapwurehiong Eipraam oh eh pwoud Sara, ni manaman, kehl en naineki seri.—Ipru 11:11, 12.
Pwehki Sises Krais ah direki manaman oh kehl, e mahsanih sapwellimaniki kamehlele inou kan laudsang ahn aramas. Mendahte ma kompoakepah keren Lasarus mehlahr, Sises mahsanih ong sapwellime tohnpadahk kan: “Kompoakpatail Lasarus meirlahr. A I pahn kolahng pangenda.” (Sohn 11:11) Dahme kahrehda Sises mahsanih me ohl mehla menet wie memeir?
Ni Sises ah lelowohng nan ahn Lasarus kahnimw en Pedani, e kohla ni eh sousou oh ruwese takai me pwain ewen sousouo en kohsang. Mwurin ah kasakas, ni ngihl laud, e ahpw mahsanih: “Lasarus, pedoido!” Oh ni mesen irail oko me mihmi wasao ahr uhlangete sousouo, “ohlo me melahro eri pedoido oh neh kan oh peh kan kidikidpene, oh meseo pil kidikidkipene likou.” Sises eri mahsanih: “Kumwail sapwadada ohlen oh kasaledekala.” (Sohn 11:43, 44) Sises kaiasada Lasarus—kapwurehdohng mour rehn ohl emen me melahr erein rahn pahieu! Krais sohte likamw ni eh mahsanih me kompoakepaho wie memeir. Pwehki ong Siohwa oh Sises, Lasarus me melahr, e kin mih ni irair en meirla. Ehi, Sises oh pil Seme me ketiket nanleng kin ketin doadoahngki dahme mehlel.
Siohwa Kak Kahrehong Soahng kan me Kitail kin Koapworopworki en Pweida
Ia uwen wekpeseng me mie nanpwungen dikedik en koht likamw akan oh Koht me uhdahn mie! Irail me kin kaudokiong dikedik en koht likamw akan kin sapwungala ni arail kin lemehiong me manaman laud kin mih rehn sansal pwukat. Ahpw, mendahki dahme aramas akan kin leme, dikedik en koht likamw pwukat sohte ahneki manaman. Ahpw, Siohwa Koht kak ketin pangeniki sapwellime ladu kan me mehlahr ahnsou werei me irail wie memourte, pwe E ketin kakohng kasapahldo mour ohng irail. “Siohwa iei Koht mehlel” oh E sohte kin ketin pitih sapwellime aramas akan.—Seremaia 10:10.
Ia uwen madamadau kansenamwahu me kin mih rehtail ni atail ese me, ni ahnsou keren, Siohwa ketin kasapahlodo irail me mehlahr oh mihmi nan sapwellime ketemen—kapwurehdohng arail mour! (Wiewia 24:15) Ei, kaiasada kin pid kapwurpwurdohn mwomwen momour en emenemen. Tamataman mwomwen mour en irail me melahr akan oh kaiasirailada sohte wia kahpwal ieu ohng Sounkapikadao, me sapwellimaniki erpit oh kehl poatoapoat. (Sohp 12:13; Aiseia 40:26) Pwehki Siohwa me diren limpoak, e pahn ketin doadoahngki sapwellime mehn ketemen me unsek pwehn kapwurehdo irail me melahr akan ohng mour nan paradais sampah iangahki mwomwen arail mwekid akan me re kin ahneki mwohn arail mehla.—1 Sohn 4:8.
Nin doken ahn Sehdan sampah ah pahn kereniong imwisekla, ahnsou me mih mwohn irail akan me kin likih Koht mehlel kin marain. (Lepin Padahk 2:21, 22; Daniel 2:44; 1 Sohn 5:19) Sounmelkahkao kamehlelehiong kitail mahsanih: “Ahnsou tehkis, a me suwed akan pahn sohrala; . . . ahpw me opampap akan pahn sapwenikihla sampah oh re pahn paiamwahu oh popohl.” (Melkahka 37:10, 11, NW) Kauwehla kosonned oh wiewia lemei pahn wiahla mehn mahs. Kopwungpwung pahn pweida, oh kahpwal en paien wehi pahn solahr wiawi. (Melkahka 37:6; 72:12, 13; Aiseia 65:21-23) Solahr pahn mweimwei en aramas lipilipilki aramas nanpwungen wehi kan, keinek kan oh pwihn en aramas akan. (Wiewia 10:34, 35) Mahwen oh dipwisou en mahwen pahn sohrala. (Melkahka 46:9) Ni ahnsowo, “sohte tohn wasao pahn nda: ‘I soumwahu.’ ” (Aiseia 33:24) Aramas koaros pahn perenki mour unsek oh kehlail. (Kaudiahl 21:3, 4) Paradais nin sampah pahn mehlella. Siohwa me ketin koasoanehdi met!
Ehi, koapworopwor koaros me poahsoanda pohn Paipel pahn mwadangete pweida. Eri, dahme kahrehda kitail me mweidong lingan en sampah en pitihkitaildi ni atail kak likih Siohwa? Iei kupwure en me “soangen aramas koaros en alehda loalokong pwung en padahk mehlel.” (1 Timoty 2:3, 4) Me mwahusang atail en kihong atail ahnsou oh pai kan ohng madamadau likamw en koasoandi wet oh koht likamw akan, kitail en kalaudehla atail loalokongkihla Koht me uhdahn mie oh kihong Ih likilik sang atail mohngiong unsek.—Lepin Padahk 3:1-6; Sohn 17:3.
[Kilel nan Pali 6]
Ohng Siohwa oh Sises, Lasarus memeirte
[Kilels nan Pali 7]
Paradais pahn pweida nan sampah ni ahnsou keren